Yoo ko Ta Yesu Atade He ni Ehe Wa Lɛ

Be ni Yesu ku esɛɛ kɛjɛ Dekapoli lɛ, Yudafoi ni yɔɔ Galilea Ŋshɔ lɛ kooyi-anai lɛ babaoo ná nu he. Eeenyɛ efee akɛ, mɛi babaoo enu bɔ ni Yesu hã kɔɔyɔɔ lɛ kɛ ŋshɔ lɛ ŋmɛ dɛmm be ni ahum ko tswa lɛ, ni ekolɛ mɛi komɛi hu ená ele akɛ etsa hii ni yɔɔ daimonioi lɛ. No hewɔ lɛ, “asafoku babaoo ko” bua amɛhe naa yɛ ŋshɔ lɛ naa, ekolɛ yɛ Kapernaum niiaŋ, koni amɛkpee Yesu. (Marko 5:21) Be ni eyi shi yɛ lɛlɛ lɛ mli lɛ, mɛi lɛ amii shɛ amɛhe waa.

Mɛi ni miishwe waa ni amɛna Yesu lɛ ateŋ mɔ kome ji Yairo, onukpa ni kwɛɔ kpeehe lɛ nɔ lɛ, ekolɛ kpeehe ni yɔɔ Kapernaum lɛ. Eho egbee Yesu naji anaa, ni ekpa lɛ fai shii abɔ akɛ: “Mibiyoo fioo he miiye waa. Ofainɛ ba ni okɛ oniji abashwie enɔ koni ehe awa lɛ ni ená wala.” (Marko 5:23) Te Yesu baafee enii ehã tɛŋŋ yɛ fai ni Yairo kɛ hiɛdɔɔ kpaa lɛ koni eye ebua ebiyoo kome ni eye afii 12 pɛ, ni eshwɛɛɛ ehe lɛ he lɛ?​—Luka 8:42.

Be ni Yesu nyiɛ gbɛ kɛyaa Yairo shĩa lɛ, ekɛ shihilɛ kroko hu ni yɔɔ mɔbɔ kpe. Mɛi ni nyiɛ Yesu sɛɛ lɛ ateŋ mɛi pii amii eshɛ amɛhe, ni amɛmiikwɛ akɛ ebaafee naakpɛɛ nii ko ekoŋŋ lo. Shi yoo ko yɛ asafoku lɛ teŋ, ní lɛ lɛ hela ni naa wa ni yeɔ lɛ lɛ he titri ejwɛŋɔ.

Lá eho Yuda yoo nɛɛ afii 12 sɔŋŋ. Etao yelikɛbuamɔ kɛjɛ helatsalɔi pii adɛŋ, ni efite eshika fɛɛ yɛ tsofai ni amɛtsɔɔ lɛ lɛ he. Shi ehiko hãko lɛ kwraa. Anɔkwa, enaagba lɛ mli “ewo wu” moŋ.​—Marko 5:26.

Ekolɛ, obaakpɛlɛ nɔ akɛ, hela ni eyeɔ lɛ yɛ hiɛgbele kɛ hiɛshishwiemɔ, ni ehãa egbɔjɔɔ hu. Afɔɔɔ hela ni tamɔ nɛkɛ he wiemɔ faŋŋ yɛ mɛi ateŋ. Kɛfata he lɛ, yɛ Mose Mla lɛ shishi lɛ, kɛ́ lá miiho yoo ko lɛ, ehe tseee yɛ kusum naa. Mɔ fɛɛ mɔ ni baata yoo ni tamɔ nɛkɛ loo etadei ni lá lɛ eko ebote mli lɛ he lɛ, esa akɛ eju ehe, ni ehe tseee kɛyashi gbɛkɛ.​—3 Mose 15:25-27.

Yoo nɛɛ “enu Yesu he amaniɛbɔi lɛ,” ni amrɔ nɛɛ ena lɛ. Shi akɛni ehe tseee hewɔ lɛ, eju shi nigii kɛtsɔ asafoku lɛ teŋ, ni ekɛɛ ehe akɛ: “Kɛji mita etadei anɔhaanɔi lɛ ahe kɛkɛ lɛ, mihe baawa mi.” Be ni eta Yesu atade lɛ naamuu lɛ he lɛ, amrɔ lɛ, enu he akɛ lá ni hoɔ lɛ lɛ sɛɛ efo! “Atsa hela ni ehã epiŋ waa lɛ.”​—Marko 5:27-29.

Kɛkɛ ni Yesu kɛɛ akɛ: “Namɔ ta mihe lɛ?” Kɛ́ okwɛ lɛ, te yoo lɛ nu he ehã tɛŋŋ be ni enu wiemɔi nɛɛ? Petro wie nɔ ko kɛtsɔɔ akɛ ekɛ Yesu kpãaa gbee; ekɛɛ akɛ: “Asafoku lɛ ebɔle ohe ni amɛmiififia bo.” No hewɔ lɛ, mɛni hewɔ Yesu bi akɛ, “Namɔ ta mihe lɛ?” Yesu tsɔɔ mli akɛ: “Mɔ ko eta mihe, ejaakɛ mile akɛ hewalɛ eje mimli.” (Luka 8:45, 46) Hɛɛ, yoo lɛ hela lɛ ni atsa lɛ hã hewalɛ ko je Yesu mli.

Shi be ni yoo lɛ na akɛ enyɛɛɛ ekɛ ehe atee lɛ, ekɛ gbeyeishemɔ kɛ hekpokpomɔ bagbee Yesu hiɛ. Ewie anɔkwale ni kɔɔ hela ni yeɔ lɛ lɛ, kɛ bɔ ni atsa lɛ amrɔ nɔŋŋ lɛ he yɛ mɛi lɛ fɛɛ hiɛ. Yesu jɛ mlihilɛ mli eshɛje emii akɛ: “Biyoo, ohemɔkɛyeli ehã ohe ewa bo. Yaa yɛ toiŋjɔlɛ mli, ni hela ni ehã opiŋ nɛɛ akagba onaa dɔŋŋ.”​—Marko 5:34.

Eyɛ faŋŋ akɛ, mɔ ni Nyɔŋmɔ ehala akɛ eye shikpɔŋ lɛ nɔ lɛ musuŋ tsɔɔ lɛ, edɔɔ mɔ he, ni jeee akɛ esusuɔ mɛi ahe kɛkɛ, shi moŋ eyɛ hewalɛ hu ni ekɛbaaye ebua amɛ!