“Tsɔɔmɔ Wɔ Sɔlemɔ”
‘Ekaselɔi lɛ ateŋ mɔ kome kɛɛ lɛ akɛ: Nuŋtsɔ, tsɔɔmɔ wɔ sɔlemɔ.”—LUKA 11:1
1-3. (a) Mɛni hewɔ ni Yesu kaselɔi lɛ yabi lɛ gbɛtsɔɔmɔ yɛ sɔlemɔ he lɛ? (b) Mɛɛ sanebimɔi ni kɔɔ sɔlemɔ he teɔ shi?
MƐI komɛi yɛ ni aduro amɛ kɛ lala gbee ni ŋɔɔ. Mɛi krokomɛi hu yɛ adebɔɔ mli nikeenii akɛ lalatsɛmɛi. Shi dani amɛbaashɛ amɛnyɛmɔ lɛ he kwraa lɛ, ehe hiaa ni nɛkɛ lalɔi kɛ lalatsɛmɛi nɛɛ ana gbɛtsɔɔmɔ. Nakai nɔŋŋ eji yɛ sɔlemɔ he. Yesu Kristo kaselɔi lɛ bayoo akɛ kɛji Nyɔŋmɔ baabo amɛsɔlemɔi atoi lɛ, belɛ gbɛtsɔɔmɔ he miihia amɛ.
2 Yɛ bei babaoo mli lɛ Yesu yaa e-Tsɛ lɛ ŋɔɔ yɛ sɔlemɔ mli yɛ teemɔŋ, taakɛ efee jenamɔ muu fɛɛ dani ehala ebɔfoi 12 lɛ. (Luka 6:12-16) Eyɛ mli akɛ ewo ekaselɔi lɛ hu hewalɛ ni amɛsɔle yɛ teemɔŋ moŋ, shi amɛnuɔ ni eesɔle yɛ faŋŋ mli ni amɛnaa akɛ etamɔɔɔ jamɔ mli osatofoi ni sɔleɔ ni gbɔmɛi ana amɛ lɛ. (Mateo 6:5, 6) Belɛ, shishinumɔ yɛ he akɛ Yesu sɛɛnyiɛlɔi lɛ aaabi egbɛtsɔɔmɔ ni nɔ kwɔ yɛ sɔlemɔ he. No hewɔ lɛ, wɔkaneɔ akɛ: “Ni eba mli akɛ eesɔle yɛ he ko; ni beni efɔ̃ɔ lɛ, ekaselɔi lɛ ateŋ mɔ kome kɛɛ lɛ akɛ: Nuŋtsɔ, tsɔɔmɔ wɔ sɔlemɔ, tamɔ bɔ ni Yohane [Baptisilɔ lɛ] hu tsɔɔ ekaselɔi lɛ.”—Luka 11:1.
3 Te Yesu here nɔ eha tɛŋŋ? Mɛni wɔbaanyɛ wɔkase kɛjɛ enɔkwɛmɔ nɔ lɛ mli? Ni mɛɛ gbɛ nɔ wɔɔna egbɛtsɔɔmɔ ni ekɛha yɛ sɔlemɔ he lɛ he sɛɛ yɛ?
Nikasemɔi Kɛha Wɔ
4. Mɛni hewɔ esa akɛ ‘wɔsɔle daa ni wɔkafɔɔ’ lɛ, ni nakai ni wɔɔfee lɛ tsɔɔ mɛni?
4 Wɔbaanya wɔkase nii babaoo kɛjɛ Yesu wiemɔi kɛ anɔkwɛmɔ nɔ akɛ nuu ni sɔleɔ lɛ mli. Nikasemɔi lɛ ateŋ ekome ji akɛ kɛji akɛ ehe bahia ni Nyɔŋmɔ Bi ni eye emuu lɛ asɔle daa lɛ, no lɛ ehe miihia babaoo ni ekaselɔi ni yeee emuu lɛ akwɛ Nyɔŋmɔ gbɛ daa gbi kɛha gbɛtsɔɔmɔ, miishɛjemɔ, kɛ mumɔŋ hiamɔ nii. No hewɔ lɛ, esa akɛ ‘wɔsɔle daa ni wɔkafɔɔ.’ (1 Tesalonikabii 5:17) Yɛ anɔkwale mli lɛ, enɛ etsɔɔɔ akɛ esa akɛ daa gbi lɛ wɔkula wɔnakutsei anaa. Shi moŋ, esa akɛ wɔna sɔlemɔ henumɔ yɛ wɔtsuii amli be fɛɛ be. Esa akɛ wɔkwɛ Nyɔŋmɔ gbɛ kɛha gbɛtsɔɔmɔ yɛ wɔshihilɛ mli nibii fɛɛ mli koni wɔkɛ sanesɛɛkɔmɔ afee wɔnii ni wɔna enɔkpɛlɛmɔ be fɛɛ be.—Abɛi 15:24.
5. Mɛni baanyɛ ahe be ni wɔbaanyɛ wɔtuu wɔha sɔlemɔ lɛ, ni mɛni esa akɛ wɔfee yɛ enɛ he?
5 Nibii babaoo baanyɛ ahe be ni esa akɛ wɔtuu wɔha sɔlemɔ lɛ yɛ nɛkɛ “naagbee gbii” nɛɛ amli. (2 Timoteo 3:1) Shi kɛji shia naagbai, nitsumɔ mli saji, kɛ nibii ni tamɔ nakai miihe be ni wɔkɛsɔleɔ wɔhaa wɔ ŋwɛi Tsɛ lɛ daa lɛ, no lɛ shihilɛ nɛɛ he susumɔ ehe wɔtsuii fe nine. Esa akɛ wɔtsake shihilɛ ni tamɔ nɛkɛ ni shishashaomɔ ko bɛ mli, ejaakɛ sɔlemɔ ni asɔleee lɛ haa mɔ ko laajeɔ ehemɔkɛyeli. Ekolɛ ebaabi ni wɔfo gbɛnaa nii ni jwere wɔnɔ yɛ nitsumɔ gbɛfaŋ lɛ nɔ aloo wɔha heloo naa hiamɔ nii kɛ wɔtsui ni wɔɔtsɔ wɔha Nyɔŋmɔ kɛ ekãa daa gbi kɛha gbɛtsɔɔmɔ lɛ aŋmɛ pɛpɛɛpɛ. Esa akɛ wɔhiɛ ‘aka shi aha sɔlemɔ.’—1 Petro 4:7.
6. Mɛɛ sɔlemɔ wɔbaasusu he agbɛnɛ ni kɛ mɛɛ yiŋtoo?
6 Yesu tsɔɔ ekaselɔi lɛ sɔlemɔ, yɛ nɔ ni atsɛɔ lɛ sɔlemɔ he nɔkwɛmɔ nɔ lɛ mli, shi jeee nɔ ni esa akɛ amɛkɛɛ lɛ pɛpɛɛpɛ. Luka wiemɔi lɛ yɛ sɔrɔto fioo yɛ Mateo nɔ lɛ he ejaakɛ eba yɛ shihilɛi sɔrɔtoi ashishi. Akɛ Yesu sɛɛnyiɛlɔi kɛ Yehowa Odasefoi lɛ, wɔbaasusu nɛkɛ sɔlemɔ nɛɛ he akɛ wɔsɔlemɔi lɛ ahe nɔkwɛmɔ nɔ.
Wɔ Tsɛ lɛ kɛ E-Gbɛi
7. Namɛi ena hegbɛ waa akɛ amɛaatsɛ Yehowa akɛ “wɔ Tsɛ”?
7 “Wɔ Tsɛ ni yɔɔ ŋwɛi.” (Mateo 6:9; Luka 11:2) Akɛni Yehowa ji adesai a-Bɔlɔ ni ŋwɛi shihilɛ he lɛ eyɔɔ hewɔ lɛ, eja jogbaŋŋ akɛ aaatsɛ lɛ akɛ “wɔ Tsɛ ni yɔɔ ŋwɛi.” (1 Maŋtsɛmɛi 8:49; Bɔfoi lɛ Asaji 17:24, 28) Wiemɔ ni ji “wɔ” ni akɛtsuɔ nii yɛ biɛ lɛ tsɔɔ akɛ mɛi krokomɛi hu kɛ Nyɔŋmɔ yɛ tsakpaa ni bɛŋkɛ kpaakpa. Shi namɛi yɔɔ hegbɛ ni husu bɛ he nɛɛ akɛ amɛaatsɛ lɛ akɛ amɛ-Tsɛ lɛ? Mɛi ni ejɔɔ amɛhe nɔ ni abaptisi amɛ ni yɔɔ ejalɔi aweku lɛ mli lɛ pɛ. Ni wɔɔtsɛ Yehowa “wɔ Tsɛ” lɛ tsɔɔ akɛ wɔyɛ hemɔkɛyeli yɛ Nyɔŋmɔ mli ni wɔyooɔ akɛ nɔ pɛ ni aaadamɔ nɔ asaa wɔkɛ lɛ teŋ ji kpɛlɛmɔ ni wɔɔkpɛlɛ Yesu kpɔmɔ afɔleshaa lɛ nɔ kwraa kɛmɔ shi.—Hebribii 4:14-16; 11:6.
8. Mɛni hewɔ esa akɛ wɔsumɔ akɛ wɔɔye be yɛ sɔlemɔ mli wɔha Yehowa lɛ?
8 Kwɛ bɔ ni esa akɛ wɔnu he wɔha akɛ wɔɔbɛŋkɛ wɔ ŋwɛi Tsɛ lɛ kpaakpa! Taakɛ gbekɛbii yaa amɛtsɛ ŋɔɔ ni etɔɔɔ amɛ kɔkɔɔkɔ lɛ, esa akɛ wɔnu he akɛ esa akɛ wɔhe be ni fa ni wɔkɛsɔle wɔha Nyɔŋmɔ. Esa akɛ hiɛsɔɔ ni mli kwɔ ni wɔɔjie kpo yɛ jɔɔmɔi ni ekɛhaa wɔ yɛ mumɔŋ kɛ heloo naa fɛɛ mli lɛ atsirɛ wɔ ni wɔda lɛ shi yɛ emlihilɛ lɛ hewɔ. Esa akɛ wɔnu he akɛ wɔbaasumɔ ni wɔshɛrɛ wɔjatsui ni tsii ni jwere wɔnɔ lɛ wɔshwie enɔ, kɛ hiɛnɔkamɔ akɛ ebaaha wɔ wɔhiamɔ nii. (Lala 55:22) Wɔbaanyɛ wɔna nɔmimaa akɛ kɛji wɔye anɔkwa lɛ, nɔ fɛɛ nɔ baaya nɔ pɛpɛɛpɛ aha wɔ ejaakɛ ebuɔ wɔhe.—1 Petro 5:6, 7.
9. Sɔlemɔ ni wɔsɔleɔ ni atse Nyɔŋmɔ gbɛi lɛ he lɛ ji nibimɔ kɛha mɛni?
9 “Ha ogbɛi lɛ he atse.” (Mateo 6:9, NWT; Luka 11:2) Bei komɛi lɛ, wiemɔ “gbɛi” lɛ tsɔɔ mɔ lɛ diɛŋtsɛ, ni “ni aaatse nɔ ko he” lɛ tsɔɔ “ni afee lɛ krɔŋkrɔŋ, ni atuu ama afa aloo ahiɛ lɛ krɔŋkrɔŋ.” (Okɛto Kpojiemɔ 3:4 he.) Enɛ hewɔ lɛ, belɛ sɔlemɔ ni biɔ ni Nyɔŋmɔ gbɛi lɛ he atse lɛ ji nibimɔ akɛ Yehowa afee nii ni ekɛtse egbɛi lɛ he. Yɛ mɛɛ gbɛ nɔ? Kɛtsɔ jiemɔ ni eeejie heguɔgbee fɛɛ ni akɛba egbɛi lɛ nɔ lɛ kɛya kwraa lɛ nɔ. (Lala 135:13) Yɛ enɛ feemɔ mli lɛ, Nyɔŋmɔ baajie efɔŋfeemɔ, ni ebaawo ehe nɔ gojoo, ni eha jeŋmaji lɛ fɛɛ ale akɛ lɛ ji Yehowa lɛ. (Ezekiel 36:23; 38:23) Kɛji wɔmiishwe akɛ wɔɔna nakai gbi lɛ ni wɔyɛ hiɛsɔɔ lɛlɛŋ kɛha Yehowa agbojee lɛ, no lɛ wɔbaabɛŋkɛ lɛ kɛ mumɔ ni tsɔɔ bulɛ taakɛ wiemɔ “ogbɛi lɛ he atse” lɛ tsɔɔ lɛ.
Nyɔŋmɔ Maŋtsɛyeli lɛ kɛ Esuɔmɔnaa Nii
10. Mɛni wɔtsɔɔ kɛji wɔsɔle ni Nyɔŋmɔ Maŋtsɛyeli lɛ aba lɛ?
10 “Ha emaŋtsɛyeli lɛ aba.” (Mateo 6:10, NW; Luka 11:2) Maŋtsɛyeli ni atsɔɔ yɛ biɛ lɛ ji Yehowa jeŋ muu fee maŋtsɛyeli, taakɛ ajie lɛ kpo faŋŋ atsɔɔ kɛtsɔ Mesia ŋwɛi maŋtsɛyeli ni yɔɔ Yesu Kristo kɛ ehefatalɔi “mɛi krɔŋkrɔŋi” lɛ adɛŋ lɛ nɔ lɛ. (Daniel 7:13, 14, 18, 27; Yesaia 9:6, 7; 11:1-5) Sɔlemɔ ni asɔleɔ koni ‘eba’ lɛ tsɔɔ mɛni? Enɛ tsɔɔ akɛ wɔbiɔ ni Nyɔŋmɔ Maŋtsɛyeli lɛ aba ni ete shi ewo mɛi fɛɛ ni yɔɔ shikpɔŋ nɔ ni teɔ shi woɔ ŋwɛi nɔyeli lɛ. Yɛ be mli ni Maŋtsɛyeli lɛ ‘ejwara shikpɔŋ nɔ maŋtsɛyelii lɛ fɛɛ wɔtsɔwɔtsɔ ni ekpata amɛhiɛ’ sɛɛ lɛ, ebaatsake shikpɔŋ lɛ ni efee lɛ jeŋ muu fɛɛ paradeiso.—Daniel 2:44; Luka 23:43.
11. Kɛji wɔmiishwe ni wɔna akɛ aafee Yehowa suɔmɔnaa nii yɛ jeŋ muu fɛɛ lɛ, mɛni wɔbaafee?
11 “Ha afee nɔ ni osumɔɔ yɛ shikpɔŋ lɛ nɔ, taakɛ afeɔ yɛ ŋwɛi hu lɛ.” (Mateo 6:10, New World Translation) Eji nii ni wɔbiɔ Nyɔŋmɔ ni etsu eyiŋtoo ni kɔɔ shikpɔŋ nɛɛ he, ni ehenyɛlɔi ni eeejie amɛ kɛya lɛ fata he lɛ he nii. (Lala 83:9-18; 135:6-10) Yɛ anɔkwale mli lɛ, etsɔɔ akɛ wɔmiishwe ni wɔna akɛ aafee Nyɔŋmɔ suɔmɔnaa nii yɛ jeŋ muu fɛɛ. Kɛ no ji nɔ ni yɔɔ wɔtsuii amli lɛ, wɔɔfee Yehowa suɔmɔnaa nii kwraa kɛmɔ shi bɔ ni wɔɔnyɛ. Wɔnyɛŋ wɔkɛ anɔkwayeli abi nii yɛ nɛkɛ gbɛ nɔ kɛji wɔkɛ ekaa ebɔɔɔ mɔdɛŋ ni wɔɔfee Nyɔŋmɔ suɔmɔnaa nii yɛ wɔ diɛŋtsɛ wɔ gbɛfaŋ lɛ. Kɛji wɔmiisɔle yɛ nɛkɛ gbɛ nɔ lɛ, no lɛ, esa akɛ wɔhiɛ ahi wɔhe nɔ jogbaŋŋ akɛ wɔfeŋ nii ni teɔ shi woɔ nakai esuɔmɔnaa nii lɛ, tamɔ wɔkɛ mɔ ni jeee heyelilɔ lɛ nyiɛmɔ ni tsɔɔ gbalashihilɛ hiɛ aloo ni wɔɔkɔ je lɛ gbɛi lɛ. (1 Korintobii 7:39; 1 Yohane 2:15-17) Yɛ no najiaŋ lɛ, esa akɛ wɔha susumɔ nɛɛ ahi wɔjwɛŋmɔ mli akɛ, ‘Mɛni ji Yehowa suɔmɔnaa nii yɛ sane nɛɛ mli?’ Hɛɛ, kɛji wɔsumɔɔ Nyɔŋmɔ kɛ wɔtsui muu fɛɛ lɛ, wɔbaatao egbɛtsɔɔmɔ yɛ shihilɛ mli nɔ fɛɛ nɔ mli.—Mateo 22:37.
Wɔ Daa Ŋmaa
12. Ni wɔɔbi ‘wɔ daa ŋmaa’ pɛ lɛ naa mɛɛ hewalɛ kpakpa yɛ wɔnɔ?
12 “Ha wɔ ŋmɛnɛ wɔdaa ŋmaa.” (Mateo 6:11) Luka wiemɔi lɛ kaneɔ akɛ: “Ha wɔ daa nɛɛ wɔ daa ŋmaa.” (Luka 11:3) Ni wɔɔbi Nyɔŋmɔ ni eha wɔ niyenii ni he hiaa “ŋmɛnɛ” lɛ haa hemɔkɛyeli ni wɔyɔɔ yɛ emli akɛ ebaanyɛ eha wɔ wɔhiamɔ nii lɛ daa gbi lɛ yaa hiɛ. Akɛɛ Israelbii lɛ ni amɛbua mana lɛ naa “bɔ ni aaashɛ amɛnaa gbi kome,” jeee kɛha otsi loo bei babaoo. (2 Mose 16:4) Enɛ jeee sɔlemɔ ni akɛmiibi naaŋɔɔmɔ nibii kɛ wɔhiamɔ nibii ni eteke nɔ shi moŋ kɛha wɔ daa gbi hiamɔ nii yɛ be mli ni ehiaa wɔ lɛ. Ni wɔɔbi wɔ daa ŋmaa pɛ lɛ hu yeɔ ebuaa wa koni wɔkafee hiɛjoolɔi.—1 Korintobii 6:9, 10.
13. (a) Yɛ shishinumɔ ni mli lɛɛ naa lɛ, ni wɔɔbi wɔ da ŋmaa lɛ tsɔɔ mɛni? (b) Kɛji wɔtsuɔ nii waa ni nɔ ko fioo ko pɛ wɔyɔɔ po lɛ, mɛni esa akɛ efee wɔ subaŋ?
13 Yɛ shishinumɔ ni mli lɛɛ naa lɛ, ni wɔɔbi wɔ daa ŋmaa lɛ tsɔɔ akɛ wɔnuuu he akɛ wɔji mɛi ni kɛ amɛhe efɔɔɔ mɔ ko nɔ shi moŋ daa gbi lɛ wɔkwɛɔ Nyɔŋmɔ gbɛ kɛhaa niyenii, numɔ nii, hehaa nɔ, kɛ hiamɔ nibii krokomɛi. Akɛ ejalɔi aweku lɛ mlibii ni ejɔɔ amɛhe nɔ amɛha lɛ lɛ, wɔkɛ wɔhe baafɔ wɔ Tsɛ lɛ nɔ shi esaaa akɛ wɔtaa shi efolo ni wɔtsuuu nii ni wɔmiikpa gbɛ akɛ ebaatsɔ naakpɛɛ gbɛ nɔ eha wɔ wɔhiamɔ nii. Wɔtsuɔ nii ni wɔkɛ nibii ni wɔyɔɔ lɛ tsuɔ nii bɔni afee ni wɔna niyenii kɛ wɔhiamɔ nibii krokomɛi. Ni kɛlɛ, wɔdaa Nyɔŋmɔ shi yɛ sɔlemɔ mli yɛ gbɛ ni ja nɔ ejaakɛ wɔnaa wɔ ŋwɛi Tsɛ lɛ suɔmɔ, nilee, kɛ hewalɛ yɛ nɛkɛ nibii nɛɛ asɛɛ. (Bɔfoi lɛ Asaji 14:15-17; okɛto Luka 22:19 he.) Ekolɛ nɔ ni baajɛ wɔ mɔdɛŋbɔɔ lɛ mli aba ji ninamɔ. Shi kɛji wɔtsuɔ nii waa shi wɔnaaa babaoo po lɛ, nyɛhaa wɔhiɛ asɔa ni wɔmii ashɛa he. (Filipibii 4:12; 1 Timoteo 6:6-8) Yɛ anɔkwale mli lɛ, mɔ ni sheɔ Nyɔŋmɔ gbeyei ni bɛ niyenii kɛ hehaa nɔ ni fa babaoo po lɛ mii shɛɔ ehe waa fe mɔ ni yɔɔ heloonaa nii babaoo. No hewɔ lɛ kɛ nɔ ko fioo ko pɛ wɔyɔɔ yɛ shihilɛi ni wɔnyɛɛɛ wɔfee he nɔ ko lɛ hewɔ lɛ, nyɛkahaa wɔnijiaŋ miije wui. Wɔbaanyɛ wɔtsɔmɔ niiatsɛmɛi yɛ mumɔŋ. Lɛlɛŋ, esaaa ni wɔgbɔjɔɔ yɛ hemɔkɛyeli, hiɛnɔkamɔ, kɛ suɔmɔ ni wɔyɔɔ kɛha Yehowa, mɔ ni wɔyijiemɔ kɛ shidaa kwɔɔ kɛyaa eŋɔɔ yɛ sɔlemɔi ni jɛ wɔtsuii amli lɛ mli.
Wɔ Nyɔji lɛ ni Akɛaake Wɔ
14. Mɛɛ nyɔji wɔbiɔ ni akɛke wɔ, ni mɛni Nyɔŋmɔ kɛtsuɔ amɛhe nii?
14 “Ni okɛ wɔnyɔji lɛ ake wɔ, tamɔ bɔ ni wɔ hu wɔkɛke mɛi ni hiɛ wɔ nyɔji lɛ.” (Mateo 6:12, New World Translation) Luka wiemɔi lɛ tsɔɔ akɛ nakai nyɔji lɛ ji eshai. (Luka 11:4) Esha ni wɔna kɛjɛ fɔmɔ mli lɛ tsiɔ wɔ gbɛ ni wɔkafee nibii ni kɛ wɔ Tsɛ lɛ suɔmɔnaa nii ni yeɔ emuu lɛ fɛɛ kpaa gbee. No hewɔ lɛ, yɛ shishinumɔ ko naa lɛ, kɛjɛ be mli ni wɔje shishi wɔbɔi ‘shihilɛ kɛ nyiɛmɔ yɛ mumɔŋ lɛ naa’ lɛ, nɛkɛ fatɔɔi nɛɛ ebatsɔmɔ wɔnyɔji, aloo gbɛnaa nii ni jwere wɔnɔ yɛ Nyɔŋmɔ hiɛ. (Galatabii 5:16-25; okɛto Romabii 7:21-25 he.) Wɔyɛ nɛkɛ nyɔji nɛɛ ejaakɛ wɔyeee emuu ni amrɔ nɛɛ wɔnyɛŋ wɔshɛ tɛi ni Nyɔŋmɔ efolɔ eshwie shi lɛ ahe kɛmɔ shi. Nɛkɛ eshai nɛɛ ni akɛkeɔ wɔ lɛ hewɔ ni wɔnaa hegbɛ wɔsɔleɔ lɛ. Wɔmii shɛɔ wɔhe akɛ, Nyɔŋmɔ baanyɛ ekɛ Yesu kpɔmɔ afɔleshaa lɛ jara lɛ atsu nɛkɛ nyɔji, loo eshai nɛɛ ahe nii.—Romabii 5:8; 6:23.
15. Mɛni esa akɛ efee wɔsu yɛ tsɔsemɔ ni he hiaa wɔ lɛ he?
15 Kɛji wɔmiikpa Nyɔŋmɔ gbɛ ni ekɛ wɔnyɔji, loo eshai lɛ ake wɔ lɛ, esa akɛ wɔshwa wɔhe ni wɔkpɛlɛ tsɔsemɔ nɔ. (Abɛi 28:13; Bɔfoi lɛ Asaji 3:19) Akɛni Yehowa sumɔɔ wɔsane hewɔ lɛ, ehaa wɔ tsɔsemɔ ni he hiaa wɔ lɛ aŋkroaŋkro bɔni afee ni wɔnyɛ wɔsaa wɔgbɔjɔmɔi lɛ. (Abɛi 6:23; Hebribii 12:4-6) Lɛlɛŋ, wɔmii baanyɛ ashɛ wɔhe kɛ wɔha dalɛ yɛ hemɔkɛyeli kɛ nilee mli saa wɔtsuii koni ekɛ Nyɔŋmɔ mlai kɛ shishitoo mlai akpa gbee koni wɔkaje gbɛ wɔtɔ. Shi kɛji wɔna akɛ wɔje gbɛ wɔtɔ hu lɛ? No lɛ esa akɛ edɔ wɔ waa yɛ wɔtsui mli tɔɔ ni wɔkɛ mɔdɛŋbɔɔ asɔle koni akɛke wɔ. (Hebribii 10:26-31) Ni yɛ be mli ni wɔkɛ ŋaawoo ni akɛhaa wɔ lɛ tsuɔ nii lɛ, esa akɛ wɔjaje wɔgbɛ lɛ oya.
16. Mɛni hewɔ ni ehe hiaa ni wɔya nɔ wɔbi ni Nyɔŋmɔ kɛ wɔhe eshai ake wɔ lɛ?
16 Ni wɔɔbi Nyɔŋmɔ daa gbi ni ekɛ wɔhe eshai ake wɔ lɛ he yɛ sɛɛnamɔ. Nakai feemɔ haa wɔhiɛ hiɔ wɔhe nɔ akɛ wɔji eshaifeelɔi, ni ehe miihia ni wɔna heshibaa su. (Lala 51:3, 4, 7) Ehe miihia ni wɔha wɔ ŋwɛi Tsɛ lɛ kɛ “wɔhe eshai lɛ afa wɔ ni etsumɔ wɔhe kɛjɛ nii ni ejaaa gbɛ fiaa mli.” (1 Yohane 1:8, 9) Kɛfata he lɛ, ni wɔɔtsi wɔhe eshai lɛ ata yɛ sɔlemɔ mli lɛ yeɔ ebuaa wɔ koni wɔya nɔ wɔwuu waa wɔshi enɛɛmɛi. Enɛ hewɔ lɛ ekaiɔ wɔ be fɛɛ be akɛ kpɔmɔ nɔ lɛ kɛ Yesu la ni afɔse ashwie shi lɛ jara lɛ he hiaa wɔ.—1 Yohane 2:1, 2; Kpojiemɔ 7:9, 14.
17. Mɛɛ gbɛ nɔ sɔlemɔ ni wɔsɔleɔ ni akɛ wɔhe eshai ake wɔ lɛ yeɔ ebuaa wɔ yɛ bɔ ni wɔkɛ mɛi krokomɛi yeɔ haa lɛ mli?
17 Ni wɔɔsɔle wɔbi eshaifaa lɛ hu yeɔ ebuaa wɔ ni wɔna mlihilɛ, kɛ musuŋtsɔlɛ, ni wɔkɛ nii ake mɛi ni hiɛɔ wɔ nyɔji yɛ saji bibii kɛ saji wuji fɛɛ mli lɛ. Luka wiemɔi lɛ kɛɔ akɛ: “Ni okɛ wɔhe eshai afa wɔ, ejaakɛ wɔ hu wɔkɛfaa mɔ fɛɛ mɔ ni tɔɔ wɔnɔ.” (Luka 11:4) Yɛ anɔkwale mli lɛ, wɔbaana eshaifaa kɛjɛ Nyɔŋmɔ ŋɔɔ kɛji akɛ ‘wɔkɛ mɛi ni hiɛ wɔ nyɔji lɛ’ ahe keɔ amɛ, mɛi ni feɔ esha shiɔ wɔ lɛ. (Mateo 6:12; Marko 11:26) Yesu kɛfata he akɛ: “Shi kɛji nyɛkɛ mɛi atɔmɔi faa amɛ lɛ, nyɛtsɛ ni yɔɔ ŋwɛi lɛ kɛaafa nyɛ hu. Shi kɛji nyɛkɛ mɛi atɔmɔi efaaa amɛ lɛ, nyɛtsɛ lɛ hu kɛ nyɛtɔmɔi lɛ efaŋ nyɛ.” (Mateo 6:14, 15) Esa akɛ sɔlemɔi ni wɔkɛbiɔ wɔhe eshaifaa lɛ hu atsirɛ wɔ ni wɔnyɛ wɔna tsui wɔha mɛi krokomɛi ni wɔkɛ amɛtɔmɔi ake amɛ. Bɔfo Paulo ŋma akɛ: “Taakɛ bɔ ni Yehowa hu ŋɔfa nyɛ lɛ, nakai nyɛ hu nyɛfea.”—Kolosebii 3:13; Efesobii 4:32, New World Translation.
Kaa kɛ Mɔ Fɔŋ Lɛ
18. Mɛni hewɔ ni esaaa ni wɔshwaa Nyɔŋmɔ yɛ kaai ni baa wɔnɔ lɛ ahewɔ lɛ?
18 “Ni okɛ wɔ akaya kaa lɛ mli.” (Mateo 6:13; Luka 11:4) Nɛkɛ wiemɔi nɛɛ etsɔɔɔ akɛ Yehowa kaa wɔ ni wɔfee esha. Bei komɛi lɛ Ŋmalɛi lɛ wieɔ akɛ Nyɔŋmɔ feɔ loo ehaa nibii komɛi ni eŋmɛɔ gbɛ lɛ baa. (Rut 1:20, 21; okɛto Jajelɔ 11:5 he.) Shi kaselɔ Yakobo ŋma akɛ, “Nyɔŋmɔ lɛ akaaa lɛ yɛ nii fɔji agbɛfaŋ, ni lɛ diɛŋtsɛ hu ekaaa mɔ ko.” (Yakobo 1:13) No hewɔ lɛ, nyɛkahaa wɔshwaa wɔ ŋwɛi Tsɛ lɛ yɛ nibii fɔji ahe kaai ni baa wɔnɔ lɛ he kɔkɔɔkɔ, ejaakɛ Satan ji Mɔ ni Kaa Mɔ ni ebɔɔ mɔdɛŋ ni etsirɛ wɔ ni wɔfee esha wɔshi Nyɔŋmɔ.—Mateo 4:3; 1 Tesalonikabii 3:5.
19. Mɛɛ gbɛ nɔ wɔɔtsɔ wɔsɔle yɛ kaai ni baa wɔnɔ lɛ ahe?
19 Wɔtsɔɔ wɔnibimɔ, “okɛ wɔ akaya kaa mli” lɛ nɔ wɔbiɔ Yehowa ni ekaŋmɛ gbɛ ni wɔŋmɛɛ wɔhe ni aye wɔnɔ yɛ be mli ni akaa wɔ loo anyɛɔ wɔnɔ ni wɔtse ehiɛ atua lɛ. Wɔbaanyɛ wɔkpa wɔ Tsɛ lɛ fai ni ekudɔ wɔnaji faamɔi koni kaa ko ni mli wa fe bɔ ni wɔɔnyɛ wɔdamɔ naa akaba wɔ gbɛ nɔ. Paulo ŋma yɛ enɛ gbɛfaŋ akɛ: “Kaa ko bako nyɛ nɔ ni jeee gbɔmɔ nɔ; shi anɔkwafo ji Nyɔŋmɔ, mɔ ni haŋ aka nyɛ fe bɔ ni nyɛaanyɛ, shi moŋ ekɛ kaa lɛ nɔŋŋ aaaje gbɛ aha nyɛ ni nyɛje mli hu, koni nyɛnyɛ mli nyɛmɔ:” (1 Korintobii 10:13) Wɔbaanyɛ wɔsɔle ni Yehowa anyiɛ wɔhiɛ koni akaka wɔ fe bɔ ni wɔɔnyɛ naa wɔdamɔ koni agbɛnɛ kɛ wɔyaje haomɔ ni mli wa shishi lɛ etsɔɔ wɔ gbɛ ni wɔkɛje mli. Kaai baa kɛjɛɔ Abonsam ŋɔɔ, wɔ heloo ni egbɔjɔ lɛ, kɛ mɛi krokomɛi ashigbeemɔi, shi wɔ Tsɛ ni yɔɔ suɔmɔ lɛ baanyɛ atsɔɔ wɔ gbɛ koni akaye wɔnɔ kunim.
20. Mɛni hewɔ esa akɛ wɔsɔle ni ajie wɔ kɛjɛ “mɔ fɔŋ lɛ” dɛŋ lɛ?
20 “Shi jiemɔ wɔ kɛjɛ mɔ fɔŋ lɛ dɛŋ.” (Mateo 6:13, New World Translation.) Ŋwanejee ko bɛ he akɛ Nyɔŋmɔ baanyɛ atsi Satan, “mɔ fɔŋ lɛ” naa koni ekaye wɔnɔ kunim. (2 Petro 2:9) Ni be ko bako ni ehe ebahia ni akpɔ wɔ kɛjɛ Abonsam dɛŋ tamɔ bɔ ni eji ŋmɛnɛ lɛ, ejaakɛ ‘egiri naakpa, ni ele akɛ be fioo kɛkɛ eyɔɔ.’ (Kpojiemɔ 12:12) Ashiii wɔ efolo ni wɔleee Satan ŋaatsɔi lɛ, ni nakai nɔŋŋ lɛ hu ejeee mɔ ni leee wɔgbɔjɔmɔi lɛ. No hewɔ lɛ, ehe miihia ni wɔsɔle ni Yehowa ajie wɔ kɛjɛ Henyɛlɔ ni tamɔ jata nɛɛ dɛŋ. (2 Korintobii 2:11; 1 Petro 6:8, 9; okɛto Lala 141:8, 9 he.) Akɛ nɔkwɛmɔ nɔ lɛ, kɛji wɔmiisumɔ ni wɔbote gbalashihilɛ mli lɛ, ehe baahia ni wɔbi Yehowa ni ejie wɔ kɛjɛ Satan ŋaatsɔi amli kɛ agbɛnɛ kɛjɛ kaa ni baaha wɔkɛ jeŋbii abɔ naanyo ni baanyɛ ekɛ wɔ ayawo ajwamaŋbɔɔ mli aloo ni wɔtse Nyɔŋmɔ hiɛ atua kɛtsɔ mɔ ni heee yeee ni wɔkɛ lɛ aaabote gbalashihilɛ mli lɛ mli. (5 Mose 7:3, 4; 1 Korintobii 7:39) Ani wɔshweɔ ni wɔna heloonaa nii babaoo? No lɛ sɔlemɔ he baahia wɔ koni eye ebua wɔ ni wɔkɛte shi wɔwo kaai ni baanyɛ aha wɔkɛ wɔhe awo asɔshwɛmɔ loo juu mli. Akɛni Satan hiɛ edɔ ni eetao efite wekukpaa ni ka wɔkɛ Yehowa teŋ lɛ hewɔ lɛ, ekɛ tawuu nii ni eyɔɔ yɛ kaai ni ekɛwuuɔ ta lɛ mli lɛ fɛɛ baatsu nii. No hewɔ lɛ eba akɛ wɔɔya nɔ wɔsɔle wɔha wɔ ŋwɛi Tsɛ lɛ, ni shiii jalɔi lɛ ehaaa kaa shi ejieɔ amɛ kɛjɛɔ mɔ fɔŋ lɛ dɛŋ lɛ be fɛɛ be.
Sɔlemɔ Tswaa Hemɔkɛyeli kɛ Hiɛnɔkamɔ Emaa Shi
21. Mɛɛ gbɛ nɔ sɔlemɔ ni wɔsɔleɔ yɛ Maŋtsɛyeli lɛ he lɛ he eba sɛɛnamɔ kɛha wɔ yɛ?
21 Wɔ ŋwɛi Tsɛ, ni jieɔ wɔ kɛjɛɔ mɔ fɔŋ lɛ dɛŋ lɛ, sumɔɔ akɛ eeejɔɔ wɔ babaoo. Ni kɛlɛ, mɛni hewɔ ni eŋmɛ gbɛ ni ewebii ni esumɔɔ amɛ waa lɛ esɔle yɛ be kakadaŋŋ mli akɛ, “Omaŋtsɛyeli lɛ aba” lɛ? Ojogbaŋŋ, afi abɔ ni wɔkɛsɔle nɛkɛ lɛ eha bɔ ni wɔshweɔ ni Maŋtsɛyeli lɛ aba kɛ hiɛsɔɔ ni wɔyɔɔ kɛha no lɛ etee hiɛ. Sɔlemɔ ni tamɔ nɛkɛ kaiɔ wɔ bɔ ni ŋwɛi nɔyeli ni mli hi nɛɛ he hiaa wɔ waa ha lɛ. Agbɛnɛ hu ehaa wala he hiɛnɔkamɔ yɛ Maŋtsɛyeli nɔyeli lɛ shishi lɛ maa wɔhiɛ.—Kpojiemɔ 21:1-5.
22. Mɛni esa akɛ efee su ni wɔjieɔ lɛ kpo be fɛɛ be yɛ sɔlemɔ ni wɔsɔleɔ wɔhaa wɔ ŋwɛi Tsɛ, Yehowa lɛ he?
22 Ŋwanejee ko bɛ he akɛ sɔlemɔ tswaa hemɔkɛyeli ni wɔyɔɔ yɛ Yehowa mli lɛ emaa shi. Ni yɛ be mli ni ehaa wɔsɔlemɔi lɛ ahetoo lɛ, ehaa tsakpaa ni ka wɔkɛ lɛ teŋ lɛ mli waa. No hewɔ lɛ, nyɛkahaa etɔa wɔ akɛ wɔɔya eŋɔɔ daa gbi kɛ yijiemɔ, shidaa kɛ faikpamɔ. Ni eba akɛ wɔhiɛ aaasɔ Yesu hetoo ni ye ebua ekaselɔi lɛ beni amɛbi lɛ akɛ: “Nuŋtsɔ, tsɔɔmɔ wɔ sɔlemɔ” lɛ.
Ani Okaiɔ?
◻ Mɛɛ nikasemɔi wɔbaanyɛ wɔkase kɛjɛ Yesu wiemɔi kɛ enɔkwɛmɔ nɔ akɛ nuu ni sɔleɔ lɛ mli?
◻ Mɛni esa akɛ wɔsɔle wɔbi yɛ wɔ ŋwɛi Tsɛ lɛ kɛ egbɛi lɛ he?
◻ Mɛni wɔbiɔ yɛ be mli ni wɔsɔleɔ ni Nyɔŋmɔ Maŋtsɛyeli lɛ aba ni afee nɔ ni esumɔɔ yɛ shikpɔŋ nɔ lɛ?
◻ Mɛni wɔbiɔ yɛ be mli ni wɔsɔleɔ kɛhaa wɔ daa ŋmaa Iɛ?
◻ Ni wɔɔsɔle wɔbi ni akɛ wɔnyɔji lɛ ake wɔ lɛ tsɔɔ mɛni?
◻ Mɛni hewɔ ehe hiaa ni wɔsɔle yɛ kaai kɛ jiemɔ kɛmiijɛ Satan, mɔ fɔŋ lɛ dɛŋ lɛ he Iɛ?
[Mfoniri ni yɔɔ baafa 9]
Yesu sɛɛnyiɛlɔi lɛ bi Iɛ ni etsɔɔ amɛ sɔlemɔ. Ani ole bɔ ni wɔɔfee ni gbɛtsɔɔmɔi ni ekɛha yɛ sɔlemɔ he Iɛ he aba sɛɛnamɔ aha wɔ?