Mumɔ Krɔŋkrɔŋ Lɛ—Nyɔŋmɔ Nifeemɔ Hewalɛ
TAAKƐ Triniti tsɔɔmɔ lɛ tsɔɔ lɛ, mumɔ krɔŋkrɔŋ lɛ ji Nyɔŋmɔ-su lɛ mli mɔ ni ji etɛ, ekɛ Tsɛ lɛ kɛ Bi lɛ yeɔ egbɔ. Taakɛ wolo, Our Orthodox Christian Faith lɛ kɛɔ lɛ: “Mumɔ Krɔŋkrɔŋ lɛ ji Nyɔŋmɔ kwraa.”
Wiemɔ ni afɔɔ kɛ nitsumɔ yɛ Hebri Ŋmalɛi lɛ amli ahaa “mumɔ” ji ruʹach, ni eshishi ji “mu ni amuɔ; kɔɔyɔɔ; mumɔ.” Wiemɔ lɛ ji pneuʹma yɛ Hela Ŋmalɛi lɛ amli, ni eshishinumɔ tamɔ nakai nɔŋŋ. Ani nɛkɛ wiemɔi nɛɛ tsɔɔ akɛ mumɔ krɔŋkrɔŋ lɛ ji Triniti lɛ fa?
Nifeemɔ Hewalɛ Ko
BƆ NI Biblia lɛ kɛ “mumɔ krɔŋkrɔŋ” tsuɔ nii ehaa lɛ tsɔɔ akɛ eji hewalɛ ko ni akudɔɔ ni Yehowa Nyɔŋmɔ kɛtsuɔ nii koni ekɛtsu eyiŋtoi sɔrɔtoi lɛ ahe nii. Abaanyɛ akɛto sarawa hewalɛ he yɛ gbɛ ko nɔ, hewalɛ ni abaanyɛ akɛtsu nibii sɔrɔtoi babaoo lɛ.
Biblia lɛ kɛɔ yɛ 1 Mose 1:2, (NW) akɛ “Nyɔŋmɔ nifeemɔ hewalɛ [“mumɔ” (Hebri, ruʹach)] lɛ hiɛ yaa kɛ baa yɛ nui lɛ ahiɛ.” Nyɔŋmɔ mumɔ lɛ ji enifeemɔ hewalɛ lɛ yɛ biɛ ni eetsu nii koni ekɛfee shikpɔŋ lɛ.
Nyɔŋmɔ kɛ emumɔ lɛ tsuɔ nii koni ekɛha mɛi ni sɔmɔɔ lɛ lɛ ana nilee. David sɔle akɛ: “Tsɔɔmɔ mi ni mafee osuɔmɔnaa nii, ejaakɛ bo ji mi-Nyɔŋmɔ; ha omumɔ [ruʹach] kpakpa lɛ atsɔɔ mi gbɛ yɛ shikpɔŋ trɛnɛɛ nɔ.” (Lala 143:10) Beni ahala hii 70 ni yɔɔ nyɛmɔ koni amɛye amɛbua Mose lɛ, Nyɔŋmɔ kɛɛ lɛ akɛ: “Maŋɔ mumɔ [ruʹach] ni yɔɔ onɔ lɛ eko mashwie amɛnɔ.”—4 Mose 11:17.
Aŋmala Biblia mli gbalɛ wiemɔi lɛ beni “mumɔ krɔŋkrɔŋ lɛ [Hela, ejɛ pneuʹma mli] tsirɛɔ Nyɔŋmɔ gbɔmɛi krɔŋkrɔŋi lɛ.” (2 Petro 1:20, 21) Yɛ nɛkɛ gbɛ nɔ lɛ belɛ Biblia lɛ “jɛ Nyɔŋmɔ mumɔ mli,” ni Hela wiemɔ kɛha enɛ ji The·oʹpneu·stos, ni eshishi ji “Nyɔŋmɔ mu.” (2 Timoteo 3:16) Ni mumɔ krɔŋkrɔŋ lɛ kudɔ gbɔmɛi komɛi koni amɛna ninaai aloo koni amɛna gbalɛ mli lamɔi.—2 Samuel 23:2; Yoel 3:1, 2; Luka 1:67; Bɔfoi lɛ Asaji 1:16; 2:32, 33.
Mumɔ krɔŋkrɔŋ lɛ tsirɛ Yesu koni eya ŋa lɛ nɔ yɛ ebaptisimɔ lɛ sɛɛ. (Marko 1:12) Mumɔ lɛ tamɔ la yɛ Nyɔŋmɔ tsuji amli, ni nakai hewalɛ lɛ kanyaa amɛ. Ni eye ebua amɛ ni amɛnyɛ amɛkɛ ekaa wie ni amɛsheee gbeyei.—Mika 3:8; Bɔfoi lɛ Asaji 7:55-60; 18:25; Romabii 12:11; 1 Tesalonikabii 5:19.
Nyɔŋmɔ tsɔɔ emumɔ lɛ nɔ etsuɔ ekojomɔi ahe nii yɛ gbɔmɛi kɛ jeŋmaji anɔ. (Yesaia 30:27, 28; 59:18, 19) Ni Nyɔŋmɔ mumɔ lɛ baanyɛ ashɛ he fɛɛ he, ebaanyɛ etsu nii eha gbɔmɛi loo etsu nii eshi amɛ.—Lala 139:7-12.
‘Hewalɛ ni Tekeɔ Adesa Nɔ̃’
NYƆŊMƆ mumɔ lɛ hu baanyɛ ni ekɛ “hewalɛ ni fa kɛteke nɔ” aha mɛi ni sɔmɔɔ lɛ lɛ. (2 Korintobii 4:7) Enɛ yeɔ ebuaa amɛ ni amɛnyɛɔ amɛŋmɛɔ amɛtsui shi yɛ amɛhemɔkɛyeli he kaai ashishi aloo ehaa amɛnyɛɔ amɛfeɔ nibii ni kulɛ amɛ diɛŋtsɛ amɛnyɛŋ amɛfee.
Akɛ nɔkwɛmɔ nɔ lɛ, Kojolɔi 14:6 wieɔ Samson he akɛ: “Ni Yehowa mumɔ lɛ bayi enɔ, ni etserɛ emli, tamɔ atserɛɔ abotia bi mli nɔŋŋ, tsɛ ehiɛɛɛ nɔ ko nɔ ko yɛ edɛŋ.” Ani ŋwɛi gbɔmɔ diɛŋtsɛ ko bayi Samson nɔ aloo ebote emli, ni ekudɔ egbɔmɔtso lɛ koni ekɛfee nɔ ni efee lɛ? Dabi, “NUŊTSƆ lɛ mumɔ lɛ [ji nɔ ni] ha Samson he wa.”—TEV.
Biblia lɛ kɛɔ akɛ beni abaptisi Yesu lɛ, mumɔ krɔŋkrɔŋ ba enɔ tamɔ okpo, jeee yɛ gbɔmɔ su mli. (Marko 1:10) Nɛkɛ Nyɔŋmɔ nifeemɔ hewalɛ nɛɛ ye ebua Yesu ni enyɛ etsa helai ni etee gbohii ashi. Taakɛ Luka 5:17 kɛɔ lɛ: “Nuŋtsɔ lɛ [Nyɔŋmɔ] Hewalɛ yɛ [ Yesu] ehewalɛ tsamɔi lɛ asɛɛ.”—JB.
Nyɔŋmɔ mumɔ lɛ hu kɛ hewalɛ ha Yesu kaselɔi lɛ koni amɛfee naakpɛɛ nibii. Bɔfoi lɛ Asaji 2:1-4 kɛɔ akɛ kaselɔi lɛ ebua amɛhe naa yɛ Pentekoste beni “trukaa lɛ gbɛɛmɔ ko ni tamɔ ahum ni tswaa waa jɛ ŋwɛi ba, . . . ni mumɔ krɔŋkrɔŋ bayimɔ amɛ fɛɛ amɛmli obɔbɔ, ni amɛbɔi wiemɔi sɔrɔtoi sɔrɔtoi awiemɔ, taakɛ bɔ ni mumɔ lɛ ŋɔwo amɛnaa lɛ.”
No hewɔ lɛ mumɔ krɔŋkrɔŋ lɛ kɛ hewalɛ ha Yesu kɛ Nyɔŋmɔ tsuji krokomɛi lɛ koni amɛtsu nibii ni kulɛ adesai nyɛŋ amɛtsu lɛ.
Ejeee Gbɔmɔ
ANI Biblia mli kukuji komɛi bɛ ni wieɔ mumɔ krɔŋkrɔŋ lɛ he akɛ gbɔmɔ? Eko yɛ, shi kadimɔ nɔ ni Katolek Nyɔŋmɔjamɔ he nilelɔ Edmund Fortman kɛɔ yɛ enɛ he yɛ wolo, The Triune God lɛ mli: “Eyɛ mli akɛ afɔɔ mumɔ nɛɛ he wiemɔ akɛ gbɔmɔ moŋ, shi etamɔ nɔ ni eyɛ faŋŋ akɛ ŋmalɛi krɔŋkrɔŋi lɛ [ni ji Hebri Ŋmalɛi lɛ] susuuu nɛkɛ mumɔ nɛɛ he loo ewieee he akɛ gbɔmɔ ko ni esoro lɛ kwraa.”
Ejeee nɔ ni ekaaa yɛ Ŋmalɛi lɛ amli akɛ aaawie nɔ ko he tamɔ gbɔmɔ. Awieɔ akɛ nilee po yɛ bii. (Luka 7:35) Atsɛɔ esha kɛ gbele akɛ maŋtsɛmɛi. (Romabii 5:14, 21) The New English Bible (NE) lɛ kɛɔ yɛ 1 Mose 4:7 akɛ: “Esha ji daimonio ni bu shinaa lɛ naa,” ni ekɛ esha miito mumɔ fɔŋ ko ni bu Kain shinaa naa lɛ he. Shi eka shi faŋŋ akɛ esha jeee mumɔŋ gbɔmɔ ko; ni asaŋ mumɔ krɔŋkrɔŋ lɛ ni akɛtoɔ gbɔmɔ he lɛ efeee lɛ gbɔmɔ.
Nakai nɔŋŋ hu, yɛ 1 Yohane 5:6-8 (NE) lɛ, jeee mumɔ lɛ pɛ yeɔ odase, shi akɛɛ “nu lɛ, kɛ la lɛ” hu ji “odasefoi.” Shi eka shi faŋŋ akɛ nu kɛ la jeee gbɔmɛi, ni nakai nɔŋŋ mumɔ krɔŋkrɔŋ lɛ hu jeee gbɔmɔ.
Nɔ ni kɛ enɛ kpaa gbee ji bɔ ni Biblia lɛ kɛ “mumɔ krɔŋkrɔŋ” tsuɔ nii akɛ nɔ ni jeee gbɔmɔ, tamɔ yɛ be mli ni ekɛtoɔ nu kɛ la he lɛ nɛkɛ. (Mateo 3:11; Marko 1:8) Awoɔ hewalɛ ni mumɔ krɔŋkrɔŋ ayimɔ gbɔmɛi amli obɔbɔ moŋ fe wein. (Efesobii 5:18) Awieɔ amɛhe akɛ mumɔ krɔŋkrɔŋ eyimɔ amɛ obɔbɔ tamɔ bɔ ni sui kpakpa tamɔ nilee, hemɔkɛyeli kɛ miishɛɛ eyimɔ amɛ obɔbɔ lɛ. (Bɔfoi lɛ Asaji 6:3; 11:24; 13:52) Ni yɛ 2 Korintobii 6:6 lɛ akɛ mumɔ krɔŋkrɔŋ fataa sui sɔrɔtoi komɛi ahe. Wiemɔi ni tamɔ nɛkɛ efeŋ nɔ ni akɛfɔɔ nitsumɔ kɛ mumɔ krɔŋkrɔŋ lɛ ji gbɔmɔ diɛŋtsɛ.
Agbɛnɛ hu, yɛ be mli ni Biblia ŋmalɛi komɛi tsɔɔ akɛ mumɔ lɛ wieɔ lɛ, ŋmalɛi krokomɛi tsɔɔ akɛ afee enɛ kɛtsɔ adesai loo ŋwɛibɔfoi anɔ. (Mateo 10:19, 20; Bɔfoi lɛ Asaji 4:24, 25; 28:25; Hebribii 2:2) Mumɔ lɛ nifeemɔ yɛ enɛ mli lɛ tamɔ redio hewalɛ ni kɛ wiemɔ tsɔɔ kɔɔyɔɔ mli kɛyahaa mɔ kroko ni yɔɔ shɔŋŋ.
Awieɔ “mumɔ krɔŋkrɔŋ lɛ gbɛi” he yɛ Mateo 28:19. Shi wiemɔ, “gbɛi” lɛ etsɔɔɔ gbɔmɔ gbɛi yɛ be fɛɛ mli yɛ Hela loo Ŋleshi wiemɔ mli. Kɛ wɔkɛɛ, “yɛ mla lɛ gbɛi amli” lɛ, jeee gbɔmɔ ko he wɔwieɔ lɛ. Wɔmiitsɔɔ nɔ ni mla lɛ damɔ shi kɛha, ehewalɛ. Robertson Word Pictures in the New Testament lɛ kɛɔ akɛ: “Gbɛi (onoma) ni akɛtsuɔ nii yɛ biɛ lɛ jeɔ kpo babaoo yɛ Septuagint lɛ kɛ papyri lɛ mli kɛha hewalɛ loo hegbɛ.” No hewɔ lɛ baptisimɔ ‘yɛ mumɔ krɔŋkrɔŋ lɛ gbɛi amli’ lɛ haa ayɔseɔ hewalɛ ni mumɔ lɛ yɔɔ, akɛ ejɛ Nyɔŋmɔ ŋɔɔ ni etsuɔ nii yɛ ŋwɛi suɔmɔnaa nifeemɔ shishi.
“Hefatalɔ” loo Yelikɛbualɔ Lɛ
YESU wie mumɔ krɔŋkrɔŋ lɛ he akɛ “hefatalɔ” loo yelikɛbualɔ, ni ekɛɛ akɛ ebaatsɔɔ nii, ni ekudɔ ni ewie. (Yohane 14:16, 26; 16:13) Hela wiemɔ ni akɛtsu nii akɛ hefatalɔ (pa·raʹkle·tos) loo yelikɛbualɔ ji nɔ ni akɛwieɔ nuu he. No hewɔ lɛ beni Yesu wie nɔ ni hefatalɔ loo yelikɛbualɔ lɛ baafee lɛ he lɛ, ekɛ nuu najiaŋ gbɛi tsu nii. (Yohane 16:7, 8) Yɛ gbɛ kroko nɔ lɛ beni akɛ Hela wiemɔ kɛha mumɔ (pneuʹma) ni damɔɔɔ shi haaa nuu loo yoo tsu nii lɛ ekɛ najiaŋ gbɛi ni damɔɔɔ shi haaa gbɔmɔ tsuɔ nii.
Shishitsɔɔlɔi pii ni heɔ Triniti lɛ amɛyeɔ lɛ kɛ anɔkwa sane nɛɛ teeɔ, taakɛ Katolek New American Bible lɛ kpɛlɛɔ nɔ yɛ Yohane 14:17 he lɛ: “Hela wiemɔ kɛha ‘Mumɔ’ lɛ damɔɔɔ shi haaa nuu loo yoo, ni yɛ be mli ni akɛ Ŋleshi najiaŋ gbɛi tamɔ (‘lɛ’) tsuɔ nii lɛ, Hela MSS [ŋmalɛi ni akɛ niji ŋmala] lɛ babaoo kɛ ‘e’ ni etsɔɔɔ nuu loo yoo lɛ tsuɔ nii.”
No hewɔ lɛ kɛ Biblia lɛ kɛ nuu najiaŋ gbɛi tsu nii kɛha pa·raʹkle·tos yɛ Yohane 16:7, 8 lɛ, eefee nakai yɛ wiemɔ he mla naa shi jeee ni eetsɔɔ tsɔɔmɔ ko.
Ejeee Triniti ko Fa
WOJI sɔrɔtoi pii kpɛlɛɔ nɔ akɛ Biblia lɛ fiii mumɔ krɔŋkrɔŋ ni akɛɛ eji Triniti lɛ mli mɔ ni gbeɔ yi feɔ etɛ lɛ sɛɛ. Akɛ nɔkwɛmɔ nɔ lɛ:
The Catholic Encyclopedia: “He ko he ko bɛ Kpaŋmɔ Momo lɛ mli ni Mɔ ni ji Etɛ jeɔ kpo faŋŋ yɛ mli.”
Katolek Nyɔŋmɔjamɔ he nilelɔ Fortman: “Yudafoi lɛ ebuuu mumɔ lɛ akɛ gbɔmɔ; ni asaŋ odaseyeli ko ni ma shi shiŋŋ bɛ ni tsɔɔ akɛ Kpaŋmɔ Momo lɛ mli niŋmalɔ ko yɛ jwɛŋmɔ ni tamɔ nɛkɛ. . . . Awieɔ Mumɔ Krɔŋkrɔŋ lɛ he yɛ Sanekpakpai lɛ amli kɛ Bɔfoi lɛ Asaji lɛ amli akɛ ŋwɛi hewalɛ.”
New Catholic Encyclopedia lɛ: “Eyɛ faŋŋ akɛ Kpaŋmɔ Momo lɛ enaaa Nyɔŋmɔ mumɔ lɛ akɛ gbɔmɔ . . . Nyɔŋmɔ mumɔ lɛ ji Nyɔŋmɔ hewalɛ kɛkɛ. Kɛji akɛ yɛ bei komɛi amli lɛ akɛdamɔɔ shi akɛ esoro no yɛ Nyɔŋmɔ he lɛ, nɔ hewɔ ji akɛ ejaakɛ Yahweh mumɔ lɛ tsuɔ nii yɛ faŋŋ mli.” Ekɛɔ hu akɛ: “Kpaŋmɔ Hee lɛ mli ŋmalɛi babaoo jieɔ Nyɔŋmɔ mumɔ lɛ kpo akɛ nɔ ko, jeee mɔ ko; anaa enɛ titri yɛ be mli ni akɛ mumɔ lɛ toɔ Nyɔŋmɔ hewalɛ lɛ he lɛ.”—Nɔ ni atsɔmɔ lɛ ji wɔnɔ.
A Catholic Dictionary: “Yɛ fɛɛ mli lɛ, Kpaŋmɔ Hee lɛ kɛ e-Momo lɛ wieɔ mumɔ lɛ he akɛ ŋwɛi hewalɛ loo nyɛmɔ ko.”
No hewɔ lɛ, Yudafoi lɛ kɛ mra be mli Kristofoi lɛ fɛɛ susuuu mumɔ krɔŋkrɔŋ lɛ he akɛ Triniti ko fa. Nakai tsɔɔmɔ lɛ ba afii ohai abɔ sɛɛ. Taakɛ A Catholic Dictionary lɛ wieɔ he lɛ: “Ama Mɔ ni ji etɛ lɛ nɔ mi yɛ Alexandria Gwabɔɔ lɛ shishi yɛ 362 . . . ni yɛ naagbee lɛ Konstantinopol Gwabɔɔ lɛ ma nɔ mi yɛ 381”—beni mumɔ krɔŋkrɔŋ lɛ eba kaselɔi lɛ anɔ yɛ Pentekoste lɛ sɛɛ afii ohai etɛ kɛ fa!
Dabi, mumɔ krɔŋkrɔŋ lɛ jeee gbɔmɔ, ni ejeee Triniti ko fa. Mumɔ krɔŋkrɔŋ lɛ ji Nyɔŋmɔ nifeemɔ hewalɛ ni ekɛtsuɔ esuɔmɔnaa nifeemɔ he nii. Ekɛ Nyɔŋmɔ yeee egbɔ shi moŋ ekɛtsuɔ nii yɛ be fɛɛ mli ni eyɛ eshishi.
[Wiemɔ ni akɔ ni akɛmiitsu nii ni yɔɔ baafa 22]
“Yɛ fɛɛ mli lɛ, taakɛ Kpaŋmɔ Momo lɛ feɔ lɛ, Kpaŋmɔ Hee lɛ wieɔ mumɔ lɛ he akɛ ŋwɛi hewalɛ.”—A Catholic Dictionary
[Mfonirii ni yɔɔ baafa 21]
Be ko lɛ mumɔ krɔŋkrɔŋ lɛ pue tamɔ okpo. Yɛ be kroko hu lɛ epue tamɔ lalilɛii—shi jeee akɛ gbɔmɔ yɛ be ko mli