Daa Shi—Yehowa Mesia Maŋtsɛyeli Lɛ Miiye Nɔ
“Wɔmiidao shi, bo Yehowa Nyɔŋmɔ Ofe, . . . ejaakɛ oŋɔ ohewalɛ kpeteŋkpele lɛ, ni oje shishi ooye nɔ akɛ maŋtsɛ.”—KPOJIEMƆ 11:17, NW.
1. Mɛni Buu Mɔɔ Asafo lɛ sɛinɔtalɔ lɛ wie yɛ be mli ni ekpa Europa yɛ 1911 lɛ sɛɛ?
AFI 1911 mra mli ni Buu Mɔɔ Asafo lɛ sɛinɔtalɔ C. T. Russell ha Biblia mli wiemɔi yɛ Europa maŋtiasei wuji lɛ amli. Be mli ni ewieɔ nakai gbɛfaa lɛ he lɛ, Russell ŋma nɔ ni nyiɛ sɛɛ nɛɛ yɛ The Watch Tower, ni ji May 15, 1911 nɔ lɛ mli akɛ: “Wɔnaa kpɛ wɔhe beni wɔna shweremɔ he odaseyeli yɛ he fɛɛ he lɛ . . . Mɛi ni kaneɔ wɔwoji lɛ le akɛ afii komɛi nɛ ni wɔbɔi gbɛkpamɔ akɛ Yinɔ nɛɛ baaba naagbee kɛ haomɔ kpeteŋkpele, ni wɔmiikpa gbɛ akɛ ebaaba trukaa kɛ hewalɛ yɛ October, 1914 sɛɛ nɔŋŋ, nɔ ni yɛ bɔ ni wɔna Ŋmalɛi lɛ ahe shishinumɔ wɔha lɛ, eji be ni Jeŋmaji Abei lɛ—be ni akɛ shikpɔŋ lɛ nɔyeli ha Jeŋmaji lɛ—baaba naagbee; ni no hewɔ lɛ eji be ni Mesia lɛ Maŋtsɛyeli lɛ kɛbaaje enɔyeli shishi.” Ani nɛkɛ gbɛkpamɔ nɛɛ ba mli?
2. Yɛ mɛɛ gbɛ nɔ afite toiŋjɔlɛ yɛ 1914, ni mɛni ni yɔɔ mɔbɔ jɛ mli ba?
2 Yɛ afi 1914 klɛŋklɛŋ fa lɛ mli lɛ, no mli lɛ je lɛ tamɔ nɔ ni eye ehe kwraa kɛjɛ tawuu he. Shi etsɛɛɛ ni toiŋjɔlɛ lɛ fite, beni Serbianyo ko gbe odehe ni baata Austria maŋtsɛsɛi lɛ nɔ lɛ trukaa yɛ June 28, 1914 lɛ. Etsɛɛɛ ni Austria kɛ Hungary fa ta amɛshi Serbia. Russia yafata Serbia he, no hewɔ lɛ Germane hu fa ta eshi Russia yɛ August 1. Kɛkɛ ni Germane fa ta eshi France hu yɛ August 3; Great Britain loo Ŋleshi Ablotsiri hu fa ta eshi Germane yɛ August 4; Montenegro fa ta eshi Austria kɛ Hungary yɛ August 7; Japan fa ta eshi Germane yɛ August 23; Austria kɛ Hungary fa ta amɛshi Belgium yɛ August 28. Mɛi pii he ye akɛ etsɛŋ ni tawuu lɛ baaba naagbee. Shi moŋ etee nɔ egbɛ eshwa ni etsɔ ta ni ehiii fe fɛɛ yɛ yinɔsane mli kɛbashi nakai be lɛ mli, ni maji krokomɛi fe 19 kɛ amɛhe wo lashishwiemɔ ni tee nɔ yɛ majimaji ateŋ ni mɛi ni hiɛ kpata fe asraafoi kɛ maŋbii 13,000,000 ni apila loo aha mɛi fe 21,000,000 je kpa nɛɛ mli.
3, 4. Mɛni ba yɛ Asafo lɛ nitsumɔ he yitso yɛ Sohaa leebi, October 2, 1914?
3 Yɛ Sohaa leebi, October 2, 1914 lɛ, Russell tswa adafi etsɔɔ Buu Mɔɔ Asafo ni yɔɔ Brooklyn, New York, lɛ nitsumɔ he yitso lɛ mli nitsulɔi lɛ akɛ: “Jeŋmaji abei lɛ eba naagbee; amɛmaŋtsɛmɛi lɛ eye amɛgbii lɛ amɛta.” Betel, ni ji “Nyɔŋmɔ we” weku lɛ kɛ miishɛɛ dɛtswaa kpee nɛkɛ adafitswaa nɛɛ.
4 Mɛni C.T. Russell kɛ ehefatalɔi lɛ yɔɔ ni amɛaadamɔ nɔ amɛha miishɛɛ babaoo ni amɛna yɛ nakai October leebi lɛ afee nɔ ni ja lɛ? Nɛgbɛ wiemɔ “Jeŋmaji Abei” lɛ je shishi kɛjɛ? Mɛɛ odaseyeli yɔɔ ni tsɔɔ akɛ Jeŋmaji Abei lɛ ba naagbee yɛ October, 1914? Ni te esa akɛ enɛ asa ohe aha tɛŋŋ?
Yerusalem kɛ Jeŋmaji Abei Lɛ
5. Nɛgbɛ wiemɔ “Jeŋmaji Abei” lɛ je shishi kɛjɛ?
5 Wiemɔ “Jeŋmaji Abei” loo “jeŋmaji abei ni ato,” lɛ baa kɛjɛɔ Yesu gbalɛ kpeteŋkpele ni kɔɔ Yerusalem hiɛkpatamɔ he lɛ mli. (Luka 21:5-36, King James Version) Gbii enyɔ dani ekɛ enɛ aaaha lɛ, Yesu kɛ ehe ha Yerusalem maŋ lɛ mlibii lɛ akɛ amɛ Mesia. Yɛ be mli ni ekɛ heshibaa ta teji nɔ kɛyaa maŋ lɛ mli lɛ, Yudafoi asafo babaoo bolɔ kɛ miishɛɛ taakɛ bɔ ni Zakaria 9:9 gba fɔ shi lɛ. Amɛbolɔ waa akɛ, “Ajɔɔ Maŋtsɛ ni baa yɛ Nuŋtsɔ [Yehowa] gbɛi anɔ lɛ.”—Luka 19:28-40.
6, 7. Mɛɛ la yi sɔyeli ni yɔɔ gbeyei klɛŋklɛŋ afii oha lɛ mli Yudea maŋ lɛ mlibii lɛ kɛba amɛ diɛŋtsɛ amɛnɔ, ni mɛni jɛ mli ba?
6 Shi Yesu le akɛ etsɛŋ ni gbɔmɛi lɛ baate shi awo lɛ yɛ gbɔmɔgbee he hetsɛ̃ ni Yerusalem Nyɔŋmɔ jamɔ mli hiɛnyiɛlɔi lɛ ni amɛtsɛ, Abonsam, ni amɛyɔɔ eshishi lɛ kudɔɔ amɛ lɛ yɔɔ kɛha lɛ lɛ hewɔ. (1 Mose 3:15; Yohane 8:44) Yɛ no sɛɛ etsɛɛɛ, yɛ Nisan 14 lɛ, Yudafoi asafoi komɛi bi ni agbe Yesu. Amɛbolɔ amɛwo Roma amralo lɛ ni sumɔɔɔ ni efeɔ nakai lɛ akɛ, “Ela aba wɔ kɛ wɔbii anɔ!” (Mateo 27:24, 25) Ni amɛaakpɛlɛ Yesu nɔ akɛ Mesia Maŋtsɛ moŋ lɛ, osɔfonukpai lɛ bolɔ akɛ: “Wɔbɛ maŋtsɛ ko akɛ ja Kaisare.” (Yohane 19:15) Kɛkɛ ni amɛkala anɔkwa Mesia lɛ amɛkpɛtɛ sɛŋmɔtso he koni egbo yɛ be mli ni amɛkɛ apasa efolɔ enaa akɛ eji maŋjwalɔ ni teɔ shi woɔ Roma kɛ mɔ ni bɔɔ Yudafoi lɛ a-Nyɔŋmɔ lɛ musu lɛ.—Marko 14:61-64; Luka 23:2; Yohane 18:36; 19:7.
7 Eka shi faŋŋ akɛ ŋwɛi mlifu baaba Yudea maŋ lɛ mlibii lɛ anɔ yɛ amɛ lashishwiemɔ kpeteŋkpele lɛ hewɔ. Anyɛŋ atsɛ Yerusalem kɛ esɔlemɔtsu fɛfɛo lɛ akɛ “Maŋtsɛ agbo lɛ [Yehowa] maŋ” dɔŋŋ. (Mateo 5:35; Luka 13:33-35) Gbii komɛi dani Yesu baagbo lɛ, ekaselɔi lɛ kɛ hiɛsɔɔ wie nakai maŋ lɛ sɔlemɔtsu lɛ tsui lɛ ahe. Yɛ hetoohamɔ mli lɛ, Yesu gba akɛ: “Enɛɛmɛi fɛɛ ni nyɛnaa nɛɛ, gbii aaaba ni ashiŋ emli tɛ kome yɛ ekroko nɔ ni atsiŋ atswaŋ shi.”—Luka 21:5, 6.
8. Beni Yesu kɛ “okadi” ni tsɔɔ nibii ni kɛ Yerusalem hiɛkpatamɔ lɛ baaba lɛ ha lɛ, no mli lɛ mɛni hu fata he.
8 Yesu kaselɔi lɛ kɛ amɛnaa ni ekpɛ amɛhe bi lɛ akɛ: “Tsɔɔlɔ, belɛ mɛɛ be mli nii nɛɛ aaaba mli? Ni mɛɛ okadi aaaba beni nii nɛɛ aaaba mli lɛ?” (Luka 21:7) Yɛ hetoohamɔ mli lɛ, Yesu gba nibii ni baaba ni kɛ Yerusalem hiɛkpatamɔ lɛ baaba lɛ pɛpɛɛpɛ, ni ekɛ nɛkɛ wiemɔ kuku ni sa kadimɔ nɛɛ fata he: “Ni Jeŋmaji lɛ aaanaanaa Yerusalem nɔ kɛyashi beyinɔ ni Jeŋmaji abei lɛ aaashɛ.” (Luka 21:8-24, KJ) No hewɔ lɛ, Yesu miitsɔɔ nɔ ko ni tekeɔ Yerusalem hiɛkpatamɔ lɛ—nɔ ko ni esa akɛ emɛ “kɛyashi beyinɔ ni Jeŋmaji abei lɛ aaashɛ.” Yɛ be mli ni ewieɔ “okadi” lɛ he lɛ, Yesu kɛɛ: “Beni nyɛaana akɛ nibii nɛɛ etsɔ naa shi lɛ, nyɛnaa nyɛlea akɛ Nyɔŋmɔ maŋtsɛyeli lɛ eshɛ eta.” (Luka 21:31) No hewɔ lɛ, okadi lɛ baana emlibaai enyɔ. Eklɛŋklɛŋ mlibaa loo yɛ gbɛ bibioo nɔ lɛ baatsɔɔ akɛ ‘Yerusalem amaŋfɔ-feemɔ lɛ ebɛŋkɛ.’ (Luka 21:20) Emlibaa ni ji enyɔ loo nɔ ni da lɛ baaba mli yɛ be mli ni Jeŋmaji Abei lɛ eba naagbee lɛ, ni ebaatsɔɔ akɛ “Nyɔŋmɔ maŋtsɛyeli lɛ eshɛ eta.”—Okɛto Mateo 24:3 he.
Akɛ Maŋtiase ni Nɔ Kwɔ To Shikpɔŋ nɔ Yerusalem Najiaŋ
9. Mɛɛ be shikpɔŋ nɔ Yerusalem laaje duromɔ hegbɛ ni eyɔɔ lɛ, ni mɛni akɛto enɛ najiaŋ?
9 Kɛ akɛɛ “ni jeŋmaji lɛ aaanaanaa Yerusalem nɔ kɛyashi beyinɔ ni jeŋmaji abei lɛ aaashɛ” lɛ, belɛ ani Yesu miitsɔɔ akɛ abaaku sɛɛ ato shikpɔŋ nɔ maŋ lɛ ama shi ekoŋŋ yɛ ŋwɛi duromɔ naa? Dabi. Yɛ be mli ni amɛgbe Nyɔŋmɔ suɔmɔ Bi lɛ sɛɛ lɛ, shikpɔŋ nɔ Yerusalem laaje gbɛhe krɛdɛɛ mli ni eyɔɔ lɛ kɛmiiya naanɔ, ni akɛ “Nyɔŋmɔ hiɛkalɔ lɛ maŋ ni ji ŋwɛi Yerusalem” ni nɔ kwɔ lɛ eto no najiaŋ.—Hebribii 12:22; Mateo 23:37, 38; 27:50, 51.
10. Mɛni ji wiemɔ “ŋwɛi Yerusalem” lɛ shishi?
10 Akɛ wiemɔ “ŋwɛi Yerusalem” lɛ tsuɔ nii yɛ Biblia lɛ mli akɛtsɔɔ ŋwɛi Maŋtsɛyeli ni anyɛŋ akpata hiɛ ni atsɛ Kristofoi ni afɔ amɛ mu lɛ akɛ amɛba mli lɛ.a (Hebribii 11:10; 12:22, 23) Beni bɔfo Paulo ŋma enɛ lɛ, no mli lɛ shikpɔŋ nɔ maŋtiase lɛ kɛ esɔlemɔtsu lɛ yɛ lolo ni Yudafoi lɛ kɛ hiɛsɔɔ kwɛɔ enɛ. No hewɔ lɛ, Paulo kai Hebri Kristofoi lɛ akɛ “ejaakɛ wɔbɛ maŋ ni kaa shi yɛ biɛ, shi maŋ ni baaba lɛ moŋ sɛɛ gbɛ wɔtaoɔ.”—Hebribii 13:14.
Nɔ Hewɔ ni Atsɛɔ lɛ Ŋwɛi Yerusalem
11. Mɛni shikpɔŋ nɔ Yerusalem damɔ shi kɛha aahu kɛyashi be mli ni elaaje Yehowa hiɛ duromɔ ni eyɔɔ lɛ?
11 Yerusalem ji Israel maŋ lɛ ni akɛɛ amɛ maŋtsɛmɛi “ta Yehowa sɛi nɔ” lɛ maŋtiase kɛjɛ jeeŋmɔ. (1 Kronika 29:23) Agbɛnɛ hu, Yehowa kɛ David fee kpaŋmɔ akɛ maŋtsɛyeli lɛ baahi eweku mli kɛya naanɔ. Taakɛ bɔ ni akɛ ŋmɛnɛŋmɛnɛ beaŋ maŋtiasei tamɔ Washington, Moscow, Canberra kɛ Pretoria tsuɔ nii akɛyɔseɔ amɛnɔyelii sɔrɔtoi lɛ, nakai nɔŋŋ hu akɛ Yerusalem tsu nii yɛ Biblia lɛ mli akɛdamɔ shi aha David maŋtsɛyeli lɛ.—2 Samuel 7:16; Luka 1:32.
12. Te esa akɛ akɛ wiemɔ ‘Jeŋmaji Abei’ lɛ atsu nii aha tɛŋŋ?
12 David maŋtsɛyeli lɛ nɔyeli yashɛɔ he ko, eyashɛɔ husui ni Nyɔŋmɔ etsɔɔ kɛha blema Israel lɛ pɛ naa. No hewɔ lɛ shikpɔŋ nɔ Yerusalem ji Mesia Maŋtsɛyeli diɛŋtsɛ ni baaye nɔ kɛjɛ ŋwɛi ni shikpɔŋ lɛ fɛɛ afee enɔyeli he lɛ he mfoniri-feemɔ mli nɔ ko kɛkɛ. (Lala 2:2, 7, 8; Daniel 7:13, 14; 2 Timoteo 4:18) No hewɔ lɛ, wolo ni ji The Time Is At Hand ni Buu Mɔɔ Asafo lɛ fee yɛ 1889 lɛ wie yɛ faŋŋ mli akɛ: “Wɔ Nuŋtsɔ lɛ kɛ wiemɔ ‘Jeŋmaji Abei’ lɛ to be kpalaŋŋ ni baaka shikpɔŋ lɛ yinɔsane teŋ, kɛjɛ be mli ni aaajie shikpɔŋ nɔ Nyɔŋmɔ Maŋtsɛyeli lɛ, ni ji Israel Maŋtsɛyeli lɛ kɛya lɛ (Ezek. 21:30-32), kɛ be mli ni akɛ nɔ ni akɛfee ehe mfoniri lɛ diɛŋtsɛ aaaba ni ato ama shi, ni ji anɔkwa Nyɔŋmɔ Maŋtsɛyeli lɛ tɛŋ lɛ he.”
Jeŋmaji Abei—Esɛɛ Kɛlɛ Feɔ Enyiɛ?
13. Mɛɛ be mli Jeŋmaji Abei lɛ je shishi, ni mɛni hewɔ ohaa hetoo nakai?
13 Babilon Maŋtsɛ Nebukadnezar butu Nyɔŋmɔ maŋtsɛyeli ni yɔɔ shikpɔŋ nɔ lɛ yɛ afi 67 D.Ŋ.B. Beni shɛɔ Yudafoi anyɔŋ ni ji kpawo lɛ nɔ, aaafee October teŋgbɛ lɛ, no mli lɛ shikpɔŋ lɛ ka shi amaŋfɔ.b (2 Maŋtsɛmɛi 25:8, 9, 22, 25, 26) Bɔni afee ni aye enɛ he odase akɛ enɛ ba mli kɛtsɔ ŋwɛi gbɛŋmɛɛ naa lɛ, Yehowa Nyɔŋmɔ kɛ lamɔ ko ha Nebukadnezar. Ekɔɔ tso ko ni afo afɔ shi ni aku sɛɛ aha eda loo ekwɛ ekoŋŋ yɛ “bei kpawo” ko sɛɛ lɛ he. Lamɔ lɛ na eklɛŋklɛŋ mlibaa beni aku sɛɛ akɛ Nebukadnezar ta emaŋtsɛsɛi nɔ ekoŋŋ yɛ beni eye sɛkɛ yɛ be fioo ko mli lɛ sɛɛ lɛ.—Daniel 4:10-17, 28-36.
14. Mɛni ji sane titri ni yɔɔ Nebukadnezar lamɔ mli?
14 Shi, Nebukadnezar lamɔ lɛ mli sane oti lɛ tsɔɔ akɛ emlibaa titri lɛ kɔɔ Nyɔŋmɔ shikpɔŋ nɔ maŋtsɛyeli, ni aŋmɛ nakai maŋtsɛ Jeŋmaŋnyo lɛ gbɛ koni ‘efo efɔ shi’ lɛ he. Lamɔ lɛ ba naagbee kɛ eyiŋtoo sane ni ajaje nɛɛ: “Bɔni afee ni hiɛkalɔi ale akɛ Mɔ Ni Yɔɔ Ŋwɛi Shɔŋŋ lɛ yɛ hewalɛ yɛ gbɔmɛi amaŋtsɛyeli nɔ, ni eŋɔhaa mɔ fɛɛ mɔ ni esumɔɔ, ni eŋɔɔ mɛi ni ji gbɔmɛi amliwoo etaa nɔ.”—Daniel 4:17.
15. Te fee tɛŋŋ ni Yesu Kristo he basa akɛ “gbɔmɛi amliwoo” lɛ? (Mateo 11:29)
15 Gbɔmɔ kome pɛ he basa yɛ nɔ fɛɛ nɔ mli akɛ aaatsɛ lɛ akɛ “gbɔmɛi amliwoo.” Nyɔŋmɔ Bi koome lɛ jie ehe kpo akɛ nakai eji kɛtsɔ bɔ ni ejɛ esuɔmɔ mli eshi eŋwɛi anunyam mli koni abafɔ lɛ akɛ adesa, akɛ Yesu, ni na yiwalɛ gbele ni akɛbaa mɔ shi fe fɛɛ yɛ Satan dɛŋ lɛ nɔ. (Filipibii 2:3, 5-11) Beni atee lɛ shi kɛtee ŋwɛi anunyam mli lɛ, ehe bahia ni Yesu amɛ kɛyashi Jeŋmaji anɔyeli bei kpawo lɛ aaaba naagbee dani awo lɛ maŋtsɛ akɛ Mesia Maŋtsɛ yɛ adesai anɔ.—Hebribii 10:12, 13.
16. Yɛ mɛɛ gbɛ nɔ Kpojiemɔ wolo lɛ yeɔ ebuaa Kristofoi koni amɛbu be mli ni bei kpawo lɛ baa naagbee lɛ?
16 Shi te fee tɛŋŋ ni Yehowa Odasefoi banu bei kpawo lɛ sɛɛkɛlɛ shishi hu? Biblia lɛ jieɔ lɛ kpo akɛ “be kɛ bei kɛ be fa” aloo bei etɛ kɛ fa, feɔ gbii 1,260. (Kpojiemɔ 12:6, 14) No hewɔ lɛ, kɛ akɛ nakai yibɔ lɛ bɔ he enyɔ aloo bei kpawo lɛ, ebaafee gbii 2,520. Yɛ gbalɛ gbɛtsɔɔmɔ ni ji “gbi kome atsɔ afi” lɛ naa lɛ, bei kpawo lɛ baafee afii 2,520. (4 Mose 14:34; Ezekiel 4:6) Yɛ nɛkɛ akɔntaabuu nɛɛ hewɔ lɛ, Jeŋmaji Abei, ni je shishi yɛ October 607 D.Ŋ.B. lɛ ba naagbee afii 2,520 sɛɛ, yɛ October 1914.
17. Mɛɛ miishɛɛ adafitswaa be bashɛ akɛ aha ale yɛ 1914?
17 October 1914 mli ni Yehowa Nyɔŋmɔ kɛ esuɔmɔ Bi, Nuŋtsɔ Yesu Kristo ta maŋtsɛsɛi nɔ yɛ ŋwɛi Maŋtsɛyeli lɛ mli. Yɛ naagbee lɛ, Kpojiemɔ mli ninaa ni Kristofonyo bɔfo Yohane na lɛ je shishi ebafee nɔ ni eba mli diɛŋtsɛ ni agbɛnɛ abaanyɛ atswa adafi lɛ akɛ: “Je nɛŋ maŋtsɛyeli lɛ etsɔ wɔ-Nuŋtsɔ [Yehowa] lɛ kɛ e-Kristo (mɔ ni efɔ lɛ mu lɛ) nɔ, ni [Yehowa] eeeye maŋtsɛ kɛaatee naanɔi anaanɔ.” (Kpojiemɔ 1:10; 4:1; 11:15) Mɛɛ anunyam sanekpakpa enɛ ji nɛkɛ, ni mɛɛ yiŋtoo hefatalɔi niyelɔi lɛ kɛ nakai Maŋtsɛyeli lɛ shishibii lɛ fɛɛ ena ni amɛaadamɔ nɔ amɛna miishɛɛ ni fe fɛɛ nɛkɛ!—Kpojiemɔ 11:17.
18. Mɛni hewɔ awerɛho shihilɛi eba adesai anɔ kɛjɛ 1914 kɛbaa nɛɛ?
18 Eji anɔkwale akɛ adesai ateŋ mɛi pii nako miishɛɛ kpakpa ko yɛ shikpɔŋ nɔ kɛjɛ 1914. Shi shihilɛ ni yɔɔ mɔbɔ ni yɔɔ shikpɔŋ nɔ lɛ ji odaseyeli ni tsɔɔ akɛ Satan nɔyeli lɛ miihe aba naagbee. Te wɔfeɔ tɛŋŋ wɔleɔ enɛ? Kpojiemɔ wolo lɛ tsɔɔ akɛ nɔ ni baajɛ Nyɔŋmɔ Maŋtsɛyeli lɛ ni aaato ama shi lɛ mli aba ji tawuu ni baaba ŋwɛi. Abaashɛrɛ Satan kɛ edaimonioi lɛ kɛjɛ ŋwɛi ashwie ni atsi amɛnaa awo wɔ shikpɔŋ nɛɛ nɔ he ko. Beni Yohane na nɛkɛ kunimyeli nɛɛ yɛ gbalɛ ninaa mli lɛ, enu gbee wulu ko miikɛɛ: “Nyɛ ŋwɛii kɛ nyɛ mɛi ni nyɛyɔɔ jɛi nyɛnaa tsuijurɔ! Kpoo ha mɛi ni yɔɔ shikpɔŋ lɛ nɔ kɛ ŋshɔ hiɛ lɛ! Ejaakɛ Abonsam lɛ ekpeleke shi kɛba nyɛŋɔɔ, egri naakpa, ni ele akɛ be fioo kɛkɛ eyɔɔ.”—Kpojiemɔ 12:1-12.
19. Mɛni hewɔ anɔkwa Kristofoi daa shi babaoo akɛ amɛyɔɔ wala mli yɛ nɛkɛ be nɛɛ mli lɛ?
19 Jeŋ shihilɛ ni yaa nɔ efiteɔ kɛjɛ 1914 lɛ ji odaseyeli akɛ Yohane ninaa lɛ ebafee nɔ ni eba mli diɛŋtsɛ, ni akɛ adesai fɛɛ ni kpooɔ akɛ amɛaaba amɛhe shi amɛha Nyɔŋmɔ nɔyeli lɛ anaagbee miibɛŋkɛ gbeyeigbeyei. (Luka 21:10, 11, 25-32) Kwɛ miishɛɛ ni enɛ ji akɛ mɔ ko aaahi wala mli yɛ nɛkɛ naakpɛɛ be ni Yehowa Nyɔŋmɔ, Ofe lɛ, baaha bei loo sane ni kɔɔ emaŋtsɛyeli yɛ shikpɔŋ lɛ nɔ lɛ he lɛ aba naagbee kwraa shikome nyɔŋlo nɛɛ mli! Kɛkɛ lɛ abaatsake shikpɔŋ lɛ ni afee lɛ paradeiso fɛfɛo, ni adesai ni ji jalɔi ni amɛje mli lɛ, aaahole amɛnɔ kɛyashɛ emuuyeli mli. Abaatee gbohii lɛ po shi ni aha amɛ hegbɛ koni amɛfee mɛi ni sa kɛha naanɔ wala.—Kpojiemɔ 20:1-3, 12, 13; 21:3-5.
Ŋmɛnɛŋmɛnɛ Beaŋ Hiamɔ Kɛha Tsakemɔ
20. (a) Namɛi bafee Yehowa anɔkwa tsuji yɛ shikpɔŋ nɔ dani 1914 shɛ? (b) Mɛɛ tsakemɔi anɔkwa Kristofoi ni afɔ amɛ mu lɛ sumɔɔ ni amɛfee?
20 Afii 38 sɔŋŋ ni tsɔ 1914 hiɛ lɛ, no mli lɛ Biblia Kaselɔi, taakɛ no mli lɛ atsɛɔ Yehowa Odasefoi lɛ, kɛ amɛnine etsɔɔ nakai afi lɛ akɛ afi mli ni Jeŋmaji Abei lɛ baaba naagbee.c Mɛɛ odaseyeli ni ekaaa enɛ ji akɛ amɛji Yehowa anɔkwa tsuji! Ni kɛlɛ, taakɛ klɛŋklɛŋ afii oha lɛ mli Nyɔŋmɔ tsuji lɛ ji lɛ, amɛ hu amɛna gbɛkpamɔi komɛi ni ejaaa. Akɛ nɔkwɛmɔ nɔ lɛ, amɛkpa gbɛ akɛ abaatee Kristofoi ni afɔ amɛ mu lɛ ayibɔ lɛ fɛɛ shi kɛya ŋwɛi yɛ October 1914. Amɛsusu hu akɛ, tawuu ni je shishi yɛ 1914 lɛ baaya ayagbe naa kɛ Satan je lɛ naagbee.
21. Mɛɛ tsɔsemɔ anɔkwa Kristofoi tsɔ mli yɛ Jeŋ Ta I mli?
21 Shi yɛ be ni sa mli lɛ, Kristofoi ni afɔ amɛ mu lɛ yɔse akɛ nitsumɔ babaoo yɛ kɛha amɛ ni esa akɛ amɛtsu yɛ shikpɔŋ nɔ. Akɛni amɛtee nɔ amɛye odase yɛ faŋŋ yɛ Jeŋ Ta I mli hewɔ lɛ, maŋkwramɔŋ nɔyelɔi lɛ ni Kristendom osɔfoi lɛ tsirɛɔ amɛyisɛɛ lɛ wa amɛyi waa. (Lala 2:1-6) Kɛkɛ ni aye anɔkwa Kristofoi lɛ anitsumɔ lɛ awui diɛŋtsɛ yɛ be mli ni yɛ June 21, 1918 lɛ, amɔmɔ Buu Mɔɔ Asafo lɛ ni yɔɔ U.S. Amerika lɛ hiɛnyiɛlɔi loo onukpai ni awo amɛ tsuŋ afii 20 yɛ apasa naafolɔmɔi ashishi lɛ.
22, 23. (a) Mɛni Kristofoi anɔkwafoi ni afɔ amɛ mu lɛ efee kɛjɛ 1919, ni mɛɛ nibii ni bɔ he enyɔ ejɛ mli eba? (b) Mɛni ji ŋmɛnɛŋmɛnɛ beaŋ mfoniri-feemɔ mli Yerusalem ni yeee anɔkwale lɛ?
22 Jeŋ Ta I ba naagbee trukaa yɛ November 1918. Kɛkɛ ni yɛ March 25, 1919 lɛ, aŋmɛɛ Buu Mɔɔ Asafo lɛ mli onukpai lɛ ahe kɛjɛ amɛtsuŋwoo lɛ mli. Yɛ sɛɛ mli lɛ, aŋmɛɛ amɛhe kwraa akɛ amɛyeee fɔ. Toiŋjɔlɛ be kpalaŋŋ ko ni akpaaa gbɛ je shishi kɛha nakai Kristofoi anɔkwafoi ni afɔ amɛ mu lɛ, ni enɛ tamɔ hegbɛi ni Kristo mra mli kaselɔi lɛ na yɛ be mli ni akɛ mumɔ krɔŋkrɔŋ wo amɛ hewalɛ yɛ afii 33 Ŋ.B. lɛ.—Bɔfoi lɛ Asaji 2:17-21, 41.
23 Kɛjɛ 1919 kɛbaa nɛɛ, akɛ kuu lɛ, Kristofoi anɔkwafoi ni afɔ amɛ mu lɛ kɛ ekaa ebo famɔ ni yɔɔ Yesu wiemɔi ni yɔɔ Mateo 24:14 lɛ toi: “Ni aaashiɛ maŋtsɛyeli lɛ he sanekpakpa nɛɛ atsɔɔ je nɛŋ fɛɛ, ni akɛye jeŋmaji lɛ fɛɛ odase; ni no dani naagbee lɛ aaaba.” Nɔ ni jɛ mli ba ji akɛ, Kristo “tooi krokomɛi” ni miihe ashɛ akpekpei ejwɛ ejɔɔ amɛwala nɔ akɛ amɛkɛ shwɛɛnii ni afɔ amɛ mu lɛ baasɔmɔ Yehowa yɛ ekomefeemɔ mli. (Yohane 10:16) Kristendom, ni yɔɔ esɔfoi lɛ ahewalɛ shishi lolo lɛ yaa nɔ ekpooɔ Maŋtsɛyeli lɛ he sane lɛ. Bɔ ni esumɔɔ adesa maŋkwramɔŋ gbɛjianɔtoo kɛ Yehowa Odasefoi ayi ni ewaa lɛ tamɔ bɔ ni klɛŋklɛŋ afii oha lɛ mli Yudea maŋ lɛ mlibii lɛ fee Kristo kɛ hejɔmɔ lɛ pɛpɛɛpɛ. Taakɛ bɔ ni Yehowa kɛ fɔbuu kojomɔ ba Yerusalem nɔ lɛ, nakai nɔŋŋ ebaafee mfoniri-feemɔ mli Yerusalem ni yeee anɔkwale lɛ, ni ji Kristendom. Ni taakɛ bɔ ni yinɔ ni nu Kristo kojomɔ shɛɛ saji lɛ hi wala mli ni amɛna hiɛkpatamɔ ni egba he sane efɔ shi lɛ, nakai nɔŋŋ hu yinɔ ni yɔɔ ŋmɛnɛ kɛjɛ 1914 lɛ “hoŋ eyaŋ” ja “amanehulu kpeteŋkpele” ni agba afɔ shi lɛ eba mli da.—Mateo 24:21, 22, 34.
24. Kɛ wɔɔje mli kɛyabote Nyɔŋmɔ jeŋ hee lɛ mli lɛ, mɛni esa akɛ wɔfee?
24 Mɛni esa akɛ wɔfee ni wɔje amanehulu kpeteŋkpele lɛ mli ni wɔya nɔ wɔhi shi yɛ Nyɔŋmɔ jeŋ hee lɛ mli? Yɛ bɔ ni gbɛkpamɔi komɛi ni wɔteŋ mɛi komɛi yɔɔ lɛ ejaaa lɛ fɛɛ sɛɛ lɛ, esa akɛ wɔkwɛ jogbaŋŋ koni wɔkawɔ yɛ wɔ Kristofoi anitsumɔi lɛ amli. (Habakuk 2:3; 1 Tesalonikabii 5:1-6) Mɛi ni nyɛɔ amɛkaiɔ nibii ni ba kɛjɛ 1914 lɛ ayifalɛ miishwɛ fioo ko. No hewɔ lɛ, esa akɛ wɔhiɛ ahi wɔhe nɔ; be ko bɛ ni abaafite. (Mateo 24:42) Esa akɛ mɛi fɛɛ ni sumɔɔ ni amɛje Satan yiwalɛ je lɛ naagbee mli lɛ afee nii bianɛ yɛ gbɛ ni tsɔɔ akɛ amɛkɛ wiemɔi ni jɛ mumɔŋ nɛɛ kpaa gbee lɛ nɔ: “Wɔmiidao shi, Yehowa Nyɔŋmɔ, Ofe, . . . ejaakɛ oŋɔ ohewalɛ kpeteŋkpele lɛ, ni oje shishi ooye nɔ akɛ maŋtsɛ.”—Kpojiemɔ 11:17, NW
[Shishigbɛ niŋmai]
a Kwɛmɔ The Watchtower ni ji March 15, 1983 nɔ lɛ baafa 22.
b Kɛha enɛ mlitsɔɔmɔ ni kɔɔ bɔ ni enɛ kadiɔ Jeŋmaji Abei lɛ shishijee he lɛ mlitsɔɔmɔ babaoo lɛ, kwɛmɔ wolo, “Let Your Kingdom Come” ni Watchtower Bible and Tract Society of New York, Inc. fee lɛ yitso 14.
c C.T. Russell ŋma sane ko ni yitso ji “Gentile Times: When Do They End?,” ni akala ni ji yɛ wolo tɛtrɛɛ Bible Examiner lɛ mli yɛ October 1876. Sane lɛ kɛɛ yɛ baafa 27 akɛ: “Bei kpawo lɛ baaba naagbee yɛ A.D. 1914.”
Te Obaaha Hetoo Oha Tɛŋŋ?
◻ Blema Yerusalem damɔ shi kɛha mɛni, shi elaaje nakai shidaamɔ ni woo yɔɔ mli lɛ yɛ mɛɛ gbɛ nɔ?
◻ Mɛɛ be mli Jeŋmaji Abei lɛ je shishi ni eba naagbee, ni mɛni ni agba afɔ shi jɛ mli ba?
◻ Yerusalem ni yeee anɔkwale lɛ hiɛkpatamɔ fee mɛni he mfoniri?
◻ Te wɔfeɔ tɛŋŋ wɔleɔ akɛ amanehulu kpeteŋkpele lɛ ebɛŋkɛ, ni mɛni esa akɛ wɔfee koni wɔje mli?
[Mfoniri ni yɔɔ baafa 16]
Yerusalem kɛ esɔlemɔtsu lɛ laaje shidaamɔ ni woo yɔɔ mli lɛ, shi Nyɔŋmɔ tee nɔ ejɔɔ e-Bi ni ji Mesia lɛ, ni ekɛ lɛ wie tɛ̃ɛ kɛjɛ ŋwɛi po