Sanebimɔi ni Jɛ Kanelɔi Adɛŋ
Mɛni hewɔ “New World Translation” Biblia lɛ tsɔɔ Mateo 3:7 shishi kakadaŋŋ akɛ “hiŋmɛi gba” moŋ fe “ena” taakɛ akɛtsu nii yɛ Biblia shishitsɔɔmɔi pii amli lɛ?
Yɛ anɔkwale mli lɛ, abaanyɛ ni akɛ shishitsɔɔmɔi lɛ fɛɛ eko atsu nii ni ejeee tɔmɔ. Ni jeee wiemɔi fɛɛ nyɛɔ tsɔɔ shishijee Hela lɛ shishi kɛ ŋɔɔmɔ yɛ enɛ mli. Shi bɔ ni atsɔɔ Mateo 3:7 shishi aha yɛ New World Translation of the Holy Scriptures lɛ mli yɛ Ŋleshi wiemɔ mli lɛ kɛ wiemɔ he-woo ni ŋɔɔ ni anaa yɛ Hela niŋmaa lɛ mli lɛ tsu nii. Wɔkaneɔ akɛ: “Beni [Yohane Baptisilɔ] lɛ hiŋmɛi gba Farisifoi kɛ Sadukifoi pii ni miiba baptisimɔ lɛ he lɛ anɔ lɛ, ekɛɛ amɛ akɛ: ‘Shinɔi ashwiei, namɔ wó nyɛtoi nɔ akɛ nyɛjo mlifu ni baa lɛ naa foi?’ ”
Taakɛ akadi lɛ, Bibliai pii kɛɔ kɛkɛ akɛ Yohane “na” Farisifoi lɛ kɛ Sadukifoi lɛ ni miiba he ni ebaptisiɔ Yudafoi lɛ yɛ lɛ. Shi, ani Biblia lɛ miitsɔɔ akɛ, Yohane na bɔ ni enɛ yaa nɔ lɛ yɛ be kpalaŋŋ mli, tamɔ nɔ ni ekwɛ enɛ shii abɔ ko dani yɛ naagbee lɛ no kanya lɛ koni ewie amɛ osatofeemɔ gbɛ lɛ he lɛ? Wiemɔ “na” lɛ baanyɛ aha ana shishinumɔ ni tamɔ nɛkɛ. Yɛ anɔkwale mli lɛ, nakai shishinumɔ lɛ jeɔ kpo yɛ bɔ ni Ferrar Fenton tsɔɔ shishi eha lɛ mli, ni ekɛɔ akɛ: “Shi beni ena Farisifoi lɛ . . . babaoo.”
Hela feemɔ-wiemɔ ni atsɛɔ lɛ aorist lɛ akɛtsu nii. Aorist lɛ tsɔɔ nifeemɔ ni sɛɛ etsɛɛɛ, yɛ be mli ni amrɔ wiemɔ lɛ tsɔɔ nɔ ko ni afeɔ kɛtsaraa nɔ (nɔ ko ni miiya nɔ) ni wiemɔ ni tsɔɔ nɔ ni eye emuu lɛ tsɔɔ áfee ágbe naa (áfee). No hewɔ lɛ aorist feemɔ-wiemɔ ni yɔɔ Mateo 3:7 lɛ shishinumɔ ji akɛ, Yohane Baptisilɔ lɛ na Farisifoi lɛ kɛ Sadukifoi lɛ ni miiba yɛ be lɛ eko mli, loo “ehiŋmɛi gba” amɛnɔ. Beni eba lɛ nakai pɛ ni ewie, taakɛ wɔkaneɔ yɛ kukuji 7-12 lɛ.
Aorist kɛ nitsumɔ yɛ shishinumɔ ni tamɔ nɛkɛ naa lɛ he nɔkwɛmɔ nii pii yɛ. Kɛ wɔyoo bɔ ni akɛwoɔ sane he ahaa lɛ eeeha wɔkɛ henumɔ anu nɔ ni Biblia lɛ kɛɔ lɛ shishi babaoo.
Akɛ nɔkwɛmɔ nɔ lɛ, Mateo 9:9 (NW) kɛɔ akɛ: “Beni Yesu hoɔ yɛ jɛmɛ lɛ, ehiŋmɛi gba nuu ko ni atsɛɔ lɛ Mateo lɛ nɔ ni eta toohemɔ he lɛ, ni ekɛɛ lɛ akɛ: ‘Feemɔ misɛɛnyiɛlɔ.’ Kɛkɛ ni ete shi ni enyiɛ esɛɛ.” Ehe ehiaaa ni Yesu afite be kakadaŋŋ ni ekɛmiikwɛ Mateo, ni asaŋ ehe ehiaaa ni ekwɛ Mateo shii abɔ. Yesu hiŋmɛi gba Mateo nɔ, ni E-tsu he nii.
Enɛɛmɛi ji nɔkwɛmɔ nii enyɔ ni tsɔɔ bɔ ni New World Translation lɛ tsuɔ Hela feemɔ-wiemɔi ni yɔɔ aorist shishinumɔ mli lɛ ahe nii jogbaŋŋ ehaa. Susumɔ bɔ ni ejeɔ kpo nakai nɔŋŋ yɛ hei komɛi lɛ ahe okwɛ, ni okwɛ nibii ni akɛwoɔ wiemɔ lɛ he ni haa eŋɔɔ lɛ ekomɛi:
“Agbɛnɛ, beni eba nɔyelɔ lɛ we lɛ, ni ehiŋmɛi gba blɛkpalɔi kɛ asafoi ni kɛ yiŋfutumɔ efee hoo lɛ anɔ lɛ, Yesu je shishi ekɛɛ amɛ akɛ: ‘Nyɛshia jɛmɛ, ejaakɛ gbekɛ yoo lɛ gbooo, shi wɔ kɛkɛ ewɔɔ.’ ”—Mateo 9:23, 24, NW.
“Beni amɛ hiŋmɛi gba enɔ ni enyiɛ ŋshɔ lɛ hiɛ lɛ, kaselɔi lɛ atsui fa, ni amɛkɛɛ: ‘Ninaa ko ni!’ Ni amɛkɛ gbeyeishemɔ bolɔ. Shi amrɔ nɔŋŋ ni Yesu kɛ amɛ wie akɛ: ‘Nyɛnaa tsui, mi ni.’ ”—Mateo 14:26, 27, NW.
“Agbɛnɛ kpeehe lɛ nɔkwɛlɔi onukpai lɛ ateŋ mɔkome, ni atsɛɔ lɛ Yairo lɛ ba, ni beni ehiŋmɛi gba [Yesu] nɔ lɛ, eho egbee shi yɛ enaji anaa ni ekpa lɛ fai shii abɔ, akɛ: ‘He ni mibiyoo fioo lɛ ka lɛ ehiii kwraa. Hewɔ lɛ ofainɛ ba ni okɛ oniji abashwie enɔ.’ ”—Marko 5:22, 23, NW.
“Shi beni ebɛŋkɛ [Nain] maŋ lɛ agbo lɛ naa lɛ, naa! atere nuu ko ni egbo kɛmiije kpo, enyɛ lɛ bi koome ji lɛ. Kɛfata he lɛ, okulafo ji yoo lɛ. Ni gbɔmɛi babaoo ni jɛ maŋ lɛ mli fata ehe. Ni beni Nuntsɔ lɛ hiŋmɛi gba enɔ lɛ, enii fee lɛ mɔbɔ, ni ekɛɛ lɛ akɛ: ‘Kpa yaafo.’ ”—Luka 7:12, 13, NW.
“No hewɔ lɛ, beni Maria bashɛ he ni Yesu yɔɔ lɛ, ni ehiŋmɛi gba [Yesu] nɔ lɛ, eho egbee enaji ashi, ni ekɛɛ lɛ akɛ: ‘Nuntsɔ, eji oyɛ biɛ kulɛ, minyɛmi lɛ gboŋ.’ No hewɔ lɛ, beni Yesu na bɔ ni efoɔ ni Yudafoi lɛ ni kɛ lɛ ba lɛ miifo lɛ, ekpokpo kɛ awerɛho yɛ mumɔ mli.”—Yohane 11:32, 33, NW.
Kɛ obaasumɔ ni okane ekrokomɛi ofata he lɛ, kwɛmɔ Bɔfoi lɛ Asaji 7:23-25; 9:39, 40; 21:32; 28:3-5; kɛ 1 Yohane 5:16. Nakai feemɔ hu baanyɛ afee bɔ ni Biblia kaselɔi ni kɛ hiɛdɔɔ kaseɔ nii lɛ baanyɛ aha nɔ ni aŋma yɛ Nyɔŋmɔ Wiemɔ lɛ mli lɛ he shishinumɔ ni amɛaana lɛ mli alɛɛ ni emli akwɔ lɛ he nɔkwɛmɔ nɔ.