Yesu Shihilɛ kɛ Esɔɔmɔ Nitsumɔ

Bɔ Ni Sɔlemɔ Kɛ Heshibaa He Hiaa Ha

MRA mli beni eyɔɔ Yudea lɛ, Yesu kɛ nɔkwɛmɔ nɔ ko ni tsɔɔ bɔ ni ehe hiaa akɛ aaaka sɔlemɔ he ha. Agbɛnɛ, yɛ enaagbee gbɛfaa ni kɛ Iɛ tee Yerusalem Iɛ mli lɛ, eku sɛɛ ema bɔ ni ehe hiaa akɛ akaha nijiaŋ miije wui yɛ sɔlemɔ mli lɛ nɔ mi. Eka shi faŋŋ akɛ no mli Iɛ Yesu yɛ Samaria loo Galilea beni ekɛ nɛkɛ nɔkwɛmɔ nɔ kroko nɛɛ ha ekaselɔi Iɛ:

“Kojolɔ ko yɛ maŋ ko nɔ, ni esheee Nyɔŋmɔ gbeyei ni asaŋ ebuuu gbɔmɔ ko. Yoo okulafo ko yɛ nakai maŋ lɛŋ, ni eba eŋɔɔ ebakɛɛ: Fa mihe yɛ mihenyɛlɔ lɛ dɛŋ! Ni ekpɛlɛɛɛ aahu. Shi fee sɛɛ lɛ, ekɛɛ yɛ eyiŋ akɛ: Yɛŋ akɛ misheee Nyɔŋmɔ gbeyei, ni mibuuu gbɔmɔ hu; shi akɛni nɛkɛ yoo okulafo nɛɛ miigba minaa hewɔ lɛ, mafa ehe, koni beni yi aayawula shi lɛ, ekaba ni ebashwie mihiɛ ma.”

Kɛkɛ ni Yesu kɛ esane nɛɛ to he, akɛ: “Nyɛboa nɔ ni kojolɔ shishitswalɔ Iɛ kɛɛ toi! Ni kɛ Nyɔŋmɔ aaaku ehiɛ afɔ ehalamɔbii ni bolɔɔ tsɛɔ lɛ shwane kɛ nyɔɔŋ lɛ nɔ aahu tete lɛ, aso ebafaŋ amɛhe?”

Yesu kɛ enɛ etsɔɔɔ akɛ Yehowa Nyɔŋmɔ tamɔ nakai kojolɔ ni ejaaa Iɛ yɛ gbɛ ko nɔ. Shi moŋ, kɛji akɛ kojolɔ ni ejaaa nɛɛ baatsu kojomɔ he nii yɛ fai ni akpaa lɛ babaoo hewɔ lɛ, belɛ sanebimɔ ko bɛ he akɛ Nyɔŋmɔ, ni eji mɔ ni ja ni ehi lɛ, baaha hetoo kɛji akɛ gbɔmɛi anijiaŋ ejeee wui yɛ sɔlemɔ mli. No hewɔ Iɛ Yesu tee nɔ akɛ: “Miikɛɛ nyɛ akɛ [Nyɔŋmɔ] eeefa amɛhe oya.”

Yɛ be babaoo mli Iɛ ayeee jalɛsane ahaaa heshibalɔi kɛ ohiafoi, yɛ be mli ni aduroɔ mɛi ni he wa kɛ niiatsɛmɛi. No hewɔ Iɛ Nyɔŋmɔ kwɛŋ koni agbala efɔŋfeelɔi lɛ atoi kɛkɛ shi moŋ ebaakwɛ ni aye jalɛsane aha etsuji lɛ kɛtsɔ naanɔ wala ni ekɛaaha amɛ lɛ nɔ. Shi mɛi enyiɛ yɔɔ ni heɔ yeɔ diɛŋtsɛ akɛ Nyɔŋmɔ baaha atsu jalɛsaneyeli he nii oya?

Yɛ be mli ni ewieɔ hemɔkɛyeli ni akɛtoɔ hewalɛ ni sɔlemɔ yɔɔ lɛ he lɛ, Yesu bi akɛ: “Shi beni gbɔmɔbi Iɛ aaaba lɛ, ani eeebana hemɔkɛyeli yɛ shikpɔŋ lɛ nɔ?” Eyɛ mli akɛ ashi sanebimɔ Iɛ ni ahaaa hetoo moŋ, shi nɔ ni etsɔɔ Iɛ baatsɔɔ akɛ anaŋ hemɔkɛyeli babaoo yɛ be mli ni Kristo baa Maŋtsɛyeli hewalɛ mli Iɛ. Ni kɛlɛ, wɔnyɛŋ wɔmu sane naa akɛ eko ehiŋ shi. Ani okɛ hemɔkɛyeli ni tamɔ nɛkɛ miitsu nii?

Mɛi ni boɔ Yesu toi lɛ ateŋ mɛi komɛi nuɔ he akɛ amɛyɛ pɛpɛɛpɛ yɛ amɛhemɔkɛyeli mli. Amɛbuɔ amɛ diɛŋtsɛ amɛhe akɛ amɛji jalɔi, ni amɛkuɔ amɛhiɛ amɛshwieɔ mɛi krokomɛi anɔ. Ekolɛ Yesu kaselɔi lɛ ateŋ mɛi komɛi po fata he. No hewɔ lɛ ekɛ nɛkɛ nɔkwɛmɔ nɔ nɛɛ to mɛi ni tamɔ nɛkɛ Iɛ ahe:

“Mɛi enyɔ yiŋ tee sɔlemɔ yɛ sɔlemɔwe lɛ; mɔ kome Iɛ Farisifonyo ji lɛ, ni mɔ kroko lɛ, toohelɔŋ. Farisifonyo Iɛ yadamɔ sɛɛ flɛŋŋ, ni esɔle nɛkɛ: Nyɔŋmɔ miidao shi akɛ mitamɔɔɔ mɛi krokomɛi lɛ, wieyelɔi, kutumpɔfoi, gbalafitelɔi, loo tamɔ nɛkɛ toohelɔ nɛɛ hu; miyeɔ buada shii enyɔ yɛ otsi mli; miŋɔɔ nibii fɛɛ ni minaa lɛ mlijai nyɔŋma mihaa.”

Ale Farisifoi lɛ yɛ bɔ ni amɛjieɔ amɛjalɛ kpo yɛ mɛi ahiɛ lɛ hewɔ. Gbii ni amɛtu amɛha amɛhe ni amɛkɛhiɔ ŋmaa ji daa Ju kɛ daa Soo, ni amɛkwɛɔ jogbaŋŋ koni amɛye mlijaa nyɔŋma mli ekomekome lɛ fɛɛ nɔ yɛ ŋmɔ shishi nibii tamɔ baai amli po. Dani enɛ aaaba lɛ, no mli lɛ amɛtsɔ hiɛ yɛ nyɔji fioo mli amɛtsɔɔ bɔ ni amɛbuuu gbɔmɛi foji Iɛ kɛtsɔ nɔ ni amɛwie yɛ Asesei Agbijurɔ lɛ yeli shishi Iɛ nɔ akɛ: “Shi asafo ni leee Mla nɛɛ [ni ji bɔ ni Farisifoi lɛ tsɔɔ shishi amɛhaa Iɛ], alomɔ amɛ.”

Yɛ be mli ni Yesu yaa nɔ yɛ enɔkwɛmɔ nɔ Iɛ mli lɛ, ewie gbɔmɔ ni “alomɔ Iɛ” nɛɛ he akɛ: “Shi toohelɔ lɛ damɔ shɔŋŋ, ni emiii ni ehole ehiŋmɛii anɔ kɛya ŋwɛi tete; shi moŋ eshimɔ etsitsi ni ekɛɛ: Nyɔŋmɔ okɛ mi ni ji eshafeelɔ Iɛ akpata!” Akɛni toohelɔ Iɛ kɛ heshibaa kpɛlɛ efatɔi anɔ hewɔ lɛ, Yesu kɛɛ: “Miikɛɛ nyɛ akɛ: Nɛkɛ nuu nɛɛ yiŋ etee ewe ni abu Iɛ bem fe mɔ kome lɛ. Ejaakɛ mɔ fɛɛ mɔ ni woɔ ehe nɔ lɛ, aaaba lɛ shi; shi mɔ ni baa ehe shi lɛ, aaawo enɔ.”

Kɛkɛ ni Yesu ma bɔ ni ehe hiaa akɛ aaaba he shi Iɛ nɔ mi ekoŋŋ. Akɛni atsɔse amɛ yɛ gbɔmɛi ni Farisifoi ni buɔ amɛhe jalɔi Iɛ naa amɛnɔ hewalɛ Iɛ ateŋ ni amɛmaa gbɛhei ni kwɔlɔ hu anɔ mi hewɔ lɛ, ebɛ naakpɛɛ akɛ enɛ po aaana Yesu kaselɔi lɛ anɔ hewalɛ. Ni kɛlɛ, mɛɛ heshibaa he nɔkwɛmɔ nɔ kpakpa po Yesu tsɔɔ nɛkɛ! Luka 18:​1-14; Yohane 7:⁠49.

◆ Mɛni hewɔ kojolɔ ni ejaaa Iɛ kpɛlɛ okulafo lɛ nibimɔ lɛ nɔ lɛ, ni Yesu nɔkwɛmɔ nɔ lɛ tsɔɔ wɔ mɛni?

◆ Mɛɛ hemɔkɛyeli Yesu baatao beni eeeba lɛ?

◆ Yesu kɛ enɔkwɛmɔnɔ ni kɔɔ Farisifonyo lɛ kɛ toohelɔ lɛ he lɛ to namɛi ahe?

◆ Mɛɛ Farisifoi asubaŋ esa akɛ akwa loo akpoo?