Kristofoi Ni Kɛ Amɛhe Wooo Maŋ Saji Amli yɛ Je ni La Ekpa Mli Fɛɛ Mli
“Mɔ fɛɛ mɔ ni shwieɔ gbɔmɔ la shi lɛ, gbɔmɔ nɔŋŋ aaashwie lɛ hu ela shi,ejaakɛ Nyɔŋmɔ subaŋ nɔ ebɔ gbɔmɔ yɛ.”—1 MOSE 9:6.NW
1. Mɛni nibii etee nɔ eba je lɛŋ kɛjɛ 1914 ni baa mɛi sheɔ gbeyei?
AFƆSE adesai fe akpekpei oha ala ashwie shi babaoo tamɔ ŋshɔ kɛjɛ 1914. Ní mɛni ji nɔ ni akpaa gbɛ yɛ wɔsɛɛ be mli? Japan maŋtiasei enyɔ ni akpata hiɛ yɛ 1945 lɛ gbe gbɔmɛi 200,000 ni enɛ ha yɛ naagbee lɛ, akɛ tsɔɔmɔ hee ko ba ni jeŋ hewalɛi enyɔ lɛ tsɛɔ lɛ yɛ gbɛ ni ja nɔ akɛ: “MAD” Aloo Sɛkɛyeli, Ni Nɔ Ni Etsɔɔ Ji (Hiɛkpatamɔ Nɔkpɛlɛmɔ Nɔmimaa) . Enɛ Ebatsɔ Nɔ Ko Ni atswa ama hegbeyeiwoo ni jɛ afai enyɔ lɛ fɛɛ nɔ, ni nɔ ni hɔ shishi ji nuklea tawuu nii ni baanyɛ akpata wɔshikpɔŋ nɛɛ fɛɛ hiɛ shii toi abɔ. Ŋshɔ shishi lɛji etere tawuu nii ni yɔɔ gbeyei yɛ ŋshɔi ashishi, ni nyɛsɛɛ nɛɛ po lɛ, ŋwɛiniiaŋ ahegbeyeiwoo lɛ eha oshara lɛ mli elɛɛ. Ahoso nakai hegbeyeiwoo ŋsɛnii lɛ po bianɛ kɛbote eshishitoi amli. Ani gbɛ ko yɛ ni aaanyɛ atsɔ nɔ aje nɛkɛ sɛkɛyeli nɛɛ mli?
2. Mɛni Yesu gba ni kɔɔ nɛkɛ bei nɛɛ ahe, shi eji mɛɛ nɔmimaa kɛba Kristofoi?
2 Hɛɛ, eko yɛ. Shi enɛ jeee nɔ ni jeŋmaji lɛ baahala. Yesu gba yɛ haomɔ shihilɛ ni amɛyɔɔ mli amrɔ nɛɛ lɛ he akɛ: “Ni okadii aaaba hulu kɛ nyɔɔŋtsere kɛ ŋulamii amli, ni jeŋmaji afimɔ lɛ aaaba shikpɔŋ Iɛ nɔ, ni amɛaafee yeyeeye, yɛ ŋshɔ kɛ ŋshɔkei agbɛɛmɔ hewɔ. Ní nɔ aaanyɔnyɔɔ gbɔmɛi anɔ yɛ gbeyei kɛ nibii ni baa je lɛŋ lɛ agbɛkwɛmɔ hewɔ; ejaakɛ aaahoso ŋwɛi hewalɛi lɛ tete.” Yesu kɛ nakai gbalɛi lɛ ba naagbee akɛ Kristofoi ni “saraa be fɛɛ be lɛ baanyɛ aje nii ni baaba nɛɛ fɛɛ mli.”—Luka 21:25, 26, 36.
Wɔkɛ Nyɔŋmɔ Teŋ Toiŋjɔlɛ Sɛɛ Ni Wɔɔdi
3. (a) Jeŋmaji lɛ miitsu nibii ni “je nɛŋ nyɔŋmɔ” lɛ sumɔɔ lɛ he nii yɛ mɛɛ gbɛ nɔ? (b) Yehowa baaha sane lɛ aba naagbee yɛ mɛɛ gbɛ nɔ?
3 Jeŋmaji lɛ, titiri lɛ, mɛi ni kɛ nuklea tawuu nii ewula amɛhe lɛ kɛ amɛhe ewo jeŋ nɔyeli he akaŋshii mli ni nɔ ni baanyɛ ajɛ enɛ mli aba ji je lɛ hiɛkpatamɔ. Enɛ tsuɔ “je nɛɛ nyɔŋmɔ” lɛ suɔmɔnaa nii ahe nii. Jeŋmaji lɛ “ete shi edamɔ shi, ni lumɛi lɛ hu efee ekome amɛtee Yehowa kɛ mɔ ni efɔ lɛ mu lɛ [Kristo]” ni awo lɛ maŋtsɛ yɛ ŋwɛi “lɛ yinɔ ajina.” Kɛ Yehowa kɛ famɔ lɛ ha lɛ, Kristo hu kɛ dadetso baajwara nakai jeŋmaji lɛ. Kɛkɛ lɛ shiwoo nɛɛ baaba mli akɛ: “Etsɛŋ ni toiŋjɔlɛ Nyɔŋmɔ lɛ aaanaanaa Satan nɔ kwraa yɛ nyɛnaji ashishi.”—2 Korintobii 4:4; Lala 2:2, 6-9; Romabii 16:20.
4. Mɛɛ gbɛ nɔ wɔɔtsɔ wɔtiu wɔkɛ Nyɔŋmɔ teŋ toiŋjɔlɛ sɛɛ? (1 Petro 3:11)
4 Yɛ wɔgbɛfaŋ lɛ, wɔbaasumɔ ni wɔtiu wɔkɛ nakai Nyɔŋmɔ lɛ teŋ toiŋjɔlɛ sɛɛgbɛ. Te wɔɔfee tɛŋŋ wɔfee nakai hu? Nɔ kome ji akɛ, esa akɛ wɔsumɔ akɛ wɔɔna Nyɔŋmɔ jwɛŋmɔ yɛ krɔŋkrɔŋ ni adesa, ewala kɛ lá ni jara wa ni hoɔ yɛ wɔfaji wuji kɛ bibii amli lɛ ji lɛ he.
5. Mɛɛ nɔkwɛmɔ nii tsɔɔ akɛ Yehowa tɔɔ lá ni afɔseɔ ashwieɔ shi yaka lɛ he owele?
5 Yehowa ji adesa kɛ lá ni yɔɔ naakpɛɛ ni tereɔ niyenii kɛyahaa adesa gbɔmɔtso lɛ ni yɛ no hewɔ Iɛ ehaa wɔhiɔ wala mli lɛ Bɔlɔ. Nyɔŋmɔ etɔko eyiŋ dã akɛ afɔse adesa lá ashwie shi yaka. Yɛ be mli ni Kain ye awui yɛ klɛŋklɛŋ be mli kwraa lɛ, Yehowa jaje akɛ Habel lá lɛ miibolo kɛmiitsɛ oweletɔɔ. Yɛ sɛɛ mli lɛ, Kain seshibii lɛ ateŋ mɔ ko, Lamek, batsɔ gbɔmɔgbelɔ ni ejaje yɛ lalafoo mli akɛ kɛ́ agbe lɛ lɛ, atɔ lá yi sɔ ni aye nɛɛ he owele. Yɛ be ni sa mli lɛ, awuyeli bayi je ni ekpɔtɔ lɛ mli obɔ. Yehowa kɛ Nu Afua lɛ ba koni ebakpata klɛŋklɛŋ adesai aje lɛ hiɛ. Noa ni sumɔɔ toiŋjɔlɛ, ni egbɛi lɛ shishi ji “Hejɔɔmɔ” lɛ kɛ eweku lɛ pɛ na wala.—1 Mose 4:8-12, 23, 24; 6:13; 7:1.
6. Mɛni ji Nyɔŋmɔ mla ni kɔɔ lá he, ni nɛkɛ mla nɛɛ fimɔɔ namɛi?
6 Kɛkɛ ni Yehowa kɛɛ Noa nɔ“ni ji E-suɔmɔnaa nii ni ejaje ni kɔɔ lá he. Ni ekɛ nɔ ni ewie nɛɛ mu naa akɛ: “Mɔ ni shwieɔ gbɔmɔ lá shi lɛ, gbɔmɔ nɔŋŋ aaashwie lɛ hu ela shi; ejaakɛ Nyɔŋmɔ subaŋ nɔ ebɔ gbɔmɔ yɛ.” (1 Mose 9:3-6) Adesai fɛɛ ni yɔɔ wala mli ŋmɛnɛ lɛ jɛ Noa mli; no hewɔ lɛ, nɛkɛ Nyɔŋmɔ mla ni maa bulɛ kɛha wala nɔ mi lɛ ka adesai fɛɛ ni sumɔɔ ni amɛna Nyɔŋmɔ nɔkpɛlɛmɔ lɛ anɔ. Kitai Nyɔŋma lɛ mli nɔ ni ji ekpaa lɛ hu jaje akɛ, “Kaagbe gbɔmɔ.” La yi sɔ ni ayeɔ lɛ biɔ ehe nifeemɔ kɛ najiaŋtoo ni sa.—2 Mose 20:13; 21:12; 5 Mose 21:1-9; Hebribii 10:30.
7. (a) Mɛni hewɔ eja gbɛ akɛ Yehowa aaafa Israel ni amɛya ta lɛ? (b) Mɛɛ tawuu Kristofoi kɛ amɛhe ewo mli ŋmɛnɛ lɛ?
7 Akɛni agu lá ni aaafɔse ashwie shi lɛ yɛ faŋŋ mli hewɔ lɛ, mɛni hewɔ Yehowa Nyɔŋmɔ ŋmɛ gbɛ ni efa po akɛ Israel maŋ lɛ kɛ amɛhe awo tawuu mli lɛ? Esa akɛ wɔkai akɛ enɛ ji ta krɔŋkrɔŋ ni Yehowa Nyɔŋmɔ, shikpɔŋ lɛ fɛɛ nɔ Kojolɔ lɛ tsɔ nɔ ni eha akpata jeŋmaji ni jaa daimonioi lɛ ahiɛ kɛjɛ nɔ. Akɛ nɔkwɛmɔ nɔ lɛ, Kanaanbii lɛ ji gbɔi ni baahi Shiwoo Shikpɔŋ lɛ nɔ be kuku, ni daimonioi ajamɔ sɛɛ amɛdiɔ ni amɛjeŋba gbonyo lɛ baafee oshara aha Nyɔŋmɔ webii ni yɔɔ krɔŋkrɔŋ lɛ, No hewɔ lɛ, Yehowa ha shikpɔŋ lɛ “shwe” nakai adesai ni amɛfite lɛ kɛjɛ amɛshikpɔŋkuku lɛ nɔ, ekɛ teokrase tawuu tsu nii ni ekɛfee nakai. (3 Mose 18:1-30; 5 Mose 7:1-6, 24) Enɛ haa mumɔŋ ta ni Kristofoi wuɔ ŋmɛnɛ lɛ feɔ nɔ ni ja gbɛ.—2 Korintobii 10:3-5; Efesobii 6:11-18.
8. Mɛni tsɔɔ akɛ Nyɔŋmɔ ekpɛlɛɛɛ mɛi ni efeko nɔ ko lɛ alá ni afɔseɔ ashwieɔ shi yaka lɛ nɔ?
8 Shi, Yehowa ekpɛlɛɛɛ lá ni aaafɔse ashwie shi kɛkɛ ni ajieee mli lɛ nɔ. No hewɔ lɛ, aŋma yɛ Yuda maŋtsɛ ko he akɛ: “Ni asaŋ Manase fɔse mɛi ni efeko nɔ ko lɛ ala eshwie shi babaoo diɛŋtsɛ, kɛyashi beyinɔ ni Yerusalem he fɛɛ he yi tɔ.” Eyɛ mli akɛ yɛ sɛɛ mli lɛ, Manase shwa ehe ni eba ehe shi yɛ Yehowa hiɛ moŋ, shi nakai lá yi sɔ ni eye lɛ hi lɛ kɛ maŋtsɛmɛi ni nyiɛ esɛɛ ba lɛ anɔ. Manase nabi ni sheɔ Nyɔŋmɔ gbeyei, Maŋtsɛ Yosia, bɔ mɔdɛŋ etsu nii jogbaŋŋ koni ekɛtsuu shikpɔŋ lɛ he ni eto anɔkwale jamɔ ema shi. Shi enyɛɛɛ ejie lá yi sɔ ni aye lɛ. Yɛ Yosia bi Yehoiakim nɔyeli mli lɛ, Yehowa fee he nɔ ko ni Nebukadnezar te shi ewɔ Yuda, koni etsu kojomɔ he nii eshi nakai maŋ lɛ. “Shi Yehowa famɔ naa kɛkɛ ni enɛ ba Yuda nɔ nɛɛ, koni ejie amɛ kɛjɛ ehiɛ eshwie yɛ Manase eshai ni efee lɛ fɛɛ hewɔ, kɛ mɛi ni efeko nɔ ko lɛ ala ni efɔse eshwie shi lɛ hewɔ; ejaakɛ ewo Yerusalem obɔ kɛ mɛi ni efeko nɔ ko lɛ alá, ni Yehowa sumɔɔɔ akɛ eeeŋɔ-fa.”—2 Maŋtsɛmɛi 21:16; 24:1-4; 2 Kronika 33:10-13.
Tɛ Ni Afo Afɔ Shi aha Kristofoi
9. Mɛɛ tɛ ni Yesu efo efɔ shi ni kɔɔ lá ni afɔseɔ ashwieɔ shi lɛ he ekɛma Kristofoi ahiɛ?
9 Wɔbaakpa gbɛ akɛ, Yesu, ni ji Kristojamɔ Shishitolɔ lɛ baafo tɛ ko afɔ shi aha Kristofoi, yɛ lá ni afɔseɔ ashwieɔ shi lɛ hewɔ. Ani efee nakai? Ojogbaŋŋ, yɛ be mli ni eto egbele lɛ Kaimɔ lɛ sɛɛ pɛ kɛkɛ ni Yesu kwɛ koni ekaselɔi lɛ ana klantei enyɔ. Kɛha mɛɛ yiŋtoo? Koni ekɛto Shishitoo taomɔ nii ni he hiaa ema shi, nɔ ni ehe baahia ni Kristofoi fɛɛ eye nɔ. Be mli ni asraafoi akuu lɛ ba koni amɛbamɔ Yesu yɛ Getsemane lɛ, Petro ni kɛ henumɔ tsuɔ nii oya lɛ fɔ eklante, ni efo Malko, ni ji Yudafoi osɔfonukpa lɛ nyɔŋ lɛ ninejurɔ toi. Ani ejeee nɔ ni sa jogbaŋŋ akɛ aaawu aha Nyɔŋmɔ Bi lɛ? Yesu susuuu he nakai. Etsa tsulɔ lɛ toi lɛ ni ekai Petro akɛ e-Ŋwɛitsɛ lɛ baanyɛ atsu ŋwɛi bɔfoi asafoi 12 kɛba koni amɛbaye amɛbua lɛ Yesu. Yesu jaje shishitoo taomɔ nii lɛ: “Mɛi fɛɛ ni kɔɔ klante lɛ, klante nɔŋŋ akɛaakpata amɛhiɛ.”—Mateo 26:51-53; Luka 22:36, 38, 49-51; Yohane 18: 10, 11.
10. (a) Mɛɛ shishitoo mla ko ni he hiaa waa akɛma shi yɛ Yohane 17:14, 16 kɛ 18:36? (b) Mɛɛ nifeemɔ yiwalaheremɔ jɛ mli ba ha klɛŋklɛŋ afi oha lɛ mli Kristofoi lɛ?
10 Yɛ sɛɛ mli lɛ, Kristofoi ni hi shi yɛ klɛŋklɛŋ afii oha lɛ mli lɛ baakai Yesu sɔlemɔ ni mli wa ni ekɛha Yehowa, ni ewie ekaselɔi lɛ ahe nɛkɛ yɛ mli lɛ: “Amɛjɛɛɛ je lɛ mli, taakɛ bɔ ni mi hu mijɛɛɛ je lɛ mli lɛ.” Amɛbaakai Yesu hetoo ni ekɛtsɔɔ esane mli eha Pontio Pilato lɛ: “Mimaŋtsɛyeli lɛ jɛɛɛ je nɛŋ; mimaŋtsɛyeli lɛ jɛ je nɛɛ mli jikulɛ, misɔɔlɔi lɛ aaapele he, koni akaŋɔ mi aha Yudafoi lɛ; shi enɛ lɛ, mimaŋtsɛyeli lɛ jɛɛɛ biɛ.” (Yohane 17:14, 16; 18:36) Yɛ nakai gbii lɛ amli lɛ, Yudafoi akui sɔrɔtoi kɛ amɛhe miiwu ta, kɛtsɔ naabu kɛ agbɛnɛ lá ni amɛfɔseɔ amɛshwieɔ shi lɛ fɛɛ nɔ. Shi Yesu kaselɔi lɛ kɛ amɛhe wooo nakai maŋ hiɛ atuatsemɔ he tafaai lɛ amli. Amɛmɛ yɛ Yerusalem afii 30. Kɛkɛ ni amɛbo Yesu gbalɛ okɛdi lɛ toi akɛ “ajo foi aya gɔji lɛ anɔ” lɛ. Nɔ ni jɛ amɛshidaamɔ ni haaa amɛkɛ amɛhe awo maŋ saji amli kɛ amɛfoijee lɛ mli ba ji amɛyiwalaheremɔ—Mateo 24:15, 16.
11, 12. (a) Mɛɛ yiŋkpɛɛ ehɛ bahia ni Kornelio kɛ Sergio Paulo afee yɛ be mli ni amɛbatsɔmɔ heyelilɔi lɛ? (b) Nɛgbɛ amɛbaana yelikɛbuamɔ yɛ koni amɛkpɛ amɛyiŋ yɛ gbɛ ni ja nɔ? (d) Mɛni ji nɔ ni enɛ tsɔɔ kɛhaa wɔ ŋmɛnɛ?
11 Mɛi komɛi baabi akɛ, ‘Ni Kornelio, asraafoi lɛ anɔ asafoiatsɛ lɛ kɛ Sergio Paulo, amralo lɛ ni yɔɔ Kipro ni asraafoi fiɔ esɛɛ lɛ hu? Ani nɛkɛ hii nɛɛ jeee mɛi ni kɛ amɛhe ebɔ asraafoi anitsumɔ he?’ Hɛɛ, yɛ be mli ni amɛkpɛlɛ Kristofoi asane lɛ nɔ lɛ, Shi Ŋmalɛi lɛ ekɛɛɛ wɔ nɔ ni Kornelio kɛ mɛi krokomɛi lɛ fee yɛ amɛtsakemɔ lɛ sɛɛ. Ŋwanejee ko bɛ he akɛ Sergio Paulo ni eji nuu hiɛshikalɔ “ni ehe jɔ̃ ehe yɛ Nuŋtsɔ [Yehowa] tsɔɔmɔ lɛ hewɔ” lɛ baapɛi eheloo naa nitsumɔ kɛ shidaamɔ lɛ mli ekwɛ yɛ hemɔkɛyeli hee ni ena nɛɛ hewɔ koni ekpɛ eyiŋ yɛ gbɛ ni ja nɔ. Eka shi faŋŋ akɛ Kornelio hu baafee nakai. (Bɔfoi lɛ Asaji 10:1, 2, 44-48; 13:7, 12) Nɔ ko bɛ ni aŋma afɔ shi akɛ kaselɔi lɛ kɛɛ amɛ nɔ ni esa akɛ amɛfee. Amɛbaanyɛ amɛna enɛ kɛjɛ Nyɔŋmɔ Wiemɔ lɛ ni amɛ diɛŋtsɛ amɛaakase lɛ mli—Yesaia 2:2-4; Mika 4:3.
12 Nakai nɔŋŋ hu ŋmɛnɛ, esaaa akɛ Kristofoi tsɔɔ mɛi krokomɛi shidaamɔ ni esa akɛ amɛkɔ yɛ saji komɛi ni kɔɔ maŋ saji ni Kristofoi kɛ amɛhe wooo mli lɛ he. Esa akɛ mɔ fɛɛ mɔ ajɛ ehenilee mli akpɛ eyiŋ yɛ eshishinumɔ ni eyɔɔ yɛ Biblia mli Shishitoo mlai ahe lɛ naa.—Galatabii 6:4, 5.
YƐ Ŋmɛnɛŋmɛnɛ Beaŋ
13. Mɛni ba Biblia Kaselɔi anɔ yɛ be mli ni amɛbɔɔ mɔdɛŋ ni amɛkwa lá yi sɔ ni amɛaaye yɛ Jeŋ Ta I mli Iɛ?
13 Afi 1914 ji be mli ni je muu fɛɛ ta pue. Jeŋmaji lɛ kɛ amɛ hewalɛ kɛ amɛnibii fɛɛ ni amɛgbɔmɛi fata he wo tawuu lɛ mli. Biblia Kaselɔi, taakɛ atsɛɔ Yehowa Odasefoi yɛ nakai be lɛ mli lɛ ateŋ mɛi pii bɔ mɔdɛŋ diɛŋtsɛ koni amɛkwa lá yi sɔ ni amɛaaye. Awa amɛyi waa, taakɛ bɔ ni Yesu kɛɛ akɛ ebaaba mli lɛ.—Yohane 15:17-20.
14, 15. (a) Yehowa kɛ gbɛtsɔɔmɔ ha yɛ Jeŋ Ta II mli yɛ mɛɛ gbɛ nɔ? (b) Mɛɛ shidaamɔ ni mli ka shi faŋŋ Yehowa Odasefoi ehala agbɛnɛ? (d) Enɛ yɛ sɔrɔto yɛ nɔ ni je lɛŋ jamɔi lɛ feɔ lɛ ahe yɛ mɛɛ gbɛ nɔ?
14 Beni jeŋ ta lɛ fɛ ekoŋŋ yɛ 1939 lɛ, Yehowa kɛ gbɛtsɔɔmɔ ni mli ka shi faŋŋ ha etsuji. Beni ta nɛɛ fɛ́ sɛɛ nyɔji enyɔ pɛ kɛkɛ ni nɛkɛ gbɛtsɔɔmɔ nɛɛ ba, ni akɛ sane ni abaatsɔ Biblia lɛ nɔ akase ni egbɛi ji ‘Maŋ Saji Ní Akɛ He Wooo Mli’ lɛ ba yɛ November 1, 1939 Blɔfo Buu-Mɔɔ lɛ mli. Eba naagbee kɛ nɛkɛ wiemɔ nɛɛ: “Mɛi fɛɛ ni yɔɔ Nuŋtsɔ lɛ masɛi lɛ adamɔ shi akɛ mɛi ni kɛ amɛhe wooo jeŋmaji ni kɛ amɛhe wuɔ lɛ asaji amli, ni amɛbaafee mɛi ni amɛtuu amɛ nɔ fɛɛ nɔ kɛ amɛhe kwraa amɛha TEOKRAT kpeteŋkpele lɛ kɛ e-Maŋtsɛ lɛ.
15 Mɛni jɛ mli ba? Ákɛ je muu fɛɛ nyɛmifeemɔ lɛ, Yehowa Odasefoi kpoo akɛ amɛaafɔse mɛi ni efeko amɛ nɔ ko lɛ alá amɛshwie shi, ni amɛnyɛmimɛi ni yɔɔ maji krokomɛi anɔ lɛ hu fata he. Yɛ be mli ni Katolekbii, Protestantbii, Budhabii, kɛ mɛi krokomɛi miigbegbee amɛhe lɛ, Yesu anɔkwale kaselɔi miibo kita hee lɛ toi: “Taakɛ bɔ ni misumɔɔ nyɛ lɛ, nakai nyɛ hu nyɛsumɔa nyɛhe.”—Yohane 13:34.
16. (a) Yehowa Odasefoi jie amɛhe kpo akɛ maŋ bii ni ja yɛ mɛɛ gbɛ nɔ? (b) Mɛɛ gbɛ nɔ Odasefoi lɛ tee nɔ amɛkɛ Nyɔŋmɔ nii ha Nyɔŋmɔ, ni yɛ bei komɛi amli lɛ mɛni jɛɔ mli baa?
16 Nɛkɛ Kristofoi nɛɛ tee nɔ amɛkɛ Kaisare nii ha Kaisare. Amɛbo maŋ lɛ mlai atoi akɛ maŋ lɛ mli bii ni ja. (Mateo 22:17-21; Romabii 13:1-7) Shi nɔ ni he hiaa fe fɛɛ lɛ, amɛkɛ nibii ni ji Nyɔŋmɔ nii lɛ ha lɛ, ni nɔ ni fata enɛ he ji amɛwala ni amɛjɔɔ nɔ kɛ Kristofoi asɔɔmɔ. No hewɔ lɛ, beni Kaisare bi ni akɛ Nyɔŋmɔ nibii aha lɛ lɛ, amɛtsu nii koni akɛ shishitoo mlai ni ajaje yɛ Bɔfoi lɛ Asaji 4:19 kɛ 5:29 lɛ akpa gbee. Kɛji akɛ sane ni ka shi lɛ ji lá ni aaafɔse ashwie shi, asraafoi anitsumɔ ni kɔɔɔ tawuu he, sɔɔmɔ yɛ gbɛ kroko nɔ aloo amaga ko ŋamɔ tamɔ maŋ aflaŋaa nɛkɛ lɛ, Kristofoi anɔkwafoi lɛ kɔɔ shidaamɔ ni tsɔɔ akɛ teŋgbɛ he ko ni aaadamɔ bɛ. Saji nɛɛ ekomɛi yɛ ni awaa amɛyi yɛ he yɛ shidaamɔ ni tamɔ nɛkɛ ni amɛkɔ lɛ hewɔ—Mateo 24:9; Kpojiemɔ 2:10.
Amɛŋmɛɛ Saji Ahe Koni Amɛkɛsaa
17. (a) Taakɛ wolo ko tsɔɔ lɛ, mɛni ji nɔ ni Nazibii lɛ fee Yehowa Odasefoi? (b) Bɔni afee ni amɛdamɔ mpoatswaa lɛ naa lɛ, ebasoro Yehowa Odasefoi yɛ mɛi krokomɛi ahe yɛ mɛɛ gbɛ nɔ?
17 Wolo ko ni aŋma nyɛsɛɛ nɛɛ ni egbɛi ji Of Gods and Men lɛ jaje akɛ Yehowa Odasefoi ji jamɔ kuu ko ni na nɔ “waa fe fɛɛ” yɛ Hitler Nɔyeli lɛ mli. Yehowa Odasefoi eŋmɛɛɛ saji ahe koni amɛkɛsaa Jamɔi krokomɛi ni yɔɔ Germane lɛ nyiɛ amɛtawuu mli osɔfoi lɛ asɛɛ ni amɛkɛ jamɔ sɔmɔ German maŋ lɛ ni amɛnine shɛ maŋkwramɔŋ kooloo lɛ “okadi” lɛ nɔ “yɛ amɛninejurɔ aloo amɛhiɛtsei anɔ.” (Kpojiemɔ 13:16) Mɛnɛɛmɛi kɛ sɛɛfimɔ ha German maŋkwramɔŋ gbɛjianɔtoo lɛ ni amɛha ana amɛshidaamɔ lɛ yɛ faŋŋ mli kɛtsɔ Hitler ni amɛjie eyi kɛ amɛ aflaŋaa ni ji swastika lɛ ni amɛŋa lɛ nɔ.
18. (a) Mɛni ni aŋma afɔ shi tsɔɔ kɛji akɛ Yehowa Odasefoi ji ‘gbɔmɛi ni kɛ amɛhe wooo maŋkwramɔŋ saji amli’? (b) Esa akɛ nɛkɛ yinɔsane mli sane nɛɛ ana wɔ aŋkroaŋkroi anɔ hewalɛ ŋmɛnɛ yɛ mɛɛ gbɛ nɔ?
18 Mɛni ji shidaamɔ ni anɔkwale Kristofoi kɔ yɛ nakai be lɛ mli? Wolo ni wɔtsi ta yɛ yiteŋgbɛ nɛɛ jaje akɛ: “Yehowa Odasefoi pɛ te shi wo nakai nɔyeli lɛ. Amɛkɛ amɛ nɔ fɛɛ nɔ wo shitee-kɛ-woo nɛɛ mli ni nɔ ni jɛ mli ba ji akɛ awo amɛteŋ mɛi fa kpotoo tsuŋ ni agbe amɛyibɔ lɛ mlijaa ejwɛ mli ekome . . . Esoro amɛ kwraa [ye jamɔi krokomɛi lɛ ahe], amɛjɛɛɛ je lɛŋ kɛ shishinumɔ akɛ amɛtaooo ni heloo naa je lɛ akpɛlɛ amɛ nɔ aloo awo amɛ nyɔmɔ ni asaŋ amɛbuuu amɛhe akɛ amɛji emli bii. ‘Amɛkɛ amɛhe wooo’ maŋkwramɔŋ ‘saji amli,’ ejaakɛ amɛji je kroko mli bii—Nyɔŋmɔ nɔ lɛ. . . . Amɛtaooo akɛ amɛaaŋmɛɛ saji ahe. . . . Ní amɛaasɔmɔ yɛ asraafoi akuu ko mli, ni amɛfɔ oshiki, aloo ni amɛaanya Hitler he ni baatsɔɔ akɛ amɛmiikpɛlɛ nɔ ni je nɛɛ kɛɔ lɛ nɔ akɛ no yeɔ nɔ ni Nyɔŋmɔ kɛɔ lɛ nɔ.” Bɔ ni Yehowa Odasefoi diɔ toiŋjɔlɛ sɛɛ ni amɛfeee basabasa lɛ hu ji nɔ ko ni ayoo yɛ gboklɛfoi aŋsaraŋ sɔrɔtoi ni amɛyɔɔ lɛ. Yɛ mɛɛ gbɛ nɔ? No ji akɛ “Odasefoi lɛ pɛ ji mɛi ni aŋmɛɔ amɛ gbɛ koni amɛkɛ asooyi ni naa ba waa lɛ aku S. S. (bulɔi) lɛ ayi ni amɛkashɛ amɛtsɛŋ, ejaakɛ amɛ pɛ ji mɛi ni amɛheɔ amɛ amɛyeɔ akɛ amɛgbeŋ amɛ.”
19. Yehowa Odasefoi enyiɛ Yesu nɔkwɛmɔ nɔ ni ekaaa lɛ sɛɛ yɛ mɛɛ gbɛ nɔ, ni mɛni ejɛ mli eba?
19 Yehowa Odasefoi batsɔmɔ Kristofoi ahe ni akɛwooo maŋsaji amli he nɔkwɛmɔ nii ni ekaaa yɛ jeŋ ta ni ji enyɔ he Iɛ mli. Ni amɛkɛ ekaa nyiɛ Yesu nɔkwɛmɔ nɔ lɛ Sɛɛ yɛ jeŋ fɛɛ ejaakɛ “amɛjɛɛɛ je lɛ mli”; amɛyɛ je ni eye lá yi sɔ nɛɛ nɔ kunim taakɛ Kristo fee lɛ.—Yohane 17:16; 16:33; 1 Yohane 5:4.
Abobaa He Ni Aaatao Kɛaajɛ La Yi Sɔ Ni Aye Lɛ Mli
20. (a) Mɛni hewɔ ehe hiaa waa akɛ aaajo foi kɛaajɛ epasa jamɔ mli lɛ? (b) Nɛgbɛ pɛ abaanyɛ ana anɔkwale abobaa he lɛ yɛ ŋmɛnɛ?
20 Nyɔŋmɔjamɔ gbɛjianɔtoi sɔrɔtoi eha yinɔsane baafai amli atsu hɛŋŋ kɛtsɔ lá ni efeko nɔ ko fɔŋ ko lɛ ni amɛfɔse amɛshwie shi yɛ amɛtai “krɔŋkrɔŋi” lɛ kɛ amɛ niseniianii ni amɛfeɔ mɛi lɛ anɔ lɛ nɔ. Amɛkɛ nɔyelɔi yiwalɔi ni lá he kumai yeɔ amɛ ebote kpaŋmɔi amli. Beni nɔyelɔi yiwalɔi nɛɛ shɛrɛ Yehowa Odasefoi amɛwo gboklɛfoi atsui kɛ ŋsaraŋ sɔrɔtoi amli ni amɛteŋ mɛi pii gboi lɛ, amɛkpɛlɛ nɔ, ni amɛjɛ amɛsuɔmɔ mli amɛfi (hiɛnyiɛlɔi) ni gbe Odasefoi lɛ kɛtsɔ tui ni atswia amɛ kɛ amɛyi ni afolɔ lɛ asɛɛ. Nɛkɛ jamɔ mli gbɛjianɔtoi nɛɛ nyɛŋ amɛjo Yehowa jalɛ kojomɔ Iɛ naa foi. Eshashaoŋ shi. Ni asaŋ esaaa akɛ mɔ ni sumɔɔ jalɛ nifeemɔ lɛ ashashao shi yɛ apasa jamɔ—Babilon kpeteŋkpele lɛ ni lá ekpa ehe kpɔtɔɔ—lɛ mli ni eeeje, ni eyatao abobaa he yɛ Nyɔŋmɔ gbɛjianɔtoo lɛ mli lɛ mli—Kpojiemɔ 18:2, 4, 21, 24 .
21. Abobaa maji ni Nyɔŋmɔ to he gbɛjianɔ lɛ feɔ mɛni he mfoniri?
21 Dani wɔteŋ mɛi pii aaakase Nyɔŋmɔ Wiemɔ lɛ, no mli lɛ ekolɛ wɔfɔse adesa la wɔshwie shi aloo wɔji jamɔ loo maŋkwramɔŋ gbɛjianɔtoi ni amɛyɛ la yi sɔ lɛ amli bii. Yɛ enɛ mli lɛ, belɛ abaanyɛ akɛwɔ ato mɔ ni enine eyakpa yɛ mɔ ko nɔ yɛ Israel lɛ he. Ebaanyɛ ejo foi kɛya mɔji sɔrɔtoi ekpaa ni eeenyɛ ena abobaa he yɛ jɛmɛ lɛ eko mli, koni ye naagbee lɛ, aha eye ehe kwraa kɛtsɔ Israel osɔfonukpa lɛ gbele nɔ. Ŋmɛnɛ, nɔ ni enɛ tsɔɔ ji akɛ ni mɔ aaakpɛlɛ sɛɛnamɔi ni jɛɔ Nyɔŋmɔ Osɔfonukpa Yesu Kristo sɔɔmɔ kɛ ekãa lɛ mli baa lɛ nɔ, ni ehi shi hu yɛ enɛ shishi. Kɛ́ wɔkɛ Nyɔŋmɔ webii ni efɔ amɛ mu lɛ fee ekome ni wɔhi shi yɛ jɛmɛ lɛ, wɔbaaje mli, yɛ be mli ni ŋmɛnɛŋmɛnɛ beaŋ “Lá he oweletɔlɔ,” Kristo Yesu kɛ Nyɔŋmɔ kojomɔ baa mɛi ni eye lá yi sɔ lɛ anɔ lɛ. Esɔ akɛ “asafo babaoo” lɛ ni joɔ foi bianɛ kɛyaa Nyɔŋmɔ gbɛjianɔtoo lɛ mli lɛ ahi nakai abobaa he lɛ kɛyashi be mli ni Kristo ákɛ Osɔfonukpa lɛ ‘gboɔ’ kɛ shishinumɔ akɛ egbe esɔɔmɔ nitsumɔ lɛ naa lɛ.—4 Mose 35:6-8, 15, 22-25; 1 Korintobii 15:22-26; Kpojiemɔ 7: 9, 14.
22. Yɛ mɛɛ gbɛ nɔ esoro Jeŋmaji Ekomefeemɔ lɛ mli maji lɛ yɛ Nyɔŋmɔ maŋ krɔŋkrɔŋ lɛ he kɛ akɛ amɛ to Yesaia 2:4 he lɛ?
22 Wɔbaanyɛ wɔkane wiemɔi ni nyiɛ sɛɛ nɛɛ ni damɔ Yesaia 2:4 (King James Version) nɔ lɛ yɛ Jeŋmaji Ekomefeemɔ ni yɔɔ New York, U.S. Amerika lɛ hiɛgbɛ gbogbo lɛ he lɛ: “Ni amɛkɛ amɛklante aaasɔ kɔi ni amɛkɛ amɛkplɔi hu aaasɔ adedai. Jeŋmaŋ ko woŋ klante nɔ shiŋŋ jeŋmaŋ ko, ni amɛkaseŋ tawuu dɔŋŋ!” Shi namɛi feɔ nii yɛ nakai wiemɔi lɛ kɛ gbeekpamɔ naa ŋmɛnɛ? Jeŋmaji ekomefeemɔ lɛ mli bii lɛ ateŋ mɔ ko efeee nakai. Mɛi ni feɔ nakai pɛ ji “maŋ” ni diɔ toiŋjɔlɛ sɛɛ ni amɛji Yehowa Odasefoi ni amɛyibɔ fe akpekpei etɛ bianɛ ni amɛjie amɛhe kpo amɛtsɔɔ yɛ faŋŋ mli bɔ ni ahiɔ shi akɛ Kristofoi ni kɛ amɛhe wooo maŋsaji amli yɛ je ni lá ekpa mli fɛɛ nɛɛ mli lɛ.a
[Shishigbɛ niŋmai]
a Ajie kɛjɛ September 1, 1986 Watchtower lɛ mli.
Sanebimɔi ni Akɛtiɔ Mli
◻ Mɛɛ gbɛ nɔ wɔɔtsɔ wɔtiu wɔkɛ Nyɔŋmɔ teɔ toiŋjɔlɛ?
◻ Te Yehowa buɔ lá shi ni ashwieɔ yaka lɛ tɛŋŋ?
◻ Mɛni ji maŋsaji ni Kristofoi kɛ amɛhe wooo mli lɛ shishi?
◻ Mɛɛ emuuyeli mlihiɛmɔ he nɔkwɛmɔ nii fɛfɛji wɔyɔɔ?
◻ Te wɔɔfee tɛŋŋ wɔna abobaa he kɛba yiwalaheremɔ?
[Akrabatsa ni yɔɔ baafa 12]
Hemɔkɛyeli, Ekãa kɛ Emuuyeli Mlihiɛmɔ He Sane ni Aŋma Afɔ Shi
Wolo ni egbɛi ji New Religious Movements: A Perspective for Understanding Society lɛ wie nɛkɛ wiemɔi nɛɛ yɛ emuuyeli mli ni Yehowa Odasefoi hiɛ yɛ be mli ni amɛdamɔɔ Nazi yiwaa naa lɛ:
“Akɛni amɛkpɛlɛɛɛ nɔ akɛ amɛaaye nɔ ni akɛɔ lɛ nɔ hewɔ lɛ, Yehowa Odasefoi lɛ tswa yiwalɛ nɔyeli lɛ gbɔmɛi asafo hee lɛ mpoa, ni nɛkɛ mpoatswaa nɛɛ, kɛ agbɛnɛ bɔ ni amɛtee nɔ amɛje nibii amli lɛ gbá mɛi ni to nakai gbɛjianɔtoo hee lɛ he gbɛjianɔ lɛ naa waa. Babaoo ni awaa Odasefoi lɛ ayi lɛ, babaoo ni amɛtswaa jwɛŋmɔ ni gbɔmɛi lɛ hiɛ lɛ mpoa ji no. Yiwaa gbɛ̀i ni etsɛ, tamɔ niseniianifeemɔ, tsuŋwoo kɛ hefɛoyelii lɛ tsakeee Odasefoi lɛ kɛbaaa Nazi gbɛhe lɛ, shi moŋ sane lɛ miibua mɛi ni waa amɛyi lɛ ayiteŋ. Enɛ ha Nazibii lɛ atsui fa yɛ bɔ ni akpeɔ amɛyiwaa nɛɛ naa ahaa lɛ hewɔ.”
“Ta lɛ mli wa waa diɛŋtsɛ yɛ nɛkɛ anɔkwayeli he bienyɛmɛi enyɔ nɛɛ ateŋ,ni nakai eji babaoo ejaakɛ Nazibii ni he wa lɛ bɛ nɔmimaa tso ni amɛbɛ shifimɔ ni ma shi Shiŋŋ hu yɛ amɛ diɛŋtsɛ amɛhemɔkɛyeli lɛ mli, ni amɛheee amɛyeee po akɛ amɛnɔyeli lɛ baaje afii ekpe Iɛ mli. Shi Odasefoi lɛ yiŋ efeee amɛ kɔshikɔshi yɛ amɛshishitoi ahe, ejaakɛ amɛhemɔkɛyeli lɛ yɛ faŋŋ kɛjɛ Habel beaŋ tɔɔ. Yɛ be mli ni esa akɛ Nazibii lɛ anyɛ shitee-kɛ-woo nɛɛ nɔ ni amɛtsɔ mɛi ni fiɔ amɛsɛɛ lɛ ayiŋ yɛ be babaoo mli, ni amɛŋɔ wiemɔi kɛ mfonirii kɛjɛ je nɛŋ Kristojamɔ mli lɛ, Odasefoi lɛ yɛ nɔmimaa diɛŋtsɛ, kɛ anɔkwayeli ni hosooo ni kɛ mɔ yaa gbele po mli yɛ amɛmlibii lɛ amli.”
Ebaafee miishɛɛ be diɛŋtsɛ yɛ be mli ni Kristofoi anɔkwayeli nɛɛ aaaye kunim kwraa lɛ. (Romabii 8:35-39) Kɛkɛ lɛ, yɛ “Toiŋjɔlɛ Lumɔ” lɛ maŋtsɛyeli nɔyeli shishi lɛ, Yesu Kristo ni awo ehiɛ nyam lɛ “lumɔyeli lɛ shweremɔ kɛ hejɔlɛ lɛ sɛɛ efoŋ.”—Yesaia 9:6, 7.
[Akrabatsa ni yɔɔ baafa 13]
Obalaŋtai Emuuyeli Mlihiɛlɔi
Saji ni nyiɛ sɛɛ nɛɛ ji wiemɔ ko ni ana kɛjɛ mɔ ko ni na nɔ ni tee nɔ lɛ woji amli yɛ Europa maŋ ko mli. Etsɔɔ bɔ ni obalaŋtai Odasefoi kɛ ekaa damɔ “amɛjɛɛɛ je lɛ mli” he sane lɛ naa amɛha.—Yohane 17 :14.
‘1945, March 12: Adamɔ asraafoi amla nɔ aaye saji. Afolɔ Yehowa Odasefoi obalaŋtai enyɔ ko naa. Amɛ naafolɔmɔ lɛ ji: amɛkpɛlɛɛɛ nɔ akɛ amɛkɛ amɛhe aaawo asraafoi anitsumɔ mli (yɛ amɛjamɔ lɛ naa) . Mɔ ni edako lɛ, ni nako afii 20 lɛ, awo lɛ tsuŋ afii 16 yɛ gboklɛfoi aŋsaraŋ, mɔ ni eda lɛ, abu lɛ gbele fɔ, ni akɛ lɛ ba maŋ ni afɔ lɛ yɛ mli lɛ koni abagbe lɛ yɛ jɛmɛ koni akɛfee nɔkwɛmɔ nɔ aha mɛi krokomɛi. Lɛ ji mɔ ni gbeɔ yi feɔ 14 ni agbe lɛ yɛ jɛmɛ. Ejɔɔ ehe yɛ toiŋjɔlɛ mli. Nɛkɛ sane nɛɛ ena minɔ hewalɛ waa. Esaaa akɛ afeɔ nɛkɛ ashiɔ Yehowa Odasefoi. Jeee akɛ amɛkɛ nɛkɛ gbekɛ nuu nɛɛ fee kɔkɔbɔɔ nɔ, shi eji lá odasefonyo. Eji gbekɛ nuu ni yɔɔ hewalɛ. Miwerɛ eho mihe yɛ ehewɔ.
‘Wɔ nu obalanyo nɛɛ gbele lɛ he yɛ shwane mli, ni enɛ ba ni gbɔmɛi babaoo ebua amɛhe naa yɛ jata nɔ ni amɛmiikwa Asraafoi ni damɔ shi ni buɔ jɛmɛ lɛ ateŋ mɔ kome gbe lɛ diɛŋtsɛ ehe dani agbe obalanyo lɛ. Nɔ̃ hewɔ lɛ ji akɛ asraafoi onukpa lɛ miisumɔ ni eye ebua mɔ ni baasɛŋ lɛ lɛ. Shi asraafonyo nɛɛ sumɔɔɔ ni efeɔ nakai. Eesumɔ moŋ ni egbe ehe. Obalanyo lɛ diɛŋtsɛ gbo kɛ ekaa. Etswaaa esɛŋ.’
Kwɛ miishɛɛ ni nɛkɛ obalahii nɛɛ baana yɛ gbohiiashitee lɛ mli, akɛ amɛhala akɛ amɛaagboi moŋ fe ni amɛaalaaje amɛgbɛhe yɛ Yehowa nibii agbɛjianɔtoo hee lɛ mli! —Okɛto Hoshea 13:14 he.