Amɛfee Yehowa Suɔmɔnaa Nii

Samarianyo ko Tsɔɔ akɛ Eji Naanyo Kpakpa

YƐ YESU gbii lɛ amli lɛ, béi ni anaa yɛ faŋŋ mli kã Yudafoi kɛ Jeŋmajiaŋbii lɛ ateŋ. Yɛ be ko mli lɛ, Yudafoi a-Mishnah lɛ po kɛ mla ko ha, ni akɛtsi Israelyei anaa koni amɛkaye amɛbua mɛi ni jeee Yudafoi kɛ́ amɛmiifɔ, ejaakɛ enɛ baaha aná Jeŋnyo ekoŋŋ yɛ je lɛŋ.—Abodah Zarah 2:1.

Samariabii lɛ bɛŋkɛ Yudafoi lɛ kpaakpa yɛ jamɔ kɛ weku fɛɛ gbɛfaŋ, fe Jeŋmajiaŋbii lɛ. Kɛlɛ, abuuu amɛ hu. Bɔfo Yohane ŋma akɛ: “Yudafoi kɛ Samariabii yeee.” (Yohane 4:9) Lɛɛlɛŋ, Talmud lɛ tsɔɔ akɛ “kpolotoo he tse kwraa fe bodobodo fioo ko ni Samarianyo ko kɛaaha Yudafonyo.” Yudafoi komɛi po kɛ wiemɔ “Samarianyo” lɛ tsuɔ nii kɛtsɔɔ nyaŋemɔ nɔ ko, aloo jɛmɔ.—Yohane 8:48.

Yɛ shihilɛ nɛɛ hewɔ lɛ, wiemɔi ni Yesu kɛ nuu ko ni le Yudafoi lɛ amla lɛ jogbaŋŋ lɛ wie lɛ ji nɔ ko ni tsɔɔ mɔ nii waa diɛŋtsɛ. Nuu lɛ yanina Yesu, ni ebi lɛ akɛ: “Tsɔɔlɔ, mɛni mafee ni maná naanɔ wala?” Yesu ha lɛ hetoo, ni egbala ejwɛŋmɔ kɛtee Mose Mla lɛ ni wo kita akɛ ‘suɔmɔ Yehowa kɛjɛ otsui fɛɛ kɛ osusuma fɛɛ kɛ onyɛmɔ fɛɛ kɛ ojwɛŋmɔ fɛɛ mli’ ni ‘osumɔ onaanyo tamɔ bɔ ni osumɔɔ bo diɛŋtsɛ ohe’ lɛ nɔ. Kɛkɛ ni mlalelɔ lɛ bi Yesu akɛ: “Namɔ ji minaanyo?” (Luka 10:25-29; 3 Mose 19:18; 5 Mose 6:5) Kɛha Farisifoi lɛ, wiemɔ ‘naanyo’ lɛ kɔɔ mɛi pɛ ni kɛ Yudafoi ablemasaji lɛ tsuɔ nii lɛ ahe—no hewɔ lɛ, jeee Jeŋmajiaŋbii lɛ loo Samariabii lɛ kwraa. Kɛ́ mlalelɔ sanetsɛ nɛɛ susuɔ akɛ Yesu baafĩ nakai susumɔ lɛ sɛɛ lɛ, no lɛ enaa baakpɛ ehe.

Samarianyo ni Jie Mɔbɔnalɛ Kpo

Yesu bu abɛ ko, ni ekɛha nuu lɛ sanebimɔ lɛ hetoo.a Ekɛɛ: “Nuu ko yiŋ kɛjɛ Yerusalem kɛmiiya Yeriko.” Gbɛ ni kã Yerusalem kɛ Yeriko teŋ lɛ shɛɔ kilomitai 23. Yɛ fɔji kɛ gɔji bibii ni yɔɔ gbɛ ni atsɔɔ nɔ kɛyaa nɛkɛ maji enyɔ nɛɛ amli lɛ hewɔ lɛ, julɔi teeɔ amɛhe, ni amɛtutuaa mɛi, ni amɛjoɔ foi yɛ gbɛ ni waaa kwraa nɔ. Taakɛ eba lɛ lɛ, gbɛfãlɔ ni yɔɔ Yesu abɛbua lɛ mli lɛ, “eyagbee ojotswalɔi ateŋ, ni amɛkpɔlɔ ehe atade ni amɛpila lɛ, ni amɛyiŋ amɛtee, ni amɛshi lɛ ni egbo fã kɛ fã.”—Luka 10:30.

Yesu kɛtsa nɔ akɛ: “Eba mli akɛ osɔfo ko batsɔ nakai gbɛ lɛ nɔ; ni beni ena lɛ lɛ, egba afã kɛho. Ni nakai nɔŋŋ Levinyo ko hu, beni eshɛ jɛi ni ena lɛ lɛ, egba afã kɛho.” (Luka 10:31, 32) Osɔfoi kɛ Levibii lɛ ji Mla lɛ tsɔɔlɔi—ní mla ni kɔɔ suɔmɔ ni anaa ahaa naanyo hu fata he. (3 Mose 10:8-11; 5 Mose 33:1, 10) Eka shi faŋŋ akɛ, esa akɛ amɛ teete amɛnu he ni amɛye amɛbua gbɛfãlɔ ni epila nɛɛ.

Yesu tee nɔ ekɛɛ akɛ: “Samarianyo ko ni nyiɛ gbɛ bashɛ he ni eyɔɔ lɛ.” Ŋwanejee ko bɛ he akɛ Samarianyo tã ni atsĩ lɛ baahɛle mlalelɔ lɛ shi koni etao babaoo ele. Ani Yesu baakpɛlɛ jwɛŋmɔ ni ejaaa ni kã maŋbii nɛɛ ateŋ lɛ nɔ? Nɔ ni tamɔɔɔ nakai lɛ, Samarianyo lɛ ‘musuŋ tsɔ lɛ,’ beni ena gbɛfãlɔ ni oshara enina lɛ nɛɛ lɛ. Yesu kɛɛ akɛ: “Etee eŋɔɔ eyafimɔ epilamɔi lɛ anɔ, ni efɔse mu kɛ wein eshwie nɔ, ni esaa ewo lɛ eta lɛ diɛŋtsɛ ekooloo lɛ nɔ, ni ekɛ lɛ tee gbɔiatoohe ni eyakwɛ lɛ.b Ni jetsɛrenɔ beni eyaa lɛ, ejie denarioi enyɔ eha gbɔiatoohetsɛ lɛ, ni ekɛɛ lɛ akɛ: Kwɛmɔ lɛ jogbaŋŋ, ni nɔ fɛɛ nɔ ni ooosaa ofite lɛ, kɛ miku misɛɛ miba lɛ, mawoo nyɔmɔ.”—Luka 10:33-35.

Kɛkɛ ni Yesu bi mɔ ni bi lɛ sane lɛ akɛ: “Agbɛnɛ lɛ, mɛi etɛ nɛɛ ateŋ namɔ osusuɔ akɛ etsɔ mɔ ni gbee ojotswalɔi ateŋ nɛɛ naanyo?” Mlalelɔ lɛ le hetoo lɛ, shi kɛlɛ, esumɔɔɔ ni ekɛɔ akɛ “Samarianyo lɛ.” Yɛ no najiaŋ lɛ, ekɛɛ kɛkɛ akɛ: “Mɔ ni na lɛ mɔbɔ lɛ.” Kɛkɛ ni Yesu kɛɛ akɛ: “Bo hu yaa ni oyafee nakai nɔŋŋ.”—Luka 10:36, 37.

Nikasemɔ Kɛha Wɔ

Nuu ni bi Yesu sane lɛ fee nakai koni ‘ekɛbu ehe bem.’ (Luka 10:29) Ekolɛ esusu akɛ Yesu baajie eyi yɛ Mose Mla lɛ ni ehiɛ mli kpɛŋŋ lɛ hewɔ. Shi ehe miihia ni mɔ ni buɔ ehe tsɔ nɛɛ ale anɔkwale ni yɔɔ Biblia lɛ mli lɛ: “Gbɔmɔ gbɛ̀i fɛɛ ja yɛ lɛ diɛŋtsɛ ehiɛ; shi Yehowa ji mɔ ni ŋmɛɔ tsui ekwɛɔ.”—Abɛi 21:2.

Abɛ ni Yesu bu lɛ tsɔɔ akɛ, gbɔmɔ ni ja yɛ anɔkwale mli lɛ booo Nyɔŋmɔ mlai lɛ atoi kɛkɛ, shi moŋ ekaseɔ esui kpakpai lɛ hu. (Efesobii 5:1) Ákɛ nɔkwɛmɔnɔ lɛ, Biblia lɛ kɛɔ wɔ akɛ, “Nyɔŋmɔ jeee mɛi ahiɛaŋkwɛlɔ.” (Bɔfoi lɛ Asaji 10:34) Ani wɔkaseɔ Nyɔŋmɔ yɛ nɛkɛ gbɛ nɔ? Yesu abɛbua ní taa mɔ mli nɛɛ tsɔɔ akɛ esa akɛ wɔ naanyobɔɔ lɛ ateke maŋ nɔ ni mɔ ko jɛ, kusumii nifeemɔi, kɛ jamɔŋ nifeemɔi. Lɛɛlɛŋ, atsɔɔ Kristofoi koni ‘amɛfee mɛi fɛɛ ejurɔ’—jeee amɛtipɛŋfoi, mɛi ni amɛkɛ amɛ jɛ weku, aloo maŋ kome mli, asaŋ jeee nanemɛi heyelilɔi pɛ kɛkɛ.—Galatabii 6:10.

Yehowa Odasefoi bɔɔ mɔdɛŋ koni amɛnyiɛ nɛkɛ Ŋmalɛ mli ŋaawoo nɛɛ sɛɛ. Ákɛ nɔkwɛmɔnɔ lɛ, kɛ́ adebɔɔ mli oshara ba lɛ, amɛkɛ nibii yayeɔ amɛbuaa nanemɛi heyelilɔi kɛ mɛi ni amɛjeee Odasefoi fɛɛ.c Kɛfata he lɛ, kɛ abua naa lɛ, amɛkɛ nɔ ni fa fe ŋmɛlɛtswai akpekpe toi akpe kome tsuɔ nii daa afi kɛyeɔ amɛbua gbɔmɛi koni amɛbaná Biblia lɛ mli nilee jogbaŋŋ. Amɛbɔɔ mɔdɛŋ koni amɛkɛ Maŋtsɛyeli shɛɛ sane lɛ ashɛ mɔ fɛɛ mɔ ŋɔɔ, ejaakɛ nɔ ni Nyɔŋmɔ sumɔɔ ji akɛ, “ehere gbɔmɛi [srɔtoi, NW] fɛɛ yiwala, koni amɛshɛ anɔkwale lɛ lee mli.”—1 Timoteo 2:4; Bɔfoi lɛ Asaji 10:35.

[Shishigbɛ niŋmai]