Nyɛshea Yehowa, Mɔ Ni Boɔ Sɔlemɔ Toi Lɛ Gbeyei
“Bo ni oboɔ sɔlemɔ toi, bo oŋɔɔ heloo fɛɛ baa.”—LALA 65:3
1. Mɛni hewɔ esa akɛ wɔkpa gbɛ akɛ Yehowa baahi taomɔ nii kɛha mɛi ni taoɔ abɛŋkɛ lɛ yɛ sɔlemɔ mli lɛ?
YEHOWA NYƆŊMƆ ji “naanɔ Maŋtsɛ.” Lɛ nɔŋŋ hu ji mɔ ni “boɔ sɔlemɔ toi,” ni lɛ eŋɔɔ “heloo fɛɛ baa.” (Kpojiemɔ 15:3, New World Translation; Lala 65:3) Shi mɛɛ gbɛ nɔ esa akɛ amɛtsɔ kɛba eŋɔɔ? Shikpɔŋ nɔ maŋtsɛmɛi biɔ nibii komɛi tamɔ atade ni esa akɛ awo kɛ gbɛ ni esa akɛ atsɔ nɔ aba amɛhiɛ. No hewɔ lɛ, esa akɛ wɔkpa Naanɔ Maŋtsɛ lɛ gbɛ lɛlɛŋ akɛ ebaahi taomɔ nii ni esa akɛ mɔ fɛɛ mɔ ni baa ehiɛ kɛ faikpamɔ kɛ shidaa lɛ ashɛ he.—Filipibii 4:6, 7.
2. Mɛɛ sanebimɔi teɔ shi yɛ sɔlemɔ he?
2 Mɛni Naanɔ Maŋtsɛ lɛ biɔ kɛjɛɔ mɛi ni bɛŋkɛɔ lɛ yɛ sɔlemɔ mli lɛ adɛŋ? Namɛi baanyɛ asɔle ni abo amɛ toi? Ni mɛni he amɛbaanyɛ amɛsɔle yɛ?
Naanɔ Maŋtsɛ lɛ Bɛŋkɛmɔ
3. Mɛɛ nɔkwɛmɔ nii obaanyɛ okɛha yɛ Nyɔŋmɔ tsuji ni hi shi yɛ mra be mli lɛ asɔlemɔi ahe, ni ani amɛtsɔ teŋdamɔlɔ ko nɔ amɛbɛŋkɛ lɛ?
3 Eka shi faŋŋ akɛ, Adam ni ji “Nyɔŋmɔ bi” lɛ kɛ Naanɔ Maŋtsɛ lɛ wieɔ dani ebatsɔ eshafeelɔ. (Luka 3:38, NW; 1 Mose 1:26-28) Beni Adam binuu Habel kɛ “etooi akromɔbii lɛ” baha Nyɔŋmɔ lɛ, ŋwanejee ko bɛ he akɛ faikpamɔ kɛ shidaa wiemɔi fata nɛkɛ nikee nii nɛɛ he. (1 Mose 4:2-4) Noa, Abraham, Isak, kɛ Yakob ma afɔleshaa latɛi ni amɛkɛ amɛ afɔlei lɛ bɛŋkɛ Yehowa yɛ sɔlemɔ mli. (1 Mose 8:18-22; 12:7, 8; 13:3, 4, 18; 22:9-14; 26:23-25; 33:18-20; 35:1, 3, 7) Ni Salomo, Ezra kɛ lalatsɛmɛi ni akɛ mumɔ tsirɛ amɛ lɛ asɔlemɔi lɛ tsɔɔ akɛ Israelbii lɛ bɛŋkɛ Nyɔŋmɔ ni jeee kɛtsɔ teŋdamɔlɔ ko nɔ.—1 Maŋtsɛmɛi 8:22-24; Ezra 9:5, 6; Lala 6:1, 2; 43:1; 55:1; 61:1; 72:1; 80:1; 143:1.
4. (a) Mɛɛ gbɛ hee ni atsɔɔ nɔ abɛŋkɛɔ Nyɔŋmɔ yɛ sɔlemɔ mli ato shishi yɛ klɛŋklɛŋ afi oha lɛ mli? (b) Mɛni hewɔ eja gbɛ jogbaŋŋ akɛ aaasɔle yɛ Yesu gbɛi amli lɛ?
4 Ato gbɛ hee ni aaatsɔ nɔ abɛŋkɛ Nyɔŋmɔ yɛ sɔlemɔ mli lɛ shishi yɛ wɔ Ŋmɛnɛŋmɛnɛ Beaŋ klɛŋklɛŋ afii oha lɛ mli. No ji kɛtsɔ e-Bi, Yesu Kristo, ni jie suɔmɔ krɛdɛɛ ko kpo etsɔɔ adesai lɛ nɔ. Beni eyɔɔ shihilɛ mli dani ebatsɔ gbɔmɔ lɛ, Yesu kɛ miishɛɛ sɔmɔ akɛ “ŋaalɔ,” ni enyaa nibii ni kɔɔ adesai ahe lɛ he. (Abɛi 8:30, 31) Beni eyɔɔ shikpɔŋ nɔ akɛ adesa lɛ, Yesu jɛ suɔmɔ mli eye ebua adesai ni yeee emuu lɛ yɛ mumɔŋ, etsa mɛi ni he yeɔ lɛ, ni etee gbohii ashi po. (Mateo 9:35-38; Luka 8:1-3, 49-56) Ni nɔ ni fe fɛɛ lɛ, Yesu kɛ ‘esusuma ha yɛ mɛi pii akpɔmɔ hewɔ.’ (Mateo 20:28) Belɛ, kwɛ bɔ ni esa jogbaŋŋ, akɛ mɛi ni haa kpɔmɔ nɔ lɛ he baa sɛɛnamɔ kɛhaa amɛ lɛ aaabɛŋkɛ Nyɔŋmɔ kɛtsɔ mɔ ni sumɔɔ adesai jogbaŋŋ nɛɛ nɔ! Amrɔ nɛɛ gbɛ pɛ ni atsɔɔ nɔ abɛŋkɛɔ Naanɔ Maŋtsɛ lɛ nɛ, ejaakɛ Yesu diɛŋtsɛ kɛɛ: “Mɔ ko baaa tsɛ lɛ ŋɔɔ, akɛ ja etsɔ minɔ,” kɛ “Nɔ fɛɛ nɔ he fai ni nyɛaakpa tsɛ lɛ yɛ migbɛi anɔ lɛ, eeeha nyɛ.” (Yohane 14:6; 16:23) Ni wɔɔbi nii yɛ Yesu gbɛi amli lɛ tsɔɔ akɛ wɔkpɛlɛɔ enɔ akɛ gbɛ pɛ ni wɔɔtsɔ nɔ wɔbɛŋkɛ sɔlemɔ Toibolɔ lɛ.
5. Te Nyɔŋmɔ feɔ enii yɛ adesai aje lɛ he ehaa tɛŋŋ, ni enɛ saa sɔlemɔ he yɛ mɛɛ gbɛ nɔ?
5 Esa akɛ wɔjie hiɛsɔɔ kpo yɛ suɔmɔ ni Yehowa jie lɛ kpo kɛtsɔ kpɔmɔ nɔ ni ekɛha lɛ he titri. Yesu kɛɛ: “Ejaakɛ nɛkɛ Nyɔŋmɔ sumɔɔ [adesai] je lɛ, akɛ eŋɔ ebi koome lɛ eha, koni mɔ fɛɛ mɔ ni heɔ enɔ yeɔ lɛ hiɛ akakpata, shi moŋ ena naanɔ wala.” (Yohane 3:16) Anaa bɔ ni Nyɔŋmɔ suɔmɔ lɛ mli kwɔ ha lɛ yɛ lalatsɛ lɛ wiemɔi nɛɛ amli: “Shi moŋ, bɔ ni ŋwɛi kwɔ fe shikpɔŋ lɛ, nakai emɔbɔnalɛ lɛ fa yɛ mɛi ni sheɔ lɛ lɛ anɔ. Bɔ ni boka kɛ anai teŋ jɛkɛ lɛ, nakai ehaa wɔkɛ wɔ nɔtɔmɔi lɛ ateŋ jɛkɛɔ. Bɔ ni tsɛ musuŋ tsɔɔ lɛ yɛ ebii ahe lɛ, nakai Yehowa musuŋ tsɔɔ lɛ yɛ mɛi ni sheɔ lɛ lɛ ahe. Ejaakɛ ele wɔsu kɛ wɔbaŋ, ekaiɔ akɛ su kɛkɛ ji wɔ.” (Lala 103:11-14) Kwɛ bɔ ni ehaa wɔtsui nyɔɔ wɔmli akɛ wɔɔle akɛ Yehowa Odasefoi ni ejɔɔ amɛhe nɔ lɛ asɔlemɔi yaa Tsɛ ni yɔɔ suɔmɔ lɛ ŋɔɔ kɛtsɔ e-Bi lɛ nɔ!
Hegbɛ ni Husu Yɔɔ He
6. Mɛɛ su esa akɛ akɛbɛŋkɛ Yehowa yɛ sɔlemɔ mli?
6 Maŋtsɛmɛi ni ji adesai lɛ eŋmɛɛɛ gbɛ ni adesa ko kɛkɛ ate shi ni eba maŋtsɛwe lɛ trukaa. Ni mɔ ko aaaba ebana maŋtsɛ lɛ ji hegbɛ ko ni husu yɔɔ he. Nakai nɔŋŋ sɔlemɔ hu ji kɛha naanɔ Maŋtsɛ lɛ. Yɛ anɔkwale mli lɛ, mɛi ni bɛŋkɛɔ lɛ kɛtsɔ Yesu Kristo nɔ kɛ hiɛsɔɔ kɛha Nyɔŋmɔ agbojee ni yɔɔ nyam lɛ baakpa gbɛ akɛ ebaabo amɛ toi. Esa akɛ abɛŋkɛ Naanɔ Maŋtsɛ lɛ kɛ bulɛ, kɛ jamɔ su. Ni esa akɛ mɛi ni taoɔ ni abo amɛ toi lɛ ajie “Yehowa gbeyeishemɔ” kpo.—Abɛi 1:7.
7. Mɛni ji “Yehowa gbeyeishemɔ”?
7 Mɛni ji “Yehowa gbeyeishemɔ”? No ji bulɛ ni mli kwɔ ni ayɔɔ kɛha Nyɔŋmɔ, kɛ gbeyei ni asheɔ yɛ gbɛ ni ja nɔ akɛ aaafee nɔ ko ni esaŋ ehiɛ. Nɛkɛ gbeyeishemɔ ni mli kwɔ nɛɛ jɛɔ hiɛsɔɔ ni mli kwɔ ni wɔnaa wɔhaa emlihilɛ kɛ ejurɔ ni efeɔ wɔ lɛ. (Lala 106:1) Nɔ ni fata he hu ji kpɛlɛmɔ ni wɔɔkpɛlɛ nɔ akɛ eji naanɔ Maŋtsɛ, mɔ ni yɔɔ hegbɛ kɛ hewalɛ akɛ ekɛ toigbalamɔ ni gbele fata he baa mɔ fɛɛ mɔ ni ebuuu lɛ lɛ nɔ. Gbɔmɛi ni jieɔ Yehowa gbeyeishemɔ kpo lɛ baasɔle amɛha lɛ kɛ gbɛkpamɔ akɛ ebaabo amɛ toi.
8. Mɛni hewɔ ni Nyɔŋmɔ boɔ mɛi ni sheɔ lɛ gbeyei lɛ asɔlemɔi atoi lɛ?
8 Taakɛ akpaa gbɛ lɛ, Nyɔŋmɔ haaa efɔŋfeelɔi, mɛi ni yeee anɔkwa, kɛ mɛi ni buɔ amɛhe jalɔi lɛ asɔlemɔi ahetoo. (Abɛi 15:29; Yesaia 1:15; Luka 18:9-14) Shi Yehowa boɔ mɛi ni sheɔ lɛ gbeyei lɛ atoi ejaakɛ amɛhiɔ shi yɛ ejalɛ tɛi ni efolɔ eshwie shi lɛ naa. Ni kɛlɛ amɛfeɔ babaoo. Mɛi ni sheɔ Yahowa gbeyei lɛ ejɔɔ amɛhe nɔ amɛha Nyɔŋmɔ yɛ sɔlemɔ mli ni amɛfee enɛ he okadi kɛtsɔ nu mli baptisimɔ nɔ. Enɛ hewɔ lɛ amɛyɛ sɔlemɔ hegbɛ ko ni husu bɛ he.
9, 10. Ani mɛi ni abaptisiko amɛ lɛ baanyɛ asɔle kɛ hiɛnɔkamɔ akɛ abaabo amɛ toi?
9 Kɛji Nyɔŋmɔ baabo mɔ ko toi lɛ, esa akɛ mɔ lɛ ajie henumɔi ni kɛ Nyɔŋmɔ suɔmɔnaa nii kpaa gbee lɛ kpo yɛ esɔlemɔi amli. Hɛɛ, esa akɛ eye anɔkwa, shi babaoo he miihia lolo. Bɔfo Paulo ŋma akɛ, “kɛ hemɔkɛyeli bɛ lɛ, anyɛŋ Nyɔŋmɔ hiɛ asa; ejaakɛ mɔ ni baa Nyɔŋmɔ ŋɔɔ lɛ, ja ehe eye akɛ eyɛ, ni eji mɛi ni taoɔ esɛɛ gbɛ lɛ anyɔmɔwolɔ.” (Hebribii 11:6) Ojogbaŋŋ, belɛ, ani abaanyɛ awo mɛi ni abaptisiko amɛ lɛ hewalɛ ni amɛsɔle kɛ hiɛnɔkamɔ akɛ abaabo amɛ toi?
10 Akɛni Maŋtsɛ Salomo le akɛ sɔlemɔ ji hegbɛ ko ni husu yɔɔ he hewɔ lɛ, ebi ni Yehowa abo gbɔi ni tsɔɔ amɛhiɛ amɛhaa Nyɔŋmɔ sɔlemɔ tsu ni yɔɔ Yerusalem lɛ ni amɛsɔleɔ lɛ pɛ toi. (1 Maŋtsɛmɛi 8:41-43) Afii ohai komɛi asɛɛ lɛ, Jeŋmajiaŋnyo gbɔ Kornelio ‘kpa Nyɔŋmɔ fai daa’ akɛ mɔ ko ni ejɔɔ ehe nɔ. Yɛ be mli ni ebana anɔkwa nilee sɛɛ lɛ, Kornelio jɔɔ ehe nɔ eha Nyɔŋmɔ, mɔ ni sɛɛ mli lɛ eha lɛ mumɔ krɔŋkrɔŋ lɛ. Yɛ enɛ sɛɛ lɛ, abaptisi Kornelio kɛ Jeŋmajiaŋbii krokomɛi (Bɔfoi lɛ Asaji 10:1-44) Taakɛ Kornelio ji lɛ, abaanyɛ awo mɛi fɛɛ ni yaa amɛhiɛ kɛbɛŋkɛɔ henɔjɔɔmɔ he lɛ hewalɛ ni amɛsɔle. Shi anyɛŋ akɛɛ yɛ mɔ aŋkro ni yeee anɔkwa yɛ Biblia lɛ kasemɔ he, ni leee taomɔ nii ni abiɔ kɛha sɔlemɔ, ni ejieko su ni saa Nyɔŋmɔ hiɛ lɛ kpo lɛ he akɛ esheɔ Yehowa gbeyei, ni eyɛ hemɔkɛyeli, aloo ekɛ mɔdɛŋbɔɔ taoɔ esɛɛ gbɛ. Gbɔmɔ ni tamɔ nɛkɛ nyɛŋ ekɛ sɔlemɔi ni saa Nyɔŋmɔ hiɛ aha.
11. Mɛni eba mɛi komɛi ni kulɛ amɛmiiya amɛhiɛ kɛmiishɛ henɔjɔɔmɔ he lɛ anɔ, ni mɛni esa akɛ amɛbi amɛhe?
11 Mɛi komɛi ni tsutsu ko lɛ amɛmiiya amɛhiɛ kɛmiishɛ henɔjɔɔmɔ he lɛ nyɛɔ amɛgbalaa amɛhe shi yɛ sɛɛ mli. Kɛ amɛbɛ suɔmɔ ni mli kwɔ kɛha Nyɔŋmɔ yɛ amɛtsuii amli ni amɛkɛaajɔɔ amɛhe nɔ kwraa kɛha lɛ lɛ, belɛ esa akɛ amɛbi amɛhe akɛ ani amɛyɛ hegbɛ ni yɔɔ naakpɛɛ ni ji sɔlemɔ lɛ lolo lo. Eka shi faŋŋ akɛ jeee nakai ni, ejaakɛ esa akɛ mɛi ni bɛŋkɛɔ Nyɔŋmɔ lɛ kɛ mɔdɛŋbɔɔ atao esɛɛ gbɛ kɛ agbɛnɛ jalɛ kɛ heshibaa hu. (Zefania 2:3) Mɔ fɛɛ mɔ ni sheɔ Yehowa gbeyei lɛlɛŋ lɛ ji heyelilɔ ni jɔɔ ehe nɔ ehaa Nyɔŋmɔ ni efeɔ he okadi kɛtsɔɔ baptisimɔ nɔ. (Bɔfoi lɛ Asaji 8:13; 18:8) Ni heyelilɔi ni abaptisi amɛ lɛ pɛ yɔɔ hegbɛ ni husu bɛ he akɛ amɛaabɛŋkɛ Naanɔ Maŋtsɛ lɛ yɛ sɔlemɔ mli.
“Nyɛsɔlea yɛ Mumɔ Krɔŋkrɔŋ lɛ Mli”
12. Mɛɛ be mli abaanyɛ akɛɛ akɛ mɔ ko ‘miisɔle yɛ mumɔ krɔŋkrɔŋ lɛ mli’?
12 Yɛ be mli ni mɔ ko ejɔɔ ehe nɔ eha Nyɔŋmɔ ni ekɛ baptisimɔ efee he okadi sɛɛ lɛ, ebanaa hegbɛ akɛ ‘eeesɔle yɛ mumɔ krɔŋkrɔŋ lɛ mli.’ Yuda ŋma yɛ enɛ he akɛ: “Shi, suɔmɔ mɛi, nyɛ lɛ nyɛhaa nyɛnane amɔa shi yɛ nyɛ hemɔkɛyeli ni yɔɔ krɔŋkrɔŋ fe fɛɛ lɛ nɔ, ni nyɛsɔlea yɛ mumɔ krɔŋkrɔŋ lɛ mli, ni nyɛtoa nyɛhe yɛ Nyɔŋmɔ suɔmɔ lɛ mli, ni nyɛkwɛa wɔ-Nuŋtsɔ Yesu Kristo mɔbɔnalɛ lɛ gbɛ, koni nyɛna naanɔ wala.” (Yuda 20, 21) Kɛji mɔ ko sɔleɔ yɛ Nyɔŋmɔ mumɔ, loo nitsumɔ hewalɛ lɛ hewalɛ shishi, ni ekɛ nibii ni awie yɛ E-Wiemɔ lɛ mli lɛ kpaa gbee lɛ, belɛ mɔ lɛ sɔleɔ yɛ mumɔ krɔŋkrɔŋ lɛ mli. Ŋmalɛi lɛ, ni aŋma yɛ Yehowa mumɔ lɛ tsirɛmɔ shishi lɛ, tsɔɔ wɔ gbɛ ni wɔɔtsɔ nɔ wɔsɔle kɛ nibii ni wɔbaanyɛ wɔbi yɛ sɔlemɔ mli. Akɛ nɔkwɛmɔ nɔ lɛ, wɔbaanyɛ wɔkɛ hiɛnɔkamɔ abi ni Nyɔŋmɔ aha wɔ emumɔ krɔŋkrɔŋ lɛ. (Luka 11:13) Kɛ wɔsɔle yɛ mumɔ krɔŋkrɔŋ lɛ mli lɛ, wɔsɔlemɔi lɛ jieɔ wɔtsuiaŋ henumɔi ni Yehowa sumɔɔ lɛ kpo.
13. Kɛ wɔsɔle yɛ mumɔ krɔŋkrɔŋ lɛ mli lɛ, mɛni wɔbaatsi wɔhe kɛjɛ he, ni mɛɛ Yesu ŋaawoo wɔkɛbaatsu nii?
13 Kɛ wɔsɔle yɛ mumɔ krɔŋkrɔŋ lɛ mli lɛ, wɔsɔlemɔ lɛ efeŋ nɔ ni eyi obɔ kɛ wiemɔi foji. Amɛfeŋ nɔ ni ato he gbɛjianɔ ni akase awo yitsoŋ ni aakɛɛ ni ajwɛŋŋ he. Dabi, wiemɔi foji ni akɛjieɔ Nyɔŋmɔ yi ni jɛɛɛ anɔkwayeli mli lɛ fataaa he. Anaa sɔlemɔi ni tamɔ nɛkɛ babaoo yɛ Kristendom kɛ Babilon Kpeteŋkpele lɛ, jeŋ apasa jamɔ maŋtsɛyeli lɛ fai krokomɛi ni eshwe lɛ amli. Shi anɔkwa Kristofoi boɔ Yesu ŋaawoo nɛɛ toi: “Shi kɛ nyɛmiisɔle lɛ, nyɛkafea tamɔ osatofoi lɛ ji lɛ; ejaakɛ amɛsumɔɔ ni amɛdamɔ kpeehei lɛ kɛ gbɛjegbɛi lɛ anɔ ni amɛsɔle, koni mɛi ana amɛ . . . Ni kɛ nyɛmiisɔle lɛ, nyɛkawiea trilii tamɔ wɔŋjalɔi; ejaakɛ amɛsusuɔ [yɛ gbɛ ni ejaaa nɔ] akɛ amɛwiemɔi babaoo lɛ baaha abo amɛ toi. No hewɔ lɛ nyɛkatamɔa amɛ.”—Mateo 6:5-8, Byington.
14. Mɛɛ wiemɔi ni haa anuɔ nii ashishi babaoo mɛi ewie yɛ sɔlemɔ he?
14 Yɛ Yesu kɛ Biblia ŋmalalɔi lɛ asɛɛ lɛ, mɛi krokomɛi hu ewie wiemɔi ni haa anuɔ sɔlemɔ shishi babaoo. Akɛ nɔkwɛmɔ nɔ lɛ, Ŋleshi Blɔfo niŋmalɔ John Bunyan (1628-88) kɛɛ: “Sɔlemɔ ji anɔkwa, kɛ nilee, kɛ suɔmɔ gbɛ ni atsɔɔ nɔ afɔseɔ susuma muu lɛ fɛɛ ahaa Nyɔŋmɔ, kɛtsɔ Kristo nɔ, yɛ Mumɔ lɛ hewalɛ kɛ yelikɛbuamɔ naa, kɛha nibii ni Nyɔŋmɔ ewo shi yɛ amɛhe lɛ.” Puritan osɔfo Thomas Brooks (1608-80) kɛɛ: “Jeee bɔ ni osɔlemɔi lɛ amli wiemɔi ji lɛ Nyɔŋmɔ kwɛɔ, bɔ ni amɛŋɔɔ ha; aloo esɔlemɔi lɛ adaramɔ, bɔ ni amɛsɛɛkɛlɛmɔ ji; aloo osɔlemɔi lɛ ahe akɔntaabuu, bɔ ni efalɛ ji; jeee saneshishinumɔ ni yɔɔ osɔlemɔi lɛ amli lɛ, bɔ ni oto amɛnaa oha lɛ; shi anɔkwayeli ni yɔɔ mli lɛ ji nɔ ni ekwɛɔ.” Abaanyɛ akɛ Bunyan wiemɔi nɛɛ afata he akɛ: “Ehi moŋ akɛ mɔ ko aaana tsui ni wiemɔi bɛ he yɛ sɔlemɔ mli, fe wiemɔi ni tsui bɛ he.” Shi kɛ wɔyeɔ anɔkwa ni wɔshɛɔ ŋwɛi taomɔ nii ahe lɛ, te wɔɔfee tɛŋŋ wɔma nɔ mi akɛ naanɔ Maŋtsɛ lɛ baabo wɔsɔlemɔi atoi lɛ?
Etsɔɔɔ Esɛɛ Ehaaa Wɔ
15. Mɛni ji nɔ ni Yesu kɛɛ yɛ Luka 11:5-8 lɛ mli agugu?
15 Yehowa Nyɔŋmɔ tsimɔɔɔ etoi ewooo etsuji ni ejɔɔ amɛhe nɔ amɛha lɛ lɛ asɔlemɔi. Afee enɛ faŋŋ yɛ Yesu wiemɔi ni haa mɔ tsui nyɔɔ emli lɛ mli beni ekaselɔi lɛ bi gbɛtsɔɔmɔ yɛ sɔlemɔ he lɛ. Nɔ ni ekɛɛ amɛ lɛ fa ko ji: “Nyɛteŋ namɔ ni yɔɔ shieŋtsɛ ni eeetee eŋɔɔ nyɔɔŋ teŋ, ni eyakɛɛ lɛ akɛ: Shieŋtsɛ, faa mi aboloi etɛ, ejaakɛ mishieŋtsɛ ko ejɛ gbɛ ebato mi, ni mibɛ nɔ ko ni mikɛbaama ehiɛ; ni mɔ ni yɔɔ tsuŋ lɛ aaahere nɔ akɛ: Kaagba minaa, aŋa shinaa lɛ momo ni mi kɛ mibii jwere saa nɔ, minyɛŋ shi mate ni mahão. Miikɛɛ nyɛ akɛ, kɛ ka eshieŋtsɛ ni ji lɛ hewɔŋ kulɛ eteŋ shi ni eha lɛ, shi enaagbamɔ lɛ hewɔ lɛ eeete shi kɛ̃ ni eha lɛ bɔ fɛɛ bɔ ni etaoɔ.” (Luka 11:1, 5-8) Mɛni ji oti ni yɔɔ nɛkɛ abɛbua nɛɛ mli?
16. Mɛni Yesu tao ni wɔfee yɛ sɔlemɔ he?
16 Eka shi faŋŋ akɛ Yesu etsɔɔɔ akɛ Yehowa sumɔɔɔ ni eyeɔ ebuaa wɔ. Shi moŋ, Kristo miitao ni wɔkɛ wɔhe afɔ Nyɔŋmɔ nɔ kwraa ni wɔsumɔ lɛ babaoo bɔ ni aaaha wɔsɔle ni wɔkpaaa. No hewɔ lɛ, Yesu tee nɔ akɛ: “Ni mi hu miikɛɛ nyɛ akɛ: Nyɛbia, ni aaaha nyɛ; nyɛtaoa, ni nyɛaana, nyɛshia, ni aaagbele nyɛ. Ejaakɛ mɔ fɛɛ mɔ ni biɔ lɛ enine shɛɔ nɔ; ni mɔ ni taoɔ lɛ, enaa; ni mɔ ni shiɔ lɛ, aaagbele lɛ.” (Luka 11:9, 10) No hewɔ lɛ, esa akɛ wɔya nɔ wɔsɔle yɛ be mli ni wɔkɛ yiwaa loo haomɔi ni jɛ wɔ diɛŋtsɛ wɔ gbɔjɔmɔi komɛi, aloo kaai krokomɛi amli kpeɔ lɛ. Yehowa efee klalo be fɛɛ be akɛ ebaaye ebua etsuji anɔkwafoi lɛ. Ekɛŋ wɔ kɔkɔɔkɔ akɛ: “Nyɛkagbaa minaa.”
17, 18. (a) Mɛɛ gbɛ nɔ Yesu wo wɔ hewalɛ koni wɔbi ni aha wɔ mumɔ krɔŋkrɔŋ lɛ yɛ, ni mɛni haa hewalɛ ni yɔɔ ewiemɔi lɛ mli lɛ yaa hiɛ? (b) Yɛ mɛɛ gbɛ nɔ Yesu kɛ shikpɔŋ nɔ fɔlɔ ko nifeemɔi to Nyɔŋmɔ nɔ he?
17 Kɛji wɔbaana wɔkɛ wɔ ŋwɛi Tsɛ lɛ teŋ wekukpaa ni bɛŋkɛ kpaakpa mli ŋɔɔmɔ lɛ, belɛ emumɔ krɔŋkrɔŋ, loo nitsumɔ hewalɛ lɛ he baahia wɔ. No hewɔ lɛ, Yesu tee nɔ akɛ: “Shi mɛɛ tsɛ yɔɔ nyɛteŋ ni kɛji ebi bi lɛ loo lɛ, ni eeeŋɔ onufu efee loo eha lɛ? Aloo kɛji ebi wuɔwɔlɔ lɛ, eeeha lɛ nyɔŋmɔŋkrakro? Belɛ kɛji nyɛ ni nyɛji mɛi fɔji lɛ nyɛle bɔ ni nyɛfeɔ ni nyɛkɛ nikeenii kpakpai keɔ nyɛbii lɛ, enyiɛ nɔŋŋ nyɛ-tsɛ ni yɔɔ ŋwɛi lɛ eŋɔŋ mumɔ krɔŋkrɔŋ ehaŋ mɛi ni biɔ lɛ lɛ?” (Luka 11:11-13, New World Translation) Mateo 7:9-11 wieɔ tɛ ni akɛaaha yɛ aboloo najiaŋ lɛ he. Hewalɛ ni yɔɔ Yesu wiemɔi lɛ amli lɛ yaa hiɛ kɛji wɔyoo akɛ aboloo ni ashaa yɛ Biblia mli blema shikpɔji anɔ lɛ su kɛ edalɛ tamɔ tɛ tɛtrɛɛ, kokloo lɛ. Onufui komɛi hu yɛ ni amɛje looi komɛi, ni nyɔŋmɔŋkrakro yɛŋ bibioo ko yɛ ni eje wuɔwɔlɔ fioo. Shi mɛɛ tsɛ yɔɔ ni kɛ ebi bi lɛ aboloo, loo, loo wuɔwɔlɔ lɛ, ni eeeha lɛ tɛ, onufu, aloo nyɔŋmɔŋkrakro?
18 Yesu tee nɔ ni ekɛ bɔ ni shikpɔŋ nɔ fɔlɔi feɔ amɛnii lɛ to bɔ ni Nyɔŋmɔ feɔ enii yɛ E-jalɔi aweku lɛ mlibii ahe lɛ he. Kɛji akɛ wɔ, ni wɔji mɛi fɔji yɛ esha ni akɛfɔ wɔ lɛ hewɔ po lɛ, wɔkɛ nikeenii kpakpai haa wɔbii lɛ, enyiɛ nɔŋŋ ni esaaa akɛ wɔkpaa wɔ ŋwɛi Tsɛ lɛ gbɛ akɛ ekɛ nikeenii ni jara wa ni ji emumɔ krɔŋkrɔŋ lɛ aaaha etsuji anɔkwafoi ni kɛ heshibaa biɔ lɛ lɛ!
19. (a) Mɛni Yesu wiemɔi ni aŋma yɛ Luka 11:11-13 kɛ Mateo 7:9-11 lɛ maa nɔ mi kɛhaa wɔ? (b) Kɛ mumɔ krɔŋkrɔŋ lɛ ji nɔ ni nyiɛɔ wɔhiɛ lɛ, te wɔɔbu kaai ni baa wɔnɔ lɛ tɛŋŋ?
19 Yesu wiemɔi lɛ maa nɔ mi kɛhaa wɔ akɛ esa akɛ wɔbi Nyɔŋmɔ ni eha wɔ E-mumɔ krɔŋkrɔŋ lɛ babaoo. Kɛji no ji nɔ ni kudɔɔ wɔ lɛ, ‘wɔwieŋ wɔshihilɛ mli naagbai ahe’ ni wɔbuŋ kaai kɛ wɔnine ni nyɛɔ shi lɛ akɛ nibii ni yeɔ wɔ awui diɛŋtsɛ. (Yuda 16) Eji anɔkwale, “gbɔmɔ ni yoo fɔ lɛ yɔɔ nɛɛ, kukuoo kɛkɛ ji egbii lɛ, ni emli eyi tɔ kɛ haomɔ sɔŋŋ,” ni mɛi babaoo ji mɛi ni ehiii shi ni amɛaana amɛnaagbai kɛ tsuiyelii lɛ anaagbee (Hiob 14:1) Shi nyɛkahaa wɔbua wɔkaai lɛ akɛ tɛi, onufui, kɛ nyɔŋmɔŋkrakroi ni sɔlemɔ Toibolɔ lɛ kɛha wɔ yɛ gbɛ ko gbɛ ko nɔ. Eji suɔmɔ he nɔkwɛmɔ nɔ ni nɔ kwɔ fe fɛɛ ni ekɛ nibii fɔji ekaaa mɔ ko mɔ ko. Shi moŋ, ehaa wɔ ‘duromɔ nii kpakpai fɛɛ kɛ nikeenii ni hi kɛwula shi.’ Yɛ enɛ hewɔ lɛ, ebaaha nɔ fɛɛ nɔ ahi aha mɛi ni sumɔɔ lɛ ni amɛsheɔ lɛ gbeyei lɛ. (Yakobo 1:12-17; 1 Yohane 4:8) Mɛi ni kɛ afii babaoo ehi anɔkwale lɛ mli lɛ le kɛjɛ niiashikpamɔ mli akɛ amɛkaai ni mli wawai lɛ babaoo anaagbee yafee sɛɛnamɔi kɛha amɛ ni eha Nyɔŋmɔ mumɔ lɛ yibii ni amɛwoɔ yɛ amɛshihilɛ mli lɛ etee hiɛ, kɛtsɔ sɔlemɔ kɛ hemɔkɛyeli nɔ. (3 Yohane 4) Yɛ anɔkwale mli lɛ, mɛɛ gbɛ ni hi fe enɛ wɔɔtsɔ nɔ wɔkase hekɛnɔfɔɔ yɛ wɔ ŋwɛi Tsɛ lɛ mli ni eye ebua wɔ ni wɔwo mumɔ lɛ yibii ni ji suɔmɔ, miishɛɛ, toiŋjɔlɛ, tsuishitoo, mlihilɛ, ejurɔfeemɔ, hemɔkɛyeli, mlijɔlɛ, kɛ henɔyeli?—Galatabii 5:22, 23.
20. Mɛɛ hewalɛ esa ekɛ Yesu wiemɔi ni aŋma yɛ Luka 11:5-13 lɛ ana yɛ wɔnɔ?
20 No hewɔ lɛ Yesu wiemɔi ni aŋmala yɛ Luka 11:5-13 lɛ haa wɔ Yehowa suɔmɔ kɛ ekwɛmɔ he nɔmimaa ni jɔɔmɔ yɔɔ mli. Esa akɛ enɛ aha hiɛsɔɔ ni mli kwɔ kɛ suɔmɔ ayimɔ wɔtsuii amli. Esa akɛ eha wɔhemɔkɛyeli mli awa ni eha suɔmɔ ni wɔyɔɔ akɛ wɔɔya Naanɔ Maŋtsɛ lɛ naneshi maaŋoo lɛ hiɛ shii abɔ ni wɔtsɛ yɛ ehiɛ yɛ esuɔmɔ lɛ mli lɛ aya hiɛ. Kɛfata he lɛ, Yesu wiemɔi lɛ maa nɔ mi ehaa wɔ akɛ ahaŋ wɔku wɔsɛɛ efolo. Wɔ ŋwɛi Tsɛ lɛ yɛ he miishɛɛ babaoo akɛ wɔɔshɛrɛ wɔjatsui lɛ wɔshwie enɔ. (Lala 55:22; 121:1-3) Ni kɛ wɔbi emumɔ krɔŋkrɔŋ lɛ akɛ etsuji anɔkwafoi ni ejɔɔ amɛhe nɔ lɛ, ehaa wɔ kwraa kɛmɔɔ shi ni eshiuuu nɔ. Mɔ nɛ ji wɔ Nyɔŋmɔ ni yɔɔ suɔmɔ lɛ, ni wɔbaanyɛ wɔna hemɔkɛyeli ni yeɔ emuu kwraa akɛ eji wɔsɔlemɔi lɛ a-Toibolɔ.
Ani Okaiɔ?
Namɔ nɔ esa akɛ wɔtsɔ wɔbɛŋkɛ Nyɔŋmɔ yɛ sɔlemɔ mli, ni mɛni hewɔ?
Yɛ mɛɛ gbɛ nɔ sɔlemɔ ji hegbɛ ko ni husu yɔɔ he?
Akɛ aaasɔle ‘yɛ mumɔ krɔŋkrɔŋ Iɛ mli’ Iɛ tsɔɔ mɛni.
Mɛɛ gbɛ nɔ oootsɔ otsɔɔ kɛjɛ Ŋmalɛi Iɛ amli akɛ aboɔ Yehowa anɔkwa Odasefoi ni abaptisi amɛ Iɛ asɔlemɔi toi?
[Mfoniri ni yɔɔ baafa 7]
Bɔ ni tsɛmɛi ni ji adesai kɛ nikeenii kpakpai haa amɛbii lɛ, nakai Yehowa kɛ mumɔ krɔŋkrɔŋ haa mɛi ni biɔ lɛ lɛ