Asraafoiatsɛ ko Jie Hemɔkɛyeli Kpele Kpo

Be ni Yesu gbe e-Gɔŋ nɔ Shiɛmɔ lɛ naa lɛ, etee Kapernaum maŋ lɛ mli. Yudafoi lɛ anukpai komɛi ba eŋɔɔ. Nuu ko ni jɛ maŋ kroko nɔ lɛ ji mɔ ni tsu amɛ​—eji Roma asraafoiatsɛ, ni ekwɛɔ asraafoi 100 nɔ.

Asraafoiatsɛ lɛ tsulɔ ko ni esumɔɔ esane waa lɛ he miiye, ni eehe egbo. Eyɛ mli akɛ asraafoiatsɛ nɛɛ ji Jeŋmajiaŋnyo moŋ, shi eetao Yesu aye abua lɛ. Yudafoi lɛ kɛɛ Yesu akɛ, nuu lɛ tsulɔ lɛ “kã shi yɛ shĩa kɛ kuumɔ hela, ni eepiŋ waa.” (Mateo 8:6) Yudafoi lɛ anukpai lɛ kɛɛ Yesu akɛ asraafoiatsɛ nɛɛ sa mɔ ni ayeɔ abuaa lɛ, ni amɛtsɔɔ mli akɛ: “Esumɔɔ wɔmaŋ lɛ, ni lɛ ema wɔkpeehe lɛ.”​—Luka 7:4, 5.

Etsɛɛɛ ni Yesu kɛ onukpai lɛ shi akɛ amɛmiiya asraafoiatsɛ lɛ shĩa lɛ. Be ni eshwɛ fioo ni amɛbaashɛ jɛmɛ lɛ, asraafoiatsɛ lɛ tsu enanemɛi ní amɛbakɛɛ Yesu akɛ: “Onukpa, kaagba ohe naa, ejaakɛ misaaa mɔ ni obaa mishĩa. No hewɔ ni mibuuu mihe akɛ misa mɔ ni baa oŋɔɔ lɛ.” (Luka 7:6, 7) Wiemɔi nɛɛ ni asraafoiatsɛ ni yɔɔ mɛi yɛ eshishi lɛ wie lɛ tsɔɔ akɛ, ebaa ehe shi waa! Ni no tsɔɔ akɛ, esoro nuu nɛɛ yɛ Romabii ni kɛ amɛnyɔji yeɔ dɛŋdɛŋ lɛ ahe kwraa.​—Mateo 8:9.

Ekã shi faŋŋ akɛ, asraafoiatsɛ lɛ le akɛ Yudafoi lɛ kɛ mɛi ni jeee Yudafoi ebɔɔɔ kwraa. (Bɔfoi 10:28) Ekolɛ, enɛ hewɔ ni etsu enanemɛi lɛ koni amɛyakɛɛ Yesu akɛ: “Hã wiemɔ lɛ ajɛ onaa, ni ohã mitsulɔ lɛ he awa lɛ” lɛ.​—Luka 7:7.

Be ni Yesu nu enɛ lɛ, efee lɛ naakpɛɛ waa, ni ewie akɛ: “Miikɛɛ nyɛ akɛ, minako mɔ ko yɛ Israel tete ni hemɔkɛyeli da tamɔ nɛkɛ dã.” (Luka 7:9) Be ni asraafoiatsɛ lɛ nanemɛi lɛ ku amɛsɛɛ kɛtee shĩa lɛ, amɛyana akɛ nyɔŋ ni he yeɔ lɛ he ewa lɛ agbɛnɛ.

Be ni Yesu tsa asraafoiatsɛ lɛ tsulɔ lɛ, eŋɔ hegbɛ lɛ kɛma nɔ mi akɛ abaajɔɔ mɛi ni jeee Yudafoi ní baajie hemɔkɛyeli kpo lɛ. Ekɛɛ akɛ: “Mɛi babaoo baajɛ boka kɛ anai aba koni amɛkɛ Abraham kɛ Isak kɛ Yakob abatara okpɔlɔ he yɛ ŋwɛi Maŋtsɛyeli lɛ mli.” Ni Yudafoi ni ejieee hemɔkɛyeli kpo lɛ hu? Yesu kɛɛ abaashɛrɛ amɛ “ashwie agbonaa duŋ lɛ mli. Jɛmɛ ji he ni amɛbaafo ni amɛbaakpe amɛnyanyɔjiashi yɛ.”​—Mateo 8:11, 12.

No hewɔ lɛ, abaakpoo Yuda fɔmɔ bii ni mɔɔɔ hegbɛ ni akɛhã amɛ klɛŋklɛŋ akɛ amɛbafata Kristo he kɛye maŋtsɛ lɛ mli lɛ. Shi yɛ shishinumɔ ko naa lɛ, abaahã Jeŋmajiaŋbii lɛ hegbɛ ní amɛkɛ Yesu ata okpɔlɔ he “yɛ ŋwɛi Maŋtsɛyeli lɛ mli.”