Sanebimɔi Ni Jɛ Kanelɔi Adɛŋ

Minuɔ shishi akɛ, akɛ Hela wiemɔ “toʹte” (kɛkɛ Iɛ) tsuɔ nii koni akɛtsɔɔ nɔ ni baanyiɛ sɛɛ aba. No hewɔ Iɛ, mɛni hewɔ Mateo 24:9 (NW) kaneɔ akɛ: “Kɛkɛ lɛ [“toʹte”] amɛaajie nyɛ amɛwo amanehulu mli,” yɛ be mli ni sane ni tamɔ nakai nɔŋŋ ni yɔɔ luka 21:12 lɛ kɛɛ: “Shi dani enɛɛmɛi fɛɛ aaaba lɛ, amɛaamɔmɔ nyɛ, ni amɛaawa nyɛ yi” Iɛ?

Eja akɛ abaanyɛ akɛ toʹte atsu nii ni akɛtsɔɔ nɔ ko ni baanyiɛ sɛɛ, nɔ ko ni baatsa nɔ aba, kɛ aaawie nakai. Shi ehe ehiaaa ni wɔnu shishi akɛ enɛ ji gbɛ pɛ ni atsɔɔ nɔ akɛ Biblia mli wiemɔ lɛ tsuɔ nii.

A Greek-English Lexicon of the New Testament and Other Early christian Literature ni Bauer, Arndt, kɛ Gingrich ŋma lɛ tsɔɔ akɛ, akɛ wiemɔ toʹte lɛ tsu nii yɛ shishinumɔi titrii enyɔ mli yɛ Ŋmalɛi lɛ amli.

Ekome ji “no mli lɛ [no be lɛ mli lɛ].” Enɛ baanyɛ afee “no dani [no mli lɛ] ni miitsɔɔ tsutsu be ko.” Ehe nɔkwɛmɔ nɔ ko ji Mateo 2:17 (NW) akɛ: “Kɛkɛ ni nɔ ni awie kɛtsɔ gbalɔ Yeremia nɔ lɛ ba mli.” Enɛ etsɔɔɔ nɔ ko ni baa kɛtsaraa nɔ, shi moŋ etsɔɔ be pɔtɛɛ ko yɛ be ni eho lɛ mli, yɛ no be lɛ mli. Nakai nɔŋŋ, abaanyɛ akɛ toʹte atsu nii ‘koni akɛtsɔɔ wɔ[sɛɛ] be mli kɛkɛ lɛ [no mli lɛ].’ Anaa nɔkwɛmɔ nɔ lɛ ekome yɛ 1 Korintobii 13:12 (NW) akɛ: “Ejaakɛ ŋmɛnɛŋmɛnɛ lɛ ashwishwɛ mli wɔtsɔɔ wɔnaa nii tuutuu, shi kɛkɛ lɛ, hiɛ kɛ hiɛ; ŋmɛnɛŋmɛnɛ lɛ mile nii fã-kɛ-fã, shi kɛkɛ lɛ, male nii kɛyishi tamɔ bɔ ni ale mi kɛyi-shi lɛ.” Paulo kɛ toʹte tsu nii kɛ shishinumɔ ni tsɔɔ ‘yɛ nakai wɔsɛɛ lɛ mli.’—Wɔma efa ko nɔ mi.

Taakɛ wiemɔ komekomei ashishitsɔɔmɔ wolo nɛɛ tsɔɔ lɛ, gbɛ kroko ni akɛ toʹte lɛ tsuɔ nii ji “ni akɛtsɔɔ nɔ ni baanyiɛ sɛɛ yɛ be naa.” Nɛkɛ wiemɔi komekomei ashishitsɔɔmɔ wolo nɛɛ kɛ nɔkwɛmɔ nii babaoo ni anaa yɛ saji etɛ, ni kɛ hetoo ni Yesu kɛha bɔfoi lɛ ahetoo, yɛ sane ni amɛbi yɛ ba ni eba lɛ he okadi lɛ he lɛ mli haa.a Ákɛ toʹte ni akɛtsuɔ nii “akɛtsɔɔ nɔ ni baanyiɛ sɛɛ aba yɛ be naa” lɛ he nɔkwɛmɔ nii lɛ, wiemɔ komekomei ashishitsɔɔmɔ wolo lɛ tsɛ saji asɛɛ kɛjɛ Mateo 24: 10, 14, 16, 30; Marko 13:14, 21; kɛ Luka 21: 20, 27. Wiemɔi ni fata he lɛ hesusumɔ tsɔɔ nɔ hewɔ ni, nɔ ko ni baaba sɛɛ mli lɛ ji shishinumɔ ni ja lɛ. Ni enɛ yeɔ ebuaa, ni anaa Yesu gbalɛ ni wɔsɛɛ be mli saji, ni baaya nɔ lɛ yɔɔ mli lɛ he shishinumɔ.

Shi kɛlɛ, ehe ehiaaa ni wɔmu sane naa akɛ, esa akɛ toʹte he nɔkwɛmɔ nii fɛɛ ni akɛaatsu nii yɛ saji nɛɛ amli lɛ, atsɔɔ nɔ ni baanyiɛ sɛɛ aba diɛŋtsɛ. Akɛ nɔkwɛmɔ nɔ lɛ, wɔkaneɔ yɛ Mateo 24:7, 8 akɛ Yesu gba fɔ shi akɛ, maŋ baate shi awo maŋ, ni akɛ hɔmɔ kɛ shikpɔŋhosomɔi baaba. Kuku 9 tsaa nɔ akɛ: “No be lɛ mli lɛ amɛaajie nyɛ amɛwo amanehulu mli, ni agbe nyɛ; ni migbɛi lɛ hewɔ lɛ jeŋmaji fɛɛ aaanyɛ nyɛ.” Ani ebaafee nɔ ni nilee yɔɔ mli akɛ aaanu shishi akɛ esa akɛ tai, hɔmɔ, kɛ shikpɔŋhosomɔi lɛ fɛɛ aba, ni ekolɛ esɛɛ afo, dani yiwaa lɛ aje shishi?—Wɔma efa ko nɔ mi.

No efeŋ nɔ ni nilee yɔɔ mli, ni asaŋ nɔ ni wɔle yɛ bɔ ni eba mli eha, yɛ klɛŋklɛŋ afii oha lɛ mli lɛ emaaa nɔ mi nakai. Sane ni yɔɔ Bɔfoi lɛ Asaji awolo lɛ mli lɛ jieɔ lɛ kpo akɛ, beni Kristofoi asafo hee lɛ mli bii je shiɛmɔ shishi nɔŋŋ lɛ, akɛ shitee-kɛ-woo ni naa wa ba amɛnɔ. (Bɔfoi lɛ Asaji 4:5-21; 5:17-40) Eka shi faŋŋ akɛ, wɔnyɛŋ wɔkɛɛ akɛ tai, hɔmɔ, kɛ shikpɔŋhosomɔi ni Yesu wie he lɛ ba dani mra be mli yiwaa lɛ je shishi. Nɔ ni tamɔɔɔ nakai lɛ, nakai shitee-kɛ-woo lɛ ba “dani” nibii krokomɛi babaoo ni agba afɔ shi lɛ ba, ni ekɛ gbɛ ni Luka tsɔ nɔ ewie saji ahe eha lɛ kpaa gbee: ‘Shi dani enɛɛmɛi fɛɛ aaaba lɛ, amɛaamɔmɔ nyɛ, ni amɛaawa nyɛ yi.’ (Luka 21:12) No baatsɔɔ akɛ, akɛ toʹte tsu nii babaoo kɛ shishinumɔ akɛ “no be lɛ mli” yɛ Mateo 24:9. Yɛ tai, hɔmɔ, kɛ shikpɔŋhosomɔi abe mli, loo yɛ no be lɛ mli lɛ, abaawa Yesu sɛɛnyiɛlɔi lɛ ayi.

[Shishigbɛ niŋmaa]