Yitso 16

Ekaa Kɛha Yehowa Jamɔ

YESU nyɛ bii—ni ji Maria bihii krokomɛi—lɛ ji Yakobo, Yosef, Simon, kɛ Yuda. Shi dani mɛi nɛɛ fɛɛ kɛ Yesu kɛ ekaselɔi lɛ aaafa gbɛ kɛaaya Kapernaum, ni ji maŋtiase ni yɔɔ Galilea Ŋshɔ lɛ masɛi lɛ, ekolɛ amɛwa yɛ amɛshia ni yɔɔ Nazaret lɛ koni amɛweku lɛ anyɛ aloo nibii ni he baahia amɛ lɛ fɛɛ.

Shi mɛni hewɔ ni Yesu yaa Kapernaum moŋ yɛ be mli ni ebaanyɛ etsu esɔɔmɔ nitsumɔ lɛ yɛ Kana, yɛ Nazaret, aloo yɛ he kroko yɛ Galilea gɔji lɛ anɔ lɛ? Yɛ nɔ kome hewɔ, akɛ ale he ni Kapernaum yɔɔ lɛ jogbaŋŋ, ni eka shi faŋŋ akɛ eji maŋ wulu hu. Agbɛnɛ hu, kaselɔi heei ni Yesu ena lɛ ateŋ mɛi pii hiɔ Kapernaum loo emasɛi kpaakpa, no hewɔ lɛ ehe ehiaŋ ni amɛshi amɛshiai dani amɛnine anyɛ ashɛ tsɔsemɔ nɔ kɛjɛ eŋɔɔ.

Beni eyɔɔ Kapernaum lɛ, Yesu tsu naakpɛɛ nitsumɔi, taakɛ bɔ ni lɛ diɛŋtsɛ eye he odase yɛ nyɔji fioo komɛi asɛɛ lɛ. Shi etsɛɛɛ ni Yesu kɛ ehefatalɔi lɛ yi gbɛ ekoŋŋ. Agbiɛnaa be mli ni, ni amɛnyiɛ gbɛ nɔ kɛmiiya Yerusalem koni amɛyaye afi 30 Ŋ.B. Hehoo lɛ. Beni amɛyɔɔ jɛmɛ lɛ, ekaselɔi lɛ na nɔ ko yɛ Yesu he ni ekolɛ amɛnako da.

Taakɛ Nyɔŋmɔ Mla lɛ tsɔɔ lɛ, ehe miihia ni Israelbii lɛ kɛ kooloi asha afɔle. No hewɔ lɛ, jarayelɔi ni yɔɔ Yerusalem lɛ hɔɔ kooloi loo lofɔji yɛ yiŋtoo nɛɛ hewɔ, koni eha efee mlɛo eha amɛ. Shi amɛmiihɔɔ nibii nɛɛ yɛ sɔlemɔtsu lɛ mli tɔɔ, ni amɛshishiuɔ gbɔmɛi lɛ ejaakɛ amɛnibii lɛ ajara wa fe nine.

Kɛkɛ ni Yesu mli fu, ni ekɛ taŋkpeei fee kplebii ni ekɛshwie mɛi ni hɔɔ nii lɛ kɛje kpo. Ni eloo shika tsakelɔi lɛ ashikai lɛ eshɛrɛ eshwie ni etsirɛ amɛkpɔlɔi lɛ etswia shi. Kɛkɛ ni ebo waa ekɛɛ mɛi ni hɔɔ okpoi lɛ akɛ: “Nyɛjiea nii nɛɛ kɛjea biɛ, nyɛkaŋɔa mi-Tsɛ we lɛ nyɛfea jara nɔ!”

Beni Yesu kaselɔi lɛ na enɛ lɛ, eha amɛkai gbalɛ ni kɔɔ Nyɔŋmɔ Bi lɛ he lɛ: “Owe lɛ he hiɛdɔɔ lɛ eye mi.” Shi Yudafoi lɛ bi lɛ akɛ: “Mɛɛ okadi okɛtsɔɔ wɔ, hewɔ ni ofeɔ enɛɛmɛi nɛɛ?” Ni Yesu ha amɛ hetoo akɛ: “Nyɛkumɔa sɔlemɔtsu nɛɛ, ni gbii etɛ mli lɛ, mamã ekoŋŋ.”

Yudafoi lɛ susu akɛ Yesu miiwie sɔlemɔtsu lɛ diɛŋtsɛ he, no hewɔ lɛ amɛbi lɛ akɛ: “Afii nyɔŋmai ejwɛ kɛ ekpaa akɛmã sɔlemɔtsu nɛɛ, ni bo lɛ, gbii etɛ okɛmaa lo?” Shi, Yesu miiwie egbɔmɔtso sɔlemɔtsu lɛ he. Ni afii etɛ sɛɛ lɛ, ekaselɔi lɛ kai nɔ ni ewie nɛɛ beni atee lɛ shi kɛjɛ gbohii ateŋ lɛ. Yohane 2:12-22; Mateo 13:55; Luka 4:23.

▪ Mɛɛ hei krokomɛi Yesu fa gbɛ kɛtee yɛ Kana yookpeemɔ lɛ sɛɛ?

▪ Mɛni hewɔ ni Yesu mli fu lɛ, ni mɛni efee?

▪ Beni Yesu kaselɔi lɛ na enɛ lɛ, mɛni eha amɛkai?

▪ Mɛni Yesu kɛɛ yɛ “sɔlemɔtsu nɛɛ” he, ni mɛni etsɔɔ lɛ?