Yitso 101

Yɛ Betania, yɛ Simon Shia Lɛ

BENI Yesu shi Yeriko lɛ, eyi mli kɛmiiya Betania. Akɛni gbɛfaa lɛ biɔ nyiɛmɔ kɛmiitsɔ gɔji ashikpɔŋ nɔ aaafee shitoi 12 jɛkɛmɔ hewɔ lɛ, shwɛɔ fioo ni ehe gbi muu fɛɛ. Yeriko maŋ lɛ baa shi fe ŋshɔ hiɛ kwɔlɛ aaafee ninetalɔi 820, ni Betania yɛ gɔŋ ni nɔ kwɔ fe ŋshɔ hiɛ kwɔlɛ aaafee ninetalɔi 2,500 nɔ. Kɛ obaakai lɛ, Betania ji Lazaro kɛ enyɛmimɛi yei lɛ amaŋ. Akrowa bibioo nɛɛ kɛ Yerusalem jɛkɛmɔ aaafee shitoi enyɔ, ni eyɛ Mu Gɔŋ lɛ boka gbɛ jɔɔ mli gbɛ.

Mɛi pii ebashɛ Yerusalem momo kɛha Hehoo lɛ yeli. Amɛba oya bɔni afee ni amɛbatsuu amɛhe yɛ jamɔ naa. Aleee nɔ, ekolɛ amɛyata gbonyo ko he aloo amɛfee nɔ kroko ni eha amɛhe tseee. No hewɔ lɛ amɛtsɔ gbɛ ni atsɔɔ nɔ lɛ nɔ amɛtsuu amɛhe bɔni afee ni amɛye Hehoo lɛ yɛ gbɛ ni akpɛlɛɔ nɔ lɛ nɔ. Beni nɛkɛ mɛi ni ebashɛ mra nɛɛ bua amɛhe naa yɛ sɔlemɔ we lɛ, mɛi pii bɔi wiemɔ kɛji Yesu baaba Hehoo lɛ yeli aloo ebaŋ.

Yerusalem ji he ko ni ajeɔ ŋwane yɛ Yesu he babaoo. Eji nɔ ko ni mɛi fɛɛ le akɛ jamɔ mli hiɛnyiɛlɔi lɛ miitao ni amɛha amɔ lɛ koni amɛgbe lɛ. Yɛ anɔkwale mli lɛ, amɛfa akɛ kɛji mɔ ko le he ni eyɔɔ lɛ, esa akɛ amɛbabɔ amɛ amaniɛ. Nɛkɛ hiɛnyiɛlɔi nɛɛ ebɔ mɔdɛŋ shii etɛ yɛ nyɔji fioo nɛɛ mli—yɛ Asesei Agbijurɔ lɛ shishi, yɛ Henɔjɔɔmɔ Gbijurɔyeli lɛ shishi, kɛ beni etee Lazaro shi kɛjɛ gbohii ateŋ lɛ sɛɛ—akɛ amɛaagbe lɛ. No hewɔ lɛ, gbɔmɛi lɛ miisusu akɛ, ani Yesu baajie ehe kpo faŋŋ yɛ mɛi fɛɛ ateŋ ekoŋŋ? Amɛbibii amɛhe akɛ: “Te nyɛsusuɔ tɛŋŋ?”

Yɛ nɛkɛ be nɛɛ mli lɛ, no mli lɛ Yesu ebashɛ Betania aaafee gbii ekpaa dani Hehoo lɛ ni gbeɔ Nisan 14 yɛ Yudafoi lɛ akalenda lɛ nɔ lɛ yeli lɛ baaje shishi. Yesu bashɛ Betania yɛ Sohaa gbɛkɛnaashi, ni ji Nisan 8 shishijee mli. Kulɛ enyɛŋ efa gbɛ lɛ kɛba Betania yɛ Hɔɔ ejaakɛ gbɛfaa yɛ Hejɔɔmɔ Gbi lɛ nɔ—kɛjɛ be ni hulu enyɔ shi yɛ Sohaa kɛyashi beni eeenyɔ shi yɔ Hɔɔ—lɛ ji be ni Yudafoi amla eŋmɛɛɛ gbɛ. Ekolɛ Yesu tee Lazaro shia lɛ, taakɛ efee be ko lɛ, ni eyaye Sohaa gbɛkɛ lɛ yɛ jɛmɛ.

Shi kɛlɛ, Betania maŋ lɛ mlinyo kroko fɔ Yesu kɛ ehefatalɔi lɛ nine koni amɛbaye nii yɛ eshia yɛ Hɔɔ gbɛkɛ. Nuu lɛ ji Simon, ni tsutsu ko lɛ eji kpitiyelɔ, ni ekolɛ Yesu etsɔ hiɛ etsa lɛ lɛ. No mli lɛ, Marta miisɔmɔ gbɔi ni afɔ amɛ nine lɛ, tamɔ ale lɛ momo akɛ mɔ ni tsuɔ nii waa lɛ. Maria miisɔmɔ Yesu, shi yɛ enɛ mli lɛ yɛ gbɛ ko ni kɛ naataomɔ ba nɔ.

Maria gbele alabastro tɔ, ni ji mu tɔ bibioo ko ni mu ni jeɔ ŋma waa, “nardo mu krɔŋŋ” aaafee ŋsɛnii-tɛ kome yɔɔ mli lɛ naa. Ejara wa waa diɛŋtsɛ. Yɛ anɔkwale mli lɛ, ejara shɛɔ aaafee afi muu nyɔmɔwoo! Beni Maria fɔse mu lɛ eshwie Yesu yiteŋ kɛ enaji ahe ni ekɛ eyiteŋ tsɔi tsumɔ enaji ahe lɛ, eŋma fɛfɛo lɛ yi shia lɛ fɛɛ obɔ.

Kaselɔi lɛ amli fu ni amɛbi lɛ akɛ: “Te yaka nifitemɔ nɛɛ shishiŋ?” Kɛkɛ ni Yuda Iskariot kɛɛ: “Mɛɛ hewɔ ahɔɔɔ mu nɛɛ aheee denarioi ohai etɛ, ni aŋɔha ohiafoi?” Shi jeee akɛ Yuda miisusu ohiafoi lɛ ahe diɛŋtsɛ, ejaakɛ ejuɔ kaselɔi lɛ ashika fotro lɛ mli shika lɛ.

Yesu fa Marai he. Efa akɛ: “Nyɛfɔa lɛ hiɛmɔ; mɛɛ hewɔ nyɛhaoɔ lɛ? Etsu nitsumɔ fɛfɛo eha mi. Ejaakɛ ohiafoi lɛ, nyɛkɛ amɛ yɛ daa, ni be fɛɛ be ni nyɛsumɔɔ lɛ nyɛaanyɛ amɛ ejurɔ nyɛfee, shi mi lɛ, jeee daa mikɛ nyɛ aaahi shi. Mɔ nɛ lɛ, nɔ ni enyɛ efee nɛ; etsɔ hiɛ ebafɔ migbɔmɔtso lɛ mu eto mifuu. Lɛlɛŋ, miikɛɛ nyɛ akɛ: He fɛɛ he ni aaashiɛ sanekpakpa nɛɛ yɛ, yɛ jeŋ fɛɛ lɛ, aaatsi nɔ ni efee nɛɛ hu ta aŋɔkai lɛ.”

Yɛ be nɛɛ mli lɛ, Yesu ehi Betania kɛ nɔ ni fe ŋmɛlɛtswai 24, ni wiemɔ egbɛ eshwa akɛ eyɛ jɛmɛ. No hewɔ lɛ, mɛi pii ba Simon shia lɛ koni amɛbana Yesu, shi amɛba koni amɛbana Lazaro hu ni no mli lɛ eyɔɔ jɛmɛ lɛ. No hewɔ lɛ osɔfonukpai lɛ tee ajina, jeee akɛ amɛbaagbe Yesu pɛ kɛkɛ, shi moŋ kɛ Lazaro hu. Nɔ hewɔ ji akɛ mɛi pii miina hemɔkɛyeli yɛ Yesu mli yɛ mɔ ni etee lɛ shi kɛjɛ gbohii ateŋ lɛ ni amɛnaa lɛ yɛ wala mli lɛ hewɔ! Lɛlɛŋ, kwɛ bɔ ni nɛkɛ jamɔ mli hiɛnyiɛlɔi nɛɛ ayitseiaŋ wala ha! Yohane 11:55–12:11; Mateo 26:6-13; Marko 14:3-9; Bɔfoi lɛ Asaji 1:12.

▪ Mɛɛ sanegbaa yaa nɔ yɛ sɔlemɔ we lɛ yɛ Yerusalem, ni mɛni hewɔ?

▪ Mɛni hewɔ ni Yesu bashɛ Betania yɛ Sohaa fe ni eeeba Hɔɔ lɛ?

▪ Beni Yesu bashɛ Betania lɛ, ekolɛ nɛgbɛ eye Hejɔɔmɔ Gbi lɛ yɛ?

▪ Mɛɛ Maria nifeemɔ ko kɛ naataomɔ ba, ni te Yesu fa ehe eha tɛŋŋ?

▪ Mɛni feɔ osɔfonukpai lɛ ayiwalɛ kpele lɛ he mfoniri?