Yitso 5
Namɔ Jamɔ Nyɔŋmɔ Kpɛlɛɔ Nɔ?
1. Mɛni Samariayoo ko taoɔ ale yɛ jamɔ he?
ANI osusu, ‘Mɔ ni Nyɔŋmɔ kpɛlɛɔ ejamɔ nɔ’ lɛ he pɛŋ? Be ko lɛ sanebimɔ ni tamɔ nɛkɛ ba yoo ko ni ekɛ Yesu Kristo wie yɛ Gerizim Gɔŋ ni yɔɔ Samaria lɛ masɛi lɛ jwɛŋmɔ mli. Beni egbalaa jwɛŋmɔ kɛyaa sɔrɔto-feemɔ ni ka Samariabii kɛ Yudafoi ajamɔ teŋ lɛ nɔ lɛ, ekɛɛ: “Gɔŋ nɛɛ nɔ, wɔtsɛmɛi lɛ sɔle yɛ, ni nyɛ lɛ, nyɛkɛɛ akɛ, Yerusalem ji he ni sa akɛ asɔle yɛ.” (Yohane 4:20) Ani Yesu kɛɛ Samariayoo lɛ akɛ Nyɔŋmɔ kpɛlɛɔ jamɔi fɛɛ nɔ? Aloo ekɛɛ akɛ nibii pɔtɛɛ komɛi ahe miihia koni akɛsa Nyɔŋmɔ hiɛ?
2. Mɛni Yesu kɛɛ, akɛ hetoo kɛha Samariayoo lɛ?
2 Yesu hetoo ni hɛleɔ mɔ shi lɛ ji: “Ŋmɛlɛtswaa lɛ miiba ni jeee gɔŋ nɛɛ nɔ, ni asaŋ jeee Yerusalem ni nyɛaaja Tsɛ lɛ yɛ.” (Yohane 4:21) Samariabii lɛ kɛ be kakadaŋŋ eshe Yehowa gbeyei ni ámɛja nyɔŋmɔi krokomɛi yɛ Gerizim Gɔŋ lɛ nɔ. (2 Maŋtsɛmɛi 17:33) Agbɛnɛ Yesu Kristo kɛɛ jeee nɛkɛ he nɛɛ loo Yerusalem he baahia kɛha anɔkwa jamɔ.
OKƐ MUMƆ KƐ ANƆKWALE AJA
3. (a) Mɛni hewɔ Samariabii lɛ leee Nyɔŋmɔ diɛŋtsɛ lɛ? (b) Te aaafee tɛŋŋ ni Yudafoi anɔkwafoi kɛ mɛi krokomɛi aaabale Nyɔŋmɔ?
3 Yesu tee nɔ ekɛɛ Samariayoo lɛ akɛ: “Nyɛ lɛ, nyɛleee nɔ ni nyɛjaa; wɔ lɛ, wɔle nɔ ni wɔjaa, ejaakɛ walaheremɔ lɛ Yudafoi lɛ aŋɔɔ ejɛ.” (Yohane 4:22) Samariabii lɛ yɛ apasa jamɔ mli susumɔi komɛi ni amɛkpɛlɛɔ Biblia lɛ mli klɛŋklɛŋ woji enumɔ lɛ pɛ nɔ akɛ nɔ ni jɛ Nyɔŋmɔ ŋdafoi lɛ adɛŋ. (Romabii 3:1, 2) Ŋmalɛi lɛ kɛ nɔ ni he baahia Yudafoi anɔkwafoi kɛ mɛi krokomɛi ni baabo toi lɛ eha amɛ bɔni afee ni amɛle Nyɔŋmɔ.
4. Taakɛ Yesu tsɔɔ lɛ, mɛni ehe hiaa ni Yudafoi kɛ Samariabii fɛɛ afee kɛ amɛ jamɔ aaafee nɔ ni Nyɔŋmɔ kpɛlɛɔ nɔ?
4 Yɛ anɔkwale mli lɛ, Yesu tsɔɔ akɛ ehe baahia ni Yudafoi kɛ Samariabii fɛɛ atsake gbɛ ni amɛtsɔɔ nɔ amɛjaa lɛ mli bɔni afee ni amɛsa Nyɔŋmɔ hiɛ. Ekɛɛ: “Shi kɛlɛ ŋmɛlɛtswaa lɛ miiba, ni eshɛ agbɛnɛ, beni anɔkwa jalɔi lɛ aaaja Tsɛ lɛ yɛ mumɔ kɛ anɔkwale mli, ejaakɛ mɛi ni jaa lɛ nɛkɛ Tsɛ lɛ hu taoɔ. Nyɔŋmɔ lɛ Mumɔŋ, ni mɛi ni jaa lɛ lɛ, ja amɛja lɛ yɛ mumɔ kɛ anɔkwale mli.” (Yohane 4:23, 24) Ehe miihia ni wɔja Nyɔŋmɔ “yɛ mumɔ,” ni tsuii ni eyimɔ obɔbɔ kɛ hemɔkɛyeli kɛ suɔmɔ kanyaa lɛ lɛ mli. Abaanyɛ aja Nyɔŋmɔ ‘kɛ anɔkwale’ kɛtsɔ e-Wiemɔ, Biblia lɛ, kasemɔ nɔ, kɛ agbɛnɛ kɛtsɔ ejamɔ yɛ anɔkwale ni ejie lɛ kpo lɛ nɔ. Ani oosumɔ ni ofee nakai?
5. (a) Mɛni ji “jamɔ” shishi? (b) Mɛni esa akɛ wɔfee kɛ wɔmiisumɔ ni Nyɔŋmɔ akpɛlɛ wɔ jamɔ nɔ?
5 Yesu ma nɔ mi akɛ Nyɔŋmɔ miisumɔ anɔkwa jamɔ. Enɛ tsɔɔ akɛ jamɔi komɛi yɛ ni Yehowa ekpɛlɛɛɛ nɔ. Ni aaaja Nyɔŋmɔ lɛ tsɔɔ akɛ ni akɛ woo ni gbeyeishemɔ yɔɔ mli aaaha lɛ ni akɛ sɔɔmɔ krɔŋkrɔŋ aha lɛ. Kɛ ootao ni okɛ woo aha nɔyelɔ ko ni he wa waa lɛ, eka shi faŋŋ akɛ obaasumɔ ni osɔmɔ lɛ ni ofee nɔ ni baasa ehiɛ. No hewɔ lɛ wɔmiisumɔ ni wɔsa Nyɔŋmɔ hiɛ. Yɛ nɔ najiaŋ ni oookɛɛ kɛkɛ akɛ, ‘Mijamɔ saa mihiɛ’ lɛ, ehe miihia ni wɔna nɔmimaa akɛ anaa Nyɔŋmɔ taomɔ nii yɛ wɔ jamɔ lɛ mli.
TSƐ LƐ SUƆMƆNAA NIFEEMƆ
6, 7. Mɛni hewɔ Yesu ekpɛlɛɛɛ mɛi komɛi ni kɛɔ akɛ ekaselɔi ji amɛ lɛ anɔ lɛ?
6 Nyɛhaa wɔkanea Mateo 7:21-23 ni wɔkwɛa akɛ ani wɔbaanyɛ wɔkɛ wɔnine atsɔɔ sane oti ni tsɔɔ akɛ ani Nyɔŋmɔ kpɛlɛɔ jamɔi fɛɛ nɔ lɛ lo. Yesu kɛɛ: “Jeee mɔ fɛɛ mɔ ni kɛɔ mi akɛ: Nuntsɔ, Nuntsɔ! lɛ, aaabote ŋwɛi maŋtsɛyeli lɛ mli; shi moŋ mɔ ni feɔ mi-Tsɛ ni yɔɔ ŋwɛi lɛ suɔmɔnaa nii lɛ. Mɛi pii aaakɛɛ mi yɛ no gbi lɛ nɔ akɛ: Nuntsɔ, Nuntsɔ! ani jeee bo ogbɛi lɛ mli wɔgba yɛ, ni ogbɛi lɛ mli wɔfamɔ daimonioi [mumɔŋ bɔɔ nii yiwalɔi] yɛ, ni ogbɛi lɛ mli wɔfee hewalɛ nibii pii yɛ lo? Ni no lɛ magba mli makɛɛ amɛ akɛ: Mileee nyɛ kwraa, nyɛjea minɔ nyɛyaa, nyɛ mɛi ni nyɛtsuɔ nibii ni ejaaa gbɛ!”
7 Ni aaakpɛlɛ Yesu Kristo nɔ akɛ Nuntsɔ lɛ he hiaa yɛ anɔkwa jamɔ mli. Shi enɛ tsɔɔ akɛ nɔ ko baalaaje yɛ mɛi pii ni kɛɔ akɛ amɛji Yesu kaselɔi lɛ ajamɔ mli. Ekɛɛ mɛi komɛi baafee “hewalɛ nibii,” tamɔ nɔ ni akɛɛ eji naakpɛɛ helatsamɔi lɛ nɛkɛ. Shi, amɛfeee nɔ ni Yesu kɛɛ ehe hiaa lɛ. Amɛjeee mɛi ni “feɔ [e]-Tsɛ suɔmɔnaa nii.” Kɛ wɔmiisumɔ ni wɔsa Nyɔŋmɔ hiɛ lɛ, esa akɛ wɔkase nɔ ni Tsɛ lɛ suɔmɔnaa nii ji ni wɔfee.
ANƆKWA NILEE—EJI HEBUU NƆ̃
8. Kɛ wɔɔnyɛ wɔfee Nyɔŋmɔ suɔmɔnaa nii lɛ, mɛni no biɔ, ni mɛɛ susumɔi komɛi ni ejaaa esa akɛ wɔkwa?
8 Nyɔŋmɔ suɔmɔnaa nifeemɔ biɔ Yehowa Nyɔŋmɔ kɛ Yesu Kristo fɛɛ he anɔkwa nilee. Nilee ni tamɔ nɛkɛ kɛ mɔ yaa naanɔ wala mli. Belɛ, wɔ fɛɛ wɔbaasumɔ ni wɔkɛ hiɛdɔɔ asusu anɔkwa nilee ni wɔɔna kɛjɛ Nyɔŋmɔ Wiemɔ, Biblia lɛ mli lɛ he. Mɛi komɛi kɛɔ akɛ ehe ehiaaa ni wɔhao wɔhe, bei abɔ ni wɔyeɔ anɔkwa ni wɔyɔɔ ekãa yɛ wɔ jamɔ mli lɛ. Mɛi krokomɛi kɛɔ akɛ, ‘Kɛ fioo ko pɛ ole lɛ, fioo ko pɛ aaakpa gbɛ kɛjɛ odɛŋ.’ Ni kɛlɛ Biblia lɛ woɔ wɔ hewalɛ koni wɔha Nyɔŋmɔ kɛ eyiŋtoi ahe nilee ni wɔyɔɔ lɛ aya hiɛ.—Efesobii 4:13; Filipibii 1:9; Kolosebii 1:9.
9. Anɔkwa jamɔ buɔ wɔhe yɛ mɛɛ gbɛ nɔ, ni mɛni hewɔ hebuu ni tamɔ nɛkɛ he hiaa wɔ lɛ?
9 Nilee ni tamɔ nɛkɛ buɔ wɔhe kɛjɛɔ wɔjamɔ lɛ ni akɛ nɔ kroko aaabafutu mli lɛ he. Bɔfo Paulo wie mumɔŋ bɔɔ nɔ ko ni kwaa efeɔ ehe “la bɔfo” lɛ he. (2 Korintobii 11:14) Akɛni etsakeɔ ehe hewɔ lɛ, nɛkɛ mumɔŋ bɔɔ nɔ nɛɛ—Satan—bɔɔ mɔdɛŋ ni eshishiu wɔ ni wɔfee nibii ni kɛ Nyɔŋmɔ suɔmɔnaa nii kpaaa gbee. Mumɔŋ bɔɔ nii krokomɛi ni fata Satan he lɛ hu miifite gbɔmɛi ajamɔ, ejaakɛ Paulo kɛɛ: “Afɔle ni jeŋmaji lɛ shaa lɛ, daimonioi amɛshãa amɛhaa, shi jeee Nyɔŋmɔ.” (1 Korintobii 10:20, NW) Eka shi faŋŋ akɛ mɛi pii esusu akɛ amɛmiija yɛ gbɛ ni ja nɔ, eyɛ mli akɛ jeee nɔ ni Nyɔŋmɔ sumɔɔ lɛ amɛfeɔ. Aashishiu amɛ kɛmiiya apasa jamɔ ni he tseee mli. Wɔbaakase Satan kɛ daimonioi lɛ ahe nii babaoo yɛ sɛɛ mli, shi nɛkɛ Nyɔŋmɔ henyɛlɔi nɛɛ etee nɔ amɛfite adesai ajamɔ diɛŋtsɛ.
10. Mɛni obaafee kɛ mɔ ko je gbɛ ekɛ ebɔɔ wo nu ni onuɔ lɛ jɛɛhe lɛ, ni mɛni Nyɔŋmɔ Wiemɔ lɛ he anɔkwa nilee wulaa wɔ koni wɔnyɛ wɔfee?
10 Kɛ ole akɛ mɔ ko eje gbɛ ekɛ ebɔɔ ewo nu ni onuɔ lɛ mli lɛ, ani obaaya nɔ onu nu kɛjɛ mli? Yɛ anɔkwale mli lɛ, obaatao nu kroko ni fiteko, nɔ ni yɔɔ krɔŋŋ. Ojogbaŋŋ, Nyɔŋmɔ Wiemɔ lɛ he anɔkwa nilee hu yeɔ ebuaa wɔ koni wɔyoo anɔkwa jamɔ ni wɔkpoo nibii ni ehiii ni haa jamɔ feɔ nɔ ni Nyɔŋmɔ ekpɛlɛɛɛ nɔ lɛ.
TSƆƆMƆI NI JI GBƆMƐI AKITAI
11. Mɛni ejaaa yɛ Yudafoi pii ajamɔ he?
11 Beni Yesu yɔɔ shikpɔŋ nɔ lɛ, Yudafoi pii efeee amɛnii yɛ Nyɔŋmɔ he anɔkwa nilee naa. No hewɔ lɛ amɛlaaje hegbɛ ni amɛkɛaana shidaamɔ ni he tse yɛ Yehowa hiɛ. Amɛhe Paulo ŋma yɛ akɛ: “Ejaakɛ miiye amɛhe odase akɛ, amɛhiɛ dɔɔ yɛ Nyɔŋmɔ he moŋ, shi jeee yɛ anɔkwa nilee naa.” (Romabii 10:2, NW) Amɛkpɛ yiŋ yɛ bɔ ni amɛaaja Nyɔŋmɔ amɛha lɛ he fe ni amɛaabo nɔ ni ekɛɔ lɛ toi.
12. Mɛni fite Israel jamɔ, ni mɛni jɛ mli ba?
12 Kɛjɛ shishijee lɛ Israelbii lɛ tsu jamɔ krɔŋŋ ni Nyɔŋmɔ kɛha lɛ he nii, shi etsɛɛɛ ni akɛ tsɔɔmɔi kɛ gbɔmɛi ajeŋ nilee wo mli muji. (Yeremia 8:8, 9; Maleaki 2:8, 9; Luka 11:52) Eyɛ mli akɛ Yudafoi ajamɔ mli hiɛnyiɛlɔi ni ale amɛ akɛ Farisifoi lɛ susu akɛ amɛ jamɔ lɛ saa Nyɔŋmɔ hiɛ moŋ, shi Yesu kɛɛ amɛ akɛ: “Yesaia gba yɛ nyɛ osatofoi nɛɛ ahe, tamɔ bɔ ni aŋma lɛ akɛ: ‘Maŋ nɛɛ, amɛnaabui amɛkɛwoɔ mi; shi amɛtsui etsi ehe kɛjɛ mihe kɛtee shɔŋŋ. Shi yakatswaa amɛjaa mi lɛ, ejaakɛ amɛtsɔɔ tsɔɔmɔi ni ji gbɔmɛi akitai.’—Marko 7:6, 7.
13. Mɛɛ gbɛ nɔ ekolɛ wɔɔfee wɔ nii tamɔ Farisifoi lɛ fee lɛ?
13 Ani eeenyɛ eba akɛ wɔɔnyɛ wɔfee taakɛ Farisifoi lɛ fee lɛ? Enɛ baanyɛ aba lɛ nakai kɛji akɛ wɔnyiɛ jamɔ mli blemasaji ni akɛha wɔ kɛjɛ blema lɛ sɛɛ moŋ fe ni wɔɔpɛi nɔ ni Nyɔŋmɔ ekɛɛ yɛ jamɔ he lɛ mli lɛ. Yɛ be mli ni ebɔɔ kɔkɔ yɛ oshara nɛɛ nɔŋŋ he lɛ, Paulo ŋma akɛ: “Shi mumɔ lɛ kɛɔ faŋŋ akɛ, naagbee gbii lɛ anɔ lɛ, mɛi komɛi aaakwa hemɔkɛyeli lɛ, ni amɛkɛ amɛhe aaayakpɛtɛ lakamɔ mumɔi kɛ daimonioi atsɔɔmɔi ahe.” (1 Timoteo 4:1) No hewɔ lɛ efaaa kɛkɛ akɛ wɔɔsusu akɛ wɔ jamɔ lɛ saa Nyɔŋmɔ hiɛ. Taakɛ Samariayoo ni kɛ Yesu kpe lɛ ji lɛ, ekolɛ wɔna wɔ jamɔ lɛ kɛjɛ wɔ fɔlɔi aŋɔɔ. Shi ehe miihia ni wɔna nɔmimaa akɛ wɔmiifee nibii ni Nyɔŋmɔ kpɛlɛɔ nɔ.
TSI OHE KƐJƐ NYƆŊMƆ NI OOOTƆ̃ ENƆ LƐ HE
14, 15. Kɛji akɛ wɔyɛ Nyɔŋmɔ suɔmɔnaa nii he nilee ko po lɛ, mɛni hewɔ ehe hiaa ni wɔkwɛ jogbaŋŋ lɛ?
14 Kɛ wɔkwɛɛɛ jogbaŋŋ lɛ, wɔbaafee nɔ ko ni Nyɔŋmɔ ekpɛlɛɛɛ nɔ. Akɛ nɔkwɛmɔ nɔ lɛ, bɔfo Yohane gbee shi yɛ ŋwɛibɔfo ko najiashi ‘koni eja lɛ.’ Shi ŋwɛibɔfo lɛ bɔ kɔkɔ akɛ: “Kaakwɛ ni ofee! Onaanyo tsulɔ kɛ onyɛmimɛi lɛ ni hiɛ Yesu odase lɛ mli lɛ ateŋ mɔ ko ji mi; Nyɔŋmɔ moŋ oja.” (Kpojiemɔ 19:10) No hewɔ lɛ ani oona bɔ ni ehe hiaa akɛ oookwɛ ni muji ko ni tamɔ wɔŋjamɔ akaba ojamɔ mli?—1 Korintobii 10:14.
15 Beni Kristofoi komɛi je shishi akɛ amɛaadi jamɔ mli kusum nifeemɔi komɛi ni esaaa Nyɔŋmɔ hiɛ lɛ sɛɛ lɛ, Paulo bi akɛ: “Te feɔ tɛŋŋ ni nyɛsaa nyɛkuɔ nyɛsɛɛ kɛyaa shishijee nibii ni nyɛɛɛ nɔ ko afee ni eye ohia lɛ anɔ, ni nyɛsaa nyɛtaoɔ akɛ nyɛje shishi nyɛsɔmɔ amɛ ekoŋŋ lɛ? Nyɛbuɔ gbii kɛ nyɔji kɛ bei kɛ afii fitsofitso. Miishe gbeyei miiha nyɛ, akɛ aleee nɔ, yakatswaa migba mihe naa yɛ nyɛ hewɔ lɛ.” (Galatabii 4:8-11) Aŋkroaŋkroi nɛɛ ena Nyɔŋmɔ he nilee, shi sɛɛ mli lɛ amɛtɔ̃ kɛtsɔ jamɔ mli kusum nifeemɔi kɛ gbijuji ni amɛyeɔ ni esaaa Yehowa hiɛ lɛ anɔ. Taakɛ Paulo kɛɛ lɛ ehe miihia ni ‘wɔka nɔ fɛɛ nɔ wɔkwɛ akɛ esa Nuntsɔ lɛ hiɛ lo.’—Efesobii 5:10.
16. Yohane 17:16 kɛ 1 Petro 4:3 yeɔ ebuaa wɔ ni wɔkpɛ wɔyiŋ yɛ gbijuji kɛ kusumii ni esaaa Nyɔŋmɔ hiɛ lɛ ahe yɛ mɛɛ gbɛ nɔ?
16 Esa akɛ wɔkwɛ jogbaŋŋ ni wɔtsi wɔhe kɛjɛ jamɔ mli gbijurɔyelii kɛ kusum nifeemɔi komɛi ni kuɔ Nyɔŋmɔ shishitoo mlai amli lɛ ahe. (1 Tesalonikabii 5:21) Akɛ nɔkwɛmɔ nɔ lɛ, Yesu wie yɛ esɛɛnyiɛlɔi lɛ ahe akɛ: “Amɛjɛɛɛ je lɛ mli, taakɛ bɔ ni mi hu mijɛɛɛ je lɛ mli lɛ.” (Yohane 17:16) Ani ojamɔ lɛ kɛ ehe woɔ gbijurɔyelii kɛ gbijuji ni teɔ shi ewoɔ he ni akɛwooo jeŋ saji amli he shishitoo mla lɛ mli? Aloo yɛ bei komɛi amli lɛ ojamɔ mlibii lɛ kɛ amɛhe woɔ kusum nifeemɔi kɛ gbijurɔyelii ni haa etamɔɔ bɔ ni bɔfo Petro etsɔɔ mli eha lɛ mli? Eŋma akɛ: “Ejaakɛ efa ha wɔ akɛ wala be ni eho momo lɛ mli lɛ, wɔtsu jeŋmajiaŋbii atsui naa nii lɛ, ni wɔba wɔjeŋ yɛ nyenyeŋtswibɔɔi, akɔnɔi, daatɔɔi, shwɛmɔi, fufeemɔi kɛ wɔŋjamɔi ni ahiɔ lɛ amli.”—1 Petro 4:3.
17. Mɛni hewɔ esa akɛ wɔkwa nɔ fɛɛ nɔ ni jieɔ je lɛ mumɔ kpo lɛ?
17 Bɔfo Yohane ma bɔ ni ehe hiaa ni wɔkwa nifeemɔi fɛɛ ni jieɔ jeŋ ni leee Nyɔŋmɔ ni ebɔle wɔhe kɛkpe lɛ mumɔ lɛ kpo lɛ nɔ mi. Yohane ŋma akɛ: “Nyɛkasumɔa je lɛ aloo nibii hu ni yɔɔ je lɛŋ. Kɛji mɔ ko miisumɔ je lɛ, Tsɛ lɛ suɔmɔ lɛ bɛ emli; ejaakɛ nɔ fɛɛ nɔ ni yɔɔ je lɛŋ lɛ, heloo lɛ sɛɛdii nii lɛ kɛ hiŋmɛii lɛ asɛɛdii nii lɛ kɛ shihilɛ lɛ mli hewoo lɛ, ejɛɛɛ Tsɛ lɛ mli, shi moŋ je lɛ mli ejɛ; ni je lɛ hoɔ eyaa kɛ emli sɛɛdii nii lɛ; shi mɔ ni feɔ Nyɔŋmɔ suɔmɔnaa nii lɛ hiɔ shi kɛyaa naanɔ.” (1 Yohane 2:15-17) Ani okadi akɛ ‘mɛi ni feɔ Nyɔŋmɔ suɔmɔnaa nii’ lɛ baahi shi kɛya naanɔ? Hɛɛ, kɛ wɔfee Nyɔŋmɔ suɔmɔnaa nii ni wɔkwa nifeemɔi ni jieɔ je nɛŋ mumɔ lɛ kpo lɛ, wɔbaanyɛ wɔna naanɔ wala he hiɛnɔkamɔ lɛ!
OKƐ NYƆŊMƆ TAOMƆ NII NI NƆ KWƆLƆ LƐ ATSU NII
18. Mɛɛ gbɛ nɔ Korintobii komɛi tɔ̃ yɛ jeŋba he lɛ, ni mɛni esa akɛ wɔkase kɛjɛ enɛ mli?
18 Mɛi ni Nyɔŋmɔ taoɔ akɛ ejálɔi ji mɛi ni kɛ ejeŋba he tɛi ni nɔ kwɔlɔ lɛ aaatsu nii. Mɛi komɛi ni hi blema Korinto lɛ susu yɛ gbɛ ni ejaaa nɔ akɛ Nyɔŋmɔ baakpɛlɛ jeŋba shara nifeemɔ nɔ. Wɔbaanyɛ wɔna bɔ ni amɛtɔ̃ kwraa yɛ enɛ mli lɛ kɛtsɔ 1 Korintobii 6:9, 10 kanemɔ nɔ. Kɛ wɔɔja Nyɔŋmɔ yɛ nɔkpɛlɛmɔ mli lɛ, esa akɛ wɔsa ehiɛ yɛ wiemɔ kɛ nifeemɔ mli. Ani ojamɔ lɛ miiye kɛmiibua bo koni ofee nakai?—Mateo 15:8; 23:1-3.
19. Anɔkwa jamɔ saa bɔ ni wɔkɛ mɛi krokomɛi yeɔ haa lɛ he yɛ mɛɛ gbɛ nɔ?
19 Esa akɛ bɔ ni wɔkɛ mɛi krokomɛi yeɔ haa lɛ hu ajie Nyɔŋmɔ taomɔ nii lɛ kpo. Yesu Kristo wo wɔ hewalɛ koni wɔkɛ mɛi krokomɛi aye taakɛ bɔ ni wɔbaasumɔ ni amɛfee wɔ, ejaakɛ enɛ ji anɔkwa jamɔ lɛ fa. (Mateo 7:12) Kadimɔ nɔ ni ekɛɛ yɛ nyɛmimɛi asuɔmɔ kpojiemɔ he lɛ hu: “Kɛji nyɛsumɔɔ nyɛhe lɛ, no mɛi fɛɛ kɛaale akɛ mikaselɔi ji nyɛ.” (Yohane 13:35) Esa akɛ Yesu kaselɔi lɛ asumɔ amɛhe ni amɛfee amɛnanemɛi jálɔi kɛ mɛi krokomɛi ejurɔ.—Galatabii 6:10.
SUSUMA MUU FƐƐ JAMƆ
20, 21. (a) Mɛɛ jamɔ nɛkɛ Nyɔŋmɔ taoɔ? (b) Mɛni hewɔ Yehowa kpoo Israel jamɔ yɛ Maleaki gbii lɛ amli lɛ?
20 Yɛ otsui mli lɛ, obaasumɔ ni oja Nyɔŋmɔ yɛ nɔkpɛlɛmɔ mli. Kɛji nakai ni lɛ, no lɛ esa akɛ okpɛlɛ bɔ ni Yehowa susuɔ jamɔ he lɛ nɔ. Kaselɔ Yakobo ma nɔ mi akɛ, bɔ ni Nyɔŋmɔ kwɛɔ nii ehaa lɛ ji nɔ ni he hiaa, jeee wɔnɔ. Yakobo kɛɛ: “Nyɔŋmɔ jamɔ ni he tse ni ehe bɛ muji ko yɛ Nyɔŋmɔ kɛ Tsɛ lɛ hiɛ ji enɛ, akɛ mɔ asara awusai kɛ okulafoi yɛ amɛmanehulu lɛ mli, ni eto ehe kɛjɛ je lɛŋ koni ekawo ehe muji.” (Yakobo 1:27) Akɛni wɔmiisumɔ ni wɔsa Nyɔŋmɔ hiɛ hewɔ lɛ, esa akɛ wɔteŋ mɔ fɛɛ mɔ apɛi wɔ jamɔ mli ni wɔna nɔmimaa akɛ ejeee nɔ ni akɛ nifeemɔi ni tsɔɔ Nyɔŋmɔ gbeyeishemɔ ni abɛ ewo mli muji aloo wɔshiii nɔ ko ni he hiaa waa yɛ ehiɛ.—Yakobo 1:26.
21 Wɔ jamɔ ni he tse ni jɛɔ susuma muu fɛɛ mli lɛ saa Yehowa hiɛ. (Mateo 22:37; Kolosebii 3:23) Beni Israel maŋ lɛ kɛ nɔ ko ni shɛɛɛ enɛ ha Nyɔŋmɔ lɛ, ekɛɛ: “Bi woɔ etsɛ, ni tsulɔ hu woɔ enuntsɔ; kolɛ kɛji tsɛ ji mi lɛ, nɛgbɛ miwoo lɛ yɔɔ? Ni kɛji nuntsɔ hu ji mi lɛ, nɛgbɛ migbeyeishemɔ lɛ yɔɔ?” Amɛmiitɔ̃ Nyɔŋmɔ nɔ kɛtsɔ kooloi shwilafoi, akpakei, kɛ helatsɛmɛi ni amɛkɛshaa afɔle lɛ nɔ, ni ekpoɔ nɛkɛ jamɔ nifeemɔi nɛɛ. (Maleaki 1:6-8) Yehowa sa jamɔ ni he tse fe fɛɛ ni ekpɛlɛɛɛ nɔ ko nɔ ko nɔ akɛ ja he ni atuɔ ahaa ekome too.—2 Mose 20:5; Abɛi 3:9; Kpojiemɔ 4:11.
22. Kɛ wɔmiisumɔ ni Nyɔŋmɔ akpɛlɛ wɔ jamɔ nɔ lɛ, mɛni wɔbaakwa, ni mɛni wɔbaafee?
22 Etamɔ nɔ ni Samariayoo ni kɛ Yesu wie lɛ miisumɔ ni eja Nyɔŋmɔ yɛ gbɛ ni ŋwɛi kpɛlɛɔ nɔ lɛ nɔ. Kɛ enɛ ji nɔ ni wɔsumɔɔ lɛ, wɔbaakwa tsɔɔmɔi kɛ nifeemɔi ni woɔ mɔ he muji lɛ fɛɛ. (2 Korintobii 6:14-18) Yɛ no najiaŋ lɛ, wɔbaamia wɔhiɛ waa ni wɔna Nyɔŋmɔ he anɔkwa nilee ni wɔfee esuɔmɔnaa nii. Wɔkɛ wɔhe baakpɛtɛ etaomɔ nii kɛha jamɔ ni akpɛlɛɔ nɔ lɛ he gbagbalii. (1 Timoteo 2:3, 4) Yehowa Odasefoi miibɔ mɔdɛŋ ni amɛfee nakai pɛpɛɛpɛ, ni amɛkɛ miishɛɛ miiwo bo hewalɛ koni okɛ amɛ ana gbɛfaŋnɔ yɛ Nyɔŋmɔ ni ajaa lɛ “yɛ mumɔ kɛ anɔkwale mli” lɛ mli. (Yohane 4:24) Yesu kɛɛ: “Mɛi ni jaa lɛ nɛkɛ Tsɛ lɛ hu taoɔ.” (Yohane 4:23) Hiɛnɔkamɔ yɛ akɛ oji gbɔmɔ ni tamɔ nɛkɛ. Taakɛ Samariayoo lɛ ji lɛ, ŋwanejee ko bɛ akɛ obaasumɔ ni ona naanɔ wala. (Yohane 4:13-15) Shi onaa ni gbɔmɛi gbɔlɔɔ ni amɛgboiɔ. Yitso ni nyiɛ sɛɛ lɛ baatsɔɔ nɔ hewɔ.
KAA ONILEE OKWƐ
Taakɛ atsɔɔ yɛ Yohane 4:23, 24 lɛ, mɛɛ jamɔ Nyɔŋmɔ kpɛlɛɔ nɔ?
Te wɔɔfee tɛŋŋ wɔle kɛji akɛ kusum nifeemɔi loo gbijurɔyelii komɛi saa Nyɔŋmɔ hiɛ?
Mɛni ji taomɔ nii komɛi kɛha jamɔ ni akpɛlɛɔ nɔ?
[Baafa muu mfoniri ni yɔɔ baafa 44]