Yitso 67

Amɛnyɛɛɛ Amɛmɔ Lɛ

BENI Asesei Agbijurɔyeli lɛ yaa nɔ lolo lɛ, jamɔ mli hiɛnyiɛlɔi lɛ tsu polisifoi onukpai kɛtee koni amɛyamɔ Yesu. Ebɔɔɔ mɔdɛŋ akɛ ebaatee ehe. Shi yɛ no najiaŋ lɛ, Yesu tee nɔ etsɔɔ nii yɛ faŋŋ mli, ni ekɛɛ: “Be fioo kɛkɛ eshwɛ ni mikɛ nyɛ aaahi shi, ni maya mɔ ni tsu mi lɛ ŋɔɔ. Nyɛaatao mi ni nyɛnaŋ mi, ni he ni miyɔɔ lɛ nyɛnyɛŋ jɛi nyɛba.”

Yudafoi lɛ nuuu shishi, no hewɔ lɛ amɛbibii amɛhe akɛ: “Nɛgbɛ mɔ nɛ baaya ni wɔnaŋ lɛ? Ani mɛi ni eshwa Yudafoi lɛ ateŋ lɛ aŋɔɔ ebaaya, ni eyatsɔɔ Helafoi lɛ anii? Mɛɛ wiemɔ ewie nɛɛ: Nyɛaatao mi ni nyɛnaŋ mi, ni he ni miyɔɔ lɛ nyɛnyɛŋ jɛi nyɛba lɛ?” Yɛ anɔkwale mli lɛ, Yesu miiwie egbele kɛ eshitee kɛmiiya wala mli yɛ ŋwɛi, he ni ehenyɛlɔi lɛ nyɛŋ anyiɛ esɛɛ kɛya, ni ebɛŋkɛ kpaakpa lɛ he.

Gbijurɔyeli lɛ naagbee gbi ni ji kpawo lɛ bashɛ. Gbijurɔyeli lɛ mli daa leebi lɛ, osɔfoi lɛ ateŋ mɔ ko batsiɔ nu ni eyɛ kɛjɛ Siloam Kpaakpo lɛ mli lɛ eshwieɔ, ni nu lɛ hoɔ kɛyaa afɔleshaa latɛ lɛ shishi. Ekolɛ akɛni eekai gbɔmɛi lɛ yɛ nɛkɛ nii ni afeɔ daa gbi nɛɛ he hewɔ lɛ, Yesu wie waa akɛ: “Kɛji kumai miiye mɔ ko lɛ, ha mɔ lɛ aba miŋɔɔ ni ebanu, mɔ ni heɔ minɔ yeɔ lɛ, taakɛ bɔ ni aŋma lɛ kɛɔ lɛ, wala nu faai aaajɛ emusu mli aho.”

Yɛ anɔkwale mli lɛ, Yesu miiwie nibii ni yɔɔ nyam ni baajɛ mli aba yɛ be mli ni aaafɔse mumɔ krɔŋkrɔŋ lɛ ashwie shi lɛ he. Yɛ afi ni nyiɛ sɛɛ lɛ mli lɛ mumɔ krɔŋkrɔŋ lɛ fɔsemɔ ba mli yɛ Pentekoste. Jɛmɛ ji he ni wala nui ho yɛ, yɛ be mli ni kaselɔi 120 lɛ je shishi amɛsɔmɔ gbɔmɛi lɛ. Shi kɛbashi nakai be lɛ mli lɛ, mumɔ ko bɛ, kɛ shishinumɔ akɛ akɛ mumɔ efɔko Kristo kaselɔi lɛ ateŋ mɔ ko mu ni atsɛko amɛteŋ mɔ ko kɛhako ŋwɛi wala.

Yɛ Yesu wiemɔi lɛ nɔheremɔ mli lɛ, mɛi komɛi bɔi kɛɛmɔ akɛ: “Gbalɔ lɛ nɛ lɛlɛŋ,” eka shi faŋŋ akɛ amɛmiiwie gbalɔ ni nɔ kwɔ fe Mose ni awo shi yɛ ehe akɛ ebaaba lɛ he. Mɛi krokomɛi hu kɛɛ: “Kristo lɛ nɛ.” Shi mɛi krokomɛi te shi amɛwo akɛ: “Ani Kristo lɛ, Galilea ebaajɛ? Ani ŋmalɛ lɛ ekɛɛɛ akɛ: David seshi lɛ mli kɛ Betlehem maŋ, he ni David hi lɛ, jɛi Kristo lɛ baajɛ?”

No hewɔ lɛ mligbalamɔ ba mɛi ni ebabua amɛhe naa lɛ ateŋ. Mɛi komɛi miitao ni amɔ Yesu, shi mɔ ko mɔ ko nyɛɛɛ ehe ata. Beni polisifoi onukpai lɛ ku amɛsɛɛ ni Yesu fataaa amɛhe lɛ, osɔfonukpai lɛ kɛ Farisifoi lɛ bi akɛ: “Mɛɛba ni nyɛkɛ lɛ baaa?”

Ni tsuji lɛ ha hetoo akɛ: “Bɔ ni gbɔmɔ nɛɛ wieɔ lɛ, mɔ ko ewieko nakai da.”

Akɛni amɛmli efu waa hewɔ lɛ, jamɔ mli hiɛnyiɛlɔi lɛ ye amɛhe fɛo, ni amɛwie wiemɔi ni ejaaa, ni amɛkɛ gbɛi gbonyo tsɛ amɛ. Amɛbolɔ amɛwo amɛ akɛ: “Ani nyɛ hu alaka nyɛ? Ani onukpai lɛ loo Farisifoi lɛ ateŋ mɔ ko ehe enɔ eye? Shi asafo ni leee mla nɛɛ, alomɔ amɛ.”

Yɛ enɛ hewɔ lɛ, Nikodemo, ni eji Farisifonyo kɛ Yudafoi lɛ anɔ onukpa (ni ji, Sanhedrin lɛ mli nyo) lɛ kɛ ekaa wie eha Yesu. Ekolɛ obaakai akɛ afii enyɔ kɛ fa ni eho lɛ, Nikodemo ba Yesu ŋɔɔ yɛ nyɔɔŋ teŋ ni ena hemɔkɛyeli yɛ emli. Agbɛnɛ Nikodemo kɛɛ akɛ: “Kɛ anuko mɔ ko daaŋ gbee ni anuko nɔ ni efee lɛ, wɔmla lɛ buɔ lɛ fɔ lo?”

Enɛ ha Farisifoi lɛ amli fu waa fe nine akɛ amɛteŋ mɔ kome miifa Yesu he. Ni amɛkɛ ekaa wie akɛ: “Ani bo hu Galilea ojɛ? Taomɔ mli okwɛ, shi gbalɔ ko eteko shi kɛjɛko Galilea pɛŋ.”

Eyɛ mli akɛ Ŋmalɛi lɛ ewieee yɛ faŋŋ mli akɛ gbalɔ ko baate shi kɛjɛ Galilea moŋ, shi amɛtsɔɔ akɛ Kristo lɛ baaba kɛjɛ jɛmɛ, ni amɛkɛɔ akɛ abaana “la kpeteŋkpele” ko yɛ nɛkɛ kpokpaa nɛɛ nɔ. Kɛfata he hu lɛ, afɔ Yesu yɛ Betlehem, ni eji David seshinyo. Eyɛ mli akɛ ekolɛ Farisifoi lɛ le enɛ moŋ, shi kɛlɛ jwɛŋmɔ ni ejaaa ni egbɛ eshwa ni mɛi hiɛ yɛ Yesu he lɛ he sɔ ka amɛnɔ. Yohane 7:32-52; Yesaia 9:1, 2; Mateo 4:13-17.

▪ Mɛni afeɔ yɛ gbijurɔyeli lɛ mli daa leebi, ni mɛɛ gbɛ nɔ Yesu tsɔ egbala jwɛŋmɔ kɛba enɛ nɔ?

▪ Mɛni hewɔ ni tsuji lɛ nyɛɛɛ amɔ Yesu lɛ, ni te jamɔ mli hiɛnyiɛlɔi lɛ fee amɛnii yɛ enɛ he amɛha tɛŋŋ?

▪ Namɔ ji Nikodemo, ni mɛni ji enifeemɔ yɛ Yesu he, ni mɛni enanemɛi Farisifoi lɛ fee lɛ?

▪ Mɛɛ odaseyeli yɔɔ ni tsɔɔ akɛ Kristo lɛ baajɛ Galilea?