“Nyɛlea Shidaa”
“Nyɛhaa Nyɔŋmɔ hejɔlɛ Iɛ ayea lumɔ yɛ nyɛtsuii amli . . . Nyɛlea shidaa.”—KOLOSEBII 3:15
1. Esa akɛ Kristofoi akwɛ amɛhe nɔ jogbaŋŋ yɛ mɛni he yɛ je ni leee shidaa nɛɛ mli?
NƐKƐ afii ohai 20 nɛɛ eshɛ he ko ni gbɔmei pii hiɛ ekpa shidaa nɔ. Hiɛsɔɔ wiemɔi, “ofainɛ” kɛ “miidao shi” lɛ etsɔmɔ wiemɔi ni anuuu he babaoo dɔŋŋ yɛ be mli ni afii lɛ hoɔ lɛ. Trumufeemɔ loo shidaa ni aleee etsɔ “kɔɔyɔɔ” lɛ fa, nɔ ni ji pɛsɛmkunya mumɔ ni yeɔ gbɔmɛi ni yɔɔ je nɛŋ lɛ anɔ lɛ. (Efesobii 2:1, 2) Eyɛ mli akɛ Kristofoi “jɛɛɛ je lɛ mli” moŋ, ‘shi esa akɛ amɛhi mli bei abɔ ni nibii agbɛjianɔtoo nɛɛ yɔɔ shihilɛ mli lolo lɛ. (Yohane 17:11, 16) No hewɔ lɛ, esa akɛ amɛkwɛ jogbaŋŋ koni mumɔ ni leee shidaa nɛɛ akaka amɛhe, ni eha amɛshidaa miilaaje.
2. (a) Mɛni ji gbɛi komɛi ni Yehowa tsuji baanyɛ atsɔ nɔ ni amɛjie shidaa kpo amɛtsɔɔ lɛ yɛ? (b) Mɛni ataoɔ ni fe naabu kɛkɛ ni akɛaada shi?
2 Wɔbaanya wɔtsi hiɛsɔɔ ni wɔyɔɔ kɛhaa ejurɔ ni Nyɔŋmɔ feɔ lɛ ta shii abɔ yɛ sane ni wɔkɛ wɔnanemɛi heyelilɔi lɛ gbaa lɛ mli. Eka shi faŋŋ akɛ Kristofoi ni amɛjɔɔ amɛhe nɔ lɛ ateŋ mɛi ni fa ji mɛi ni daa amɛŋwɛi Tsɛ, Yehowa shi, yɛ ejurɔ ni efeɔ shii abɔ daa gbi lɛ hewɔ, ni amɛfeɔ enɛ kɛtsɔɔ amɛ diɛŋtsɛ amɛteemɔŋ sɔlemɔi amli. Atsiɔ shidaa hu ta yɛ asafoŋ sɔlemɔi amli kɛ be mli ni wɔlaa Maŋtsɛyeli lalai yɛ Kristofoi akpeei ashishi. Eka shi faŋŋ akɛ ewaaa kwraa akɛ aaatsɔ wiemɔi anɔ atsɔɔ shidaa. Shi bɔfo Paulo wo enyɛmimɛi ni yɔɔ Kolose lɛ hewalɛ ni amɛkakɛɛ kɛkɛ akɛ amɛmiida shi, shi moŋ amɛkɛ nɔ ko atsɔɔ aloo amɛkɛ nɔkwɛmɔ nɔ ko atsɔɔ enɛ yɛ amɛdaa gbi shihilɛi amli. Eŋma akɛ: “Ni nyɛhaa Nyɔŋmɔ hejɔlɛ lɛ ayea lumɔ yɛ nyɛtsuii amli, nɔ he hu ni atsɛnyɛ kɛba yɛ gbɔmɔtso kome mli lɛ, ni nyɛlea shidaa.”—Kolosebii 3:15.
Nibii Pii yɛ ni Wɔdaa Shi yɛ He
3. Mɛni hewɔ esa akɛ wɔ fɛɛ wɔda Nyɔŋmɔ shi lɛ?
3 Mɔ fɛɛ mɔ ni yɔɔ shihilɛ mli lɛ yɛ nibii babaoo ni eeedamɔ nɔ eda shi yɛ he. Nɔ ni fe fɛɛ ji wala mli ŋɔɔmɔ diɛŋtsɛ, ejaakɛ nɔ fɛɛ nɔ ni wɔyɔɔ loo wɔɔto he gbɛjianɔ lɛ baanyɛ afee nɔ ni sɛɛnamɔ bɛ he trukaa kɛ wɔlaaje wɔwala. Lalatsɛ David wo adesai fɛɛ hewalɛ ni amɛkai akɛ “Ejaakɛ bo [Yehowa Nyɔŋmɔ] oŋɔɔ wala nu bu yɔɔ.” (Lala 36:10) Ni bɔfo Paulo kai Ateenebii lɛ yɛ nɛkɛ naanɔ anɔkwale nɛɛ nɔŋŋ he beni ewieɔ yɛ Areopago lɛ. (Bɔfoi lɛ Asaji 17:28) Hɛɛ, wala mli kɛkɛ ni wɔyɔɔ lɛ ji nɔ ko babaoo ni wɔɔdamɔ nɔ wɔda shi. Ni wɔ hiɛsɔɔ hu mli kwɔɔ kɛ wɔkai nyɛmɔi ni Nyɔŋmɔ kɛha wɔ lɛ—naasaa, hetaa, ŋmajee loo fujee, ninaa kɛ sanenumɔ henumɔi lɛ—bɔni afee ni wɔna wala kɛ adebɔɔ mli nibii ni yɔɔ fɛo ni ebɔle wɔhe lɛ mli ŋɔɔmɔ.
4. Mɛni baabu wɔhe koni wɔkaku wɔhiɛ wɔshwie wala mli jɔɔmɔi anɔ?
4 Ni kɛlɛ, mɛi komɛi kuɔ amɛhiɛ amɛshwieɔ nibii kpakpai nɛɛ anɔ. Kɛ nyɛmɔ ko eje amɛdɛŋ, tamɔ nii ni anaa loo anuɔ he nɛkɛ lɛ, no dani adesai pii yɔseɔ jɔɔmɔi ni amɛhiɛ esɔɔɔ yɛ be mli ni amɛyɔɔ gbɔmɔtso mli hewalɛ kpakpa mli lɛ. Ehe miihia ni Kristofoi ni amɛjɔɔ amɛhe nɔ lɛ aha amɛhiɛ ahi amɛhe nɔ yɛ be fɛɛ mli ni amɛkwɛ jogbaŋŋ koni amɛkakplaŋ kɛmiiya shihilɛ ni tsɔɔ hiɛsɔɔ ni bɛ nɛɛ mli. Esa akɛ amɛtsu nii jogbaŋŋ ni amɛhiɛ nakai shidaa su lɛ nɔŋŋ ni lalatsɛ lɛ ni ŋma nɛkɛ lɛ jie no kpo lɛ mli: “Yehowa, mi-Nyɔŋmɔ, onaakpɛɛ nii ni otsuɔ kɛ ojwɛŋmɔi ni ojwɛŋɔ yɛ wɔhe lɛ fa naakpa. Nɔ ko bɛ ni aaanyɛ aŋɔto ohe! Kɛ mikɛɛ majaje ni mawie he lɛ, amɛfa fe bɔ ni aaanyɛ akane.”—Lala 40:6.
5. Yɛ jɔɔmɔi ni Israel na kɛjɛ Yehowa ŋɔɔ kɛfata he lɛ fɛɛ sɛɛ lɛ, mɛɛ gbɛ ni yɔɔ hiɛgbele amɛtsɔ nɔ?
5 Lala 106 lɛ kɛ lalafoo gbee mua Yehowa naakpɛɛ nitsumɔi ni etsu yɛ ewebii ni ji Israelbii lɛ ahe lɛ naa. Bɔ ni Nyɔŋmɔ kɛamɛ ye eha lɛ fata ejurɔ kɛ wala mli jɔɔmɔi ni ekɛhaa adesai fɛɛ lɛ he. Yɛ nɛkɛ sɛɛnamɔi nɛɛ fɛɛ sɛɛ lɛ, lalatsɛ lɛ tsɔɔ akɛ Israelbii lɛ eyaaa nɔ amɛjieee hiɛsɔɔ kpo amɛtsɔɔɔ amɛjɔɔmɔi ni ekaaa nɛɛ. Kuku 13 lɛ jaje akɛ: “Shi etsɛɛɛ ni amɛhiɛ kpa enitsumɔi lɛ anɔ, ni amɛmɛɛɛ eŋaawoo dɔŋŋ.” Dabi, jeee be ni ho lɛ ji nɔ ni ha amɛshidaa lɛ sɛɛ fo, koni yɛ no sɛɛ afii nyɔŋmai abɔ lɛ, amɛkakai nɔ ni Nyɔŋmɔ efee kɛha amɛ lɛ dɔŋŋ. Shi moŋ etsɛɛɛ ni amɛhiɛ kpa nɔ—yɛ naakpɛɛ nii ni ekaaa ni Yehowa fee kɛha amɛ yɛ Ŋshɔ Tsuru lɛ naa lɛ sɛɛ otsii fioo ko pɛ. (2 Mose 16:1-3) Nɔ ni yɔɔ mɔbɔ ji akɛ, wɔsɛɛ be nibii ni ba lɛ tsɔɔ akɛ trumufeemɔ batsɔ amɛ daa gbi shihilɛ lɛ fa.
Gbɛ ni Wɔɔtsɔ nɔ Wɔtsɔɔ Shidaa
6. Mɛni hewɔ mlijai nyɔŋma mli ekome taomɔ nii lɛ kɛ tɔlɛ ko baaa lɛ?
6 Yehowa je gbɛ etsɔɔ gbɛi sɔrɔtoi etɛ ni esa akɛ Israelbii lɛ atsɔ nɔ amɛjie hiɛsɔɔ diɛŋtsɛ kpo yɛ ejurɔ ni efeɔ amɛ lɛ he amɛtsɔɔ. Ekome ji ni amɛye mlijaa nyɔŋma mli ekome taomɔ nii ni biɔ ni amɛkɛ nibaa nii kɛ kooloi fɛɛ amlijai nyɔŋma mli ekome abaha Yehowa lɛ nɔ. (3 Mose 27:30-32) Enɛ waŋ kɛhaŋ amɛ, ejaakɛ Nyɔŋmɔ ji mɔ ni haa hulu tsoɔ, lɛ ehaa amɛ shikpɔŋ kpakpa, nugbɔnɛmɔ, kɛ naakpɛɛ nii ni ji kwɛɛ nii ni daraa lɛ. No hewɔ lɛ, mlijaa nyɔŋma mli ekome ni akɛaaha osɔfoi lɛ yɛ Yehowa sɔlemɔwe lɛ ji shi ni adaa Yehowa diɛŋtsɛ lɛ kpojiemɔ.
7. (a) Mɛɛ sɔrɔtofeemɔ agbo ko yɔɔ mlijaa nyɔŋma mli ekome lɛ kɛ nɔwomɔ nikee nii ni akɛhaa Yehowa lɛ mli? (b) Mɛni ji nɔ ni enɛ ŋmɛ gbɛ koni Israelbii lɛ ajie lɛ kpo yɛ amɛ diɛŋtsɛ amɛhe?
7 Taomɔ nii kroko ji nɔwomɔ nikee nii ni akɛhaa Nyɔŋmɔ ni enɛ ni akɛhaa lɛ falɛ lɛ damɔ mɔ aŋkro ni ji Israelnyo lɛ tsui nɔ. Yɛ be mli ni akɛ efalɛ ko haaa lɛ, esa akɛ nɔ ni akɛkeɔ nɛɛ afee klɛŋklɛŋ nii—yɛ amɛ abele, wein kɛ toi ahe tsɔi ni amɛkuɔ lɛ mli. (4 Mose 15:17-21; 5 Mose 18:4) Agbɛnɛ, Yehowa fa akɛ ewebii lɛ ‘akashashao shi yɛ nihamɔ mli’ ni esa akɛ amɛkɛ “klɛŋklɛŋ yibii lɛ amli klɛŋklɛŋ nii ni hi fe fɛɛ aha.” (2 Mose 22:29; 23:19, New World Translation) Enɛ kɛ hegbɛ ha Israelbii lɛ koni amɛtsɔɔ akɛ amɛdaa Yehowa shi yɛ gbɛ pɔtɛɛ ko nɔ. Amɛbaanyɛ amɛjie amɛshidaa ni jɛ tsuiŋ tɔɔ lɛ kpo kɛtsɔ nɔ ni amɛkɛhaa lɛ falɛ nɔ. Ani wein yibii kusha kome pɛ amɛkɛbaaba? Aloo tsuijurɔ baatsirɛ amɛ ni amɛkɛ kɛŋtɛŋ obɔ aba? No hewɔ lɛ, mɔ fɛɛ mɔ loo weku fɛɛ weku baanyɛ ajie shidaa kpo ni anyɛɛɛ enɔ.
8. (a) Mɛɛ sɛɛnamɔi enyɔ kpɛkpɛoyeli he gbɛjianɔtoo lɛ kɛba? (b) Mɛɛ gbɛ nɔ mɛi fɛɛ ni kɛ amɛhe woɔ kpɛkpɛoyeli he gbɛjianɔtoo lɛ mli lɛ aaanyɛ atsɔ nɔ ajie mlihilɛ kɛ shidaa kpo amɛtsɔɔ yɛ?
8 Gbɛ pɔtɛɛ ni ji etɛ ni amɛbaanyɛ amɛtsɔ nɔ amɛjie shi ni amɛdaa Yehowa lɛ kpo lɛ kɔɔ kpɛkpɛoyeli he gbɛjianɔ ni Nyɔŋmɔ eto lɛ he. Kɛ ŋmaakpamɔ be shɛ lɛ, esa akɛ ashi ŋmɔ lɛ fai komɛi ni akpaaa jɛmɛ nibaa nii lɛ, koni ohiafoi aye kpɛkpɛo yɛ mli. Jeee akɛ enɛ tsɔɔ amɛ musuŋtsɔlɛ kɛ ohiafoi ahe susumɔ kɛkɛ, shi moŋ eye ebua koni amɛkahi shi kɛkɛ akɛ mɛi ni niyenii akɛɔ amɛ dani amɛhiɔ shi ni amɛbɔɔɔ amɛhe mɔdɛŋ ko. (3 Mose 19:9, 10) Atsɔɔɔ bɔ ni esa akɛ ashi aha ohiafoi lɛ. Shi kɛji akɛ Israel okwaafoi lɛ jie mlijɔlɛ mumɔ kpo ni amɛshi babaoo yɛ ŋmɔ lɛ naabui ni amɛkɛtsɔɔ ejurɔ ni amɛfeɔ amɛhaa ohiafoi lɛ, amɛmiiwo Nyɔŋmɔ hiɛ nyam. (Abɛi 14:31) Akɛ amɛbaashi he ko bibioo loo heko ni da ni amɛkpaaa ŋmaa ni yɔɔ jɛmɛ lɛ damɔ amɛ diɛŋtsɛ amɛnɔ. Shi Nyɔŋmɔ kɛ famɔ ni kɔɔ musuŋtsɔlɛ he ha akɛ kɛ okwaafoi lɛ ahiɛ kpa jatsu ko nɔ yɛ ŋmɔshi loo amɛhiɛ kpa amɛtsei lɛ eko nɔ yibii ni amɛaakpa lɛ nɔ tamɔ wein tsei lɛ eko nɛkɛ lɛ amɛshi amɛha mɛi ni yeɔ kpɛkpɛo yɛ ŋmɔshi lɛ. (5 Mose 24:19-22) Yɛ no sɛɛ lɛ, mɛi ni yeɔ kpɛkpɛo lɛ diɛŋtsɛ baanyɛ atsɔɔ shi ni amɛdaa Yehowa yɛ nɛkɛ gbɛjianɔtoo nɛɛ hewɔ lɛ kɛtsɔ kpɛkpɛo ni amɛyeɔ nɛɛ hu mlijai nyɔŋma mli ekome ni amɛkɛ aaaha yɛ ejamɔ he lɛ nɔ.
Tsuiŋ Mlihilɛ
9. Mɛni hewɔ mɛi ni jieɔ pɛsɛmkunya su lɛ yeɔ amɛ diɛŋtsɛ amɛhe awui diɛŋtsɛ lɛ?
9 Kɛji akɛ Israelbii Iɛ jɛ amɛtsuiŋ amɛke nii lɛ, Yehowa jɔɔmɔ baaba amɛshiai anɔ. (Okɛto Ezekiel 44:30; Maleaki 3:10 he.) Yɛ amɛnikpamɔ babaoo lɛ fɛɛ sɛɛ lɛ, be shɛɔ ni amɛkeee nii. Ni Nyɔŋmɔ tsɔɔ maŋtsɛmɛi loo gbalɔi anɔ ekaiɔ amɛ koni ekɛhɛle amɛ shi koni amɛtsɔɔ shidaa. Yɛ anɔkwale mli lɛ, Israelbii ni ji pɛsɛmkunyatsɛmɛi lɛ ji mɛi ni laajeɔ nii lɛ. Ejaakɛ Yehowa nyɛŋ ajɔɔ mɛi ni tsiɔ nikee ni amɛkɛaaha yɛ jamɔ hei loo nɔ ni amɛkɛaaha ohiafoi lɛ nɔ.
10. (a) Mɛɛ miishɛɛ sane jɛ Maŋtsɛ Hezekia kaimɔi ni kɔɔ shidaa he lɛ mli ba? (b) Ani shihilɛi nɛɛ asɛɛ tsɛ?
10 Be ko lɛ, nɔ ni jɛ Maŋtsɛ Hezekia kaimɔi lɛ amli ba ji gbijurɔ ni akɛ gbii 14 ye yɛ miishɛɛ mli yɛ Yerusalem. Akanya gbɔmɛi lɛ yɛ mumɔŋ. Klɛŋklɛŋ lɛ, amɛkpata amagajamɔ he nibii ni eshwɛ lɛ fɛɛ ahiɛ ni amɛkɛ amɛŋmɔshi nii lɛ ba “ni amɛbato amɛ kui kui. . . . Ni beni Hezekia kɛ onukpai lɛ ba ni amɛna kui lɛ, amɛjie Yehowa kɛ emaŋ Israel yi.” (2 Kronika 30:1, 21-23; 31:1, 6-8) Nɔ ni yɔɔ mɔbɔ ji akɛ kɛ akanya amɛ yɛ be kɛ bei amli nɛkɛ lɛ, kɛkɛ lɛ amɛkpale kɛtee amɛtrumufeemɔ lɛ mli ekoŋŋ. Yɛ naagbee lɛ, Nyɔŋmɔ tsuishiŋmɛɛ lɛ ta, ni eŋmɛ gbɛ koni aŋɔ ewebii lɛ kɛya nom mli yɛ Babilon. Akpata amɛmaŋ kɛ sɔlemɔtsu fɛfɛo lɛ hiɛ. (2 Kronika 36:17-21) Yɛ sɛɛ mli lɛ, beni akɛ amɛ eba ni asaa atswa tsu lɛ kɛ gbogboi lɛ ekoŋŋ lɛ, shihilɛ lɛ bafite kwraa akɛ Yehowa kɛ Yudafoi lɛ akpɛkpɛɛfeemɔ lɛ to ju ni amɛjuɔ lɛ kɛ shishiumɔ ni amɛshishiuɔ lɛ lɛ he!—Maleaki 3:8.
11. Mɛɛ shishitoo mlai ni akase kɛjɛ Israel yinɔsane mli he baanyɛ aba sɛɛnamɔ aha Kristofoi ni yɔɔ shihilɛ mli ŋmɛnɛ lɛ?
11 Mɛɛ shishitoo mla abaanyɛ akase kɛjɛ Israelbii ayinɔsane ni haa amɛjɛɔ he kome amɛyahiɔ he kroko lɛ mli? No ji enɛ: Bei abɔ ni shidaa eyi amɛtsui mli obɔ lɛ, amɛkɛ miishɛɛ jie enɛ kpo kɛtsɔ ŋmaa ni amɛha Yehowa “kui kui” lɛ nɔ. Shi kɛ amɛhiɛ kpa shidaa nɔ aloo eba shi lɛ, miishɛɛ mli ni ajɛɔ akeɔ nii lɛ baa naagbee. Ani Kristofoi ni amɛjɔɔ amɛhe nɔ lɛ baanyɛ ajie su gbonyo ni tamɔ nɛkɛ kpo ŋmɛnɛ? Hɛɛ, ejaakɛ emuu ni adesa yeee lɛ yɛ wɔhe lolo. Kwɛ miishɛɛ ni wɔyɔɔ akɛ Nyɔŋmɔ ha aŋmala gbɛ ni etsɔ nɔ ekɛ Israel ye lɛ fɛɛ afɔ shi koni wɔ, ni wɔyɔɔ nibii agbɛjianɔtoo nɛɛ naagbee lɛ, wɔnyɛ wɔkase ni nomɛi ahe aba sɛɛnamɔ aha wɔ! —Romabii 15:4; 1 Korintobii 10:11.
12. (a) Yɛ mɛɛ gbɛ nɔ Yehowa webii ni yɔɔ ŋmɛnɛ lɛ yɔɔ shihilɛ ni tamɔ Israelbii lɛ anɔ lɛ nɔŋŋ mli? (b) Mɛɛ saji ehe hiaa ni wɔbi?
12 Taakɛ Israelbii lɛ ji lɛ, Yehowa webii ni yɔɔ ŋmɛnɛ lɛ yɛ nibii babaoo ni amɛaadamɔ nɔ amɛda shi. Wɔ hu wɔnine eshɛ jɔɔmɔi babaoo nɔ fe nɔ ni wɔnanemɛi adesai krokomɛi naa. Yɛ anɔkwale mli lɛ, wɔle Yehowa yiŋtoi ahe nii babaoo fe bɔ ni Israelbii lɛ le. Wɔkase bɔ ni Nyɔŋmɔ jɛ esuɔmɔ mli ekɛ e-Bi lɛ sha afɔle, ni wɔle jɔɔmɔi ni enɛ kɛbaaba abaha mɛi ni naa ŋwɛi nɔkpɛlɛmɔ lɛ. Ni ŋmɛnɛ wɔna hegbɛ akɛ wɔɔhi mumɔŋ paradeiso, ejaakɛ kɛjɛ 1919 kɛbaa nɛɛ, Yehowa ebɔ mumɔŋ shihilɛ he fɛfɛo ko eha ewebii lɛ. Hɛɛ, Yehowa Odasefoi yɛ nibii babaoo ni fata he ni wɔɔnyɛ wɔdamɔ nɔ wɔda shi. No hewɔ lɛ, ehe miiha ni wɔbi akɛ: Te shi ni wɔdaa Nyɔŋmɔ lɛ mli wa ha tɛŋŋ? Ni te wɔɔfee tɛŋŋ wɔjie wɔhe kpo akɛ wɔdaa shi yɛ afi ohai 20 nɛɛ mli?
Ŋmɛnɛŋmɛnɛ Beaŋ Henɔ Loo Nɔkwɛmɔ Nii
13, 14. Eyɛ mli akɛ Kristofoi bɛ Mose Mla lɛ shishi moŋ, shi ani abaanyɛ ana he nɔ ko loo nɔkwɛmɔ nɔ ko ni jɛ mlijai nyɔŋma mli ekome he mla lɛ mli?
13 Kristofoi bɛ Mose Mla ni tsɔɔ gbɛ ni esa akɛ atsɔ nɔ ada Nyɔŋmɔ shi lɛ shishi. (Galatabii 3:24, 25) Wɔ yijiemɔ “afɔle” kɛha Yehowa lɛ ji “naabui ni jajeɔ egbɛi lɛ ayibii lɛ.” (Hebribii 13:15) Belɛ enɛ ji gbɛ titri ni Kristofoi ni amɛjɔɔ amɛhe nɔ lɛ baanyɛ atsɔ nɔ ni amɛda Nyɔŋmɔ shi. Shi abaanyɛ ana henɔ loo nɔkwɛmɔ nii krokomɛi kɛjɛ mlai ni kɔɔ mlijaai nyɔŋma mli ekome, nɔwomɔ nikee nii kɛ kpɛkpɛo ni ayeɔ lɛ mli.
14 Mlijaa nyɔŋma mli ekome lɛ tsɔɔ ekome ni aja mli nyɔŋma mli nikee nii ko ni akɛaake—ni mɔ ko efeee nɔ ni esumɔɔ yɛ enɛ he. Nakai nɔŋŋ hu ŋmɛnɛ famɔi pɔtɛɛ yɛ ni ka Yehowa tsuji fɛɛ nɔ, ni amɛbɛ naajiemɔ yɛ he. Esa akɛ wɔkpe daa, esa akɛ wɔshiɛ Yehowa Maŋtsɛyeli lɛ wɔtsɔɔ yɛ faŋŋ mli ni wɔye wɔbua mɛi krokomɛi ni amɛbatsɔmɔ Kristo kaselɔi.—Hebribii 10:24, 25; Mateo 24:14; 28:19, 20.
15. Mɛɛ ŋmɛnɛŋmɛnɛ beaŋ mlihilɛ tsui ni yɔɔ lɛ he nɔkwɛmɔ nɔ tamɔ nɔ ni nɔwomɔ nikee nii kɛ kpɛkpɛo he gbɛjianɔtoo ni yɔɔ blema Israel lɛ jie lɛ kpo lɛ?
15 Kaimɔ nikee nii kɛ kpɛkpɛoyeli he gbɛjianɔtoo lɛ hu. Atsɔɔɔ yifalɛ ko ni esa akɛ akɛba. Nakai nɔŋŋ hu Ŋmalɛ lɛ etsɔɔɔ bei falɛ ni esa akɛ Yahowa Odasefoi lɛ ateŋ mɔ fɛɛ mɔ kɛtsu sɔɔmɔ krɔŋkrɔŋ lɛ he nii. Ashi bei ni abaatuu aha Nyɔŋmɔ Wiemɔ lɛ kasemɔ kɛ shiɛmɔ ni aaashiɛ aha mɛi krokomɛi lɛ aha mlihilɛ kanyamɔ kɛ tsui ni pɛsɛmkunya bɛ mli. Nakai nɔŋŋ hu heloo gbɛfaŋ nikee nii ni akɛaaha ni akɛtsi Maŋtsɛyeli lɛ he nibii asɛɛ lɛ ji nɔ ko ni ashi aha mɔ aŋkro lɛ tsui. Bɔ ni wɔshidaa lɛ mli kwɔ ha lɛ ji nɔ ni baatsɔɔ kɛji akɛ Nyɔŋmɔ tsuji ni yɔɔ ŋmɛnɛ lɛ ateŋ mɔ ko kɛ “kui kui” baaba aloo fioo ko ni sa ehiɛ kɛkɛ. (2 Kronika 31:6) Shi taakɛ eji yɛ Israel gbɛfaŋ lɛ, kɛ mɔ ko jie shidaa babaoo kpo lɛ, enine shɛɔ jɔɔmɔi babaoo hu nɔ kɛjɛɔ Nyɔŋmɔ ŋɔɔ.
Gbɛi Anɔ ni Wɔɔtsɔ Wɔjie Shidaa Kpo Yɛ
16-18. Mɛɛ gbɛi pɔtɛɛ komɛi anɔ Kristofoi ni amɛjɔɔ amɛhe nɔ baanyɛ atsɔ nɔ atsɔɔ akɛ amɛdaa shi?
16 Gbɛi ni yɔɔ tɛɛ ni atsɔɔ nɔ ajieɔ shidaa kpo atsɔɔ Yehowa lɛ ateŋ ekome ji ni wɔkɛ wɔhe awo be fɛɛ sɔɔmɔ lɛ mli. Ani oshidaa lɛ daa babaoo bɔ ni no aaaha otsui ashwe enɛ? Ayoo akɛ klɛŋklɛŋ lɛ esa akɛ gbɛgbalɔ ni yeɔ omanye lɛ ana suɔmɔ lɛ akɛ eeesɔmɔ kɛ shihilɛi ni ja hu. Kɛ shidaa lɛ mli wa lɛ, suɔmɔ ni tsirɛɔ mɔ koni asɔmɔ Nyɔŋmɔ babaoo lɛ daa yɛ mɔ lɛ hiɛsɔɔ tsui lɛ mli. Ani onuɔ he nakai? Kɛji akɛ shihilɛ ni oyɔɔ mli ŋmɛnɛ lɛ po haaa okɛ ohe awo be fɛɛ sɔɔmɔ lɛ mli lɛ, esaaa akɛ enɛ gbeɔ gbɛgbamɔ mumɔ lɛ. Obaanyɛ ojɛ otsuiŋ fɛɛ ofi amɛ sɛɛ ni owo gbɛgbalɔi lɛ ahewalɛ.
17 Kɛ onyɛɛɛ ofee gbɛgbalɔ bianɛ lɛ, ani obaanyɛ ofee gbɛgbalɔi awalɔ yɛ be kɛ bei amli? Bei krɛdɛɛi komɛi baa yɛ afi fɛɛ afi mli ni Kristofoi asafo lɛ jeɔ gbɛ ewoɔ hewalɛ krɛdɛɛ yɛ shiɛmɔ nitsumɔ lɛ he. Akɛ nɔkwɛmɔ nɔ lɛ, hulutsoo nyɔji lɛ hi jogbaŋŋ kɛha mɛi pii, ni hegbɛ kɛha nitsumɔ kroko hu baa yɛ gbo be mli yɛ woji tɛtrɛbii lɛ ashɛɛ he tafaa lɛ mli. Yɛ be ni akɛaawo sɔɔmɔ krɔŋkrɔŋ lɛ mli ni aaaha afa lɛ he lɛ, shishitoo taomɔ nii lɛ ka he eji anɔkwale akɛ shidaa kɛ nihamɔ yɛ mlihilɛ mli baa.
18 Gbɛ kroko ni yɔɔ pɔtɛɛ ni aaanyɛ atsɔ nɔ atsɔɔ shidaa ji kɛtsɔ teokrase tsumaa he gbɛjianɔtoo ni yaa nɔ yɛ shikpɔŋ muu lɛ fɛɛ nɔ lɛ sɛɛfimɔ nɔ. Aamamɔ Maŋtsɛyeli Asai heei pii yɛ shikpɔji sɔrɔtoi anɔ ni aalɛɛ nɔ ni yɔɔ lɛ ekomɛi amli akɛni afa fe nine hewɔ. Aamamɔ Kpeei Asai sɔrɔtoi abɔ, aalɛɛ Betel Shiai kɛ nitsumɔ hei amli. Mɛɛ gbɛ ni hi jogbaŋŋ nɔ po atsɔɔ ajieɔ shidaa kpo ahaa Yehowa nɛkɛ—wɔhewalɛ loo shika ni wɔkɛaaha koni akɛtsu nɛkɛ tsui sɔrɔtoi nɛɛ ahe nii!
Okulafo Ohiafo ko Nɔkwɛmɔ nɔ Kpakpai Lɛ
19. Mɛni feɔ bo fɛo waa yɛ yoo okulafo ohiafo lɛ he yɛ sɔlemɔwe lɛ?
19 Biblia mli nɔkwɛmɔ nɔ ko ni ale jogbaŋŋ ni tsɔɔ shidaa ni heloo gbɛfaŋ nihamɔ kɛbaa ji okulafo lɛ ni Yesu Kristo tsɔɔ bɔ ni eji lɛ mli lɛ. (Luka 21:1-4) Eka shi faŋŋ akɛ eyoo akɛ etsaakpoi enyɔ lɛ bɛ jara ko kwraa ni aaaha ekɛ sɔrɔtofeemɔ ko aba sɔlemɔtsu lɛ kɛ mɛi ni sɔmɔɔ yɛ jɛmɛ lɛ ahilɛ-kɛ-hamɔ mli. Shi ekwɛɛɛ sɔlemɔtsu lɛ kɛ osɔfoi lɛ ni sɔmɔɔ yɛ jɛmɛ lɛ ni esusu lɛ diɛŋtsɛ ehe akɛ ‘amɛhiɔ shi jogbaŋŋ po fe mi ni amɛyɛ tsu kpakpa hu fe ohiafoi ashia ni miyɔɔ nɛɛ mli.’ Eji anɔkwale akɛ sɔlemɔtsu lɛ yɛ nyam ni eyɛ fɛo waa diɛŋtsɛ. “Akɛ tɛi fɛfɛji kɛ kee nii ewula lɛ.” (Luka 21:5) Shi no etsiii okulafo lɛ gbɛ akɛ ekatsu too loo onia. Eesumɔ ni ejie ehe kpo akɛ edaa Yehowa shi, shi jeee gbɔmɛi ni sɔmɔɔ yɛ sɔlemɔwe lɛ.
20. Mɛɛ gbɛ nɔ wɔɔtsɔ wɔjie su ni yɔɔ fɛo ni tamɔ okulafo ohiafo lɛ nɔ lɛ kpo?
20 Yehowa webii ni yɔɔ ŋmɛnɛ lɛ kaseɔ nii kɛjɛɔ nɛkɛ nɔkwɛmɔ nɔ nɛɛ mli. Amɛle akɛ amɛnikee nii lɛ Nyɔŋmɔ amɛkɛhaa, kɛ eda jio edaaa jio, tamɔ yoo okulafo ohiafo lɛ. Ni amɛnaa nɔmimaa yɛ enɛ mli akɛni amɛle akɛ bɔ ni ato Yehowa shikpɔŋ nɔ gbɛjianɔtoo lɛ he gbɛjianɔ aha lɛ haŋ gbɔmɔ aŋkro ko ana nɔ ko he sɛɛ yɛ shika gbɛfaŋ yɛ mli. Ato Asafo lɛ nitsumɔi ahe gbɛjianɔ ni atsuɔ he nii bɔ ni no aaawula nitsulɔi ni tsuɔ nii waa lɛ, koni amɛnyɛ amɛfee Bibliai, kɛ Biblia kasemɔ woji ni akɛtsu Maŋtsɛyeli lɛ he nibii ahe nii. Enɛ yɛ sɔrɔto kwraa yɛ juu kɛ hiɛgbeji agbɛ ni atsɔ nɔ akɛ shika ni akɛke nyɛsɛɛ nɛɛ lɛ tsu nii taakɛ abɔ he amaniɛ yɛ tɛlivishin nɔ sanekpakpashiɛlɔi komɛi ahe lɛ.
Shidaa Be Kaimɔi ni Akɛhaa lɛ He yɛ Sɛɛnamɔ
21, 22. Mɛni esa akɛ mlihilɛ kaimɔi koni wɔjie wɔhe kpo akɛ wɔdaa shi lɛ akanya yɛ wɔtsuii ni hiɛ sɔɔ nii lɛ amli?
21 Kaimɔ ni aaakai Israelbii lɛ daa yɛ nii ni esa ni amɛtsu amɛha Yehowa lɛ he lɛ he miihia, titri lɛ bɔni ehe hiaa ni amɛjie shidaa mumɔ kpo amɛtsɔɔ lɛ. Yɛ fɛɛ mli lɛ, kɛ agbala amɛjwɛŋmɔ kɛba nɛkɛ saji nɛɛ anɔ lɛ, ekanyaa shidaa yɛ amɛtsuii amli, ni nɔ ni jɛɔ mli baa lɛ fe wiemɔi pɛ kɛkɛ ni amɛkɛaatsɔɔ hiɛsɔɔ. Amɛmiisumɔ ni amɛkɛ nikee nii “kui kui” aha Yehowa ni akɛtsu nii yɛ ejamɔ we lɛ.
22 Eba akɛ ŋmɛnɛŋmɛnɛ beaŋ “Nyɔŋmɔ Israel” lɛ kɛ “asafo babaoo” ni ji amɛnanemɛi lɛ aaanu he yɛ nakai gbɛ nɔŋŋ nɔ. (Galatabii 6:16; Kpojiemɔ 7:9) Eba akɛ amɛhiɛsɔɔ tsuii lɛ atsirɛ amɛ ni amɛkɛ yijiemɔ ni tamɔ “kui kui” aha Yehowa. Kɛkɛ lɛ amɛbaanyɛ amɛkɛɛ yɛ anɔkwayeli mli akɛ “wɔmiijie shidaa kpo wɔtsɔɔ wɔ-Nyɔŋmɔ ni yɔɔ suɔmɔ ni ji Yehowa ni mli hi lɛ.’”
[Shishigbɛ niŋmai]
Ajie kɛjɛ July 1, 1988 Watchtower lɛ mli.
Ani Okaiɔ?
◻ Mɛni hewɔ ehe hiaa ni Kristofoi akwɛ amɛshidaa jogbaŋŋ yɛ be fɛɛ mli Iɛ?
◻ Mɛni hewɔ Yahowa webii yɔɔ nɔ ni amɛbaadamɔ nɔ amɛda shi yɛ be fɛɛ mli Iɛ?
◻ Mɛɛ gbɛi pɔtɛɛ komɛi anɔ Israelbii Iɛ baanyɛ atsɔ nɔ amɛjie shi ni amɛdaa Yehowa Iɛ kpo yɛ?
◻ Mɛɛ nibii pɔtɛɛ wɔbaanyɛ wɔfee ni wɔkɛjie wɔshidaa kpo wɔtɔɔ taakɛ Israelbii Iɛ fee lɛ?
◻ Mɛni wɔbaanyɛ wɔkase kɛjɛ okulafo ohiafo Iɛ he yɛ sɔlemɔwe lɛ?
[Mfonirii ni yɔɔ baafa 19]
Israelbii Iɛ jie shidaa kpo kɛtsɔ mlijai nyɔŋma mli ekome Iɛ kIɛŋklɛŋ nii ni amɛkɛha Iɛ kɛ gbɛjianɔ ni amɛto amɛha ohiafoi koni amɛye kpɛkpɛo yɛ ŋmɔshi lɛ mIi.
[Mfonirii ni yɔɔ baafa 20]
Lalatsɛ Iɛ da Yehowa shi yɛ E-naakpɛɛ nitsumɔi kɛ bɔ ni esusuɔ E-webii ahe Iɛ hewɔ
[Mfonirii ni yɔɔ baafa 22]
Yehowa Odasefoi ni yɔɔ ŋmɛnɛ Iɛ hu jieɔ shidaa kpo kɛtsɔɔ shiɛmɔ nitsumɔ Iɛ kɛ teokrase tsui sɔrɔtoi ni amaa ni amɛkɛ amɛhe woɔ mli lɛ, kɛ agbɛnɛ hu heloo gbɛfaŋ nibii ni amɛkɛkeɔ Iɛ nɔ