Sanebimɔi ni Jɛ Kanelɔi Adɛŋ

Ani Maria, ni batsɔ Yesu nyɛ lɛ, eŋɔ hɔ momo beni etee eyasara ewekunyo Elisabet lɛ?

Hɛɛ, odaseyeli lɛ tsɔɔ nakai.

Klɛŋklɛŋ lɛ wɔkaneɔ Elisabet, osɔfo Zakaria ŋa ni fɔ Yohane (Baptisilɔ lɛ) hɔŋɔɔ lɛ he sane yɛ Luka yitso 1. Bɔfo Gabriel yasara Maria, yɛ Elisabet hɔŋɔɔ lɛ “nyɔŋ ni ji ekpaa lɛ nɔ,” koni eyakɛɛ lɛ akɛ ebaaŋɔ hɔ, ni ebaafɔ “Ŋwɛinyo lɛ Bi.” (Luka 1:26, 30-33) Shi mɛɛ be mli Maria ŋɔ hɔ?

Luka sane lɛ tee nɔ egba akɛ, yɛ enɛ hewɔ lɛ Maria fa gbɛ kɛtee Yuda koni eyasara ewekunyo Elisabet ni eŋɔ hɔ lɛ. Beni yei enyɔ lɛ kpe lɛ, abifao ni yɔɔ Elisabet musuŋ lɛ (Yohane) tũ. Elisabet wie ‘Maria musuŋbi’ he ni etsɛ Maria “mi-Nuntsɔ nyɛ.” (Luka 1:39-44) No hewɔ lɛ, sane naamuu ni ja lɛ ji akɛ, no mli lɛ Maria eŋɔ hɔ momo, ákɛ beni eyasara Elisabet lɛ, no mli lɛ ehiɛ musu.

Luka 1:56 kaneɔ akɛ: “Ni Maria kɛ lɛ hi shi aaafee nyɔji etɛ, ni eku esɛɛ etee emaŋ.” Jeee akɛ nɛkɛ kuku nɛɛ kɛ kalanda nɔ be pɔtɛɛ miiha. Ekɛɔ akɛ “aaafee nyɔji etɛ,” ni baatsɔɔ akɛ Elisabet hɔŋɔɔ lɛ ebote nyɔji nɛɛhu mli.

Beni eye ebua Elisabet yɛ ehɔŋɔɔ lɛ naagbee nyɔji lɛ amli lɛ, Maria shi kɛtee eshia yɛ Nazaret. Ekolɛ Maria yoo akɛ, kɛ Elisabet fɔ (Yohane) pɛ lɛ, gbɔi pii baaba jɛmɛ, ni ekolɛ amɛteŋ mɛi komɛi baanyɛ afee wekumɛi. Enɛ baafee hiɛgbele kɛ naagba aha obalayoo ni bɛ wu ni lɛ diɛŋtsɛ lɛ ehiɛ musu. Nyɔji enyiɛ Maria hɔ lɛ ena beni eshi kɛmiiya Nazaret lɛ? Akɛni ekɛ Elisabet hi shi “aaafee nyɔji etɛ” hewɔ lɛ, eeenyɛ eba akɛ no mli lɛ Maria hɔŋɔɔ lɛ yɛ enyɔji etɛ lɛ naagbee loo enyɔji ejwɛ lɛ shishijee mli beni eku esɛɛ kɛtee Nazaret lɛ.