Yitso 126

“Lɛlɛŋ Nyɔŋmɔ Bi Nɛ”

YESU etsɛko tsɔ yɛ tso lɛ nɔ beni yɛ shwane mli lɛ, duŋ kpii ko wo ŋmɛlɛtswai etɛ yɛ naakpɛɛ gbɛ nɔ. Jeee hulu ni woɔ duŋ kɛ enɛ ba, ejaakɛ enɛɛmɛi baa beni nyɔŋtsere lɛ eje ehee, shi nyɔŋtsere lɛ eye emuu yɛ Hehoo be mli lɛ. Agbɛnɛ hulu ni woɔ duŋ shwane lɛ sɛɛ tsɛɔ minitii fioo ko pɛ. No hewɔ lɛ duŋ lɛ jɛ Nyɔŋmɔ ŋɔɔ! Ekolɛ eha mɛi ni yeɔ Yesu he fɛo lɛ kpa, ni eha ehe fɛo ni amɛyeɔ kɛ jɛmɔi lɛ sɛɛ fo.

Kɛji akɛ naakpɛɛ nii ni woɔ mɔ he gbeyei nɛɛ ba dani efɔŋfeelɔ kome lɛ kã enaanyo lɛ hiɛ ni ebi ni Yesu akai lɛ lɛ, belɛ eeenyɛ efee nɔ ko ni fata etsuitsakemɔ lɛ he. Ekolɛ duŋ nɛɛ mli ni yei ejwɛ lɛ, ni ji, Yesu nyɛ kɛ enyɛmiyoo Salome, Maria Magdalena, kɛ Maria ni ji bɔfo Yakobo Bibioo lɛ nyɛ lɛ bɛŋkɛ sɛŋmɔtso lɛ he lɛ. Yohane, Yesu bɔfo ni esumɔɔ lɛ lɛ fata amɛhe yɛ jɛmɛ.

Kwɛ bɔ ni nii ‘baanyɛ agbu’ Yesu nyɛ tsui mli aha, yɛ be mli ekwɛɔ ebinuu ni elɛ lɛ ni etsɔse lɛ lɛ tsotsoro shi yɛ piŋmɔ mli lɛ! Kɛlɛ, Yesu susuuu lɛ diɛŋtsɛ epiŋmɔ lɛ he, shi enyɛ lɛ hilɛ-kɛhamɔ he. Ekɛ hiɛmiamɔ diɛŋtsɛ kɛ eyitso tsɔɔ Yohane nɔ ni ekɛɛ enyɛ lɛ akɛ: “Awo, naa! Obi nɛ!” Kɛkɛ ni ekɛ eyitso tsɔɔ Maria nɔ ni ekɛɛ Yohane akɛ: “Naa! Onyɛ nɛ!”

No hewɔ lɛ Yesu kɛ enyɛ lɛ kwɛmɔ, ni eka shi faŋŋ akɛ no mli lɛ etsɔ okulafo lɛ, wo ebɔfo ni eyɔɔ suɔmɔ krɛdɛɛ kɛha lɛ lɛ dɛŋ. Efee enɛ ejaakɛ Maria bihii krokomɛi lɛ heko lɛ amɛyeko lolo. No hewɔ lɛ etsɔ enɛ nɔ eto okadi kpakpa ni kɔɔ gbɛjianɔ ni etoɔ ehaa enyɛ mumɔŋ hiamɔ nii ahe lɛ efɔ shi, shi jeee eheloo mli hiamɔ nii pɛ.

Aaafee shwane ŋmɛji etɛ lɛ, Yesu kɛɛ: “Kumai miiye mi.” Kɛkɛ ni Yesu nu he akɛ etamɔ nɔ ni e-Tsɛ lɛ ejie ehebuu kɛjɛ ehe koni aka emuuyeli mli ni ehiɛ lɛ akwɛ kɛyashɛ enaagbee kwraa. No hewɔ lɛ ekɛ gbee wulu bo akɛ: “Mi-Nyɔŋmɔ, mi-Nyɔŋmɔ, mɛɛba okwa mi?” Beni mɛi ni damɔ emasɛi gbɛ lɛ ateŋ mɛi komɛi nu enɛ lɛ, amɛbo akɛ: “Elia, mɔnɛ tsɛɔ nɛɛ.” Amrɔ nɔŋŋ pɛ kɛkɛ ni amɛteŋ mɔ kome jo foi ni eyakɔ ŋshɔŋ-kotsa ni eŋɔtsɔ ashiŋ mli, ni eŋɔ-ma pamplo naa eŋɔha lɛ akɛ enu. Shi mɛi krokomɛi kɛɛ: “Ahi shi! Ha wɔkwɛ akɛ Elia aaaba abajie lɛ lo.”

Beni Yesu he ashiŋ lɛ, ebo akɛ: “Agbe naa!” Hɛɛ, egbe nɔ fɛɛ nɔ ni e-Tsɛ lɛ tsu lɛ akɛ ebatsu yɛ shikpɔŋ nɔ lɛ naa. Yɛ naagbee lɛ ekɛɛ: “Ataa, odɛŋ mituɔ mimumɔ miwoɔ nɛɛ.” No hewɔ lɛ Yesu kɛ ewala hewalɛ lɛ wo Nyɔŋmɔ dɛŋ yɛ hekɛnɔfɔɔ mli akɛ Nyɔŋmɔ kɛbaaha lɛ ekoŋŋ. Kɛkɛ ni ema eyi shi ni egbo.

Beni Yesu mu enaagbee mumɔ lɛ pɛ kɛkɛ ni shikpɔŋhosomɔ ko ni naa wa waa ba, ni egbala tɛsaai. Hosomɔ lɛ naa wa aahu akɛ kaimɔ gbohii abui ni yɔɔ Yerusalem sɛɛ lɛ anaa gbele-gbelei, ni gbohii lɛ koklo kɛbashwie shi. Kɛkɛ ni mɛi ni yaa ni baa ni na bɔ ni gbohii lɛ ahe eje lɛ bote maŋ lɛ mli ni amɛyabɔ amaniɛ.

Kɛfata he lɛ, beni Yesu gbo lɛ pɛ kɛkɛ ni muhɔɔ agbo ni jaa Nyɔŋmɔ sɔlemɔtsu lɛŋ He Krɔŋkrɔŋ lɛ kɛjɛɔ Krɔŋkrɔŋ Fe Fɛɛ lɛ mli lɛ mli gba enyɔ kɛjɛ yiteŋ kɛbayi shi. Eka shi faŋŋ akɛ nɛkɛ muhɔɔ fɛfɛo ni akɛ nibii etara mli nɛɛ kwɔlɛ ji ninetalɔi 60 ni etsii waa hu! Jeee akɛ naakpɛɛ nii ni faa mɔ tsui nɛɛ jieɔ Nyɔŋmɔ mlifu ni ete shi ewo mɛi ni gbe E-Bi lɛ kpo kɛkɛ, shi etsɔɔ akɛ hegbɛ ni kɛ mɔ yaa Krɔŋkrɔŋ Fe Fɛɛ, ni ji ŋwɛi diɛŋtsɛ lɛ eba agbɛnɛ, yɛ Yesu gbele lɛ hewɔ.

Beni gbɔmɛi nu shikpɔŋhosomɔ lɛ he ni amɛna nibii ni yaa nɔ lɛ, amɛshe gbeyei naakpa. Asraafonyo nukpa ni kwɛ esɛŋmɔ lɛ nɔ lɛ wo Nyɔŋmɔ hiɛ nyam. Ebo akɛ: “Lɛlɛŋ, Nyɔŋmɔ Bi nɛ!” Ekolɛ eyɛ jɛmɛ ni awie Nyɔŋmɔ bi ni Yesu ji lɛ he yɛ beni ayeɔ esane yɛ Pilato hiɛ lɛ. Ni agbɛnɛ ehe eye akɛ Nyɔŋmɔ Bi ji Yesu, hɛɛ, akɛ lɛ ji nuu ni fe hii fɛɛ ni ehi shi lɛ.

Naakpɛɛ nibii nɛɛ na mɛi krokomɛi hu nɔ hewalɛ, kɛkɛ ni amɛku amɛsɛɛ akɛ amɛaaya shia ni amɛmiishimɔ amɛtsitsi akɛ awerɛho babaoo ni amɛyeɔ kɛ amɛhiɛgbele lɛ he okadi. Mɛi ni damɔ sɛɛ flɛŋŋ ni amɛkwɛɔ nɔ ni yaa nɔ lɛ hu ji yei babaoo ni ji Yesu kaselɔi ni nibii ni yaa nɔ nɛɛ ena amɛnɔ hewalɛ babaoo lɛ. Bɔfo Yohane hu yɛ jɛmɛ. Mateo 27:45-56; Marko 15:33-41; Luka 23:44-49; 2:34, 35; Yohane 19:25-30.

▪ Mɛni hewɔ duŋ ni wo ŋmɛlɛtswai etɛ lɛ jeee hulu hiɛ ni wo duŋ kɛkɛ lɛ?

▪ Mɛɛ nɔkwɛmɔ nɔ kpakpa Yesu fee kɛha mɛi ni yɔɔ fɔlɔi ni amɛdara lɛ, beni eshwɛ fioo ni ebaagbo lɛ?

▪ Mɛni ji Yesu naagbee wiemɔi ejwɛ ni ewie dani egbo lɛ?

▪ Mɛni shikpɔŋhosomɔ lɛ tsu, ni sɔlemɔtsu lɛŋ muhɔɔ lɛ ni mli gba enyɔ lɛ tsɔɔ mɛni?

▪ Te naakpɛɛ nibii ni tee nɔ lɛ sa asraafoi onukpa ni kwɛɔ esɛŋmɔ lɛ nɔ lɛ he eha tɛŋŋ?