Agugui Ni Jɛ Mateo Sanekpakpa Lɛ Mli

YEHOWA NYƆŊMƆ kɛ mumɔ tsirɛ tsutsu toohelɔ Mateo ni eŋma Yesu Kristo fɔmɔ, eshihilɛ kɛ egbele kɛ eshitee lɛ he sane ni yɔɔ miishɛɛ efɔ shi. Woji sɔrɔtoi ni akɛ niji ŋmala ni yɔɔ dani afii ohai nyɔŋma lɛ shɛ lɛ kɛɔ akɛ aŋma nɛkɛ Sanekpakpa nɛɛ aaafee beni Yesu kwɔ kɛtee ŋwɛi lɛ sɛɛ afii kpaanyɔ (aaafee 41 Ŋ.B.) Enɛ jeee nɔ ni kɛ odaseyeli ni yɔɔ mli lɛ kpaaa gbee, akɛni emli sane lɛ ba naagbee kɛ famɔ ni Yesu kɛha ekaselɔi lɛ akɛ amɛfee kaselɔi yɛ afii 33 Ŋ.B. ni ekɛɛɛ nɔ ko yɛ Yerusalem hiɛkpatamɔ ni Romabii lɛ kɛba yɛ afii 70 Ŋ.B. lɛ mli lɛ hewɔ.

Yɛ ewolo Historia Ecclesiastica (Ecclesiastical History) ni Eusebius ni ji yinɔsaneŋmalɔ ni hi shi yɛ afii ohai ejwɛ lɛ mli lɛ ŋma lɛ mli lɛ, etsɛ wiemɔi kɛjɛ Papias kɛ Irenaeus ni hi shi yɛ afii ohai enyɔ lɛ kɛ Origen ni hi shi yɛ afii ohai etɛ lɛ ni amɛ fɛɛ amɛkɛɔ akɛ Mateo ji mɔ ni ŋma Sanekpakpa nɛɛ ni agbɛnɛ amɛkɛɔ akɛ eŋma yɛ Hebri wiemɔ mli lɛ awiemɔi amli. Ani enɛ aaanyɛ afee Aramaic diɛŋtsɛ? Jeee nakai yɛ bɔ ni woji ni George Howard, jamɔ he nilelɔ ni yɔɔ University of Georgia lɛ ŋma lɛ tsiɔ ta lɛ hewɔ. Eŋma akɛ: “Nɛkɛ susumɔ nɛɛ jɛ titri lɛ he ni aheɔ ayeɔ akɛ Hebri ni awieɔ yɛ Yesu bei lɛ amli lɛ jeee nɔ ni akɛtsuɔ nii dɔŋŋ yɛ Palestina shi moŋ akɛ Aramaic eto najiaŋ lɛ hewɔ. No hewɔ lɛ Dead Sea Scrolls (Ŋshɔ ni Egbo lɛ Mli Woji) ni ayana ni aŋmala yɛ Hebri wiemɔ mli, kɛ agbɛnɛ Hebri woji krokomɛi ni jɛ Palestina ni jɛ be ni Yesu hi shi lɛ mli lɛ tsɔɔ agbɛnɛ akɛ Hebri ji wiemɔ ko ni awieɔ jogbaŋŋ yɛ klɛŋklɛŋ afii oha lɛ mli.” Eka shi faŋŋ akɛ, Mateo ŋma e-Sanekpakpa lɛ koni ehe aba sɛɛnamɔ aha Hebri Kristofoi lɛ, ni ekolɛ eha atsɔɔ shishi hu kɛtee Hela wiemɔ ni awieɔ lɛ hu mli.

Wɔmiiwo bo hewalɛ ni okane Mateo Sanekpakpa lɛ. Yɛ be mli ni wɔkwɛɔ agugui komɛi ni yɔɔ mli lɛ, kadimɔ nibii ni aŋmala he saji lɛ ni haa sane lɛ mli feɔ faŋŋ lɛ.

Fɔmɔ Kɛ Mra Be Mli Sɔɔmɔ Nitsumɔ Lɛ

Mateo Sanekpakpa lɛ jeɔ shishi kɛ Yesu fɔmɔ he yinɔsane. Beni ana akɛ Maria hiɛ musu lɛ, Yosef ni etsɛ ehe baa lɛ, “susu akɛ eeeŋmɛɛ ehe kpoo.” (1:19) Shi te eeefee tɛŋŋ efee nakai, akɛni etsɛ ehe baa pɛ kɛkɛ lɛ? Ojogbaŋŋ, kɛha Yudafoi lɛ, yoo ni atsɛ ehe baa lɛ he gbɛnaa nii tamɔ yoo ni ebote gbalashihilɛ mli nɔ nɔŋŋ. Kɛ ekɛ nuu ko na bɔlɛ lɛ, abaanyɛ atswia lɛ tɛi akɛ gbalafitelɔ. (5 Mose 22:​23-29) Yɛ bɔ ni hebaatsɛɛ nɛɛ fiɔ amɛ nɛɛ hewɔ lɛ, Yosef kpɛ eyiŋ akɛ ebaaŋmɛɛ Maria he, eyɛ mli akɛ kponɔgbɛ nifeemɔ ko bɛ ni fiɔ amɛ yɛ yookpeemɔ mli.

Yesu Gɔŋ nɔ Shiɛmɔ lɛ yɛ Mateo Sanekpakpa lɛ shishijee yitsei lɛ amli. Ni emli ni Kristo bɔ kɔkɔ akɛ kɛ mɔ ko tsɛ enyɛmi akɛ “raka” loo [yakagbɔmɔ) lɛ, eeeye “ajina lɛ hiɛ fɔ.” (5:22) Wiemɔ ni tamɔ nɛkɛ tsɔɔ akɛ mɔ lɛ miitsɛ enyɛmi akɛ nɔ ko nɔ ko bɛ eyitso ni ma enɔ lɛ mli.

Shi mɛni ji nɛkɛ “ajina” nɛɛ? No ji Yerusalem Sanhedrin loo bɛgwafoi ni mɛi 71 feɔ lɛ. Mɛni baaha mɔ ko he asa ni mɔ ko atsɔ emli nyo? McClintock kɛ Strong Cyclopedia lɛ kɛɔ akɛ: “Esa akɛ mɔ ni taoɔ enɛ lɛ afee mɔ ni sane ko bɛ ehe yɛ jeŋba mli kɛ gbɔmɔtsoŋ. Esa akɛ efee mɔ ni eda ni eshɛ teŋgbɛ afii amli, mɔ ni kɛ, ehe yɔɔ fɛo, eyɔɔ shika, ele nii . . . Ebiɔ ni ele wiemɔi babaoo . . . Gbɔmɛi ni amɛdara yɛ afii amli, atsake amɛ kɛba Yuda jamɔ mli, osaii, kɛ Nethinim lɛ jeee mɛi ni ahalaa amɛ yɛ bɔ ni amɛsusuɔ nii ahe amɛhaa lɛ hewɔ; ni asaŋ hu ahalaaa mɔ ni bɛ bii, ejaakɛ amɛnuŋ shihilɛ mli saji ahe . . .; ni ahalaaa mɛi ni nyɛɛɛ atsɔɔ akɛ amɛji osɔfoi aseshibii, Levibii loo Israelbii. . . . Aatao ni mɔ ni baafee Sanhedrin Kpeteŋkpele lɛ mli nyo lɛ, klɛŋklɛŋ kwraa lɛ, efee kojolɔ yɛ lɛ diɛŋtsɛ emaŋ; ni agbɛnɛ ajie lɛ kɛjɛ jɛmɛ kɛba Sanhedrin Bibioo lɛ mli . . ., koni agbɛnɛ eya ehiɛ kɛba Sanhedrin Bibioo ni ji enyɔ lɛ mli . . . dani anyɛ aŋɔ lɛ akɛ gbɔmɛi nyɔŋmai kpawo kɛ ekome lɛ mlinyo.”

No hewɔ lɛ Yesu kɛɛ akɛ: ‘Mɔ fɛɛ mɔ ni kɛ wiemɔ sha ko aaajɛ enyɛmi’ lɛ yeɔ fɔ ni tamɔ nɔ ni Yudafoi Asaneyeli He Wulu lɛ aaabu mɔ ko gbele fɔ. Mɛɛ kɔkɔbɔɔ enɛ ji akɛ wɔkagbe wɔnyɛmimɛi lɛ ahe guɔ! Nyɛhaa wɔkwɛa wɔlilɛi nɔ jogbaŋŋ koni ekaba akɛ aaabu wɔ fɔ yɛ Saneyeli He Wulu lɛ, yɛ Yehowa, “shikpɔŋ fɛɛ nɔ Kojolɔ lɛ” hiɛ.​—1 Mose 18:​25; Yakobo 3:​2-12.

Yesu Ji Tsɔɔlɔ Ni He Esa

Nɛkɛ Sanekpakpa nɛɛ hu tsɔɔ akɛ Yesu ji tsɔɔlɔ ni nyɛɔ ekɛ hesaa haa sanebimɔi ahetoo. Akɛ nɔkwɛmɔ nɔ lɛ, be mli ni abi lɛ sane ko lɛ, etsɔɔ nɔ hewɔ ni ekaselɔi lɛ ehiii ŋmaa lɛ mli. (9:​14-17) Amɛbɛ nɔ ni amɛbaadamɔ nɔ amɛhi ŋmaa yɛ be mli ni eyɔɔ wala mli lɛ. Shi taakɛ egba lɛ, amɛhi ŋmaa ni amɛye awerɛho beni egbo lɛ ejaakɛ amɛleee nɔ hewɔ ni aŋmɛ egbele lɛ gbɛ lɛ. Shi beni amɛnine shɛ mumɔ krɔŋkrɔŋ lɛ nɔ yɛ Pentekoste lɛ, agbele amɛhiŋmɛii kɛ amɛsaneshishinumɔ ni amɛhiii ŋmaa yɛ awerɛho mli dɔŋŋ.

Yɛ be mli ni ewieɔ sane lɛ nɔŋŋ he lɛ, Yesu kɛfata he akɛ mɔ ko kɛ mama hee taaa atade momo; ejaakɛ ehee lɛ baaha emomo lɛ agbala babaoo. Ekɛɛ hu akɛ akɛ wein hee wooo wolo tɔi memeji amli. Wolo tɔ ji kooloi ahewolo ni akpɛ naa ni ekolɛ ashi nane kome pɛ. Wein hee ni shaa lɛ teɔ kɔɔyɔɔ fɔŋ shi ni enɛ haa wolo tɔi memeji lɛ fɛɔ. Kɛ akɛto he lɛ, anɔkwale ni Kristo tsɔɔ lɛ mli wa tsɔ fe blema Yuda jamɔ ni yɔɔ keketee lɛ. Agbɛnɛ, ebɔɔɔ mɔdɛŋ akɛ ekɛ nɔ ko hee aaafata jamɔ gbɛjianɔtoo ni ebe eho lɛ kɛ eŋmaahilɛ kusumii kɛ kusum nifeemɔi krokomɛi lɛ ahe loo ni eeeha enɛɛmɛi ashwere. Shi moŋ, Nyɔŋmɔ kɛ Yesu tsu nii koni eto jamɔ gbɛjianɔtoo hee ko. Yɛ anɔkwale mli lɛ, esaaa akɛ wɔfeɔ nɔ ko ni wɔkɛaafi futufutu hemɔkɛyeli kui asɛɛ loo ni wɔɔha apasa jamɔ ni tamɔ nɛkɛ ashwere.

Bo Ŋaawoo Ni Jɛ Nyɔŋmɔ Bi Lɛ Ŋɔɔ Lɛ Toi

Taakɛ Mateo sane ni kɔɔ tsakemɔ lɛ he lɛ ji lɛ, Nyɔŋmɔ tsɛ Yesu akɛ E-Bi ni ekpɛlɛ enɔ ni ekɛɛ akɛ esa akɛ wɔbo lɛ toi. (17:⁠5) No hewɔ lɛ esa akɛ wɔbo Kristo ŋaawoo lɛ fɛɛ toi, tamɔ nɔ ni kɔɔ kɔkɔbɔɔ akɛ mɔ fɛɛ mɔ ni aaatɔtɔ mɛi ni naa emli hemɔkɛyeli lɛ ekome naji lɛ, eeehi moŋ akɛ akɛ wiɛ wulu aaaŋmɔ ekuɛ ni aaafɔ lɛ awo ŋshɔŋ. (18:⁠6) Mɛɛ tɛ enɛ ji? Jeee bibioo, shi Yesu miitsɔɔ wiɛ wulu ni elɛɛmɔ shɛɔ ninetalɔi ejwɛ kɛmiiya enumɔ. Ní aaatsɔmɔ enɛ yɛ tɛ ni baa shi nɔ lɛ biɔ kooloo hewalɛ. Mɔ ko mɔ ko yi naŋ wala yɛ ŋshɔŋ kɛ wiɛ wulu ni tamɔ nɛkɛ ŋmɔ ekuɛ. No hewɔ lɛ Yesu miiwo wɔ ŋaa ni wɔkwa efɔŋ ni ji tɔtɔmɔ ni wɔɔtɔtɔ esɛɛnyiɛlɔi lɛ eko nane lɛ. Nakai jwɛŋmɔ nɔŋŋ bɔfo Paulo kɛŋma akɛ: “Ehi akɛ oyeee loo ni asaŋ onuuu wein loo nɔ ko ni aaato onyɛmi pampi loo aaaha enane atɔtɔ.”​—Romabii 14:⁠21.

Nyɔŋmɔ Bi lɛ kɛ ŋaawoo ha yɛ gbɛ kroko nɔ beni ejaje kpoo eshwie woloŋmalɔi lɛ kɛ Farisifoi lɛ anɔ ni ekɛɛ akɛ amɛtamɔ saŋii ni asha he eyɛŋ lɛ. (23:​27, 28) Nɔ ni afɔɔ feemɔ ji ni asha saŋii kɛ gbohii abui ahe eyɛŋ koni gbɔmɛi akata he ni amɛfee mɛi ni he tseee. Akɛni egbalaa jwɛŋmɔ kɛyaa nifeemɔ nɛɛ nɔ hewɔ lɛ, Yesu tsɔɔ akɛ woloŋmalɔi lɛ kɛ Farisifoi lɛ tamɔ mɛi ni ja yɛ kponɔgbɛ shi “osato kɛ mlatɔmɔ eyi [amɛ] mli obɔ.” Nɛkɛ ŋaawoo nɛɛ toiboo baaha wɔkpoo nibii ni ejaaa gbɛ koni wɔfee nii “kɛ hemɔkɛyeli ni osato bɛ mli.”​—1 Timoteo 1:5; Abɛi 3:​32; 2 Timoteo 1:⁠5.

Wɔ Okaditolɔ Lɛ Emuuyeli Mli Hiɛlɔ

Yɛ be mli ni eŋma Yesu gbalɛ ni kɔɔ ‘ba ni eba lɛ he okadi’ lɛ he lɛ, Mateo gbaa wɔ bɔ ni atsɔɔ Kristo sɛɛ gbɛ, amɔ lɛ, ayɛ esane, agbe lɛ ni atee lɛ shi lɛ he sane. Beni etsotsoro sɛŋmɔtso lɛ nɔ lɛ, Yesu kpoo akɛ eeenu wein ni akɛ ebɔɔ efutu mli, nɔ ko ni haa mɔ ko henumɔ gboɔ. (27:34) Yei kɛ wein ni tamɔ nɛkɛ haa efɔŋfeelɔi koni amɛkɛgbe amɛpiŋmɔ henumɔi yɛ sɛŋmɔtso lɛ nɔ lɛ. Marko 15:23 kɛɔ akɛ aha lɛ wein ni “akɛ mire efutu mli,” ni enɛ baaha eje ŋma yɛ ehiɛ. Eka shi faŋŋ akɛ ebɔɔ kɛ mire lɛ fɛɛ yɛ wein ni Kristo kpoo lɛ mli. Yɛ be mli ni eyashɛ eshikpɔŋ nɔ sɔɔmɔ nitsumɔ lɛ naagbee lɛ, esumɔŋ ni akɛ tsofa ko aha lɛ ni efee shikpilikpii. Yesu miisumɔ ni eye ehenumɔi anɔ bɔni afee ni eye anɔkwale kɛyashi gbele mli. Taakɛ wɔ Okaditolɔ kpakpa lɛ ji lɛ, eba akɛ wɔɔya nɔ wɔhiɛ wɔ emuuyeli mli wɔha Yehowa Nyɔŋmɔ yɛ be fɛɛ mli.​—Lala 26:​1, 11.