“Maŋtsɛyeli Lɛ Naa Samfei” Lɛ Kɛ “Asafo Babaoo” Lɛ
1. Akɛni yɛ naagbee lɛ Filipo fa eyahi Kaisarea hewɔ lɛ, mɛɛ sanebimɔi teɔ shi ni kɔɔ lɛ kɛ afi afi 36 Ŋ.B. he?
1 NƆKO ni akadi yɛ Kristofoi ayinɔsane mli ba yɛ Kaisarea yɛ Mediterranean Ŋshɔ lɛ bokagbɛ yɛ afi 36 Ŋ.B. Kɛji Filipo sanekpakpa shiɛlɔ lɛ eyahi jɛi yɛ nakai afi lɛ mli lɛ, no lɛ wɔleee. Kɛji eyahi jɛi lɛ, belɛ mɛni hewɔ akɛ Iɛ tsuuu nii yɛ Italia asraafoi aku ni yɔɔ jɛmɛ lɛ asafoiatsɛ lɛ he lɛ? Filipo tsɔ bɔfo Petro hiɛ yɛ Kristofoi anitsumɔ mli yɛ Samaria, nohewɔ lɛ mɛni hewɔ agbɛnɛ jeee yɛ Kaisarea hu yɛ afi 36 Ŋ.B. lɛ? Ŋmalɛi lɛ ni jɛ mumɔ mli lɛ haa wɔ hetoo.
2. Mɛɛ be mli agu Mose Mla kpaŋmɔ lɛ, shi kɛlɛ atee nɔ akɛ hegbɛ krɛdɛɛ ko ha Yudafoi ni afoamɛ ketia lɛ kɛyashi mɛɛ be?
2 Adamɔ Yesu Kristo, Abraham kɛ Maŋtsɛ David seshinyo lɛ sɛŋmɔ lɛ nɔ afo Mla kpaŋmɔ ni Mose damɔ mli ha Yehowa Nyɔŋmɔ kɛ Israel yɛ Sinai Gɔŋ lɛ nɔ yɛ Arabia lɛ mli. Enɛ feɔ afii etɛ kɛ fã kɛjɛ be mli ni abaptisi lɛ yɛ nu mli ni akɛ mumɔ fɔ Yesu mu yɛ afi 29 Ŋ.B. lɛ. Kɛ̃lɛ Yehowa tee nɔ ekɛ hegbɛ titri ko ha heloo naa Yudafoi kɛ Samariabii lɛ hu yɛ nɛkɛ be nɛɛ mli afii etɛ kɛ fa kroko, koni eha gbalɛ ni yɔɔ Daniel 9:24-27a lɛ aba mli. Nɛkɛ “otsi” aloo be ni feɔ afii kpawo nɛɛ ba naagbee yɛ nyɔɔŋtsere nyɔɔŋ ni ji kpawo (Tishri) lɛ nɔ yɛ afi 36 Ŋ.B. Kɛjɛ nakai be lɛ nɔ kɛbaa lɛ agbɛnɛ abaabu Israelbii ni ji Abraham seshibii lɛ akɛ amɛkɛ Jeŋmajianɔbii ni jeee Yudafoi ni amɛfoko ketia lɛ yeɔ egbɔ yɛ mumɔŋ. Yɛ no sɛɛ lɛ Abraham Nyɔŋmɔ lɛ kɛ hegbɛ titri ko haŋ Yudafoi lɛ dɔŋŋ! Mɛɛ gbɛ nɔ atsɔ afee enɛ he nɔkwɛmɔnɔ yɛ afi 36 Ŋ.B.?
3. (a) Nɛgbɛ bɔfo Petro yɔɔ yɛ nɛkɛ be nɛɛ mli, ni mɛni hewɔ? (b) Mɛni hewɔ Yudafoi Kristofoi ni yɔɔ Yerusalem ni afoamɛ ketia lɛ wie Petro hiɛ yɛ enifeemɔ ni yɔɔ sɔrɔto aloo ekaaa Iɛ hewɔ?
3 Aaafee nɛkɛ be nɛɛ mli, kɛtsɔ nɔko ni he hiaa waa ni Kristofoi asafo lɛ ni yɔɔ Yopa ŋshɔ naa maŋ lɛ mli lɛ bi hewɔ lɛ, Petro eba jɛmɛ ni ébatee Yudayoo Kristofonyo ejurɔfeelɔ Dorka ni gbo lɛ shi. Jɛmɛ ekɛ Simon, wolokpoolɔ lɛ hi gbii fioo ko yɛ. (Bɔf. 9:36-43) Yɛ nɛkɛ be nɛɛ mli lɛ asumɔɔɔ akɛ Jeŋmaŋnyo ko ni efoko ketia kɛ Yudanyo bɔɔ naanyo, tamɔ bɔ pɛ ni eji anɔkwale yɛ mɔni ashwielɛ kɛjɛ Nyɔŋmɔ webii asafo lɛ mli lɛ he lɛ. (Mat. 18:17) Nohewɔ lɛ, kɛbashi nɛkɛ be nɛɛ mli lɛ, Yudanyo Kristofonyo Petro ejɛko lɛdiɛŋtsɛ esuɔmɔ mli eboteko Jeŋmaŋnyo ko ni afokolɛ ketia shia da. (Eka shi faŋŋ akɛ enɛ hu ji anɔkwale yɛ sanekpakpa shiɛlɔ Filipo gbɛfaŋ.) Nohewɔ lɛ beni yɛ sɛɛ mli lɛ Yudafoi Kristofoi ni afoamɛ ketia ni yɔɔ Yerusalem lɛ nu akɛ Petro etee Jeŋmaŋnyo ko shia lɛ, amɛwie ehiɛ amɛkɛɛ “otee hii folɔi aŋɔɔ ni okɛamɛ yaye nii.”—Bɔf. 11:3.
4. Mɛɛ gbɛ Yudanyo bɔfo Petro Kristofonyo lɛ tsɔ nɔ etsɔɔ ehenumɔi sɔrɔtoi lɛ amli yɛ be mli ni etee Jeŋmajiaŋbii ashia yɛ Kaisarea lɛ?
4 Petro po, ni yɛ nakai be lɛ mli lɛ efee Kristofonyo bɔfo afii pii lɛ kɛɛ shiatsɛ lɛ ni eshashaoɔ shi akɛ eeebote eshia lɛ yɛ Kaisarea lɛ akɛ: “Nyɛdiɛŋtsɛ nyɛle bɔni Yudanyo bɛ hegbɛ akɛ ekɛ mɔko ni ji maŋ kroko nɔ nyo bɔɔ aloo obaa eŋɔɔ.” Abuɔ Jeŋmajiaŋbii lɛ akɛ amɛhe tseee aloo mɛi ni amɛbule amɛhe
5, 6. Mɛɛ anɔkwa saji Petro kɛmamɔ shi ni ekɛjie enaa yɛ ehiɛ ni awie yɛ enifeemɔ yɛ Kaisarea lɛ hewɔ?
5 Beni afee ni ejie enaa lɛ, ehe bahia ni Petro atsɔɔ anɔkwa sane lɛ ni kɔɔ enɛ he lɛ mli faŋŋ etsɔɔ bɔfoi lɛ kɛ Yudafoi Kristofoi krokomɛi ni afoamɛ ketia ni yɔɔ Yerusalem lɛ. Mɛni ji anɔkwalei ni kɔɔ enɛ he lɛ? Enɛɛmɛi: Ákɛ jeee Petro diɛŋtsɛ jɛ esuɔmɔ mli eto gbɛjianɔ efee nii nɛɛ. Efee enɛ ni ekɛfee toiboo eha Yehowa Nyɔŋmɔ.
6 Beni Petro yɔɔ Simon wolokpoolɔ lɛ shia yɛ Yopa lɛ, Nyɔŋmɔ tsu ninaa ko kɛba Petro ŋɔɔ koni ebatsɔɔlɛ nɔni Nyɔŋmɔ etsuu he agbɛnɛ lɛ koni Petro akatsɛ́ nomɛi akɛ nibii ni he tseee. Kɛkɛ ni hii etɛ ni Italia asraafoi lɛ anɔ asafoiatsɛ Kornelio ni jɛ Kaisarea tsuamɛ lɛ bashɛ shia lɛ naa ni amɛbi Petro shi. Agbɛnɛ Nyɔŋmɔ kɛɛ Yudanyo Kristofonyo bɔfo nɛɛ akɛ ekɛamɛ aya, “ni okaje ŋwane ko, ejaakɛ mi mitsuamɛ.” Yudafoi Kristofoi ni afoamɛ ketia ni yɔɔ Yopa asafo lɛ mli lɛ ateŋ mɛi ekpaa kɛ Petro tee Kaisarea ŋshɔ naa maŋ lɛ mli. Enɔ jetsɛremɔ lɛ, beni amɛbote jeŋmaŋnyo asafoiatsɛ Kornelio shia lɛ, etsɔɔ mli akɛ Nyɔŋmɔ bɔfo ejie ehe kpo etsɔɔ lɛ ni ekɛɛ lɛ akɛ etsu ni ayatsɛ Petro yɛ Yopa kɛba, “lɛ eeeba kɛɛo wiemɔi ni aaatsɔ nɔ ahere okɛ owe lɛ fɛɛ yiwala.”—Bɔf. 10:1-3; 11:14.
7. Nɛgbɛ Petro kɛ ewiemɔ lɛ yashɛ yɛ Italia asraafonyo asafoiatsɛ Kornelio ni ji Jeŋmaŋnyo lɛ shia?
7 Petro tee nɔ ejaje sane lɛ ni kɔɔ Yesu Kristo shikpɔŋ nɔ sɔɔmɔ nitsumɔ lɛ he, kɛ egbele kɛ eshitee kɛmiijɛ gbohii ateŋ kɛtsɔ Nyɔŋmɔ hewalɛ kpele lɛ nɔ lɛ etsɔɔ ni eleee nɔni baajɛ mli aba. Petro tee shɔŋŋ yɛ ewiemɔ nɛɛ mli kɛyashi be mli ni ekɛɛ akɛ: “Lɛ ji mɔni Nyɔŋmɔ efa eto hiɛkalɔi kɛ gbohii akojolɔ lɛ. Lɛ ehe odase gbalɔi lɛ fɛɛ yeɔ, akɛ mɔfɛɛmɔ ni heɔ enɔ yeɔ lɛ aaana ehe eshaifaa yɛ egbɛi lɛ ahewɔ.”—Bɔf. 10:34-43.
8. Beni Petro wieɔ lɛ, mɛɛ odase Nyɔŋmɔ ye ni tsɔɔ akɛ agbɛnɛ eeŋɔ Jeŋmajiaŋbii ni heɔ yeɔ ni afokoamɛ ketia lɛ kɛmiiba emɛi ni akɛ mumuɔ efɔamɛ lɛ asafo lɛ mli?
8 Biɛ Yehowa Nyɔŋmɔ ye odase etsɔɔ yɛ akɛ agbɛnɛ eeŋmɛ Jeŋmajiaŋbii ni heɔ yeɔ lɛ agbɛ ni amɛbote Kristofoi ni akɛ mumɔ efɔamɛ lɛ asafo lɛ mli, tsɛ, afokoamɛ ketia, ejaakɛ wɔkaneɔ akɛ: “Beni Petro wieɔ nɛkɛ wiemɔ nɛɛ lolo lɛ, mumɔ krɔŋkrɔŋ lɛ ba mɛi fɛɛ ni nuɔ wiemɔ lɛ nɔ. Ni heyelilɔi ni jɛ ketiafoo lɛ mli ni kɛ Petro ba lɛ anaa kpɛ amɛhe akɛ afɔse mumɔ krɔŋkrɔŋ nɔkeenɔ lɛ ashwie Jeŋmajiaŋbii hu anɔ; ejaakɛ amɛnu akɛ amɛmiiwie maŋsɛɛ wiemɔi sɔrɔtoi ni amɛmiijie Nyɔŋmɔ yi.”—Bɔf. 10:44-46.
9. Mɛɛ bɛ Petro tsɔ nɔ etsɔɔ mumɔ krɔŋkrɔŋ lɛ nifeemɔ ni ba yɛ Kaisarea lɛ mli beni etsɔɔ nɔni ba lɛ mli yɛ Yerusalem lɛ, ni ekɛto mɛni he?
9 Beni Petro diɛŋtsɛ tsɔɔ nɔni tee nɔ nɛɛ mli yɛ Yerusalem lɛ, ekɛɛ akɛ: “Shi beni mibɔi wiemɔ lɛ, mumɔ krɔŋkrɔŋ lɛ bayi amɛnɔ, tamɔ bɔni eyi wɔ hu wɔ nɔ tsutsu lɛ [yɛ Pentekosto 33 Ŋ.B.]. Ni mikae Nuntsɔ lɛ wiemɔ lɛ ni ekɛɛ akɛ: Yohane lɛ ekɛ nu baptisi, shi nyɛ lɛ aaabaptisinyɛ yɛ mumɔ krɔŋkrɔŋ mli lɛ. Agbɛnɛ kɛ Nyɔŋmɔ ehaamɛ nakai nɔkeenɔ lɛ nɔŋŋ ni eha wɔ ni wɔheɔ Nuntsɔ Yesu Kristo lɛ nɔ wɔyeɔ lɛ hu lɛ: mi lɛ, namɔ ji mi ni manyɛ Nyɔŋmɔ naa matsi?”—Bɔf. 11:15-17.
10. Mɛni Petro fa akɛ afee nɛkɛ Jeŋmajiaŋbii ni amɛfoko ketia nɛɛ, ni mɛni hewɔ?
10 Nohewɔ lɛ mɛni Petro fee agbɛnɛ? “Kɛkɛ ni Petro here nɔ akɛ: Ani mɔko [Yudafoi Kristofoi ekpaa ni fata Petro he kɛtee lɛ] aaanyɛ nu naa atsi, ni akabaptisi mɛnɛɛmɛi ni na mumɔ krɔŋkrɔŋ lɛ tamɔ wɔ [Yudafoi ni afoamɛ ketia] nɔŋŋ lɛ? Ni efa akɛ abaptisiamɛ yɛ Nuntsɔ lɛ gbɛi lɛ amli.”—Bɔf. 10:46-48.
11. (a) Kɛjɛ nakai be lɛ nɔ kɛyaa lɛ, agbɛnɛ Jeŋmajiaŋbii ni ji heyelilɔi ni akɛ mumɔ efɔamɛ lɛ yɛ hegbɛ akɛ amɛtsuɔ mɛni? Mɛni hewɔ? (b) Mɛɛ gbɛ nɔ mumɔ krɔŋkrɔŋ lɛ nifeemɔ lɛ bafee nifeemɔ kometoo lɛ nɔŋŋ yɛ shii etɛ ni ekɛ kuui sɔrɔtoi etɛ lɛ ye lɛ mli?
11 Nohewɔ lɛ “Nyɔŋmɔ basara jeŋmaji [ni efoko ketia] lɛ tsutsu ko ni ehala amɛteŋ maŋ ko eha egbɛi lɛ.” (Bɔf. 15:14) Nɛkɛ be nɛɛ mli, yɛ asafoiatsɛ Kornelio ni efoko ketia ni yɔɔ Kaisarea lɛ shia, Petro kɛ “ŋwɛi maŋtsɛyeli lɛ naa samfei” lɛ kroko ni ji samfee ni ji etɛ lɛ tsu nii. Kɛjɛ nakai be lɛ nɔ kɛyaa lɛ Yesu kaselɔi ni akɛ mumɔ efɔamɛ mu lɛ baanyɛ afee ehe odasefoi “kɛyashi shikpɔŋ lɛ naagbeehei lɛ.” (Bɔf. 1:8) Nɔni Nyɔŋmɔ etsɔ samfee-hiɛlɔ Petro nɔ egbele naa lɛ naa baayanɔ aka shi kɛha jeŋ fɛɛ odaseyeli. Yɛ enɛ kɛ gbee kpamɔ naa lɛ, Nyɔŋmɔ mumɔ krɔŋkrɔŋ lɛ ‘bayimɔ’ (Hela: epipípto) heyelilɔi akuui sɔrɔtoi etɛ nɔ, (1) eba kaselɔi 120 ni abaptisiamɛ lɛ anɔ, no sɛɛ lɛ aaafee Yudafoi 3,000 ni amɛtsake amɛtsui, fɛɛ yɛ Yerusalem yɛ afi 33 Ŋ.B.; (2) yɛ Samariabii ni abaptisiamɛ lɛ anɔ, shi yɛ beni bɔfo Petro kɛ Yohane eha ni áamɛbatsu amɛhe nii da; kɛ (3) yɛ Jeŋmajiaŋbii ni heɔ yeɔ ni bua amɛhe naa yɛ Kornelio shia yɛ Kaisarea, yɛ afi 36 Ŋ.B. mli Iɛ anɔ.—Bɔf. 1: 15; 2:1-4, 38, 41; 8:15-17; 10: 44, 45; 11:15, 16.
GBƐ NI AGBELE AHA “ASAFO BABAOO” LƐ
12. Kɛjɛ nakai be lɛ nɔ kɛbaa lɛ, Yehowa miijie mɛɛ kuu kɛmiijɛ namɛi ateŋ?
12 Kɛje nakai afii ohai abɔ lɛ amli kɛbaa nɛɛ, Yehowa miihala gbɔmɛi “eha egbɛi lɛ” kɛmiijɛ Yudafoi ni afoamɛ ketia, Samariabii ni afoamɛ ketia kɛ Jeŋmajiaŋbii ni amɛfoko ketia lɛ ateŋ. (Amos 9:12) Nɛkɛ gbɔmɛi nɛɛ ni yɔɔ kɛha Yehowa gbɛi lɛ ayibɔ baafee 144,000 pɛ, ni amɛkɛ Yesu baafee ekome yɛ eŋwɛi maŋtsɛyeli lɛ mli.—Kpoj. 7:4-8; 14:1-4.
13. Mɛni Food for thinking Christians kɛ The Divine Plan of the Ages woji lɛ tsɔɔ yɛ adebɔɔ su kɛ yiwalaheremɔi sɔrɔtoi ni kɔɔ he lɛ he?
13 Afi 1881 September mli afee Buu Mɔɔ wolo ni atsɛɔlɛ Food for Thinking Christians lɛ. Yɛ sɛɛ mli, yɛ afi 1886 mli Iɛ, afee wolo ni ji The Divine Plan of the Ages lɛ. Nɛkɛ woji enyɔ nɛɛ tsɔɔ akɛ sɔrɔtofeemɔ yɛ mumɔŋ gbomɔtso lɛ kɛ adesa aloo shikpɔŋ nɔ gbɔmɔtso lɛ mli. Nohewɔ lɛ mɛi ni akɛ mumɔ efɔamɛ lɛ ni ji 144,000 lɛ asafo lɛ yiwalaheremɔ kɛmiiya ŋwɛi lɛ baafee sɔrɔto yɛ adesai ni ákpɔ̃amɛ kɛmiiya wala yɛ shikpɔŋ nɔ paradeiso lɛ mli lɛ nɔ̃ lɛ he. Shi kɛ̃lɛ, Yesu Kristo kpɔmɔ afɔle lɛ nɔ abaadamɔ akɛ yiwalaheremɔi lɛ fɛɛ aha.
14. Mɛni nɔ mi maŋshiɛmɔ ni akɛha yɛ Los Angeles, California, yɛ Hɔgbaa, February 24, 1918 lɛ ma?
14 Yɛ February 24, 1918, yɛ be mli ni Jeŋ Fɛɛ Ta I lɛ yaa nɔ lɛ, J. F. Rutherford, ákɛ Buu Mɔɔ Biblia Asafo lɛ nɔkwɛlɔ lɛ ha maŋshiɛmɔ ko yɛ Los Angeles, California, U.S.A. Wiemɔ lɛ yitso ji, ‘Ekolɛ Gbɔmɛi Akpekpei Abɔ Ni Yɔɔ Wala Mli Ŋmɛnɛ lɛ Gboiŋ Dɔŋŋ.’ Jeŋ Ta I lɛ sɛɛ pɛ ni akɛ nɛkɛ sane ni hosoɔ mɔ nɛɛ mli wiemɔi lɛ fee wolo. Sane ni akɛha nɛɛ ma nɔ mi akɛ gbɔmɛi ni feɔ jalɛnii baahi shikpɔŋ lɛ nɔ ni abaabaa amɛyi kɛtsɔ Nyɔŋmɔ mlifu gbi ni baa lɛ mli. Amɛbaaje mli kɛbote Nyɔŋmɔ gbɛjianɔtoo hee lɛ mli ni amɛna hegbɛ akɛ mɛi ni gboiŋ dɔŋŋ kɛjɛŋ shikpɔŋ ni atsakelɛ afeelɛ paradeiso lɛ nɔ.
15. Mɛni ji nɔni wiemɔ ni aha yɛ 1923 yɛ Los Angeles, ni kɔɔ abɛbua ni kɔɔ gwantɛŋi kɛ abotiai lɛ ahe lɛ kɛma shi?
15 Yɛ Los Angeles nɔŋŋ ekoŋŋ, yɛ afi 1923 mli lɛ, afee kpee ko yɛ jɛmɛ ni Asafo lɛ nɔkwɛlɔ lɛ kɛ wiemɔ ko ni kɔɔ Yesu abɛbua ni kɔɔ gwantɛŋi kɛ abotiai ahe lɛ ha. Etsɔ Ŋmalɛi lɛ anɔ ekɛ anɔkwale lɛ ma shi faŋŋ akɛ mfoniri feemɔ mli “gwantɛŋi” ni yɔɔ abɛbua nɛɛ mli lɛ ji mɛi ni amrɔ nɛɛ, yɛ nɛkɛ “naagbee be” nɛɛ mli lɛ, amɛfeɔ Yesu mumɔŋ nyɛmimɛi aloo ‘mɛi ni afɔamɛ ehee’ nɛɛ ejurɔ yɛ gbɛi sɔrɔtoi anɔ lɛ. Nyɔmɔwoo ni mɛi ni feɔ ekpakpa nɛɛ anine baashɛ nɔ ji amɛyi ni abaabaa kɛtsɔ Harmagedon ta ni baa lɛ mli, ni “gbɔmɔbi” ni awo ehi nyam, ŋwɛi Maŋtsɛ Yesu Kristo lɛ kɛamɛ baaya shikpɔŋ ni enɔyeli afii akpe lɛ baaye nɔ lɛ nɔ. (Mat. 25:31-46) Enɛ ha gbɔmɛi pii ni tamɔ gwantɛŋi ni fee Kristo “nyɛmimɛi” lɛ ekpakpa tamɔ Iɛ moŋ amɛfeɔ amɛhaa lɛ ná shikpɔŋ nɔ shihilɛ he hiɛnɔkamɔ babaoo.
16, 17. Beni saji ni kɔɔ Biblia mli shishinumɔ ni etee hiɛ fe fɛɛ nɛɛ ba yɛ afii 12 sɛɛ lɛ, mɛni hewɔ enɛ jeee be ko kɛkɛ ni eba lɛ?
16 Shi, Biblia mli shishinumɔ ni yaa hiɛ nɛɛ yashɛ heni kwɔ fe fɛɛ yɛ afii 12 sɛɛ. Enɛ ebafeee adesa yinɔsane mli be flo ko kɛkɛ. No mli lɛ fimɔ be ni fe fɛɛ lɛ ebote afi ni ji ekpaa kɛjɛ be mli ni eje shishi lɛ mli. Roma Katolek “Afi Krɔŋkrɔŋ” ni ji afi 1933 lɛ nyɛɛɛ ekɛ “toiŋjɔlɛ kɛ shweshweeshwe shihilɛ” ni ewo shi yɛ he aba. Akɛni bei loo naataamɔ ebaka ekɛ Etiopia Maŋtsɛyeli lɛ teŋ hewɔ lɛ, Fasist Italia miisaa ehe kɛha tawuu, kɛkɛ ni October 3, 1935 lɛ, Italia asraafoi yatutua Maŋtsɛyeli lɛ. Adolf Hitler ena afii etɛ kɛjɛ be mli ni ebatsɔ nɔyelɔ yiwalɔ yɛ Germane lɛ, ni ekɛ sɛkɛyeli miiwa Yehowa Odasefoi ayi. Atsɔ woji ni tamɔ telegram ohai abɔ ni afee kɛjɛ shikpɔŋ nɔ hefɛɛhe lɛ anɔ abɔlɛ kɔkɔ yɛ October 7, 1934 akɛ, kɛji akɛ ekpaaa amɛ yiwaa lɛ, Yehowa baakpata lɛ kɛ e-Nazi kuu lɛ hiɛ. Shi etee nɔ tamɔ abotia etswa efai shi akɛ ebaabule nɛkɛ “kooloi ashwiei” ni ji Kristofoi ni kɛ amɛhe wooo maŋkwramɔ saji amli nɛɛ ashishi kɛjɛ Germane Nɔyeli lɛ mli.
17 Yɛ afi 1935 mli lɛ, no mli lɛ Amerika Maŋsɔɔlɔ Nukpa, Franklin D. Roosevelt kɛ naagbai miikpe yɛ gbɛjianɔtoo ko ni lɛdiɛŋtsɛ ekɛba ni ji NRA (National Recovery Administration) lɛ hewɔ, ni maŋ lɛ nɔyeli lɛ miiŋmɛɛ saji ahe yɛ nɔnyɛɛ ni Catholic Action (Katolek Nifeemɔ Kuu) lɛ kɛba amɛnɔ lɛ hewɔ. No mli lɛ Soviet Rusia yɛ “yiwalɔ” Stalin nɔyeli shishi. Ni Japan ni nyaa Maŋtsɛmɛi anɔyeli he lɛ ni teɔ shi woɔ Komunist Nɔyeli lɛ miihe ɛkɛ ehe awo Tripartite Pact ni ji mɔji sɔrɔtoi etɛ akpaŋmɔ lɛ mli, ni amɛji Fasist Italia kɛ Nasi Germane, koni amɛfee ekomefeemɔ nɔyeli hewalɛ. Aato gbɛjianɔ ni aje Jeŋ Ta II shishi!
18. Nɛgbɛ Yehowa Odasefoi fee kpee yɛ yɛ 1935 agbiɛnaa be mli, ni mɛni ji maŋshiɛmɔ lɛ yitso?
18 Eyɛ mli akɛ nibii amli ewa kɛha nɔyelii fɛɛ ni yɔɔ je lɛŋ hefɛɛhe lɛ yɛ amɛsaji amli yɛ 1935 mli moŋ, shi ebafee miishɛɛ be kpele kɛha Yehowa Odasefoi. Amɛfee kpee yɛ Amerika maŋtiase ni amɛnɔyeli lɛ yɔɔ jɛmɛ lɛ mli, ni ji Washington, D.C., kɛjɛ May 30 kɛyashi June 3. Maŋshiɛmɔ ni aha yɛ Hɔgbaa June 2 lɛ yitso ji “Nɔyeli,” ni atsɔ radio no aha enɛ shɛ Ŋleshi Ablotsiri, Europa, Afrika kɛ ŋshɔ mli ŋshɔkpɔi anɔ.—Kwɛmɔ The Golden Age, ni afee yɛ August 29, 1935 lɛ mli.
19. Mɛɛ kuu mlibii abayoo amɛ yɛ faŋŋ yɛ Sohaa shwane, May 31, ni mɛni baafee nɛkɛ kuu nɛɛ niiashikpamɔ ni kɔɔ “amanehulu kpeteŋkpele” lɛ he?
19 Dani enɛ baaba lɛ, yɛ Sohaa shwane, May 31 lɛ, akɛ wiemɔ ko ni mliwa waa ni kanyaa mɛi fɛɛ ni amɛba kpee lɛ shishi lɛ ha. Bɔni ehe hiaa ha hewɔ lɛ, atsɔ radio nitsumɔhei sɔrɔtoi enyɔ nɔ ashiɛ wiemɔ nɛɛ atsɔɔ yɛ be kometoo lɛ nɔŋŋ mli. Aje gbɛ afɔ nine atsɛ mɛi ni tamɔ gwantɛŋi ni yɔɔ naanɔ wala yɛ paradeiso shikpɔŋ nɔ lɛ he miishɛɛ lɛ nine ni amɛba nɛkɛ kpee nɛɛ shishi. Wiemɔ lɛ yitso, ni kɛbashi nakai be lɛ mli lɛ anuu shishi jogbaŋŋ, ni ji “asafo babaoo” ni bɔfo Yohane na yɛ ninaa ni akɛhalɛ lɛ mli taakɛ eyɔɔ Kpojiemɔ 7:9-17 lɛ gbala mɛi ni amɛba kpee lɛ shishi lɛ fɛɛ ajwɛŋmɔ. Toibolɔi ni ana amɛ kɛ mɛi ni anaaa amɛ lɛ bayoo mɛi ni nɛkɛ “asafo babaoo” nɛɛ mlibii lɛ ji yɛ faŋŋ mli. Amɛjeee mɛi ni miiya ŋwɛi, Kristofoi akuu ni ‘afɔamɛ ehee.’ Amɛji shikpɔŋ nɔ “gwantɛŋi” akuu ni yɔɔ Yesu abɛbua ni aŋma afɔ shi yɛ Mateo 25:31-46 lɛ mli lɛ. Amɛnaa wala yɛ shikpɔŋ nɔ ni nɛkɛ gbɛ nɔ amɛtsɔɔ ni ‘amɛjeɔ amanehulu kpeteŋkpele lɛ mli lɛ.’—Kpoj. 7:14.
20. Mɛni ji nɔni ehe hiaa akɛ mɛi ni sumɔɔ akɛ amɛaafee “asafo babaoo” Iɛ mlibii lɛ afee ni be mli ni ámɛye enɛ he odase yɛ mɛi pii ahiɛ lɛ, mɛni ji nɔni esaaa akɛ amɛkpaa mumɔ lɛ gbɛ akɛ eeefee?
20 Mɛnɛɛmɛi baa gbɛnaanii ni ji Yehowa Tookwɛlɔ Kpakpa, Yesu Kristo ni amɛkɛ amɛhe aaawo eshishi lɛ shishi. Amɛtsɔɔ nɔni esa akɛ amɛfee lɛ kɛtsɔɔ ‘amɛhe krɔŋkrɔŋ ni amɛfeɔ,’ aloo amɛhe nɔ ni amɛjɔɔ amɛhaa Yehowa kɛtsɔɔ Kristo nɔ lɛ nɔ. Yɛ Ŋmalɛ lɛ naa lɛ, esani atsɔ nu mli baptisimɔ yɛ Tsɛ lɛ, Bi lɛ, kɛ mumɔ krɔŋkrɔŋ lɛ gbɛi anɔ aye nɛkɛ henɔjɔɔmɔ nɛɛ he odase. (Mat. 28:19, 20) Nohewɔ lɛ kɛji akɛ mɛikomɛi miisumɔ ni amɛfee “asafo babaoo” lɛ mlibii lɛ, belɛ nɔni esa akɛ amɛfeɔ ji amɛjɔɔ amɛhe nɔ bianɛ ni amɛkɛ nu mli baptisimɔ afee amɛ henɔjɔɔmɔ nɛɛ he okadi. (The Watchtower, August 15, 1934, p. 250, par. 34) Akpaaa gbɛ akɛ yɛ amɛ baptisimɔ lɛ sɛɛ lɛ, Nyɔŋmɔ mumɔ lɛ ‘baayimɔ’ amɛnɔ ni efɔamɛ kɛya ŋwɛi wala ni amɛtaooo lɛ mli.
21. Yɛ nɔni ejie kpo atsɔɔ nɛɛ hewɔ lɛ, ekanya gbɔmɛi ohai babaoo yɛ gbi ni nyiɛ sɛɛ Iɛ nɔ ni no ha amɛfee mɛni ni mɛɛ “tooi kuu” mli amɛta yuu kɛba?
21 Nɔni ajielɛ kpo nɛɛ kanyaa mɔ waa, titri lɛ nakai eji kɛha mɛi ni tamɔ gwantɛŋi lɛ ni miishwe akɛ amɛaanu gbɛhe mli ni amɛyɔɔ yɛ Yehowa gbɛjianɔtoo lɛ mli lɛ shishi jogbaŋŋ lɛ. Nohewɔ lɛ “asafo babaoo” lɛ ni amɛyoo amɛ lɛ woamɛ hewalɛ waa kɛha nitsumɔ. Yɛ gbi ni nyiɛ sɛɛ lɛ nɔ lɛ, yɛ Hɔɔ, June 1, ji be ni ato he gbɛjianɔ ni akɛ nu mli baptisimɔ he gbɛ aha. Mɛi ni amɛyibɔ shɛɔ 840 ni amɛkɛ amɛhe ha kɛha enɛ feemɔ lɛ ná miishɛɛ babaoo, ejaakɛ amɛteŋ mɛi pii ji mɛi ni amiiamɛ nu kɛ hiɛnɔkamɔ akɛ Yehowa aaabuamɛ akɛ amɛfata “asafo babaoo” lɛ he. Ebafee baptisimɔ be ni eko bako nakai da. Etamɔ nɔni agbele agbo wulu ko naa, ni mɛi babaoo miiho yuu kɛmiitsɔ mli koni amɛyajaje wekukpaa ni ka amɛkɛ Yehowa teŋ lɛ amɛtsɔɔ yɛ faŋŋ mli, ni amɛbote Tookwɛlɔ Kpakpa lɛ “kuu kome” lɛ mli, ni amɛyafata ehe akɛ emumɔŋ “nyɛmimɛi.”—Yoh. 10:16; Mat. 25:34.
22. (a) Mɛɛ “samfee” akɛtsu nii nɛɛ, ni mɛni jɛ mli ba? (b) Mɛɛ nɔyeli agbala amɛjwɛŋmɔ kɛba nɔ yɛ bi ni nyiɛ sɛɛ lɛ nɔ, ni amɛgbɛfaŋnɔ ji akɛ amɛjie yi akɛ eji mɛni?
22 Etamɔ nɔni “tsulɔ anɔkwafo kɛ nilelɔ” kuu lɛ kɛ “nilee lɛ naa samfee” (Mat. 24:45-47; Luka 11:52) etsu nii ni amɛgbele shinaa lɛ naa amɛha mɛi ni baafee “asafo babaoo” lɛ mlibii lɛ koni amɛbote hegbɛi sɔrɔtoi ni yɔɔ naakpɛɛ nɛɛ amli. Hegbɛi ni tamɔ nɛkɛ ni amɛaamɔ mli lɛ baaha amɛje “amanehulu kpeteŋkpele” lɛ mli ni amɛyabote shikpɔŋ ni nɔ tse lɛ nɔ yɛ ejeŋ nɔyeli hee ni yɔɔ Kristo shishi lɛ mli. Agbala amɛjwɛŋmɔ kɛba nakai nɔyeli lɛ nɔ yɛ gbi ni nyiɛ sɛɛ lɛ nɔ kɛtsɔ maŋshiɛmɔ ko ni eyitso ji “Nɔyeli” ni eji wiemɔ ko ni akɛto shihilɛ ni yɔɔ nakai be lɛ mli je lɛ mli lɛ he. Wiemɔ lɛ tsɔ hiɛ ebɔ hiɛkpatamɔ ni baa shikpɔŋ nɔ nɔyelii fɛɛ ni gbɔmɛi ni yɔɔ je lɛ mli lɛ to lɛ anɔ yɛ Nyɔŋmɔ ta ni ji Harmagedon mli lɛ he kɔkɔ etsɔɔ gbɔmɛi babaoo ni anaa amɛ kɛ mɛi babaoo diɛŋtsɛ ni fa fe nakai ni anaaa amɛ lɛ kɛtsɔ radio nɔ. Agbɛnɛ hu wiemɔ lɛ ma Yehowa teokrase nɔyeli kɛtsɔ Kristo nɔ lɛ nɔ nii akɛ no pɛ ji adesai fɛɛ ahiɛnɔkamɔ kome. Enɛ ji Nyɔŋmɔ nɔyeli kɛha “asafo babaoo” lɛ koni amɛjaje no amɛtsɔɔ akɛ amɛ anumnyam hiɛnɔkamɔ!
23. (a) Ani “nilee Iɛ naa samfee” ni akɛtsu nii lɛ tsɔɔ akɛ aŋa shinaa ni heyelilɔi ni sa akɛ ahereɔ amɛyiwala kɛyaa ŋwɛi maŋtsɛyeli lɛ mli lɛ aaatsɔ mli lɛ Io? (b) Mɛni ji nɔni abaanyɛ akɛha ni yeɔ enɛ he odase?
23 Shi kɛ̃lɛ, ani atsɔ “nilee lɛ naa samfee” ni akɛtsu nii lɛ nɔ aŋa shinaa ni atsɔɔ nɔ aheɔ heyelilɔi ni sa kɛbaa ŋwɛi maŋtsɛyeli lɛ mli lɛ naa yɛ be kometoo lɛ nɔŋŋ mli lo? Dabi, ejaakɛ Yesu Kristo ji Mɔni hiɛ “David samfee” lɛ, ni lɛ pɛ ji mɔni baanyɛ aŋa shinaa ko. Nohewɔ lɛ hegbɛ yɛ lolo akɛ aaahe mɛikomɛi aba mli kɛ́ Nyɔŋmɔ miisumɔ lɛ nakai. Yɛ enɛ he odaseyeli lɛ, abaptisi shwɛɛnii ni afɔamɛ mu lɛ ni ji Yehowa Odasefoi lɛ ateŋ mɛikomɛi yɛ afii ni nyiɛ be mli ni ajie naakpɛɛ sane ni kɔɔ “asafo babaoo” lɛ he atsɔɔ yɛ afi 1935 agbiɛnaa be mli Iɛ sɛɛ, ni aŋmala nɔni ajielɛ kpo nɛɛ aha yɛ August 1 kɛ 15, 1935 Ŋleshi Buu-Mɔɔ lɛ mli.—Kpoj. 3:7; Luka 11:52; Mat. 23:13.
24. (a) Mɛni baatsi mɛikrokomɛi lolo ni baabote “kuu kome” ni yɔɔ Tookwɛlɔ Kpakpa lɛ shishi lɛ ateŋ lɛ gbɛ? (b) Mɛɛ hɛgbɛ Tookwɛlɔ kpakpa lɛ damɔɔ nɔ ni ekɛheɔ “tooi” lɛ kɛbaa “kuu kome” lɛ mli lɛ?
24 “Amanehulu kpeteŋkpele” lɛ pɛ baanyɛ atsi botemɔ ni adesai aaabote mɛi ni tamɔ gwantɛŋi ni feɔ “asafo babaoo” lɛ ateŋ Iɛ naa. Gbɛ ni aaatsɔ nɔ ajo hiɛkpatamɔ kɛ nibii agbɛjianɔtoo nɛɛ ni ábulɛ fɔ lɛ mli lɛ baafee hegbɛ kɛha yiwalaheremɔ ni elaaje. Yɛ nɛkɛ afii nɛɛ fɛɛ mli, kɛjɛ 1935 kɛbaa nɛɛ fɛɛ Iɛ, gbɛ ni akɛboteɔ Tookwɛlɔ Kpakpa lɛ “kuu kome” lɛ mli naa kã. Taakɛ abɔ amaniɛ yɛ enɛ he lɛ, gbɔmɛi ni fa fe akpekpei enyɔ etsɔ mli. Tookwɛlɔ Kpakpa, Yesu Kristo kɛɛ akɛ: “Miji tooi lɛ ashinaa lɛ.” (Yoh. 10:7-9) Yɛ nɛkɛ ni eji hewɔ lɛ eka he eehe emumɔŋ “nyɛmimɛi” lɛ ananemɛi lɛ kɛmiiba mli ni ejieɔamɛ kɛjɛɔ “abotiai” ni amɛjeŋ “amanehulu kpeteŋkpele” lɛ kɛ ‘eta’ lɛ yɛ Harmagedon lɛ mli kɔkɔɔkɔ lɛ ahe. Ha mɛi fɛɛ ni sumɔɔ lɛ abo Tookwɛlɔ Kpakpa lɛ “gbee” ni anuɔ kɛtsɔɔ emumɔŋ “nyɛmimɛi” ni yɔɔ shikpɔŋ nɔ lɛ anɔ Iɛ toi. (Yoh. 10:16) Oo, kwɛ bɔni hegbɛ ni ámɛna nɛɛ nɔ kwɔ gojoo ha, ákɛ amɛaana wala aloo shweshweeshwe shihilɛ ni “kuu kome” ni yɔɔ “kwɛlɔ kome” lɛ shishi lɛ naa mli ŋɔɔmɔ lɛ mli gbɛfaŋnɔ!a
[Shishigbɛ niŋmaa]
a Ajie kɛjɛ October 1, 1979 Blɔfo Buu-Mɔɔ lɛ mli.
Odasefoi ohai babaoo ni abaptisiamɛ ehee kɛ toibolɔi ni anaa amɛ lɛ kpɛlɛ yiŋtoo ko ni wielɔ lɛ kɛfɔ amɛhiɛ yɛ wiemɔ lɛ naagbee Iɛ nɔ ni ekɛɛ akɛ: “Ni agbɛnɛ minanemɛi kpakpa ni ji toibolɔi, nyɛ mɛi ni anaa nyɛ kɛ mɛi ni anaaa nyɛ lɛ fɛɛ, miiwo nyɛteŋ mɔfɛɛmɔ ni sumɔɔ nɔyeli ni toiŋjɔlɛ, shweremɔ kɛ miishɛɛ yɔɔ mli ni baaba aha mɔfɛɛmɔ ni feɔ toiboo lɛ ŋaa akɛ, ete shi ni ekɛɛ akɛ, Hɛɛ.”
Washington adafitswaa wolo Herald lɛ wie yɛ nɔni nyiɛ nɛkɛ ŋaawoo nɛɛ sɛɛ ba lɛ he akɛ:
“Gbɔmɛi asafo babaoo ni amɛbabua amɛhe naa yɛ heni afeɔ kpee lɛ yɛ lɛ te shi damɔ shi tamɔ ŋshɔke wulu ko ni amɛ holeholei amɛniji anɔ, ni Yehowa Odasefoi nɛɛ kɛ gbee ni naa wa kpɛlɛ nɔ. Samfɛji ni yɔɔ kpeehe lɛ fɛɛ hoso yɛ gbee nɛɛ gbɛɛmɔ lɛ hewɔ, ni polisfoi kɛɛ akɛ abaanyɛ anu nɛkɛ gbɛɛmɔ nɛɛ he aahu kɛyashɛ shitoo kome.”
Nɔni ba nɛɛ hu ba yɛ be kometoo lɛ nɔŋŋ mli yɛ London, Belfast, Glasgow, Copenhagen kɛ shikpɔŋ lɛ nɔ maji babaoo mli.—The Golden Age ni aŋma yɛ June 19, 1935, baafa 598: agbɛnɛ kwɛmɔ Year Book of Jehovah’s Witnesses for 1935, baafa 62, kuku 3.