Kristofoi Kɛ Afii Akpe Hiɛnɔkamɔ Lɛ
“Ha omaŋtsɛyeli lɛ aba. Ha afee osuɔmɔnaa nii yɛ shikpɔŋ nɔ hu, taakɛ afeɔ yɛ ŋwɛi lɛ.”—Mat. 6:10, NW.
1. (a) Te Kristendom wieɔ afii akpe hiɛnɔkamɔ lɛ he ehaa tɛɛŋ? (b) Mɛni hewɔ enɛ gbaaa Yehowa Odasefoi anaa lɛ?
1 ROMA Katolek Sɔlemɔ lɛ kɛ agbɛnɛ Protestant jamɔi wuji ni yɔɔ lɛ etsiii afii aakpe hiɛnɔkamɔ lɛ ta amɛtsɔɔɔ sɔlemɔyalɔi. Amɛkɛ heguɔgbee wieɔ nakai hiɛnɔkamɔ lɛ he akɛ “millennialism” (afii akpe hemɔkɛyeli) , kɛ mɛi ni naa mli gbɛfaŋnɔ lɛ akɛ “millenarians” (afii akpe heyelilɔi) . Shi Yehowa Odasefoi ahiɛ gbooo tsɔɔmɔ nɛɛ he, ejaakɛ yinɔsane mli anɔkwalei ni anyɛŋ aje he ŋwane tsɔɔ akɛ klɛŋklɛŋ Kristofoi lɛ yɛ nɛkɛ afii akpe he hiɛnɔkamɔ nɛɛ.
ATSƐ KRISTOFOI LƐ AKƐ “MILLENARIANS”
2. Mɛni ji nɔ ni Encyclopaediai sɔrɔtoi enyɔ wie yɛ afii akpe lɛ he hiɛnɔkamɔ ni yɔɔ klɛŋklɛŋ Kristofoi lɛ ateŋ lɛ he?
2 Be mli ni ewieɔ Kristofoi ni heɔ Kristo nɔyeli afii 1,000 lɛ amɛyeɔ lɛ ahe lɛ, Encyclopedia Americana lɛ kɛɛ akɛ: “Atsɛɔ mɛi ni hiɛ jwɛŋmɔ ni tamɔ nɛkɛ lɛ̀ akɛ millenarians loo chiliasts kɛ amɛtsɔɔmɔ lɛ hu akɛ chiliasm (Hela chilioi, 1,000) Aheɔ ayeɔ yɛ he fɛɛ he akɛ kɛ hoo kwraa lɛ jwɛŋmɔ nɛɛ ji nɔ ni ele jogbaŋŋ yɛ blema sɔlemɔ lɛ mli.” French Encyclopedia Universalis lɛ kɛɔ wɔ akɛ: “Afii akpe he tsɔɔmɔ lɛ he shi waa yɛ Yudafoi kɛ Kristofoi lɛ ateŋ yɛ Anaigbɛ Kristendom yɛ klɛŋklɛŋ afii ohai etɛ lɛ mli. Afii akpe he tsɔɔmɔ lɛ ji nɔ ni ehe shi waa yɛ klɛŋklɛŋ ‘afii ohai ni Kristojamɔ kɛhi shi lɛ mli.”
3, 4. (a) Mɛni yɔɔ ni tsɔɔ akɛ ehe ehiaaa ni Kristofoi lɛ amɛ Kpojiemɔ lɛ dani amɛna afii akpe Iɛ he hiɛnɔkamɔi? (b) Mɛni ji nɔ ni mɛi komɛi baakɛɛ yɛ afii ekpe Iɛ he hiɛnɔkamɔ lɛ he?
3 Odaseyeli yɛ ni tsɔɔ akɛ Kristofoi lɛ yɛ hiɛnɔkamɔi ni kɔɔ Kristo nɔyeli afii 1,000 lɛ he po dani bɔfo Yohane nine shɛ Kpojiemɔ lɛ nɔ yɛ Ŋ.B. klɛŋklɛŋ afii oha lɛ naagbee. Gbalɔi ni ji Yudafoi lɛ aniŋmaai akanemɔ haa wɔleɔ akɛ amɛtsɔ hiɛ amɛná afii akpe ni yɔɔ naakpɛɛ lɛ he ninaa yɛ hiɛnɔkamɔ ni Kristo kɛha yɛ Kpojiemɔ yitsei 20 kɛ 21 lɛ mli. Nɔ ni yɔɔ miishɛɛ ji akɛ, Encyclopedia Britannica (1966 nɔ̃) lɛ maa enɛ nɔ mi, akɛ: “Afii akpe lɛ he jwɛŋmɔ ni klɛŋklɛŋ Kristofoi lɛ na lɛ jɛ Yudafoi ajeŋ naagbee he tsɔɔmɔi ni amɛkpaa no gbɛ lɛ mli titri [gbɛkpamɔi ni kɔɔ adesai kɛ je Iɛ naagbee he].” New Encyclopedia Britannica (1977) lɛ ni hiɛ kpoi 30 lɛ yɛ nɔ ko kɛɛmɔ yɛ nɛkɛ sane nɛɛ nɔŋŋ he: “Yɛ Kpojiemɔ Wolo lɛ mli lɛ, Yudafoi ajeŋ naagbee ni baa yɛ nɔkpɛlɛmɔ kɛ shishinumɔ [efɔŋ hiɛkpatamɔ ni baa ni akpaa gbɛ kɛ kunim ni ekpakpa baaye] kɛba Kristojamɔ lɛ bafee nɔ ni agbe naa. . . . Yɛ Kristofoi ayinɔsane klɛŋklɛŋ afii oha lɛ mli lɛ [33-133 Ŋ.B.], nɛkɛ milianarianism loo chiliasm (ni jɛ Hela wiemɔ kɛha 1,000 mli lɛ) , ji nɔ ni atsɔɔ ni akpɛlɛ nɔ yɛ sɔlemɔ lɛ mli.”—Niŋmaa,ni atsɔmɔ lɛ ji wɔnɔ̃.
4 Shi mɛi komɛi baaha hetoo oya akɛ: ‘Ekolɛ nɛkɛ afii akpe hiɛnɔkamɔ ni klɛŋklɛŋ Kristofoi lɛ yɔɔ lɛ kɔɔɔ shikpɔŋ lɛ he. Eji ŋwɛi hiɛnɔkamɔ. Shi kɛ lɛ, mɛni ji nɔ ni yinɔsane mli anɔkwalei kɛ Biblia lɛ tsɔɔ? Nyɛhaa wɔkwɛa.
SHIKPƆŊ NƆ PARADEISO TEE NƆ EFEE NƆ NI HIƐ KA NƆ
5, 6. Taakɛ woji sɔrɔtoi ni kɛ hewalɛ wieɔ lɛ tsɔɔ lɛ, mɛni ji jwɛŋmɔ ni klɛŋklɛŋ afii oha lɛ mli Kristofoi lɛ hiɛ?
5 Odaseyelii babaoo yɛ ni tsɔɔ akɛ klɛŋklɛŋ Kristofoi,lɛ susuuu akɛ gbalɛi kɛ shiwooi lɛ fɛɛ ni yɔɔ Hebri Ŋmalɛi lɛ amli ni kɔɔ shikpɔŋ nɔ paradeiso ni aaaku sɛɛ akɛba lɛ he lɛ ji nɔ ko ni afo mli yɛ Mesia lɛ loo Kristo lɛ baa lɛ hewɔ. Dictionnaire de Theologie Catholique lɛ diɛŋtsɛ kpɛlɛɔ nɔ akɛ: “Afii akpe he tsɔɔmɔ lɛ shishijee yaa shɔŋŋ kɛtekeɔ Kristofoi abe lɛ. Hemɔkɛyeli ni ayɔɔ yɛ maŋtsɛ ni Mesia lɛ baaye yɛ shikpɔŋ nɔ lɛ ná eshishijee yɛ Israel hiɛnɔkamɔi amli.”
6 Yinɔsaneŋmalɔ Kenneth Scott Latourette kɛɛ yɛ wolo ni ji A History of Christianity lɛ mli yɛ klɛŋklɛŋ Kristofoi ni kpaa Kristo baa ni ji enyɔ lɛ gbɛ lɛ ahe akɛ: “Mɛi pii hiɛ jwɛŋmɔ lɛ akɛ dani yinɔsane aaaba naagbee kwraa ni Nyɔŋmɔ yiŋtoo ni kɔɔ E-suɔmɔnaa nii ni yeɔ emuu he lɛ aaaba mli kwraa, hiɛnɔkamɔ ni Kristofoi fɛɛ le lɛ, Kristo baaku esɛɛ aba, ni ebato emaŋtsɛyeli lɛ ema shikpɔŋ nɔ ni eye anɔ afii akpe. Afii loo afii akpe be sɛɛ jɛkɛmɔ he jwɛŋmɔ lɛ jeee nɔ ni anaa yɛ Kristofoi ateŋ pɛ, shi moŋ anaa yɛ Yudajamɔ hu mli.”
7. Mɛni tsɔɔ akɛ klɛŋklɛŋ Kristofoi lɛ kɛ paradeiso futuuu ŋwɛi?
7 No hewɔ lɛ, odaseyelii babaoo yɛ ni abua naa akɛ klɛŋklɛŋ Kristofoi lɛ ji “millenarians” (afii akpe heyelilɔi) , akɛni akɛ nakai gbɛi lɛ tsɛ mɛi ni hiɛ ka Kristo loo Mesia lɛ nɔyeli afii 1,000 lɛ nɔ lɛ hewɔ. Yesu ejie le kpo akɛ ebaaye nɔ kɛjɛ ŋwɛi shi efiteee shishijee Mesia he hiɛnɔkamɔ ni Yudafoi lɛ yɔɔ, paradeiso ni aaaku sɛɛ akɛba shikpɔŋ nɔ yɛ nakai afii akpe lɛ mli lɛ. Nɔ ni yɔɔ miishɛɛ ji akɛ, Katolek Supplement au Dictionire de la Bible Iɛ kpɛlɛɔ nɔ akɛ “yɛ Yudafoi eniŋmaai amli, taakɛ eji yɛ klɛŋklɛŋ Kristofoi awoji amli lɛ, akɛ wiemɔ paradeiso lɛ tsuuu nii akɛtooo ŋwɛi he.”—Niŋmaai ni atsɔmɔ lɛ ji wɔnɔ.
KRISTO FITEEE AFII AKPE HIƐNƆKAMƆ LƐ
8. (a) Yesu baa lɛ maa mɛni nɔ mi? (b) Mɛɛ gbɛ nɔ Ŋmalɛi lɛ tsɔɔ yɛ akɛ abaato paradeiso ama lɛ nɔ ekoŋŋ?
8 Yesu wie yɛ e-Gɔŋ nɔ Shiɛmɔ ni ehe gbɛi lɛ mli akɛ: “Nyɛkasusua akɛ miba Mla lɛ loo Gbalɔi lɛ afitemɔ. Miba, jeee ni mibafite, shi koni maha eba mli.” (Mat. 5:17, NW) Aloo, taakɛ Today’s English Version Biblia lɛ tsɔɔ naagbee wiemɔ lɛ shishi lɛ: “Mibaaa ni mibajie kɛya, shi ni maha amɛtsɔɔmɔi lɛ aba mli anɔkwale.” Akɛni Yesu ba koni ebaha gbalɔi lɛ atsɔɔmɔi aba mli anɔkwale hewɔ lɛ, ehaa lɛ maa nɔ mi akɛ amɛgbalɛi ni kɔɔ paradeiso ni aaaku sɛɛ ato ama shikpɔŋ nɔ ekoŋŋ lɛ he lɛ baaba mli. Emli fioo ko nɛ: Lala 37:11, 29; 72:1-8, 16-19; 115:16; Yesaia 9:6, 7; 11:1-10; 45:18; Daniel 2:34, 35, 44; 7:14, 14.
9. Yɛ mɛɛ gbɛ nɛ Nɔkwɛmɔ Sɔlemɔ lɛ haa Maŋtsɛyeli lɛ kɔɔ afii akpe hiɛnɔkamɔ lɛ he?
9 Agbɛnɛ Yesu tsɔɔ yɛ Gɔŋ nɔ Shiɛmɔ lɛ mli faŋŋ akɛ shikpɔŋ lɛ baatsu egbɛfaŋnɔ yɛ ŋwɛi suɔmɔnaa nii aloo yiŋtoo lɛ he nitsumɔ mli. Etsɔɔ esɛɛnyiɛlɔi lɛ ni amɛsɔle akɛ: “Wɔ Tsɛ ni yɔɔ ŋwɛi, ha ogbɛi lɛ he atse. Ha omaŋtsɛyeli lɛ aba. Ha afee nɔ ni osumɔɔ yɛ shikpɔŋ nɔ hu, taakɛ afeɔ yɛ ŋwɛi lɛ.” (Mat. 6:9, 10, NW) Eha Nyɔŋmɔ suɔmɔnaa nii ni aaafee yɛ shikpɔŋ lɛ nɔ lɛ kɔ Nyɔŋmɔ maŋtsɛyeli lɛ he, ni enɛ jeee eko kwraa fe Mesia maŋtsɛyeli lɛ. No hewɔ lɛ, Nuntsɔ lɛ Sɔlemɔ, ni Katolekbii kɛ Protestantbii eti mli shii akpekpei abɔ yɛ afii ohai abɔ lɛ fɛɛ mli lɛ ji sɔlemɔ kɛha Mesia lɛ shiwooi ni kɔɔ afii akpe hiɛnɔkamɔ lɛ he lɛ mlibaa yɛ anɔkwale mli.
AJIE AFII AKPE HIƐNƆKAMƆ LƐ KPO FAŊŊ
10. (a) Mɛɛ be ni yɛ mɛɛ gbɛ nɔ Yesu jie afii akpe hiɛnɔkamɔ lɛ kpo faŋŋ? Mɛɛ emlitsɔɔmɔ ni haa mɔ tsui nyaa ekɛha?
10 Beni Romabii lɛ kpata Yerusalem hiɛ yɛ afi 70 Ŋ.B. (ni kɛ Yudafoi ahiɛnɔkamɔi ni kɔɔ amɛmaŋ lɛ kpɔmɔ kɛtsɔ maŋkwramɔŋ Mesia ko nɔ lɛ ba naagbee) lɛ sɛɛ afii nyɔŋmai enyɔ kɛ enumɔ lɛ, Yesu, anɔkwale Mesia lɛ, jie anɔkwale afii akpe hiɛnɔkamɔ lɛ kpo faŋŋ. Bɔfo Yohane ŋma yɛ Kpojiemɔ ni enine shɛ nɔ kɛjɛ Nyɔŋmɔ ŋɔɔ kɛtsɔ Yesu Kristo nɔ lɛ he sane efɔ shi akɛ:
“Ni minu bɔfo ko miikpelekeshi kɛmiijɛ ŋwɛi, ni ehiɛ bu kwɔŋkwɔŋ lɛ naa saamfe kɛ kɔsɔŋkɔsɔ kpeteŋkpele ko yɛ edɛŋ. Ni emɔ drako lɛ, blema onufu lɛ mi ji diabolo (Abonsam) kɛ Satan lɛ ni efi lɛ afii akpe. . . .
“Ni mina maŋtsɛsɛi,—ni amɛho amɛtara nɔ, ni aŋɔ kojomɔ aha amɛ. . . . Mɔ ni ajɔɔ kɛ mɔ krɔŋkrɔŋ ji mɔ ni aaana gbɛnaa yɛ klɛŋklɛŋ shitee lɛ mli lɛ; gbele ni ji enyɔ lɛ bɛ Hewalɛ ko yɛ nakai mɛi lɛ anɔ; shi moŋ amɛaatsɔmɔ Nyɔŋmɔ kɛ Kristo osɔfoi, ni amɛkɛ lɛ aaaye maŋtsɛ afii akpe.
“Ni mina ŋwɛi hee kɛ shikpɔŋ hee; . . . ni minu gbee kpeteŋkpele ko jɛ maŋtsɛsɛi lɛ mli kɛɛ: Naa, Nyɔŋmɔ buu lɛ yɛ gbɔmɛi ateŋ, ni eeeshi ebuu lɛ yɛ amɛteŋ, . . . Ni Nyɔŋmɔ aaatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ; ejaakɛ tsutsu nii lɛ eho etee.”—Kpoj. 20:1-6; 21:1-4.
ATSƆƆ “TEEMƆŊ SANE KRƆŊKRƆŊ” LƐ MLI
11. Yɛ mɛɛ gbɛ nɔ afii akpe hiɛnɔkamɔ ni Yesu jie lɛ kpo lɛ kɛ shishijee Mesia lɛ he hiɛnɔkamɔ ni Yudafoi lɛ yɔɔ lɛ kpaa gbee?
11 Ani onaa akɛ bɔni atsɔɔ Kristo nɔyeli afii akpe lɛ mli aha lɛ kɛ shishijee Yudafoi a-Mesia he hiɛnɔkamɔ,’ “Mesia kpakpa ko he hiɛnɔkamɔ ni baaba wɔsɛɛ . . . paradeiso toiŋjɔlɛ mli yinɔ kpakpa . . . jeŋ ni toiŋjɔlɛ kɛ gbee kpamɔ ni yeɔ emuu yɔɔ bɔɔnii fɛɛ ateŋ . . . ’ŋwɛi hee kɛ shikpɔŋ hee’ lɛ je amɛhe ha waa yɛ be mli ni wɔŋɔɔ The Jewish Encyclopediaa lɛ ekoŋŋ wɔkɛ-tsuɔ nii lɛ?
12, 13. Mɛni tsɔɔ akɛ Yesu kaselɔi Iɛ miikpa Mesia lɛ shikpɔŋ nɔ nɔyeli gbɛ lolo?
12 Shi ŋwanejee ko kwraa bɛ he akɛ saji ni he hiaa yɛ ni kɔɔ Mesia maŋtsɛyeli lɛ he ni Yudafoi lɛ nuuu shishi, ni eshishinumɔ wa po kɛha bɔfoi 12 lɛ kɛ klɛŋklɛŋ Kristo kaselɔi krokomɛi lɛ. Beni eha e-Gɔŋ nɔ Shiɛmɔ ni emli otsɔɔ ekaselɔi lɛ ni amɛsɔle ni Nyɔŋmɔ maŋtsɛyeli lɛ aba ni afee Nyɔŋmɔ suɔmɔnaa nii yɛ shikpɔŋ nɔ, taakɛ afeɔ yɛ ŋwɛi lɛ sɛɛ lɛ, Yesu kɛɛ ekaselɔi lɛ akɛ: “Nyɛ lɛ aŋɔ Nyɔŋmɔ maŋtsɛyeli lɛ he teemɔŋ sane krɔŋkrɔŋ lɛ ahanyɛ akɛ nyɛle, shi mɛi ni yɔɔ sɛɛ lɛ, abɛbuai amli akɛ amɛ aaawie nii fɛɛ.”—Mar. 4:11, NW.
13 Yesu tsɔɔ ekaselɔi lɛ nibii pii ni kɔɔ Mesia maŋtsɛyeli lɛ he yɛ eshikpɔŋ nɔ sɔɔmɔ nitsumɔ be lɛ fɛɛ mli. Yɛ anɔkwale mli lɛ, yɛ egbele sɛɛ po, kɛ agbɛnɛ kɛyashi be mli ni ekwɔ kɛtee eŋwɛi Tsɛ lɛ ŋɔɔ lɛ etee nɔ “ekɛ amɛ awie Nyɔŋmɔ maŋtsɛyeli lɛ he.” Shi kɛlɛ, yɛ enɛɛmɛi fɛɛ sɛɛ lɛ, naagbee sane ni amɛbi lɛ ji akɛ: Nuntsɔ, ani nɛkɛ be nɛɛ mli obaatee maŋtsɛyeli lɛ shi oma shi oha Israel lɛ?”, ni enɛ jie amɛ kpo akɛ amɛkahe amɛmiikpa gbɛ akɛ Mesia lɛ baato heloo naa Israel maŋtsɛyeli lɛ ema shi. (Bɔf. 1:3, 6) Ákɛ amɛsusuɔ akɛ Mesia maŋtsɛyeli lɛ kɔɔ nɔyeli, maŋtsɛyeli he lɛ ja, shi amɛtɔ yɛ susumɔ ni amɛsusu akɛ Mesia lɛ baaye nɔ yɛ shikpɔŋ nɔ ni akɛ enɔyeli lɛ baafee Yudafoi anɔ̃ sɔŋŋ lɛ mli.
14. (a) Mɛni ye bua Kristo kaselɔi lɛ ni amɛye amɛhe kɛjɛ amɛhiɛnɔkamɔ ni tɔmɔ yɔɔ he lɛ mli? (b) Mɛɛ “teemɔŋ sane krɔŋkrɔŋ” lɛ he nibii ni he hiaa klɛŋklɛŋ Kristofoi lɛ banu shishi fiofio?
14 Mumɔ krɔŋkrɔŋ lɛ fɔsemɔ kɛ shishwiemɔ yɛ Pentekoste sɛɛ dani Kristo kaselɔi lɛ ye amɛhe kɛjɛ Mesia maŋtsɛyeli ni ji amɛmaŋ lɛ pɛ nɔ̃ he ni amɛje shishi amɛsusu “Nyɔŋmɔ maŋtsɛyeli lɛ he teemɔŋ sane krɔŋkrɔŋ” lɛ he nibii hee ni he hiaa lɛ ahe. Nɔ kome ni kɔɔ nakai “teemɔŋ sane krɔŋkrɔŋ” lɛ he ji akɛ Mesia lɛ baafee ŋwɛi maŋtsɛ, ni ákɛ enɔyeli lɛ baahi ŋwɛi. (Yoh. 18:36; Bɔf. 2:32-36; 1 Tim. 3:16) Nakai “teemɔŋ sane krɔŋkrɔŋ” lɛ he nibii krokomɛi—anɔkwalei heei kɛ nɔ ni tsakeɔ saji ahiɛ kɛha Yudafoi anɔkwafoi ajwɛŋmɔ ni Ŋmalɛi lɛ kudɔɔ shi jeee Hela jeŋnilee-ji akɛ, abaahala adesai ateŋ mɛi ayibɔ fioo akɛ “mɛi krɔŋkrɔŋi” ni amɛbafee Mesia lɛ hefatalɔi yɛ maŋtsɛyeli lɛ mli, ni ákɛ mɛnɛɛmɛi kɛ lɛ baaye maŋtsɛ yɛ ŋwɛi, ni ákɛ jeee Yudafoi lɛ ateŋ pɛ abaahala amɛ kɛjɛ, shi moŋ kɛaajɛ Jeŋmajiaŋbii aloo mɛi ni jeee Yudafoi lɛ ateŋ hu.—Dan. 7:13, 14, 27; Luka 12:32; 22:28-30; Yoh. 14:1-3; Efe. 3:36; Kol. 1:26, 27.
HIƐNƆKAMƆ HEE NI TSAKEƆ SAJI AHIƐ KWRAA
15. Mɛni hewɔ ni jwɛŋmɔ akɛ aaya ŋwɛi lɛ ji tsakemɔ hee ko kwraa kɛha Yudafoi shwɛɛnii anɔkwafoi lɛ?
15 Enɛɛmɛi fɛɛ ji nɔ ko hee kwraa. Taakɛ bɔni wɔtsɔ hiɛ wɔna momo yɛ sane ni ji “Afii Akpe Hiɛnɔkamɔ lɛ Shishijee” lɛ mli lɛ, Yudafoi lɛ ashishijee Mesia lɛ he hiɛnɔkamɔ ji shikpɔŋ nɔ hiɛnɔkamɔ, ni apasa jamɔ blemasaji kɛ jeŋnilee ni na amɛnɔ hewalɛ lɛ pɛ ha amɛteŋ mɛi komɛi bahe ye akɛ susuma ni gbooo ko yɛ, yɛ sɛɛ mli yɛ amɛblema yinɔsane mli. Eka shi faŋŋ akɛ Yudafoi anɔkwafoi ni ji shwɛɛnii ni kɛ amɛhe kpɛtɛ mumɔ naa Hebri Ŋmalɛi lɛ ahe ni amɛkpɛlɛ Yesu nɔ akɛ anɔkwa Mesia lɛ heee susuma ni hɔ mɔ mli ni gbooo lɛ amɛyeee. No hewɔ lɛ Mesia ni baaye shikpɔŋ lɛ nɔ kɛjɛ ŋwɛi ni amɛbu amɛbaatsɔmɔ ehe fatalɔi nɔyelɔi yɛ ŋwɛi lɛ ji tsakemɔ hee kwraa ni eba.
16. Mɛni ji nɔ ni Petro ŋma yɛ nɛkɛ hiɛnɔkamɔ hee ni kɛ tsakemɔ kwraa baa nɛɛ he?
16 Bɔfo Petro ŋma wolo ko eyaha klɛŋklɛŋ Kristofoi lɛ ni nine eshɛ nɛkɛ tsɛmɔ krɛdɛɛ nɛɛ nɔ ni amɛkɛ ŋwɛi Mesia lɛ abafee osɔfoi kɛ maŋtsɛmɛi lɛ akɛ: “‘Ajɔɔ Nyɔŋmɔ kɛ wɔ-Nuntsɔ Yesu Kristo tsɛ lɛ, mɔ ni fɔ wɔ ehee yɛ lɛ diɛŋtsɛ emɔbɔnalɛ babaoo lɛ naa, eha wala hiɛnɔkamɔ yɛ Yesu Kristo shi ni etee kɛjɛ gbohii ateŋ lɛ hewɔ, eha gboshinii ni fiteɔ ni he bɛ kpa ho ni ekwa ni aŋɔto yɛ ŋwɛi aha nyɛ. . . . Shi nyɛ lɛ, weku ni ahala ji nyɛ, maŋtsɛ. mɛi ni yeɔ osɔfoi.”—1 Pet. 1:3, 4; 2:9.
17. Mɛɛ gbɛ nɔ Paulo tsɔɔ yɛ akɛ tsɛmɔ kɛmiiha wala yɛ ŋwɛi lɛ ji nɔ ko hee?
17 Bɔfo Paulo hu ŋma yɛ nɛkɛ tsɛmɔ kɛha ŋwɛi wala ni yɔɔ sɔrɔto nɛɛ he akɛ: “Ehere wɔyiwala ni ekɛ tsɛmɔ krɔŋkrɔŋ tsɛ wɔ . . . ni agbɛnɛ atsɔ wɔyiwalaherelɔ Yesu Kristo puemɔ lɛ nɔ ajie lɛ shi faŋŋ; lɛ efo gbele sɛɛ ni ejie wala kɛ naanɔ shishilɛ kpo etsɔɔ wɔ yɛ sanekpakpa lɛŋ.” (2 Tim. 1:9, 10) Eji wala yɛ ŋwɛi efee shwɛɛnii anɔkwafoi ni yɔɔ Yudafoi lɛ ateŋ lɛ ahiɛnɔkamɔ kulɛ, mɛni hewɔ Kristo “jie wala kɛ naanɔ shihilɛ kpo” yɛ nɛkɛ “tsɛmɔ krɔŋkrɔŋ” ni kɛ mɔ yaa shihilɛ ni fitemɔ bɛ mli nɛɛ mli? Dabi, eka shi faŋŋ akɛ nɛkɛ tsɛmɔ kɛmiiya wala mli yɛ ŋwɛi nɛɛ ji nɔ ko hee kwraa kɛha nɛkɛ klɛŋklɛŋ Kristofoi ni ahala amɛ kɛjɛ Yudafoi kɛ Jeŋmajiaŋbii lɛ ateŋ lɛ.
ŊWƐI HIƐNƆKAMƆ KƐHA “MƐI NI HALA AMƐ” LƐ AYIBƆ KO NI AFO HE HUSU
18, 19. Tsɔɔmɔ bɔni Paulo wolo ni ji enyɔ ni eŋma eyaha Timoteo kɛ Petro klɛŋklɛŋ wolo lɛ tsɔɔ akɛ jeee mɛi fɛɛ ni hiɛ ka nɔ akɛ amɛbaahi shi kɛya naanɔ lɛ kɛ Kristo baafee maŋtsɛmɛi kɛ osɔfoi yɛ ŋwɛi. (Kpoj. 5:9, 10)
18 Shi ani mɛi fɛɛ ni kpɛlɛɔ Kristo nɔ ni amɛhiɛ ka nɔ akɛ amɛbaahi shi kɛya naanɔ lɛ anine shɛɔ nɛkɛ “tsɛmɔ krɔŋkrɔŋ” ni kɛ mɔ yaa shihilɛ ni fitemɔ bɛ mli yɛ ŋwɛi lɛ nɔ? Be mli ni etsɔɔ akɛ nɛkɛ tsɛmɔ krɛdɛɛ nɛɛ yɛ kɛha gbɔmɛi akuu ko ni afo amɛyibɔ he husu loo ‘ahala amɛ’ lɛ (Authorised Version) aloo “‘mɛi ni ahala amɛ lɛ,” Paulo kɛfata he akɛ: “Enɛ hewɔ lɛ mimiaa mihiɛ yɛ saji fɛɛ mli yɛ mɛi ni ahala amɛ lɛ hewɔ, koni amɛhu amɛnine ashɛ walaheremɔ ni yɔɔ Kristo Yesu mli lɛ kɛ naanɔ anunyam lɛ nɔ. Anɔkwa wiemɔ nɛ: Ejaakɛ kɛ wɔkɛ lɛ gbo lɛ, wɔkɛ lɛ aaaná wala hu, kɛ wɔmia wɔhiɛ yɛ amanehulu mli lɛ, wɔkɛ lɛ awaje maŋtsɛ hu.”—2 Tim. 2:10-12.
19 Kɛji akɛ atsɛɔ mɛi fɛɛ ni ahereɔ amɛ yiwala lɛ kɛyaa “naanɔ anunyam” mli beni afee ni ‘amɛkɛ Kristo Yesu aye maŋtsɛ hu’ lɛ, bɛlɛ namɛi anɔ maŋtsɛ amɛbaaye lɛ? Ní kɛji akɛ amɛfɛɛ amɛbaatsɔmɔ “maŋtsɛmɛi ni yeɔ osɔfoi” lɛ“, belɛ amɛbaatsu nii akɛ maŋtsɛmɛi ni yeɔ osɔfoi amɛha namɛi?
20. Yɛ mɛɛ gbɛ nɔ Paulo wolo ni eŋma eyaha Galatabii lɛ kɛ Romabii lɛ tsɔɔ akɛ ajo mumɔŋ Israelbii lɛ ayibɔ lɛ he husu?
20 Susumɔ nɔ ni nyiɛ sɛɛ nɛɛ ahe: Paulo kɛɛ Kristofoi ni ahala amɛ kɛjɛ Yudafoi kɛ mɛi ni jeee Yudafoi lɛ ateŋ yɛ ewolo ni eŋma eyaha Galatabii lɛ mli akɛ “abaptisinyɛ awo Kristo mli” ni akɛ “Abraham seshibii ji nyɛ, kɛ gboshiniyelɔi hu yɛ shiwoo lɛ naa,” ni etsɛ amɛ “Nyɔŋmɔ Israel lɛ.” (Gal. 3:26-29; 6:16) Ní yɛ ewolo ni eŋma eyaha Romabii lɛ mli lɛ, nɛkɛ bɔfo Paulo nɛɛ nɔŋŋ wie “teemɔŋ sane krɔŋkrɔŋ” ni kɔɔ mɛi ni jeee Yudafoi ni Nyɔŋmɔ tsɛ amɛ ‘yɛ he ni Yudafoi lɛ ateŋ mɛi babaoo heee yeee’ lɛ hewɔ ni ekɛfata he akɛ —sane titri ni yɔɔ enɛ mli nɛ “kɛyashi beyinɔ ni jeŋmaji lɛ ayifalɛ [“yibɔ ni gbeɔ naa,” TEV] lɛ aaaba mli.” Etsɔɔ mli akɛ “ni no dani,” ni ji akɛ, kɛtsɔ Jeŋmajiaŋbii ni atsɛ amɛ koni amɛha yibɔ ni ataoɔ lɛ aye emuu lɛ nɔ aaatsɔ “ahere Israel fɛɛ yiwala.” Eka shi faŋŋ akɛ enɛ kɔɔ mumɔŋ Israel he, “mɛi ni ahala amɛ” kɛjɛ Yudafoi kɛ mɛi ni jeee Yudafoi lɛ ateŋ, ni ji “‘Israel’ diɛŋtsɛ” aloo “anɔkwale Israel.” lɛ.—Rom. 11:7, 17-26; 9:6 (The New English Bible) 2:28, 29.
21. (a) Mumɔŋ Israelbii enyiɛ yɔɔ? (b) Mɛɛ ŋmalɛ yɔɔ ni tsɔɔ akɛ abalaaa amɛ kɛjɛɛɛ ŋwɛibɔfoi lɛ ateŋ?
21 Akɛni mɛi ni jeee Yudafoi lɛ anine baashɛ nɛkɛ “tsɛmɔ krɔŋkrɔŋ” nɛɛ nɔ kɛyashi be mli ni mɛi ni feɔ “Nyɔŋmɔ Israel” lɛ “ayifalɛ lɛ aaaba mli” hewɔ lɛ, eka shi faŋŋ akɛ belɛ afo mumɔŋ Israelbii nɛɛ ayibɔ lɛ he husu. Ojogbaŋŋ, mɛni ji nakai yibɔ lɛ? Kwɛmɔ Kpojiemɔ 7:1-8. Afo Kristofoi ni “asɔo amɛnaa” ni amɛbafata mumɔŋ Israelbii lɛ ahe lɛ ayibɔ lɛ he husu yɛ jɛmɛ. Ákɛ nɛkɛ yibɔ ni afo he husu nɛɛ jeee mɛi ni ahala amɛ kɛjɛ ŋwɛibɔfoi ateŋ Iɛ, Kpojiemɔ 14:1-4 yeɔ enɛ he odase, ni jɛmɛ nɔŋŋ atsɔɔ yɛ akɛ nɛkɛ yibɔ nɛɛ ji mɛi ni “ahe kɛjɛ shikpɔŋ lɛ nɔ,” “ahe kɛjɛ gbɔmɛi ateŋ ni amɛtsɔmɔ klɛŋklɛŋ yibii amɛha Nyɔŋmɔ kɛ toobi lɛ.”
22. Kɛha 144,000 lɛ, amɛhiɛnɔkamɔ ni damɔ Biblia lɛ nɔ lɛ ji mɛni nɔ?
22 Kɛha nɛkɛ Kristofoi 144,000 ni akɛ mumɔ krɔŋkrɔŋ efɔ amɛ ni akɛfɔ amɛ mu nɛɛ agbɛfaŋ lɛ, amɛhiɛnɔkamɔ ni damɔ Biblia lɛ nɔ lɛ ji ŋwɛi hiɛnɔkamɔ. Yɛ be mli ni amɛna gbɛfaŋnɔ yɛ “klɛŋklɛŋ shitee” lɛ mli lɛ sɛɛ lɛ, “amɛaatsɔmɔ Nyɔŋmɔ kɛ Kristo osɔfoi, ni amɛkɛ lɛ aaaye maŋtsɛ afi akpe.”—Kpoj. 20:6.
23. Wiemɔi “klɛŋklɛŋ yibii” kɛ “maŋtsɛmɛi” lɛ teɔ mɛɛ sanebimɔi ashi?
23 Shi kɛji akɛ nɛkɛ “mɛi ni ahala amɛ” nɛɛ ji “klɛŋklɛŋ yibii” lɛ, belɛ eka shi faŋŋ akɛ yibii krokomɛi hu baanyiɛ sɛɛ. Ni kɛji akɛ “amɛbaaye nɔ akɛ maŋtsɛmɛi” lɛ, belɛ namɛi baafee amɛshishibii Iɛ, ni mɛni ji nɛkɛ gbɔmɛi nɛɛ ahiɛnɔkamɔ? Wɔbaakwɛ yɛ be mli ni wɔyaa nɔ wɔpɛiɔ nɛkɛ sane nɛɛ mli lɛb.
[Shishigbɛ niŋmai]
a Kwɛmɔ sane ni aŋma ni ji “Afii Akpe Hiɛnɔkamɔ lɛ Shishijee” yɛ Buu-Mɔɔ nɛɛ mli.
b (Ajie kɛjɛ April 15, 1981 Blɔfo Buu-Mɔɔ lɛ mli)
[Akrabatsa ni yɔɔ baafa 9]
Papias ni jɛ Hierapolis, lrenaeus ni lɛ Lyons kɛ Justin ni lɛ Roma—afii ohai enyɔ lɛ mli “hetselɔi” kɛ “Tsɛmɛi” ni Katolek Sɔlemɔ lɛ ekpɛlɛ amɛnɔ lɛ—fɛɛ ji millenarians aloo mɛi ni heɔ afii akpe lɛ amɛyeɔ.—The Catholic Encyclopedia.
[Akrabatsa ni yɔɔ baafa 10]
Yɛ be mli ni amɛwuɔ amɛshiɔ afii okpe hiɛnɔkamɔ lɛ, Roma osɔfonukpa Caius kɛ “Hetselɔ” Dionysius ba shi kwraa kɛshɛ heni amɛkpoo anɔkwale ni Kpojiemɔ, ní okɛha bɔfo Yohane lɛ ji lɛ.—Dictionnaire de Theologie Catholique.