Shikpɔŋ Nɔ Shikpɔŋkuku Ni Etsɛ Fe Fɛɛ Lɛ Mli Saji Ni Mli Wawai Lɛ Ahe Nitsumɔ
“ŊWƐI maŋtsɛyeli lɛ ebɛŋkɛ.” Nakai sane lɛ tsoɔ nɔ ko krɛdɛɛ ko kɛhaa shiɛlɔi 370 ni jajeɔ “sanekpakpa” lɛ yɛ ŋmɛnɛŋmɛnɛ beaŋ Israel Maŋ lɛ diɛŋtsɛ mli lɛ. Mɛni hewɔ? Ejaakɛ biɛ ji he ni Yesu Kristo jaje Maŋtsɛyeli lɛ he sane lɛ klɛŋklɛŋ yɛ, aaafee afii 2,000 ni eho nɛ. (Mateo 4:17; 24:14) Enɛ haa Israel feɔ shikpɔŋ nɔ shikpɔŋkuku ni etsɛ fe fɛɛ ni ashiɛɔ sanekpakpa lɛ yɛ mli.
Shi enɛ efee shikpɔŋkuku ni mli saji wawai kɛjɛ shishijee beebe. Eyɛ mli akɛ mɛi pii jie miishɛɛ kpo yɛ Yesu sane lɛ he moŋ, shi mɛi fioo ko pɛ tee nɔ kɛteke nakai miishɛɛ lɛ. (Yohane 6:2, 66) Ŋmɛnɛ, saji ni mli wawai nɛɛ ji jamɔi, kusumii kɛ maŋkwramɔŋ susumɔi sɔrɔtoi.
Yɛ gbɛ kome nɔ lɛ, Arabiabii ni amɛyibɔ shɛɔ akpekpei 2.2 yɛ. Mɛi ni fata amɛhe ji mɛi ni kɛɔ akɛ amɛji Kristofoi, Muslimbii ni diɔ amɛjamɔ sɛɛ loo amɛdiii sɛɛ, Druze hemɔkɛyeli lɛ mlibii, kɛ mɛi ni kɛɔ akɛ amɛheee eyakpɛtɛ maŋkwramɔŋ gbɛi sɔrɔtoi ahe, mɛi komɛi miisumɔ ni ato Palestina maŋ ni yeɔ ehe yɛ West Bank kɛ Gaza Shikpɔŋkuku lɛ nɔ.
Yɛ gbɛ kroko hu nɔ lɛ, Yudafoi ni ji Israelbii akpekpei 3.5 lɛ hu ni amɛmli egbala yɛ gbɛi sɔrɔtoi babaoo nɔ lɛ hu yɛ. Amɛteŋ mɛi komɛi fa kɛjɛ Morocco, Yemen, Iraq, kɛ Syria. Mɛi krokomɛi hu kɛjɛ Europa kɛ Russia. Mɛi krokomɛi yɛ lolo ni ba kɛjɛ India, Americas, Ethiopia, South Afrika kɛ hei krokomɛi. Amɛhiɔ shi akɛ akutsei ni hiɛ amɛ diɛŋtsɛ amɛkusumii kɛ blema saji kɛ agbɛnɛ bɔ ni amɛtsɔɔ Yuda jamɔ shishi amɛhaa kɛ bɔ ni amɛtsuɔ he nii amɛhaa.
Akɛ nɔkwɛmɔ nɔ lɛ, rabbi nukpa yɛ kɛha Ashkenazi (Europa) Yudafoi lɛ ni mɔ kroko hu yɛ kɛha Sephardic (Boka Teŋgbɛ) Yudafoi lɛ. Yɛ be mli ni mɛi ni fa lɛ ji mɛi ni jieɔ miishɛɛ kpo yɛ maŋkwramɔŋ saji ahe lɛ, Yudafoi lɛ ateŋ mɛi komɛi yɛ ni amɛkɛ amɛhe ewo jamɔ mli vii akɛ amɛyɔseee po akɛ Israel Maŋ ko yɛ ni amɛkpoo akɛ amɛaawo too. Agbɛnɛ mɛi ni je Hiɛkpatamɔ lɛ mli lɛ hu yɛ, amɛteŋ mɛi pii yɛ ni amɛtsutsu niseniianii ni afee amɛ lɛ miigba amɛnaa lolo, mɔ fɛɛ mɔ yɛ niiashikpamɔ ko ni ji tsuiŋdɔlɛ nɔ ni ebaagba bo. Mɛi ni faaa hu ji mɛi ni kɛɔ akɛ amɛheee Nyɔŋmɔ nɔ amɛyeee lɛ, ni amɛ diɛŋtsɛ amɛhiɛ amɛjeŋ nilee sɔrɔtoi amli. Kpaa kome ni fimɔɔ Yudafoi lɛ fɛɛ ji bɔ ni amɛaafee ni amɛhi shi akɛ gbɔmɛi ni hiɛ maŋkwramɔŋ gbɛhe.
Sane Ni Mli Wa Lɛ He Nitsumɔ
Beni afo Maŋtsɛyeli shiɛmɔ nitsumɔ lɛ mli fe afii 1,800 sɛɛ lɛ, aje shishi yɛ gbɛ bibioo ko nɔ yɛ biɛ yɛ 1913. Yɛ nakai be lɛ mli lɛ, obalanyo ko ni yɔɔ Biblia lɛ he miishɛɛ je shishi akɛ eeetɛo Maŋtsɛyeli dumɔ wui lɛ yɛ Ramallah, aaafee Yerusalem kooyigbɛ shitoi nyɔŋma. Sanekpakpa lɛ jɛ jɛmɛ egbɛ eshwa kɛtee Arabiabii ni hiɔ Beit-Jala kɛ Haifa lɛ ateŋ. Jeŋ Ta II sɛɛ ni Odasefoi enyɔ ni ji nyɛmimɛi yei ni amɛji Yuda fɔmɔbii je nitsumɔ lɛ shishi yɛ Tel Aviv/Jaffa niiaŋ. Ŋmɛnɛ, Yehowa Odasefoi asafoi ekpaa kɛ kui enyɔ miisɔmɔ yɛ Haifa, Tel Aviv, Bethlehem, Ramallah, Lod, kɛ Beer-Sheba niiaŋ.
Taakɛ eji yɛ afii ohai 19 ni eho nɛ lɛ, shia-kɛ-shia sɔɔmɔ lɛ ka he eji gbɛ ni hi fe fɛɛ ni atsɔɔ nɔ anaa mɛi ni yɔɔ sanekpakpa lɛ he miishɛɛ lɛ. (Luka 8:1; ekɛto Bɔfoi lɛ Asaji 5:42 he.) Yɛ anɔkwale mli lɛ, kɛ akɛto shikpɔji krokomɛi ahe lɛ, eji miishɛɛ sane diɛŋtsɛ akɛ aaaye odase yɛ nɛkɛ gbɛ nɔ yɛ biɛ. Gbɔmɛi lɛ fɛɛ miisumɔ ni amɛle shɛɛ sane ni wɔhiɛ lɛ, ni yɛ be babaoo mli lɛ amɛfɔɔ nine amɛtsɛɔ Maŋtsɛyeli shiɛlɔi lɛ koni amɛkɛ amɛ agba sane. Nɛkɛ nibii amli ni amɛtaoɔ amɛle nɛɛ haa akɛ wɔwoji lɛ kɛ Biblia kasemɔ he woji haa amɛ. Yɛ be babaoo mli lɛ, akɛ nɛkɛ woji nɛɛ haa akutseiaŋbii, ni nɔ ni jɛɔ mli baa ji akɛ aŋkroaŋkroi komɛi kaseɔ Biblia mli anɔkwale lɛ.
Shi nɛkɛ nibii amli ni ataoɔ ale nɛɛ batsɔɔ oshara kɛhaa anɔkwale dumɔ wu ni waaa ni atɛo yɛ mɛi heei lɛ atsuii amli lɛ. (Mateo 13:20, 21) Akutseiaŋbii, nanemɛi kɛ titri lɛ jamɔ mli hiɛnyiɛlɔi bɔɔ mɔdɛŋ ni amɛfee nɔ fɛɛ nɔ ni amɛaanyɛ koni amɛnyɛ mɛi ni tsɔɔ miishɛɛ yɛ Maŋtsɛyeli lɛ he sane lɛ anɔ, amɛye amɛhe fɛo, amɛgba amɛnaa, yɛ bei komɛi amli lɛ ayiɔ amɛ po. Nɔ ni ejɛ mli eba ji akɛ, mɛi komɛi anitsumɔi eje amɛdɛŋ, ni mɛi komɛi hu yɛ ni amɛnanemɛi kɛ wekumɛi ekpoo amɛ kwraa. Esa akɛ mɛi ni damɔɔ shi shiŋŋ ni amɛbatsɔmɔɔ Yehowa Odasefoi lɛ aŋmɛ amɛtsui shi yɛ nɛkɛ shitee-kɛ-woo ni tamɔ la nɛɛ anaa.—Okɛto Yohane 9:22 he.
Shitee-kɛ-woo hu baa kɛjɛɔ gbɛi krokomɛi anɔ. Asafo yuu kɛ basabasafeemɔ etutua Odasefoi ni amɛfɔlɔi ji Yudafoi. Abɔ mɔdɛŋ akɛ aaasha nitsumɔ he nine lɛ kɛ Maŋtsɛyeli Asa ni yɔɔ Tel Aviv lɛ kɛ Haifa Maŋtsɛyeli Asa lɛ. Agbɛnɛ aanyɛ Odasefoi ni ji Arabiabii kɛ Yudafoi fɛɛ nɔ ni amɛkɛ amɛhe awo maŋkwramɔŋ bei ni yaa nɔ ni kɔɔ Palestina maŋ ni aaato ama shi lɛ he lɛ mli. Yɛ be mli ni amɛdamɔɔ shi akɛ mɛi ni kɛ amɛhe wooo shihilɛ ni tamɔ nɛkɛ mli lɛ, nyɛmimɛi lɛ kɛ ŋaa tsɔɔ mli akɛ adesa gbɛjianɔtoo ko nyɛŋ ana adesai ni ehao lɛ ahaomɔi lɛ anaa tsabaa. Shi moŋ, yɛ amɛ Hiɛnyiɛlɔ, Yesu Kristo kasemɔ mli lɛ, Odasefoi lɛ kɛ amɛnine tsɔɔ Nyɔŋmɔ Maŋtsɛyeli lɛ akɛ tsabaa kome pɛ ni yɔɔ.—Yohane 17:16; 18:36.
Awo Maŋtsɛyeli Yibii
Yɛ saji ni mli wawai ni baa yɛ shikpɔŋkuku ni etsɛ fe fɛɛ ni ayeɔ odase yɛ mli nɛɛ mli lɛ fɛɛ sɛɛ lɛ, mɛi ni “nuɔ wiemɔ lɛ ni [amɛ]yooɔ sɛɛ lɛ” woɔ Maŋtsɛyeli yibii yɛ ŋmɔ nɛɛ mli. (Mateo 13:23) Be fɛɛ sɔɔlɔ ko ni he esa kɛɛ: “Gbɔmɛi yɛ ni anɔkwale lɛ he kumai miiye amɛ, mɛi ni sumɔɔ jalɛ nifeemɔ, ni miitao enɛ diɛŋtsɛ. Nɔ ni mɛi komɛi kɛɔ loo nɔnyɛɛ ni jɛɔ mɛi krokomɛi adɛŋ baa lɛ naaa amɛnɔ hewalɛ. Kɛ hegbɛ ni amɛkɛaakase anɔkwale lɛ ba pɛ lɛ, amɛmɔɔ mli oya.” Niiashikpamɔi babaoo yeɔ enɛ he odase.
Atsɔse Benvenida yɛ osɔfoi anikasemɔ he yɛ Greece, ni eji mɔ ni nɔ ni Biblia lɛ kɛɔ yɛ “jamɔ ni he tse ni ehe bɛ muji ko” lɛ he lɛ saa ehiɛ jogbaŋŋ, titri lɛ, “akɛ mɔ asara awusai kɛ okulafoi yɛ amɛmanehulu lɛ mli, ni eto ehe kɛjɛ je nɛŋ koni ekawo ehe muji” lɛ. (Yakobo 1:27) Akɛ Yuda obalayoo fioo lɛ, nɔ ni ekɛkpe pɛ ji “amanehulu sɛɛ amanehulu,” taakɛ ewieɔ he lɛ. Eŋmɛ etsui shi yɛ Nazi yiwalɛ ni ba kɛ maŋ ta ni ha ewu gbo lɛ shishi. Shi ehiɛnɔkamɔ ni eyɔɔ akɛ eeena gbɔmɛi ni yeɔ anɔkwale ni jeee pɛsɛmkunyatsɛmɛi lɛ baaa shi.
Beni efa kɛba Israel yɛ 1949 lɛ, Benvenida tee nɔ etsu nii akɛ yoo ni fɔɔ mɔ kɛyashi be mli ni ekpa enɛ tsumɔ yɛ 1974. Ekɛɛ: “Yɛ nɛkɛ be nɛɛ fɛɛ mli lɛ, mitee nɔ mibi mi diɛŋtsɛ mihe akɛ: ‘Nɛgbɛ gbɔmɛi kpakpai ni yeɔ anɔkwale ni Biblia lɛ wieɔ amɛhe lɛ yɔɔ? Nɛgbɛ ji he ni je nɛŋ jalɛ nifeemɔ lɛ yɔɔ?’” Ekɛ ehe wo Yuda jamɔ mli, etee amɛ kpee he lɛ, ni eye hejɔɔmɔ gbii kɛ gbijuji. Shi oshekuyeli kɛ bei ni he ehiaaa ni yaa nɔ yɛ asafo lɛ mlibii lɛ ateŋ lɛ ha “jamɔ ni he tse ni ehe bɛ muji ko” lɛ he kumai baye lɛ waa.
Yɛ naagbee lɛ, yɛ 1985 lɛ, beni Benvenida etee gbɔmɔtsoŋ hewalɛnamɔ he ko ni yɔɔ Greece taakɛ efeɔ daa lɛ, Odasefonyo yoo ko ni lɛ hu etee eyaatsa ehe yɛ jɛmɛ lɛ kɛ lɛ je sanegbaa shishi. Amɛgba sane kakadaŋŋ ko. Nakai gbɛkɛ lɛ nɔŋŋ lɛ, Benvenida tee eklɛŋklɛŋ kpee yɛ Maŋtsɛyeli Asa ni yɔɔ maŋ lɛ mli lɛ nɔ ni miishɛɛ kɛ anɔkwayeli ni ena yɛ nyɛmimɛi hii kɛ nyɛmimɛi yei lɛ ateŋ lɛ na enɔ hewalɛ waa.
Benvenida tee nɔ yɛ enikasemɔ lɛ mli beni eku esɛɛ eba Israel, ni aaafee afi kɛ fa sɛɛ lɛ, abaptisi lɛ koni ekɛfee ehe nɔ ni ejɔɔ eha anɔkwa Nyɔŋmɔ, Yehowa lɛ he okadi. Ekɛɛ: “Yɛ naagbee lɛ, yɛ afii nɛɛ fɛɛ sɛɛ lɛ, yɛ be mli ni miye afi 70 lɛ, mina gbɔmɛi hiɛshikalɔi kɛ heshibalɔi ni Biblia lɛ wieɔ amɛhe lɛ, gbɔmɛi ni buɔ mi tamɔ gbɔmɔ diɛŋtsɛ lɛ. Agbɛnɛ mishihilɛ gbii fɛɛ mli etsɔ miishɛɛ gbi kɛ be ni yiŋtoo kpakpa yɔɔ mli kɛha mi!”
Moshe hu ji anɔkwale taolɔ kroko ni miimɛ ni ‘enu tookwɛlɔ kpakpa lɛ gbee.’ (Okɛto Yohane 10:14-16 he.) Eyɛ mli akɛ Moshe nyaa Ŋmalɛi lɛ ahe yɛ be fɛɛ mli moŋ, shi “Kpaŋmɔ Hee” lɛ ekome ni enyɛminuu ko miihe ashɛ afɔ lɛ mli ekase Yesu Kristo he sane yɛ, ni ena he miishɛɛ waa. Yɛ sɛɛ mli be ko lɛ, Moshe kɛ ehe yafata enaanyo nitsulɔ ko ni kɛ Odasefonyo ko kaseɔ Biblia lɛ he ni eyabo maŋshiɛmɔ ko ni saralɔ lɛ baha lɛ toi. Ewie yɛ klɛŋklɛŋ kpee lɛ sɛɛ akɛ: “Enɛ ji nɔ ko ni mitaoɔ ni manu yɛ be fɛɛ mli lɛ!”
Beni nibii komɛi egba enaa fioo lɛ, etsɛɛɛ ni Moshe shwere oyayaayai. Abaptisi lɛ yɛ nyɔji ekpaa pɛ mli. Shi ehiɛyaa lɛ kɛ shitee-kɛ-woo ni jɛ eweku lɛ mli ba, titri lɛ eŋa. Enɛ bashɛ he ni wa, beni ákɛ bi nukpa yɛ weku lɛ mli lɛ ekpoo akɛ ekɛ ehe aaawo kusum nifeemɔi kɛ sɔlemɔi ni yaa nɔ yɛ etsɛ yara nɔ lɛ mli. Kɛfata he lɛ, enanemɛi kɛ ewekumɛi kɛɛ eŋa lɛ akɛ ákɛ yoo lɛ ekwɛ ni ‘efee he nɔ ko oya’ dani ewu lɛ kɛ nɔ fɛɛ nɔ awo asafo lɛ dɛŋ. Moshe wie akɛ: “Miba egbeyeishemɔ lɛ shi beni mikɛɛ lɛ akɛ belɛ masumɔ ni mikɛ shia lɛ awo egbɛi amli lɛ.” Akɛni enyɛ eto ebe he gbɛjianɔ jogbaŋŋ hewɔ lɛ, enyɛ eŋmɛ pɛpɛɛpɛ yɛ eweku lɛ kɛ asafoŋ gbɛnaa nii amli yɛ miishɛɛ mli.
Jeee wekumɛi fɛɛ teɔ shi woɔ anɔkwale lɛ. Nehai gba nɔ ni ekase kɛjɛ Biblia lɛ mli lɛ etsɔɔ ewu, Hanna, ni kɛ ehe ewo maŋkwramɔŋ saji amli waa lɛ. Etsɛɛɛ ni mɛi enyɔ lɛ fɛɛ bayoo akɛ Maŋtsɛyeli lɛ pɛ ji adesai ni ahaoɔ amɛ lɛ ahiɛnɔkamɔ kome pɛ. No hewɔ lɛ amɛbatsɔmɔ Yehowa tsuji ni amɛjɔɔ amɛhe nɔ ni amɛje shishi akɛ amɛaaye odase yɛ Arabic wekui ni yɔɔ Haifa lɛ ateŋ kɛ agbɛnɛ akrowai ni bɛŋkɛ jɛmɛ lɛ amli. Amɛye amɛwekumɛi ni yɔɔ shɔŋŋ lɛ titri odase, mɛi ni shɛɔ 252 lɛ fɛɛ.
Ani enɛ fee sane ni mli wa? Hɛɛ, ejaakɛ yɛ tsɔne mli ni ebaata aaafee ŋmɛlɛtswaa kome kɛ fa kɛya akrowai ni Arabiabii yɔɔ jɛmɛ lɛ ni eyafee sɛɛsaramɔi ni eku esɛɛ eba nakai nɔŋŋ lɛ biɔ tsuishitoo kɛ tsuishiŋmɛɛ babaoo. Hanna kɛɛ: “Yɛ bei komɛi amli lɛ gbɔmɛi komɛi kɛɔ bo akɛ amɛsumɔɔɔ ni amɛboɔ osane lɛ toi dɔŋŋ. Kɛ enɛ ba lɛ, esa akɛ okpa wiemɔ. Yɛ sɛɛ mli lɛ, ekolɛ obaanyɛ okɛ ŋaa aje sane lɛ shishi ekoŋŋ. Etamɔ nɔ ni ashi bo ŋtia yɛ shinaa lɛ naa ni agbɛnɛ oku osɛɛ otsɔ samfɛlɛ mli obote shia lɛ mli.” Shi sɛɛnamɔ eba enɛɛmɛi fɛɛ he. Kɛbashi amrɔ nɛɛ, ewekumɛi ni bɛŋkɛ kpaakpa ni ji mɛi 36 lɛ ateŋ 24 etsɔɔ miishɛɛ diɛŋtsɛ yɛ Ŋmalɛi lɛ ahe, ni amɛteŋ 13 kɛ Hanna loo Odasefoi krokomɛi miikase Biblia lɛ. Kɛbashi amrɔ nɛɛ, wɔwekumɛi ni bɛŋkɛ kpaakpa lɛ ateŋ mɛi enumɔ kɛ agbɛnɛ lɛ diɛŋtsɛ ebii ejɔɔ amɛhe nɔ amɛha Yehowa ni mɛi krokomɛi etɛ hu miiya amɛhiɛ kɛyashɛ enɛ he.
Nɔyaa Heei Yɛ Shikpɔŋkuku Ni Etse Fe Fɛɛ Lɛ Mli
Niiashikpamɔi ni tamɔ enɛɛmɛi ni haa mɔ tsui nyaa lɛ miifa babaoo yɛ Israel, biɛ, ni gbɛkpamɔ akɛ anɔkwale lɛ baashwere lɛ yɛ. Maŋtsɛyeli jajelɔi ayifalɛ lɛ yashɛ 370 yɛ 1988 mli. Shia Biblia mli nikasemɔi ni afeɔ daa nyɔŋ nɔ yɛ mɛi ni yɔɔ wiemɔ lɛ he miishɛɛ lɛ ashiai amli lɛ tee hiɛ kɛjɛ 89 yɛ 1979 mli kɛbashɛ 301 yɛ 1988—efee nɔ ni miihe abɔ he toi enyɔ kɛ fa.
Enɛɛmɛi fɛɛ kɛ miishɛɛ babaoo bahaa Yehowa Odasefoi ni yɔɔ blema shikpɔŋ nɛɛ nɔ lɛ. Wɔmiikpa jɔɔmɔi babaoo gbɛ kɛmiijɛ Yehowa wɔ-Nyɔŋmɔ lɛ dɛŋ, yɛ be mli ni wɔyaa hiɛ yɛ kaselɔ-feemɔ nitsumɔ lɛ mli yɛ shikpɔŋ nɔ shikpɔŋkuku ni etsɛ fe fɛɛ nɛɛ mli lɛ.
[Mfonirii ni yɔɔ baafa 26, 27]
Ŋwɛi gbɛ: Yerusalem Trom Gbonyobu
Ŋwɛi gbɛ abɛku: Jara nɔ kɛ gbɛjegbɛi anɔ nibii yɛ Israel
Shishigbɛ abɛku: Nitsumɔ he nine yɛ Tel Aviv