Yohane Baptisilɔ lɛ Saa Gbɛ lɛ Eto

Aaafee afii 17 eho kɛjɛ be ni Yesu ye afii 12 ni etee sɔlemɔwe lɛ eyabibii tsɔɔlɔi lɛ saji lɛ. Amrɔ nɛɛ, afi 29 Ŋ.B., March loo April eshɛ. Yesu wekunyo Yohane miishiɛ yɛ kpokpaa ni yɔɔ Yordan Faa lɛ anaigbɛ lɛ fɛɛ nɔ, ni mɛi babaoo miiwie ehe.

Yohane hesaamɔ kɛ ewiemɔ fɛɛ hãa mɛi ajwɛŋmɔ yaa enɔ waa. Ewoɔ atade ní akɛ yoma hetsɔi lo, ni ekɛ kooloo hewolo hɛfiinɔ fiɔ ehɛ. Eyeɔ baalabii, ni ji agã henɔ ko lɛ, kɛ ŋa mli wo. Mɛni ji sane ni eshiɛɔ lɛ? “Nyɛtsakea nyɛtsui, ejaakɛ ŋwɛi Maŋtsɛyeli lɛ ebɛŋkɛ nyɛ.”​—Mateo 3:2.

Mɛi ni baboɔ Yohane toi lɛ náa esane lɛ he miishɛɛ waa. Amɛteŋ mɛi babaoo yɔse akɛ esa akɛ amɛtsake amɛtsui, ni tsɔɔ akɛ, amɛtsake amɛjeŋba kɛ amɛgbɛi, ni amɛkwa amɛtsutsu shihilɛ ni esaaa lɛ. Mɛi ni baa eŋɔɔ lɛ jɛɔ “Yerusalem kɛ Yudea fɛɛ kɛ Yordan niiaŋ fɛɛ.” (Mateo 3:5) Mɛi ni baa eŋɔɔ nɛɛ ateŋ mɛi babaoo tsakeɔ amɛtsui. Emuɔ amɛ mele yɛ Yordan Faa lɛ mli kɛbaptisiɔ amɛ. Mɛni hewɔ?

Ebaptisiɔ amɛ kɛfeɔ anɔkwayeli mli ni amɛjɛɔ amɛtsakeɔ amɛtsui yɛ eshai ni amɛfee amɛshi Nyɔŋmɔ Mla kpaŋmɔ lɛ hewɔ lɛ he okadi. (Bɔfoi 19:4) Shi jeee mɛi fɛɛ sa baptisimɔ. Be ni jamɔŋ hiɛnyiɛlɔi komɛi, ni ji Farisifoi kɛ Sadukifoi lɛ ba Yohane ŋɔɔ lɛ, etsɛ amɛ “shikpãi ashwiei.” Ekɛɛ amɛ akɛ: “Nyɛwoa yibii ni sa tsuitsakemɔ . . . Nyɛkasusua yɛ nyɛmli akɛ, ‘Wɔtsɛ ji Abraham.’ Ejaakɛ miikɛɛ nyɛ akɛ, Nyɔŋmɔ baanyɛ atee bii ashi kɛjɛ tɛi nɛɛ amli ehã Abraham. Lema lɛ kã tsei lɛ ashishifã lɛ nɔ momo. Belɛ, tso fɛɛ tso ni wooo yibii kpakpa lɛ, abaatoo afɔ̃ shi ni ashɛ afɔ̃ la lɛ mli.”​—Mateo 3:7-10.

Akɛni mɛi babaoo miibo Yohane toi, esane lɛ miiná mɛi anɔ hewalɛ waa, ni eebaptisi mɛi babaoo hewɔ lɛ, atsu osɔfoi kɛ Levibii komɛi koni amɛyabi lɛ akɛ: “Namɔ ji bo?”

Yohane wie faŋŋ akɛ: “Jeee miji Kristo lɛ.”

Amɛbi lɛ akɛ: “Namɔ ji bo mɔ? Ani bo ji Elia?”

Ehã amɛ hetoo akɛ: “Jeee mi ni.”

Amɛbi lɛ akɛ: “Ani bo ji Gbalɔ lɛ?,” ni tsɔɔ akɛ Gbalɔ kpele ni Mose kɛɛ ebaaba lɛ.​—5 Mose 18:15, 18.

Yohane hã hetoo akɛ: “Dabi!”

Amɛtee nɔ amɛbi lɛ akɛ: “Namɔ ji bo? Kɛɛmɔ wɔ koni wɔná hetoo wɔhã mɛi ni tsu wɔ lɛ. Mɛni okɛɔ yɛ bo diɛŋtsɛ ohe?” Yohane kɛɛ amɛ akɛ: “Miji mɔ gbee ni boɔ yɛ ŋa lɛ nɔ akɛ, ‘Nyɛfea Yehowa gbɛ lɛ trɔmɔɔ,’ taakɛ gbalɔ Yesaia kɛɛ lɛ.”​—Yohane 1:19-23.

Amɛbi lɛ akɛ: “Belɛ, kɛjeee bo ji Kristo lɛ loo Elia loo Gbalɔ lɛ, mɛni hewɔ obaptisiɔ mɔ?” Ehã amɛ hetoo ni mɔɔ shi akɛ: “Mi lɛ, mibaptisiɔ yɛ nu mli. Mɔ ko damɔ nyɛteŋ ni nyɛleee lɛ, mɔ ni baa yɛ misɛɛ lɛ.”​—Yohane 1:25-27.

Hɛɛ, Yohane kpɛlɛ nɔ akɛ eeye eebua mɛi lɛ koni amɛsaa amɛtsui bɔ ni afee ni amɛkpɛlɛ Mesia ni agba ehe sane afɔ̃ shi, mɔ ni baatsɔ Maŋtsɛ lɛ nɔ. Ni ekɛ enɛ miisaa gbɛ lɛ eeto. Yohane wie yɛ Yesu he akɛ: “Mɔ ni baa yɛ misɛɛ lɛ he wa fe mi, etokotai tete lɛ, misaaa mɔ ni jieɔ.” (Mateo 3:11) Anɔkwa, Yohane wie po akɛ: “Mɔ ni baa yɛ misɛɛ lɛ etsɔ mihiɛ, ejaakɛ eyɛ shihilɛ mli dani miba.”​—Yohane 1:15.

Enɛ hewɔ lɛ, sane ni Yohane shiɛ akɛ, “Nyɛtsakea nyɛtsui, ejaakɛ ŋwɛi Maŋtsɛyeli lɛ ebɛŋkɛ nyɛ” lɛ sa jogbaŋŋ diɛŋtsɛ. (Mateo 3:2) No hã mɛi na akɛ etsɛŋ ni Yesu Kristo, mɔ ni Yehowa ehala akɛ ebaaye Maŋtsɛ lɛ baaje esɔɔmɔ lɛ shishi.