Adesa Su Lɛ Tsakemɔ
JEŊ nilelɔ Sir Isaiah Berlin kɛɛ: “Adesai ehiii shi ni amɛmiiku efɔŋ naa kɛkɛ. Amɛhiɔ shi yɛ otii diɛŋtsɛ ni mamɔ shi yɛ amɛhiɛ, akɛ aŋkroaŋkroi kɛ kutuu lɛ anaa.” Shi mɛi enyiɛ anine shɛɔ nɛkɛ “otii diɛŋtsɛ” nɛɛ anɔ? Yɛ bei babaoo mli lɛ adesai asu lɛ haa ekɛ ehe woɔ nibii gbohii kɛ nibii ni kpataa nii ahiɛ lɛ amli.
Akɛ nɔkwɛmɔ nɔ lɛ, awuiyeli mli efɔŋfeemɔ etee hiɛ oha mlijaa 11 yɛ Britania. Britania maŋsɔɔlɔ nukpa lɛ kɛɛ akɛ “wɔnitsumɔ ji ni wɔtao naatsii nii bɔni afee ni adesai ahiŋmɛigbelemɔ kpele lɛ anyɛ aya nɔ.” Shi ani mlai kɛ maŋkwramɔŋ nɔnyɛɛ, ni bɔ ni amɛhi amɛha kɔɔɔ he eko, lɛ baanyɛ atsake yiŋtoi ni gbɔmɛi hiɛ ni amɛkɛfeɔ efɔŋ lɛ? Anɔkwale ni eji akɛ mlakwamɔ yɛ ni eeya hiɛ yɛ mlai ni awoɔ lɛ fɛɛ sɛɛ, kɛ agbɛnɛ yɛ gbɛjianɔtoi ni tsuɔ mla nɔ yeli he nii lɛ po ahiɛ lɛ wieɔ ehaa ehe. Nɔ ko ni nɔ kwɔ fe mla naa naatsii he miihia. Esa akɛ atsake adesai lɛ asu kɛ baŋ diɛŋtsɛ.
Biblia lɛ tsɔɔ adesai asui fɔji ni yɔɔ amɛhe lɛ mli yɛ anɔkwayeli mli yɛ gbɛ ni mli ka shi faŋŋ hu nɔ. Akɛ nɔkwɛmɔ nɔ lɛ, bɔfo Paulo ŋma wolo eyaha enanemɛi Kristofoi ni yɔɔ Galatia lɛ yɛ “jeŋba shara, ni ekpɔtɔ, kɛ nifeemɔi ni he tseee lɛ ahe . . . Gbɔmɛi tsɔmɔɔ henyɛlɔi ni amɛnɔɔ; amɛtsɔmɔɔ awuŋayelɔi, amɛmli fuɔ, ni . . . amɛhe tsɛ̃ɔ mɔ, amɛtɔɔ daa, amɛnaa bɔlɛ yɛ gbɛi fɔji anɔ, ni amɛfeɔ nibii krokomɛi tamɔ enɛɛmɛi.” Ni taakɛ Today’s English Version ni atsɛ wiemɔi nɛɛ asɛɛ kɛjɛ mli lɛ tsɔɔ lɛ, nɛkɛ nifeemɔi ni baa mɔ shi nɛɛ ji “nibii ni adesai asu lɛ feɔ.”—Galatabii 5:19-21.
Naagba lɛ Shishifa
Shi kɛlɛ, Today’s English Translation lɛ ji shishitsɔɔmɔ ko ni atsɔɔɔ wiemɔi lɛ ashishi ekomekome, ni wiemɔ “nibii ni adesai asu lɛ feɔ” lɛ ji nɔ ni Paulo kɛɛ lɛ ni awie yɛ wiemɔ kroko mli. Hela wiemɔ ni Paulo kɛtsu nii, sarx, lɛ shishitsɔɔmɔ ji “heloo,” jeee “adesai asu.” Yɛ yiŋtoo nɛɛ hewɔ lɛ, shishitsɔɔmɔi ni tsɔɔ wiemɔi lɛ ashishi ekomekome lɛ wieɔ “heloo lɛ nitsumɔi” ahe koni eha Paulo wiemɔ lɛ shishinumɔ aje kpo jogbaŋŋ yɛ wɔ ŋmɛnɛŋmɛnɛ wiemɔi amli.a
Biblia lɛ amaniɛbɔɔ ni tsɔɔ bɔ ni fee ni esha ba adesai ashihilɛ mli lɛ yɛ faŋŋ ni eyɛ mlɛo hu—yɛ anɔkwale mli lɛ, ewaaa aahu po akɛ mɛi pii kpooɔ akɛ amɛaahe amɛye. Nɛkɛ ji bɔ ni Paulo tsɔɔ mli eha: “Gbɔmɔ kome nɔ esha tsɔ kɛba je lɛŋ, ni gbele tsɔ esha nɔ kɛba, ni no ha gbele lɛ tsɛŋe gbɔmɛi fɛɛ, ejaakɛ amɛ fɛɛ amɛfee esha.” (Romabii 5:12) Paulo miiwie Biblia mli klɛŋklɛŋ wolo, 1 Mose, kɛ agbɛnɛ klɛŋklɛŋ nuu, Adam, kɛ eŋa Hawa bɔɔ he yɛ biɛ. Bɔ ni amɛjɛ amɛsuɔmɔ mli amɛgbo toi lɛ ji nɔ ko ni ale jogbaŋŋ. Yɛ no hewɔ lɛ, abu amɛ gbele fɔ. Amɛfɔ amɛshwiei lɛ kɛ emuu ni amɛyeee lɛ ni amɛ hu amɛgboi. No hewɔ lɛ, belɛ “mɛi fɛɛ efee esha, ni Nyɔŋmɔ anunyam lɛ ebɔ amɛ.” Yɛ nɛkɛ shishitoo yiŋtoo nɛɛ hewɔ lɛ, ŋmɛnɛ, kɛ adesai asu lɛ ehi kwraa lɛ, etamɔ bɔ ni eji yɛ be mli ni Nyɔŋmɔ bɔ gbɔmɔ kɛjɛ shishijee mli ni eye emuu lɛ ni akɛwu ŋmɔtɔ mli—Romabii 3:23; 1 Mose, yitsei 2 kɛ 3.
Adesa Su lɛ ni Atsake Lɛ!
Shi kɛlɛ, abaanyɛ aye adesai asui lɛ amli nɔ ni ehiii fe fɛɛ lɛ po anɔ kunim. Yɛ anɔkwale mli lɛ, Biblia lɛ kɛɔ akɛ wɔbaanyɛ wɔtsake wɔsu yɛ gbɔmɛi hee ni wɔɔtsake wɔtsɔmɔ lɛ naa. Yɛ mɛɛ gbɛ nɔ? Yɛ Nyɔŋmɔ mumɔ krɔŋkrɔŋ lɛ yelikɛbuamɔ naa.—Romabii 8:9.
Paulo wie he yɛ nɛkɛ gbɛ nɔ yɛ wolo ni eŋma eyaha enanemɛi Kristofoi ni yɔɔ Kolose lɛ mli akɛ: “Nyɛjie[a] gbɔmɔ momo lɛ kɛ enitsumɔi lɛ nyɛshwie[a], ni nyɛwo gbɔmɔ hee ni tsɔɔ ehee ekoŋŋ kɛyaa nilee mli yɛ Mɔ ni bɔ lɛ lɛ subaŋ lɛ naa.” Kɛfata nibii ni etsi ta yɛ gbɔmɔ momo lɛ nifeemɔi lɛ ahe lɛ, etsɔɔ subaŋi ni tsirɛɔ gbɔmɛi koni amɛfee nibii ni kpataa nii ahiɛ lɛ ekomɛi: hiɛjoomɔ, mlifu, mlila, kɛ nishaianii—Kolosebii 3:5-10.
Yɛ be mli ni eŋmaa wolo kroko ni tamɔ enɛ nɔŋŋ eyaha Kristofoi ni yɔɔ Efeso lɛ, Paulo tsi ta ekoŋŋ akɛ “gbɔmɔ hee,” ni taakɛ ekɛɛ lɛ, “abɔ yɛ Nyɔŋmɔ subaŋ nɔ yɛ anɔkwa jalɛ kɛ hetsemɔ mli lɛ” he miihia. Etee esanegbaa lɛ nɔ ni ekɛɛ: “Nyɛhaa mlijoomɔ kɛ mlila kɛ mlifu kɛ bolɔmɔ kɛ musubɔɔ fɛɛ sɛɛ afoa yɛ nyɛteŋ, kɛ efɔŋ fɛɛ efɔŋ. Shi nyɛmli ahia ahaa nyɛhe, nyɛmusuŋ atsɔa nyɛ yɛ nyɛhe.”—Efesobii 4:24, 31, 32.
Ani Paulo wiemɔi lɛ ji nɔ ni anyɛɔ he nii atsuɔ? Ani abaanyɛ atsake gbɔmɛi ni afee amɛ ehee? Ojogbaŋŋ, odaseyeli lɛ tsɔɔ akɛ nakai mra be mli Kristofoi lɛ fee tsakemɔi diɛŋtsɛ yɛ amɛshihilɛi amli. Akɛ gbɔmɛi akuu lɛ, amɛdamɔ shi akɛ mɛi sɔrɔtoi yɛ jeŋ ni bɔle amɛ lɛ ahe. Justin Martyr, ni eji yinɔsaneŋmalɔ ko ni hi shi yɛ mra be mli Kristofoi lɛ abei amli lɛ ŋma akɛ: “Wɔ mɛi ni wɔnyɛɔ wɔhe ni wɔgbegbeeɔ wɔhe, ni, yɛ jeŋbai sɔrɔtoi ni wɔyɔɔ lɛ hewɔ lɛ, wɔkpooɔ akɛ wɔkɛ gbɔmɛi ni jɛ maji krokomɛi anɔ lɛ aaahi shi lɛ, amrɔ nɛɛ, kɛjɛ be mli ni Kristo pue nɛɛ, wɔkɛ amɛ hiɔ shi yɛ sharamɔ mli gbɛi ni je amɛhe nɔ, ni wɔsɔleɔ wɔhaa wɔhenyɛlɔi, ni wɔbɔɔ mɔdɛŋ akɛ wɔɔtsɔ mɛi ni nyɛɔ wɔ ni shishinumɔ bɛ he lɛ ayiŋ koni amɛhi shi yɛ Kristo kitai ni eye emuu lɛ kɛ gbeekpamɔ naa.”
Ni ŋmɛnɛ hu? Ani anyɛɔ afeɔ tsakemɔi diɛŋtsɛ yɛ gbɔmɔ su mli? Hɛɛ! Nɔkwɛmɔ nii akpei nyɔŋmai abɔ tsɔɔ akɛ tsakemɔi ni yɔɔ naakpɛɛ miiya nɔ lolo. Nɔ ni nyiɛ sɛɛ nɛɛ ji amɛteŋ ekome pɛ.
Afɔ Stephen ni eda yɛ maji wuji ni atsuɔ dadei ahe nii waa yɛ mli yɛ England lɛ ekome mli. Etsɛ ji mɔ ko ni kɛɔ akɛ Nyɔŋmɔ bɛ. Beni Stephen ye afii 12 lɛ, abu lɛ fɔ ni ayatsi enaa afii etɛ yɛ skul ni atsɔseɔ gbekɛbii fɔji yɛ lɛ. Ekpɛlɛ nɔ akɛ eju shii 64 sɔŋŋ! Etsɛɛɛ kɛkɛ ni bulɛ ni eyɔɔ kɛha hegbɛi lɛ fɛɛ ta, ni yɛ be mli ni edaa lɛ, nifɔji ni efeɔ lɛ mli bawo wu. Nibii ni efee lɛ ekomɛi ji shishiumɔ, daatɔɔ, kɛ jeŋba gbonyo, kɛ nɔmɔ ni ekɛ polisifoi nɔ, ni yɛ naagbee nɔ nɛɛ hewɔ lɛ ayawo Stephen tsuŋ. Esu bafee yiwalɛ su. Ekɛɛ akɛ “efɔŋ ko bɛ ni gbɔmɔ ni sheee Nyɔŋmɔ gbeyei lɛ nyɛŋ afee kɛji etaomɔ nii lɛ fa waa lɛ.”
Mɛni baanyɛ atsake awuiyelɔ kpanaa ni tamɔ mɔnɛ? Yɛ naagbee lɛ, Stephen kpɛlɛ yelikɛbuamɔ ni enyɛminuu ni ebatsɔ Yehowa Odasefoi lɛ ateŋ mɔ kome lɛ kɛha lɛ lɛ nɔ. Yɛ be mli ni ekase Biblia lɛ be fioo ko sɛɛ lɛ, Stephen je shishi akɛ eeewo “gbɔmɔ hee” lɛ. Tsakemɔi ni efee lɛ yɛ naakpɛɛ diɛŋtsɛ. Amrɔ nɛɛ, yɛ afii enumɔ sɛɛ lɛ, ebote gbalashihilɛ mli yɛ miishɛɛ mli ni eji Yehowa Odasefoi asafo lɛ, ni esɔmɔɔ yɛ mli akɛ asafoŋ sɔɔlɔ lɛ mli nyo ni abuɔ lɛ.
No hewɔ lɛ anyɛɔ atsakeɔ adesa su yɛ aŋkroaŋkroi agbɛfaŋ. Shi ani adesai agbɔjɔmɔi lɛ ji yiŋtoo titri hewɔ ni ‘afiteɔ adesai ahiŋmɛigbelemɔ nibii’ lɛ ŋmɛnɛ lɛ?
“Ŋmalɛ lɛ Mli Abonsam Lɛ”
Bɔfo Paulo ŋma gbalɛ ko ni sa kadimɔ jogbaŋŋ yɛ nɛkɛ “naagbee gbii” nɛɛ ahe. Aŋmala ewiemɔ lɛ ekoŋŋ yɛ akrabatsa ni yɔɔ yiteŋ gbɛ lɛ mli. Kadimɔ akɛ bɔ ni awuiyeli kɛ efɔŋfeemɔ yaa hiɛ lɛ haa “jaramɔ bei” baa. Ani adesai asu lɛ ji nɔ ni abaashwa akɛ no kɛ enɛɛmɛi fɛɛ ba?—2 Timoteo 3:1.
Dabi, nɔ kroko hu fata he, hewalɛ fɔŋ ko ni sumɔɔ efɔŋ ni kɛ adesai agbɔjɔmɔi lɛ miitsu nii waa. Taakɛ bɔ ni ewa ha mɛi komɛi akɛ amɛaahe amɛye akɛ adesa yɛ esha su ni akɛfɔ lɛ lɛ, nakai nɔŋŋ ewa ha amɛ akɛ amɛaakpɛlɛ nɔ akɛ hewalɛ ko yɛ ni nɔ kwɔ fe gbɔmɔ ni taoɔ ni ekɛ lɛ atsu nii. Shi Biblia lɛ kɛɔ akɛ hewalɛ ko ni tamɔ nakai yɛ diɛŋtsɛ: Satan Abonsam.
Wiemɔ “Abonsam” (ni eshishi ji, “naafolɔlɔ”) lɛ jeɔ kpo shii 33 yɛ Biblia lɛ mli, ni “Satan” (ni eshishi ji, “shitee-kɛwolɔ”) lɛ jeɔ kpo shii 52. Eyɛ faŋŋ akɛ wiemɔi nɛɛ fɛɛ wieɔ mumɔ fɔŋ kome lɛ nɔŋŋ he. Shi kɛlɛ, mɛi komɛi ekpɛlɛɛɛ nɔ akɛ Satan diɛŋtsɛ ko yɛ, ni amɛsumɔɔ moŋ ni amɛkɛɛ akɛ: “Adesai asu lɛ kɛ adebɔɔ mli henumɔi ni enaa akɛ efee esha lɛ ji Ŋmalɛi lɛ mli abonsam lɛ.”b Shi kɛlɛ, miishɛɛ sane ji akɛ, Hebri niŋmaa lɛ kɛ wiemɔ has·Sa·tanʹ, Satan lɛ, tsuɔ nii yɛ Yehowa tsulɔ anɔkwafo Hiob he sane ni aŋma lɛ mli, ni wɔkaneɔ yɛ Luka 4:2 akɛ Abonsam lɛ (Hela: ho di-a’bolos) ji mɔ ni ka Yesu lɛ. (Hiob 1:6) Yɛ enyɔ lɛ fɛɛ mli lɛ, atsɔ wiemɔ he mla nɔ awie mɔ pɔtɛɛ ko diɛŋtsɛ he. Adesai asu baaa mli kwraa yɛ biɛ.
Bɔfo Paulo haa bɔ ni wɔnuɔ bɔ ni Satan he wa waa ha lɛ shishi lɛ yaa hiɛ yɛ be mli ni ewie “je nɛɛŋ lumɛi ni yɔɔ be nɛ be duŋ lɛ mli lɛ, kɛ mumɔi fɔji asafo ni yɔɔ ŋwɛiniiaŋ lɛ” ahe, yɛ be mli ni eŋmaa wolo eyaha Efesobii lɛ. (Efesobii 6:12) Kɛfata Satan Abonsam he lɛ, nakai “je nɛɛŋ lumɛi” lɛ ji daimonioi, mumɔŋ bɔɔnii fɔji ni anaaa amɛ. Amɛ “shishiuɔ jeŋ muu lɛ fɛɛ,” ni amɛkɛ adesai shigbeemɔ shihilɛ lɛ miitsu nii waa yɛ gbɛ fɛɛ gbɛ ni amɛaanyɛ nɔ. (Kpojiemɔ 12:9) Enɛ hewɔ ni Paulo woɔ Kristofoi fɛɛ hewalɛ waa koni ‘amɛnyɛ Abonsam ŋaatsɔɔi lɛ anaa amɛdamɔ’ lɛ. Lɛ ji mɔ titri ni adesai ashihilɛ ni yaa hiɛ efiteɔ ni wɔnaa ni ebɔle wɔhe kɛkpe nɛɛ jɛ.—Efesobii 6:11.
Esaamɔ Kɛbaa Ekoŋŋ
Petro, ni lɛ hu ehi shi yɛ Paulo gbii lɛ amli lɛ, maa nɔ mi ehaa wɔ akɛ Satan kɛ edaimonioi lɛ ehiŋ shi kɛyaŋ naanɔ ni amɛye adesai anɔ. Ekɛɔ akɛ: “Shi yɛ eshiwoo lɛ naa lɛ, wɔmiikwɛ ŋwɛi hee kɛ shikpɔŋ hee ni jalɛ hiɔ mli lɛ gbɛ.” (2 Petro 3:13) Lɛlɛŋ, yɛ be nɛɛ mli nɔŋŋ lɛ, etsɛŋ ni efɔŋfeemɔ kɛ gbɛi sɔrɔtoi ni etsɔɔ nɔ ejieɔ ehe kpo lɛ fɛɛ baafee nibii ni anaŋ dɔŋŋ yɛ adesai ashihilɛ mli. Abaakpata Satan kɛ edaimonioi lɛ ahiɛ. (Romabii 16:20; Kpojiemɔ 20:1-3) Yɛ nakai beaŋ lɛ, adesai asa lɛ baajie “Nyɔŋmɔ anunyam” lɛ kpo diɛŋtsɛ, kɛ naanɔ wala akɛ hiɛnɔkamɔ ni ma shi shiŋŋ kɛha adesai aweku lɛ.—Romabii 3:23.
Amerika nɔyelɔ Thomas Jefferson wie akɛ “miwieɔ daa nɛɛ ni mawie daa gbi hu akɛ, Wolo Krɔŋkrɔŋ lɛ kasemɔ kɛ hiɛdɔɔ haa maŋbii feɔ gbɔmɛi kpakpai . . . Biblia lɛ haa anaa gbɔmɛi kpakpai fe fɛɛ yɛ je nɛɛ mli.” Taakɛ wɔna lɛ, kɛ wɔha Biblia lɛ shɛɛ sane ni mli wa lɛ hegbɛ ni ena hewalɛ yɛ wɔshihilɛ nɔ lɛ, no lɛ ebaanyɛ etsake wɔsu. (Romabii 12:2) Wɔbaanyɛ wɔhala ni wɔshɛ otii ni bulɛ yɔɔ he lɛ ahe ni wɔmɔ Nyɔŋmɔ jamɔ mli waa. Ni wɔbaanyɛ wɔhala akɛ wɔkɛ mɛi ni jɛɔ anɔkwayeli mli amɛsumɔɔ akɛ amɛaafee nakai nɔŋŋ lɛ aaabɔ, bɔni afee ni ewo wɔ hewalɛ yɛ mɔdɛŋ ni wɔbɔɔ akɛ wɔɔya wɔhiɛ lɛ mli. (Hebribii 10:24, 25) Yehowa Odasefoi yɛ he miishɛɛ akɛ amɛaaye amɛbua bo yɛ gbɛ fɛɛ gbɛ ni amɛaanyɛ nɔ. Mɛni hewɔ okɛ ohe ebɔɔɔ amɛhe bianɛ nɔŋŋ!
[Shishigbɛ niŋmai]
a Okɛto: New World Translation of the Holy Scriptures; The Holy Bible, ni Robert Young fee lɛ; The Emphasised Bible, ni Joseph B. Rotherham fee lɛ; The Holy Bible in Modern English, ni Ferrar Fenton fee lɛ; The Modern Reader’s Bible, ni Richard G. Moulton fee lɛ ahe.
b Eji Christadelphia jamɔ, ni ji Kristendom jamɔ kitãi lɛ ekome lɛ wiemɔi ni tsɔɔ amɛhemɔkɛyelii lɛ ateŋ ekome.
[Akrabatsa ni yɔɔ baafa 6]
“Naagbee Gbii Lɛ” Bɔ ni Biblia lɛ Tsɔɔ Mli Eha
“Shi na enɛ ole akɛ naagbee gbii lɛ anɔ lɛ jaramɔ bei baaba. Ejaakɛ gbɔmɛi aaatsɔmɔ hesuɔlɔi, shika suɔlɔi, shwalɔi, hewolɔi, musubɔlɔi, fɔlɔi anɔ toigbolɔi, trumui, mɛi ni he tseee, mɛi ni edɔɔɔ mɔ he, kpaŋmɔ mli kulɔi, oshekuyelɔi, mɛi ni nyɛɛɛ amɛkɔnɔ nɔ amɛye, mɛi ni hiɛ yɔɔ la, mɛi ni sumɔɔɔ ekpakpa, sɛɛgbɛtsɔɔlɔi, yiwalɔi, henɔwolɔi, mɛi ni sumɔɔ shwɛmɔ-kɛ-ŋɔɔmɔ fe Nyɔŋmɔ, mɛi ni hiɛ Nyɔŋmɔ jamɔ su, shi amɛkwa emli hewalɛ lɛ; tsi ohe kɛjɛ nɛkɛ gbɔmɛi ahe.”—2 Timoteo 3:1-5.
[Mfoniri ni yɔɔ baafa 7]
Etsɛŋ ni adesai asu lɛ baajie Nyɔŋmɔ anunyam Iɛ kpo kwraa kɛmɔ shi