Yitso 60

Yesu Maŋtsɛyeli Anunyam lɛ ni Ajie Kpo Atsɔɔ

YESU eba Kaisaria Filipi niiaŋ gbɛ, ni eetsɔɔ gbɔmɛi asafo babaoo ko ni ebɔfoi lɛ fata he lɛ nii. Kɛkɛ ni ewie nɛkɛ wiemɔ ni ha amɛhe jɔ̃ amɛhe nɛɛ akɛ: “Lɛlɛŋ miikɛɛ nyɛ akɛ, mɛi komɛi yɛ mɛi ni damɔ biɛ nɛɛ ateŋ ni amɛsaŋ amɛnaa gbele kɛyashi beyinɔ ni amɛaana gbɔmɔ Bi lɛ miiba yɛ emaŋtsɛyeli lɛ mli.”

Shi ekaselɔi lɛ baasusu akɛ: ‘Mɛni Yesu tsɔɔ nɛɛ?’ No sɛɛ aaafee otsi lɛ, Yesu tsɛ Petro, Yakobo, kɛ Yohane efata ehe, ni amɛkwɔ kɛtee gɔŋ ko ni kwɔ nɔ. Ekolɛ eeenyɛ efee akɛ je ena, ejaakɛ wɔ miiye kaselɔi lɛ. Beni Yesu sɔleɔ lɛ, kɛkɛ ni atsake lɛ yɛ amɛhiɛ. Kɛkɛ ni ehiɛ bɔi kpɛmɔ tamɔ hulu, ni etadei lɛ hu yɛ waa tamɔ la.

Kɛkɛ ni mɛi enyɔ komɛi, ni ale amɛ akɛ “Mose kɛ Elia” bajie amɛhe kpo ni amɛkɛ Yesu bɔi ‘Yerusalem ni ebaaya’ lɛ he wiemɔ. Eka shi faŋŋ akɛ nakai gbɛfaa lɛ kɔɔ Yesu gbele kɛ eshitee kɛjɛ gbohii ateŋ yɛ sɛɛ mli lɛ he. No hewɔ lɛ, nɛkɛ sanegbaa nɛɛ maa nɔ mi akɛ egbele akɛ mɔ ko ni aba lɛ shi nɛɛ jeee nɔ ko ni ebaanyɛ ejo naa foi, taakɛ Petro taoɔ ni efee lɛ.

Akɛni amɛhiɛ etsɛ kwraa hewɔ lɛ, efee kaselɔi lɛ naakpɛɛ beni amɛkwɛɔ ni amɛboɔ toi lɛ. Eyɛ mli akɛ enɛ ji ninaa moŋ, shi etamɔ nɔ ko ni miiba mli yɛ faŋŋ mli aahu akɛ Petro kɛ ehe wo nɔ ni tee nɔ lɛ mli, ni ekɛɛ: “Nuŋtsɔ, ehi ha wɔ akɛ wɔɔhi biɛ; kɛji oosumɔ lɛ, ha ni wɔfee buui etɛ yɛ biɛ, onɔ ekome, kɛ Mose nɔ ekome, kɛ Elia nɔ ekome.”

Beni Petro yaa nɔ ewieɔ lolo lɛ, atatu ko ni miikpɛ halaŋŋ baha amɛnɔ, ni gbee ko jɛ atatu lɛ mli kɛɛ: “Mɔ nɛ ji misuɔmɔ Bi ni minaa ehe tsui lɛ; nyɛboa lɛ toi!” Ni kaselɔi lɛ nu gbee lɛ, amɛkɛ amɛhiɛ bumɔ shi. Shi Yesu kɛɛ amɛ akɛ: “Nyɛtea shi, nyɛkashea gbeyei!” Beni amɛte shi lɛ, amɛnaaa mɔ ko ja Yesu kome pɛ.

Beni amɛkpelekeɔ shi kɛjɛɔ gɔŋ lɛ nɔ enɔ jetsɛremɔ lɛ, Yesu fa amɛ akɛ: “Nyɛkagbaa ninaa nɛɛ nyɛtsɔɔa mɔ ko, akɛ ja gbɔmɔ Bi lɛ ete shi kɛjɛ gbohii ateŋ da.” Elia ni bapue yɛ ninaa lɛ mli lɛ ha sanebimɔ ko ba kaselɔi lɛ ajwɛŋmɔ mli. Amɛbi akɛ: “Mɛɛ hewɔ mɔ ni woloŋmalɔi lɛ kɛɔ akɛ, ja Elia eba da lɛ?”

Yesu kɛɛ: “Elia eba momo, ni amɛyooo lɛ.” Shi, Yesu miiwie Yohane Baptisilɔ lɛ he, mɔ ni batsu nitsumɔ ko ni tamɔ Elia nɔ lɛ nɔŋŋ lɛ. Yohane saa gbɛ lɛ eto Kristo, taakɛ Elia fee eha Elisha lɛ.

Kwɛ bɔ ni ninaa nɛɛ bafee nɔ ni woɔ mɔ hewalɛ eha, kɛha Yesu kɛ kaselɔi lɛ fɛɛ! Etamɔ nɔ ni ninaa lɛ ji Kristo Maŋtsɛyeli anunyam lɛ he nɔ ko ni ajie kpo atsɔɔ. No hewɔ lɛ, nɔ ni kaselɔi lɛ na lɛ ji “gbɔmɔ Bi lɛ [ni] miiba yɛ emaŋtsɛyeli lɛ mli,” taakɛ Yesu wo amɛ shi yɛ otsi pɛ ni tsɔ hiɛ lɛ mli lɛ. Yɛ Yesu gbele sɛɛ lɛ, Petro ŋma ‘odasefoi ni amɛbatsɔmɔ yɛ Kristo anunyam lɛ he beni amɛkɛ lɛ yɔɔ gɔŋ lɛ nɔ lɛ’ he sane.

Farisifoi lɛ miibi ni Yesu afee okadi ko kɛtsɔɔ akɛ lɛ ji mɔ ni awo ehe shi yɛ Ŋmalɛi lɛ amli akɛ ebaafee Maŋtsɛ ni Nyɔŋmɔ ehala lɛ lɛ. Shi ahaaa amɛ okadi ko tamɔ nakai. Yɛ gbɛ kroko nɔ lɛ, aŋmɛ Yesu kaselɔi ni bɛŋkɛ lɛ kpaakpa lɛ gbɛ koni amɛna Yesu ni atsake lɛ lɛ akɛ Maŋtsɛyeli lɛ he gbalɛi lɛ amlibaa. No hewɔ lɛ, Petro ŋma yɛ sɛɛ mli akɛ: “Ni ama gbalɛ wiemɔ lɛ nɔ mi aha wɔ fe tsutsu lɛ.” Mateo 16:13, 28–17:13; Marko 9:1-13; Luka 9:27-37; 2 Petro 1:16-19.

▪ Dani amɛaasa amɛnaa gbele lɛ, mɛɛ gbɛ nɔ mɛi komɛi naa Kristo akɛ eeba yɛ e-Maŋtsɛyeli lɛ mli yɛ?

▪ Mɛni Mose kɛ Elia kɛ Yesu wie he yɛ ninaa lɛ mli?

▪ Mɛni hewɔ ni ninaa nɛɛ ji yelikɛbuamɔ nɔ ni woɔ mɔ hewalɛ kɛha kaselɔi lɛ?