Yitso 9
Hewalɛ ni Gbohiiashitee He Hiɛnɔkamɔ lɛ Yɔɔ
1. Mɛɛ hiɛnɔkamɔ ni yɔɔ naakpɛɛ gbohiiashitee lɛ kɛhaa?
KƐ GBOHIIASHITEE bɛ lɛ, belɛ wɔsɛɛ wala he hiɛnɔkamɔ bɛ kɛha adesai ni egboi lɛ. Shi Yehowa ejɛ emlihilɛ ni wɔsaaa lɛ mli egbele hegbɛ kpele ko eha gbɔmɛi akpekpei abɔ ni egboi lɛ koni amɛna naanɔ wala mli ŋɔɔmɔ. Yɛ enɛ hewɔ lɛ, wɔ hu wɔyɛ hiɛnɔkamɔ ni miishɛɛ yɔɔ mli akɛ wɔsuɔlɔi ni ewɔ yɛ gbele mli lɛ baate shi amɛbafata wɔhe ekoŋŋ.—Okɛto Marko 5:35, 41, 42; Bɔfoi lɛ Asaji 9:36-41 he.
2. (a) Yɛ mɛɛ gbɛi anɔ gbohiiashitee lɛ ebafee nɔ ni he hiaa waa yɛ Yehowa yiŋtoo he nitsumɔ mli? (b) Mɛɛ be titri gbohiiashitee he hiɛnɔkamɔ lɛ bafeɔ hewalɛwoo jɛɛhe kɛhaa wɔ?
2 Yɛ gbohiiashitee lɛ hewɔ lɛ, Yehowa baanyɛ eŋmɛ Satan gbɛ kɛyashi he ko yɛ enaafolɔmɔ lɛ he nitsumɔ mli ni eyeee etsuji anɔkwafoi awui, yɛ nɔ ni ekɛɛ nɛɛ hewɔ, akɛ: “Ni nɔ fɛɛ nɔ ni mɔ ko yɔɔ lɛ eŋɔhaa yɛ ewala hewɔ.” (Hiob 2:4) Akɛni atee Yesu shi kɛjɛ gbohii ateŋ hewɔ lɛ, enyɛ ekɛ adesa afɔle lɛ jara lɛ ha e-Tsɛ lɛ yɛ eŋwɛi maŋtsɛsɛi lɛ hiɛ, akɛ nɔ ni baanyɛ ahere wɔyiwala. Atsɔɔ gbohiiashitee lɛ nɔ akɛ mɛi ni ji Kristo hefatalɔi niyelɔi lɛ yafataa ehe yɛ ŋwɛi Maŋtsɛyeli lɛ mli. Gbohiiashitee lɛ ji hewalɛwoo jɛɛhe ni fe fɛɛ kɛha wɔteŋ mɔ fɛɛ mɔ ni yɔɔ hemɔkɛyeli, beni wɔkɛ kaai ni baaha wɔgboi ekpe lɛ.
NƆ HEWƆ NI EJI KRISTOFOI AHEMƆKƐYELI LƐ SHISHIJEE NƆ LƐ
3. (a) Mɛɛ shishinumɔ naa gbohiiashitee lɛ bafeɔ “shishijee tsɔɔmɔ” yɛ? (b) Mɛni gbohiiashitee lɛ tsɔɔ kɛhaa jeŋ muu lɛ fɛɛ?
3 Taakɛ bɔ ni atsɔɔ yɛ Hebribii 6:1, 2 (NW) lɛ, gbohiiashitee lɛ ji “shishijee tsɔɔmɔ” kɛ hemɔkɛyeli shishitoo ni wɔnyɛŋ wɔkwa no ni wɔtsɔmɔ Kristofoi ni edara lɛ fa. Shi esoro enɛ yɛ bɔ ni je lɛ fɛɛ jwɛŋɔ he ehaa lɛ he. Yɛ mumɔŋ nibii ahe nilee ni amɛbɛ lɛ hewɔ lɛ, gbɔmɛi pii yaa nɔ amɛhiɔ shi amɛhaa miishɛɛnamɔ. Amɛnaa shihilɛ nɛɛ akɛ nɔ ni hi fe fɛɛ. (1 Kor. 15:32) Mɛi ni fiɔ blema jamɔi asɛɛ yɛ Kristendom kɛ esɛɛ fɛɛ lɛ susuɔ akɛ amɛyɛ susuma ko ni gbooo, ni enɛ tsɔɔ akɛ sɛɛnamɔ ko bɛ gbohiiashitee lɛ he. Mɔ fɛɛ mɔ ni bɔɔ mɔdɛŋ akɛ eeeha susumɔi enyɔ nɛɛ akpa gbee lɛ kɛ yiŋfutumɔ kpeɔ moŋ fe hiɛnɔkamɔ. Mɛɛ gbɛ nɔ wɔɔtsɔ wɔye wɔbua mɛi ni sumɔɔ ni amɛbo toi lɛ?—Bɔf. 17:32.
4. (a) Dani mɔ ko baale nɔ ni gbohiiashitee lɛ ji lɛ, mɛni ehe hiaa ni wɔkɛ lɛ asusu he? (b) Mɛɛ ŋmalɛi okɛbaatsu nii ni okɛgbala nɔ ni susuma lɛ ji lɛ mli otsɔɔ? Shihilɛ mli ni gbohii lɛ yɔɔ? (d) Shi kɛ mɔ ko kɛ Biblia shishitsɔɔmɔ ko tsuɔ nii, shi ejieee anɔkwalei ni anaa yɛ ŋmalɛi nɛɛ amli lɛ akpo faŋŋ lɛ, mɛni?
4 Dani gbɔmɛi nɛɛ aaale gbɛjianɔtoo kpakpa ni gbohiiashitee lɛ ji lɛ, ehe miihia ni amɛnu nɔ ni susuma lɛ ji kɛ shihilɛ mli ni gbohii lɛ yɔɔ lɛ shishi jogbaŋŋ. Efɔɔ kaa akɛ, ŋmalɛi fioo ko pɛ fa bɔ ni eeeha saji amli afee faŋŋ aha mɔ ni anɔkwale lɛ he hɔmɔ yeɔ lɛ lɛ. (1 Mose 2:7; Ezek. 18:4; Lala 146:3, 4) Shi ŋmɛnɛŋmɛnɛ beaŋ Biblia shishitsɔɔmɔi kɛ ekukuji komɛi haa nɛkɛ anɔkwalei nɛɛ anɔ. No hewɔ lɛ ehe hiaa ni amɛsusu wiemɔi ni akɛtsu nii yɛ Biblia lɛ shishijee wiemɔi amli lɛ he jogbaŋŋ.
5. Mɛɛ gbɛ nɔ obaatsɔ oye obua nakai mɔ lɛ ni enu nɔ ni susuma lɛ ji lɛ shishi?
5 New World Translation lɛ hi jogbaŋŋ kɛha enɛ feemɔ, ejaakɛ etsɔɔ Hebri wiemɔ neʹphesh kɛ Hela wiemɔ psy·kheʹ ni fɛɛ tsɔɔ nɔ kome too lɛ nɔŋŋ lɛ shishi akɛ “susuma,” ni yɛ niŋmaai ahefatamɔ lɛ amli lɛ aŋmala ŋmalɛi pii ni wiemɔi nɛɛ jeɔ kpo yɛ mli lɛ yɛ mli. Ekolɛ ŋmɛnɛŋmɛnɛ beaŋ shishitsɔɔmɔi komɛi baatsɔɔ nakai shishijee wiemɔi nɛɛ ashishi, ni jeee akɛ “susuma” pɛ, shi moŋ akɛ “bɔɔ nɔ,” “mɔ ni yɔɔ wala mli,” “gbɔmɔ” kɛ “wala”; ekolɛ abaatsɔɔ “mi-neʹphesh” shishi akɛ “mi,” kɛ “o-neʹphesh” shishi akɛ “bo.” Bibliai nɛɛ ni akɛaato shishitsɔɔmɔi ni etsɛ lɛ aloo New World Translation lɛ he lɛ baaye abua nikaselɔ lɛ ni ele akɛ shishijee wiemɔi ni atsɔɔ shishi akɛ “susuma” lɛ miiwie (1) gbɔmɛi, (2) kooloi kɛ (3) wala mli ŋɔɔmɔ ni amɛnaa lɛ he. Shi amɛhiɛɛɛ shishinumɔ akɛ anyɛɛɛ ana susuma lɛ kɛ hiŋmɛi, ni anyɛɛɛ emli amɔ ni ebaanyɛ eje gbɔmɔtso lɛ mli yɛ gbele mli ni eka he ehi shi akɛ hiɛkalɔ yɛ he ko.
6. (a) Mɛni hewɔ ŋmɛnɛŋmɛnɛ beaŋ shishitsɔɔmɔi komɛi eha mɛi ni kaneɔ lɛ ayiŋ efutu amɛ yɛ Sheol, Hades kɛ Gehena shishinumɔ he lɛ? (b) Mɛɛ gbɛ nɔ obaatsɔ ojɛ Biblia lɛ mli ogbala shihilɛ ni gbɔmɛi ni yɔɔ Sheol, aloo Hades yɔɔ mli lɛ mli otsɔɔ? Ni Gehena hu?
6 Nakai nɔŋŋ New World Translation lɛ kɛ Sheol tsuɔ nii be fɛɛ be ekɛtsɔɔ Hebri wiemɔ sheōlʹ kɛ bɔ ni ekɛ Hades tsuɔ nii kɛhaa Hela wiemɔ haʹdes kɛ Gehena hu kɛha geʹen·na yɛ he fɛɛ he lɛ shishi. Shi ŋmɛnɛŋmɛnɛ beaŋ shishitsɔɔmɔi krokomɛi kɛ Biblia lɛ fai komɛi ni aŋmala lɛ futuɔ nikanelɔ lɛ yiŋ kɛtsɔɔ haʹdes kɛ geʹen·na FƐƐ ni atsɔɔ shishi akɛ “hell,” afataa sheōlʹ kɛ haʹdes ni atsɔɔ shishi akɛ “gbonyo bu” kɛ “gbohii lɛ ajeŋ” lɛ he lɛ nɔ. Kɛ akɛ shishitsɔɔmɔi komɛi to he lɛ, abaanyɛ ana akɛ Sheol kɛ Hades fɛɛ tsɔɔ nɔ kome too. (Lala 16:10; Bɔf. 2:27) Biblia lɛ feɔ lɛ faŋŋ akɛ Sheol, aloo Hades, ni ji adesai akwamaŋ gbonyo bu lɛ kɛ gbele nyiɛ, shi jeee wala. (Lala 89:49; Kpoj. 20:13) Agbɛnɛ etsɔɔ gbɛkpamɔ ni yɔɔ akɛ abaaku sɛɛ ajɛ jɛmɛ aba kɛtsɔ gbohiiashitee nɔ. (Hiob 14:13; Bɔf. 2:31) Nɔ ni tamɔɔɔ enɛ lɛ, wɔsɛɛ be wala he hiɛnɔkamɔ ko bɛ kɛha mɛi ni yaa Gehena lɛ, ni yɛ anɔkwale mli lɛ, awieko nɔ ko ni tsɔɔ akɛ susuma lɛ hiɛ ka yɛ jɛmɛ.—Mat. 18:9; 10:28.
7. Kɛ mɔ ko nu gbohiiashitee lɛ shishi jogbaŋŋ lɛ, te enɛ naa ejeŋba kɛ enifeemɔ nɔ hewalɛ ehaa tɛŋŋ?
7 Beni saji nɛɛ ahe shishinumɔ ebafee faŋŋ lɛ, ehaa Kristo gbele kɛ eshitee lɛ bafeɔ nɔ ni shishinumɔ yɔɔ he diɛŋtsɛ. Abaanyɛ aye abua mɔ ko agbɛnɛ ni enu nɔ ni gbohiiashitee tsɔɔ kɛhaa lɛ lɛ shishi ni ehiɛ baaje shishi asɔ suɔmɔ mli ni Yehowa jɛ eto nakai gbɛjianɔ fɛfɛo lɛ. Enɛ baaha mɛi ni amɛsuɔlɔi egboi lɛ ahiɛ akpa awerɛho ni amɛyeɔ lɛ nɔ ni amɛkɛ miishɛɛ akwɛ amɛsɛɛkuu kɛbaa ekoŋŋ lɛ gbɛ yɛ Nyɔŋmɔ Gbɛjianɔtoo Hee lɛ mli. Klɛŋklɛŋ afii oha lɛ mli Kristofoi lɛ le akɛ Yesu Kristo gbohiiashitee lɛ ji Kristofoi ahemɔkɛyeli lɛ shishitoo. Amɛkɛ ekaa ye enɛ kɛ hiɛnɔkamɔ ni ekɛhaa lɛ he odase amɛtsɔɔ mɛi krokomɛi. Nakai nɔŋŋ mɛi ni le enɛ ŋmɛnɛ lɛ sumɔɔ ni amɛkɛ mɛi krokomɛi aja anɔkwale ni yɔɔ nyam nɛɛ.—Bɔf. 5:30-32; 10:40-43; 13:32-39; 17:31.
‘HADES SAMFELE’ LƐ KƐ NITSUMƆ
8. Bɔ ni Yesu kɛ “gbohiiaje [Hades] kɛ gbele naa samfelei” lɛ tsu nii lɛ tsɔɔ mɛni kɛhaa esɛɛnyiɛlɔi ni akɛ mumɔ efɔ amɛ mu lɛ?
8 Bɔ fɛɛ bɔ ni fee lɛ, esa akɛ mɛi fɛɛ ni baafata Kristo he yɛ eŋwɛi Maŋtsɛyeli lɛ mli lɛ agboi. Shi amɛle shiwoo ni ekɛha nɛɛ jogbaŋŋ beni ekɛɛ bɔfo Yohane akɛ: “Migbo, ni naa, mihiɛ ka kɛmiiya naanɔi anaanɔ, ni mihiɛ gbohiiaje [Hades] kɛ gbele naa samfelei lɛ.” (Kpoj. 1:18) Mɛni etsɔɔ lɛ? Eegbala jwɛŋmɔ kɛmiiya lɛ diɛŋtsɛ eniiashikpamɔ lɛ nɔ. Lɛ hu egbo. Shi Nyɔŋmɔ shiii lɛ yɛ Hades. Yɛ gbi ni ji etɛ lɛ nɔ lɛ, Yehowa diɛŋtsɛ tee lɛ shi kɛba mumɔŋ wala mli ni ekɛ shihilɛ ni gbele bɛ mli duro lɛ. Jeee no pɛ, shi Nyɔŋmɔ kɛ “gbohiiaje kɛ gbele naa samfelei lɛ” ha lɛ koni ekɛtsu nii ni ekɛjie mɛi krokomɛi lɛ kɛjɛ adesa kwamaŋ gbonyo bu lɛ kɛ hewalɛ ni Adam esha lɛ ena yɛ amɛnɔ lɛ mli. Akɛni Yesu hiɛ samfelei nɛɛ hewɔ lɛ, enyɛ etee esɛɛnyiɛlɔi anɔkwafoi lɛ ashi kɛjɛ gbohii ateŋ. Beni efee enɛ sɛɛ lɛ, ekɛ ŋwɛi wala ni gbele bɛ mli duro esafo lɛ mli bii ni akɛ mumɔ efɔ amɛ mu lɛ, taakɛ bɔ ni e-Tsɛ lɛ efee kɛha lɛ lɛ.—Rom. 6:5; Fil. 3:20, 21.
9. Mɛɛ be mli Kristofoi anɔkwafoi ni afɔ amɛ mu lɛ ashitee lɛ je shishi?
9 Mɛɛ be mli Kristofoi anɔkwafoi ni afɔ amɛ mu nɛɛ baana nakai gbohiiashitee lɛ? Enɛ eje shishi momo. Bɔfo Paulo tsɔɔ akɛ abaatee amɛ shi yɛ ‘be mli ni Kristo eba lɛ mli,’ nɔ ni je shishi kɛjɛ 1914 Ŋ.B. lɛ. (1 Kor. 15:23) Agbɛnɛ, kɛ mɛnɛɛmɛi gbe amɛ shikpɔŋ nɔ shihilɛ lɛ naa lɛ, ehe ehiaaa ni amɛmɛ yɛ gbele mli kɛha amɛ-Nuŋtsɔ lɛ sɛɛkuu. Kɛ amɛgboi nɔŋŋ pɛ lɛ, ateɔ amɛ shi yɛ mumɔŋ ni ‘atsakeɔ amɛ fɛɛ trukaa, hiŋmɛitswaa mli.’ Mɛɛ miishɛɛ amɛnaa nɛkɛ, ejaakɛ “amɛnitsumɔi lɛ nyiɛɔ amɛsɛɛ”!—1 Kor. 15:51, 52; Kpoj. 14:13.
10. Mɛɛ gbohiiashitee kroko hu yɔɔ, ni mɛɛ be enɛ baaje shishi?
10 Shi jeee amɛ nɔ lɛ pɛ ji gbohiiashitee ni yɔɔ. Anɔkwale ni eji akɛ atsɛɔ enɛ akɛ “klɛŋklɛŋ shitee” lɛ tsɔɔ akɛ esa akɛ gbohiiashitee kroko anyiɛ sɛɛ. (Kpoj. 20:6) Mɛi ni naa sɛɛkpee shitee nɛɛ mli gbɛfaŋnɔ lɛ baana naanɔ wala he hiɛnɔkamɔ ni miishɛɛ yɔɔ mli yɛ shikpɔŋ nɔ Paradeiso mli. Mɛɛ be enɛ baaba? Kpojiemɔ wolo lɛ tsɔɔ akɛ enɛ baaba beni ajie “ŋwɛi kɛ shikpɔŋ lɛ” ni feɔ yiwalɛ nibii agbɛjianɔtoo ni yɔɔ ŋmɛnɛ lɛ kɛtee lɛ sɛɛ. Nakai gbɛjianɔtoo momo lɛ naagbee eshɛ eta. Yɛ enɛ sɛɛ lɛ, shikpɔŋ nɔ gbohiiashitee lɛ baaje shishi yɛ Nyɔŋmɔ be ni eto lɛ mli.—Kpoj. 20:11, 12.
11. Namɛi baafata gbɔmɛi anɔkwafoi ni abaatee amɛ shi kɛba wala mli yɛ shikpɔŋ nɔ lɛ ahe, ni mɛni hewɔ enɛ ji hiɛnɔkamɔ ni miishɛɛ yɔɔ mli lɛ?
11 Namɛi baafata he? Yehowa tsuji anɔkwafoi ni hi shi kɛjɛ blema bei amli lɛ. Amɛteŋ mɛi komɛi ji hii ni, yɛ hemɔkɛyeli ni mli wa ni amɛna yɛ gbohiiashitee nɛɛ mli lɛ hewɔ lɛ, “amɛkpɛlɛɛɛ kpɔmɔ”—ni ji ŋmɛɛmɔ ni amɛaaŋmɛɛ emuuyeli mli ni amɛhiɛ kɛha Nyɔŋmɔ lɛ he bɔni afee ni amɛjo gbele ni akɛaaba amɛnɔ lɛ naa foi lɛ. (Heb. 11:35) Mɛɛ miishɛɛ enɛ baaji nɛkɛ, akɛ wɔɔle amɛ aŋkroaŋkroi, ni wɔnu saji ni aŋmala amɛ kukuji yɛ Biblia lɛ mli lɛ amli wiemɔi lɛ fitsofitso kɛjɛ amɛ diɛŋtsɛ amɛnaa! Mɛi ni baafata mɛnɛɛmɛi ahe ji Habel, ni ji Yehowa klɛŋklɛŋ odasefonyo anɔkwafo lɛ. Henok kɛ Noa, mɛi ni shiɛ Nyɔŋmɔ kɔkɔbɔɔ wiemɔi amɛtsɔɔ dani Nu Afua lɛ ba ni amɛsheee gbeyei lɛ. Abraham, mɔ ni here ŋwɛibɔfoi ahiɛmɛɛ lɛ. Mose, mɔ ni atsɔ enɔ akɛ Mla lɛ ha yɛ Sinai Gɔŋ lɛ he lɛ. Gbalɔi ekaalɔi tamɔ Yeremia, mɔ ni na Yerusalem hiɛkpatamɔ lɛ yɛ afi 607 D.Ŋ.B. lɛ. Kɛ Yohane Baptisilɔ lɛ, mɔ ni nu ni Nyɔŋmɔ diɛŋtsɛ miiwie Yesu he akɛ E-Bi lɛ. Agbɛnɛ gbɔmɛi anɔkwafoi krokomɛi hu yɛ ni amɛgboi yɛ gbɛjianɔtoo ni yɔɔ ŋmɛnɛ lɛ naagbee gbii nɛɛ amli.—Heb. 11:4-38; Mat. 11:11.
12. (a) Gbohii ni yɔɔ Hades lɛ ateŋ mɛi enyiɛ baate shi? (b) No hewɔ lɛ, namɛi baafata he, ni mɛni hewɔ?
12 Beni be shwieɔ mli lɛ, abaatee mɛi krokomɛi hu shi. Atsɔɔ bɔ ni Yesu kɛ ‘gbohiiaje samfelei lɛ’ baatsu nii yɛ adesai ahe lɛ mli yɛ ninaa ko ni ajie kpo atsɔɔ bɔfo Yohane lɛ mli, beni ena akɛ “gbele kɛ gbohiiaje lɛ, ashɛrɛ amɛ ashwie la kpaakpo lɛ mli” lɛ. Mɛni enɛ tsɔɔ? Etsɔɔ akɛ akpata hiɛ; ebɛ shihilɛ mli dɔŋŋ akɛni gbɔmɛi eta yɛ emli kwraa lɛ hewɔ. No hewɔ lɛ, beni Yesu etee Yehowa jalɔi anɔkwafoi ashi sɛɛ lɛ, ebaajɛ mɔbɔnalɛ mli etee mɛi ni ejaaa lɛ hu ashi kɛjɛ Hades loo Sheol. Mɛnɛɛmɛi ateŋ mɔ ko kwraa bɛ ni ateeɔ lɛ shi ahaa kojomɔ akɛ mɔ ni sa gbele ekoŋŋ. Yɛ Nyɔŋmɔ Maŋtsɛyeli lɛ jalɛ gbɛjianɔtoo lɛ mli lɛ, abaaye abua amɛ ni amɛtsake amɛshihilɛ ni ekɛ Yehowa gbɛi akpa gbee. Ana “wala wolo” ko ni agbele naa yɛ ninaa lɛ mli, ni amɛbaana hegbɛ akɛ abaaŋmala amɛgbɛi yɛ mli. ‘Abaakojo amɛteŋ mɔ fɛɛ mɔ bɔ ni sa enitsumɔi lɛ,’ nɔ ni amɛtsu yɛ amɛshitee lɛ sɛɛ. (Kpoj. 20:12-14; Bɔf. 24:15) No hewɔ lɛ, kɛ akwɛ nɔ ni baajɛ mli aba yɛ naagbee lɛ, amɛnɔ lɛ baafee ‘shitee kɛmiiya wala mli,’ shi jeee bɔ fɛɛ bɔ ni ji lɛ, shitee ‘kɛmiiya kojomɔ [hiɛkpatamɔ] mli.’—Yoh. 5:28, 29.
13. (a) Namɛi naŋ gbohiiashitee lɛ? (b) Te esa akɛ anɔkwale ni kɔɔ gbohiiashitee lɛ he nilee he lɛ ana wɔshihilɛ nɔ hewalɛ aha tɛŋŋ?
13 Shi, jeee mɔ fɛɛ mɔ ni ehi shi pɛŋ lɛ baate shi. Mɛi komɛi efee eshai komɛi ni anyɛŋ akɛke amɛ. Mɛi ni hiɛ baakpata yɛ “amanehulu kpeteŋkpele” ni ebɛŋkɛ kpakpa nɛɛ mli lɛ baafata mɛi ni baana naanɔ hiɛkpatamɔ lɛ ahe. (Mat. 12:31, 32; 23:33; 24:21, 22; 25:41, 46; 2 Tes. 1:6-9) No hewɔ lɛ, eyɛ mli akɛ ajieɔ mɔbɔnalɛ sɔrɔto nɛɛ kpo atsɔɔ, yɛ mɛi fɛɛ ni yɔɔ Hades lɛ ajiemɔ mli moŋ, shi gbohiiashitee lɛ kɛ nɔdaamɔ nɔ ko haaa akɛ wɔbaanyɛ wɔhi shi bɔ ni wɔsumɔɔ bianɛ. Shi moŋ, esa akɛ enɛ atsirɛ wɔ ni wɔjie bɔ ni wɔhiɛ sɔɔ Nyɔŋmɔ mlihilɛ ni wɔsaaa nɛɛ kpo wɔtsɔɔ.
GBOHIIASHITEE HE HIƐNƆKAMƆ LƐ WOƆ WƆ HEWALƐ
14. Yɛ mɛɛ gbɛ nɔ gbohiiashitee lɛ baanyɛ afee hewalɛwoo jɛɛhe aha mɔ ni ewala shihilɛ ni yɔɔ bianɛ lɛ miiba naagbee lɛ?
14 Mɛi ni kɛ gbohiiashitee he hiɛnɔkamɔ nɛɛ efee amɛnɔ lɛ naa hewalɛwoo kpele kɛjɛɔ mli. Kɛ amɛwala miiba naagbee lɛ, amɛle akɛ bɔ fɛɛ bɔ ni fee lɛ, amɛnyɛŋ amɛtsi amɛgbele lɛ amɛto, yɛ tsofafeemɔ mli mɔdɛŋbɔɔ lɛ fɛɛ sɛɛ. (Jaj. 8:8) Kɛ amɛkɛ amɛwala fɛɛ ewo Nuŋtsɔ lɛ sɔɔmɔ mli ni amɛkɛ egbɛjianɔtoo lɛ etsu nii yɛ anɔkwayeli mli lɛ, amɛbaanyɛ amɛkwɛ wɔsɛɛ gbɛ kɛ nɔmimaa. Amɛle akɛ, kɛtsɔ gbohiiashitee lɛ nɔ lɛ amɛbaaba wala mli ekoŋŋ yɛ Nyɔŋmɔ be ni sa mli. Ni mɛɛ shihilɛ enɛ baafee nɛkɛ! Bɔfo Paulo tsɛ enɛ akɛ “anɔkwa wala.”—1 Tim. 6:19; 1 Kor. 15:58; Heb. 6:10-12.
15. Kɛ yiwalɔi awuiyelɔi miiwo wɔhe gbeyei lɛ, mɛni baaye abua wɔ ni wɔhiɛ emuuyeli mli wɔha Yehowa?
15 Jeee ni wɔle akɛ gbohiiashitee yɛ pɛ, shi nɔ ni yeɔ buaa wɔ ni woɔ wɔ hewalɛ lɛ ji le ni wɔɔle Mɔ ni ji nakai gbɛjianɔtoo lɛ Jɛɛhe. Enɛ wajeɔ wɔ ni wɔyeɔ Nyɔŋmɔ anɔkwale kɛ yiwalɔi awuiyelɔi kɛ gbele miiwo wɔhe gbeyei po. Satan ejɛ jeeŋmɔ beebe ekɛ trukaa gbele he gbeyeiwoo etsu nii ekɛŋɔ gbɔmɛi anom. Shi Yesu sheee enɛ gbeyei; eye anɔkwale eha Yehowa kɛyashi gbele mli tɔ̃ɔ. Etsɔ nɔ ni egbele lɛ tsu lɛ nɔ ekɛ nɔ ni baakpɔ̃ mɛi krokomɛi kɛjɛ nakai gbeyeishemɔ lɛ mli lɛ ha. (Heb. 2:14, 15) Yɛ hemɔkɛyeli ni amɛyɔɔ yɛ nakai gbɛjianɔtoo lɛ mli hewɔ lɛ, enɔkwa sɛɛnyiɛlɔi lɛ ena gbɛi kɛha amɛhe akɛ emuuyeli mlihiɛlɔi. Kɛ amɛbaje nɔnyɛɛ shishi lɛ, amɛjieɔ amɛhe kpo akɛ ‘mɛi ni edɔɔɔ amɛsusumai ahe’ fe bɔ ni amɛdɔɔ Yehowa he. (Kpoj. 12:11) Yɛ nilee mli lɛ, amɛbɔɔɔ mɔdɛŋ akɛ amɛaabaa amɛŋmɛnɛŋmɛnɛ beaŋ wala nɛɛ yi kɛtsɔ Kristofoi ashishitoo mlai ni amɛaaku mli lɛ nɔ, ni no aha naanɔ wala he hiɛnɔkamɔ lɛ abɔ amɛ. (Luka 9:24, 25) Ani oyɛ hemɔkɛyeli ni tamɔ nɛkɛ? Obaanyɛ ona enɛ kɛ oyɛ suɔmɔ diɛŋtsɛ kɛha Yehowa ni okɛ nɔ ni gbohiiashitee he hiɛnɔkamɔ lɛ tsɔɔ kɛha bo lɛ eto otsui mli.
Sanegbaa Ni Akɛtiɔ Mli
● Mɛni hewɔ esa akɛ anu nɔ ni susuma lɛ ji kɛ shihilɛ mli ni gbohii lɛ yɔɔ lɛ shishi dani mɔ ko anyɛ ana hiɛsɔɔ aha gbohiiashitee lɛ?
● Namɛi baaku sɛɛ aje gbohiiaje aba lɛ? Te esa akɛ nilee nɛɛ atsirɛ wɔ aha tɛŋŋ?
● Gbohiiashitee he hiɛnɔkamɔ lɛ wajeɔ wɔ yɛ mɛɛ gbɛ nɔ?