‘No Mli Lɛ Enyiɛ Atswa?’
‘ENYIƐ atswa?’ Shii enyiɛ obi nakai sane lɛ da? Wɔhiɛ hiɔ be nɔ be fɛɛ be yɛ wɔ ŋmɛnɛŋmɛnɛ yinɔ ni hiɛ foi waa nɛɛ mli. Wɔ daa gbi shihilɛ mli nibii lɛ pii—leebi shitee, nitsumɔ-yaa, wɔniyeli, wɔnanemɛi ni wɔkɛkpeɔ, kɛ nibii krokomɛi—fɛɛ yɛ be kudɔmɔ shishi jogbaŋŋ diɛŋtsɛ. Ni wɔkɛ wɔhe fɔɔ nibii sɔrɔtoi ni wɔyɔɔ—watsii ni akɛkpɛtɛɔ gbogbo he, watsii ni afiɔ, ŋmɛlɛi, redioi—anɔ ni amɛtsɔɔ wɔ bɔ ni atswa.
Shi Biblia bei amli beni gbɔmɛi bɛ nibii ni akɛleɔ bɔ ni atswa tamɔ nɔ ni wɔyɔɔ nɛɛ hu? Te amɛfeɔ tɛŋŋ amɛbuɔ be hu? Ani Biblia mli sane lɛ tsɔɔ nɔ ko yɛ enɛ he? Gbi lɛ mli be pɔtɛɛ ni Biblia mli sane ko ba mli ni ooole lɛ baaha ona sanekɔɔmɔ hee ko yɛ Nyɔŋmɔ Wiemɔ lɛ he ni eeeha o-Biblia kasemɔ lɛ afee nɔ ni miishɛɛ yɔɔ mli.
Nibii ni Nyɔŋmɔ Kɛha ni Tsɔɔ Be
Yɛ mra be mli lɛ, abuɔ be mli ni sane ko ba lɛ he akɔntaa kɛtsɔ hulu lɛ aloo nyɔŋtsere lɛ, “kanei wuji enyɔ” ni Bɔlɔ lɛ kɛwo ŋwɛi “koni amɛgbala shwane kɛ nyɔɔŋ mli” lɛ akwɛmɔ nɔ. (1 Mose 1:14-16) Akɛ nɔkwɛmɔ nɔ lɛ, “beni je tsɛre” lɛ, ni bɔfoi enyɔ lɛ tsirɛ Lot kɛ eweku lɛ yisɛɛ koni amɛjo foi kɛjɛ Sodom maŋ ni abu lɛ fɔ lɛ mli lɛ. (1 Mose 19:15, 16) Ni aaafee “gbɛkɛnaashi” mli ni Abraham tsulɔ anɔkwafo lɛ yashɛ nu bu lɛ he, he ni ekɛ Rebeka kpe yɛ lɛ.—1 Mose 24:11, 15.
Eshɛɔ be, ni atsɔɔ be pɔtɛɛ loo be tuuŋtu ni nibii komɛi ba. Akɛ nɔkwɛmɔ nɔ lɛ, awo Kojolɔ Gideon binuu Abimelek awuiyelɔ lɛ ŋaa ni “leebi, kɛ hulu te shi pɛ lɛ,” ni efa ni eyatutua Shekem maŋtiase lɛ. (Kojolɔi 9:33) Eka shi faŋŋ akɛ ŋaa gbɛ ko kɛ nitsumɔ he yiŋtoo yɛ enɛ he. Bɔ ni leebi hulu lɛ kpɛɔ haŋŋ yɛ Abimelek tabilɔi lɛ asɛɛ lɛ ha ebawa waa kɛha Shekem hefalɔi lɛ akɛ amɛaayoo tai ni baa amɛbatutua amɛ lɛ yɛ “gɔji lɛ asusumai” lɛ amli—Kojolɔi 9:36-41.
Be he Wiemɔi yɛ Abɛbuai Amli
Hebribii lɛ kɛ wiemɔi ni awo he kɛ wiemɔi ni ŋɔɔ fɛɛ tsuɔ nii ni amɛkɛtsɔɔ be. Ni jeee akɛ enɛɛmɛi haa wɔleɔ bɔ ni amɛmaŋ lɛŋ shikamɔ kɛ kusum ji kɛkɛ, shi moŋ amɛjieɔ nɔ ko ni kɔɔ nɔ hewɔ ni afee nɔ pɔtɛɛ ko lɛ he lɛ kpo etsɔɔ.
Akɛ nɔkwɛmɔ nɔ lɛ, 1 Mose 3:8 kɛɔ wɔ akɛ aaafee “beni gbɛkɛnaashi kɔɔyɔɔ shwie lɛ,” ni Yehowa kɛ Adam kɛ Hawa wie yɛ gbi ni amɛfee esha lɛ nɔ. Anuɔ enɛ shishi akɛ ebɛŋkɛɔ hulu shinyɔɔ be mli beni kɔɔyɔɔ ŋanii bɔiɔ tswaa, ni ehaa mɔ he jɔɔ lɛ yɛ gbi lɛ mli dɔlɛ lɛ sɛɛ lɛ he. Yɛ be babaoo mli lɛ, kɛ gbi lɛ miiba enaagbee lɛ, ebafeɔ be ni akɛhereɔ kɔɔyɔɔ ni akɛjɔɔ he hu. Ni kɛlɛ, Yehowa haaa kojomɔ sane ni hiɛdɔɔ yɔɔ he nɛɛ alilaa shi kɛyashi enɔ jetsɛremɔ yɛ be mli ni be yɔɔ ni abaanyɛ akɛtsu he nii lɛ.
Shi yɛ gbɛ kroko nɔ lɛ, 1 Mose 18:1, 2 tsɔɔ akɛ Yehowa bɔfoi lɛ ba Abraham buu lɛ he yɛ Mamre “shwane ketekete.” Feemɔ shwane ketekete hulu ni miitso waa yɛ Yudea gɔji lɛ anɔ lɛ he mfoniri okwɛ. Dɔlɛ lɛ baanyɛ aye onɔ kwraa. Nɛkɛ be nɛɛ ji be ni akɛfɔɔ niyeli kɛ hejɔɔmɔ. (Kwɛmɔ 1 Mose 43:16, 25; 2 Samuel 4:5.) Enɛ hewɔ lɛ, no mli lɛ Abraham “ta ebuu lɛ shinaa lɛ naa,” he ni ekolɛ kɔɔyɔɔ miitswa fioo yɛ, ni ekolɛ eeewo etsui yɛ be mli ni eye nɔ ko lɛ sɛɛ. Wɔbaanyɛ wɔnu nuumo nɛɛ gbɔfeemɔ su lɛ shishi jogbaŋŋ kɛji wɔkane akɛ “esha foi” koni ekɛ gbɔi lɛ ayakpe, ni no sɛɛ lɛ “[e]yiŋ kɛtee . . . buu lɛ mli” koni eyakɛɛ Sara ni efee aboloo, kɛkɛ ni “[e]sha foi kɛtee tsinai lɛ ateŋ,” ni eyamɔ eko “eŋɔfee niyenii oya” lɛ. Efee enɛɛmɛi fɛɛ yɛ shwane dɔlɛ babaoo lɛ mli!—1 Mose 18:2-8.
Hebribii lɛ a-Nyɔɔŋ Bei
Eka shi faŋŋ akɛ Hebribii lɛ jaraa nyɔɔŋ be lɛ mli etɛ, ni amɛtsɛɔ lɛ “buu bei.” Eko fɛɛ eko heɔ be ni ka hulu shinyɔɔ kɛ eshitee teŋ lɛ mlijaa etɛ mli ekome, aloo aaafee ŋmɛlɛtswai ejwɛ, yɛ afi lɛ mli be lɛ naa. (Lala 63:7) “Nyɔɔŋ teŋ buu be lɛ shishijee mli,” ni jeɔ shishi kɛjɛɔ aaafee gbɛkɛ ŋmɛlɛ nyɔŋma mli kɛyashi nyɔɔŋ ŋmɛji enyɔ lɛ mli ni Gideon yatutua Midianbii lɛ aŋsra lɛ. Ŋwanejee ko bɛ he akɛ nɛkɛ beaŋ tutuamɔ lɛ yati bulɔi lɛ ashi trukaa. Eka shi faŋŋ akɛ, Gideon ni le ehenɔkwɛmɔ jogbaŋŋ lɛ halaŋ be kroko ni hi waa kɛha etutuamɔ lɛ fe enɛ!—Kojolɔi 7:19.
Yɛ Eksodo loo Gbɛfaa Be lɛ mli lɛ, Yehowa “ha boka kɔɔyɔɔ ni naa wa batswa nakai nyɔɔŋ lɛŋ fɛɛ, ni ŋshɔ lɛ ho kɛtee,” ni eha Israelbii lɛ tsɔ shikpɔŋ gbiŋ nɔ kɛfo mli kɛtee. Beni Mizraimbii lɛ kɛɛ amɛbɛŋkɛɔ amɛ lɛ, no mli lɛ abote “leebi buu be lɛ mli,” ni Yehowa futu Mizraimbii lɛ ŋsra lɛ mlibii lɛ fɛɛ ayiŋ, ni yɛ naagbee lɛ, “beni je tsɛre leebi lɛ, ŋshɔ lɛ ku sɛɛ kɛbaho ekoŋŋ,” ni etsɔ nakai feemɔ nɔ ekpata amɛhiɛ kwraa. (2 Mose 14:21-27) No hewɔ lɛ ŋshɔ lɛ mli gbamɔ koni Israelbii lɛ atsɔ mli kɛya lɛ hé aaafee jenamɔ be loo nyɔɔŋ muu lɛ fɛɛ.
Yɛ Klɛŋklɛŋ Afii Oha lɛ Mli
Beni shɛɔ klɛŋklɛŋ afii oha lɛ mli lɛ, no mli lɛ Yudafoi lɛ ebɔi ŋmɛlɛtswai 12 kanemɔ kɛha gbi kome. Enɛ hewɔ ni Yesu kɛɛ yɛ ebɛbuai lɛ ekome mli akɛ: “Ani jeee ŋmɛlɛtswai nyɔŋma-kɛ-enyɔ yɔɔ jenamɔ mli?” lɛ. (Yohane 11:9) Akaneɔ kɛjɛɔ hulu jeee kɛyashiɔ hulu shinyɔɔ mli, aloo aaafee leebi ŋmɛji ekpaa kɛyashi gbɛkɛ ŋmɛji ekpaa. No hewɔ lɛ, “ŋmɛlɛtswaa ni ji etɛ” lɛ baafee leebi ŋmɛji nɛɛhu. Nɛkɛ be nɛɛ mli yɛ Pentekoste gbi lɛ nɔ ni afɔse mumɔ krɔŋkrɔŋ lɛ ashwie shi lɛ. Beni gbɔmɛi lɛ folɔ kaselɔi lɛ anaa akɛ “daa dɔkɔdɔkɔ etɔrɔ amɛ” lɛ, Petro ku nakai naafolɔmɔ lɛ naa kwraa shikome nyɔŋlo. Eka shi faŋŋ akɛ mɔ ko mɔ ko etɔŋ daa leebi maŋkpa nakai!—Bɔfoi lɛ Asaji 2:13, 15.
Nakai nɔŋŋ hu, Yesu wiemɔ akɛ “miŋmaa ji akɛ mafee mɔ ni tsu mi lɛ suɔmɔnaa nii” lɛ kɛ shishinumɔ babaoo haa wɔ kɛji wɔsusu be ni ewie nakai wiemɔ lɛ he lɛ. Taakɛ Yohane 4:6 tsɔɔ lɛ, “aaafee ŋmɛlɛ nyɔŋma-kɛ-enyɔ mli,” aloo aaafee shwane fintiŋŋ. Yɛ be mli ni amɛkɛ leebi be lɛ fɛɛ enyiɛ Samaria gɔji ashikpɔŋ lɛ fɛɛ nɔ sɛɛ lɛ, eka shi faŋŋ akɛ hɔmɔ kɛ kumai baaye Yesu kɛ ekaselɔi lɛ. No hewɔ ni kaselɔi lɛ wo lɛ hewalɛ ni eye nɔ ko beni amɛku amɛsɛɛ amɛkɛ niyenii lɛ ba lɛ. Hewalɛ kɛ kanyamɔ ni Yesu naa kɛjɛɔ Yehowa nitsumɔ lɛ tsumɔ mli lɛ he nɔ ko bibioo pɛ amɛle. Ŋwanejee ko bɛ he akɛ Yesu wiemɔi lɛ fe mfoniri-teemɔŋ nɔ kɛkɛ. Eyɛ mli akɛ ekolɛ ŋmɛlɛtswai babaoo eho kɛjɛ be mli ni eye nii lɛ moŋ, shi Nyɔŋmɔ nitsumɔ lɛ tsumɔ wajeɔ lɛ yɛ gbɔmɔtsoŋ diɛŋtsɛ.—Yohane 4:31-34.
Akɛni hulu shitee kɛ hulu shinyɔɔ tsakeɔ yɛ afi lɛ mli be lɛ naa hewɔ lɛ, yɛ bei babaoo mli lɛ be ni bɛŋkɛ kpaakpa lɛ kɛkɛ atsɔɔ. No hewɔ lɛ, wɔfɔɔ kanemɔ akɛ nibii komɛi ba mli yɛ ŋmɛlɛtswai ni ji etɛ, ekpaa, aloo nɛɛhu lɛ nɔ—ni yɛ be babaoo mli lɛ etsɔɔ be ni bɛŋkɛ nakai ŋmɛlɛtswai lɛ kpaakpa. (Mateo 20:3, 5; 27:45, 46; Marko 15:25, 33, 34; Luka 23:44; Yohane 19:14; Bɔfoi lɛ Asaji 10:3, 9, 30) Shi kɛlɛ, kɛji nɔ ni kɔɔ be he lɛ he miihia yɛ nɔ ni awieɔ he lɛ mli lɛ, no lɛ awieɔ wiemɔi pɔtɛɛ komɛi ni tsɔɔ be lɛ. Akɛ nɔkwɛmɔ nɔ lɛ, beni nuu ni he tswaa shi lɛ taoɔ ale kɛji Yesu hewalɛ naa lɛlɛŋ atsa ebinuu lɛ yɛ lɛ, etsuji lɛ ha lɛ hetoo akɛ: “Nyɛ shwane ŋmɛlɛ kome mli [ŋmɛlɛtswaa ni ji kpawo lɛ nɔ] ni fulu lɛ tse yɛ enɔ.”—Yohane 4:49-54.
Nyɔɔŋ Be Mlijaramɔi
Beni Romabii lɛ yeɔ amɛnɔ lɛ, etamɔ nɔ ni Yudafoi lɛ hala bɔ ni Helabii kɛ Romabii lɛ jaraa nyɔɔŋ be lɛ mli amɛwoɔ buu bei ejwɛ mli lɛ ni amɛkɛbɔi nitsumɔ yɛ etɛ ni kulɛ amɛkɛtsuɔ nii tsutsu lɛ najiaŋ. Eka shi faŋŋ akɛ Yesu miiwie nɛkɛ mlijaramɔi ejwɛ nɛɛ ahe yɛ Marko 13:35. “Gbɛkɛ” buu be lɛ jeɔ shishi kɛjɛɔ hulu shinyɔɔ kɛyashiɔ aaafee gbɛkɛ ŋmɛji nɛɛhu. Buu be ni ji enyɔ, “nyɔɔŋ teŋ” buu be lɛ jeɔ shishi aaafee ŋmɛji nɛɛhu ni egbeɔ naa nyɔɔŋ nyɔŋma-kɛ-enyɔ. “Wuɔ gbɛɛmɔ” lɛ heɔ kɛjɛɔ nyɔɔŋ nyɔŋma-kɛ-enyɔ aahu kɛyashiɔ aaafee ŋmɛji etɛ. Ni naagbee buu be, “leebi,” lɛ baa naagbee yɛ jetsɛremɔ mli, aloo aaafee ŋmɛji ekpaa.
“Wuɔ gbɛɛmɔ” buu be lɛ he miihia wɔ waa yɛ Yesu wiemɔi ni ekɛ Petro wie yɛ Marko 14:30 lɛ hewɔ: “Wuɔ naŋ agbɛɛ shii enyɔ ni oookpa yɛ misɛɛ shii etɛ.” Eyɛ mli akɛ ŋmalɛi ahe wielɔi komɛi kɛɔ akɛ “shii enyɔ” lɛ kɔɔ bei pɔtɛɛ komɛi ahe—nyɔɔŋ teŋ kɛ jetsɛremɔ be ni tsa nɔ lɛ moŋ,—shi A Dictionary of Christ and the Gospels, ni James Hastings ŋma lɛ tsɔɔ akɛ, “yɛ anɔkwale mli lɛ, wuɔ gbɛɛɔ yɛ nyɔɔŋ mli, yɛ bei sɔrɔtoi amli yɛ nyɔɔŋ teŋ nyɔŋma-kɛ-enyɔ sɛɛ kɛyaa yɛ Bokagbɛ taakɛ eji yɛ hei krokomɛi fɛɛ hu lɛ.” Eka shi faŋŋ akɛ jeee be pɔtɛɛ mli ni Petro baakwa lɛ lɛ he Yesu wieɔ lɛ. Shi moŋ, okadi ko ekɛhaa koni ekadi ewiemɔi lɛ eha Petro, ni enɛ ba mli pɛpɛɛpɛ yɛ nakai maŋkɛ lɛ nɔŋŋ.—Marko 14:72.
“Nyɔɔŋ saramɔ be ni ji ejwɛ lɛ nɔ”—yɛ leebi ŋmɛji etɛ kɛ ŋmɛji ekpaa teŋ—ni Yesu nyiɛ Galilea Ŋshɔ lɛ mli nui lɛ ahiɛ, ni ekɛba ekaselɔi lɛ aŋɔɔ, beni amɛyɔɔ lɛlɛ mli ni “lɛlɛ lɛ eshɛ ŋshɔ lɛ teŋ momo” ni amɛkɛ shikpɔŋ jɛkɛ lɛ. Ekolɛ ewaaa akɛ aaanu nɔ hewɔ ni beni kaselɔi lɛ na lɛ lɛ, “amɛtsui fa, ni amɛkɛɛ akɛ: ‘Ninaa ko nɛ!’ Ni amɛbolɔ kɛ gbeyei” lɛ shishi. (Mateo 14:23-26, New World Translation) Yɛ gbɛ kroko hu nɔ lɛ, enɛ tsɔɔ akɛ Yesu ye be babaoo ni ekometoo eesɔle yɛ gɔŋ lɛ nɔ. Akɛni enɛ ba mli yɛ be mli ni Herode Antipa kɛ klante fo Yohane Baptisilɔ lɛ yitso lɛ sɛɛ etsɛɛɛ ni eshwɛ fioo ni Hehoo, ni kadi Yesu shikpɔŋ nɔ sɔɔmɔ nitsumɔ lɛ naagbee afi lɛ shishijee lɛ aaashɛ hewɔ lɛ, eka shi faŋŋ akɛ Yesu yɛ nibii babaoo ni ebaajwɛŋ he yɛ lɛ diɛŋtsɛ esɔlemɔ ni ekɛfɔɔ e-Tsɛ lɛ hiɛ lɛ mli.
Kɛfata buu bei ejwɛ ni akɛtsuɔ nii lɛ ahe lɛ, akɛ ŋmɛlɛtswai 12 hu tsuɔ nii akɛkaneɔ nyɔɔŋ be. Bɔni afee ni akɛ Paulo anyiɛ ni akwɛ enɔ shweshweeshwe kɛya Kaisarea lɛ, asraafoiatsɛ Klaudio Lisia kɛɛ esafoiatsɛmɛi lɛ ni amɛsaa asraafoi 470 “gbɛkɛ ŋmɛlɛ nɛɛhu mli.” (Bɔfoi lɛ Asaji 23:23, 24) No hewɔ lɛ akɛ Paulo shi Yerusalem ni akɛ lɛ tee shweshweeshwe yɛ duŋ mli.
Le bɔ ni Atswa yɛ Gbi lɛ Mli
Nibii ni ba Nyɔŋmɔ blema webii lɛ anɔ ni aŋmala ashwie shi lɛ akanemɔ kɛ enɔ jwɛŋmɔ ji miishɛɛ kɛ mumɔŋ hewalɛ jɛɛhe. Kɛji obaanyɛ okɛ be ni nibii lɛ ba lɛ afata oniiahesusumɔ lɛ he lɛ, eka shi faŋŋ akɛ eeeha o-Biblia kasemɔ mli miishɛɛ lɛ afa babaoo. Mɛni hewɔ? Ejaakɛ yɛ nɛkɛ gbɛ nɔ lɛ eeeha ole Nyɔŋmɔ Wiemɔ lɛ mli nibii lɛ jogbaŋŋ. Woji tamɔ Insight on the Scriptures lɛ kɛ New World Translation of the Holy Scriptures With References lɛ ji yelikɛbuamɔ nibii ni he yɔɔ sɛɛnamɔ yɛ enɛ gbɛfaŋ (Watchtower Bible and Tract Society of New York, Inc. lɛ fee woji enyɔ lɛ fɛɛ). Kɛji obi ohe akɛ: ‘No mli lɛ enyiɛ atswa?’ lɛ, amɛaaye amɛbua bo koni onyɛ ona hetoo lɛ.