Yitso 116

Bɔfoi lɛ Asaamɔ Kɛha Eshimɔ

AYE kaimɔ niyenii lɛ agbe naa, shi Yesu kɛ ebɔfoi lɛ yɛ ŋwɛitsu lɛ nɔ lolo. Eyɛ mli akɛ etsɛŋ ni Yesu baaya moŋ, shi eyɛ nibii pii ni ebaakɛɛ amɛ lolo. Eshɛje amɛmii akɛ: “Nyɛkayea nyɛtsuii; nyɛhea Nyɔŋmɔ nɔ nyɛyea.” Ekɛfata he akɛ: “Ni mi hu nyɛhea minɔ nyɛyea.”

Yesu tee nɔ akɛ: “Shihilɛ hei pii yɛ mitsɛ we lɛ; jeee nakai kulɛ, mikɛɛ momo; ejaakɛ miiya ni mayasaa gbɛhe mato nyɛ, . . . koni he ni miyɔɔ lɛ, nyɛ hu nyɛhi jɛi. Ni he ni miyaa lɛ, nyɛle.” Bɔfoi lɛ nuuu shishi akɛ Yesu miiwie ŋwɛi ni ebaaya lɛ he, no hewɔ lɛ Toma bi lɛ akɛ: “Nuŋtsɔ, wɔleee he ni oyaa, ni te aaafee tɛŋŋ ni wɔɔnyɛ gbɛ lɛ wɔle hu?”

Yesu ha hetoo akɛ: “Mi nɔŋŋ ji gbɛ lɛ kɛ anɔkwale lɛ kɛ wala lɛ.” Hɛɛ, ja mɔ ko kpɛlɛɔ enɔ ni enyiɛɔ eshihilɛ gbɛ lɛ sɛɛ dani mɔ lɛ aaanyɛ abote Tsɛ lɛ ŋwɛi shihilɛ he lɛ, ejaakɛ, taakɛ Yesu kɛɛ lɛ: “Mɔ ko baaa Tsɛ lɛ ŋɔɔ, akɛ ja etsɔ minɔ.”

Ni Filipo bi lɛ akɛ: “Nuŋtsɔ, tsɔɔmɔ wɔ Tsɛ lɛ, ni no fa ha wɔ.” Eka shi faŋŋ akɛ Filipo miitao ni Yesu aha amɛ okadi ko ni baajie Nyɔŋmɔ kpo etsɔɔ yɛ faŋŋ mli, taakɛ afee yɛ blema bei amli yɛ ninaai amli aha Mose, Elia, kɛ Yesaia lɛ. Shi, yɛ faŋŋ mli lɛ, bɔfoi lɛ yɛ nɔ ko ni hi kwraa fe ninaai ni tamɔ nomɛi, taakɛ Yesu tsɔɔ mli lɛ: “Jeeŋmɔ ni mikɛ nyɛ yɔɔ nɛɛ, oleko mi lolo, Filipo? Mɔ ni ena mi lɛ, ena Tsɛ lɛ.”

Yesu jieɔ e-Tsɛ lɛ su kpo yɛ gbɛ ni mɔɔ shi jogbaŋŋ nɔ aahu akɛ kɛ akɛ lɛ hi shi ni ayɔse lɛ lɛ, etamɔ nɔ ni mɔ lɛ ena Tsɛ lɛ nɔŋŋ. Shi kɛlɛ, Tsɛ lɛ nɔ kwɔ fe Bi lɛ, taakɛ Yesu kpɛlɛɔ nɔ lɛ: “Wiemɔi ni mikɛ nyɛ wieɔ lɛ, jeee mi diɛŋtsɛ miyiŋ mitoɔ miwieɔ.” Yesu kɛ yijiemɔ ni jɛɔ enitsɔɔmɔ lɛ mli baa lɛ fɛɛ haa eŋwɛi Tsɛ lɛ yɛ gbɛ ni ja nɔ.

Kwɛ bɔ ni ebaawo bɔfoi lɛ hewalɛ waa akɛ amɛaanu ni Yesu miikɛɛ amɛ nɛkɛ: “Mɔ ni heɔ minɔ yeɔ lɛ, nitsumɔi ni mitsuɔ lɛ, lɛ hu eeetsu, ni eeetsu nii ni fe nomɛi tete”! Yesu etsɔɔɔ akɛ esɛɛnyiɛlɔi lɛ baatsu hewalɛ nibii ni yɔɔ naakpɛɛ fe bɔ ni lɛ etsu lɛ. Dabi, shi moŋ eetsɔɔ akɛ amɛbaaya nɔ amɛtsu sɔɔmɔ nitsumɔ lɛ yɛ be babaoo mli, kɛyashɛ shɔŋŋ, kɛyashɛ mɛi babaoo hu aŋɔɔ.

Kɛ Yesu shi amɛ etee lɛ, ekuŋ ehiɛ efɔŋ ekaselɔi lɛ anɔ. Ewo amɛ shi akɛ: “Nɔ fɛɛ nɔ ni nyɛaakpa he fai yɛ migbɛi anɔ lɛ, no mafee.” Ekɛɛ kɛfata he hu akɛ: “Mi lɛ mabi Tsɛ lɛ, ni eeeha nyɛ hefatalɔ kroko, koni ekɛ nyɛ ahi shi kɛya naanɔ; anɔkwale mumɔ lɛ.” Yɛ sɛɛ mli, beni ekwɔ kɛtee ŋwɛi lɛ sɛɛ lɛ, Yesu fɔse mumɔ krɔŋkrɔŋ lɛ, ni ji hefatalɔ kroko nɛɛ eshwie ekaselɔi lɛ anɔ.

Be eshɛ ni Yesu baaku esɛɛ eya, taakɛ ekɛɛ lɛ: “Eshwɛ fioo kɛkɛ ni je lɛ enaŋ mi dɔŋŋ.” Yesu baatsɔ mumɔŋ bɔɔnɔ ni adesa ko nyɛŋ ana lɛ. Shi Yesu wo ebɔfoi anɔkwafoi lɛ ashi ekoŋŋ akɛ: “Shi nyɛ lɛ, nyɛmiina mi; ejaakɛ mihiɛ kã, ni nyɛ hu nyɛhiɛ aaakã.” Hɛɛ, jeee akɛ Yesu baajie ehe kpo etsɔɔ amɛ yɛ adesa su mli yɛ eshitee kɛjɛ gbohii ateŋ lɛ sɛɛ kɛkɛ, shi moŋ yɛ be ni sa mli lɛ ebaatee amɛ shi kɛba wala mli yɛ emasɛi yɛ ŋwɛi akɛ mumɔŋ bɔɔnii.

Kɛkɛ ni Yesu jaje nɛkɛ mla ni yɔɔ mlɛo nɛɛ: “Mɔ ni mikitai lɛ yɔɔ edɛŋ ni eyeɔ nɔ lɛ, lɛ ji mɔ ni sumɔɔ mi; ni mɔ ni sumɔɔ mi lɛ, mi-Tsɛ aaasumɔ lɛ, ni mi hu masumɔ lɛ, ni majie mihe shi matsɔɔ lɛ.”

Kɛkɛ ni bɔfo Yuda, mɔ ni atsɛɔ lɛ akɛ Tadeo hu lɛ, fo mli ni ekɛɛ: “Nuŋtsɔ, mɛni eba hewɔ ni wɔ kɛkɛ obaajie ohe shi otsɔɔ, ni ojieŋ otsɔŋ je lɛ?”

Yesu ha hetoo akɛ: “Kɛji mɔ ko miisumɔ mi lɛ, eeeye miwiemɔi lɛ nɔ, ni mi-Tsɛ aaasumɔ lɛ, . . . Mɔ ni sumɔɔɔ mi lɛ, eyeee miwiemɔi lɛ anɔ.” Je lɛ tamɔɔɔ esɛɛnyiɛlɔi ni boɔ lɛ toi lɛ, ejaakɛ amɛkuɔ amɛhiɛ amɛshwieɔ Yesu tsɔɔmɔi lɛ anɔ. No hewɔ lɛ ejieee ehe kpo etsɔɔɔ amɛ.

Yesu tsɔɔ ebɔfoi lɛ nibii pii yɛ eshikpɔŋ nɔ sɔɔmɔ nitsumɔ lɛ mli. Te aaafee tɛŋŋ ni amɛkai enɛɛmɛi fɛɛ, titri lɛ, akɛni kɛbashi amrɔ nɛɛ, amɛnuuu nibii pii ashishi lolo lɛ? Shi miishɛɛ sane ji akɛ, Yesu wo amɛ shi akɛ: “Shi hefatalɔ lɛ, ni ji mumɔ krɔŋkrɔŋ lɛ, mɔ ni Tsɛ lɛ baatsu yɛ migbɛi anɔ lɛ, lɛ eeetsɔɔ nyɛ nii fɛɛ, ni eeekai nyɛ nii fɛɛ ni mikɛɛ nyɛ lɛ.”

Beni eshɛjeɔ amɛmii ekoŋŋ lɛ, Yesu kɛɛ: “Hejɔlɛ mishiɔ maha nyɛ, hejɔlɛ ni ji minɔ lɛ miŋɔhaa nyɛ, . . . Nyɛtsuii akayea, ni asaŋ ekafãa.” Eji anɔkwale, Yesu miiya, shi etsɔɔ mli akɛ: “Nyɛmiisumɔ mi kulɛ, nyɛaana miishɛɛ akɛ miiya Tsɛ lɛ ŋɔɔ, ejaakɛ mi-Tsɛ da fe mi.”

Be ni eshwɛ ni Yesu kɛ amɛ baahi shi lɛ faaa dɔŋŋ. Ekɛɛ: “Mikɛ nyɛ ewieŋ nibii pii dɔŋŋ, ejaakɛ je lɛŋ lumɔ lɛ miiba, ni ebɛ nɔ ko yɛ mimli.” Satan Abonsam, mɔ ni nyɛ ebote Yuda mli ni enine nyɛ eshɛ enɔ lɛ ji je lɛŋ lumɔ lɛ. Shi eshafeemɔ he gbɔjɔmɔ ko bɛ Yesu mli ni Satan nine baanyɛ ashɛ nɔ ni ejie lɛ kɛjɛ Nyɔŋmɔ sɔɔmɔ he.

Wekukpaa ni Bɛŋkɛ Kpaakpa Mli Ŋɔɔmɔ ni Anaa

Yɛ kaimɔ niyenii lɛ sɛɛ lɛ, Yesu tee nɔ ekɛ tsuiŋ wiemɔ kɛ tsɔɔmɔ wo ebɔfoi lɛ hewalɛ. Etamɔ nɔ ni no mli lɛ, nyɔɔŋteŋ po eho. No hewɔ lɛ Yesu wo amɛ hewalɛ akɛ: “Nyɛbaa, ni wɔjea kpo kɛjɛa biɛ.” Shi dani amɛaashi lɛ, suɔmɔ ni Yesu yɔɔ kɛha amɛ lɛ tsirɛ lɛ ni etee nɔ ewie etsɔɔ amɛ, ni ekɛ nɔkwɛmɔ nii sɔrɔtoi wo amɛ hewalɛ.

Eje shishi akɛ: “Miji anɔkwa weintso lɛ, ni mi-Tsɛ ji okwaafonyo lɛ.” Okwaafonyo Kpeteŋkpele, Yehowa Nyɔŋmɔ, tɛo nɛkɛ okadi weintso nɛɛ beni ekɛ mumɔ krɔŋkrɔŋ fɔ Yesu mu yɛ ebaptisimɔ be lɛ mli yɛ afi 29 Ŋ.B. naagbee be mli lɛ. Shi Yesu tee nɔ etsɔɔ akɛ, weintso lɛ feɔ nɔ ni fe lɛ pɛ he okadi, akɛ: “Mihe nine fɛɛ nine ni wooo yibii lɛ, efolɔɔ, ni nɔ fɛɛ nɔ ni woɔ yibii lɛ, ekpɔlɔɔ he, bɔni afee ni ewo yibii fe tsutsu lɛ. . . . Taakɛ bɔ ni tso nine nyɛŋ ajɛ lɛ diɛŋtsɛ emli awo yibii akɛ ja ema weintso lɛ he lɛ, nakai nyɛ hu nyɛnyɛŋ akɛ ja nyɛhi mimli. Miji weintso lɛ, ni nyɛji niji lɛ.”

Yɛ Pentekoste, gbii 51 sɛɛ lɛ, bɔfoi lɛ kɛ mɛi krokomɛi batsɔmɔ tsei aniji yɛ weintso lɛ nɔ beni afɔse mumɔ krɔŋkrɔŋ ashwie amɛnɔ lɛ. Yɛ naagbee lɛ, gbɔmɛi 144,000 batsɔmɔ okadi tsei aniji yɛ weintso lɛ nɔ. Amɛ kɛ weintso lɛ diɛŋtsɛ, Yesu Kristo, feɔ okadi weintso ni woɔ Nyɔŋmɔ Maŋtsɛyeli lɛ yibii lɛ.

Yesu tsɔɔ nɔ ni haa yibiiwoo nɛɛ baa lɛ mli akɛ: “Mɔ ni hiɔ mimli, ni mi hu mihiɔ emli lɛ, lɛ nɔŋŋ ewoɔ yibii pii; ejaakɛ kɛ jeee miŋ lɛ, nyɛnyɛŋ nɔ ko nyɛfee.” Shi kɛji akɛ mɔ ko wooo yibii lɛ, Yesu kɛɔ akɛ, “afoɔ tamɔ tso nine, ni egbiɔ, ni abuaa naa awoɔ la mli, ni ashaa.” Shi yɛ gbɛ kroko nɔ lɛ, Yesu wo shi akɛ: “Kɛ nyɛhi mimli, ni miwiemɔi lɛ hi nyɛmli lɛ, nyɛaakpa nɔ fɛɛ nɔ ni nyɛtaoɔ lɛ he fai, ni aaafee aha nyɛ.”

Kɛkɛ ni Yesu tee nɔ ekɛɛ ebɔfoi lɛ akɛ: “Enɛ akɛwoɔ mi-Tsɛ hiɛ nyam, kɛ nyɛwo yibii pii, ni nyɛtsɔmɔ mikaselɔi lɛ.” Yibii ni Nyɔŋmɔ taoɔ yɛ tsei aniji lɛ anɔ ji Kristofoi asubaŋi ni amɛaajie lɛ kpo, titri lɛ, suɔmɔ. Kɛfata he lɛ, akɛni Kristo ji Nyɔŋmɔ Maŋtsɛyeli lɛ jajelɔ hewɔ lɛ, nɔ ni fata yibii ni asumɔɔ lɛ he ji amɛnitsumɔ akɛ mɛi ni feɔ kaselɔi taakɛ efee lɛ.

Agbɛnɛ Yesu wo amɛ hewalɛ akɛ, “nyɛhia shi yɛ misuɔmɔ lɛ mli.” Ni kɛlɛ, mɛɛ gbɛ ebɔfoi lɛ aaatsɔ nɔ afee enɛ yɛ? Ekɛɔ akɛ, “kɛji nyɛye mikitai lɛ anɔ lɛ, nyɛaahi misuɔmɔ lɛ mli.” Yɛ be mli ni Yesu yaa nɔ lɛ etsɔɔ mli akɛ: “Enɛ ji mikita, akɛ nyɛsumɔ nyɛhe tamɔ bɔ ni misumɔ nyɛ lɛ. Mɔ ko bɛ suɔmɔ ni da fe enɛ, akɛ mɔ aaaŋɔ ewala eŋmɛ shi eha eshieŋtsɛmɛi.”

Yɛ ŋmɛlɛtswai fioo mli lɛ, Yesu baajie nɛkɛ suɔmɔ ni kwɔ fe fɛɛ nɛɛ kpo etsɔɔ kɛtsɔ ewala ni ekɛaaha yɛ ebɔfoi lɛ ahewɔ, kɛ agbɛnɛ mɛi krokomɛi fɛɛ ni baatsɔɔ hemɔkɛyeli yɛ emli lɛ nɔ. Esa akɛ enɔkwɛmɔ nɔ lɛ atsirɛ esɛɛnyiɛlɔi lɛ ni amɛna suɔmɔ ni haa akɛ he shaa afɔle ahaa mɛi krokomɛi lɛ nɔŋŋ eko. Nɛkɛ suɔmɔ nɛɛ baakadi amɛ, taakɛ Yesu etsɔ hiɛ ewie lɛ: “Enɛ mɛi fɛɛ kɛaale akɛ mikaselɔi ji nyɛ, kɛji nyɛsumɔɔ nyɛhe lɛ.”

Yɛ be mli ni etsɔɔ mɛi ni ji eshieŋtsɛmɛi lɛ, Yesu kɛɛ: “Kɛji nyɛfee nii ni miwoɔ nyɛ he kita lɛ, no lɛ mishieŋtsɛmɛi ji nyɛ. Mitsɛɛɛ nyɛ nyɔji dɔŋŋ, ejaakɛ nyɔŋ leee nɔ ni enuŋtsɔ feɔ; shi moŋ shieŋtsɛmɛi mitsɛ nyɛ, ejaakɛ nii fɛɛ ni minu yɛ mi-Tsɛ naa lɛ, mitsi ta mikɛɛ nyɛ.”

Mɛɛ wekukpaa ni jara wa waa po ji enɛ—akɛ mɔ ko kɛ Yesu aaabɔ akɛ shieŋtsɛmɛi ni bɛŋkɛ amɛhe kpaakpa! Shi bɔni afee ni amɛya nɔ amɛna wekukpaa nɛɛ mli ŋɔɔmɔ lɛ, esa akɛ ekaselɔi lɛ “aya nɔ awo yibii.” Kɛji amɛfee nakai lɛ, Yesu kɛɔ akɛ, “nɔ fɛɛ nɔ ni nyɛaabi Tsɛ lɛ yɛ migbɛi amli lɛ, ebaafee eha nyɛ.” Yɛ anɔkwale mli lɛ, enɛ ji nyɔmɔwoo kpele kɛha Maŋtsɛyeli yibiiwoo babaoo! Yɛ be mli ni etee nɔ ewo ebɔfoi lɛ hewalɛ akɛ “amɛsumɔ amɛhe” lɛ, Yesu tsɔɔ mli akɛ, je lɛ baanyɛ amɛ. Ni kɛlɛ eshɛje amɛmii: “Kɛji je lɛ miinyɛ nyɛ lɛ, nyɛnaa nyɛlea akɛ mi tsutsu enyɛ.” Kɛkɛ ni Yesu tsɔɔ nɔ hewɔ ni je lɛ nyɛɔ esɛɛnyiɛlɔi lɛ mli, akɛ: “Akɛni nyɛjɛɛɛ je lɛ mli, shi mi moŋ mihala nyɛ kɛjɛ je lɛŋ lɛ, no hewɔ je lɛ nyɛɔ nyɛ lɛ.”

Yɛ be mli ni etsɔɔ nɔ hewɔ ni je lɛ nyɛɔ amɛ lɛ mli lolo lɛ, Yesu tee nɔ akɛ: “Shi amɛaaŋɔ enɛɛmɛi fɛɛ amɛfee nyɛ yɛ migbɛi lɛ hewɔ; ejaakɛ amɛleee [Yehowa Nyɔŋmɔ] mɔ ni tsu mi lɛ.” Yesu naakpɛɛ nitsumɔi lɛ buɔ mɛi ni nyɛɔ lɛ lɛ fɔ, taakɛ ewie he lɛ: “Eji mitsuuu nitsumɔi ni mɔ ko mɔ ko tsuko eko da yɛ amɛteŋ kulɛ, amɛhe bɛ esha ko; shi enɛ lɛ amɛna, ni kɛlɛ amɛnyɛ mi kɛ mi-Tsɛ fɛɛ.” No hewɔ lɛ taakɛ Yesu kɛɔ lɛ, ŋmalɛi lɛ eba mli: “Amɛnyɛ mi yakatswaa.”

Taakɛ etsɔ hiɛ efee lɛ, Yesu tee nɔ eshɛje amɛmii ekoŋŋ kɛtsɔ shi ni ewo amɛ akɛ ebaatsu yelikɛbualɔ lɛ, mumɔ krɔŋkrɔŋ lɛ, ni ji Nyɔŋmɔ nifeemɔ hewalɛ lɛ kɛba amɛnɔ lɛ nɔ. “Lɛ, kɛ eba lɛ, eeeye mihe odase; ni nyɛ hu nyɛaaye odase.”

Shimɔ Be Mli Ŋaawoo ni Etee nɔ Ekɛha

Yesu kɛ bɔfoi lɛ efee klalo ni amɛbaashi ŋwɛitsu lɛ nɔ. Kɛkɛ ni etee nɔ akɛ: “Mikɛɛ nyɛ nii nɛɛ bɔni afee ni nyɛnaji akatɔ̃tɔ.” Kɛkɛ ni ekɛ kɔkɔbɔɔ ni sa hesusumɔ waa nɛɛ ha amɛ: “Amɛaashwie nyɛ kɛaajɛ kpeehei lɛ. Ni be baaba tete, ni mɔ fɛɛ mɔ ni gbeɔ nyɛ lɛ aaasusu akɛ ekɛmiija Nyɔŋmɔ.”

Eka shi faŋŋ akɛ kɔkɔbɔɔ nɛɛ gba bɔfoi lɛ anaa waa diɛŋtsɛ. Eyɛ mli akɛ Yesu etsɔ hiɛ ekɛɛ amɛ momo akɛ je lɛ baanyɛ amɛ moŋ, shi ejieko lɛ kpo yɛ faŋŋ mli akɛ abaagbe amɛ. Yesu tsɔɔ mli akɛ: “Shi kɛjɛ shishijee lɛ mikɛɛɛ nyɛ nii nɛɛ, ejaakɛ mikɛ nyɛ yɛ.” Shi kɛlɛ kwɛ bɔ ni ehi jogbaŋŋ ha akɛ eeetsɔ hiɛ ekɛ nɛkɛ wiemɔ nɛɛ awo amɛ hewalɛ dani eshi amɛ eya!

Yesu tee nɔ akɛ: “Shi agbɛnɛ lɛ, miiya mɔ ni tsu mi lɛ ŋɔɔ, ni nyɛteŋ mɔ ko biii mi akɛ: ‘Nɛgbɛ oyaa?’ ” Mra mli yɛ nakai gbɛkɛ lɛ, amɛbi lɛ he ni eyaa, shi amrɔ nɛɛ nɔ ni ekɛɛ amɛ lɛ ehoso amɛ aahu akɛ amɛbiii lɛ enɛ he saji babaoo dɔŋŋ. Taakɛ Yesu kɛɛ lɛ: “Shi ni mitsi nii nɛɛ atã mikɛɛ nyɛ hewɔ lɛ, ŋkɔmɔyeli eyimɔ nyɛtsuiiaŋ.” Jeee akɛ ni bɔfoi lɛ ena amɛle akɛ amɛbaana yiwaa ni mli wa mli amanehulu ni abaagbe amɛ lɛ pɛ kɛkɛ hewɔ ni amɛyeɔ ŋkɔmɔ lɛ, shi moŋ akɛni amɛ-Nuŋtsɔ lɛ miishi amɛ lɛ hu hewɔŋ.

No hewɔ lɛ Yesu tsɔɔ mli akɛ: “Ehi ha nyɛ akɛ matee; ejaakɛ, kɛji miyaaa lɛ, hefatalɔ lɛ baŋ nyɛŋɔɔ; shi kɛji mitee lɛ, maha eba nyɛŋɔɔ.” Akɛ gbɔmɔ adesa lɛ, Yesu baanyɛ ahi he kome yɛ be kome mli, shi kɛ eyɛ ŋwɛi lɛ, no lɛ ebaanyɛ etsu hefatalɔ, ni ji Nyɔŋmɔ mumɔ krɔŋkrɔŋ lɛ kɛba esɛɛnyiɛlɔi lɛ aŋɔɔ yɛ he fɛɛ he ni amɛyɔɔ yɛ shikpɔŋ lɛ nɔ. No hewɔ lɛ ya ni Yesu yaa lɛ he baaba sɛɛnamɔ.

Yesu kɛɛ akɛ, mumɔ krɔŋkrɔŋ lɛ, “eeekã je lɛ yɛ esha hewɔ kɛ jalɛ hewɔ kɛ kojomɔ hewɔ.” Abaakpa je lɛ esha, ni ji kpoomɔ ni ekpoo akɛ eeejie hemɔkɛyeli kpo yɛ Nyɔŋmɔ Bi lɛ mli lɛ he mama. Kɛfata he hu lɛ, abaafee Yesu jalɛ lɛ he mfoniri yɛ gbɛ ni tsɔɔ mɔ yiŋ nɔ kɛtsɔ Tsɛ lɛ ŋɔɔ ni eeekwɔ kɛaaya lɛ nɔ. Ni bɔ ni Satan kɛ eyiwalɛ je lɛ yeee omanye yɛ be mli ni amɛbɔɔ mɔdɛŋ ni amɛfite Yesu emuuyeli lɛ ji odaseyeli ni tsɔɔ mɔ yiŋ akɛ akojo je nɛŋ lumɔ lɛ ni abu lɛ fɔ.

Yesu tee nɔ akɛ: “Miyɛ nii pii lolo ni makɛɛ nyɛ; shi nyɛnyɛŋ mli nyɛmɔ amrɔ nɛɛ.” No hewɔ lɛ Yesu wo shi akɛ kɛ efɔse mumɔ krɔŋkrɔŋ lɛ, ni ji Nyɔŋmɔ nitsumɔ hewalɛ lɛ eshwie shi lɛ, ebaakudɔ amɛ kɛya nibii nɛɛ ashishinumɔ mli yɛ bɔ ni amɛbaanyɛ amɛnu shishi lɛ kɛ gbeekpamɔ naa.

Nɔ ni bɔfoi lɛ nyɛɛɛ anu shishi titri ji akɛ Yesu baagbo ni no sɛɛ lɛ ebaajie ehe kpo etsɔɔ amɛ yɛ be mli ni atee lɛ shi kɛjɛ gbohii ateŋ lɛ sɛɛ. No hewɔ lɛ amɛbibii amɛhe akɛ: “Mɛni ji nɔ ni ekɛɔ wɔ nɛɛ: ‘Eshwɛ fioo ni nyɛnaŋ mi, ni asaŋ eshwɛ fioo, ni nyɛbaana mi, ni asaŋ: miiya Tsɛ lɛ ŋɔɔ’?”

Yesu yoo akɛ amɛmiitao ni amɛbibii lɛ saji, no hewɔ lɛ etsɔɔ mli akɛ: “Lɛlɛŋ, lɛlɛŋ, miikɛɛ nyɛ akɛ: Nyɛ lɛ nyɛbaafo ni nyɛbaawo yara, shi je lɛ baanya; nyɛ lɛ nyɛbaaye ŋkɔmɔ, shi nyɛ ŋkɔmɔyeli lɛ aaatsɔ miishɛɛ.” No sɛɛ shwane, beni agbe Yesu lɛ, je lɛŋ jamɔ mli hiɛnyiɛlɔi lɛ nya, shi kaselɔi lɛ ye ŋkɔmɔ. Shi kɛlɛ, amɛ ŋkɔmɔyeli lɛ tsake ni ebatsɔ miishɛɛ yɛ be mli ni atee Yesu shi kɛjɛ gbohii ateŋ lɛ! Ni amɛmiishɛɛ lɛ tee nɔ yɛ be mli ni eha amɛ hewalɛ yɛ Pentekoste koni amɛfee edasefoi kɛtsɔ Nyɔŋmɔ mumɔ krɔŋkrɔŋ lɛ ni efɔse eshwie amɛnɔ lɛ nɔ lɛ!

Ni Yesu kɛ shihilɛ ni bɔfoi lɛ yɔɔ mli lɛ to yoo ni miikɔ̃mɔ ni ebaafɔ he ni ekɛɛ: “Kɛ yoo miikɔmɔ lɛ, ehaoɔ, ejaakɛ eŋmɛlɛtswaa lɛ eshɛ.” Shi taakɛ bɔ ni ehiɛ kpaa emanehulu lɛ nɔ yɛ be mli ni efɔ ebi lɛ sɛɛ lɛ, nakai Yesu kɛɛ amɛ akɛ: “No hewɔ lɛ nyɛ hu, agbɛnɛ nyɛmiiye ŋkɔmɔ moŋ; shi mibana nyɛ ekoŋŋ, [kɛ atee mi shi kɛjɛ gbohii ateŋ lɛ sɛɛ] ni nyɛtsuii aaanyɔ nyɛmli, ni nyɛmiishɛɛ lɛ mɔ ko shɔŋ yɛ nyɛdɛŋ.”

Kɛbashi nɛkɛ be nɛɛ mli lɛ, no mli lɛ bɔfoi lɛ biko nɔ ko yɛ Yesu gbɛi amli dã. Shi agbɛnɛ ekɛɛ: “Nɔ fɛɛ nɔ he fai ni nyɛaakpa Tsɛ lɛ yɛ migbɛi anɔ lɛ, eeeha nyɛ. . . . Ejaakɛ Tsɛ lɛ diɛŋtsɛ miisumɔ nyɛ, ejaakɛ nyɛ hu nyɛmiisumɔ mi, ni nyɛhe nyɛye akɛ Nyɔŋmɔ ŋɔɔ mijɛ. Tsɛ lɛ ŋɔɔ mijɛ miba je lɛ mli, asaŋ miijɛ je lɛŋ maya Tsɛ lɛ ŋɔɔ.”

Yesu wiemɔi lɛ ji hewalɛwoo kpele kɛha bɔfoi lɛ. Amɛkɛɛ: “Enɛ wɔkɛheɔ wɔyeɔ, akɛ Nyɔŋmɔ ŋɔɔ ojɛ.” Yesu bi amɛ akɛ: “Agbɛnɛ nyɛmiihe nyɛmiiye? Naa, ŋmɛlɛtswaa lɛ miiba ni eshɛ po, ni nyɛbaagbɛ nyɛshwã ni mɔ fɛɛ mɔ aaakɔ egbɛ, ni nyɛaashi mikome.” Bɔ fɛɛ bɔ ni etamɔ nɔ ni anyɛŋ ahe aye ha lɛ, enɛ ba mli dani je tsɛre!

Ni Yesu mu naa akɛ: “Miikɛɛ nyɛ nii nɛɛ, koni nyɛwo nyɛtsuii yɛ mimli. Je lɛŋ lɛ, hejaramɔ nyɛnaa, shi kɛlɛ nyɛtsuii anyɔa nyɛmli! Miye je lɛ nɔ kunim.” Yɛ nɔ fɛɛ nɔ ni Satan kɛ eje lɛ bɔ mɔdɛŋ amɛfee koni amɛkɛfite emuuyeli mli ni Yesu hiɛ lɛ fɛɛ sɛɛ lɛ, Yesu ye je lɛ nɔ kunim kɛtsɔ Nyɔŋmɔ suɔmɔnaa nii ni efee kɛgbe naa yɛ anɔkwayeli mli lɛ nɔ.

Naagbee Sɔlemɔ Yɛ Ŋwɛitsu lɛ Nɔ

Akɛni eyɔɔ suɔmɔ babaoo kɛha ebɔfoi lɛ hewɔ lɛ, Yesu miisaa amɛ kɛmiiha shimɔ ni eeeshi amɛ ni baa lɛ. Agbɛnɛ, yɛ be mli ni ewo amɛ ŋaa ni eshɛje amɛmii babaoo sɛɛ lɛ, ehole ehiŋmɛii anɔ kɛtee ŋwɛi ni ekpa e-Tsɛ lɛ fai akɛ: “Wo obi lɛ hiɛ nyam, koni obi lɛ hu awo ohiɛ nyam; taakɛ bɔ ni oha lɛ hegbɛ yɛ heloo fɛɛ nɔ, koni mɛi fɛɛ ni oŋɔha lɛ lɛ eha amɛ naanɔ wala lɛ.”

Mɛɛ saneyitso ni kanyaa mɔ po Yesu jie lɛ kpo nɛkɛ—naanɔ wala! Akɛni aha lɛ “hegbɛ yɛ heloo fɛɛ nɔ” hewɔ lɛ, Yesu baanyɛ ni ekɛ ekpɔmɔ afɔleshaa lɛ mli sɛɛnamɔi lɛ aha adesai fɛɛ ni gboiɔ lɛ. Kɛlɛ, ekɛ “naanɔ wala” haa mɛi pɛ ni Tsɛ lɛ kpɛlɛɔ amɛnɔ lɛ. Yɛ be mli ni eyaa nɔ ewieɔ saneyitso ni kɔɔ naanɔ wala he nɛɛ he lɛ, Yesu tee nɔ yɛ esɔlemɔ lɛ mli akɛ:

“Enɛ ji naanɔ wala lɛ, akɛ amɛaana bo anɔkwa Nyɔŋmɔ kome lɛ, kɛ Yesu Kristo, mɔ ni otsu lɛ lɛ he nilee.” (NW) Hɛɛ, yiwalaheremɔ damɔ Nyɔŋmɔ kɛ e-Bi lɛ fɛɛ he nilee ni wɔɔna nɔ. Shi babaoo he miihia fe yitsoŋ nilee kɛkɛ.

Esa akɛ mɔ lɛ ale amɛ diɛŋtsɛ yɛ teemɔŋ, esa akɛ mɔ lɛ kɛ amɛ abɔ tamɔ nanemɛi ni nuɔ amɛhe shishi. Esa akɛ mɔ lɛ anu saji ahe taakɛ bɔ ni amɛnuɔ he lɛ, ni amɛna nibii kɛtsɔ amɛhiŋmɛiiaŋ loo taakɛ bɔ ni amɛnaa lɛ lɛ. Nɔ ni fe fɛɛ lɛ, esa akɛ mɔ lɛ abɔ mɔdɛŋ ni ekase amɛsui kpakpai ni nɔ bɛ yɛ bɔ ni amɛkɛ mɛi yeɔ haa lɛ he.

Yɛ no sɛɛ lɛ, Yesu sɔle akɛ: “Mi lɛ miwo ohiɛ nyam yɛ shikpɔŋ lɛ nɔ akɛni nitsumɔ lɛ ni oŋɔha mi tsumɔ lɛ migbe naa lɛ.” Akɛni etsu enitsumɔ lɛ kɛbashi he ni eshɛ nɛɛ ni ele akɛ ewɔsɛɛ be baaye omanye hewɔ lɛ, ekpa fai akɛ: “Ataa, ŋɔɔ anunyam ni miyɔɔ yɛ oŋɔɔ dani je lɛ yɔɔ lɛ owo mihiɛ nyam.” Hɛɛ, eebi agbɛnɛ koni aku sɛɛ akɛ lɛ aya etsutsu ŋwɛi anunyam lɛ mli kɛtsɔ gbohiiashitee nɔ.

Yɛ be mli ni emuaa eshikpɔŋ nɔ nitsumɔ titri lɛ naa lɛ, Yesu kɛɛ: “Mijie ogbɛi lɛ ashi mitsɔɔ gbɔmɛi ni oŋɔ amɛ kɛjɛ je lɛ mli oha mi lɛ. Onii ji amɛ, ni oŋɔ amɛ oha mi, ni amɛye owiemɔ lɛ nɔ.” Yesu kɛ Nyɔŋmɔ gbɛi, Yehowa, tsu nii yɛ esɔɔmɔ lɛ mli, ni efee bɔ ni atsɛɔ gbɛi nɛɛ ahaa ni egbɛɔ lɛ he nɔkwɛmɔ nɔ, shi efee fe nakai koni ekɛjie Nyɔŋmɔ gbɛi lɛ kpo etsɔɔ ebɔfoi lɛ. Agbɛnɛ hu egbele amɛnilee kɛ hiɛsɔɔ ni amɛyɔɔ kɛha Yehowa, esu kɛ baŋ kɛ eyiŋtoi lɛ amli.

Yɛ be mli ni ekɛ yijiemɔ haa Yehowa akɛ Mɔ ni Kwɔ Fe lɛ, Mɔ shishi ni esɔmɔɔ yɛ lɛ, Yesu kɛ heshibaa kpɛlɛ nɔ akɛ: “Wiemɔi lɛ ni oŋɔha mi lɛ, miŋɔha amɛ; ni amɛhe, ni amɛna amɛle krɛdɛɛ akɛ oŋɔɔ mijɛ, ni amɛhe amɛye akɛ bo otsu mi.”

Yɛ be mli ni ekɛ sɔrɔtofeemɔ baa esɛɛnyiɛlɔi lɛ kɛ adesai ni eshwɛ lɛ ateŋ lɛ, Yesu tee nɔ esɔle akɛ: “Mi lɛ, amɛ mibiɔ maha; jeee je lɛ mibiɔ maha . . . Beni mikɛ amɛ yɔɔ je lɛ mli lɛ, . . . mibu amɛhe, ni amɛteŋ mɔ ko mɔ ko elajeko, ja laajemɔ bi lɛ,” ni ji Yuda Iskariot. Yɛ nɛkɛ be nɛɛ mli lɛ, no mli lɛ Yuda etee koni eyatsu nitsumɔ gbonyo ni ekɛbaatsɔɔ Yesu sɛɛ gbɛ lɛ he nii. No hewɔ lɛ, Yuda miiha Ŋmalɛi lɛ miiba mli ni eleee.

Yesu tee nɔ esɔle akɛ: “Je lɛ miinyɛ amɛ, . . . Mibiii akɛ ojie amɛ kɛjɛ je lɛ mli, shi moŋ akɛ obu amɛhe yɛ mɔ fɔŋ lɛ mli. Amɛjɛɛɛ je lɛ mli, taakɛ bɔ ni mi hu mijɛɛɛ je lɛ mli lɛ.” Yesu sɛɛnyiɛlɔi lɛ yɛ je lɛ mli, nɛkɛ adesai asafo ni ato amɛ gbɛjianɔ ni Satan yeɔ amɛnɔ lɛ, shi esa akɛ amɛfee mɛi ni etse amɛhe kɛjɛ enɛ kɛ eyiwalɛ nifeemɔi lɛ ahe ni amɛhi shi nakai yɛ be fɛɛ mli.

Yesu tee nɔ akɛ: “Feemɔ amɛ krɔŋkrɔŋ yɛ onɔkwale lɛ mli; owiemɔ lɛ anɔkwaleŋ.” Yesu miitsɛ Hebri Ŋmalɛi ni jɛ mumɔŋ ni etsɛɔ wiemɔi kɛjɛɔ mli lɛ yɛ biɛ akɛ “anɔkwale lɛ.” Shi nɔ ni etsɔɔ ekaselɔi lɛ kɛ nɔ ni yɛ sɛɛ mli lɛ amɛŋma yɛ mumɔ lɛ tsirɛmɔ naa akɛ Kristofoi a-Hela Ŋmalɛi lɛ hu ji “anɔkwale lɛ.” Nɛkɛ anɔkwale nɛɛ baanyɛ atsuu mɔ ko he, etsake esubaŋ kwraa ni efee lɛ gbɔmɔ ni esoro lɛ ni etsi ehe kɛjɛ je lɛ he.

Agbɛnɛ Yesu sɔle akɛ, “Shi jeee mɛnɛɛmɛi ahewɔ kɛkɛ mibiɔ lɛ, shi mɛi ni baahe minɔ aye yɛ amɛwiemɔ naa lɛ hu ahewɔ.” No hewɔ lɛ Yesu sɔle eha mɛi ni baafee esɛɛnyiɛlɔi ni afɔ amɛ mu lɛ kɛ wɔsɛɛ be mli kaselɔi ni abaabua amɛnaa afee amɛ “kuu kome” lɛ hu. Mɛni ebiɔ kɛhaa mɛnɛɛmɛi fɛɛ?

“Koni amɛ fɛɛ amɛfee ekome, taakɛ bɔ ni bo, Ataa, oyɔɔ mimli ni mi hu miyɔɔ omli lɛ, koni amɛ hu amɛfee ekome yɛ wɔmli.” Yesu kɛ e-Tsɛ lɛ jeee heloo naa gbɔmɔ kome, shi moŋ amɛkpaa gbee yɛ nibii fɛɛ mli. Yesu sɔle koni esɛɛnyiɛlɔi lɛ hu ana ekomefeemɔ nɛɛ nɔŋŋ mli ŋɔɔmɔ koni “je lɛ ale akɛ bo otsu mi ni osumɔɔ amɛ tamɔ bɔ ni osumɔɔ mi lɛ.”

Agbɛnɛ Yesu bi eŋwɛi Tsɛ lɛ nɔ ko eha mɛi ni baafee esɛɛnyiɛlɔi ni afɔ amɛ mu lɛ. Kɛha mɛni? “Miisumɔ akɛ he ni miyɔɔ lɛ, amɛ hu amɛkɛ mi abahi jɛmɛ, koni amɛna minunyam ni oŋɔha mi lɛ, ejaakɛ osumɔɔ mi dani ato je lɛ shishi,” ni ji akɛ, dani Adam kɛ Hawa aaaŋɔ amɛseshi lɛ hɔ. Mra mli dani enɛ aaaba lɛ, no mli lɛ Nyɔŋmɔ sumɔɔ e-Bi koome ni batsɔ Yesu Kristo lɛ.

Yɛ be mli ni ekɛ esɔlemɔ lɛ baa naagbee lɛ, Yesu ma nɔ mi ekoŋŋ akɛ: “Mijie ogbɛi lɛ kpo mitsɔɔ amɛ, ni masaa majie lɛ kpo matsɔɔ, koni suɔmɔ ni okɛsumɔɔ mi lɛ ahi amɛmli, ni mi hu mahi amɛmli.” Kɛha bɔfoi lɛ, Nyɔŋmɔ gbɛi lɛ ni amɛkase lɛ kɔɔ Nyɔŋmɔ suɔmɔ lɛ diɛŋtsɛ ni amɛbale lɛ he. Yohane 14:1–17:26; 13:27, 35, 36; 10:16; Luka 22:3, 4; 2 Mose 24:10; 1 Maŋtsɛmɛi 19:9-13; Yesaia 6:1-5; Galatabii 6:16; Lala 35:19; 69:4; Abɛi 8:22, 30.

▪ Nɛgbɛ Yesu yaa, ni mɛɛ hetoo Toma nine shɛ nɔ ni kɔɔ gbɛ ni yaa jɛmɛ lɛ he?

▪ Eka shi faŋŋ akɛ, mɛni Filipo taoɔ ni Yesu afee, kɛtsɔ nii ni ebi lɛ nɔ?

▪ Mɛni hewɔ ni mɔ ni ena Yesu lɛ, ena Tsɛ lɛ hu lɛ?

▪ Mɛɛ gbɛ nɔ Yesu sɛɛnyiɛlɔi lɛ baatsu nitsumɔi wuji fe bɔ ni lɛ etsu lɛ yɛ?

▪ Mɛɛ shishinumɔ naa Satan nine nyɛɛɛ ashɛ Yesu nɔ yɛ lɛ?

▪ Mɛɛ be mli Yehowa tɛo okadi weintso lɛ, ni mɛɛ be mli mɛi krokomɛi batsɔmɔ weintso lɛ fa, ni yɛ mɛɛ gbɛ nɔ?

▪ Yɛ naagbee lɛ, tsei aniji enyiɛ okadi weintso lɛ baana?

▪ Mɛɛ yibii Nyɔŋmɔ taoɔ kɛjɛɔ tsei aniji lɛ anɔ?

▪ Te wɔɔfee tɛŋŋ wɔtsɔmɔ Yesu shieŋtsɛmɛi?

▪ Mɛni hewɔ je lɛ nyɛɔ Yesu sɛɛnyiɛlɔi lɛ?

▪ Mɛɛ kɔkɔbɔɔ ko ni Yesu kɛha hao ebɔfoi lɛ?

▪ Mɛni hewɔ ni bɔfoi lɛ biii Yesu sane ko kwraa yɛ he ni eyaa lɛ he lɛ?

▪ Mɛni titri bɔfoi lɛ nuuu shishi kwraa lɛ?

▪ Mɛɛ gbɛ nɔ Yesu fee he mfoniri yɛ akɛ bɔfoi lɛ ashihilɛ lɛ baatsake kɛjɛ ŋkɔmɔyeli mli kɛya miishɛɛ mli?

▪ Mɛni Yesu kɛɛ akɛ etsɛŋ ni bɔfoi lɛ baafee?

▪ Mɛɛ gbɛ nɔ Yesu tsɔ eye je lɛ nɔ kunim yɛ?

▪ Aha Yesu na “hegbɛ yɛ heloo fɛɛ nɔ” yɛ mɛɛ gbɛ nɔ?

▪ Akɛ aaana Nyɔŋmɔ kɛ e-Bi lɛ he nilee lɛ tsɔɔ mɛni?

▪ Yesu jie Nyɔŋmɔ gbɛi lɛ kpo yɛ mɛɛ gbɛi anɔ?

▪ Mɛni ji “anɔkwale lɛ,” ni efeɔ Kristofonyo lɛ “krɔŋkrɔŋ” yɛ mɛɛ gbɛ nɔ?

▪ Nyɔŋmɔ, kɛ e-Bi lɛ kɛ anɔkwa jalɔi fɛɛ lɛ ekomeŋ yɛ mɛɛ gbɛ nɔ?

▪ Mɛɛ be mli “ato je lɛ shishi” lɛ?