Kɛ Osɔle lɛ Ani Nyɔŋmɔ Boɔ Toi?
MAŊ onukpa kpɛɔ eyiŋ kɛ eesumɔ ni ekɛ sane ko awo mɔ ko dɛŋ aloo lɛ diɛŋtsɛ eeetsu he nii. Nakai nɔŋŋ Jeŋ Muu Fɛɛ Nɔyelɔ lɛ yɔɔ hegbɛ akɛ etsɔɔ he ni ekɛ ehe baawo sane ko mli kɛyashi. Ŋmalɛi lɛ tsɔɔ akɛ Nyɔŋmɔ ehala akɛ lɛ diɛŋtsɛ ekɛ ehe baawo wɔ sɔlemɔi amli, no hewɔ lɛ ekɛɔ wɔ ni wɔsɔle wɔha lɛ.—Lala 66:19; 69:14.
Nɔ ni Nyɔŋmɔ halaa yɛ sane nɛɛ mli lɛ jieɔ bɔ ni enyaa etsuji adesai asɔlemɔi ahe lɛ kpo. Ni eeeje ewebii lɛ anijiaŋ wui akɛ amɛkɛ amɛsusumɔi kɛ hiamɔ nii fɛɛ akaba ehiɛ lɛ, ewoɔ amɛ ŋaa moŋ akɛ: “Nyɛsɔlea ni nyɛkafɔa,” “nyɛhiɛa sɔlemɔ mli daa,” “shɛ ojatsu lɛ ofɔ Yehowa nɔ,” “nyɛŋɔa nyɛhaomɔi fɛɛ nyɛfɔa [Nyɔŋmɔ] nɔ.”—1 Tesalonikabii 5:17; Romabii 12:12; Lala 55:23; 1 Petro 5:7.
Kɛji akɛ Nyɔŋmɔ sumɔɔɔ ni eboɔ etsuji asɔlemɔi atoi lɛ, kulɛ etoŋ gbɛjianɔ koni anyɛ abɛŋkɛ lɛ ni ewo hewalɛ koni akɛtsu nii yaka. No hewɔ lɛ, Nyɔŋmɔ ni sumɔɔ akɛ eeeha ewebii abɛŋkɛ lɛ nɛkɛ lɛ ji yiŋtoo kome kɛha hekɛnɔfɔɔ akɛ eboɔ toi diɛŋtsɛ. Hɛɛ, esusuɔ etsuji lɛ ateŋ mɔ fɛɛ mɔ sɔlemɔi ahe.
Nɔ ni esaaa akɛ wɔkuɔ wɔhiɛ wɔshwieɔ nɔ ji anɔkwale ni eji akɛ Nyɔŋmɔ boɔ sɔlemɔ toi lɛ. Akɛ nɔkwɛmɔ nɔ lɛ, bɔfo Yohane ŋma akɛ: “Ni enɛ ji ekãa ni wɔyɔɔ yɛ ehiɛ lɛ akɛ, kɛji wɔba nɔ ko yɛ esuɔmɔ naa lɛ, eboɔ wɔ toi.” (1 Yohane 5:14) Maŋtsɛ David wie Yehowa Nyɔŋmɔ he akɛ “bo ni oboɔ sɔlemɔ toi,” ni ekɛ hekɛnɔfɔɔ kɛɛ akɛ: “Ni eeebo migbee toi.”—Lala 55:18; 65:3.
No hewɔ lɛ yɛ be mli ni ŋwanejee ko bɛ he akɛ sɛɛnamɔ yɛ sɔlemɔ diɛŋtsɛ he lɛ, Ŋmalɛi lɛ tsɔɔ akɛ babaoo yɛ ni kɔɔ jalɔ sɔlemɔ he. Mɔ ko miibo toi. Nakai toibolɔ lɛ ji Nyɔŋmɔ.—Yakobo 5:16-18.
Sɔlemɔi ni Abo Toi
Biblia lɛ mli eyi obɔ kɛ gbɔmɛi ni abo amɛ sɔlemɔi atoi, yɛ anɔkwale mli lɛ nɔ ni Nyɔŋmɔ nu ni eha hetoo hu. Amɛ niiashikpamɔi lɛ maa nɔ mi yɛ faŋŋ mli akɛ sɔlemɔ mli sɛɛnamɔi lɛ tekeɔ mɔ ko susumɔi amlitsɔɔmɔ kɛ ehe wiemɔ ni tamɔ tsamɔ ko ni jɛɔ mli baa lɛ. Amɛtekeɔ mɔdɛŋ ni mɔ ko bɔɔ koni ekɛ esɔlemɔi akpa gbee lɛ.
Akɛ nɔkwɛmɔ nɔ lɛ, beni Maŋtsɛ David bale Absalom yinɔkpaŋmɔ koni eshɔ Israel maŋtsɛyeli lɛ kɛjɛ edɛŋ lɛ, esɔle akɛ: “Yehowa, ofainɛ, ni oha Ahitofel [Absalom ŋaawolɔ lɛ] ŋaawoo lɛ atsɔ kwashiai asane!” Enɛ jeee nibimɔ bibioo ko, ejaakɛ “Ahitofel ŋaa lɛ ni ewoɔ . . . lɛ tamɔ nɔ ni ayabiɔ Nyɔŋmɔ daaŋ gbee; nakai . . . [a]buɔ Ahitofel ŋaai fɛɛ ni ewo amɛ lɛ.” Yɛ no sɛɛ lɛ Absalom kpoo Ahitofel ŋaawoo ni kɔɔ gbɛ ni esa akɛ atsɔ nɔ ashwie Maŋtsɛ David lɛ he lɛ. Mɛni hewɔ? “Ejaakɛ to Yehowa eto akɛ akwa Ahitofel ŋaawoo kpakpa lɛ, bɔni afee ni Yehowa kɛ efɔŋ aba Absalom nɔ.” Eyɛ faŋŋ akɛ abo David sɔlemɔ lɛ toi.—2 Samuel 15:31; 16:23; 17:14.
Nakai nɔŋŋ beni Hezekia kpa Nyɔŋmɔ fai akɛ ehere eyiwala kɛjɛ hela ni baagbe lɛ lɛ mli lɛ, ehe wa lɛ. Ani enɛ jɛ jwɛŋmɔŋ sɛɛnamɔi komɛi ni Hezekia ná yɛ esɔlemɔ lɛ hewɔ? Dabi kwraa! Yehowa shɛɛ sane ni ekɛha Hezekia kɛtsɔ gbalɔ Yesaia nɔ ji akɛ: “Minu ofaikpamɔ lɛ, ni mina ohiɛ yaafonui lɛ hu. Naa, mibatsao.”—2 Maŋtsɛmɛi 20:1-6.
Yehowa bɔfo ma nɔ mi eha Daniel, ni aha esɔlemɔi ahetoo yɛ sɛɛ mli kwraa fe bɔ ni esusuɔ lɛ akɛ: “Anu owiemɔi lɛ.” Aha mɛi krokomɛi asɔlemɔi, tamɔ Hana nɔ̃, Yesu kaselɔi lɛ anɔ̃, kɛ asraafoi asafoiatsɛ Kornelio nɔ̃ lɛ hetoo yɛ gbɛ ni nyɛŋ afee nɔ ni jɛ gbɔmɔ mɔdɛŋbɔɔ pɛ nɔ. Belɛ Biblia lɛ tsɔɔ yɛ faŋŋ mli akɛ Nyɔŋmɔ nine shɛɔ sɔlemɔi ni kɛ ŋwɛi suɔmɔnaa nifeemɔ kpaa gbee lɛ anɔ, eboɔ toi ni ehaa hetoo hu.—Daniel 10:2-14; 1 Samuel 1:1-20; Bɔfoi lɛ Asaji 4:24-31; 10:1-7.
Shi mɛɛ gbɛ nɔ Nyɔŋmɔ tsɔɔ ehaa etsuji anɔkwafoi lɛ asɔlemɔi ahetoo ŋmɛnɛ yɛ?
Sɔlemɔi Ahetooi
Aha sɔlemɔi ni atsi ta yɛ yiteŋgbɛ nɛɛ ahetoo trukaa yɛ naakpɛɛ gbɛ nɔ. Shi, ofainɛ, ha ahi ojwɛŋmɔ mli akɛ, yɛ Biblia bei amli po lɛ ayooo sɔlemɔi ni ahaa hetoo kpitiokpitio lɛ yɛ faŋŋ. Ejaakɛ enɛ kɔɔ jeŋba mli hewalɛ kɛ hiɛtɛjemɔ ni ekɛhaa, ni haa Nyɔŋmɔ tsuji hiɔ jalɛ gbɛi anɔ lɛ he. Titri kɛha Kristofoi lɛ, sɔlemɔi ahetoo kɔɔ saji ni ji mumɔŋ nibii ahe titri, jeee hewalɛ nitsumɔi ni yɔɔ naakpɛɛ.—Kolosebii 1:9.
No hewɔ lɛ kaaha onijiaŋ miije wui kɛji akɛ ahaaa osɔlemɔi ahetoo yɛ gbɛ ni okpaa gbɛ loo osumɔɔ lɛ nɔ. Akɛ nɔkwɛmɔ nɔ lɛ, ni Nyɔŋmɔ aaajie kaa ko kɛaajɛ onɔ lɛ, ekolɛ ebaasumɔ moŋ ni eha bo “hewalɛ ni fa kɛteke nɔ” koni onyɛ odamɔ naa. (2 Korintobii 4:7; 2 Timoteo 4:17) Ekaba kɔkɔɔkɔ akɛ wɔɔbu hewalɛ ni tamɔ nɛkɛ akɛ nɔ ko bibioo, aloo ni wɔɔmu sane naa akɛ Yehowa haaa wɔsɔlemɔ lɛ hetoo kwraa.
Susumɔ Nyɔŋmɔ Bi, Yesu Kristo diɛŋtsɛ sane lɛ he okwɛ. Akɛni esusuɔ bɔ ni esumɔɔɔ ni egbo akɛ musubɔlɔ lɛ he hewɔ lɛ, Yesu sɔle akɛ: “Ataa, kɛji oosumɔ lɛ, jiemɔ kpulu nɛɛ kɛjɛ minɔ.” Ani Nyɔŋmɔ bo sɔlemɔ nɛɛ toi? Hɛɛ, taakɛ Hebribii 5:7 maa nɔ mi lɛ. Yehowa ejieee bɔ ni ehe hiaa ni e-Bi lɛ agbo yɛ sɛŋmɔtso nɔ lɛ kɛyaaa. Shi moŋ, “bɔfo ko jɛ ŋwɛi bajie ehe kpo etsɔɔ lɛ, ni ebawo lɛ hewalɛ.”—Luka 22:42, 43.
Hetoo ni ba trukaa yɛ naakpɛɛ gbɛ nɔ nɛ? Kɛha wɔteŋ mɔ fɛɛ mɔ lɛ eeenyɛ efee nakai! Shi kɛha Yehowa Nyɔŋmɔ, hewalɛ ni tamɔ nɛkɛ jɛɛhe lɛ, enɛ jeee naakpɛɛ nifeemɔ ko. Ni Yesu hu le kɛjɛ eshihilɛ shishijee mli yɛ ŋwɛi akɛ tsutsu bei amli lɛ, ŋwɛibɔfoi jieɔ amɛhe kpo amɛtsɔɔ gbɔmɛi. No hewɔ lɛ bɔfo ko ni aaapue yɛ ehiɛ lɛ efeŋ lɛ naakpɛɛ tamɔ bɔ ni eeefee wɔ naakpɛɛ lɛ. Ni kɛlɛ, bɔfo nɛɛ ni eka shi faŋŋ akɛ Yesu le lɛ jogbaŋŋ kɛjɛ beni E-tsɔko adesa lɛ ye ebua ni awaje Lɛ kɛha kaa ni ka ehiɛ lɛ.
Yɛ be mli ni ehaa etsuji anɔkwafoi asɔlemɔi ahetoo ŋmɛnɛ lɛ, Yehowa fɔɔ hewalɛ ni he hiaa lɛ kɛhamɔ koni anyɛ adamɔ naa. Nɛkɛ sɛɛfimɔ nɛɛ baanyɛ aba tamɔ hewalɛwoo ni baa kɛjɛɔ nanemɛi jálɔi ni wɔkɛ amɛ bɔɔ lɛ aŋɔɔ. Ani wɔteŋ mɔ ko baasumɔ ni ekpoo nakai hewalɛwoo lɛ, ni ekolɛ wɔmu sane naa akɛ akɛni wɔnanemɛi tsuji nɛɛ tsɔko kaai ni tamɔ wɔnɔ lɛ amli hewɔ lɛ, amɛnyɛŋ amɛwo wɔ hewalɛ? Kulɛ Yesu hu baanyɛ aŋɔ su ni tamɔ nɛkɛ yɛ bɔfo ni jie ehe kpo etsɔɔ lɛ lɛ he. Shi moŋ ekpɛlɛ hewalɛwoo lɛ nɔ akɛ hetoo ni Yehowa kɛhaa esɔlemɔ lɛ, no hewɔ lɛ enyɛ etsu e-Tsɛ lɛ suɔmɔnaa nii ahe nii yɛ anɔkwayeli mli. Wɔ hu wɔbaasumɔ ni wɔkɛ mlihilɛ akpɛlɛ hewalɛ ni Nyɔŋmɔ kɛhaa akɛ wɔsɔlemɔi lɛ ahetoo lɛ nɔ. Kaimɔ hu akɛ, yɛ bei babaoo mli lɛ, nɔ ni nyiɛɔ tsuishiŋmɛɛ bei ni akɛmɛɔ nɛɛ sɛɛ baa ji jɔɔmɔi babaoo.—Jajelɔ 11:6; Yakobo 5:11.
Na Hekɛnɔfɔɔ akɛ Nyɔŋmɔ Boɔ Toi
Kaaŋmɛɛ hekɛnɔfɔɔ ni oyɔɔ yɛ hewalɛ ni sɔlemɔ yɔɔ lɛ mli kɛji ahaaa bo hetoo amrɔ nɔŋŋ. Ekolɛ sɔlemɔi komɛi tamɔ nɔ ni afeɔ koni ajie mɔ ko kɛjɛ haomɔi komɛi amli, aloo ni mɔ ko ana babaoo feemɔ yɛ Nyɔŋmɔ sɔɔmɔ mli lɛ ahetoo sɛɛ tsɛɔ fioo kɛyashiɔ be ni Nyɔŋmɔ le akɛ eja loo ehi. (Luka 18:7, 8; 1 Petro 5:6) Kɛji oosɔle yɛ teemɔŋ sane ko ni he hiaa bo waa he lɛ, tsɔɔmɔ enɛ kɛtsɔ ehekamɔ kɛha Nyɔŋmɔ lɛ nɔ akɛ ooshwe nɔ ni obiɔ nɛɛ waa, ni oyiŋtoo mli tse keŋkeŋ ni eyɛ krɔŋŋ hu. Yakob jie su ni tamɔ nɛkɛ kpo beni ekɛ bɔfo lɛ eshi mple yɛ be kakadaŋŋ mli, ni ewie nɛkɛ lɛ: “Mihaŋ oya, ja ojɔɔ mi da.” (1 Mose 32:24-32) Esa akɛ wɔna hekɛnɔfɔɔ ni tamɔ nɛkɛ akɛ kɛji akɛ wɔtee nɔ wɔbi lɛ, wɔnine baashɛ jɔɔmɔ nɔ yɛ be ni sa mli.—Luka 11:9.
Naagbee susumɔ kome nɛ. Akɛ jeŋ muu fɛɛ Maŋtsɛ lɛ aaabo wɔ toi lɛ ji hegbɛ ko ni jara wa waa. Yɛ enɛ hewɔ lɛ, kɛ Yehowa Nyɔŋmɔ miitsɔ e-Wiemɔ lɛ nɔ eewie etaomɔ nii ahe kɛmiitsɔɔ wɔ lɛ, ani wɔboɔ toi jogbaŋŋ? Akɛni wɔsɔlemɔi lɛ kɛ wɔ bɛŋkɛɔ wɔ Bɔlɔ lɛ he kpaakpa hewɔ lɛ, wɔbaasumɔ ni wɔkɛ hiɛdɔɔ abo nɔ fɛɛ nɔ ni eyɔɔ ni eeekɛɛ wɔ lɛ toi jogbaŋŋ.
[Mfoniri ni yɔɔ baafa 6]
Nyɔŋmɔ boɔ sɔlemɔi atoi. Ani wɔboɔ lɛ toi kɛtsɔɔ e-Wiemɔ lɛ nɔ?