Yitso 59
Namɔ Diɛŋtsɛ ji Yesu?
BENI lɛlɛ ni Yesu kɛ ekaselɔi lɛ ta mli lɛ bashɛ Betsaida lɛ, gbɔmɛi lɛ kɛ shwilafo ko ba eŋɔɔ ni amɛbakpa lɛ fai ni eta nuu lɛ he ni etsa lɛ. Kɛkɛ ni Yesu mɔ nuu lɛ nine mli ni ekɛ lɛ shi akrowa lɛ, ni etsɛ̃ lajɔ eshwie ehiŋmɛii anɔ ni ebi lɛ akɛ: ‘Oona nii lo?’
Ni nuu lɛ here nɔ akɛ: “Miina gbɔmɛi tamɔ tsei ni nyiɛɔ.” Kɛkɛ ni Yesu kɛ eniji shwie nuu lɛ hiŋmɛii anɔ ni eha ena nii jogbaŋŋ. Kɛkɛ ni Yesu wo nuu lɛ gbɛ ni eya shia ni efa lɛ koni ekaya maŋ lɛ mli.
Agbɛnɛ Yesu kɛ ekaselɔi lɛ shi kɛtee akrowai ni yɔɔ Kaisaria Filipi lɛ amli, yɛ Palestina shikpɔŋ lɛ kooyigbɛ tɔɔ lɛ. Gɔŋ ni nɔ kwɔ waa ni, eehe eshɛ shitoi 30, kɛyaa Kaisaria Filipi maŋ fɛfɛo lɛ mli, ni ekwɔlɛ aaafee ninetalɔi 1,150 fe ŋshɔ hiɛ kwɔlɛ. Ekolɛ nɛkɛ gbɛfaa nɛɛ heɔ gbii enyɔ.
Beni amɛnyiɛ gbɛ kɛyaa lɛ, Yesu shi amɛ koni eyasɔle. Eshwɛ nyɔji nɛɛhu loo nyɔŋma pɛ ni egbele lɛ baashɛ, ni eesusu ekaselɔi lɛ ahe waa. Mɛi pii eshi lɛ momo po ni amɛnyiɛɛɛ esɛɛ dɔŋŋ. Ni etamɔ nɔ ni mɛi komɛi hu ayiŋ miifee amɛ kɔshikɔshi ni amɛnijiaŋ eje wui yɛ kpoomɔ ni ekpoo mɔdɛŋ ni gbɔmɛi lɛ bɔ ni amɛwo lɛ maŋtsɛ lɛ hewɔ kɛ agbɛnɛ hu, akɛni efeee okadi ko beni ehenyɛlɔi lɛ ba amɛbatswa lɛ mpoa ni efee okadi ekɛtsɔɔ akɛ maŋtsɛ ji lɛ lɛ. Mɛni ebɔfoi lɛ heɔ yeɔ yɛ mɔ ni eji he? Beni amɛba he ni esɔleɔ yɛ lɛ, Yesu bi amɛ akɛ: “Namɔ mɛi kɛɔ akɛ mi ji?”
Amɛha hetoo akɛ: “Mɛi komɛi kɛɔ akɛ Yohane Baptisilɔ lɛ ni, ni mɛi komɛi hu kɛɔ akɛ Elia ni, ni mɛi krokomɛi kɛɔ akɛ Yeremia aloo gbalɔi lɛ ateŋ mɔ kome ni.” Hɛɛ, gbɔmɛi lɛ susuɔ akɛ Yesu ji nɛkɛ hii nɛɛ ateŋ mɔ ko ni atee lɛ shi kɛjɛ gbohii ateŋ!
Yesu bi amɛ akɛ: “Shi nyɛ lɛ, namɔ nyɛkɛɔ akɛ mi ji?”
Ni Petro ha lɛ hetoo oya akɛ: “Bo ji Kristo lɛ, Nyɔŋmɔ hiɛkalɔ lɛ Bi lɛ.”
Beni ekpɛlɛ Petro hetoo lɛ nɔ lɛ sɛɛ lɛ, Yesu kɛɛ: “Bo ji Petro lɛ, ni nɛkɛ tɛsaa nɛɛ nɔ matswa misafo lɛ mamã, ni gbohiiaje agboi lɛ nyɛŋ enɔ aye.” Yesu tswa adafi klɛŋklɛŋ kwraa yɛ biɛ akɛ ebaato asafo ko, ni akɛ gbele tete po nyɛŋ aye emlibii lɛ anɔ nyɔji yɛ be mli ni amɛgbe amɛ shikpɔŋ nɔ nitsumɔ lɛ naa yɛ anɔkwayeli mli lɛ. Kɛkɛ ni ekɛɛ Petro akɛ: “Ni maŋɔ ŋwɛi maŋtsɛyeli lɛ naa samfei lɛ mahao.”
No hewɔ lɛ Yesu jie lɛ kpo akɛ Petro nine baashɛ hegbɛi krɛdɛɛi komɛi anɔ. Dabi, ahaaa Petro hegbɛ akɛ klɛŋklɛŋ mɔ yɛ kaselɔi lɛ ateŋ, ni asaŋ afeee lɛ asafo lɛ shishitoo nɔ hu. Yesu diɛŋtsɛ ji Tɛsaa ni ebaatswa esafo lɛ ema nɔ lɛ. Shi akɛ samfei etɛ baaha Petro koni, taakɛ eji lɛ, ekɛgbele hegbɛi anaa eha gbɔmɛi akui sɔrɔtoi koni amɛbote ŋwɛi Maŋtsɛyeli lɛ mli.
Petro kɛ klɛŋklɛŋ samfee lɛ baatsu nii yɛ Pentekoste yɛ afi 33 Ŋ.B. koni etsɔɔ Yudafoi ni etsake amɛtsui lɛ nɔ ni esa akɛ amɛfee kɛha yiwalaheremɔ. No sɛɛ lɛ etsɛŋ ni ekɛ nɔ ni ji enyɔ lɛ baatsu nii koni ekɛgbele hegbɛ eha Samariabii ni heɔ yeɔ lɛ ni amɛbote Nyɔŋmɔ Maŋtsɛyeli lɛ mli. Kɛkɛ lɛ, ekɛ samfee ni ji etɛ lɛ baatsu nii yɛ 36 Ŋ.B. mli koni ekɛgbele nakai hegbɛ lɛ nɔŋŋ eko eha Jeŋmajiaŋbii ni afolɔko amɛ ketia lɛ, Kornelio kɛ enanemɛi lɛ.
Yesu tsa sane ni ekɛ ekaselɔi lɛ gbaa lɛ nɔ. Amanehului kɛ gbele ni etsɛŋ ni ekɛbaakpe yɛ Yerusalem ni etsi ta etsɔɔ amɛ lɛ ha amɛnijiaŋ je wui. Akɛni amɛyanuuu shishi akɛ abaatee Yesu shi kɛjɛ gbohii ateŋ kɛya ŋwɛi wala mli hewɔ lɛ, Petro tsɛ Yesu kɛtee afa. Ni ekɛɛ lɛ akɛ: “Naa ohe mɔbɔ, Nuŋtsɔ, enɛ akagbaleo fɔɔŋfɔ!” Kɛkɛ ni Yesu tsɔ ehe ni eha lɛ hetoo akɛ: “Ho misɛɛ, Satan! Ootɔtɔ minane, ejaakɛ ojwɛŋŋ Nyɔŋmɔ nii ahe, shi gbɔmɛi anii ahe moŋ ojwɛŋɔ.”
Eka shi faŋŋ akɛ, mɛi krokomɛi hu fata Yesu kɛ ekaselɔi lɛ ahe kɛfaa gbɛ lɛ, no hewɔ lɛ etsɛ amɛ kɛba eŋɔɔ ni etsɔɔ mli akɛ ebɛ mlɛo akɛ mɔ ko aaafee esɛɛnyiɛlɔ. Ekɛɛ: “Kɛji mɔ ko miisumɔ ni enyiɛ misɛɛ lɛ, ha ekwa ehe ni ewo esɛŋmɔtso lɛ ni enyiɛ misɛɛ. Ejaakɛ mɔ fɛɛ mɔ ni taoɔ akɛ ebaa esusuma yi lɛ, eeelaaje lɛ; shi mɔ ni laajeɔ esusuma yɛ mi kɛ sanekpakpa lɛ hewɔ lɛ, enine aaashɛ nɔ.”
Hɛɛ, kɛ amɛaatsɔɔ akɛ amɛsa ehiɛ duromɔ lɛ, no lɛ esa akɛ Yesu sɛɛnyiɛlɔi lɛ afee ekaa ni amɛkɛ amɛhe asha afɔle. Etee nɔ akɛ: “Ejaakɛ mɔ fɛɛ mɔ ni mi kɛ miwiemɔi lɛ ahe feɔ lɛ hiɛgbele yɛ yinɔbii gbalafitelɔi kɛ eshafeelɔi nɛɛ ateŋ lɛ, lɛ hu ehe aaafee gbɔmɔ Bi lɛ hiɛgbele, beni eeeba yɛ e-Tsɛ anunyam lɛ mli kɛ ebɔfoi krɔŋkrɔŋi lɛ.” Marko 8:22-38; Mateo 16:13-28; Luka 9:18-27.
▪ Mɛni hewɔ ni Yesu susuɔ ekaselɔi lɛ ahe waa lɛ?
▪ Mɛɛ jwɛŋmɔi gbɔmɛi lɛ hiɛ yɛ mɔ ni Yesu ji he?
▪ Mɛɛ samfei akɛha Petro, ni mɛɛ gbɛ nɔ ekɛaatsu nii yɛ?
▪ Mɛɛ tsɔsemɔ akɛha Petro, ni mɛni hewɔ?