Eyaye Nii yɛ Simon Shi̇̃a lɛ yɛ Betania

Be ni Yesu shi Yeriko lɛ, ewó ehiɛ ewo Betania. Gbɛfãa nɛɛ biɔ ni amɛnyiɛ gbɛ ni nɔ nyiɛmɔ wa ni jekɛmɔ aaafee kilomitai 20 nɔ kɛkwɔ gɔŋ. Yeriko maŋ lɛ yɛ jɔɔ mli ni Betania yɛ gɔŋ nɔ. Betania ji he ni Lazaro kɛ enyɛmimɛi yei enyɔ lɛ yɔɔ, ni akrowa bibioo nɛɛ kɛ Yerusalem jekɛmɔ aaafee kilomitai 3, ni ekã Oliv Gɔŋ lɛ boka.

Yudafoi babaoo ebashɛ Yerusalem momo kɛhã Hehoo lɛ. Amɛba mra “koni amɛyatsuu amɛhe yɛ kusum naa,” ejaakɛ ekolɛ amɛta gbonyo he loo amɛfee nɔ ko ni ewo amɛhe muji. (Yohane 11:55; 4 Mose 9:6-10) Mɛi ni eba mra nɛɛ ateŋ mɛi komɛi bua amɛhe naa yɛ sɔlemɔwe lɛ. Amɛmiikwɛ akɛ Yesu baaba Hehoo lɛ lo.​—Yohane 11:56.

Mɛi miiwie nibii srɔtoi yɛ Yesu he. Jamɔŋ hiɛnyiɛlɔi lɛ ekomɛi miitao amɛmɔ lɛ ni amɛgbe lɛ. Amɛfã akɛ, kɛ́ mɔ ko ná le he ni Yesu yɔɔ lɛ, ebakɛɛ amɛ “koni amɛyamɔ lɛ.” (Yohane 11:57) Be ni Yesu tee Lazaro shi lɛ, jamɔŋ hiɛnyiɛlɔi nɛɛ ka akɛ amɛbaagbe Yesu. (Yohane 11:49-53) No hewɔ lɛ, ŋwanejee ko bɛ he akɛ mɛi komɛi baasusu akɛ Yesu kɛ ehe baatee.

Yesu bashɛ Betania Sohaa, no mli lɛ, “eshwɛ gbii ekpaa dani Hehoo lɛ baashɛ.” (Yohane 12:1) Gbi kroko (ni ji Hejɔɔmɔ Gbi, Nisan 8) baaje shishi be ni hulu enyɔ shi. No hewɔ lɛ, eyashɛ dani Hejɔɔmɔ Gbi lɛ shɛ. Kulɛ enyɛŋ eshi Yeriko yɛ Hejɔɔmɔ Gbi​—ni ji Sohaa be ni hulu enyɔ shi kɛyashi Hɔɔ be ni hulu enyɔ shi​—lɛ nɔ, ejaakɛ Yudafoi lɛ amla lɛ eŋmɛɛɛ gbɛ ni afã gbɛ yɛ Hejɔɔmɔ Gbi lɛ nɔ. Ekolɛ Yesu tee Lazaro shĩa lɛ, taakɛ efee be ko ni eho lɛ.

Nuu ko ni atsɛɔ lɛ Simon ni yɔɔ Betania lɛ fɔ̃ Yesu kɛ enanemɛi lɛ kɛ Lazaro nine kɛhã niyeli yɛ Hɔɔ gbɛkɛ mli. Atsɛɔ Simon akɛ “kpitiyelɔ,” ejaakɛ ekolɛ tsutsu ko lɛ eji kpitiyelɔ, ni Yesu tsa lɛ. Marta bɔi gbɔi lɛ sɔɔmɔ taakɛ ale ni efɔɔ feemɔ lɛ. Maria hu hiɛ edɔ yɛ Yesu he waa aahu akɛ enifeemɔ lɛ tee naataamɔ ko shi.

Maria jwa alabastro tɔ ko ní “mu ni jeɔ ŋma, nardo mu krɔŋŋ, . . . ni ŋmɛɔ nsɛnii tɛ kome” yɔɔ mli lɛ naa. (Yohane 12:3) Mu nɛɛ jara wa waa (denarioi 300), ejara baafee nitsulɔ afi nyɔmɔwoo! Maria fɔse mu lɛ eshwie Yesu yiteŋ kɛ naji ahe, ni ekɛ eyitsɔi tsumɔ Yesu naji ahe. Mu nɛɛ ŋma lɛ yi shĩa lɛ fɛɛ tɔ.

Kaselɔi lɛ amli wo la ni amɛbi akɛ: “Mɛni hewɔ afite mu ni jeɔ ŋma nɛɛ?” (Marko 14:4) Yuda Iskariot wie eshi akɛ: “Mɛni hewɔ ahɔ̃ɔɔ mu ni jeɔ ŋma nɛɛ denarioi ohai etɛ ni akɛhã ohiafoi?” (Yohane 12:5) Jeee ohiafoi ahe Yuda foɔ. Ejaakɛ ejuɔ shika ni yɔɔ adeka ni ekɛtoɔ ehãa kaselɔi lɛ mli lɛ.

Yesu fã Maria he ekɛɛ: “Mɛni hewɔ nyɛgbaa yoo lɛ naa? Etsu nitsumɔ kpakpa ehã mi. Ejaakɛ ohiafoi lɛ nyɛkɛ amɛ yɛ daa, shi mi lɛ jeee daa mikɛ nyɛ baahi shi. Be ni yoo nɛɛ fɔse mu ni jeɔ ŋma nɛɛ eshwie migbɔmɔtso lɛ nɔ lɛ, efee koni ekɛsaa mi eto mifuu lɛ. Lɛɛlɛŋ, miikɛɛ nyɛ akɛ, he fɛɛ he ni abaashiɛ sane kpakpa nɛɛ yɛ, yɛ jeŋ fɛɛ lɛ, abaagba nɔ ni yoo nɛɛ fee nɛɛ hu ni akɛkai lɛ.”​—Mateo 26:10-13.

Eye fe gbi kome yɛ Betania, ni mɛi ená ele akɛ Yesu eba. Enɛ hewɔ lɛ, Yudafoi babaoo ba Simon shĩa lɛ, koni amɛbakwɛ Yesu, shi jeee lɛ pɛ, amɛmiitao amɛna Lazaro ni ji “mɔ ni [Yesu tee] lɛ shi kɛjɛ gbohii ateŋ lɛ hu.” (Yohane 12:9) Agbɛnɛ, osɔfoi tsiifoi lɛ tee Yesu kɛ Lazaro fɛɛ yi nɔ apam akɛ amɛbaagbe amɛ. Jamɔŋ hiɛnyiɛlɔi nɛɛ susuɔ akɛ Lazaro ni atee lɛ shi lɛ hewɔ ni mɛi babaoo heɔ Yesu nɔ amɛyeɔ lɛ. Jamɔŋ hiɛnyiɛlɔi nɛɛ ayitseiaŋ wala diɛŋtsɛ!