Nyɛhiɛa Ekomefeemɔ Mli Yɛ Naagbee Gbii Nɛɛ Amli
“Nyɛbaa nyɛjeŋ bɔ ni sa Kristo sanekpakpa lɛ kɛkɛ, koni, . . . nyɛdamɔ shi yɛ mumɔ kome mli, ni nyɛkɛ jwɛŋmɔ kome miipele sanekpakpa lɛ hemɔkɛyeli lɛ he.”—FILIPIBII 1:27.
1. Mɛɛ sɔrɔtofeemɔ kã Yehowa Odasefoi kɛ je lɛ teŋ?
“NAAGBEE gbii” lɛ nɛ. Ŋwanejee ko bɛ he akɛ, “jaramɔ bei” lɛ eba. (2 Timoteo 3:1-5) Yɛ “naagbee gbii” nɛɛ, kɛ bɔ ni adesai efee yeyeeye eha nɛɛ mli lɛ, Yehowa Odasefoi ebafee gbɔmɛi ni yɔɔ sɔrɔto kwraa, yɛ amɛ toiŋjɔlɛ kɛ ekomefeemɔ lɛ hewɔ. (Daniel 12:4) Shi aabi ni aŋkroaŋkro fɛɛ ni fata Yehowa jalɔi ajeŋ muu fɛɛ weku nɛɛ he lɛ atsu nii waa, ni ekɛhiɛ ekomefeemɔ nɛɛ mli.
2. Mɛni Paulo wie yɛ ekomefeemɔ mli ni aaahiɛ lɛ he, ni mɛɛ sanebimɔ abaasusu he?
2 Bɔfo Paulo wo nanemɛi Kristofoi lɛ ŋaa ni amɛhiɛ ekomefeemɔ mli. Eŋma akɛ: “Nyɛbaa nyɛjeŋ bɔ ni sa Kristo sanekpakpa lɛ kɛkɛ, koni, kɛ miba mibana nyɛ jio, mikɛ nyɛ bɛ jio, manu nyɛhe akɛ nyɛdamɔ shi yɛ mumɔ kome mli, ni nyɛkɛ jwɛŋmɔ kome miipele sanekpakpa lɛ hemɔkɛyeli lɛ he, ni nyɛkahaa henyɛlɔi lɛ miiwoa nyɛhe gbeyei yɛ nɔ̃ ko nɔ̃ ko mli, no nɔŋŋ ji hiɛkpatamɔ okadi ha amɛ, shi nyɛ lɛ, eji walaheremɔ okadi ha nyɛ, ni enɛ jɛ Nyɔŋmɔ dɛŋ.” (Filipibii 1:27, 28) Paulo wiemɔi lɛ tsɔɔ faŋŋ akɛ, esa akɛ wɔtsu nii kutuu akɛ Kristofoi. No hewɔ lɛ, mɛni baaye abua wɔ ni wɔhiɛ wɔ Kristofoi a-ekomefeemɔ lɛ mli yɛ jaramɔ bei nɛɛ amli?
Ba Ohe Shi Oha Ŋwɛi Suɔmɔnaa Nifeemɔ
3. Mɛɛ be, ni te fee tɛŋŋ ni klɛŋklɛŋ Jeŋmajiaŋbii foolɔi lɛ batsɔmɔ Kristo sɛɛnyiɛlɔi?
3 Gbɛ kome ni wɔɔtsɔ nɔ wɔhiɛ wɔ ekomefeemɔ lɛ mli ji kɛtsɔ wɔhe shi ni wɔɔba wɔha ŋwɛi suɔmɔnaa nii yɛ bei fɛɛ mli lɛ nɔ. Enɛ baabi tsakemɔ yɛ wɔsusumɔ mli. Susumɔ Yesu Kristo mra be mli kaselɔi Yudafoi lɛ ahe okwɛ. Beni bɔfo Petro shiɛ etsɔɔ Jeŋmajiaŋbii ni amɛfoko ketia lɛ klɛŋklɛŋ kwraa, yɛ afi 36 Ŋ.B. mli lɛ, Nyɔŋmɔ kɛ mumɔ krɔŋkrɔŋ ha gbɔmɛi ni jɛ jeŋmaji lɛ amli lɛ, ni abaptisi amɛ. (Bɔfoi lɛ Asaji, yitso 10) Kɛbashi nakai be lɛ, Yudafoi, kɛ mɛi ni amɛtsake amɛtsɔmɔ Yudafoi, kɛ Samariabii pɛ etsɔmɔ Yesu Kristo sɛɛnyiɛlɔi.—Bɔfoi lɛ Asaji 8:4-8, 26-38.
4. Beni etsɔɔ nɔ ni eba Kornelio nɔ lɛ mli lɛ sɛɛ lɛ, mɛni Petro wie, ni mɛɛ kaa enɛ kɛbafɔ Yesu kaselɔi Yudafoi lɛ ahiɛ?
4 Beni bɔfoi lɛ kɛ nyɛmimɛi krokomɛi ni yɔɔ Yerusalem lɛ ná amɛle akɛ atsake Kornelio kɛ Jeŋmajiaŋbii krokomɛi lɛ, amɛna miishɛɛ akɛ amɛaanu Petro amaniɛbɔɔ lɛ. Beni etsɔɔ nɔ ni ba ni kɔɔ Kornelio kɛ Jeŋmajiaŋbii krokomɛi ni heɔ yeɔ lɛ ahe lɛ mli lɛ, bɔfo lɛ mu sane lɛ naa kɛ wiemɔi nɛɛ: “Agbɛnɛ kɛ Nyɔŋmɔ eha amɛ [Jeŋmajiaŋbii ni heɔ yeɔ] nakai [mumɔ krɔŋkrɔŋ] nɔ̃keenɔ̃ lɛ nɔŋŋ, ni eha wɔ [Yudafoi] ni wɔheɔ Nuntsɔ Yesu Kristo lɛ wɔyeɔ lɛ hu lɛ: mi lɛ namɔ ji mi ni manyɛ Nyɔŋmɔ naa matsi?” (Bɔfoi lɛ Asaji 11:1-17) Enɛ kɛ kaa bafɔ̃ Yesu Kristo sɛɛnyiɛlɔi Yudafoi lɛ anɔ. Ani amɛbaaŋmɛɛ amɛhe amɛha Nyɔŋmɔ suɔmɔnaa nífeemɔ, ni amɛkpɛlɛ Jeŋmajiaŋbii ni heɔ yeɔ lɛ anɔ akɛ amɛnanemɛi jálɔi? Aloo oshara baaba Yehowa shikpɔŋ nɔ tsuji lɛ ekomefeemɔ lɛ he?
5. Mɛɛ gbɛ bɔfoi lɛ kɛ nyɛmimɛi krokomɛi lɛ tsɔ nɔ amɛhere anɔkwale ni eji akɛ, Nyɔŋmɔ eha Jeŋmajiaŋbii lɛ tsuitsakemɔ lɛ nɔ, ni mɛni wɔbaanyɛ wɔkase kɛjɛ nɛkɛ su nɛɛ mli?
5 Sane lɛ kɛɔ akɛ: “Shi beni [bɔfoi lɛ kɛ onukpai krokomɛi lɛ] amɛnu wiemɔi nɛɛ lɛ, amɛbu amɛnaa, ni amɛwo Nyɔŋmɔ hiɛ nyam amɛkɛɛ: ‘Belɛ jeŋmaji lɛ hu Nyɔŋmɔ eha amɛ tsuitsakemɔ ni akɛaahere amɛyiwala.’” (Bɔfoi lɛ Asaji 11:18) Nakai subaŋ lɛ báa Yesu sɛɛnyiɛlɔi lɛ ekomefeemɔ yi ni eha eshwere. Yɛ be kukuoo pɛ mli lɛ, shiɛmɔ nitsumɔ lɛ tee hiɛ yɛ Jeŋmajiaŋbii lɛ, loo gbɔmɛi ni jɛ jeŋmaji lɛ amli lɛ ateŋ, ni Yehowa jɔɔmɔ yɛ nitsumɔi ni tamɔ nɛkɛ nɔ. Esa akɛ wɔ diɛŋtsɛ hu wɔkpɛlɛ nɔ, kɛ abi wɔ ekomefeemɔ yɛ asafo hee ko shishitoo mli, loo kɛ afee teokrase tsakemɔ yɛ Nyɔŋmɔ mumɔ krɔŋkrɔŋ lɛ gbɛtsɔɔmɔ shishi lɛ mli lɛ. Wɔtsui muu fɛɛ mli ni wɔɔjɛ wɔkpã gbee lɛ baasa Yehowa hiɛ, ni ebaaye ebua wɔ ni wɔhiɛ wɔ ekomefeemɔ lɛ mli yɛ naagbee gbii nɛɛ amli.
Kpɛtɛmɔ Anɔkwale lɛ He
6. Te anɔkwale lɛ saa Yehowa jalɔi ekomefeemɔ lɛ he ehaa tɛŋŋ?
6 Akɛ Yehowa jálɔi aweku lɛ fã lɛ, wɔhiɛɔ ekomefeemɔ mli, ejaakɛ ‘Yehowa tsɔɔ wɔ fɛɛ nii,’ ni wɔmɔɔ enɔkwale ni ejie lɛ kpo lɛ mli kpɛŋŋ. (Yohane 6:45; Lala 43:3) Akɛni wɔ tsɔɔmɔi lɛ damɔ Nyɔŋmɔ Wiemɔ lɛ nɔ hewɔ lɛ, wɔ fɛɛ wɔwieɔ kɛ naabu kome. Wɔkɛ miishɛɛ kpɛlɛɔ mumɔŋ niyenii ni Yehowa etsɔ “tsulɔ anɔkwafo kɛ nilelɔ” lɛ nɔ esaa kɛha wɔ lɛ nɔ. (Mateo 24:45-47) Nitsɔɔmɔ yɛ ekomefeemɔ mli yɛ gbɛ ni tamɔ nɛkɛ nɔ yeɔ ebuaa wɔ ni wɔhiɛɔ wɔ ekomefeemɔ yɛ jeŋ fɛɛ lɛ mli.
7. Kɛ ewa kɛha wɔ aŋkroaŋkroi lɛ akɛ wɔɔnu sane ko shishi lɛ, mɛni esa akɛ wɔfee, ni mɛni esaaa akɛ wɔfeɔ?
7 Ni kɛ́ ewa kɛha wɔ aŋkroaŋkroi akɛ wɔɔnu loo wɔɔkpɛlɛ tsɔɔmɔ ko nɔ hu? Esa akɛ wɔsɔle wɔbi nilee, ni wɔpɛi Ŋmalɛi lɛ kɛ Kristofoi awoji amli. (Abɛi 2:4, 5; Yakobo 1:5-8) Onukpa ko ni akɛ lɛ aaasusu enɛ he baaye abua. Kɛ anuuu sane lɛ shishi lolo lɛ, ebaahi jogbaŋŋ akɛ aaaŋmɛɛ he. Ekolɛ abaaŋmala sane lɛ he nibii babaoo, ni ebaaha wɔ shishinumɔ mli alɛɛ. Shi ebaafee nɔ ni ejaaa, akɛ oootsɔ mɛi krokomɛi ni yɔɔ asafo lɛ mli lɛ ayiŋ, ni amɛkpɛlɛ wɔsusumɔ ni esoro no lɛ nɔ. Enɛ dũɔ gbeekpamɔ ni bɛ ewoɔ mɔ mli, ni etsuuu nii ni ekɛbaa ekomefeemɔ yi. Kwɛ bɔ ni ehi jogbaŋŋ moŋ akɛ ‘wɔɔya nɔ wɔnyiɛ yɛ anɔkwale lɛ mli,’ ni wɔwo mɛi krokomɛi ahewalɛ ni amɛfee nakai!—3 Yohane 4.
8. Mɛɛ su ni aaaná yɛ anɔkwale lɛ he ji nɔ ni sa?
8 Paulo wie yɛ klɛŋklɛŋ afii oha lɛ mli akɛ: “Ŋmɛnɛŋmɛnɛ lɛ, ashwishwɛ mli wɔtsɔɔ wɔnaa nii tuutuu, shi no mli lɛ, hiɛ kɛ hiɛ; ŋmɛnɛŋmɛnɛ lɛ, mile nii fã-kɛ-fã, shi no mli lɛ, male nii kɛyishi, tamɔ bɔ ni ale mi kɛyishi lɛ.” (1 Korintobii 13:12) Eyɛ mli akɛ mra be mli Kristofoi lɛ enaaa nɔ fɛɛ nɔ mli fitsofitso moŋ, shi kɛlɛ, amɛfee ekome kɛhi shi. Wɔyɛ Yehowa yiŋtoo kɛ enɔkwa Wiemɔ lɛ ahe shishinumɔ babaoo ni mli ka shi faŋŋ bianɛ. Belɛ, nyɛhaa wɔdaa shi yɛ anɔkwale lɛ ni wɔnine eshɛ nɔ kɛtsɔ “tsulɔ anɔkwafo” lɛ nɔ lɛ hewɔ. Ni nyɛhaa wɔdaa shi akɛ Yehowa etsɔ egbɛjianɔtoo lɛ nɔ enyiɛ wɔhiɛ. Yɛ be mli ni jeee nilee ni fa lɛ nɔŋŋ wɔ fɛɛ wɔyɔɔ lɛ, mumɔŋ hɔmɔ kɛ kumai yeee wɔ. Yɛ no najiaŋ lɛ, wɔ-Kwɛlɔ, Yehowa, eha wɔhi shi yɛ ekomefeemɔ mli, ni ekwɛ wɔnɔ jogbaŋŋ.—Lala 23:1-3.
Okɛ Lilɛi lɛ Atsu Nii yɛ Gbɛ ni Ja Nɔ!
9. Mɛɛ gbɛ nɔ aaatsɔ ni akɛ lilɛi lɛ atsu nii ni akɛha ekomefeemɔ ashwere?
9 Lilɛi lɛ kɛ nitsumɔ koni akɛwo mɛi krokomɛi ahewalɛ ji gbɛ ni he hiaa ni atsɔɔ nɔ ahaa ekomefeemɔ kɛ nyɛmifeemɔ mumɔ yaa hiɛ. Wolo ni aŋma, ni saa ketiafoo he béi, ni klɛŋklɛŋ afii oha lɛ mli nɔyeli kuu lɛ kɛmaje lɛ ji hewalɛwoo jɛɛhe. Beni amɛkane sɛɛ lɛ, kaselɔi Jeŋmajiaŋbii ni yɔɔ Antiokia lɛ ‘amii shɛ amɛhe yɛ miishɛjemɔ lɛ hewɔ.’ Yuda kɛ Sila, ni akɛ wolo lɛ tsu amɛ kɛjɛ Yerusalem lɛ “kɛ wiemɔ babaoo shɛje nyɛmimɛi lɛ amii, ni amɛwo amɛ hewalɛ.” Ŋwanejee ko bɛ he akɛ, Paulo kɛ Barnaba ni amɛna amɛ lɛ hu wo nanemɛi heyelilɔi ní yɔɔ Antiokia lɛ hewalɛ. (Bɔfoi lɛ Asaji 15:1-3, 23-32) Wɔbaanyɛ wɔfee nakai nɔŋŋ, kɛ wɔbua wɔhe naa kɛha Kristofoi akpeei, ni ‘wɔwowoo wɔhe hewalɛ’ kɛtsɔ jɛmɛ ni wɔyɔɔ kɛ wɔ wiemɔi ni tswaa mɔ maa shi lɛ nɔ.—Hebribíi 10:24, 25.
10. Bɔni afee ni ekomefeemɔ ahi shi lɛ, mɛni ekolɛ abaafee kɛ ajɛ mɔ ko?
10 Shi, lilɛi lɛ kɛ nitsumɔ yɛ gbɛ ni ejaaa nɔ baanyɛ afite wɔ ekomefeemɔ lɛ. Kaselɔ Yakobo ŋma akɛ: “Lilɛi hu, henɔ̃ bibioo ni, ni eshwãa nii wuji. Naa, la bibioo hu, nyɛkwɛa koo bɔ sɔŋŋ ni eshãa!” (Yakobo 3:5) Yehowa nyɛ̃ɛɔ mɛi ni woɔ béi. (Abɛi 6:16-19) Wiemɔ ni tamɔ nɛkɛ kɛ mligbalamɔ baa. No hewɔ lɛ, kɛji akɛ ajɛ́ mɔ ko, ni ji akɛ, abɔ lɛ ahora, loo asopa lɛ hu? Onukpai lɛ baabɔ mɔdɛŋ ni amɛye amɛbua efɔŋ feelɔ lɛ. Shi kɛlɛ, esa akɛ ashwie mɔ̃ jɛlɔ ni tsakeee etsui lɛ, koni akɛbaa asafo lɛ toiŋjɔlɛ, gbɛjianɔtoo kpakpa, kɛ ekomefeemɔ lɛ yi. Fɛɛ sɛɛ lɛ, Paulo ŋma akɛ: “Kɛji mɔ ko ni atsɛɔ lɛ nyɛmi lɛ ji . . . mɔ̃ jɛlɔ . . . lɛ, lɛ lɛ nyɛkɛ lɛ akayea nii tete.”—1 Korintobii 5:11.
11. Mɛni hewɔ heshibaa he hiaa kɛ wɔwie nɔ ko ni kɛ mlifu eba wɔ kɛ wɔnaanyo heyelilɔ ko teŋ lɛ?
11 Lilɛi lɛ ni awoɔ lɛ manyofɛlɛ lɛ yeɔ ebuaa wɔ ni ehaa ekomefeemɔ hiɔ wɔteŋ. (Yakobo 3: 10-18) Shi, ŋɔɔ lɛ akɛ nɔ ko ni wɔwie eha mlifu eba wɔ kɛ naanyo Kristofonyo ko teŋ. Ani efeŋ nɔ ni sa akɛ wɔtsɔ hiɛ wɔtao wɔkɛ wɔnyɛmi lɛ teŋ toiŋjɔlɛ, ni wɔkpa fai po kɛ aaahi? (Mateo 5:23, 24) Yɛ anɔkwale mli lɛ, enɛ biɔ humifeemɔ, loo heshibaa jwɛŋmɔ, shi Petro ŋma akɛ: “Nyɛbaa nyɛhe shi nyɛhaa nyɛhe, ni nyɛbumɔa heshibaa jwɛŋmɔ lɛ, ejaakɛ Nyɔŋmɔ kuɔ hewolɔi anaa, shi heshibalɔi eduroɔ.” (1 Petro 5:5) Heshibaa baatsirɛ wɔ ni ‘wɔtiu’ wɔkɛ wɔnyɛmimɛi ateŋ ‘toiŋjɔlɛ sɛɛ,’ wɔkpɛlɛ wɔtɔmɔi anɔ, ni wɔkɛ faikpamɔ ni sa aha. Enɛ yeɔ buaa ni ehaa Yehowa weku lɛ ekomefeemɔ hiɔ shi.—1 Petro 3:10, 11.
12. Te wɔɔfee tɛŋŋ ni wɔkɛ lilɛi lɛ atsu nii ni wɔkɛha ekomefeemɔ ni kã Yehowa webii ateŋ lɛ ahi shi?
12 Wɔbaanyɛ wɔha weku mumɔ ni yɔɔ mɛi ni yɔɔ Yehowa gbɛjianɔtoo lɛ mli lɛ aya hiɛ, kɛ wɔkɛ wɔ lilɛi tsu nii yɛ gbɛ kpakpa nɔ. Akɛni nakai Paulo fee hewɔ lɛ, ebaanyɛ ekai Tesalonikabii lɛ akɛ: “Taakɛ bɔ nɔŋŋ ni nyɛle akɛ wɔwieɔ wɔtsɔɔ nyɛteŋ mɔ fɛɛ mɔ, tamɔ bɔ ni tsɛ ko wieɔ etsɔɔ ebii, ni wɔshɛjeɔ nyɛmii hu, ni wɔma nɔ mi wɔha nyɛ akɛ, nyɛnyiɛ bɔ ni sa Nyɔŋmɔ.” (1 Tesalonikabii 2:11, 12) Akɛni efee nɔkwɛmɔ nɔ kpakpa yɛ enɛ mli hewɔ lɛ, Paulo baanyɛ awo nanemɛi Kristofoi lɛ hewalɛ akɛ, “nyɛshɛjea mɛi ni tsui fãa lɛ amii.” (1 Tesalonikabii 5:14) Susumɔ ekpakpa babaoo ni wɔbaanyɛ wɔfee, kɛtsɔ lilɛi lɛ ni wɔkɛaatsu nii ni wɔkɛshɛje mɛi amii, wɔkɛwo hewalɛ, ni wɔkɛtswa mɛi krokomɛi wɔma shi lɛ nɔ lɛ he okwɛ. Hɛɛ, “wiemɔ ni awie yɛ be ni sa mli lɛ, ehi pam!” (Abɛi 15:23) Agbɛnɛ hu, wiemɔ ni tamɔ nɛkɛ yeɔ ebuaa ni ehaa ekomefeemɔ ni yɔɔ Yehowa webii ateŋ lɛ yaa hiɛ ni ehiɔ shi hu.
Okɛ Sane Ake!
13. Mɛni hewɔ esa akɛ wɔkɛ sane ake?
13 Mɔ ni etɔ̃, ni ekpa fai, ni akɛ sane keɔ lɛ lɛ he hiaa kɛ wɔɔha Kristofoi a-ekomefeemɔ ahi shi. Ni shii enyiɛ esa akɛ wɔkɛ sane ake? Yesu kɛɛ Petro akɛ: “Jeee, Kɛyashi shii kpawo, shi moŋ, Kɛyashi shii nyɔŋmai kpawo kɛ kpawo.” (Mateo 18:22, NW) Kɛ wɔkɛ sane ekeee lɛ, belɛ wɔmiite shi kɛmiiwo nibii ni he baaba sɛɛnamɔ aha wɔ diɛŋtsɛ lɛ. Yɛ mɛɛ gbɛ nɔ? Ojogbaŋŋ, nyɛ̃ɛ kɛ bɛ ni abɛɔ mɔ awoɔ mli baaha wɔlaaje jwɛŋmɔŋ toiŋjɔlɛ. Ni kɛ ana ale wɔ akɛ, wɔgbɛ́i tsɔɔ akɛ wɔyi wa ni wɔkɛ sane ekeee lɛ, mɛi baatsi amɛhe kɛjɛ wɔhe. (Abɛi 11:17) Bɛ ni abɛɔ mɔ awoɔ mli lɛ esaaa Nyɔŋmɔ hiɛ, ni ebaanyɛ ekɛ esha ni hiɛdɔɔ yɔɔ mli aba. (3 Mose 19:18) Kaimɔ akɛ, afo Yohane Baptisilɔ lɛ yitso yɛ ŋaa fɔŋ ni Herodia, yiwalɔ lɛ, ni “bɛ lɛ wo emli” lɛ tsɔ̃ lɛ hewɔ.—Marko 6:19-28.
14. (a) Mɛni Mateo 6:14, 15 tsɔɔ wɔ yɛ eshaifaa he? (b) Ani esa akɛ wɔmɛ ni akpa wɔ fai be fɛɛ be dani wɔkɛ sane ake mɔ?
14 Wiemɔi nɛɛ fata Yesu sɔlemɔ nɔkwɛmɔ nɔ lɛ he: “Okɛ wɔhe eshai ake wɔ, ejaakɛ wɔ hu wɔkɛkeɔ mɔ fɛɛ mɔ ni tɔɔ wɔnɔ.” (Luka 11:4, NW) Kɛ wɔkɛ sane ekeee lɛ, oshara yɛ akɛ, gbi ko lɛ Yehowa Nyɔŋmɔ hu kɛ wɔhe eshai ekeŋ wɔ, ejaakɛ Yesu kɛɛ: “Kɛji nyɛkɛ mɛi atɔmɔi ke amɛ lɛ, nyɛ-Tsɛ ni yɔɔ ŋwɛi lɛ kɛaake nyɛ hu; shi kɛji nyɛkɛ mɛi atɔmɔi ekeee amɛ lɛ, nyɛ-Tsɛ lɛ hu kɛ nyɛtɔmɔi ekeŋ nyɛ.” (Mateo 6:14, 15, NW) No hewɔ lɛ, kɛji akɛ wɔmiisumɔ diɛŋtsɛ ni wɔfee wɔ gbɛfaŋnɔ yɛ ekomefeemɔ ni wɔɔha ahi Yehowa jálɔi aweku lɛ mli lɛ he lɛ, wɔkɛ sane baake daa, ekolɛ ni wɔha wɔhiɛ akpa tɔmɔ ko ni ba, ni jɛ nɔ̃ ko he ni asusuuu jogbaŋŋ, ni jwɛŋmɔ fɔŋ ko bɛ sɛɛ lɛ nɔ. Paulo kɛɛ: “Nyɛnanaa nyɛhaa nyɛhe, ni nyɛkɛfafaa nyɛhe, taakɛ bɔ ni [Yehowa, NW] hu ŋɔfa nyɛ lɛ, nakai nyɛ hu nyɛfea.” (Kolosebii 3:13) Kɛ wɔkɛ sane keɔ lɛ, wɔyeɔ wɔbuaa koni ekomefeemɔ ni jara wa ni yɔɔ Yehowa gbɛjianɔtoo lɛ mli lɛ ahi shi nakai.
Ekomefeemɔ kɛ Mɔ Diɛŋtsɛ Yiŋkpɛi
15. Mɛni yeɔ buaa Yehowa webii ni amɛhiɛɔ ekomefeemɔ mli beni amɛkpɛɔ amɛ diɛŋtsɛ amɛyiŋ lɛ?
15 Nyɔŋmɔ bɔ wɔ akɛ mɛi ni yeɔ amɛhe, ni halaa nɔ ni amɛsumɔɔ, ni yɔɔ hegbɛ kɛ gbɛnaa nii akɛ amɛaakpɛ amɛyiŋ amɛha amɛhe. (5 Mose 30:19, 20; Galatabii 6:5) Kɛlɛ, wɔnyɛɔ wɔhiɛɔ wɔ ekomefeemɔ lɛ mli, ejaakɛ wɔyeɔ Biblia mlai kɛ shishitoo taomɔnii anɔ. Wɔsusuɔ nomɛi ahe kɛ wɔmiikpɛ yiŋ wɔha wɔhe. (Bɔfoi lɛ Asaji 5:29; 1 Yohane 5:3) Ŋɔɔ lɛ akɛ sane ko ni kɔɔ maŋ saji ni akɛ he wooo mli he ete shi. Wɔ diɛŋtsɛ wɔbaanyɛ wɔdamɔ nilee nɔ wɔkpɛ wɔyiŋ, kɛtsɔ kaimɔ ni wɔɔkai akɛ, ‘wɔjɛɛɛ je lɛ mli,’ ni wɔkɛ ‘wɔ klantei esɔ kɔii’ lɛ nɔ. (Yohane 17:16; Yesaia 2:2-4) Nakai nɔŋŋ hu, kɛ esa akɛ wɔkpɛ wɔ diɛŋtsɛ wɔyiŋ yɛ tsakpãa ni kã wɔkɛ Maŋ lɛ teŋ lɛ he lɛ, wɔsusuɔ nɔ ni Biblia lɛ kɛɔ yɛ ‘Nyɔŋmɔ nii ni wɔkɛaaha Nyɔŋmɔ’ lɛ he, yɛ be mli ni wɔyaa nɔ wɔbaa wɔhe shi wɔhaa “hegbɛi ni yeɔ nɔ” lɛ yɛ je lɛŋ saji amli lɛ. (Luka 20:25; Romabii 13:1-7; Tito 3:1, 2) Hɛɛ, Biblia mlai kɛ shishitoo taomɔnii ni wɔɔsusu he, beni wɔkpɛɔ wɔ diɛŋtsɛ wɔyiŋ lɛ yeɔ ebuaa ni ehaa wɔ Kristofoi a-ekomefeemɔ lɛ hiɔ shi.
16. Mɛɛ gbɛ nɔ wɔɔtsɔ wɔye wɔbua koni ekomefeemɔ ahi shi, beni wɔkpɛɔ yiŋ ni ja loo ejaaa yɛ Ŋmalɛ naa lɛ? Feemɔ enɛ he nɔkwɛmɔ nɔ.
16 Wɔbaanyɛ wɔye wɔbua koni Kristofoi a-ekomefeemɔ ahi shi, yɛ be mli ni wɔkpɛɔ wɔ diɛŋtsɛ wɔyiŋ, ni ja loo ejaaa yɛ Ŋmalɛ naa lɛ. Yɛ mɛɛ gbɛ nɔ? Kɛtsɔ suɔmɔ ni wɔkɛaasusu mɛi krokomɛi ni ekolɛ wɔ yiŋkpɛɛ lɛ baanyɛ asa amɛhe lɛ ahe lɛ nɔ. Akɛ nɔkwɛmɔ nɔ lɛ: Sane ko te shi ni kɔɔ loo ni akɛshã afɔle aha wɔji he, yɛ blema Korinto asafo lɛ mli. Eji anɔkwale akɛ, Kristofonyo kɛ ehe woŋ wɔŋjamɔ kusum nifeemɔ mli. Shi, ejeee esha, akɛ aaaye kooloo ni afɔse ela ashwie shi jogbaŋŋ ni tamɔ nɛkɛ, ni ahɔ̃ɔ eloo ni eshwɛ lɛ yɛ maŋ jara nɔ lɛ. (Bɔfoi lɛ Asaji 15:28, 29; 1 Korintobii 10:25) Ni kɛlɛ, Kristofoi komɛi ahenileei gba amɛnaa yɛ loo ni tamɔ nɛkɛ ni ayeɔ lɛ he. No hewɔ lɛ, Paulo wo Kristofoi krokomɛi lɛ hewalɛ akɛ, amɛkpa amɛnane tɔ̃tɔ̃mɔ. Yɛ anɔkwale mli lɛ, eŋma akɛ: “No hewɔ lɛ, kɛji ŋmãa aaaha minyɛmi nane atɔ̃tɔ̃ lɛ, no lɛ miyeŋ loo gbi ko gbi ko dɔŋŋ, koni mikaha minyɛmi nane miitɔ̃tɔ̃.” (1 Korintobii 8:13) No hewɔ lɛ, kɛji akɛ ekɔɔɔ Biblia mla loo shishitoo taomɔnii ko he po lɛ, kwɛ bɔ ni etsɔɔ suɔmɔ, akɛ aaasusu mɛi krokomɛi ahe, beni mɔ diɛŋtsɛ kpɛɔ eyiŋ ni baanyɛ asa Nyɔŋmɔ weku lɛ ekomefeemɔ he lɛ!
17. Mɛni jwɛŋmɔ yɔɔ mli akɛ wɔɔfee beni esa akɛ wɔkpɛ yiŋ wɔha wɔ diɛŋtsɛ wɔhe lɛ?
17 Kɛ wɔbɛ nɔmimaa yɛ gbɛ ni esa akɛ wɔkɔ lɛ he lɛ, nilee yɛ mli akɛ wɔɔkpɛ yiŋ yɛ gbɛ ni haa wɔhiɛɔ henilee kpakpa mli nɔ, ni esa akɛ mɛi krokomɛi kɛ bulɛ aha wɔ yiŋkpɛɛ lɛ. (Romabii 14:10-12) Shi, kɛ esa akɛ wɔkpɛ yiŋ wɔha wɔhe lɛ, esa akɛ wɔtao Yehowa gbɛtsɔɔmɔ yɛ sɔlemɔ mli. Taakɛ lalatsɛ lɛ ji lɛ, wɔbaanyɛ wɔsɔle yɛ hekɛnɔfɔɔ mli akɛ: “Ba otoi shi oha mi, . . . ejaakɛ mi tɛsaa kɛ mi mɔ̃ɔ jio, no hewɔ lɛ tsɔɔmɔ mi gbɛ, ni owa mi yɛ ogbɛi lɛ hewɔ.”—Lala 31:3, 4.
Nyɛhiɛa Kristofoi a-Ekomefeemɔ Mli Be Fɛɛ Be
18. Paulo fee Kristofoi asafo lɛ ekomefeemɔ lɛ he nɔkwɛmɔ nɔ yɛ mɛɛ gbɛ nɔ?
18 Paulo kɛ adesa gbɔmɔtso lɛ tsu nii ni ekɛfee Kristofoi asafo lɛ ekomefeemɔ he nɔkwɛmɔ nɔ, yɛ 1 Korintobii yitso 12. Ema he ni akɛaafɔ̃fɔ̃ɔ he nɔ, kɛ bɔ ni emli bii lɛ ateŋ mɔ fɛɛ mɔ he hiaa lɛ nɔ mi. Paulo bi akɛ: “Shi kɛ amɛ fɛɛ amɛji henɔ̃ kome lɛ, nɛgbɛ gbɔmɔtso lɛ yɔɔ? Shi agbɛnɛ lɛ, henii pii ni moŋ, shi gbɔmɔtso komeŋ. Shi hiŋmɛi nyɛŋ akɛɛ nine akɛ: Mibɛ ohe nitsumɔ; ni asaŋ yitso nyɛŋ akɛɛ naji akɛ: Mibɛ nyɛhe nitsumɔ.” (1 Korintobii 12:19-21) Nakai nɔŋŋ jeee wɔ fɛɛ ni wɔyɔɔ Yehowa jálɔi aweku lɛ mli lɛ tsuɔ nitsumɔ kome too lɛ nɔŋŋ. Ni kɛlɛ, wɔfee ekome, ni wɔhe hiaa wɔhe wɔhe.
19. Mɛɛ gbɛ nɔ wɔɔtsɔ wɔna Nyɔŋmɔ mumɔŋ gbɛjianɔtoi lɛ ahe sɛɛ, ni mɛni nyɛmi nuu ko ni eda wie yɛ enɛ he?
19 Taakɛ niyenii, kwramɔ, kɛ gbɛtsɔɔmɔ he hiaa gbɔmɔtso lɛ, nakai mumɔŋ gbɛjianɔtoo ni Nyɔŋmɔ tsɔɔ e-Wiemɔ, mumɔ, kɛ gbɛjianɔtoo lɛ nɔ ekɛhaa wɔ lɛ he hiaa wɔ. Kɛ gbɛjianɔtoi nɛɛ ahe aaaba sɛɛnamɔ aha wɔ lɛ, no lɛ esa akɛ wɔfata Yehowa shikpɔŋ nɔ weku lɛ he. Beni nyɛmi nuu ko kɛ afii pii ehi Nyɔŋmɔ sɔɔmɔ mli lɛ, eŋma akɛ: “Miida shi babaoo akɛ mihi shi yɛ Yehowa yiŋtoi ahe nilee lɛ mli, kɛjɛ nakai mra gbii ni tsɔ 1914 hiɛ, beni nibii bɛ faŋŋ jogbaŋŋ lɛ amli, . . . kɛbashi ŋmɛnɛ gbi nɛɛ, ni anɔkwale lɛ kpɛɔ tamɔ shwane fintiŋŋ hulu lɛ. Kɛji akɛ nɔ̃ kome ko efee nɔ ni he hiaa mi waa lɛ, no ji Yehowa gbɛjianɔtoo ni anaa lɛ ni mikɛ mihe kpɛtɛ he gbagbalii lɛ. Niiashikpamɔ ni mina kɛjɛ mra mli lɛ tsɔɔ mi bɔ ni adesa susumɔ ni akɛ he aaafɔ nɔ lɛ bɛ shweshweeshwe ha. Beni mikpɛ miyiŋ yɛ nakai sane lɛ he pɛ kɛkɛ ni mitswa mifai shi akɛ, mikɛ gbɛjianɔtoo ni yeɔ anɔkwa lɛ baahi shi. Mɛɛ gbɛ kroko po yɔɔ ni mɔ ko aaatsɔ nɔ aná Yehowa hiɛ duromɔ kɛ jɔɔmɔ?”
20. Mɛni esa akɛ wɔtswa wɔfai shi akɛ wɔbaafee yɛ wɔ ekomefeemɔ akɛ Yehowa webii lɛ he?
20 Yehowa etsɛ ewebii lɛ kɛjɛ je lɛŋ duŋ kɛ mligbalamɔ lɛ mli. (1 Petro 2:9) Ekɛ wɔ eba wɔkɛ lɛ diɛŋtsɛ kɛ wɔnanemɛi heyelilɔi lɛ ateŋ ekomefeemɔ ni jɔɔmɔ yɔɔ mli lɛ mli. Ekomefeemɔ nɛɛ baahi shi yɛ nibii agbɛjianɔtoo hee lɛ ni ebɛŋkɛ kpaakpa lɛ mli. No hewɔ lɛ, nyɛhaa wɔyaa nɔ ni ‘wɔwoa suɔmɔ,’ ni wɔfee nɔ fɛɛ nɔ ni wɔɔnyɛ, ni wɔkɛha wɔ ekomefeemɔ ni jara wa lɛ aya hiɛ ni wɔhiɛ mli yɛ nɛkɛ jaramɔ gbii nɛɛ amli.—Kolosebii 3:14.
Te Obaaha Hetoo Oha Tɛŋŋ?
◻ Mɛni hewɔ Nyɔŋmɔ suɔmɔnaa nifeemɔ kɛ anɔkwale lɛ ni wɔkɛ wɔhe aaakpɛtɛ he lɛ baaye abua wɔ ni wɔhe ekomefeemɔ ahi shi?
◻ Lilɛi lɛ kɛ nitsumɔ yɛ gbɛ ni ja nɔ kɔɔ ekomefeemɔ he yɛ mɛɛ gbɛ nɔ?
◻ Mɔ ni kɛ tɔ̃mɔ̃-keɔ ni oooji lɛ kɔɔ mɛni he?
◻ Mɛɛ gbɛ nɔ wɔɔtsɔ wɔhiɛ ekomefeemɔ mli beni wɔkpɛɔ wɔ diɛŋtsɛ wɔyiŋ lɛ?
◻ Mɛni hewɔ esa akɛ ohiɛ Kristofoi ‘ a-ekomefeemɔ mli?
[Mfoniri ni yɔɔ baafa 16]
Taakɛ tookwɛlɔ nɛɛ buaa etooku lɛ naa lɛ, nakai Yehowa haa ewebii lɛ feɔ ekome
[Mfoniri ni yɔɔ baafa 18]
Heshibaa baaye obua wɔ ni wɔha ekomefeemɔ aya nɔ kɛtsɔ fai ni wɔɔkpa beni wɔtɔ̃ lɛ nɔ