Sanebimɔi Ni Jɛ Kanelɔi Adɛŋ

Ani Mateo 28:17 tsɔɔ akɛ bɔfoi lɛ ekomɛi ayiŋ fee amɛ kɔshikɔshi lolo yɛ be kpalaŋŋ mli, beni Yesu ni atee lɛ shi lɛ ejie ehe kpo etsɔɔ amɛ lɛ sɛɛ?

Dabi, ehe ehiaaa ni wɔmu sane naa nakai, yɛ nɔ ni aŋma yɛ Mateo 28:​16, 17 lɛ hewɔ, he ni kaneɔ akɛ: “Shi kaselɔi nyɔŋma kɛ ekome lɛ yiŋ amɛtee Galilea gɔŋ lɛ nɔ, he ni Yesu eto amɛ lɛ; ni beni amɛna lɛ lɛ, amɛkoto shi amɛja lɛ, shi mɛi komɛi je ŋwane.”

Yesu tsɔ hiɛ mra mli tɔŋŋ ni ebɔ mɔdɛŋ akɛ eeeye ebua kaselɔi lɛ ni amɛyoo “akɛ ja etee Yerusalem ni eyana amanehulu pii yɛ onukpai lɛ kɛ woloŋmalɔi lɛ adɛŋ, ni agbe lɛ, ni gbi ni ji gbi etɛ lɛ nɔ lɛ eeete shi ekoŋŋ.” (Mateo 16:21) Shi kɛlɛ, emɔmɔ kɛ egbele lɛ ha kaselɔi lɛ anijiaŋ je wui ni amɛyiŋ futu amɛ. Etamɔ nɔ ni eshitee kɛmiijɛ gbohii ateŋ lɛ bati amɛ shi trukaa. Ni beni ejie ehe kpo yɛ adesa su mli lɛ, klɛŋklɛŋ lɛ, mɛi komɛi “heee amɛyeee lolo yɛ miishɛɛ hewɔ.” (Luka 24:​36-41) Shi kɛlɛ, ehe kpojiemɔ yɛ eshitee lɛ sɛɛ lɛ ye ebua esɛɛnyiɛlɔi ni bɛŋkɛ lɛ kpaakpa lɛ ni amɛkpɛlɛ anɔkwale ni eshitee lɛ ji lɛ nɔ; bɔfo Toma po yiŋ tsɔ akɛ atee Yesu shi lɛlɛŋ.​—Yohane 20:​24-29.

Yɛ no sɛɛ lɛ bɔfoi anɔkwafoi 11 lɛ”yiŋ amɛtee Galilea.” (Mateo 28:​16; Yohane 21:⁠1) Beni amɛyɔɔ jɛmɛ lɛ, Yesu “jie ehe kpo etsɔɔ aaafee nyɛmimɛi ohai enumɔ loo nɔ shikome.” (1 Korintobii 15:⁠6) Nɛkɛ be nɛɛ mli ni Mateo 28:17 tsiɔ ta akɛ “mɛi komɛi je ŋwane” lɛ. No hewɔ lɛ mɛi ni jeɔ ŋwane lolo lɛ baanyɛ afata nakai sɛɛnyiɛlɔi 500 lɛ ahe.

Kadimɔ wiemɔi ni yɔɔ miishɛɛ ni C. T. Russell, ni ji Buu Mɔɔ Asafo lɛ klɛŋklɛŋ sɛinɔtalɔ lɛ wie nɛɛ:

“Nilee yɛ mli akɛ wɔɔsusu akɛ mɛi ni je ŋwane lɛ nyɛŋ afee bɔfoi nyɔŋma kɛ ekome lɛ ateŋ mɛi komɛi, ejaakɛ amɛkpɛlɛ nɔ jogbaŋŋ, ni amɛhe amɛye kɛmɔ shi, ni amɛwie he nakai yɛ be ni tsɔ hiɛ lɛ mli. Wɔsusuɔ akɛ mɛi ni je ŋwane lɛ fata ‘nyɛmimɛi ohai enumɔ’ ni yɔɔ jɛmɛ yɛ be ni ato nɛɛ mli lɛ ahe, mɛi ni tsɔko hiɛ amɛkɛ lɛ ekpeko kɛjɛ be mli ni atee lɛ shi lɛ sɛɛ lɛ, mɛi hu ni nilee yɔɔ mli akɛ wɔɔsusu akɛ amɛteŋ mɛi komɛi ahe waaa tsɔ ko yɛ hemɔkɛyeli lɛ mli tamɔ bɔfoi lɛ kɛ enanemɛi krɛdɛɛi ni etsɔ hiɛ ekɛ amɛ ewie momo lɛ ji lɛ. Wiemɔ ni awie akɛ ‘mɛi komɛi je ŋwane’ lɛ ji odaseyeli ni tsɔɔ bɔ ni Sanekpakpa Jajelɔ lɛ niŋmaa lɛ mli ka shi faŋŋ ha. Etsɔɔ wɔ hu akɛ, Nuŋtsɔ lɛ sɛɛnyiɛlɔi lɛ heee nɔ fɛɛ nɔ amɛyeee kɛkɛ, shi moŋ amɛsumɔɔ ni amɛkpa mli ni amɛŋmɛ odaseyelii ni akɛhaa lɛ amɛkwɛ da, ni ekaa, kɛ hewalɛ kɛ he-kɛ-afɔleshaa mumɔ ni mɛi ni he amɛye lɛ jie lɛ kpo yɛ sɛɛ mli lɛ haa wɔnaa odaseyeli babaoo ni tsɔɔ anɔkwale ni amɛhemɔkɛyeli lɛ ji yɛ wɔ Nuŋtsɔ lɛ shitee lɛ he, nɔ ni amɛ diɛŋtsɛ kɛ agbɛnɛ wɔ hu wɔkpɛlɛɔ nɔ akɛ no ji hemɔkɛyeli ni wɔyɔɔ yɛ emli lɛ shishitoo nɔ lɛ. Kɛji ateee Kristo shi lɛ, no lɛ wɔhemɔkɛyeli lɛ efee yaka, ni wɔka he wɔyɛ wɔhe eshai lɛ amli lolo.​—1 Kor. 15:17?.”​—Zion’s Watch Tower and Herald of Christ’s Presence, May 1, 1901, baafa 152.

Wɔbaanyɛ wɔkadi akɛ bɔ ni Mateo tsiɔ oti nɛɛ ta lɛ haa wɔnaa odaseyeli ni tsɔɔ bɔ ni abaanyɛ akɛ he afɔ Biblia lɛ nɔ kɛ bɔ ni eji anɔkwale hu ha. Kɛji mɔ ko miifo sane ko eetã lɛ, ebaabɔ mɔdɛŋ koni ekɛ otii komɛi afata he bɔni afee ni anyɛ ahe sane ni efoɔ etaa lɛ aye; ekolɛ ebaanu he akɛ kɛji eshi otii komɛi loo saji komɛi yɛ mli lɛ, ebaaha aje esane lɛ he ŋwane. Shi Mateo hu?

Enuuu he akɛ sɔ̃ ko ka enɔ akɛ ekɛ wiemɔ ni ewie akɛ “mɛi komɛi je ŋwane” lɛ mlitsɔɔmɔ fitsofitso aha. Saji ni Marko, Luka, kɛ Yohane ŋmala lɛ ewieee enɛ he nɔ ko kwraa, no hewɔ lɛ, kɛ aŋɔ Mateo wiemɔ lɛ kɛkɛ lɛ, ebafeɔ tamɔ nɔ ni ekɔɔ bɔfoi 11 lɛ, ni eji amɛteŋ mɔ ko lɛ ahe. Shi kɛlɛ, Mateo wie wiemɔ lɛ kuku kɛkɛ, ni ekɛ mlitsɔɔmɔ ko kwraa fataaa he. No sɛɛ aaafee afii 14 lɛ, bɔfo Paulo ŋma Korintobii a-Klɛŋklɛŋ wolo lɛ. Yɛ mlitsɔɔmɔ ni ekɛha yɛ 1 Korintobii 15:6 lɛ shishinumɔ naa lɛ, wɔbaanyɛ wɔmu sane naa yɛ nakai gbɛ nɔ akɛ jeee bɔfoi lɛ ji mɛi ni je ŋwane lɛ, shi moŋ kaselɔi ni yɔɔ Galilea lɛ, mɛi ni Yesu ejieko ehe kpo etsɔko amɛ yɛ nakai beaŋ lɛ. No hewɔ lɛ, wiemɔ ni Mateo wie akɛ “mɛi komɛi je ŋwane” lɛ bafeɔ anɔkwale; etsɔɔ niŋmalɔ anɔkwafo ni kɛ anɔkwa sane ko ni eba mli lɛ he sane miiha yɛ gbɛ ni ja nɔ, ni ebɔɔɔ mɔdɛŋ akɛ eeetsɔɔ nibii fɛɛ ni ba lɛ mli fitsofitso.