“Nyɛbɔa Gbɔfeemɔ he Mɔdɛŋ”

“Mɛi krɔŋkrɔŋi lɛ ahia lɛ ahia nyɛ hu; nyɛbɔa gbɔfeemɔ he mɔdɛŋ.”—ROMABII 12:13.

 1. Mɛni ji adesa shishijee hiamɔ nii titri ko, ni mɛɛ gbɛ nɔ enɛ jeɔ kpo yɛ?

ÁKƐ okome ooonyiɛ gbɛjegbɛ ni nɔ ejɔ nɔ, yɛ akutso ni oleee mli jogbaŋŋ, beni je ena waa lɛ, baanyɛ afee niiashikpamɔ ni yɔɔ gbeyei waa gbii-etɛ-nɛɛ. Shi nakai nɔŋŋ hu kɛji oyɛ mɛi pii ateŋ ni oleee mɔ ko mɔ ko, loo ayooo bo lɛ, no hu nyɛɔ ehaoɔ mɔ waa. Lɛlɛŋ, adesa su lɛ fã ko ji, hiamɔ ni ehe hiaa ni asusu ehe, ana lɛ akɛ ehe hiaa, ni asumɔ lɛ. Mɔ ko kwraa sumɔɔɔ ni akɛ lɛ aye akɛ gbɔ aloo mɔkpɔŋ.

 2. Yehowa kɛ hefatalɔ ni he hiaa wɔ lɛ eha wɔ yɛ mɛɛ gbɛ nɔ?

² Yehowa Nyɔŋmɔ, nibii fɛɛ a-Feelɔ kɛ Bɔlɔ lɛ, le bɔ ni hefatalɔ he hiaa adesai lɛ jogbaŋŋ. Ákɛ ebɔɔ nii ni ji adesai a-Feelɔ lɛ, kɛjɛ shishijee tɔ̃ɔ lɛ, Nyɔŋmɔ le akɛ “ehiii akɛ gbɔmɔ lɛ kome hiɔ shi,” ni efee nɔ ko yɛ he. (1 Mose 2:18, 21, 22) Saji ni aŋmala yɛ Biblia lɛ mli lɛ eyi obɔ kɛ nɔkwɛmɔ nii ni tsɔɔ mlihilɛ nifeemɔi ni Yehowa kɛ etsuji ejie kpo etsɔɔ adesai. Enɛ yeɔ ebuaa wɔ ni wɔkaseɔ bɔ ni wɔɔfee ‘wɔbɔ gbɔfeemɔ he mɔdɛŋ,’ kɛha mɛi krokomɛi amiishɛɛnamɔ kɛ mlifilimɔ, koni wɔ diɛŋtsɛ hu wɔtsui anyɔ wɔmli.—Romabii 12:13.

Gbɔi Ahe Miishɛɛ Namɔ

 3. Tsɔɔmɔ bɔ ni gbɔfeemɔ shishinumɔ diɛŋtsɛ ji lɛ mli.

³ Atsɔɔ wiemɔ “gbɔfeemɔ,” taakɛ akɛtsu nii yɛ Biblia lɛ mli lɛ shishi kɛjɛ Hela wiemɔ phi·lo·xe·niʹa mli, ni aná kɛjɛ shishijee wiemɔi enyɔ ni shishinumɔ ji “suɔmɔ” kɛ “gbɔ” mli. Enɛ hewɔ lɛ, nɔ ni gbɔfeemɔ tsɔɔ krɛdɛɛ ji “suɔmɔ ni ayɔɔ kɛha gbɔi.” Shi kɛlɛ, enɛ jeee gbɛnaa nii ko ni aatsu he nii kɛkɛ loo nifeemɔ ni tsɔɔ bulɛ. Ekɔɔ mɔ henumɔi kɛ nibii ni esumɔɔ ahe. Taakɛ Exhaustive Concordance of the Bible ni James Strong fee lɛ tsɔɔ lɛ, feemɔ-wiemɔ phi·leʹo shishi ji “ni akɛ mɔ abɔ naanyo (aná [mɔ aŋkro loo nɔ ko] he miishɛɛ), ni ji akɛ aná suɔmɔ kɛha (ni tsɔɔ he ni akɛkpɛtɛɔ mɔ diɛŋtsɛ, ákɛ nɔ ni tsɔɔ tsui mlitalɛ loo henumɔ).” No hewɔ lɛ, gbɔfeemɔ yaa shɔŋŋ kɛtekeɔ suɔmɔ ni damɔ shishitoo mla nɔ kɛkɛ, ekolɛ ejɛɔ gbɛnaa nii loo sɔ̃ ni anuɔ he akɛ esa akɛ atsu he nii lɛ mli. Bei pii lɛ, efeɔ anɔkwa hedɔɔ, suɔmɔ, kɛ naanyobɔɔ kpojiemɔ.

 4. Namɛi esa akɛ ajie gbɔfeemɔ kpo atsɔɔ?

⁴ Mɔ ni ajieɔ nɛkɛ hedɔɔ kɛ suɔmɔ nɛɛ akpo atsɔɔ lɛ lɛ ji “gbɔ” (Hela, xeʹnos) lɛ. Namɔ mɔnɛ aaanyɛ afee? Shikome ekoŋŋ lɛ, Concordance ni Strong fee lɛ tsɔɔ wiemɔ xeʹnos shishi akɛ ‘mɔkpɔŋ (yɛ faŋŋ mli lɛ, gbɔ, loo yɛ mfoniri feemɔŋ lɛ mɔ hee); ni tsɔɔ akɛ mɔ ni ebato gbɔ loo (sɛɛsɛɛ lɛ) gbɔ.’ No hewɔ lɛ, gbɔfeemɔ, taakɛ afee he nɔkwɛmɔ nɔ yɛ Biblia lɛ mli lɛ, baanyɛ atsɔɔ mlihilɛ ni wɔjieɔ lɛ kpo wɔtsɔɔ mɔ ko ni wɔnaa ehe miishɛɛ, aloo abaanyɛ akpã mli aha gbɔ kwraa po. Yesu tsɔɔ mli akɛ: “Kɛji nyɛsumɔɔ mɛi ni sumɔɔ nyɛ lɛ, mɛɛ nyɔmɔwoo nyɛyɔɔ? Ani toohelɔi lɛ tete efeee nakai nɔŋŋ? Ni kɛji nyɛŋaa nyɛnyɛmimɛi kɛkɛ lɛ, enyiɛ nɔŋŋ nyɛfeɔ? Ani wɔŋjalɔi lɛ tete efeee nakai nɔŋŋ?” (Mateo 5:46, 47) Anɔkwa gbɔfeemɔ mli lɛɛɔ kɛtekeɔ mligbalamɔ kɛ hiɛaŋkwɛmɔ ni mɛi ahe jwɛŋmɔ fɔŋ namɔ kɛ gbeyeishemɔ kɛbaa lɛ.

Yehowa, Gbɔfeelɔ ni Eye Emuu

5, 6. (a) Mɛni yɔɔ Yesu jwɛŋmɔ mli beni ewie akɛ, “Nyɛtsɛ ni yɔɔ ŋwɛi lɛ hi kɛwula shi lɛ”? (b) Mɛɛ gbɛ nɔ anaa Yehowa mlihilɛ lɛ yɛ?

⁵ Beni etsɔɔ fatɔɔi ni yɔɔ suɔmɔ ni adesai jieɔ lɛ kpo amɛtsɔɔ amɛhe lɛ mli lɛ sɛɛ, taakɛ atsɛ yisɛɛ yɛ yiteŋgbɛ lɛ, Yesu kɛ wiemɔ nɛɛ fata he akɛ: “No hewɔ lɛ nyɛhia kɛwulaa shi, tamɔ bɔ ni nyɛtsɛ ni yɔɔ ŋwɛi lɛ hi kɛwula shi lɛ.” (Mateo 5:48) Yɛ anɔkwale mli lɛ, Yehowa eye emuu kɛwula shi yɛ nibii fɛɛ mli. (5 Mose 32:4) Shi kɛlɛ, Yesu miima Yehowa emuuyeli lɛ fã kome pɔtɛɛ ko pɛ nɔ mi, taakɛ ekɛɛ kɛtsɔ hiɛ lɛ, akɛ: “[Nyɔŋmɔ] haa ehulu teɔ shi yɛ mɛi fɔji kɛ mɛi kpakpai anɔ, ni ehaa nugbɔ nɛɔ yɛ jalɔi kɛ mɛi ni bɛ jalɛ lɛ anɔ.” (Mateo 5:45) Kɛ eba lɛ akɛ aajie mlihilɛ kpo lɛ, Yehowa kɛ hiɛaŋkwɛmɔ ko kwraa tsuuu nii.

⁶ Akɛ Bɔlɔ lɛ, Yehowa nii ji nɔ fɛɛ nɔ. “Kooŋ looi fɛɛ lɛ minɔŋ, kɛ lɛɛ kooloi akpei abɔ ni yɔɔ gɔji anɔ lɛ. Mile gɔji anɔ loofɔji fɛɛ, ni ŋaŋ kooloi hu minii ni,” Yehowa kɛɛ. (Lala 50:10, 11) Ni kɛlɛ, ekɛ nɔ ko kwraa etooo yɛ pɛsɛmkunya hewɔ. Ejɛɔ emlihilɛ lɛ mli ehaa ebɔɔ nii fɛɛ ahiamɔ nii. Lalatsɛ lɛ kɛɛ yɛ Yehowa he akɛ: “Ogbɛɔ odɛŋ ni ohaa nɔ fɛɛ nɔ ni hiɛ kã tɔɔ kɛ nii ni etaoɔ.”—Lala 145:16.

 7. Mɛni wɔbaanyɛ wɔkase kɛjɛ bɔ ni Yehowa kɛ gbɔi kɛ mɛi ni ehia amɛ lɛ yeɔ haa lɛ mli?

⁷ Yehowa haa gbɔmɛi nɔ ni he hiaa amɛ—gbɔmɛi ni leee lɛ po, ni ji gbɔi kɛha lɛ. Paulo kɛ Barnaba kai wɔŋjalɔi ni hi Listra maŋtiase lɛ mli lɛ akɛ, Yehowa “efɔ̃ɔɔ lɛ diɛŋtsɛ ehe odaseyeli, shi moŋ efeɔ ejurɔ ni ehaa nugbɔ jɛɔ ŋwɛi nɛɔ haa nyɛ, kɛ afii ni baa nii pii hu, ekɛ ŋmaa kɛ miishɛɛ woɔ nyɛtsuiiaŋ obɔbɔ.” (Bɔfoi lɛ Asaji 14:17) Yehowa jieɔ mlihilɛ kɛ nihamɔ kpo etsɔɔ mɛi ni ehia amɛ lɛ titri. (5 Mose 10:17, 18) Nibii babaoo yɛ ni wɔbaanyɛ wɔkase kɛjɛ Yehowa ŋɔɔ yɛ mlihilɛ kɛ nihamɔ kpojiemɔ mli—ni wɔjie gbɔfeemɔ kpo—wɔtsɔɔ mɛi krokomɛi.

 8. Yehowa ejie emlihilɛ lɛ kpo yɛ wɔ mumɔŋ hiamɔ nii ahe nitsumɔ gbɛfaŋ yɛ mɛɛ gbɛ nɔ?

⁸ Kɛfata heloonaa nii babaoo ni ehaa ebɔɔ nii lɛ he lɛ, Yehowa tsuɔ amɛhiamɔ nii ahe nii yɛ mumɔŋ hu. Yehowa fee nii yɛ nihamɔ kɛ mlihilɛ gbɛ ni fe fɛɛ nɔ kɛha wɔ mumɔŋ hilɛ-kɛhamɔ, dani wɔteŋ mɔ ko kwraa po na akɛ wɔyɛ jaramɔ shihilɛ ni mli wa mli yɛ mumɔŋ. Wɔkaneɔ yɛ Romabii 5:8, 10 akɛ: “Nyɔŋmɔ jieɔ lɛ diɛŋtsɛ esuɔmɔ ni ekɛsumɔ wɔ lɛ shi etsɔɔ, akɛ be mli ni wɔji eshafeelɔi lɛ beebe ni Kristo bagbo yɛ wɔnajiaŋ. . . . Be mli ni wɔji henyɛlɔi lɛ ni akɛ Nyɔŋmɔ bi lɛ gbele lɛ bakpata wɔkɛ Nyɔŋmɔ teŋ.” Nakai gbɛjianɔtoo lɛ haa adesai eshafeelɔi naa hegbɛ akɛ amɛkɛ wɔ ŋwɛi Tsɛ lɛ aaabote miishɛɛ wekukpaa mli. (Romabii 8:20, 21) Yehowa kwɛ hu koni akɛ kudɔmɔ kɛ gbɛtsɔɔmɔ kpakpa aha wɔ bɔni afee ni wɔnyɛ wɔye omanye yɛ shihilɛ mli, yɛ esha shihilɛ ni wɔyɔɔ mli kɛ emuu ni wɔyeee lɛ fɛɛ sɛɛ.—Lala 119:105; 2 Timoteo 3:16.

9, 10. (a) Mɛni hewɔ wɔbaanyɛ wɔkɛɛ akɛ Yehowa ji gbɔfeelɔ ni hi kɛwula shi lɛ? (b) Te esa akɛ anɔkwa jalɔi akase Yehowa yɛ enɛ gbɛfaŋ amɛha tɛŋŋ?

⁹ Enɛ hewɔ lɛ, wɔbaanyɛ wɔkɛɛ akɛ Yehowa ji gbɔfeelɔ ni eye emuu lɛlɛŋ yɛ gbɛi babaoo nɔ. Ekuuu ehiɛ efɔ̃ɔɔ ohiafoi, kɛ heshibalɔi, kɛ mɛi ni abuuu amɛ lɛ anɔ. Ejieɔ anɔkwa miishɛɛ kɛ hesusumɔ kpo yɛ gbɔi ahe, kɛ ehenyɛlɔi po, ni etaooo heloonaa nyɔmɔwoo ko yɛ enɛ he. Yɛ enɛ fɛɛ mli lɛ, ani ejeee gbɔfeelɔ ni eye emuu lɛ he nɔkwɛmɔ nɔ ni fe fɛɛ?

¹⁰ Ákɛ Nyɔŋmɔ ni jieɔ suɔmɔ kɛ mlihilɛ, kɛ nihamɔ ni tamɔ nɛkɛ kpo lɛ, Yehowa miitao ni ejálɔi akase lɛ. Wɔnaa nɛkɛ mlihilɛ su nɛɛ he nɔkwɛmɔ nii ni sa kadimɔ waa yɛ Biblia lɛ mli fɛɛ. Encyclopaedia Judaica lɛ kɛɔ akɛ “yɛ blema Israel lɛ, gbɔfeemɔ jeee sane ni kɔɔ jeŋba kpakpa ni aaajie lɛ kpo lɛ he kɛkɛ, shi moŋ eji jeŋba he gbɛjianɔtoo . . . Biblia mli kusumii ni ji miishɛɛ ni akɛnyaa gbɛfalɔ ni etɔ lɛ lɛ he, kɛ gbɔ ni ahereɔ lɛ hiɛmɛɛ ni ahaa ebafataa mɔ he lɛ ji nifeemɔ titri ni gbɔfeemɔ kɛ sui krokomɛi ni tamɔ nakai lɛ fɛɛ jɛ mli, ni etee hiɛ fiofio kɛbatsɔ jeŋba kpakpa ni abuɔ waa yɛ Yudafoi akusum mli.” Gbɔfeemɔ jeee kadimɔ nii ni anaa yɛ gbɔmɛi ni jɛ maŋ loo hewolonɔ su pɔtɛɛ ko mli lɛ pɛ ahe, shi moŋ esa akɛ efee subaŋ ni akɛkadiɔ Yehowa anɔkwa jalɔi fɛɛ.

Mɔ ko ni Fee Ŋwɛibɔfoi Agbɔ

11. Mɛɛ nɔkwɛmɔ nɔ ni sa kadimɔ waa tsɔɔ akɛ gbɔfeemɔ kɛ jɔɔmɔi ni akpaaa gbɛ baa? (Kwɛmɔ 1 Mose 19:1-3; Kojolɔi 13:11-16 hu.)

¹¹ Biblia mli saji ni ale jogbaŋŋ, ni kɔɔ gbɔfeemɔ su kpojiemɔ he lɛ ekome ji nɔ ni kɔɔ Abraham kɛ Sara he, beni amɛyashĩ buu ni amɛhi mli yɛ Mamre tsei wuji lɛ ateŋ, yɛ Hebron masɛi lɛ. (1 Mose 18:1-10; 23:19) Ŋwanejee ko bɛ he akɛ, sane ni ba nɛɛ ji nɔ ni yɔɔ bɔfo Paulo jwɛŋmɔ mli beni ekɛ ŋaawoo nɛɛ ha lɛ, akɛ: “Gbɔfeemɔ hu, nyɛhiɛ akakpaa nɔ; ejaakɛ no nɔ mɛi komɛi tsɔ̃ fee ŋwɛibɔfoi agbɔ, ni amɛleee.” (Hebribii 13:2) Sane ni aŋma nɛɛ kasemɔ baaye abua wɔ ni wɔna akɛ gbɔfeemɔ jeee sane ni kɔɔ kusum loo bɔ ni atsɔse mɔ ko aha pɛ he. Shi moŋ, eji Nyɔŋmɔ gbeyeishemɔ su ni kɛ jɔɔmɔi ni yɔɔ naakpɛɛ baa.

12. Te Abraham jie suɔmɔ ni eyɔɔ kɛha gbɔi lɛ kpo eha tɛŋŋ?

¹² Mose Klɛŋklɛŋ Wolo 18:1, 2 lɛ tsɔɔ akɛ Abraham leee saralɔi lɛ ni ekpaaa amɛ gbɛ hu, ni eyaa nɔ ewieɔ akɛ amɛji gbɔi etɛ ni miiho kɛmiiya he ko kɛkɛ. Taakɛ saji ahe wielɔi komɛi tsɔɔ lɛ, Bokagbɛ bii akusum ji akɛ, gbɛfalɔ ni eyaje shikpɔŋ ko nɔ, he ni eleee lɛ, yɛ hegbɛ ni ekpaa gbɔfeemɔ gbɛ, kɛji eleee mɔ ko mɔ ko kwraa yɛ jɛmɛ po. Shi Abraham emɛɛɛ ni gbɔi lɛ kɛ hegbɛ ni amɛyɔɔ nɛɛ atsu nii dã; lɛ moŋ eŋɔ hegbɛ lɛ klɛŋklɛŋ ni ekɛtsu nii. “Esha foi” koni ekɛ gbɔi nɛɛ ni no mli lɛ amɛkɛ lɛ teŋ jɛkɛ fioo lɛ ayakpe—ni efee enɛ fɛɛ “shwane ketekete” beni lɛ, Abraham lɛ eye afii 99! Ani enɛ etsɔɔɔ nɔ hewɔ ni Paulo tsĩ Abraham tã akɛ nɔkwɛmɔ nɔ kɛha wɔ koni wɔkase lɛ lɛ? No ji nɔ titri ni gbɔfeemɔ tsɔɔ, gbɔi ahe miishɛɛ loo suɔmɔ ni anaa, kɛ amɛhiamɔ nii ahesusumɔ. Eji subaŋ kpakpa diɛŋtsɛ.

13. Mɛni hewɔ Abraham “koto shi” eha saralɔi lɛ?

¹³ Sane ni aŋma lɛ kɛɔ wɔ hu akɛ, beni ekɛ gbɔi lɛ yakpe lɛ, no sɛɛ lɛ Abraham “koto shi.” Ani eekoto shi eeha gbɔi ni eye emuu? Ojogbaŋŋ, shikotomɔ, taakɛ Abraham fee lɛ, ji gbɛ ni atsɔɔ nɔ aŋãa gbɔ ni sa woo loo mɔ ko ni hiɛ gbɛhe ni nɔ kwɔ, ni esaaa ni wɔkɛfutuɔ nifeemɔ ni tsɔɔ jamɔ, ni esa akɛ akɛha Nyɔŋmɔ pɛ lɛ. (Okɛto Bɔfoi lɛ Asaji 10:25, 26; Kpojiemɔ 19:10 he.) Abraham tsɔ̃ shikotomɔ, ni jeee eyi shi ni emã kɛkɛ, shi moŋ ‘shikpɔŋ kotomɔ’ lɛ nɔ ekɛ woo ha gbɔi nɛɛ akɛ mɛi komɛi ni he hiaa. Blematsɛmɛi aweku ni da, ni yɔɔ nii babaoo hu lɛ yitso ji lɛ, shi kɛlɛ, ebu gbɔi nɛɛ akɛ mɛi ni sa woo fe lɛ diɛŋtsɛ. Kwɛ bɔ ni enɛ yɔɔ sɔrɔto kwraa yɛ su ni ajieɔ lɛ kpo daa, ni ji yiŋ ni etɛ̃ɛɛ mɔ yɛ gbɔi ahe, aloo makwɛ-lɛ-fioo-dã subaŋ lɛ he! Abraham jie shishinumɔ ni yɔɔ nɔ ni awie, akɛ: “Mɔ fɛɛ mɔ kɛ woo aha enaanyo tsutsu” lɛ sɛɛ lɛ kpo lɛlɛŋ.—Romabii 12:10.

14. Mɛɛ mɔdɛŋbɔɔ kɛ afɔleshaa yɔɔ gbɔfeemɔ ni Abraham jie lɛ kpo etsɔɔ gbɔi lɛ mli?

¹⁴ Sane lɛ fã ni eshwɛ lɛ tsɔɔ akɛ Abraham jie anɔkwa henumɔi diɛŋtsɛ kpo. Niyenii diɛŋtsɛ ni efee lɛ yɛ sɔrɔto kwraa. Akɛ “tsina bi ni esako ni hi” efeee niyenii daa gbi, yɛ weku ni da ni yɔɔ lɛɛ kooloi babaoo po lɛ mli. Daily Bible Illustrations, ni John Kitto fee lɛ wieɔ kusumii ni yaa nɔ yɛ nakai kpokpaa lɛ nɔ lɛ ahe akɛ: “Akɛ he wooo agboi anii loo fɛo nifeemɔi amli, ja gbijurɔyelii komɛi amli pɛ, aloo be mli ni gbɔ ko ebashɛ shi; ni nakai beaŋ pɛ ji be mli ni mɛi ni yɔɔ tooi kɛ tsinai babaoo lɛ po gbeɔ kooloo ni akɛfeɔ niyenii.” Bɔ ni jeŋ dɔɔ yɛ jɛmɛ lɛ eŋmɛɛɛ gbɛ ni anyɛ akɛ niyenii ni fiteɔ ato, no hewɔ lɛ kɛ aafee niyenii ni tamɔ nɛkɛ lɛ, esa akɛ afee nɔ fɛɛ nɔ agbe naa yɛ nakai be lɛ mli nɔŋŋ. Ebɛ naakpɛɛ akɛ wiemɔi “feemɔ mramra” loo ‘fee oya’ jeɔ kpo shii etɛ yɛ sane kuku ni agba nɛɛ mli, ni Abraham “sha foi” diɛŋtsɛ kɛtee ni eyafee niyenii lɛ klalo!—1 Mose 18:6-8.

15. Mɛni ji jwɛŋmɔ kpakpa ni esa akɛ ana yɛ heloonaa nibii ahe yɛ gbɔfeemɔ mli, taakɛ Abraham fee he nɔkwɛmɔ nɔ lɛ?

¹⁵ Shi kɛlɛ, yiŋtoo lɛ jeee ni aŋmɛ okpɔlɔ agbo ni akɛsa mɔ hiɛ. Eyɛ mli akɛ Abraham kɛ Sara bɔ mɔdɛŋ waa ni amɛkɛfee niyenii lɛ kɛha amɛ moŋ, shi kadimɔ bɔ ni Abraham tsɔ̃ hiɛ ewie he eha lɛ: “Ofainɛ, ha ni ayɛ nu fioo kɛba, ni nyɛkɛfɔ nyɛnaji ahe, ni nyɛjɔɔ nyɛhe yɛ tso lɛ shishi; ni mayakɔ aboloo atroma kome kɛba, ni nyɛkɛwo nyɛtsui, ni no sɛɛ koni nyɛfoŋ kɛya; shi no hewɔ nyɛbatsɔ̃ nyɛ tsulɔ ŋɔɔ nɛɛ.” (1 Mose 18:4, 5) Nakai “aboloo atroma kome” lɛ batsɔ̃ tsina bi ni ewo fɔ ni akɛŋmɛ okpɔlɔ, kɛ tatalei ni akɛ mã kpakpa eshĩ, kɛ butru, kɛ fufɔ—okpɔlɔŋmɛɛ ni sa maŋtsɛ. Mɛni wɔkaseɔ yɛ enɛ mli? Kɛ aajie gbɔfeemɔ kpo lɛ, nɔ ni he hiaa, loo nɔ ni esa akɛ ama nɔ mi lɛ jeee bɔ ni niyenii kɛ dãai lɛ baaŋɔɔ waa eha, aloo nɔ̃ hiɛtserɛjiemɔ ni abaabɔ mɔdɛŋ waa ni akɛha, kɛ nibii ni tamɔ nakai. Gbɔfeemɔ damɔɔɔ nyɛ ni mɔ ko baanyɛ ekɛ nibii ni jara wa atsu he nii lɛ nɔ. Shi moŋ, edamɔ anɔkwale mli ni ajɛɔ asusuɔ mɛi krokomɛi ahilɛ-kɛhamɔ he, kɛ suɔmɔ ni ayɔɔ akɛ afee mɛi krokomɛi ejurɔ bɔ ni aaanyɛ lɛ nɔ. Taakɛ Biblia abɛbua ko kɛɔ lɛ, “shwie ni suɔmɔ yɔɔ he lɛ ehi fe tsina ni ewo fɔ ni nyɛɛ yɔɔ he,” ni enɛ mli anaa anɔkwa gbɔfeemɔ su lɛ yɛ.—Abɛi 15:17.

16. Abraham jie hiɛsɔɔ kpo yɛ mumɔŋ nibii ahe yɛ nɔ ni efee eha saralɔi lɛ mli yɛ mɛɛ gbɛ nɔ?

¹⁶ Shi kɛlɛ, esa akɛ wɔkadi akɛ, nɔ ko ni he hiaa waa yɛ mumɔŋ hu yɛ sane muu lɛ fɛɛ mli. Abraham yoo yɛ gbɛ ko nɔ akɛ, tsuji ni jɛ Yehowa ŋɔɔ ji nɛkɛ saralɔi nɛɛ. Wiemɔi ni ekɛ amɛ wie nɛɛ ji nɔ ni tsɔɔ nakai, akɛ: “Nuntsɔ [Yehowa, NW], kɛji mihiɛ eba nyam yɛ ohiɛ lɛ, miikpao fai, kaaho otsulɔ he ooya!”a (1 Mose 18:3; okɛto 2 Mose 33:20 he.) Abraham leee kɛtsɔɔɔ hiɛ akɛ ekolɛ amɛyɛ shɛɛ sane ko kɛha lɛ, aloo kɛji amɛmiiho kɛkɛ kɛmiiya he ko. Yɛ fɛɛ sɛɛ lɛ, ena akɛ Yehowa yiŋtoo ko he nitsumɔ miiya nɔ. Gbɔmɛi nɛɛ miitsu nitsumɔ ko ni Yehowa kɛha amɛ lɛ he nii. Kɛji ebaanyɛ efee nɔ ko ni ekɛye ebua nakai nitsumɔ lɛ, ebaaná he miishɛɛ waa. Eyoo akɛ Yehowa tsuji sa nibii kpakpai fe fɛɛ, ni ekɛ enibii kpakpai fe fɛɛ lɛ baaha yɛ shihilɛ ni yɔɔ lɛ mli. Mumɔŋ jɔɔmɔ baajɛ nakai ni eeefee lɛ mli kɛba, kɛji kɛha lɛ diɛŋtsɛ ehe loo kɛha mɔ kroko. Taakɛ bɔ ni eba lɛ eha lɛ, ajɔɔ Abraham kɛ Sara babaoo yɛ amɛ anɔkwa gbɔfeemɔ lɛ hewɔ.—1 Mose 18:9-15; 21:1, 2.

Gbɔmɛi ni Sumɔɔ Gbɔfeemɔ

17. Mɛni Yehowa tao yɛ Israelbii lɛ adɛŋ, yɛ gbɔi kɛ mɛi ni ehia amɛ ni yɔɔ amɛteŋ lɛ agbɛfaŋ?

¹⁷ Esaaa ni jeŋmaŋ ni jɛ Abraham mli lɛ hiɛ kpaa enɔkwɛmɔ nɔ ni sa kadimɔ waa lɛ nɔ. Gbɛjianɔtoi ni akɛaajie gbɔfeemɔ kpo atsɔɔ gbɔi ni yɔɔ amɛteŋ lɛ fata Mla ni Yehowa kɛha Israelbii lɛ he. “Gbɔ ni toɔ gbɔ yɛ nyɛŋɔɔ lɛ, nyɛbua lɛ tamɔ nyɛmaŋ nyo nɔŋŋ, ni osumɔ lɛ tamɔ bɔ ni osumɔɔ bo diɛŋtsɛ ohe lɛ; ejaakɛ nyɛ hu nyɛyato gbɔ pɛŋ yɛ Mizraim shikpɔŋ lɛ nɔ. Mi ji Yehowa, nyɛ-Nyɔŋmɔ lɛ.” (3 Mose 19:34) Esa akɛ gbɔmɛi lɛ asusu mɛi ni heloonaa yelikɛbuamɔ he hiaa amɛ lɛ ahe yɛ gbɛ krɛdɛɛ nɔ, ni amɛkajie amɛ yɛ amɛjwɛŋmɔ mli akɛ amɛhe ehiaaa. Kɛ Yehowa jɔɔ amɛ kɛ ŋmɔshi nikpamɔ babaoo, kɛ́ amɛmiiye amɛ gbijuji kɛ miishɛɛ, kɛ́ amɛmiijɔɔ amɛhe yɛ amɛnitsumɔi amli yɛ Hejɔɔmɔ afii lɛ amli, kɛ bei krokomɛi amli hu lɛ, esa akɛ gbɔmɛi lɛ akai mɛi ni bɛ nɔ ko lɛ—okulafoi, awusãi, kɛ gbɔi ni ebahi amɛteŋ lɛ.—5 Mose 16:9-14; 24:19-21; 26:12, 13.

18. Te gbɔfeemɔ he hiaa ha tɛŋŋ, kɛ akɛmiito Yehowa duromɔ kɛ edɛŋ jɔɔmɔi ni aaana lɛ he?

¹⁸ Abaanyɛ ana bɔ ni mlihilɛ, nihamɔ, kɛ gbɔfeemɔ su ni ajieɔ lɛ kpo atsɔɔ mɛi krokomɛi, titri lɛ kɛha mɛi ni ehia amɛ lɛ he hiaa ha, yɛ bɔ ni Yehowa kɛ Israelbii lɛ ye ha beni amɛkpoo akɛ amɛaajie sui nɛɛ akpo lɛ mli. Yehowa ha efee faŋŋ akɛ mlihilɛ kɛ nihamɔ su ni ajieɔ lɛ kpo atsɔɔ gbɔi kɛ mɛi ni ehia amɛ lɛ fata taomɔ nii kɛha ewebii koni amɛnine ashɛ edɛŋ jɔɔmɔi anɔ daa lɛ he. (Lala 82:2, 3; Yesaia 1:17; Yeremia 7:5-7; Ezekiel 22:7; Zakaria 7:9-11) Kɛ maŋ lɛ kɛ mɔdɛŋbɔɔ tsu enɛɛmɛi kɛ taomɔ nii krokomɛi ahe nii lɛ, amɛshwereɔ ni amɛnaa heloonaa kɛ mumɔŋ nibii babaoo mli ŋɔɔmɔ. Kɛ amɛha amɛ diɛŋtsɛ amɛ pɛsɛmkunya taomɔ nii hé amɛjwɛŋmɔ fɛɛ, ni amɛku amɛhiɛ amɛfɔ̃ mlihilɛ sui nɛɛ ni amɛaajie kpo amɛtsɔɔ mɛi ni ehia amɛ lɛ nɔ lɛ, amɛnaa Yehowa dɛŋ fɔbuu, ni yɛ naagbee lɛ, atsuɔ toigbalamɔ kojomɔ he nii yɛ amɛnɔ.—5 Mose 27:19; 28:15, 45.

19. Mɛni esa akɛ wɔsusu he lolo?

¹⁹ Belɛ, kwɛ bɔ ni ehe hiaa waa akɛ wɔpɛi wɔ diɛŋtsɛ wɔmli ni wɔkwɛ akɛ, ani wɔmiihi shi yɛ Yehowa gbɛkpamɔi yɛ enɛ gbɛfaŋ lɛ anaa lo! Nakai enɛ ji ŋmɛnɛ, titri lɛ yɛ pɛsɛmkunya kɛ mligbalamɔ mumɔ ni yɔɔ je lɛŋ lɛ hewɔ. Mɛɛ gbɛ nɔ wɔɔtsɔ wɔjie Kristofoi agbɔfeemɔ kpo yɛ jeŋ ni mli egbala lɛ mli? No ji saneyitso ni awie he yɛ nikasemɔ ni nyiɛ sɛɛ lɛ mli.

[Shishigbɛ niŋmaa]

Ani Okaiɔ?

◻ Mɛni ji Biblia mli wiemɔ ni atsɔɔ shishi akɛ “gbɔfeemɔ” lɛ shishinumɔ?

◻ Yehowa ji gbɔfeemɔ he nɔkwɛmɔ nɔ ni hi kɛwula shi yɛ mɛɛ gbɛi anɔ?

◻ Nɛgbɛ Abraham jie gbɔfeemɔ su kpo kɛyashɛ?

◻ Mɛni hewɔ esa akɛ anɔkwa jálɔi fɛɛ ‘abɔ gbɔfeemɔ he mɔdɛŋ’ lɛ?