Kwɛmɔ Jogbaŋŋ ni Okɛ Nibii ni He Hiaa Aye Klɛŋklɛŋ Gbɛhe!

Abaaya kpee gbɛkɛ nɛɛ, shi oyɛ nitsumɔ ni obaatsu. Te nɔ ni okɛbaaye klɛŋklɛŋ gbɛhe?

OJI wu kɛ tsɛ. Yɛ be mli ni nitsumɔ mli gbi ni sɛɛ jɛkɛ ni tɔlɛ yɔɔ mli lɛ baa naagbee lɛ, ojwɛŋmɔ tsɔ kɛtee asafoŋ kpee he gbɛjianɔtoo kɛha gbɛkɛnaashi lɛ nɔ. Kɛ oshi nitsumɔhe lɛ amrɔ nɔŋŋ lɛ, obaaná be ni sa ni okɛbaaju ohe, okɛtsake otadei lɛ, ni okɛye nii oya dani oshi kɛya kpee lɛ shishi. Trukaa nɔŋŋ lɛ, onitsumɔtsɛ lɛ ba oŋɔɔ ni ebi bo koni otsu nii kɛteke be ni ato akɛ okɛtsu nii lɛ. Ewo bo shi akɛ ebaawo bo nyɔmɔ jogbaŋŋ. Shika lɛ he miihia bo.

Aloo oji ŋa kɛ nyɛ. Yɛ be mli ni otoɔ gbɛkɛ niyenii he gbɛjianɔ lɛ, ohiŋmɛi gba atadei babaoo ni abua naa ni atooko nɔ, ni ekomɛi ahe baahia enɔ jetsɛrɛmɔ lɛ nɔ. Obi ohe akɛ, ‘Kɛ mitee kpee gbɛkɛnaashi nɛɛ, mɛɛ be mana ni mikɛtoo nibii lɛ anɔ?’ Akɛni nyɛsɛɛ nɛɛ oyabi nitsumɔ ni akɛbe-fɛɛ tsuɔ hewɔ lɛ, ookase bɔ ni ewa akɛ aaatsu shia nitsumɔi ahe nii yɛ be mli ni ataoɔ daaŋ ŋmaa lɛ.

Aloo oji nikaselɔ. Obua skul nifeemɔi ni akɛbaa shia lɛ babaoo naa oshwie okpɔlɔ lɛ nɔ yɛ otsũ lɛ mli. Amɛteŋ babaoo ji nifeemɔ ni akɛha be ko ni eho nɛ, shi otsi oto aahu, ni amrɔ nɛɛ nifeemɔi babaoo eba shikome. Oohe ni obi ofɔlɔi agbɛ koni ohi shia ni okaya kpee lɛ koni ogbe oskul nifeemɔ ni akɛbaa shia lɛ naa.

Te nɔ ni okɛbaaye klɛŋklɛŋ gbɛhe lɛ: heloonaa nitsumɔ kroko ni ebafata he lɛ, nibii anɔ toomɔ lɛ, skul nifeemɔ ni akɛbaa shia lɛ, loo asafoŋ kpee lɛ? Kɛ aaawie yɛ mumɔ naa lɛ, mɛni ji nɔ ni nibii ni he hiaa ni akɛaaye klɛŋklɛŋ gbɛhe lɛ tsɔɔ? Mɛni ji Yehowa susumɔ?

Mɛni Esa akɛ Akɛye Klɛŋklɛŋ Gbɛhe?

Beni Israelbii lɛ anine shɛ Kitai Nyɔŋma lɛ nɔ etsɛɛɛ sɛɛ lɛ, ana ni nuu ko miilɛ́ lai yɛ Hejɔɔmɔ Gbi lɛ nɔ. Agu enɛ kwraa yɛ Mla lɛ mli. (4 Mose 15:32-34; 5 Mose 5:12-15) Kulɛ, te oookojo sane lɛ oha tɛŋŋ? Ani kulɛ okɛ nuu lɛ he baake lɛ, kɛ naatsɔɔmɔ akɛ ejaakɛ jeee akɛ eetsu nii koni ekɛhiɛ ogbɔjɔ shihilɛ ko mli, shi moŋ koni ekɛ eweku lɛ hiamɔ nii aha? Ani kulɛ obaasusu he akɛ bei babaoo yɛ, yɛ afi lɛ mli ni akɛbaaye Hejɔɔmɔ Gbi lɛ, ni akɛ abaanyɛ akɛ ekome mli ni aaafo yɛ gbɛjianɔ ni ekolɛ mɔ lɛ etooo kɛtsɔɔɔ hiɛ lɛ hewɔ lɛ ake kɛkɛ?

Yehowa bu sane lɛ kɛ hiɛdɔɔ babaoo. Biblia lɛ kɛɔ akɛ: “Ni Yehowa kɛɛ Mose akɛ: Gbe ágbe nuu lɛ.” (4 Mose 15:35) Mɛni hewɔ Yehowa nu nɔ ni nuu lɛ fee lɛ he waa nakai lɛ?

Gbɔmɛi lɛ yɛ gbii ekpaa ni amɛkɛbaalɛ́ lai ni amɛkɛbaatsu amɛhiamɔ nii ni kɔɔ niyenii, atade, kɛ wɔɔhe lɛ he nii. Esa akɛ amɛtuu gbi ni ji kpawo lɛ amɛha amɛmumɔŋ hiamɔ nii. Yɛ be mli ni tɔ̃mɔ bɛ he akɛ aaalɛ́ lai lɛ, tɔ̃mɔ yɛ he akɛ akɛ be ni esa akɛ akɛfɔ̃ shi kɛha Yehowa jamɔ atsu enɛ he nii. Eyɛ mli akɛ Kristofoi bɛ Mose Mla lɛ shishi moŋ, shi ani nifeemɔ nɛɛ etsɔɔɔ wɔ nii yɛ nibii ni he hiaa lɛ ni wɔkɛaaye klɛŋklɛŋ gbɛhe jogbaŋŋ lɛ he ŋmɛnɛ?—Filipibii 1:10.

Yɛ be mli ni amɛkɛ afii 40 ehi ŋa lɛ nɔ sɛɛ lɛ, Israelbii lɛ fee klalo koni amɛbote Shiwoo Shikpɔŋ lɛ nɔ. Mana ni ji ŋwɛi niyenii ni akɛha amɛ yeli yɛ ŋa lɛ nɔ lɛ eje mɛi komɛi atsine, ni ŋwanejee ko bɛ he akɛ amɛmiikwɛ gbɛ akɛ abaatsake amɛniyenii lɛ mli aha amɛ. Bɔni afee ni aye abua amɛ koni amɛhiɛ jwɛŋmɔ kpakpa yɛ be mli ni amɛboteɔ shikpɔŋ ni “fufɔ kɛ wò hoɔ yɛ nɔ lɛ,” Yehowa kai amɛ akɛ: “Jeee aboloo kɛkɛ haa gbɔmɔ yi náa wala, shi moŋ nɔ fɛɛ nɔ ni jɛɔ Yehowa daaŋ lɛ haa gbɔmɔ yi náa wala.”—2 Mose 3:8; 5 Mose 8:3.

Esa akɛ Israelbii lɛ atsu nii waa kɛha amɛ “fufɔ kɛ wò” lɛ. Asraafoi yɛ ni esa akɛ aye amɛnɔ kunim, tsũi yɛ ni esa akɛ amamɔ, kɛ ŋmɔji ni esa akɛ adũ nii yɛ mli. Yɛ no feemɔ mli po lɛ, Yehowa fã gbɔmɛi lɛ koni amɛto be ko gbi fɛɛ gbi koni amɛkɛjwɛŋ mumɔŋ saji ahe. Esa akɛ amɛŋɔ be hu koni amɛkɛtsɔɔ amɛbii lɛ Nyɔŋmɔ gbɛ̀i. Yehowa kɛɛ akɛ: “Ni nyɛŋɔtsɔɔ nyɛbii [mi kitai lɛ], ni nyɛwie he, beni ota oshia kɛ beni onyiɛ gbɛ teŋ kɛ beni oka shi kɛ beni ote shi.”—5 Mose 11:19.

Afã koni nuu fɛɛ nuu ni ji Israelnyo kɛ nuu fɛɛ nuu ni etsake kɛba Yuda jamɔ lɛ mli abapue yɛ Yehowa hiɛ shii etɛ yɛ afi mli. Beni amɛyɔse akɛ weku muu lɛ fɛɛ baaná mumɔŋ sɛɛnamɔ kɛjɛ nakai kpeei lɛ amli lɛ, weku yitsei babaoo to gbɛjianɔ kɛha amɛbii kɛ amɛŋamɛi lɛ koni amɛfata amɛhe kɛya. Shi namɔ baabu amɛshiai kɛ amɛŋmɔji lɛ ahe kɛjɛ henyɛlɔi atutuamɔ mli beni weku lɛ eshi kɛtee lɛ? Yehowa wo amɛ shi akɛ: “Be mli ni otee oyapue yɛ Yehowa, o-Nyɔŋmɔ lɛ, hiɛ daa afi shii etɛ lɛ, mɔ ko mɔ ko hiɛ ekɔŋ oshikpɔŋ lɛ nɔ.” (2 Mose 34:24) Ebi hemɔkɛyeli ni Israelbii lɛ ahe aye akɛ kɛ́ amɛkɛ mumɔŋ nibii ye klɛŋklɛŋ gbɛhe lɛ, heloonaa nɔ ko eshwɛŋ amɛ. Ani Yehowa ye ewiemɔ lɛ mli anɔkwa? Efee nakai lɛɛlɛŋ!

Yaa Nɔ Otao Maŋtsɛyeli lɛ Klɛŋklɛŋ

Yesu tsɔɔ esɛɛnyiɛlɔi lɛ koni amɛkɛ mumɔŋ nibii aye nibii krokomɛi fɛɛ ahiɛ. Yɛ Gɔŋ nɔ Shiɛmɔ lɛ mli lɛ, ewo etoibolɔi lɛ ŋaa akɛ: “Nyɛkahaoa nyɛhe nyɛkɛɛa akɛ: Mɛni wɔɔye, aloo mɛni wɔɔnu, mɛni hu wɔɔŋɔha wɔhe? . . . nyɛtaoa . . . maŋtsɛyeli lɛ kɛ ejalɛ lɛ tsutsu, ni akɛ nii nɛɛ [heloonaa nibii ni he hiaa lɛ] fɛɛ aaafata he aha nyɛ.” (Mateo 6:31, 33) Yesu gbele sɛɛ nɔŋŋ lɛ, Kristofoi ni abaptisi amɛ ehee lɛ nyiɛ nakai ŋaawoo lɛ sɛɛ. Amɛteŋ mɛi babaoo ji Yudafoi loo mɛi ni etsake kɛba Yuda jamɔ lɛ mli ni fã gbɛ kɛtee Yerusalem kɛha Pentekoste gbi jurɔ lɛ yeli yɛ afi 33 Ŋ.B. Beni amɛyɔɔ jɛmɛ lɛ, nɔ ko ni akpaaa gbɛ ba. Amɛnu sanekpakpa ni kɔɔ Yesu Kristo he lɛ, ni amɛmɔ mli. Akɛni amɛmiisumɔ koni amɛkase amɛhemɔkɛyeli hee ni amɛná lɛ he nii babaoo hewɔ lɛ, amɛhi Yerusalem. Amɛniyenii lɛ bɔi tãa, shi heloonaa miishɛjemɔ nii ji hiamɔ nii ni baa gbɛhe ni ji enyɔ. Amɛna Mesia lɛ! Amɛnyɛmimɛi Kristofoi lɛ kɛ amɛ ja nɔ̃ heloonaa nii ni amɛyɔɔ lɛ bɔni afee ni amɛ fɛɛ amɛya nɔ “amɛhiɛ bɔfoi lɛ atsɔɔmɔ lɛ kɛ . . . sɔlemɔi lɛ amli.”—Bɔfoi lɛ Asaji 2:42.

Yɛ be ko sɛɛ lɛ, Kristofoi komɛi kwa hiamɔ ni yɔɔ kpeei ni aaaya daa lɛ. (Hebribii 10:23-25) Ekolɛ, amɛfee mɛi ni tiuɔ heloonaa nii asɛɛ, ni amɛkwaa mumɔŋ nibii yɛ be mli ni amɛbɔɔ mɔdɛŋ koni amɛfee shweshweeshwe yɛ shika gbɛfaŋ kɛha amɛhe kɛ amɛwekui lɛ. Beni ewo enyɛmimɛi lɛ hewalɛ koni amɛkakwa kpeeiyaa lɛ sɛɛ lɛ, bɔfo Paulo ŋma akɛ: “Shika suɔmɔ akaba nyɛjeŋba mli, ni nyɛmii ashɛa nii ni nyɛyɔɔ lɛ he; ejaakɛ lɛ diɛŋtsɛ ekɛɛ: ‘Mishiŋo ni misaa mikwaŋo gbi ko gbi ko.’ ”—Hebribii 13:5.

Paulo ŋaawoo lɛ baafee nɔ ni yɔɔ ebe naa. Aaafee afii enumɔ yɛ be mli ni Paulo eŋma ewolo lɛ eyaha Hebribii lɛ sɛɛ lɛ, Cestius Gallus, Roma asraafoi lɛ bawo Yerusalem he ka. Kristofoi anɔkwafoi lɛ kai Yesu kɔkɔbɔɔ lɛ: “Kɛ nyɛna [enɛ lɛ] . . . mɔ ni yɔɔ tsũ yiteŋ lɛ akakpeleke shi eba shia, aloo ni ebote shia eyakɔ nɔ ko; ni mɔ ni yɔɔ ŋmɔ shi lɛ ekaku esɛɛ eyakɔ etade.” (Marko 13:14-16) Amɛle akɛ amɛyibaamɔ damɔɔɔ amɛnitsumɔ ni damɔ shi jogbaŋŋ lɛ nɔ loo heloonaa nibii ni yɔɔ lɛ ajarawalɛ lɛ nɔ, shi edamɔ toiboo ni amɛaafee amɛha Yesu gbɛtsɔɔmɔi lɛ nɔ. Ŋwanejee ko bɛ he akɛ, efee mlɛo kɛha mɛi ni bo Paulo ŋaawoo lɛ toi ni amɛkɛ mumɔŋ nibii ye klɛŋklɛŋ gbɛhe lɛ akɛ amɛaashi shia, nitsumɔ, atadei, kɛ nibii ni jara wawai ni amɛjo foi kɛya gɔji lɛ ayiteaŋ fe mɔ ni yeko ehe kɛjɛko shika suɔmɔ he lɛ mli.

Bɔ ni Mɛi Komɛi Kɛ Nibii ni He Hiaa Yeɔ Klɛŋklɛŋ Gbɛhe Ŋmɛnɛ

Anɔkwa Kristofoi ni yɔɔ ŋmɛnɛ lɛ náa ekome ni amɛkɛ amɛnyɛmimɛi lɛ feɔ daa lɛ he miishɛɛ waa, ni mɛi babaoo shãa afɔlei bɔni afee ni amɛya kpeei lɛ ashishi. Yɛ hei komɛi lɛ, nitsumɔ pɛ ni yɔɔ jɛmɛ ji nitsulɔi akuu ni tsakeɔ kuu kroko. Nyɛminuu ko kɛɛ enitsumɔ mli bii komɛi akɛ ebaasumɔ koni ekɛ amɛ atsake daa Hɔɔ gbɛkɛ nitsumɔ, nɔ ni mɛi babaoo ni yɔɔ ekutsoŋ lɛ sumɔɔ koni amɛkɛjie amɛhiɛtserɛ lɛ, kɛ́ amɛ hu amɛbaasumɔ koni amɛtsu enɔ lɛ gbɛkɛgbɛkɛ yɛ ekpee gbii amli lɛ. Nyɛmimɛi krokomɛi ni tsuɔ nii ni amɛyaa ni mɛi krokomɛi baa lɛ hu yaa kpeei yɛ asafo ni bɛŋkɛ lɛ mli kɛ́ amɛnitsumɔ lɛ tsĩ amɛ gbɛ yɛ amɛ diɛŋtsɛ amɛkpee ni amɛaaya lɛ mli lɛ. Kɛtsɔ nɛkɛ gbɛ nɔ lɛ, kpee lɛ eko kwraa eŋmɛɛɛ amɛ yɛ bei pii amli. Mɔ ko ni yɔɔ wiemɔ lɛ he miishɛɛ ni yɔɔ Canada lɛ yɔse hiamɔ ni yɔɔ Teokrase Sɔɔmɔ Skul lɛ kɛ Sɔɔmɔ Kpee lɛ he amrɔ nɔŋŋ, shi egbɛjianɔtoo yɛ nitsumɔhe lɛ tsĩɔ ekpeeiyaa lɛ naa. No hewɔ lɛ ewo naanyo nitsulɔ ko nyɔmɔ koni etsu enɔ lɛ eha lɛ bɔni afee ni enyɛ ená hegbɛ ni eya kpeei ni he hiaa nɛɛ shishi.

Etsɛɔ aahu dani mɛi babaoo ni yeɔ hela ni ehiii tsamɔ lɛ foɔ kpee mli. Amɛboɔ gbɛjianɔtoo lɛ toi yɛ shia kɛtsɔɔ tɛlifoŋ kpãai ni akɛtsa nɔ loo wiemɔi ni amɔmɔ awo kasɛt nɔ yɛ be mli ni amɛnyɛɛɛ amɛya Maŋtsɛyeli Asa lɛ nɔ lɛ. Amɛjieɔ hiɛsɔɔ ni sa yijiemɔ kpo kɛhaa Yehowa mumɔŋ nikeenii ni jɛɔ ‘etsulɔ anɔkwafo kɛ nilelɔ’ lɛ dɛŋ lɛ! (Mateo 24:45) Kristofoi ni miisɔmɔ akɛ amɛfɔlɔi ni egbɔlɔ lɛ akwɛlɔi lɛ ahiɛ sɔɔ waa kɛ́ nyɛminuu ko loo nyɛmiyoo ko kɛ ehe ha akɛ ekɛ fɔlɔ lɛ aaahi shi bɔni afee ni mɔ ni kwɛɔ mɔ lɛ anyɛ aya asafoŋ kpee lɛ.

Too Gbɛjianɔ Kɛtsɔ Hiɛ!

Fɔlɔi ni hiɛ yɔɔ amɛ diɛŋtsɛ amɛmumɔŋ hiamɔ nii anɔ lɛ yeɔ amɛbuaa amɛbii koni amɛhiɛ asɔ Kristofoi akpeei. Bei pii lɛ, amɛkpaa amɛbii agbɛ akɛ amɛbaafee skul nifeemɔ ni akɛbaa shia yɛ be ni akɛha lɛ naa moŋ fe ni amɛaamɛ aahu ni nitsumɔi lɛ afa dã. Kɛ shɛ bei ni abaaya kpee gbɛkɛ lɛ, gbekɛbii lɛ feɔ amɛskul nifeemɔi ni amɛkɛbaa shia lɛ kɛ́ amɛjɛ skul amɛba shia nɔŋŋ. Aŋmɛɛɛ gbɛ ni shwɛmɔi kɛ nifeemɔi krokomɛi abafo asafoŋ kpeei amli.

Ákɛ wu kɛ tsɛ lɛ, ani okɛ kpeeiyaa yeɔ klɛŋklɛŋ gbɛhe? Ákɛ ŋa kɛ nyɛ lɛ, ani obɔɔ mɔdɛŋ koni oto ogbɛnaa nii ahe gbɛjianɔ bɔni afee ni onyɛ oya kpeei? Ákɛ gbekɛ ni oye afii nyɔŋma kɛ etɛ kɛyaa lɛ, ani otoɔ oskul nifeemɔ ni okɛbaa shia lɛ he gbɛjianɔ akɛ kpeei ahe hiaa fe no aloo otoɔ kpeei he gbɛjianɔ akɛ skul nifeemɔi ni akɛbaa shia lɛ he hiaa fe no?

Asafoŋ kpee ji Yehowa nikeenii ko ni suɔmɔ yɔɔ mli. Esa akɛ abɔ mɔdɛŋ fɛɛ ni aaanyɛ koni akɛhe awo nakai gbɛjianɔtoo lɛ mli. Yehowa baajɔɔ bo babaoo kɛ́ okɛ nibii ni he hiaa ye klɛŋklɛŋ gbɛhe!