Sanebimɔi Ni Jɛ Kanelɔi Adɛŋ

■ Ani Yesu shiwoo yɛ naanɔ wala he taakɛ akɛha yɛ Yohane 11:​25, 26 Iɛ kɔɔ mɛi ni afɔ amɛ mu lɛ pɛ he, aloo nɛkɛ wiemɔi nɛɛ kɔɔ “asafo babaoo” ni kwɛɔ wala yɛ shikpɔŋ nɔ Paradeiso gbɛ lɛ hu he?

Yɛ bei komɛi ni eho amli lɛ Buu-Mɔɔ lɛ etsɔɔ akɛ afo ŋmalɛ nɛɛ mlibaa he husu awo Kristofoi ni naa ŋwɛi shihilɛ lɛ ahe. Eka shi faŋŋ akɛ ana susumɔ ni tamɔ nɛkɛ ejaakɛ yɛ nakai be lɛ mli lɛ Yesu kɛ gbɔmɛi ni yɛ sɛɛ mli lɛ abaaha amɛ nakai hiɛnɔkamɔ lɛ miiwie. Shi nɛkɛ ŋmalɛi nɛɛ amlitaomɔ jogbaŋŋ tsɔɔ akɛ Yesu efooo husu ko ni tamɔ nakai. Taakɛ saji ni akaseɔ ni yɔɔ Buu-Mɔɔ nɛɛ mli lɛ maa nɔ mi lɛ, esa akɛ wɔsusumɔ yɛ Yohane 11:​25, 26 he lɛ afee nɔ ni mli lɛɛ ni kɔɔ gbɔmɛi ni hiɛnɔkamɔ ji akɛ amɛaahi shi yɛ Paradeiso shikpɔŋ lɛ nɔ lɛ he. Mɛni hewɔ wɔwieɔ nakai?

Kadimɔ nɔ ni Marta kɛɛ yɛ Lazaro ni egbo lɛ he yɛ Yohane 11:24 lɛ: “Mile akɛ ebaate shi yɛ gbohiiashitee lɛ mli lɛ naagbee gbi lɛ nɔ.” Te gbohiiashitee ni yɔɔ ejwɛŋmɔ mli yɛ nakai be lɛ mli lɛ? Mɛni, no ji gbohiiashitee ni Abraham kɛ Yudafoi anɔkwayelɔi krokomɛi kɛ hemɔkɛyeli kwɛ gbɛ lɛ​—shikpɔŋ nɔ gbohiiashitee? Agbɛnɛ, te Yesu wiemɔi ni nyiɛ sɛɛ lɛ baatsirɛ Marta aha tɛŋŋ? Amɛbaaha ena bɔ ni shihilɛ lɛ baatamɔ yɛ shikpɔŋ nɔ gbohiiashitee lɛ mli.

Yesu jie ehe shi yɛ enɛ sɛɛ akɛ mɔ ni baatee gbohii lɛ ashi. Shi ekɛɛɛ akɛ eewie gbohii komɛi ni na hemɔkɛyeli yɛ emli pɛ he. Lɛ ji “shitee lɛ kɛ wala lɛ” kɛha mɛi fɛɛ ni naa naanɔ wala, kɛji yɛ ŋwɛi loo shikpɔŋ nɔ jio. Abaanyɛ akɛ nɔ fɛɛ nɔ ni Yesu tee nɔ ewie yɛ kukuji 25 kɛ 26 mli lɛ ato kui enyɔ lɛ fɛɛ he, tsɛbelɛ yɛ gbɛi sɔrɔtoi anɔ. Kristofoi ni afɔ amɛ mu lɛ ‘ahiɛ kaa’ akɛni ateeo amɛ shi kɛyaa ŋwɛi wala ni gbele bɛ mli lɛ mli hewɔ. Ateeɔ gbohii lɛ ateŋ mɛi ni baahi shi kɛya naanɔ yɛ shikpɔŋ nɔ lɛ ashi ni agbɛnɛ akɛ amɛ baa emuuyeli mli fiofio.​—Okɛto Kpojiemɔ 20:4 he.

Eji anɔkwale ni ka shi faŋŋ yɛ mɛi ni afɔ amɛ mu lɛ ahe, taakɛ ajaje yɛ kuku 26 lɛ akɛ ‘amɛgboŋ gbi ko ‘gbi ko’ yɛ amɛshitee lɛ sɛɛ. Agbɛnɛ ‘amɛbaana Nyɔŋmɔ bɔ ni eyɔɔ lɛ,’ koni ‘amɛkanyiɛ yɛ hemɔkɛyeli naa’ dɔŋŋ. (1 Yohane 3:3; 2 Korintobii 5:⁠7) So hewɔ lɛ beni Yesu kɛɛ, “Mɔ fɛɛ mɔ ni hiɛ ka ni eheɔ minɔ eyeɔ lɛ” ekɛ nɔ ko ni he hiaa titri ni kɔɔ mɛi ni ŋmɛnɛ amɛhiɛnɔkamɔ ji amɛaana naanɔ wala yɛ shikpɔŋ nɔ lɛ he lɛ ba shihilɛ mli. Ábu jalɛ aha “asafo babaoo” lɛ momo ejaakɛ “amɛfɔ amɛtadei lɛ ahe, ni amɛha eyɛ futaa yɛ too bi lɛ lá lɛ mli.” Amɛye heloo shihilɛ mli momo kɛ hiɛnɔkamɔ akɛ amɛaaje amanehulu kpeteŋkpele lɛ mli, ni abuɔ amɛshihilɛi lɛ akɛ eji jalɛ nɔ tamɔ blema Abraham nɔ lɛ. Esa akɛ amɛ, kɛ adesai krokomɛi ni ateeɔ amɛ shi lɛ aya nɔ ana hemɔkɛyeli yɛ Kristo afii akpe nɔyeli lɛ mli bɔni afee ni amɛna naanɔ wala yɛ adesa emuuyeli mli.​—Kpojiemɔ 7:​9, 10, 14, 15; 21:​3, 4.

Yɛ anɔkwale mli lɛ, enɛ jeee susumɔ hee ko kwraa. Yɛ be kɛ bei amli yɛ afii lɛ amli lɛ, Buu Mɔɔ Asafo lɛ woji lɛ etsɔɔ gbɛ ni mli lɛɛ ni atsɔɔ nɔ akɛ Yohane 11:​24-26 tsuɔ nii. Akɛ nɔkwɛmɔ nɔ lɛ, June 1, 1959 Blɔfo Buu-Mɔɔ lɛ baafa 337 wie Yehowa odasefoi ni abuaa amɛ naa kɛjɛɔ jeŋmaji fɛɛ amli lɛ ahe akɛ: “Mɛi ni kpaa gbɛ akɛ amɛbaahi shikpɔŋ lɛ nɔ lɛ ahiɛ ka nɔ hu akɛ amɛbaaje je nɛɛ naagbee lɛ mli, ni amɛaaka he amɛhi shi kɛbote jeŋ hee lɛ mli ni amɛgboŋ.” Etsɛ Hebribii 11:​1, 6 kɛ Yohane 11:26 ekɛfi sɛɛ. Ni April 15, 1976 Blɔfo Buu-Mɔɔ lɛ baafa 243 lɛ hu kɛ adesai ni atee amɛ shi lɛ fataa “asafo babaoo” ni je Harmagedon mli lɛ he yɛ nakai Yesu wiemɔi lɛ nɔŋŋ mli: “Ni mɔ fɛɛ mɔ ni hiɛ ka ni eheɔ minɔ eyeɔ lɛ, egboŋ gbi ko gbi ko kɛaatee naanɔ. Oheɔ enɛ oyeɔ lo?

Ani ofeɔ nakai?

May Daa Gbi Ŋmalɛ

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)