Ajɔɔ Mɛi Ni Nyɔŋmɔ Gbalaa Amɛ Toi
“Ajɔɔ gbɔmɔ ni bo, Yehowa, ogbalaa etoi, ni ojɛɔ omla lɛ mli otsɔɔ lɛ nii.”—Lala 94:12.
1, 2. Te esa akɛ wɔnu jajemɔ loo toigbalamɔ ni Nyɔŋmɔ gbeyeishemɔ yɔɔ mli lɛ he wɔha tɛɛŋ?
1 MƐƐ be nɛ ni otɔ̃ Nyɔŋmɔ jalɛ gbɛ̀i kɛ tɛi ni efolɔ eshwie shi lɛ anɔ, yɛ wiemɔ loo nifeemɔ mli nyɛsɛɛ nɛɛ? Eka shi faŋŋ akɛ ehe ehiaaa ni ojwɛŋ kɛya shɔŋŋ, ekolɛ ŋmɛlɛtswaai loo gbii fioo ko, ejaakɛ wɔfɛɛ wɔfeɔ esha, ni wɔnyɛɛɛ wɔjie Nyɔŋmɔ anunyam lɛ kpo yɛ gbɛ ni ja nɔ.—1 Maŋts. 8:46; 1 Yoh. 1:8-10.
2 Wɔbaanyɛ wɔna miishɛɛ akɛ Yehowa sumɔɔ ni enyɛɔ egbalaa wɔ toi yɛ esuɔmɔ lɛ mli. “Mɔ ni gbalaa jeŋmaji atoi ni etsɔɔ gbɔmɛi anilee lɛ, aso ekaŋ mɔ hiɛ? Ajɔɔ gbɔmɔ ni bo, Yehowa, ogbalaa etoi, ni ojɛɔ omla lɛ mli otsɔɔ lɛ nii.” Kɛ ‘wɔŋmɛ gbɛ’ ni Yehowa ‘gbala wɔ toi’ lɛ, wɔbaana miishɛɛ, ejaakɛ wɔkɛ Iɛ baakpa gbee.—Lala 94:10, 12.
3. Mɛni ji saji ni esa akɛ asusu he yɛ gbɛ ni ja nɔ lɛ?
3 Kristofoi baanyɛ ni amɛkɛ amɛhe afɔ nɔmimaa ni Biblia lɛ kɛhaa nɛɛ nɔ: “Ejaakɛ mɔ ni Nuŋtsɔ lɛ sumɔɔ lɛ, lɛ etsɔseɔ.” (Heb. 12:6) No hewɔ lɛ eŋɔɔ wɔnaa akɛ wɔkɛ sane ko ni damɔ Biblia lɛ nɔ ni kɔɔ kamɔ, tsuitsakemɔ kɛ mɔ shwiemɔ he aaaha yɛ biɛ. Saji sɔrɔtoi enyɔ ni aŋmala yɔɔ Buu-Mɔɔ nɛɛ mli, ni abaaŋma etɛ ni eshwɛ lɛ yɛ nɔ ni baanyiɛ enɛ sɛɛ lɛ mli. Nɛkɛ nikasemɔi enumɔ nɛɛ baaye abua wɔfɛɛ ni wɔna Ŋmalɛ mli shishitoo mlai ni kɔɔ enɛ he lɛ ahe shishinumɔ ni mli ka shi faŋŋ, koni “nyɛyea emuu, nyɛhaa ashɛjea nyɛmii, nyɛjwɛŋmɔ afee ekome, nyɛhia shi yɛ hejɔlɛ mli.”—2 Kor. 13:11.
4, 5. Mɛɛ gbɛ Yehowa Nyɔŋmɔ tsɔɔ nɔ ejajeɔ wɔ loo egbalaa wɔ toi?
4 Nyɔŋmɔ fɔɔ wɔ toi gbalamɔ yɛ mlijɔlɛ kɛ agbɛnɛ yɛ gbɛ ni waaa nɔ akɛ bei pii lɛ wɔyɔseee akɛ eji toigbalamɔ. Ekolɛ wɔkaneɔ nɔ ko yɛ e-Wiemɔ lɛ mli ni egbalaa wɔ kɛjɛɔ gbɛ ni ejaaa lɛ nɔ aloo ejajeɔ wɔsusumɔ. Yɛ bei komɛi amli lɛ toigbalamɔ ni jɛ Nyɔŋmɔ ŋɔɔ nɛɛ bafeɔ nɔ ni mli ka shi faŋŋ kɛ agbɛnɛ nɔ ni dɔlɛ po yɔɔ mli. Shi kɛlɛ ele heni ebaafee enɛ kɛyashɛ kɛ gbɛ ni hi fe fɛɛ kɛha wɔ ni ebaatsɔ nɔ ejaje wɔ. (Yer. 30:11) Kwɛ bɔni ehi jogbaŋŋ mɔ akɛ wɔɔjɛ wɔ suɔmɔ mli wɔkpɛlɛ etoigbalamɔ lɛ nɔ, ejaakɛ Nyɔŋmɔ kɛ tsɔsemɔ haa yɛ suɔmɔ mli taakɛ bɔni tsɛ kɛhaa ebi ni esumɔɔ lɛ lɛ! Jwɛŋmɔ yɛ mli hu akɛ oookpɛlɛ toigbalamɔ ni tsiɔ wɔ naa yɛ nɔ ko feemɔ he be fioo ni Yehowa Nyɔŋmɔ kɛaafɔ wɔ nɔ lɛ nɔ, fe ni eeegbala wɔ toi kɛyashɛ hiɛkpatamɔ mli.—Yer. 10:24; Heb. 12:5.
5 Eshɛɔ be ni Nyɔŋmɔ kɛ toigbalamɔ nɛɛ haa kɛtsɔɔ adesai anɔ. Etsu gbalɔi kɛ kojolɔi kɛtee Israel maŋ lɛ mli. Shi ebaanyɛ ekɛ toigbalamɔ loo tsɔsemɔ ni nilee yɔɔ mli aha mɔ aŋkro. Hiob “miishɛjelɔi” gbohii lɛ ateŋ mɔ kome kpɛlɛ nɔ akɛ Hiob “etsɔɔ mɛi pii anii” aloo etsɔse mɛi pii. (Hiob 4:3; 16:2) Mɛɛ jɔɔmɔ eji akɛ mɔ ko nine aaashɛ toigbalamɔ loo tsɔsemɔ ni nilee yɔɔ mli nɔ kɛjɛ Hiob ŋɔɔ, nuu ni etu ehe eha Nyɔŋmɔ yɛ gbɛ ni ekaaa nɔ! Wɔbaanyɛ wɔbi wɔ diɛŋtsɛ wɔhe akɛ, ‘Ani mikpɛlɛɔ toigbalamɔ ni yeɔ buaa ni tamɔ nɛkɛ nɔ, toigbalamɔ loo tsɔsemɔ ni jɛ adesa ŋɔɔ shi eji nɔ ni damɔ Nyɔŋmɔ nilee ni yeɔ emuu lɛ nɔ?’
TSƆSEMƆ LOO TOIGBALAMƆ NI WƆKƐ AAAHA WƆHE WƆHE YƐ SUƆMƆ
6. Mɛni nɔ nyɛmi ko baanyɛ adamɔ ni ekɛ jajemɔ loo kamɔ aha wɔ?
6 Yesu kɛ nɔ ni abaadamɔ nɔ akpa toigbalamɔ kɛ agbɛnɛ ekɛhamɔ yɛ suɔmɔ mli lɛ gbɛ fɔ shi. Yesu kɛɛ yɛ wiemɔi ni kɔɔ efɔŋ ni hiɛdɔɔ yɔɔ mli ni mɔ ko aaafee, shi ni abaanyɛ akɛ shishitoo mlai lɛ atsu shihilɛi sɔrɔtoi ahe nii lɛ he akɛ: “Kɛji onyɛmi tɔ onɔ lɛ, jajemɔ lɛ; ni kɛji eshwa ehe lɛ, ŋɔɔ fa lɛ.” (Luka 17:3, The New American Bible) Agbɛnɛ hu bɔfo Paulo ŋma akɛ “Nuŋtsɔ lɛ tsulɔ lɛ” esa akɛ efee “mɔ ni kɛ mlijɔlɛ wieɔ etsɔɔ mɛi (ejajeɔ loo ekaa mɛi) .”—2 Tim. 2:24, 25, NAB.
7. Mɛni esa akɛ afee yɛ esha ni hiɛdɔɔ yɔɔ mli lɛ he?
7 Tookwɛlɔi aloo nɔkwɛlɔi ni ahala amɛ yɛ asafo lɛ mli lɛ yɛ Kristofonyo fɛɛ Kristofonyo he miishɛɛ, kɛ agbɛnɛ asafoku muu lɛ fɛɛ ni amɛaabu amɛhe. (Heb. 13:17; 1 Pet. 5:2, 3) No hewɔ lɛ, kɛji akɛ mɔ ko yagbee esha ko ni mliwa mli lɛ, esa akɛ aha amɛle sane lɛ. Esa akɛ eshafeelɔ lɛ diɛŋtsɛ “etsɛ asafo lɛ mli onukpai lɛ kɛba eŋɔɔ.” Aloo, Kristofonyo fɛɛ Kristofonyo ni baanu esha ni hiɛdɔɔ yɔɔ mli ni efee nɛɛ he lɛ awó onukpai lɛ atoi nɔ yɛ efɔŋfeelɔ lɛ he susumɔ kɛ asafo lɛ hetsemɔ hewɔ. (3 Mose 5:1) Kɛkɛ lɛ nɛkɛ onukpai nɛɛ baanyɛ aye abua mɔ ni egbee tɔmɔ mli lɛ, koni amɛha eku esɛɛ ni ‘amɛkɛhere esusuma kɛjɛ gbele mli.’—Yak. 5:14, 16, 19, 20.
8. Te esa akɛ wɔbu wɔnyɛmimɛi atɔmɔi bibii lɛ tɛŋŋ?
8 Fatɔɔi loo tɔmɔi komɛi yɛ ni mli waaa tsɔ ni Kristofoi ni amɛdara yɛ mumɔŋ baanyɛ ni amɛkɛ jajemɔ loo yelikɛbuamɔ ni damɔ Biblia lɛ nɔ lɛ aha. Shi kɛlɛ esa akɛ wɔkwɛ jogbaŋŋ yɛ keketee ni wɔfee yɛ mɔ ko tɔmɔi bibii ahe lɛ mli, ejaakɛ Nyɔŋmɔ woɔ wɔ ŋaa ni wɔna tsuishitoo ni wɔna wɔha wɔhe. (Kol. 3:12, 13) Esa akɛ wɔna ‘heshibaa jwɛŋmɔ, ni wɔbu akɛ mɛi krokomɛi anɔ kwɔlɔ fe wɔ, ni wɔkafo wɔkome wɔ nɔ pɛ mli, shi moŋ wɔfo mɛi krokomɛi anɔ hu mli.’ (Filip. 2:3, 4) Nyɔŋmɔ maa nɔ mi kɛhaa wɔ akɛ gbɔmɔ hiɛ ni “ekuɔ efɔɔ nɔtɔmɔ nɔ lɛ, ehiɛnyam ni.”—Abɛi 19:11.
9, 10. Mɛni abaanyɛ afee kɛji akɛ etamɔ nɔ ni nyɛmi miitsɔ gbɛ ni ejaa nɔ?
9 Agbɛnɛ be ko baashɛ ni wɔbaanyɛ wɔna Kristofonyo naanyo ko ni eetsɔ gbɛ fɔŋ nɔ aloo enyiɛ gbɛ ni kɛ lɛ baabote oshara mli yɛ nɔkwɛmɔ nɔ fɔŋ hewɔ lɛ nɔ. Akɛ nɔkwɛmɔ nɔ lɛ, ekolɛ akɛni wɔkɛ nyɛminuu ko bɔɔ kpaakpa hewɔ lɛ, wɔbayoo akɛ esumɔɔ daa numɔ waa. Etamɔɔɔ mɔ ni tɔɔ daa, shi moŋ eka shi faŋŋ akɛ ‘enuɔ daa babaoo.’ (1 Tim. 3:8) No hewɔ lɛ abaanyɛ akɛ jajemɔ ni yeɔ buaa aha lɛ. Shi namɛi baafee enɛ?
10 Paulo ŋma Galata Kristofoi lɛ akɛ: “Kɛji nɔtɔmɔ ko banina mɔ ko trukaa lɛ, nyɛ mɛi ni nyɛji mumɔŋ gbɔmɛi lɛ nyɛsaa nakai mɔ lɛ ekoŋŋ yɛ mlijɔlɛ mumɔ mli.” (Gal. 6:1) Kristofonyo ni eda yɛ mumɔŋ lɛ baanyɛ ekɛ toigbalamɔ loo jajemɔ aha yɛ gbɛi sɔrɔtoi anɔ yɛ mlihilɛ kɛ agbɛnɛ yɛ ŋaa gbɛ nɔ. Akɛ nɔkwɛmɔ nɔ lɛ, ebaanyɛ ekɛɛ nɔ ko yɛ sanegbaa mli kɛkɛ ni no haŋ ale po akɛ eje gbɛ eewo ŋaa. (Abɛi 15:23) Aloo, ebaanyɛ ekɛ ŋaawoo wiemɔi aha yɛ teemɔŋ. Shi kɛlɛ—ni enɛ he miihia ákɛ, esaaa akɛ emɔdɛŋbɔɔ lɛ baa kɛjɛɔ mumɔ ni yɔɔ keketee mli, shi moŋ esa akɛ ejɛ mɔ he susumɔ yɛ suɔmɔ mli.—1 Kor. 13:4, 5.
11. Mɛɛ gbɛ nɔ nyɛmimɛi hii kɛ yei ni yɔɔ Filipi lɛ baanyɛ aye abua yɛ naagba ko ni eba jɛmɛ lɛ mli?
11 Shihilɛi krokomɛi hu yɛ ni nyɛmimɛi hii kɛ yei Kristofoi baanyɛ aye abua yɛ mli. Paulo ŋma enɛ yɛ naagba ko ni eba Filipi lɛ he:
“Miiwo Evodia ŋaa, ni miiwo Sintika hu ŋaa, akɛ amɛjwɛŋmɔ afee ekome yɛ Nuŋtsɔ lɛ mli. Hɛɛ, bo hu miikpao fai, minaanyo sɔɔlɔ kpakpa, akɛ oye obua yei nɛɛ ni kɛ mi pele sanekpakpa lɛ he lɛ.” (Fil. 4:2, 3)
Eka shi faŋŋ akɛ naagba loo bei ko yɛ nɛkɛ Kristofoi yei ni afɔ amɛ mu nɛɛ ateŋ. Eka shi faŋŋ akɛ bɔfo lɛ wooo Filipibii lɛ ahewalɛ ni amɛyadamɔ mɔ kome sɛɛ yɛ bei lɛ mli. Eka shi faŋŋ akɛ enɛ kɛ mligbalamɔi baaba asafo lɛ mli, ni nɔ ni baajɛ mli aba ji kui, awuŋayelii kɛ bei. (1 Kor. 1:10-13; 3:2-9) Enɛ ji oshara ni hiɛdɔɔ yɔɔ mli ni esa akɛ akwa. Shi nyɛmimɛi hii kɛ yei lɛ baanyɛ atsu nii akɛ ‘nanemɛi sɔɔlɔi kpakpai’ yɛ Filipi asafo lɛ mli ni amɛkɛ jajemɔ kɛ hewalɛwoo aha ni ekomefeemɔ ahi amɛteŋ akɛ Kristofoi, amɛkɛ sane ake ni amɛtsu nii yɛ suɔmɔ mli, tsɛbelɛ amɛkɛ amɛhe woŋ yei nɛɛ asaji amli. (Mat. 5:23-25; Efe. 4:1-6, 31, 32; Tito 2:3-5) Kɛji akɛ onaanyo sɔɔlɔ kɛ jajemɔ loo kãmɔ ni jɛ jwɛŋmɔ kpakpa ni tamɔ nɛkɛ mli ha bo lɛ, esa akɛ obu enɛ akɛ mlihilɛ kpojiemɔ.—Lala 141:5.
Shiŋŋfeemɔ Kɛ Nitsumɔ
12, 13. Mɛɛ tɔmɔ ni hiɛdɔɔ yɔɔ mli baanyɛ ahi asafo ko mli?
12 Be ko baanyɛ aba ni Kristofonyo ko baadi gbɛ ni kɛ Nyɔŋmɔ gbɛtsɔɔmɔi kpaaa gbee lɛ sɛɛ ni etsakeŋ hu yɛ yelikɛbuamɔ ni onukpai lɛ kɛaaha lɛ lɛ fɛɛ sɛɛ. Enɛ jeee sane ni kɔɔ mɔ ko ni kɛ mɔ kroko yeee he. Ni asaŋ ejeee sane ni tsɔɔ akɛ esa akɛ mɔ lɛ ada kɛshɛ Kristofoi adalɛ he. No hewɔ lɛ bɔni ehe ehia akɛ eda yɛ mumɔŋ lɛ miije kpo yɛ gbɛi sɔrɔtoi anɔ. Paulo kpɛlɛ nɔ akɛ Kristofoi ni darako yɛ mumɔŋ baahi shi ni esa ákɛ akɛ tsuishitoo, suɔmɔ kɛ tsui ni ashweɔ akɛ aaana akɛ amɛmiiya amɛhiɛ lɛ aye abua amɛ. (Rom. 14:1; 15:1; 1 Kor. 13:11; Filip. 3:15, 16) Shi yɛ mɛnɛɛmɛi asɛɛ lɛ, mɔ ko yɛ ni ebaahala akɛ eeetsɔ gbɛ ko ni, yɛ be mli ni efeko esha ni hiɛdɔɔ yɔɔ mli lɛ, ebafee gbɛ ni enyiɛɔ nɔ ni teɔ shi woɔ Nyɔŋmɔ ŋaawoo yɛ faŋŋ mli lɛ nɔ.
13 Esaaa ni efeɔ mɔ ko naakpɛɛ akɛ yɛ bei komɛi amli lɛ Kristofoi ni tamɔ nɛkɛ hiɔ shi. Biblia lɛ kɛɔ akɛ: “Shi shia wulu ko mli lɛ, jeee shikanii kɛ jwiɛtɛinii kɛkɛ yɔɔ jɛmɛ, shi moŋ tsonii kɛ sunii hu yɛ mli, ni ekomɛi lɛ abuɔ amɛ, shi ekomɛi lɛ abuuu.” (2 Tim. 2:20, 21) Akɛ asafo lɛ to shia ko ni ekolɛ aŋkroaŋkroi komɛi yɔɔ mli ni tamɔ nibii ni áshɔ̃ ni abuuu, mɛi ni amɛgbɛi kɛ amɛnifeemɔ ehiii. Abɔ Timoteo kɛ Kristofoi anɔkwafoi krokomɛi lɛ kɔkɔ koni ‘amɛtsi amɛhe kɛjɛ’ nii ni áshɔ̃ ni abuuu nɛɛ ahe.—Okɛto Romabii 16:17 he.
14, 15. Mɛɛ naagba ko te shi yɛ asafo ni yɔɔ Tesalonika lɛ mli, ni te Kristofoi baanyɛ afee amɛnii yɛ naagba nɛɛ he amɛha tɛɛŋ?
14 Yɛ nɔ ni kɛ shishinumɔ nɛɛ kɛ Paulo wiemɔi nɛɛ kɛ nitsumɔ kpaa gbee lɛ, wɔkadia akɛ sane ko ni tamɔ enɛ hi blema Tesalonika. Awo asafo muu lɛ fɛɛ ŋaa akɛ eka shi faŋŋ akɛ mɛi komɛi yɛ mli ni amɛyɔɔ hewalɛ ni amɛbaanyɛ amɛtsu nii shi amɛtsuuu nii. Mɛi fioo nɛɛ miisumɔ ni amɛye mɛi ahe nii, ni enɛ teɔ shi woɔ ŋaawoo ni Nyɔŋmɔ kɛha ni kɔɔ hejɔ̃feemɔ he lɛ. No hewɔ lɛ Paulo ŋma akɛ: “Shi anyɛmimɛi, wɔmiiwonyɛ kita yɛ wɔ Nuntsɔ Yesu Kristo gbɛi amli akɛ nyɛkɛ nyɛmi fɛɛ nyɛmi ni enyiɛɛɛ gbɛjianɔ yɛ nii ni wɔtu wɔwo nyɛ dɛŋ lɛ anaa Iɛ agbala mli.”—2 Tes. 3:6; Abɛi 20:4; 24:30; Jaj. 5:12, 18. 10:18.
15 Hɛɛ, mɔ ko yɛ ni ‘eŋmɛko gbɛ ni wiemɔi kɛkɛ ajaje lɛ,’ ni Ŋmalɛ mli ŋaawoo ni jɛ asafo lɛ mli onukpai lɛ aŋɔɔ hu fata he, ni ebɔɔ mɔdɛŋ akɛ eeeya nɔ yɛ gbɛ ni teɔ shi woɔ Nyɔŋmɔ shishitoo mlai lɛ amli. Belɛ Kristofoi yɛ hegbɛ akɛ amɛ kɛ lɛ “agbala mli” taakɛ Paulo wo ŋaa lɛ.—Abɛi 10:17; 29:19.
“Nyɛkadia Lɛ”
16. Mɛɛ ŋaawoo Paulo kɛha Tesalonikabii lɛ?
16 Beni eyaa nɔ ekɛ ŋaawoo lɛ haa Tesalonikabii lɛ yɛ mɔ ni feɔ hejɔ ni enyiɛɔ basabasa lɛ he lɛ, Paulo ŋma akɛ, “shi kɛ mɔ ko booo wɔ wiemɔ ni yɔɔ wolo lɛ mli Iɛ toi lɛ, nyɛkadia lɛ, ni nyɛ kɛ lɛ akabɔa, koni ehiɛ agbo; shi nyɛkabua lɛ akɛ henyɛlɔ, shi moŋ nyɛwiea nyɛtsɔɔa lɛ akɛ nyɛmi.” (2 Tes. 3:14, 15) No hewɔ lɛ, Kristofoi baanyɛ ‘akadi’ mɔ ko ni yaa nɔ ekuɔ ehiɛ eshwieɔ Nyɔŋmɔ shishitoo mlai anɔ lɛ.
17. (a) Mɛni hewɔ esa akɛ akwɛ jogbaŋŋ yɛ nakai ŋaawoo lɛ kɛ nitsumɔ mli lɛ? (b) Mɛni ji nɔ ni Yesu wie yɛ enɛ gbɛfaŋ?
17 Shi kɛlɛ, ehe miihia ni wɔkwɛ jogbaŋŋ yɛ nɛkɛ ŋwɛi ŋaawoo nɛɛ kɛ nitsumɔ mli. Akɛni wɔyeee emuu hewɔ lɛ, ekolɛ wɔbaanyɛ wɔkɛ wɔ diɛŋtsɛ wɔ kojomɔi komɛi ni damɔ nɔ ni wɔsumɔɔ kɛ nɔ ni wɔsumɔɔɔ nɔ, tamɔ ekolɛ gbɛ̀i ni atsɔɔ nɔ asaa he aloo awulaa he lɛ nɛkɛ aha. Shi akɛ nɔkwɛmɔ nɔ lɛ, kɛji akɛ nyɛmiyoo ko atade ni ewo lɛ jeee nɔ ni hiɛshikamɔ bɛ mli, egbaaa hiŋmɛi naa aloo ejeee nɔ ni haoɔ nyɛmimɛi lɛ, belɛ esa akɛ wɔnu shishi akɛ, eyɛ nɔ ko ni esumɔɔ yɛ hesaamɔ mli. (1 Mose 37:3, 4; Yoh. 19:23; 1 Tim. 2:9, 10) Átoko wɔ wɔnyɛmimɛi hii kɛ yei lɛ anɔ kojolɔi yɛ saji loo susumɔi ni he ehiaaa aloo yɛ henilee mli, kɛ sɔrɔtofeemɔi amli. (Rom. 14:4, 10-12) Aloo, kɛji akɛ mɔ ko sane ejaaa yɛ sane ko ni he ehiaaa mli lɛ, esa akɛ wɔkai Yesu ŋaawoo lɛ:
“Nyɛkakojoa, koni akakojonyɛ. Shi nɔ kojomɔ ni nyɛŋɔ-kojoɔ lɛ, aaaŋɔ kojonyɛ; . . . Shi mɛɛba onaa kuli ni yɔɔ onyɛmi hiŋmɛi mli lɛ, shi bo diɛŋtsɛ ohiŋmɛi mli mplaŋ lɛ, oyooo lɛ?”—Mat. 1:1-3.
18. Mɛni esa akɛ afee be mli ni mɔ ko eje gbɛ kwraa eeku Nyɔŋmɔ ŋaawoo mli lɛ?
18 Shi kɛlɛ kɛji akɛ mɔ kɔ yɛ ni eegba afa kwraa kɛmiijɛ Nyɔŋmɔ shishitoo mlai ahe, ekolɛ etsɔ hejɔlɔ aloo mɔ ni wieɔ shiɔ mɛi aloo ‘tsoŋtsoŋ amɛnyiɛɔ, ni amɛkɛ amɛhe woɔ saji ni jeee amɛhe sane ko lɛ amli’ lɛ hu? (2 Tes. 3:11) Aloo, naagba lɛ baanyɛ afee mɔ ni tsɔɔ ŋaa fɔŋ koni eye enyɛmimɛi ahe nii, ekɛ ehe woɔ hiɛtserɛjiemɔ ni ejaaa gbɛ lɛ mli, aloo ekɛ ehe woɔ jeŋba ko ni esaaa shi kɛlɛ eshɛko heni aaagbala lɛ ni akojo lɛa lɛ mli. Onukpai ebɔ mɔdɛŋ akɛ amɛaaye amɛbua lɛ, shi eka he eeeya nɔ nakai lolo, ni ebaanyɛ ena hewalɛ yɛ mɛi krokomɛi ni yɔɔ asafo lɛ mli lɛ anɔ aloɔ eeefee eshara kɛha mɛi krokomɛi. Onukpai lɛ baanyɛ asusu sane lɛ he ni amɛbaanyɛ amɛhala amɛteŋ mɔ kome ni ekɛ Ŋmalɛ mli wiemɔi ni kɔɔ sane lɛ he ni ma shi shiŋŋ aha asafo lɛ, Onukpai lɛ etsiŋ “yakayaka wielɔ” lɛ gbɛi ata moŋ, shi amɛbaanyɛ amɛtsɔ nɛkɛ gbɛ nɔ ‘awo’ mɔ ni nyiɛɔ basabasa nɛɛ ‘naa manyoflɛ.’—Tito 1:10-13.
19. Mɛni ji nɔ ni mɛi krokomɛi ni yɔɔ asafo lɛ mli lɛ baanyɛ afee kɛji akɛ naagba lɛ yɛ lolo?
19 Kɛji akɛ shihilɛ ko ni tamɔ nakai ba asafo ko mli lɛ, aŋkroaŋkroi ni ji Kristofoi lɛ yɛ hegbɛ akɛ ‘amɛkadiɔ’ nɛkɛ mɔb nɛɛ. Paulo tsɔɔ nɔ ni kɔɔ enɛ he lɛ mli akɛ: “‘Nyɛkɛ lɛ akabɔa, koni ehiɛ agbo.” (2 Tes 3:14) Enɛ tsɔɔ akɛ abaafo naanyo ni akɛ mɔ ni ‘akadi lɛ’ ‘lɛ aaabɔ lɛ mli. Esaaa akɛ otswaa oteemɔŋ yiŋtoo nɛɛ he adafi laloo otsiɔ ta, ni nakai nɔŋŋ hu esaaa akɛ ohaa mɛi krokomɛi tsɔɔ gbɛ ni tamɔ nakai nɔ. Shi bo diɛŋtsɛ lɛ obaakwa nakai mɔ ni ‘akadi’ lɛ lɛ kɛ bɔɔ, koni okɛ ŋaawoo kpakpa ni asafo lɛ mli onukpai lɛ kɛha lɛ anyiɛ. Shi kɛlɛ, okwaŋ lɛ kwraa moŋ, ejaakɛ ekahe eji onyɛmi, onaanyo Kristofonyo ni Kristo gbo kɛha lɛ. Ni oooŋmɛ gbɛ ni su ko tamɔ “nyɛ̃ɛ” aaate shi yɛ omli lɛ, esa akɛ ‘okã’ lɛ. Yɛ mɛɛ gbɛ nɔ? Ojogbaŋŋ, yɛ nɔkwɛmɔ nɔ kpaakpa ni bodiɛŋtsɛ ooofee sɛɛ lɛ, mlihilɛ kɛ shiŋŋfeemɔ ni okɛaabɔ gbɛtsɔɔmɔ akɛ “nyɛkɛ lɛ akabɔa” lɛ toi hewɔ lɛ, enɛ baafee jajemɔ loo toigbalamɔ gbɛ lɛ hu ekɔ. Shi obaanyɛ ofee babaoo ni okɛye obua.—3 Mose 19:17; Tito 2:7, 8.
20. Kɛji akɛ ‘okadi’ mɔ ko ni nyiɛɔ basabasa lɛ, belɛ mɛɛ gbɛnaa nii ka onɔ?
20 Obaana mɔ ni ‘akadi’ lɛ nɛɛ yɛ Kristofoi akpeei ashishi kɛ agbɛnɛ yɛ shiɛmɔ mli. No hewɔ lɛ obaana gbɛ ni otsu gbɛnaa nii ni ka onɔ akɛ ‘okadi’ lɛ lɛ he nii: “Ni nyɛkabua lɛ akɛ henyɛlɔ, shi moŋ nyɛwiea nyɛtsɔɔa lɛ taakɛ nyɛmi.” (2 Tes. 3:14, 15) Kɛji akɛ otsuuu ogbɛnaanii ni kɔɔ Nyɔŋmɔ ŋaawoo nɛɛ he nii yɛ nɛkɛ gbɛ nɔ, shi moŋ obu mɔ ni ‘akadi’ lɛ lɛ akɛ henyɛlɔ lɛ, belɛ gbɛ ni otsɔ nɔ lɛ baafee gbɛ ni suɔmɔ bɛ, mli tamɔ enɔ̃ lɛ nɔŋŋ.
21. Mɛni ji nɛkɛ Biblia mli gbɛjianɔtoo nɛɛ yiŋtooi (4 Mose 35:12: 5 Mose 19:11,12)
21 Wɔhiɛ ka nɔ akɛ mɔ ni ‘akadi lɛ’ lɛ hiɛ baagbo. Ebaayoo akɛ Ŋmalɛ mli gbɛtsɔɔmɔ hewɔ okwaa lɛ kɛ bɔɔ lɛ. Nɛkɛ tsɔsemɔ nɛɛ baaye abua lɛ ni “nyɛwajea niji ni mli eje wui kɛ nakutsei ni egbɔjɔ lɛ, ni nyɛtoa nyɛnaji ashi jogbaŋŋ ni nyɛnyiɛa trɔmɔɔ, koni etsɔɔlɔ lɛ akashane shi moŋ atsa lɛ.” Yɛ nyɛmimɛi anɔkwafoi babaoo ni kɛ Nyɔŋmɔ asafo lɛ bɔɔ ŋmɛnɛ hewɔ lɛ, eka shi faŋŋ akɛ ebaawa dani Kristofoi lɛ baanyɛ ‘akadi’ nyɛmi ko ni nyiɛɔ basabasa. Shi kɛji akɛ enɛ ba lɛ, ekolɛ jajemɔ kɛ wiemɔ kɛ tsɔɔmɔ kɛ ŋaawoo baawo ‘hejɔlɛ yibii ni ji jalɛ.’—Heb. 12:11-13.
Ajinafoi Ni Ji Onukpai Lɛ Ni Akɛ Amɛ Aaakpe
22, 23. Te esa akɛ atsu esha ni hiɛdɔɔ yɔɔ mli lɛ he nii aha tɛɛŋ?
22 Taakɛ wɔkadi yɛ (kuku 7 lɛ) , esa akɛ “asafo lɛ mli onukpai lɛ” agbala amɛjwɛŋmɔ kɛba ‘mɔ ni efee esha ni hiɛdɔɔ yɔɔ mli’ nɛɛ nɔ. (Yak. 5:14, 15) Nɛkɛ onukpai nɛɛ yɛ hegbɛ ni amɛkɛ jajemɔ loo toigbalamɔ ni Nyɔŋmɔ gbeyeishemɔ yɔɔ mli haa mɔ ni esha enina lɛ ‘ni egbee esha ni hiɛdɔɔ yɔɔ mli lɛ mli lɛ. Amɛbaanyɛ amɛkɛ mumɔŋ yelikɛbuamɔ ni he hiaa lɛ aha lɛ.—Abɛi 6:23.
23 Efɔɔ kaa akɛ ahalaa onukpai etɛ akɛ ajinafoi ni amɛkwɛ efɔŋfeemɔ ni hiɛdɔɔ yɔɔ mli lɛ mli. Amɛtsuuu nii akɛ kojolɔi aloo ‘mumɔŋ polisifoi’ kɛkɛ, amɛji asafoku lɛ kwɛlɔi, ni amɛjieɔ amɛhe kpo akɛ nakai amɛji yɛ be mli ni amɛkɛ mɔ ko ni etɔ miiye lɛ. Tooi akwɛlɔ diɛŋtsɛ ejieee oweletɔɔ, yiwalɛ loo tɔmɔ taomɔ su kpo etsɔɔɔ. Nakai nɔŋŋ hu esaaa akɛ onukpai lɛ feɔ nakai. Amɛyɛ jɛmɛ akɛ amɛaaye amɛbua shi jeee ni amɛbu fɔ. (Yuda 23) Oti ni ma amɛhiɛ ji ni amɛkpale efɔŋfeelɔ kɛjɛ egbɛ lɛ nɔ, kɛ́ nakai feemɔ aaahi.—Yak. 5:19, 20.
24. Mɛni ji nɔ ni onukpai lɛ bɔɔ mɔdɛŋ ni amɛfee amɛha eshafeelɔ lɛ?
24 Shi kɛlɛ, yɛ be mli ni amɛtsuɔ esha ni hiɛdɔɔ yɔɔ mli lɛ he nii lɛ, esa akɛ onukpai lɛ ‘ahiɛ tsɔɔmɔ lɛ naa anɔkwa wiemɔ lɛ mli, koni amɛnyɛ amɛwie amɛtsɔɔ mɛi “yɛ nitsɔɔmɔ ni tsaa mɔ lɛ mli, ni mɛi ni kuɔ wiemɔ naa lɛ hu eka amɛhiɛ.” (Tito 1:9) No hewɔ lɛ esaaa akɛ amɛgbalaaa amɛhe shi kɛjɛɔ Ŋmalɛi lɛ amli ni amɛaajɛ amɛtsɔɔ mɔ ni etɔ lɛ egbɛ ni ejaaa lɛ kɛ nɔ hewɔ ni esa akɛ ejaje egbɛ lɛ yɛ faŋŋ mli lɛ he. Amɛmiisumɔ ni etsake ni toiŋjɔlɛ aba ekɛ Nyɔŋmɔ teŋ ekoŋŋ.—1 Pet. 3:10-12.
25. Mɛɛ saji krokomɛi yɔɔ lolo ni esa akɛ akase?
25 Belɛ mɛɛ gbɛ nɔ onukpai lɛ baatsɔ ni amɛkã nɔtɔlɔi lɛ? Mɛni ji tsuitsakemɔ ni Nyɔŋmɔ gbeyeishemɔ yɔɔ mli? Te ajieɔ enɛ kpo ahaa tɛɛŋ? Mɛɛ gbɛ nɔ onukpai lɛ baatsɔ ni amɛye saji ni afee esha ni hiɛdɔɔ yɔɔ mli shi ajie tsuitsakemɔ su kpo lɛ? Ani esa akɛ akã efɔŋfeelɔ lɛ yɛ asafo muu lɛ fɛɛ hiɛ? Asusu saji nɛɛ ahe yɛ nikasemɔ ni nyiɛ sɛɛ nɛɛ mlic.
[Shishigbɛ niŋmai]
a (Ajie kɛjɛ September 1,1981 Blɔfo Buu-Mɔɔ lɛ mli)
b Nɔkwɛmɔ nɔ ni kɔɔ nyiɛmɔ ni tsɔɔ gbalashihilɛ hiɛ yɛ be mli ni mɔ lɛ bɛ hegbɛ akɛ ekuɔ sɛɛ eboteɔ gbalashihilɛ mli yɛ Ŋmalɛ lɛ naa lɛ ji nɔ koni awie he yɛ “Sanebimɔi ni jɛ Kanelɔi Adɛŋ” ni yɔɔ August 1,1980 Blɔfo Buu-Mɔɔ lɛ mli lɛ.
c Ni ‘aaakadi mɔ ko’ lɛ tsɔɔ akɛ hiɛ aaahi enɔ jogbaŋŋŋ. Okɛ gbɛ ni atsɔɔ nɔ akadiɔ mɔ ni hi yɛ enɛ mli ato Ŋmalɛi nɛɛ ahe: Lala 37:37; Filipibii 3:17 kɛ Hebribii 13:7
[Akrabatsa ni yɔɔ baafa 11]
JAJEMƆ LOO TOIGBALAMƆ NI NYƆŊMƆ GBEYEISHEMƆ YƆƆ MLI LƐ KƆƆ WƆHE YƐ MƐƐ GBƐ NƆ?
Yɛ bei komɛi amli lɛ Nyɔŋmɔ jajeɔ wɔ́ loo egbalaa wɔtoi kɛtsɔɔ Biblia lɛ loo Biblia kasemɔ woji anɔ.
Aloo ekolɛ Kristofonyo, titri lɛ onukpa ko baanyɛ agbala wɔjwɛŋmɔ kɛba tɔmɔ ko nɔ yɛ suɔmɔ mli.
Kɛji akɛ mɔ ko kpoo akɛ eeekpa basabasa gbɛ ko ni enyiɛ nɔ lɛ nɔ nyiɛmɔ lɛ, onukpai lɛ baanyɛ agbala asafo lɛ jwɛŋmɔ kɛba egbɛ loo esubaŋ lɛ nɔ ni akɛbɔ amɛ kɔkɔ.
Belɛ esa akɛ wɔnu he akɛ wɔ aŋkroaŋkroi lɛ esa akɛ ‘wɔkadi’ (2 Tes. 3:14, 15) mɔ ni nyiɛɔ basabasa lɛ.
Kɛji akɛ wɔfee nakai lɛ, esaaa akɛ wɔkɛ mɛi ni tamɔ nɛkɛ bɔɔ naanyo, SHI esa akɛ wɔtsu, gbɛnaa nii ni ka wɔ nɔ lɛ he nii, akɛ wɔye wɔbua amɛ ni wowɔ mɛi ni nyiɛɔ basabasa nɛɛ aŋaa, ejaakɛ amɛkahe amɛji wɔnyɛmimɛi Kristofoi.
[Mfoniri ni yɔɔ baafa 9]
Kɛji akɛ ona Kristofonyo ni ji nyɛmi ni miibote oshara mli lɛ, ani okɛ ŋaawoo ni mlihilɛ yɔɔ mli baaha?
[Mfoniri ni yɔɔ baafa 10]
Paulo wo ŋaa akɛ “nyɛyaa nɔ nyɛyea nyɛbuaa” mɛi ni hewalɛwoo ni jajeɔ mɔ Iɛ he ehia amɛ lɛ