Shi “Ŋmalɛi ni Akɛmaa” Triniti “Nɔ Mi” lɛ Hu?

AKƐƆ akɛ Biblia mli ŋmalɛi komɛi maa Triniti lɛ nɔ mi. Shi kɛ ookane Ŋmalɛi ni tamɔ nɛkɛ lɛ, esa akɛ wɔha ahi wɔjwɛŋmɔ mli akɛ Biblia lɛ kɛ yinɔsane mli odaseyeli fiii Triniti lɛ sɛɛ.

Esa akɛ anu Biblia mli ŋmalɛi fɛɛ ni akɛhaa akɛ no fiɔ sɛɛ lɛ shishi yɛ Biblia ŋmalɛ lɛ mli saji lɛ diɛŋtsɛ anaa. Yɛ be babaoo mli lɛ anuɔ ŋmalɛ lɛ diɛŋtsɛ shishi jogbaŋŋ kɛtsɔɔ ŋmalɛ mli kukuji ni ebɔle lɛ lɛ nɔ.

Etɛ yɛ Ekome Mli

WOLO New Catholic Encyclopedia lɛ kɛ “ŋmalɛi ni akɛmaa nɔ mi” nɛɛ etɛ haa shi ekpɛlɛɔ nɔ hu akɛ: “Atsɔɔɔ Triniti Krɔŋkrɔŋ tsɔɔmɔ lɛ yɛ Kpaŋmɔ Momo lɛ mli. Ni yɛ Kpaŋmɔ Hee lɛ mli hu lɛ, anaa odaseyeli ni etsɛ fe fɛɛ lɛ yɛ Paulo woji lɛ amli, titri lɛ yɛ 2 Kor. 13:​13 [kuku 14 yɛ Bibliai komɛi amli], kɛ 1 Kor. 12:​4-⁠6. Yɛ Sanekpakpai lɛ amli lɛ anaa Triniti lɛ he odaseyeli yɛ baptisimɔ he sane ni yɔɔ Mat. 28:​19 lɛ pɛ mli.”

Atoɔ “mɛi” etɛ lɛ anaa yɛ nakai kukuji lɛ amli yɛ The New Jerusalem Bible lɛ mli yɛ nɛkɛ gbɛ nɔ. 2 Korintobii 13:​13 (14) kɛ etɛ lɛ fɛɛ baa yɛ nɛkɛ gbɛ nɔ: “Nuŋtsɔ Yesu Kristo duromɔ lɛ kɛ Nyɔŋmɔ suɔmɔ lɛ kɛ Mumɔ Krɔŋkrɔŋ naanyobɔɔ lɛ kɛ nyɛ fɛɛ ahi shi.” Klɛŋklɛŋ Korintobii 12:​4-⁠6 kɛɔ akɛ: “Shi duromɔ keenii sɔrɔtoi yɛ, shi Mumɔ kome lɛ nɔŋŋ ni; ni sɔɔmɔ nitsumɔi sɔrɔtoi hu yɛ, shi Nuŋtsɔ kome lɛ nɔŋŋ ni; ni nitsumɔi sɔrɔtoi hu yɛ, shi Nyɔŋmɔ kome lɛ nɔŋŋ ji mɔ ni tsuɔ fɛɛ yɛ mɛi fɛɛ mli.” Ni Mateo 28:​19 kaneɔ akɛ: “No hewɔ lɛ nyɛyaa ni nyɛyafea jeŋmaji fɛɛ mikaselɔi; nyɛbaptisia amɛ nyɛwoa Tsɛ lɛ kɛ Bi lɛ kɛ Mumɔ Krɔŋkrɔŋ lɛ gbɛi amli.”

Ani nakai kukuji lɛ tsɔɔ akɛ Nyɔŋmɔ, Kristo kɛ mumɔ krɔŋkrɔŋ lɛ feɔ Triniti ni ji Nyɔŋmɔ-su kome, ni akɛ mɛi etɛ lɛ yeɔ egbɔ yɛ gbɔmɔtso, hewalɛ kɛ naanɔ shihilɛ mli? Dabi, amɛfeee nakai, tamɔ bɔ ni mɛi etɛ tamɔ Tom, Dick, kɛ Harry gbɛi ni aaato naa lɛ etsɔɔɔ akɛ amɛji mɛi etɛ yɛ gbɔmɔ kome mli lɛ.

McClintock kɛ Strong Cyclopedia of Biblical, Theological, and Ecclesiastical Literature lɛ kpɛlɛɔ nɔ akɛ nɔ ni awieɔ nɛɛ, “maa nɔ mi akɛ, mɛi etɛ ni atsi amɛ ta lɛ yɛ, . . . shi ejeee odaseyeli ni tsɔɔ diɛŋtsɛ akɛ, mɛi etɛ lɛ fɛɛ hɔ Nyɔŋmɔ-su kome mli, ni ŋwɛi woo sa amɛ fɛɛ pɛpɛɛpɛ.”

Eyɛ mli akɛ wolo nɛɛ fiɔ Triniti lɛ sɛɛ moŋ, shi ekɛɔ yɛ 2 Korintobii 13:​13 (14) he akɛ: “Wɔnyɛŋ wɔkɛ enɛ atsɔɔ yɛ gbɛ ni ja nɔ akɛ amɛhewalɛ yeɔ egbɔ, aloo amɛhiɛ gbɔmɔtso kome.” Ni ekɛɔ yɛ Mateo 28:​18-20 he akɛ: “Kɛ asusu ŋmalɛ nɛɛ diɛŋtsɛ he lɛ, enyɛŋ ema mɛi etɛ ni atsi amɛta lɛ asu kɛ baŋ, aloo amɛ egbɔyeli loo nyɔŋmɔyeli nɔ mi yɛ faŋŋ mli.”

Beni abaptisi Yesu lɛ, atsi Nyɔŋmɔ, Yesu, kɛ mumɔ krɔŋkrɔŋ lɛ ta yɛ nakai ŋmalɛ lɛ nɔŋŋ mli. Yesu “na Nyɔŋmɔ mumɔ lɛ miikpeleke shi tamɔ okpo kɛmiiba enɔ.” (Mateo 3:​16) Shi enɛ ekɛɛɛ akɛ mɛi etɛ lɛ ekomeŋ. Atsiɔ Abraham, Isak kɛ Yakob ta shii abɔ yɛ be kome mli, shi enɛ efeee amɛ gbɔmɔ kome. Atsiɔ Petro, Yakobo kɛ Yohane fɛɛ ta, shi enɛ efeee amɛ gbɔmɔ kome. Kɛfata he lɛ, Nyɔŋmɔ mumɔ lɛ kpeleke shi kɛba Yesu nɔ yɛ ebaptisimɔ be lɛ mli, ni tsɔɔ akɛ atsɔko hiɛ akɛ mumɔ lɛ efɔko Yesu mu kɛbashi nakai be lɛ mli. Kɛ nɛkɛ sane lɛ ji lɛ, belɛ te eeefee tɛŋŋ efee Triniti lɛ fa ni ekɛ mumɔ krɔŋkrɔŋ lɛ afee ekome yɛ be fɛɛ mli hu?

Anaa nɔ kroko ni wieɔ mɛi etɛ lɛ he lɛ yɛ Biblia shishitsɔɔmɔi ni etsɛ lɛ ekomɛi amli yɛ 1 Yohane 5:⁠7. Shi woloŋlelɔi kpɛlɛɔ nɔ akɛ nɛkɛ wiemɔi nɛɛ bɛ Biblia lɛ mli kɛjɛ shishijee shi sɛɛ mli akɛfata he. Shishitsɔɔmɔi heei pii jieɔ kuku ni jeee anɔkwale nɛɛ kɛjɛɔ mli yɛ gbɛ ni ja nɔ.

“Ŋmalɛi krokomɛi ni akɛmaa nɔ mi” lɛ wieɔ wekukpaa ni ka mɛi enyɔ pɛ teŋ he​—Tsɛ lɛ kɛ Yesu. Nyɛhaa wɔsusuɔ ekomɛi ahe.

“Mi kɛ Tsɛ lɛ Fɛɛ lɛ Ekomeŋ”

AFƆƆ nakai ŋmalɛ ni yɔɔ Yohane 10:​30 lɛ kɛ nitsumɔ akɛfiɔ Triniti lɛ sɛɛ, eyɛ mli akɛ atsiii mɔ ni ji etɛ ta yɛ biɛ. Shi Yesu diɛŋtsɛ tsɔɔ nakai ‘ekome’ ni ekɛ e-Tsɛ lɛ feɔ lɛ shishi. Esɔle eha Nyɔŋmɔ yɛ Yohane 17:​21, 22 akɛ ekaselɔi lɛ “amɛfee ekome, taakɛ bɔ ni bo, Ataa, oyɔɔ mimli, ni mi hu miyɔɔ omli lɛ, koni amɛ hu amɛfee ekome yɛ wɔmli, . . . koni amɛfee ekome, taakɛ bɔ ni wɔ hu wɔyɔɔ ekome lɛ.” Ani Yesu miisɔle koni ekaselɔi lɛ fɛɛ afee mɔ kome? Dabi, eka shi faŋŋ akɛ eesɔle koni amɛfee ekome yɛ jwɛŋmɔ kɛ yiŋtoo mli, taakɛ ekɛ Nyɔŋmɔ ji lɛ.​—Kwɛmɔ 1 Korintobii 1:​10 hu.

Paulo kɛɔ yɛ 1 Korintobii 3:​6, 8 akɛ: “Mi lɛ, mitɛo; Apolo shwie nɔ nu . . . Mɔ ni tɛoɔ lɛ kɛ mɔ ni shwieɔ nɔ nu lɛ fɛɛ lɛ ekomeŋ.” Paulo kɛ enɛ etsɔɔɔ akɛ ekɛ Apolo ji mɛi enyɔ ni yɔɔ gbɔmɔ kome mli; eetsɔɔ akɛ amɛyiŋtoo lɛ ekomeŋ. Hela wiemɔ ni Paulo kɛtsu nii yɛ biɛ kɛha “ekomeŋ” (hen) hiɛ ehe, ni ji “(nɔ) kome,” ni tsɔɔ ekomefeemɔ yɛ gbeekpamɔ mli. Nakai wiemɔ lɛ nɔŋŋ Yesu kɛtsu nii yɛ Yohane 10:​30 ekɛtsɔɔ wekukpaa ni ka ekɛ e-Tsɛ lɛ teŋ lɛ. Nakai wiemɔ lɛ nɔŋŋ Yesu kɛtsu nii yɛ Yohane 17:​21, 22 lɛ. No hewɔ lɛ beni ekɛ wiemɔ “ekomeŋ” (hen) lɛ tsu nii yɛ wiemɔi nɛɛ amli lɛ, eewie ekomefeemɔ yɛ susumɔ kɛ yiŋtoo he.

Yɛ Yohane 10:​30 he lɛ, John Calvin (ni heɔ Triniti eyeɔ lɛ) kɛɛ yɛ wolo, Commentary on the Gospel According to John lɛ mli akɛ: “Blemabii lɛ kɛ ŋmalɛ nɛɛ tsu nii yɛ gbɛ ni ejaaa nɔ amɛkɛtsɔɔ akɛ Kristo . . . kɛ Tsɛ lɛ fɛɛ lɛ ekomeŋ. Ejaakɛ Kristo ewieee heloo kome ni amɛji he, shi moŋ gbeekpamɔ ni ka ekɛ Tsɛ lɛ teŋ lɛ he ewieɔ.”

Anaa yɛ ewiemɔi ni nyiɛ Yohane 10:​30 lɛ sɛɛ nɔŋŋ lɛ amli akɛ Yesu kɛ hewalɛ miitsɔɔ akɛ ewiemɔi lɛ etsɔɔɔ akɛ lɛ ji Nyɔŋmɔ. Ebi Yudafoi lɛ ni mu sane naa nakai ni no hewɔ lɛ amɛmiitao ni amɛtswia lɛ tɛi lɛ akɛ: “Nyɛmiikɛɛ yɛ mɔ ni Tsɛ lɛ efee lɛ krɔŋkrɔŋ, ni etsu lɛ kɛba je lɛ mli lɛ hewɔ akɛ: ‘Obɔ musu,’ akɛni mikɛɛ akɛ: ‘Nyɔŋmɔ bi ji mi lɛ’?” (Yohane 10:​31-36) Dabi, Yesu kɛɛ akɛ ejeee Nyɔŋmɔ ni ji Bi, shi moŋ Nyɔŋmɔ Bi.

“Ekɛ Ehe Miito Nyɔŋmɔ He”?

AKƐ Yohane 5:​18 hu haa akɛ ŋmalɛ kroko ni fiɔ Triniti lɛ sɛɛ. Ekɛɔ akɛ Yudafoi lɛ (taakɛ eji yɛ Yohane 10:​31-36 lɛ) miitao agbe Yesu ejaakɛ “etsɛ Nyɔŋmɔ akɛ lɛ diɛŋtsɛ etsɛ, ekɛ ehe miito Nyɔŋmɔ he.”

Shi namɛi kɛɛ akɛ Yesu kɛ ehe miito Nyɔŋmɔ he lɛ? Jeee Yesu ni. Efa ehe yɛ nɛkɛ amale naafolɔmɔ nɛɛ he yɛ kuku ni nyiɛ sɛɛ (19) lɛ nɔŋŋ mli akɛ: “No hewɔ lɛ Yesu here nɔ ekɛɛ amɛ akɛ: . . . ‘Bi lɛ diɛŋtsɛ nyɛŋ eto eyiŋ efee nɔ ko, ja nɔ ni enaa akɛ Tsɛ lɛ feɔ lɛ.’”

Yesu kɛ enɛ tsɔɔ Yudafoi lɛ akɛ ekɛ Nyɔŋmɔ yeee egbɔ ni yɛ enɛ hewɔ lɛ enyɛŋ ejɛ esuɔmɔ mli efee nɔ ko. Ani shishinumɔ yɛ mli akɛ mɔ ni kɛ Nyɔŋmɔ Ofe lɛ yeɔ egbɔ lɛ nɔŋŋ aaakɛɛ akɛ “enyɛŋ eto eyiŋ efee nɔ ko”? (Okɛto Daniel 4:​34, 35 he.) Nɔ ni yɔɔ miishɛɛ ji akɛ, Yohane 5:​18 kɛ 10:​30 mli saji lɛ fɛɛ tsɔɔ akɛ Yesu fa ehe yɛ apasa naafolɔmɔ ni Yudafoi lɛ kɛfɔ enɔ lɛ mli, tamɔ mɛi ni heɔ Triniti lɛ amɛyeɔ lɛ kɛmuɔ sane naa yɛ gbɛ ni ejaaa nɔ lɛ!

‘Ani Ekɛ Nyɔŋmɔ Yeɔ Egbɔ’?

YƐ FILIPIBII 2:⁠6 lɛ, Katolek Douay Version (Dy) ni afee yɛ afi 1609 lɛ kɛɔ yɛ Yesu he akɛ: “Mɔ ni Nyɔŋmɔ su lɛŋ eyɔɔ moŋ, shi esusuuu he akɛ eji ojotswaa akɛ ekɛ Nyɔŋmɔ aaaye egbɔ.” King James Version (KJ) ni afee yɛ afi 1611 (ni atsɔɔ Ga Biblia lɛ shishi kɛjɛ mli) lɛ kaneɔ tamɔ nakai. Mɛi komɛi kɛ shishitsɔɔmɔi ni tamɔ nɛkɛ tsuɔ nii lolo amɛkɛfiɔ jwɛŋmɔ ni ji akɛ Yesu kɛ Nyɔŋmɔ yeɔ egbɔ lɛ sɛɛ. Shi kadimɔ bɔ ni shishitsɔɔmɔi krokomɛi tsɔɔ kuku nɛɛ shishi amɛhaa:

Afi 1869: “mɔ ni, Nyɔŋmɔ su lɛŋ eyɔɔ moŋ, shi ebuuu enɛ akɛ nii ni ebaashɔ koni ekɛ Nyɔŋmɔ aye egbɔ.” The New Testament, ni G. R. Noyes fee.

Afi 1965: “Lɛ​—ni eji ŋwɛinyo diɛŋtsɛ lɛ!⁠—​ekɛ hekɛnɔfɔɔ efeee ehe mɔ ni kɛ Nyɔŋmɔ yeɔ egbɔ kɔkɔɔkɔ.” Das Neue Testament, ni Friedrich Pfäfflin saa ŋma.

Afi 1968: “mɔ ni, eyɛ Nyɔŋmɔ su mli moŋ, shi esusuuu egbɔ ni ekɛ Nyɔŋmɔ aaaye lɛ he akɛ ekɛ hiɛkɔɔ aaashɔ afee enɔ.” La Bibbia Concordata.

Afi 1976: “Eyɛ Nyɔŋmɔ su lɛ daa, shi esusuuu akɛ eeetsɔ nɔnyɛɛ loo hewalɛ nɔ ebɔ mɔdɛŋ ni ekɛ Nyɔŋmɔ aye egbɔ.” Today’s English Version.

Afi 1984: “mɔ ni Nyɔŋmɔ su lɛŋ eyɔɔ moŋ, shi esusuuu shɔmɔ ni eeeshɔ enɛ he, ni ji akɛ, esa akɛ ekɛ Nyɔŋmɔ aye egbɔ.” New World Translation of the Holy Scriptures.

Afi 1985: “Mɔ ni Nyɔŋmɔ su mli eyɔɔ moŋ, shi ebuuu egbɔ ni ekɛ Nyɔŋmɔ aaaye lɛ akɛ nɔ ko ni esa akɛ esha.” The New Jerusalem Bible.

Shi mɛi komɛi kɛɔ po akɛ, nɛkɛ shishitsɔɔmɔi ni ja nɛɛ tsɔɔ akɛ (1) Yesu yɛ egbɔyeli lɛ momo shi esumɔɔɔ ni emɔ no mli, aloo (2) ehe ehiaaa ni eshɔ egbɔyeli lɛ ejaakɛ eyɛ enɛ momo.

Yɛ enɛ gbɛfaŋ lɛ, Ralph Martin kɛɔ yɛ The Epistle of Paul to the Philippians lɛ mli yɛ shishijee Hela wiemɔ lɛ he akɛ: “Ákɛ feemɔ-wiemɔ lɛ shishinumɔ aaanyɛ atsake kɛjɛ eshishinumɔ diɛŋtsɛ ni ji akɛ ‘ashɔ,’ ‘asha nɔ ko ekaa naa’ kɛya ‘amɔ mli kpɛŋŋ’ lɛ ji nɔ ko ni sanebimɔ loo yiŋkɔshikɔshi-feemɔ yɔɔ he.” The Expositor’s Greek Testament lɛ hu kɛɔ akɛ: “Wɔnaaa niŋmaa ko ni ἁρπάζω [har·paʹzo] aloo wiemɔi krokomɛi ni ana kɛjɛ mli lɛ eko hiɛ shishinumɔ ni ji ‘hiɛ mli akɛ enɔ,’ ‘hiɛ mli.’ Etamɔ nɔ ni etsakeee akɛ aaatsɔɔ shishi akɛ ‘shɔ,’ ‘sha nɔ ko ekaa naa.’ No hewɔ lɛ aŋmɛɛɛ gbɛ akɛ aaashi eshishinumɔ diɛŋtsɛ ni ji ‘ashɔ’ lɛ ni afee lɛ nɔ ni yɔɔ sɔrɔto kwraa ni ji, ‘amɔ mli kpɛŋŋ.’ ”

Anaa kɛjɛɔ enɛ mli faŋŋ akɛ mɛi ni tsɔɔ Douay kɛ King James loo Ga Biblia lɛ shishi lɛ miikudɔ mla lɛ koni efi Triniti tsɔɔmɔ lɛ sɛɛ. Ejeee akɛ Yesu susu po akɛ esa akɛ ekɛ Nyɔŋmɔ aye egbɔ, ejaakɛ kɛ akane Filipibii 2:⁠6 lɛ yɛ Hela wiemɔ mli jogbaŋŋ lɛ, etsɔɔ nɔ ni kɛ enɛ kpaaa gbee lɛ moŋ, akɛ Yesu susuuu he akɛ esa akɛ ekɛ Nyɔŋmɔ aye egbɔ.

Saji ni yɔɔ kukuji ni ebɔle (3-5, 7, 8) lɛ amli lɛ feɔ bɔ ni esa akɛ anu kuku 6 lɛ shishi lɛ faŋŋ. Awo Filipibii lɛ hewalɛ akɛ: “Nyɛkɛ heshibaa jwɛŋmɔ abubua nyɛnanemɛi fe nyɛ diɛŋtsɛ nyɛhe.” Kɛkɛ ni Paulo kɛ Kristo fee su nɛɛ he nɔkwɛmɔ nɔ ni ekaaa: “Nɔ ni Kristo Yesu hu jwɛŋ lɛ, no nɔŋŋ nyɛjwɛŋa yɛ nyɛmli.” Mɛni ‘ejwɛŋ’? ‘Ni eeesusu akɛ ejeee ojotswaa akɛ ekɛ Nyɔŋmɔ aaaye egbɔ’? Dabi, no baafee nɔ ni teɔ shi eshiɔ sane oti ni akɛmaa shi lɛ! Shi moŋ, Yesu, ni ‘buɔ Nyɔŋmɔ akɛ ehi fe lɛ lɛ,’ ‘mɔŋ egbɔ ni ekɛ Nyɔŋmɔ aaaye lɛ mli,’ shi moŋ “eba ehe shi ni ebo toi kɛtee gbele mli.”

Yɛ anɔkwale mli lɛ, enɛ etsɔɔɔ akɛ aawie Nyɔŋmɔ Ofe lɛ fa ko he. Aawie Yesu, mɔ ni fee Paulo sane lɛ he nɔkwɛmɔ nɔ yɛ emuuyeli mli yɛ biɛ lɛ he​—ni ji, bɔ ni heshibaa kɛ toiboo ni aaafee aha Mɔ ni Kwɔ lɛ kɛ Bɔlɔ lɛ ni ji Yehowa Nyɔŋmɔ he hiaa ha lɛ.

“Mi-ji” loo “Mi-yɛ”

AKƐ nɔkwɛmɔ nɔ lɛ, shishitsɔɔmɔi pii, tamɔ The Jerusalem Bible lɛ tsɔɔ Yohane 8:​58 shishi akɛ Yesu kɛɛ yɛ jɛmɛ akɛ: “Dani Abraham aaaba lɛ, Mi-Yɛ.” Ani Yesu miitsɔɔ yɛ biɛ, taakɛ Triniti tsɔɔlɔi lɛ kɛɔ lɛ, akɛ ale lɛ kɛ sabala ni ji “Mi-Yɛ” loo “Mi-Ji”? Ni taakɛ amɛkɛɔ lɛ, ani enɛ tsɔɔ akɛ lɛ ji Yehowa ni yɔɔ Hebri Ŋmalɛi lɛ amli lɛ, akɛni King James Version loo Ga Biblia lɛ kɛɔ yɛ 2 Mose 3:​14 akɛ: “Ni Nyɔŋmɔ kɛɛ Mose akɛ, “MI-JI MƆ NI MI-JI” lɛ hewɔ?

Akɛ wiemɔ kuku, “MI-JI” ni yɔɔ 2 Mose 3:​14 (KJ) aloo Ga Biblia lɛ mli lɛ tsu nii akɛ sabala kɛha Nyɔŋmɔ ni akɛtsɔɔ akɛ eyɛ diɛŋtsɛ ni ebaafee nɔ ni ewo shi yɛ he lɛ. The Pentateuch and Haftorahs, ni Dr. J. H. Hertz ŋma lɛ kɛɔ yɛ nɛkɛ wiemɔ kuku nɛɛ he akɛ: “Kɛha Israelbii ni yɔɔ nyɔŋyeli mli lɛ, eshishinumɔ lɛ baafee, ‘Eyɛ mli akɛ E-jieko E-hewalɛ lɛ kpo etsɔko yɛ nyɛhewɔ moŋ, shi E-baafee nakai; E-yɛ kɛmiiya naanɔ ni ebaajie nyɛ kɛ̃.’ Ŋmɛnɛŋmɛnɛ beaŋ shishitsɔɔmɔi pii nyiɛɔ Rashi [French Biblia kɛ Talmud he wielɔ lɛ] sɛɛ ni amɛtsɔɔ [2 Mose 3:​14] shishi akɛ ‘Mafee mɔ ni mafee.’ ”

Esoro wiemɔ ni yɔɔ Yohane 8:​58 lɛ kwraa yɛ nɔ ni akɛtsu nii yɛ 2 Mose 3:​14 lɛ he. Yesu kɛ enɛ tsuuu nii akɛ gbɛi loo sabala shi moŋ akɛ nɔ ko ni ekɛmiitsɔɔ shihilɛ mli ni eyɔɔ dani ebatsɔ adesa lɛ mli. No hewɔ lɛ kadimɔ bɔ ni Biblia shishitsɔɔmɔi komɛi tsɔɔ Yohane 8:​58 shishi amɛhaa:

Afi 1869: “Kɛjɛ dani Abraham aaaba lɛ, miyɛ.” The New Testament, ni G. R. Noyes fee.

Afi 1935: “Miyɛ dani afɔ Abraham!” The Bible​—An American Translation, ni J. M. P. Smith kɛ E. J. Goodspeed fee.

Afi 1965: “Dani aaafɔ Abraham lɛ, no mli lɛ Miji mɔ ni Miji momo.” Das Neue Testament, ni Jörg Zink fee.

Afi 1981: “Miyɛ wala mli dani afɔ Abraham!” The Simple English Bible.

Afi 1984: “Dani Abraham aaaba shihilɛ mli lɛ, no mli lɛ miyɛ.” New World Translation of the Holy Scriptures.

No hewɔ lɛ, jwɛŋmɔ diɛŋtsɛ ni yɔɔ Hela wiemɔ ni akɛtsu nii yɛ biɛ lɛ sɛɛ ji akɛ, Nyɔŋmɔ “kromɔ bi,” Yesu, ni abɔ lɛ lɛ ehi shihilɛ mli jeeŋmɔ dani abafɔ Abraham.​—Kolosebii 1:​15; Abɛi 8:​22, 23, 30; Kpojiemɔ 3:⁠14.

Agbɛnɛ hu, emli saji lɛ tsɔɔ akɛ enɛ ji shishinumɔ ni ja lɛ. Yɛ enɛ mli hu lɛ Yudafoi lɛ miitao ni amɛtswia Yesu tɛi ejaakɛ eetsɔɔ akɛ ‘ena Abraham,’ yɛ be mli ni, taakɛ amɛkɛɛ lɛ, eyeko afii 50. (Kuku 57) Bɔ ni esa akɛ Yesu aha amɛ hetoo ji ni egba amɛ anɔkwale ni kɔɔ afii ni eye lɛ he. No hewɔ lɛ ekɛɛ amɛ diɛŋtsɛ akɛ “miyɛ wala mli dani afɔ Abraham!”​—The Simple English Bible.

“Ni Wiemɔ lɛ Nyɔŋmɔ Ni”

YƐ YOHANE 1:⁠1 lɛ, King James Version loo Ga Biblia lɛ kaneɔ akɛ: “Shishijee lɛŋ lɛ, Wiemɔ lɛ yɛ, ni Wiemɔ lɛ kɛ Nyɔŋmɔ yɔɔ, ni Wiemɔ lɛ Nyɔŋmɔ ni.” Triniti tsɔɔlɔi kɛɔ akɛ enɛ tsɔɔ akɛ “Wiemɔ lɛ” (Hela, ho loʹgos) ni ba shikpɔŋ nɔ akɛ Yesu Kristo lɛ ji Nyɔŋmɔ Ofe lɛ diɛŋtsɛ.

Shi kadimɔ yɛ biɛ ekoŋŋ akɛ, emli saji lɛ kɛ eshishitsɔɔmɔ ni ja haa wɔ. King James Version lɛ po kɛɔ akɛ, “Ni Wiemɔ lɛ kɛ Nyɔŋmɔ yɔɔ.” (Nɔ ni atsɔmɔ lɛ ji wɔnɔ.) Mɔ ni “kɛ” mɔ kroko yɔɔ lɛ nyɛŋ afee mɔ kroko lɛ ni ekɛ lɛ yɔɔ lɛ nɔŋŋ. Yɛ enɛ kɛ gbeekpamɔ naa lɛ, Journal of Biblical Literature, ni Jesuit Joseph A. Fitzmyer ŋma lɛ tsɔɔ akɛ, kɛ atsɔɔ Yohane 1:⁠1 naagbee fa lɛ shishi akɛ etsɔɔ Nyɔŋmɔ “lɛ”, belɛ enɛ “teɔ shi ewoɔ wiemɔ kuku ni tsɔ hiɛ lɛ,” nɔ ni kɛɔ akɛ Wiemɔ lɛ kɛ Nyɔŋmɔ yɔɔ lɛ.

Agbɛnɛ hu kadimɔ bɔ ni shishitsɔɔmɔi krokomɛi tsɔɔ kuku nɛɛ fa nɛɛ shishi amɛhaa:

Afi 1808: “ni wiemɔ lɛ ji nyɔŋmɔ ko.” The New Testament in an Improved Version, Upon the Basis of Archbishop Newcome’s New Translation: With a Corrected Text.

Afi 1864: “ni nyɔŋmɔ ko ji wiemɔ lɛ.” The Emphatic Diaglott, niŋmaai ashishi nikanemɔ ni Benjamin Wilson fee.

Afi 1928: “ni Wiemɔ lɛ ji ŋwɛinyo ko.” La Bible du Centenaire, L’Evangile selon Jean, ni Maurice Goguel fee.

Afi 1935: “ni Wiemɔ lɛ yɛ krɔŋkrɔŋ.” The Bible​—An American Translation, ni J. M. P. Smith kɛ E. J. Goodspeed fee.

Afi 1946: “ni nɔ krɔŋkrɔŋ ji Wiemɔ lɛ.” Das Neue Testament, ni Ludwig Thimme fee.

Afi 1950: “ni Wiemɔ lɛ ji nyɔŋmɔ ko.” New World Translation of the Christian Greek Scriptures.

Afi 1958: “ni Wiemɔ lɛ ji Nyɔŋmɔ ko.” The New Testament, ni James L. Tomanek fee.

Afi 1975: “ni nyɔŋmɔ ko (aloo nɔ krɔŋkrɔŋ ko) ji Wiemɔ lɛ.” Das Evangelium nach Johannes, ni Siegfried Schulz fee.

Afi 1978: “ni Logos lɛ tamɔ nyɔŋmɔ ko.” Das Evangelium nach Johannes, ni Johannes Schneider fee.

Hela gbɛi the·osʹ (nyɔŋmɔ) lɛ jeɔ kpo shii enyɔ yɛ Yohane 1:⁠1. Klɛŋklɛŋ nɔ lɛ kɔɔ Nyɔŋmɔ Ofe lɛ ni Wiemɔ lɛ kɛ lɛ yɔɔ lɛ he (“ni Wiemɔ [loʹgos] lɛ kɛ Nyɔŋmɔ [the·osʹ ko] yɔɔ”). Nɔ ni yɔɔ klɛŋklɛŋ the·osʹ nɛɛ sɛɛ ji wiemɔ ton (lɛ), Hela wiemɔ ni tsɔɔ nɔ pɔtɛɛ ni miitsɔɔ mɔ pɔtɛɛ ko lɛ, ni yɛ enɛ mli lɛ Nyɔŋmɔ Ofe lɛ (“ni Wiemɔ lɛ kɛ Nyɔŋmɔ [lɛ] yɔɔ”).

Yɛ gbɛ kroko nɔ lɛ, wiemɔ ni tsɔɔ nɔ pɔtɛɛ bɛ ni ye the·osʹ ni ji enyɔ lɛ sɛɛ yɛ Yohane 1:⁠1. No hewɔ lɛ ekanemɔ diɛŋtsɛ baaba akɛ, “ni nyɔŋmɔ ji Wiemɔ lɛ.” Ni kɛlɛ wɔna akɛ shishitsɔɔlɔi pii tsɔɔ the·osʹ ni ji enyɔ (gbɛi mlitsɔɔmɔ) nɛɛ shishi akɛ “krɔŋkrɔŋ,” “tamɔ nyɔŋmɔ,” loo “nyɔŋmɔ ko.” Mɛɛ hewalɛ nɔ amɛdamɔɔ amɛfeɔ enɛ?

Hela ni mɛi foji lɛ wieɔ lɛ yɛ wiemɔ ni tsɔɔ nɔ pɔtɛɛ (“lɛ”), shi ebɛ wiemɔ ni etsɔɔɔ nɔ pɔtɛɛ (“ko”). No hewɔ lɛ kɛ gbɛi mlitsɔɔmɔ ko enyiɛɛɛ wiemɔ ni tsɔɔ nɔ pɔtɛɛ lɛ sɛɛ lɛ, ebaanyɛ efee nɔ ni etsɔɔɔ nɔ pɔtɛɛ, yɛ emli sane lɛ naa.

Journal of Biblical Literature lɛ kɛɔ akɛ wiemɔi “ni bɛ gbɛi mlitsɔɔmɔ ni etsɔɔɔ nɔ pɔtɛɛ ni yeɔ feemɔ-wiemɔ sɛɛ lɛ shishinumɔ hi ni hewalɛ yɛ mli.” Taakɛ Journal lɛ kadi lɛ, enɛ tsɔɔ akɛ abaanyɛ akɛ loʹgos lɛ ato nyɔŋmɔ ko he. Ewie yɛ Yohane 1:⁠1 he akɛ: “Hewalɛ ni yɔɔ gbɛi mlitsɔɔmɔ lɛ hilɛ mli lɛ jeɔ kpo waa akɛ anyɛŋ abu gbɛi [the·osʹ ] lɛ akɛ etsɔɔ nɔ pɔtɛɛ.”

No hewɔ lɛ Yohane 1:⁠1 maa Wiemɔ lɛ hilɛ nɔ mi, akɛ eyɛ “krɔŋkrɔŋ,” “etamɔ nyɔŋmɔ,” “nyɔŋmɔ ko,” shi jeee Nyɔŋmɔ Ofe. Enɛ kɛ Biblia lɛ fai krokomɛi ni tsɔɔ akɛ Yesu, ni atsɛɔ lɛ “Wiemɔ lɛ” yɛ biɛ, akɛ Nyɔŋmɔ Otsaamɛ loo Naawielɔ lɛ ji mɔ ni baa ehe shi, ní Mɔ ni Kwɔ fe lɛ, Nyɔŋmɔ Ofe lɛ tsu lɛ kɛba shikpɔŋ nɔ lɛ kpaa gbee.

Biblia mli saji pii yɛ ni etamɔ nɔ ni shishitsɔɔlɔi lɛ fɛɛ kpaa gbee yɛ wiemɔi krokomɛi ni amɛkɛ “ko” tsu nii yɛ he lɛ mli, beni amɛtsɔɔ Hela wiemɔi ni tamɔ nakai nɔŋŋ lɛ ashishi lɛ. Akɛ nɔkwɛmɔ nɔ lɛ, yɛ Marko 6:​49, beni kaselɔi lɛ na Yesu ni nyiɛ nu lɛ hiɛ lɛ, King James Version lɛ kaneɔ akɛ: “Amɛsusu akɛ mumɔ ko ni.” Wiemɔ “ko” bɛ ni ye “mumɔ” lɛ sɛɛ yɛ Hela ni gbɔmɛi foji lɛ wieɔ lɛ mli. Shi etamɔ nɔ ni wiemɔi krokomɛi amli shishitsɔɔmɔi lɛ fɛɛ kɛ “ko” fataa he koni ekɛ emli sane lɛ akpa gbee. Yɛ nakai gbɛ nɔ nɔŋŋ lɛ, akɛni Yohane 1:⁠1 tsɔɔ akɛ Wiemɔ lɛ kɛ Nyɔŋmɔ yɔɔ hewɔ lɛ enyɛŋ efee Nyɔŋmɔ shi moŋ eji “nyɔŋmɔ ko,” loo “krɔŋkrɔŋ.”

Joseph Henry Thayer, Nyɔŋmɔjamɔ he nilelɔ kɛ woloŋlelɔ ni tsu American Standard Version lɛ he nii lɛ jaje yɛ faŋŋ akɛ: “Logos [Wiemɔ] Lɛ yɛ krɔŋkrɔŋ, jeee Mɔ Krɔŋkrɔŋ lɛ diɛŋtsɛ.” Ni Jesuit osɔfo John L. McKenzie ŋma yɛ ewolo, Dictionary of the Bible lɛ mli akɛ: “Esa akɛ atsɔɔ Yoh. 1:⁠1 shishi diɛŋtsɛ akɛ . . . ‘ni wiemɔ lɛ ji mɔ krɔŋkrɔŋ ko.’ ”

Ani Ekuɔ Mla ko Mli?

SHI mɛi komɛi kɛɔ akɛ shishitsɔɔmɔi ni tamɔ nɛkɛ lɛ fiteɔ Hela ni gbɔmɛi foji lɛ wieɔ lɛ he wiemɔ mla ni Hela woloŋlelɔ E. C. Colwell ŋma yɛ afi 1933 mli lɛ. Ekɛɛ akɛ yɛ Hela wiemɔ mli lɛ, wiemɔ su lɛ “naa wiemɔ ni tsɔɔ nɔ pɔtɛɛ lɛ kɛ enyiɛ feemɔ-wiemɔ sɛɛ; enaaa wiemɔ ni tsɔɔ nɔ pɔtɛɛ lɛ kɛ enyiɛ feemɔ-wiemɔ hiɛ.” Ekɛ enɛ miitsɔɔ akɛ esa akɛ anu wiemɔ ni yeɔ feemɔ-wiemɔ sɛɛ lɛ shishi akɛ etamɔ nɔ ni eyɛ wiemɔ ni tsɔɔ nɔ pɔtɛɛ ni ji “lɛ” lɛ yɛ esɛɛ. Anaa ni gbɛi ni ji enyɔ (the·osʹ ) ni yɔɔ Yohane 1:⁠1 lɛ wiemɔ su lɛ yeɔ feemɔ-wiemɔ lɛ sɛɛ​—“ni [the·osʹ ] lɛ ji Wiemɔ lɛ.” No hewɔ lɛ Colwell kɛɔ akɛ esa akɛ Yohane 1:⁠1 akane akɛ “ni Nyɔŋmɔ [lɛ] ji Wiemɔ lɛ.”

Shi susumɔ nɔkwɛmɔ nii enyɔ pɛ ni anaa yɛ Yohane 8:​44 lɛ he. Yesu wieɔ Abonsam he yɛ jɛmɛ akɛ: “Lɛ lɛ, gbɔmɔgbelɔ ji lɛ” kɛ “amalelɔ ji lɛ.” Taakɛ bɔ ni eyɔɔ Yohane 1:⁠1 lɛ, feemɔ-wiemɔ (“ji lɛ”) lɛ yeɔ gbɛi (“gbɔmɔgbelɔ” kɛ “amalelɔ”) sɛɛ yɛ Hela wiemɔ lɛ mli. Wiemɔ ni etsɔɔɔ nɔ pɔtɛɛ bɛ wiemɔi loo gbɛi lɛ asɛɛ ejaakɛ wiemɔ ni etsɔɔɔ nɔ pɔtɛɛ bɛ Hela ni gbɔmɛi foji lɛ wieɔ lɛ mli. Shi shishitsɔɔmɔi pii kɛ wiemɔ “ko” hɔɔ mli ejaakɛ Hela wiemɔ he mla kɛ emli saji lɛ biɔ enɛ.​—Kwɛmɔ Marko 11:​32; Yohane 4:​19; 6:​70; 9:​17; 10:⁠1; 12:⁠6.

Ehe bahia ni Colwell akpɛlɛ enɛ nɔ yɛ gbɛi su lɛ hewɔ, ejaakɛ ekɛɛ: “Eji gbɛi ni etsɔɔɔ nɔ pɔtɛɛ [“ko”] yɛ enɛ pɛ mli beni emli saji lɛ biɔ ni ebalɛ nakai lɛ.” No hewɔ lɛ ekpɛlɛɔ nɔ akɛ, kɛ emli saji lɛ miibi enɛ lɛ, shishitsɔɔlɔi baanyɛ ni amɛkɛ gbɛi ni etsɔɔɔ nɔ pɔtɛɛ aye gbɛi lɛ sɛɛ yɛ wiemɔ kuku ni tamɔ nɛkɛ mli.

Ani emli saji lɛ biɔ wiemɔ ni etsɔɔɔ nɔ pɔtɛɛ yɛ Yohane 1:⁠1? Hɛɛ, ejaakɛ Biblia muu lɛ fɛɛ mli odaseyelii lɛ ji akɛ Yesu jeee Nyɔŋmɔ Ofe lɛ. No hewɔ lɛ, jeee Colwell wiemɔ he mla ni yiŋkɔshikɔshi-feemɔ yɔɔ he lɛ, shi moŋ emli saji lɛ ji nɔ ni esa akɛ ekudɔ shishitsɔɔlɔ lɛ yɛ saji ni tamɔ nɛkɛ mli. Ni ejeɔ kpo faŋŋ yɛ bɔ ni shishitsɔɔmɔi ni kɛ wiemɔ ni etsɔɔɔ nɔ pɔtɛɛ, “ko” hɔɔ Yohane 1:⁠1 kɛ hei krokomɛi amli lɛ mli, akɛ woloŋlelɔi pii kɛ mla ni jeee anɔkwale nɛɛ kpaaa gbee ni nakai hu Nyɔŋmɔ Wiemɔ lɛ feɔ.

Eteee Shi Ewooo Nɔ Ko

ANI kɛɛmɔ ni akɛɔ akɛ Yesu Kristo ji “nyɔŋmɔ ko” lɛ teɔ shi ewoɔ Biblia mli tsɔɔmɔ akɛ Nyɔŋmɔ kome pɛ yɔɔ lɛ? Dabi, ejaakɛ yɛ bei komɛi amli lɛ Biblia lɛ kɛ nakai wiemɔ lɛ tsuɔ nii ekɛtoɔ bɔɔ nii ni he wa lɛ ahe. Lala 8:⁠6 (NW ) kaneɔ nɛkɛ: “Agbɛnɛ otee nɔ ofee [gbɔmɔ] lɛ mɔ ni baa shi fioo fe mɛi ni tamɔ nyɔŋmɔi [Hebri, ʼelo·himʹ ] lɛ,” ni ji, ŋwɛibɔfoi. Yɛ be mli ni Yesu faa ehe yɛ Yudafoi lɛ anaafolɔmɔ akɛ ekɛɔ akɛ Nyɔŋmɔ ji lɛ lɛ mli lɛ, etsɔɔ akɛ “Mla lɛ kɛ wiemɔ nyɔŋmɔi tsuɔ nii ekɛtoɔ mɛi aŋɔɔ ni Nyɔŋmɔ Wiemɔ lɛ ba lɛ ahe,” ni ji, adesai kojolɔi. (Yohane 10:​34, 35, JB; Lala 82:​1-⁠6) Atsɛɔ Satan po akɛ “je nɛŋ nyɔŋmɔ” yɛ 2 Korintobii 4:⁠4.

Yesu yɛ gbɛhe ko ni kwɔ kwraa mli fe ŋwɛibɔfoi lɛ, adesai ni yeee emuu, aloo Satan. Akɛni atsɛɔ mɛnɛɛmɛi akɛ “nyɔŋmɔi,” mɛi ni he wa hewɔ lɛ, yɛ anɔkwale mli lɛ Yesu baanyɛ afee “nyɔŋmɔ ko” ni nakai eji hu. Yɛ gbɛhe ni ekaaa mli ni eyɔɔ kɛ akɛto Yehowa he lɛ hewɔ lɛ, Yesu ji “Nyɔŋmɔ Hewalɔ.”​—Yohane 1:⁠1; Yesaia 9:⁠5.

Shi ani “Nyɔŋmɔ Hewalɔ” kɛ eniŋmaai wuji nɛɛ etsɔɔɔ akɛ Yesu kɛ Yehowa Nyɔŋmɔ yeɔ egbɔ yɛ gbɛ ko nɔ? Dabi kwraa. Yesaia gba enɛ ekɛtsɔɔ gbɛi sɔrɔtoi ejwɛ ni akɛbaatsɛ Yesu lɛ ateŋ ekome kɛkɛ, ni akɛ niŋmaai wuji ŋmalaa gbɛi ni tamɔ nɛkɛ yɛ Ŋleshi wiemɔ mli. Kɛlɛ, eyɛ mli akɛ atsɛ Yesu akɛ “Hewalɔ” moŋ, shi mɔ kome pɛ yɔɔ ni baanyɛ ahi shi ni atsɛ lɛ “Ofe” loo “Hewalɛ Fɛɛ Tsɛ.” Ni aaatsɛ Yehowa Nyɔŋmɔ akɛ “Ofe” loo “Hewalɛ Fɛɛ Tsɛ” lɛ efeŋ nɔ ni tsɔɔ nɔ ko tsɔ, ja mɛi krokomɛi ni atsɛɔ amɛ hu akɛ nyɔŋmɔi ni amɛ gbɛhei baa shi yɛ.

Bulletin of the John Rylands Library ni yɔɔ England yɛ Ŋleshi Ablotsiri lɛ tsɔɔ akɛ, taakɛ Katolek Nyɔŋmɔjamɔ he nilelɔ, Karl Rahner tsɔɔ lɛ, yɛ be mli ni akɛ the·osʹ tsuɔ nii yɛ ŋmalɛi lɛ amli, tamɔ yɛ Yohane 1:⁠1 akɛtoɔ Kristo he lɛ, “enɛɛmɛi amli he ko he ko bɛ ni akɛ ‘theos’ lɛ etsu nii yɛ nɛkɛ gbɛ nɔ ni baaha ayoo Yesu akɛ lɛ ji mɔ ni jeɔ kpo yɛ Kpaŋmɔ Hee lɛ mli hei krokomɛi akɛ ‘ho Theos,’ ni ji, Jeŋ Muu Fɛɛ Nyɔŋmɔ lɛ.” Ni Bulletin lɛ kɛfata he akɛ: “Kɛji akɛ Kpaŋmɔ Hee lɛ mli niŋmalɔi lɛ he ye akɛ ehe miihia ni anɔkwafoi lɛ ajaje Yesu akɛ ‘Nyɔŋmɔ’ lɛ, belɛ ani abaanyɛ atsɔɔ nɔ hewɔ ni nɛkɛ sane jajemɔ nɛɛ pɛ bɛ Kpaŋmɔ Hee lɛ mli kwraa lɛ mli?”

Shi nɔ ni bɔfo Toma kɛ Yesu wie ni ji “Mi-Nuŋtsɔ kɛ mi-Nyɔŋmɔ!” yɛ Yohane 20:​28 lɛ hu? Yesu tamɔ “nyɔŋmɔ ko” kɛha Toma, titri lɛ yɛ shihilɛi ni yɔɔ naakpɛɛ ni eyɔɔ mli ni ha ebo nɛkɛ lɛ hewɔ. Woloŋlelɔi komɛi kɛɔ akɛ Toma kɛ henumɔ kɛ enaa ni ekpɛ ehe sɔŋŋ wie nɛkɛ etsɔɔ Yesu shi Nyɔŋmɔ ji mɔ ni ekɛ nakai wiemɔi lɛ tsɔɔ. Yɛ fɛɛ mli lɛ, Toma heee yeee akɛ Yesu ji Nyɔŋmɔ Ofe lɛ, ejaakɛ lɛ kɛ bɔfoi krokomɛi lɛ fɛɛ le akɛ Yesu ekɛko da akɛ eji Nyɔŋmɔ, shi moŋ etsɔɔ mɛi akɛ Yehowa pɛ ji “anɔkwa Nyɔŋmɔ kome pɛ lɛ.”​—Yohane 17:⁠3, NW.

Agbɛnɛ hu emli saji lɛ yeɔ ebuaa wɔ ni wɔnuɔ enɛ shishi. Yesu ni atee lɛ shi lɛ kɛɛ Maria Magdaleena yɛ gbii fioo ko ni tsɔ hiɛ lɛ amli akɛ ekɛɛ ekaselɔi lɛ akɛ: “Miiya ŋwɛi yɛ mi-Tsɛ kɛ nyɛ hu nyɛ-Tsɛ, kɛ mi-Nyɔŋmɔ kɛ nyɛ hu nyɛ-Nyɔŋmɔ lɛ ŋɔɔ.” (Yohane 20:​17) Eyɛ mli akɛ atee Yesu shi momo akɛ mumɔ ni he wa moŋ, shi Yehowa ka he eji e-Nyɔŋmɔ. Ni Yesu tee nɔ ewie E-he nakai yɛ Biblia lɛ mli naagbee wolo lɛ po mli, yɛ be mli ni awo ehiɛ nyam lɛ sɛɛ.​—Kpojiemɔ 1:​5, 6; 3:​2, 12.

Toma wiemɔ lɛ sɛɛ kukuji etɛ pɛ kɛkɛ ni Biblia lɛ tee nɔ efee sane lɛ faŋŋ ekoŋŋ yɛ Yohane 20:​31 akɛ: “Shi enɛɛmɛi lɛ aŋma koni nyɛhe nyɛye akɛ Yesu ji Kristo, Nyɔŋmɔ bi lɛ,” shi jeee akɛ lɛ ji Nyɔŋmɔ Ofe lɛ. Ni etsɔɔ “Bi” yɛ heloo naa gbɛ nɔ, tamɔ heloo naa tsɛ kɛ bi, shi jeee Triniti Nyɔŋmɔ-su ko fã ni yɔɔ naakpɛɛ ni anaaa naa.

Esa akɛ Ekɛ Biblia lɛ Akpa Gbee

AKƐƆ akɛ ŋmalɛi krokomɛi pii fiɔ Triniti lɛ sɛɛ. Shi enɛɛmɛi tamɔ nɔ ni wɔtsɔ hiɛ wɔsusu he lɛ, ejaakɛ kɛ atao mli jogbaŋŋ lɛ, amɛfiii sɛɛ kwraa. Nɛkɛ ŋmalɛi nɛɛ maa nɔ mi moŋ akɛ, kɛ aasusu nɔ ni akɛɛ efiɔ Triniti sɛɛ nɛɛ eko he lɛ, esa akɛ mɔ abi ehe akɛ: Ani shishitsɔɔmɔ lɛ kɛ Biblia muu lɛ fɛɛ mli tsɔɔmɔ​—akɛ Yehowa Nyɔŋmɔ pɛ ji Ofe lɛ kpaa gbee? Kɛ jeee nakai lɛ, belɛ shishitsɔɔmɔ lɛ ji nɔ ni tɔmɔ yɔɔ mli.

Ehe miihia ni wɔha ahi wɔjwɛŋmɔ mli hu akɛ nakai “ŋmalɛi ni akɛmaa nɔ mi” lɛ ekome po bɛ ni kɛɔ akɛ Nyɔŋmɔ, Yesu kɛ mumɔ krɔŋkrɔŋ lɛ feɔ ekome yɛ teemɔŋ Nyɔŋmɔ-su ko mli. Ŋmalɛ kome folo ko bɛ Biblia lɛ mli ni kɛɔ akɛ mɛi etɛ lɛ fɛɛ yeɔ egbɔ yɛ heloo, hewalɛ, kɛ naanɔ shihilɛ mli. Biblia lɛ kɛ ehe kpaa gbee be fɛɛ be yɛ jiemɔ ni ejieɔ Nyɔŋmɔ Ofe lɛ ni ji Yehowa kpo akɛ lɛ pɛ ji Mɔ ni Kwɔ Fe Fɛɛ, kɛ Yesu akɛ e-Bi ni ebɔ lɛ, kɛ mumɔ krɔŋkrɔŋ lɛ akɛ Nyɔŋmɔ nifeemɔ hewalɛ lɛ mli.

[Wiemɔ ni akɔ ni akɛmiitsu nii ni yɔɔ baafa 24]

“Blemabii lɛ kɛ [Yohane 10:​30] tsu nii yɛ gbɛ ni ejaaa nɔ koni amɛkɛtsɔɔ akɛ Kristo kɛ . . . Tsɛ lɛ fɛɛ lɛ ekomeŋ.”​—Commentary on the Gospel According to John, ni John Calvin fee

[Wiemɔ ni akɔ ni akɛmiitsu nii ni yɔɔ baafa 27]

Mɔ ni “kɛ” mɔ ko yɔɔ lɛ nyɛŋ afee mɔ ni ekɛ lɛ yɔɔ lɛ nɔŋŋ

[Wiemɔ ni akɔ ni akɛmiitsu nii ni yɔɔ baafa 28]

“Logos lɛ yɛ krɔŋkrɔŋ, shi ejeee Ŋwɛinyo lɛ diɛŋtsɛ.”​—Joseph Henry Thayer, Biblia nilelɔ

[Mfonirii ni yɔɔ baafa 24, 25]

Yesu sɔle eha Nyɔŋmɔ koni ekaselɔi lɛ “amɛfee ekome” tamɔ bɔ ni lɛ kɛ e-Tsɛ lɛ “yɔɔ ekome” lɛ

[Mfoniri ni yɔɔ baafa 26]

Yesu tsɔɔ Yudafoi lɛ akɛ ekɛ Nyɔŋmɔ yeee egbɔ, ni ekɛɛ ‘enyɛŋ ejɛ lɛ diɛŋtsɛ esuɔmɔ mli efee nɔ ko akɛ ja nɔ ni ena ni Tsɛ lɛ feɔ’

[Mfonirii ni yɔɔ baafa 29]

Akɛni Biblia lɛ tsɛɔ adesai, ŋwɛibɔfoi, kɛ Satan po akɛ “nyɔŋmɔi” loo hewalɔi hewɔ lɛ, abaanyɛ atsɛ Yesu ni kwɔ fe amɛ ni yɔɔ ŋwɛi lɛ akɛ “nyɔŋmɔ ko”