Shishitoo Mla lɛ Yɔsemɔ Tsɔ̃ɔ Dalɛ
NAANYOBƆƆ fɔŋ fiteɔ jeŋbai kpakpai. Nɔ ni odũɔ lɛ nɔŋŋ okpaa. (1 Korintobii 15:33; Galatabii 6:7) Wiemɔ nɛɛ eko fɛɛ eko, kɛ́ yɛ heloo naa loo yɛ mumɔŋ lɛ, eji shishijee anɔkwale ko he nɔkwɛmɔnɔ—shishitoo mla—ni eko fɛɛ eko kɛ nɔdaamɔ nɔ kɛha mlai hãa. Shi, mlai baanyɛ aba ni amɛbaaya, ni amɛkɔɔ nibii pɔtɛɛ komɛi ahe. Shi yɛ gbɛ kroko nɔ lɛ, shishitoo mlai amli lɛɛ, ni amɛnyɛɔ amɛhiɔ shi kɛyaa naanɔ. No hewɔ lɛ, Nyɔŋmɔ Wiemɔ lɛ woɔ wɔ hewalɛ ni wɔjwɛŋ shishitoo mlai ni kɔɔ nibii ahe lɛ he kɛ aaahi.
Webster’s Third New International Dictionary lɛ tsɔ̃ɔ shishitoo mla mli akɛ “nɔ ni mɔ fɛɛ mɔ ŋɔɔ lɛ akɛ eji anɔkwale aloo shishijee anɔkwale: shishijee mla ni yɔɔ fitsofitso, tsɔɔmɔ, loo susumɔ ni nibii krokomɛi damɔ nɔ aloo ni anáa ekrokomɛi kɛjɛɔ mli.” Akɛ nɔkwɛmɔnɔ lɛ, mɔ ko baanyɛ ekɛ mla aha gbekɛ akɛ, “Kaata stof lɛ he.” Shi kɛha onukpa lɛ, wiemɔ akɛ, “Stof lɛ edɔ” lɛ kɛkɛ fá. Kadimɔ akɛ sɛɛkpee wiemɔ lɛ mli lɛɛ pii. Ejaakɛ ekudɔɔ nɔ ni mɔ ko baafee—ekolɛ ebaahoo niyenii, eshã nɔ ko, aloo egbe stof lɛ—yɛ shishinumɔ naa lɛ, ebatsɔ̃ɔ shishitoo mla.
Shi kɛlɛ, shishitoo mlai titrii ni yɔɔ shihilɛ mli lɛ ji mumɔŋ nɔ̃; amɛkudɔɔ jamɔ ni wɔkɛhaa Nyɔŋmɔ kɛ wɔ miishɛɛnamɔ. Shi, mɛi komɛi gbalaa amɛhe shi kɛjɛɔ mɔdɛŋbɔɔ ni ataoɔ koni akɛsusu shishitoo mlai ahe lɛ he. Amɛsumɔɔ miishɛɛ ni mla kɛhaa yɛ be mli ni amɛkɛ yiŋkpɛɛ kpeɔ lɛ. Nilee bɛ enɛ mli, ni ekɛ nɔkwɛmɔnii ni blema hii anɔkwafoi ni hi shi yɛ Biblia bei amli lɛ fee amɛfɔ shi lɛ kpaaa gbee.—Romabii 15:4.
Hii ni Hi Shi yɛ Shishitoo Mla ni Nyɔŋmɔ Gbeyeishemɔ Yɔɔ Mli lɛ Naa
Abaanyɛ atsɛ Habel, yɛ hii ni yeee emuu lɛ ateŋ ákɛ klɛŋklɛŋ gbɔmɔ ni hi shi yɛ shishitoo mla ni Nyɔŋmɔ gbeyeishemɔ yɔɔ mli lɛ naa. Eyɛ faŋŋ akɛ esusu shiwoo ni kɔɔ ‘seshi’ lɛ he lɛ he waa, ni eyoo akɛ kpɔmɔ kɛmiijɛ esha mli lɛ baakɔ lá afɔleshãa he. (1 Mose 3:15) No hewɔ lɛ, ekɛ “etooi akromɔbii lɛ” shã afɔle eha Nyɔŋmɔ. Wiemɔ kuku “kɛ amɛfɔi lɛ eko” lɛ tsɔɔ akɛ Habel kɛ enii ni hi fe fɛɛ ha Yehowa. Ni kɛlɛ, ebaafee nɔ ni fe afii akpei enyɔ yɛ Habel gbele sɛɛ kwraa dani Nyɔŋmɔ baatsɔɔ taomɔ nii ni kɔɔ afɔleshai ahe lɛ amli fitsofitso. Ákɛ mɔ ni tamɔɔɔ Habel ni sheɔ Nyɔŋmɔ gbeyei ni diɔ shishitoo mla sɛɛ lɛ, Kain ni ji enyɛmi nuu lɛ tsu afɔle ni ashãa lɛ jabejabe ko he nii eha Nyɔŋmɔ. Shi esubaŋ esaaa hiɛ, nɔ ko yɛ efɔleshãa lɛ he ni tsɔɔ tsui ni bɛ shishitoo mla.—1 Mose 4:3-5.
Noa hu ji nuu ni di shishitoo mla ni Nyɔŋmɔ gbeyeishemɔ yɔɔ mli sɛɛ. Yɛ be mli ni Biblia mli sane lɛ tsɔɔ akɛ Nyɔŋmɔ je gbɛ efã lɛ ni ekpɛ adeka lɛ, wɔkaneee fãmɔ ko ni akɛha lɛ akɛ eshiɛ etsɔɔ mɛi krokomɛi lɛ he sane. Shi kɛlɛ, atsɛɔ Noa akɛ “jalɛ shiɛlɔ lɛ.” (2 Petro 2:5) Eyɛ mli akɛ ekolɛ Nyɔŋmɔ fã Noa akɛ eshiɛ moŋ, shi ŋwanejee ko bɛ he akɛ, shishitoo mla he shishinumɔ kɛ naanyo suɔmɔ ni eyɔɔ lɛ hu tsirɛ lɛ koni efee nakai. Akɛni bei ni tamɔ Noa nɔ̃ lɛ mli wɔyɔɔ hewɔ lɛ, nyɛhaa wɔkasea esubaŋ kɛ enɔkwɛmɔnɔ kpakpa lɛ.
Ákɛ mɔ ni tamɔɔɔ egbii lɛ amli osɔfoi lɛ, Yesu tsɔɔ gbɔmɛi lɛ anii koni amɛdamɔ shishitoo mlai anɔ amɛsusu saji ahe. E-Gɔŋ nɔ Shiɛmɔ lɛ ji enɛ he nɔkwɛmɔnɔ. Nɔ̃ titri ni yɔɔ mli ji shishitoo mla ni ebi ni akɛtsu nii. (Mateo, yitsei 5-7) Yesu tsɔɔ nii yɛ nɛkɛ gbɛ nɔ, ejaakɛ taakɛ Habel kɛ Noa ni tsɔ ehiɛ lɛ ji lɛ, ele Nyɔŋmɔ diɛŋtsɛ. Beni eji obalanyo fioo po lɛ, ekɛ woo ha shishijee anɔkwale nɛɛ: “Jeee aboloo kɛkɛ . . . shi moŋ nɔ fɛɛ nɔ ni jɛɔ Yehowa daaŋ lɛ haa gbɔmɔ yi naa wala.” (5 Mose 8:3; Luka 2:41-47) Hɛɛ, nɔ titri ni haa mɔ ko feɔ mɔ ni diɔ shishitoo mla ni Nyɔŋmɔ gbeyeishemɔ yɔɔ mli sɛɛ ji ni mɔ lɛ ale Yehowa diɛŋtsɛ, nii ni esumɔɔ, nii ni esumɔɔɔ, kɛ eyiŋtoi. Kɛ nɛkɛ shishijee nibii ni kɔɔ Nyɔŋmɔ he lɛ kudɔɔ wɔshihilɛ lɛ, nɔ ni jɛɔ mli baa ji akɛ, amɛbatsɔmɔɔ shishitoo mlai ni wala yɔɔ mli.—Yeremia 22:16; Hebribii 4:12.
Shishitoo Mlai kɛ Tsui Lɛ
Anyɛɔ akɛ mligbigbilimɔ kɛkɛ yeɔ mla nɔ, ekolɛ yɛ enɔ toigbomɔ he toigbalamɔ lɛ pɛ hewɔ. Shi, shishitoo mla ko kɛ nitsumɔ eŋmɛɛɛ subaŋ ni tamɔ nɛkɛ gbɛ, ejaakɛ nɔ ni yɔɔ shishitoo mlai amli diɛŋtsɛ ji akɛ, kɛ no yeɔ onɔ lɛ belɛ esa akɛ ojɛ tsui mli okpɛlɛ nɔ. Susumɔ Yosef, ni taakɛ Habel kɛ Noa ji lɛ, ehi shi dani ato Mose Mla kpaŋmɔ lɛ ama shi lɛ he okwɛ. Beni Potifar ŋa lɛ bɔ mɔdɛŋ ni elaka lɛ lɛ, Yosef ha hetoo akɛ: “Te aaafee tɛŋŋ ni mafee efɔŋ kpeteŋkpele ni tamɔ nɛkɛ nɛɛ, ni mafee esha mashi Nyɔŋmɔŋ?” Hɛɛ, Yosef le shishitoo mla ni tsɔɔ akɛ wu kɛ ŋa ji “heloo kome” lɛ.—1 Mose 2:24; 39:9.
Jalɛ shishitoo mlai bɛ je lɛŋ ŋmɛnɛ. Je lɛ feɔ fu yɛ awuiyeli kɛ jeŋba shara he. Oshara ni yɔɔ ji akɛ, ekolɛ enɛ baaka Kristofonyo lɛ koni eye niyenii gbonyo kome too lɛ nɔŋŋ—sinii, videoi, loo woji lɛ ahe nii fiofio yɛ teemɔŋ. Belɛ kwɛ bɔ ni esa yijiemɔ, ákɛ wɔ hu wɔɔtamɔ Yosef ni wɔdamɔ shishitoo mla nɔ wɔkpoo efɔŋ, ni wɔkai akɛ Nyɔŋmɔ baabaa anɔkwafoi lɛ pɛ yi kɛtsɔ “amanehulu babaoo” ni baa lɛ mli. (Mateo 24:21) Hɛɛ, nɔ̃ ni wɔji titri yɛ teemɔŋ, shi jeee yɛ kponɔgbɛ lɛ, ji nɔ ni jieɔ bɔ ni wɔji diɛŋtsɛ yɛ mligbɛ lɛ kpo.—Lala 11:4; Abɛi 15:3.
No hewɔ lɛ, kɛ Biblia mli shishitoo mlai kudɔɔ wɔ lɛ, wɔtaoŋ nɔ ni tamɔ gbɛi ni yɔɔ Nyɔŋmɔ mlai lɛ amli ni wɔɔtsɔ nɔ wojo nibii anaa foi; ni asaŋ wɔbɔŋ mɔdɛŋ akɛ wɔɔkwɛ he ni wɔɔnyɛ wɔya shɔŋŋ kɛyashɛ ni wɔkuŋ mla ko mli diɛŋtsɛ. Susumɔ ni tamɔ nɛkɛ haa wɔnine nyɛɔ shi; yɛ naagbee lɛ eyeɔ wɔ awui.
Kwɛmɔ Nɔ̃ ni Yɔɔ Mla lɛ Sɛɛ
Eji anɔkwale akɛ, mlai tsuɔ nii ni he hiaa he nii yɛ Kristofonyo lɛ shihilɛ mli. Amɛtamɔ bulɔi ni yeɔ buaa wɔhebuu, ni nɔ ni yɔɔ amɛmligbɛ tɔ̃ɔ ji shishitoo mlai babaoo ni he hiaa. Shishitoo mlai nɛɛ ni wɔnyɛɛɛ wɔyoo lɛ baaha wɔsuɔmɔ kɛha mlai krokomɛi ni kɔɔ he lɛ ahe ajɔ. Blema Israel maŋ lɛ fee enɛ he nɔkwɛmɔnɔ.
Nyɔŋmɔ kɛ Kitai Nyɔŋma lɛ ha Israel, ni emli klɛŋklɛŋ nɔ lɛ guɔ nyɔŋmɔ ko ni aaaja lɛ, ja Yehowa. Ákɛ Yehowa bɔ nibii fɛɛ lɛ ji shishijee anɔkwale ni yɔɔ mla nɛɛ sɛɛ. (2 Mose 20:3-5) Shi ani maŋ lɛ hi shi yɛ shishitoo taomɔ nii nɛɛ naa? Yehowa diɛŋtsɛ haa hetoo: “[Israelbii lɛ kɛɛ] tso kuku akɛ: ‘Wɔtsɛ jio,’ ni [amɛbolɔ amɛtsɛ́] tɛ akɛ, ‘Minyɛ.’ Shi amɛtsɔmɔ amɛsɛɛ amɛha mi [Yehowa], ni amɛtsɔmɔ amɛhiɛ kɛjɛ mihe kɛtee afã.” (Yeremia 2:27, The New English Bible) Mɛɛ tsui ni wa kɛ shishitoo mla ni abɛ he buuluufeemɔ nɛ! Ni kwɛ nidɔɔnii ni amɛfee Yehowa!—Lala 78:40, 41; Yesaia 63:9, 10.
Kristofoi hu yɛ mlai ni jɛ Nyɔŋmɔ ŋɔɔ. Akɛ nɔkwɛmɔnɔ lɛ, esa akɛ amɛtsi amɛhe kɛjɛ wɔŋjamɔ, bɔlɛnamɔ mli jeŋba shara, kɛ lá ni akɛtsuɔ nii yɛ gbɛ fɔŋ nɔ lɛ ahe. (Bɔfoi lɛ Asaji 15:28, 29) Kɛ osusu he lɛ, wɔbaanyɛ wɔna shishitoo mlai ni hɔlɔ sɛɛ, tamɔ akɛ: Nyɔŋmɔ sa hetuu-kɛhamɔ ni wɔkɛaaha ekome too; esa akɛ wɔye wɔ hefatalɔ lɛ anɔkwale; kɛ Yehowa ji wɔ Wala-Halɔ. (1 Mose 2:24; 2 Mose 20:5; Lala 36:10) Kɛji akɛ wɔyoo ni wɔhiɛ sɔ shishitoo mlai ni yɔɔ gbɛtsɔɔmɔi nɛɛ asɛɛ waa lɛ, wɔnaa akɛ amɛyɛ kɛha wɔ diɛŋtsɛ wɔhilɛ-kɛhamɔ. (Yesaia 48:17) Kɛha wɔ lɛ, Nyɔŋmɔ ‘kitai lɛ waaa.’—1 Yohane 5:3.
Yɛ be mli ni Israelbii lɛ ku amɛhiɛ amɛshwie Nyɔŋmɔ kitai anɔ yɛ be ko ni eho lɛ, beni Yesu be lɛ shɛɔ lɛ, amɛ “mlalelɔi” lɛ, ni ji woloŋmalɔi lɛ, eyaje afã gbɛ kroko lɛ kwraa. Amɛfee mlai kɛ blema saji babaoo ni tsiɔ jamɔ krɔŋŋ gbɛ lɛ anaa amɛshwie shi, ni amɛkɛ shishitoo mlai ni Nyɔŋmɔ gbeyeishemɔ yɔɔ mli lɛ to. (Mateo 23:2, NEB) Gbɔmɛi ŋmɛɛ amɛhe amɛha nijiaŋwujee, hiɛnɔkamɔ ni bɛ, loo osatofeemɔ. (Mateo 15:3-9) Ni mɔbɔnalɛ bɛ mlai ni adesai fee lɛ pii amli. Beni Yesu miihe atsa nuu ko ni enine egbo lɛ, ebi Farisifoi ni yɔɔ jɛmɛ lɛ akɛ: “Ani hejɔɔmɔ gbi lɛ nɔ lɛ eja akɛ afeɔ ekpakpa?” Dioo ni amɛfee lɛ tsɔɔ akɛ mla eŋmɛɛɛ gbɛ, ni eha Yesu “ye awerɛho waa yɛ bɔ ni amɛtsui nuuu nii ahe lɛ hewɔ.” (Marko 3:1-6, NW) Farisifoi lɛ baanyɛ aye abua shĩa kooloo ni eka he ko loo epila (ejaakɛ shika yɛ mli) yɛ Hejɔɔmɔ gbi lɛ nɔ, shi amɛfeŋ nakai amɛhaŋ nuu ko loo yoo ko—ja sane lɛ ji wala kɛ gbele nɔ̃. Yɛ anɔkwale mli lɛ, adesai amlai kɛ mla mli nibii bibii eye amɛ sɛkɛ aahu akɛ, amɛtamɔ tsatsubii ni miifo shi yɛ nitɛŋmɔ nɔ, amɛnaaa mfoniri muu lɛ kwraa—ni ji ŋwɛi shishitoo mlai lɛ.—Mateo 23:23, 24.
Shi, kɛ gbekɛbii po hiɛ tsuii ni ja lɛ, amɛbaanyɛ ni amɛkɛ woo abaha Yehowa kɛtsɔ hiɛsɔɔ ni amɛyɔɔ kɛha Biblia mli shishitoo mlai lɛ nɔ. Rebecca ni eye afii 13 lɛ tsɔɔlɔ lɛ bi klas lɛ akɛ amɛteŋ namɔ baasumɔ ni eshwɛ asɔ. Amɛteŋ mɛi pii kɛɛ amɛfeŋ nakai. Shi kɛlɛ, beni atsi shihilɛi sɔrɔtoi atã lɛ, amɛ fɛɛ amɛkpɛlɛ nɔ akɛ amɛbaashwɛ asɔ lɛ yɛ gbɛ kome loo gbɛ kroko nɔ, ja Rebecca pɛ. Tsɔɔlɔ lɛ bi Rebecca kɛ ekɛ sent-20 baahe atsiatsi tikiti koni akɛna shika ahã nɔ ko ni hi ni abaafee. Rebecca kɛɛ dabi, ni ekɛ Ŋmalɛ mli yiŋtoi ni nakai feemɔ baatsɔ̃ tamɔ asɔshwɛmɔ ha. Kɛkɛ ni etsɔɔlɔ lɛ kɛɛ klasbii lɛ fɛɛ akɛ: ‘Yɛ misusumɔ naa lɛ, Rebecca pɛ ji mɔ ni yɔɔ biɛ ni yɔɔ nɔ ni mitsɛɔ lɛ “shishitoo mlai” yɛ wiemɔ lɛ shishinumɔ diɛŋtsɛ naa.’ Hɛɛ, kulɛ Rebecca baanyɛ aha hetoo kɛkɛ akɛ, “Eteɔ shi ewoɔ mijamɔ,” shi esusu saji ahe kɛtee shɔŋŋ fe nakai; enyɛ ehã nɔ hewɔ ni asɔshwɛmɔ ejaaa kɛ nɔ hewɔ ni ekpoo akɛ ekɛ ehe wooo mli lɛ hetoo.
Nɔkwɛmɔnii tamɔ Habel, Noa, Yosef, kɛ Yesu tsɔɔ wɔ bɔ ni ‘wɔjwɛŋmɔŋ nyɛmɔ’ kɛ ‘wɔsusumɔŋ hewalɛ’ ni wɔkɛaatsu nii lɛ he baa sɛɛnamɔ kɛhaa wɔ yɛ jamɔ ni wɔkɛhãa Nyɔŋmɔ lɛ mli. (Abɛi 2:11; Romabii 12:1) Kristofoi onukpai feɔ jogbaŋŋ beni amɛkaseɔ Yesu yɛ ‘Nyɔŋmɔ asafoku lɛ ni amɛlɛɔ amɛ’ lɛ mli. (1 Petro 5:2) Taakɛ Yesu fee he nɔkwɛmɔnɔ jogbaŋŋ lɛ, mɛi ni sumɔɔ shishitoo mlai ni Nyɔŋmɔ gbeyeishemɔ yɔɔ mli lɛ ji mɛi ni shwereɔ yɛ Yehowa maŋtsɛyeli lɛ shishi.—Yesaia 65:14.