Yehowa Ji Wɔ-Nɔyelɔ!
“Esa akɛ aboɔ Nyɔŋmɔ moŋ toi akɛ nɔyelɔ fe gbɔmɛi.”—BƆFOI LƐ ASAJI 5:29, New World Translation.
1, 2. Mɛɛ shidaamɔ ni tamɔ bɔfoi lɛ anɔ Yehowa Odasefoi kɔɔ yɛ be mli ni nibii ni adesai biɔ lɛ teɔ shi woɔ Nyɔŋmɔ suɔmɔnaa nii lɛ?
YEHOWA Nyɔŋmɔ eŋmɛ gbɛ koni akɛ hii 12 aya saneyeli he wulu ko. Afi lɛ ji 33 Ŋ.B., ni saneyeli he lɛ ji Yudafoi a-Sanhedrin lɛ. Mɛi ni ayeɔ amɛ sane nɛɛ ji Yesu Kristo bɔfoi lɛ. Bo toi! Ni osɔfonukpa lɛ kɛɛ: ‘Ani jeee kita wɔwo nyɛ akɛ nyɛkatsɔɔ nii yɛ nɛkɛ gbɛi nɛɛ anɔ lɛ, ni agbɛnɛ nyɛha Yerusalem eyi obɔ kɛ nyɛtsɔɔmɔ lɛ.’ Kɛkɛ ni Petro kɛ bɔfoi krokomɛi lɛ here nɔ amɛkɛɛ: “Esa akɛ aboɔ Nyɔŋmɔ moŋ toi akɛ nɔyelɔ fe gbɔmɛi.” (Bɔfoi lɛ Asaji 5:27-29, NW) Nɔ ni amɛkɛɛ lɛ tsɔɔ akɛ: “Yehowa ji wɔ-Nɔyelɔ!”
2 Hɛɛ, Yehowa ji Yesu anɔkwa sɛɛnyiɛlɔi lɛ a-Nɔyelɔ. Anaa enɛ faŋŋ yɛ Biblia mli wolo ni ji Bɔfoi lɛ Asaji, ni “Luka, tsofatsɛ ni asumɔɔ lɛ” lɛ ŋma yɛ Roma aaafee afi 61 Ŋ.B. lɛ mli. (Kolosebii 4:14) Kɛ adesai miibi nibii ni teɔ shi woɔ Yehowa suɔmɔnaa nii lɛ, ewebii ni yɔɔ ŋmɛnɛ lɛ boɔ amɛ ŋwɛi Nɔyelɔ lɛ toi, taakɛ bɔfoi lɛ fee lɛ. Shi mɛni hu wɔbaanyɛ wɔkase kɛjɛ Bɔfɔi lɛ Asaji lɛ mli? (Yɛ be mli ni okaseɔ nii yɛ teemɔŋ lɛ, wɔmiiwo ŋaa akɛ okane wolo lɛ kukuji ni aŋmala kɛ niŋmaa ni atĩ mli lɛ fɛɛ.)
Yesu Tsu Odasefoi
3. Beni akɛ “mumɔ krɔŋkrɔŋ baptisi” Yesu sɛɛnyiɛlɔi lɛ, mɛni ji yiŋtoo titri ni amɛhiɛ?
3 Bɔfoi lɛ nyɛ amɛkɔ shidaamɔ ni yɔɔ shiŋŋ yɛ Nyɔŋmɔ gbɛfaŋ ejaakɛ awo amɛ hewalɛ yɛ mumɔŋ. Kristo gbo yɛ sɛŋmɔtso nɔ, shi amɛle akɛ atee lɛ shi. (1:1-5) Yesu “jie ehe etsɔɔ amɛ akɛ hiɛkalɔ” ni etsɔɔ Maŋtsɛyeli anɔkwalei lɛ yɛ be mli ni etsake ehe kɛba heloo mli gbii 40 lɛ. Agbɛnɛ hu ekɛɛ ekaselɔi lɛ ni amɛmɛ yɛ Yerusalem ni “akɛ mumɔ krɔŋkrɔŋ” abaptisi amɛ. Nɔ ni baaka amɛjwɛŋmɔ nɔ kwraa ji shiɛmɔ, taakɛ eji kɛha Yehowa Odasefoi ni yɔɔ ŋmɛnɛ lɛ.—Luka 24:27, 49; Yohane 20:19–21:24.
4. Mɛni baaba yɛ be mli ni mumɔ krɔŋkrɔŋ lɛ baa Yesu sɛɛnyiɛlɔi lɛ anɔ lɛ?
4 Akɛni yɛ nakai be lɛ mli lɛ akɛ mumɔ krɔŋkrɔŋ ebaptisiko amɛ hewɔ lɛ, bɔfoi lɛ susu shikpɔŋ nɔ nɔyeli he yɛ gbɛ ni ejaaa nɔ akɛ no kɛ Roma nɔyeli lɛ baaba naagbee ni amɛbi akɛ: “Nuŋtsɔ, ani nɛkɛ be nɛɛ mli obaatee maŋtsɛyeli lɛ shi oma shi oha Israel lɛ?” (1:6-8) Nɔ ni Yesu kɛɛ lɛ tsɔɔ akɛ dabi, ejaakɛ ‘jeee amɛhe sane ko ji ni amɛaale bei loo yinɔi lɛ.’ ‘Kɛ mumɔ krɔŋkrɔŋ lɛ na ba amɛnɔ lɛ,’ ebaawo amɛ hewalɛ ni amɛye Nyɔŋmɔ ŋwɛi Maŋtsɛyeli lɛ he odase, jeee maŋtsɛyeli ko ni yɔɔ shikpɔŋ nɛɛ nɔ. Amɛbaashiɛ yɛ Yerusalem, Yudea, kɛ Samaria, “kɛyashi shikpɔŋ lɛ naagbee hei fɛɛ.” Yehowa Odasefoi miitsu nitsumɔ nɛɛ yɛ gbɛ ni kpeleɔ jeŋ muu lɛ fɛɛ nɔ yɛ nɛkɛ naagbee gbii nɛɛ amli, yɛ mumɔ lɛ yelikɛbuamɔ naa.
5. Mɛɛ gbɛ nɔ Yesu baaba yɛ, tamɔ gbɛ ni etsɔ nɔ etee lɛ nɔŋŋ?
5 Yesu kɛ nakai jeŋ muu fɛɛ shiɛmɔ nitsumɔ lɛ he famɔ ha etsɛɛɛ tsɔ kɛkɛ ni ekwɔ kɛtee ŋwɛi. Nakai kwɔɔ lɛ je shishi yɛ be mli ni ebɔi ekaselɔi lɛ shimɔ kɛ ŋwɛi gbɛ yaa lɛ, kɛkɛ ni no sɛɛ lɛ Yesu yashɛ eŋwɛi Nɔyelɔ lɛ hiɛ ni enyɛ etsu nii hu yɛ mumɔi ashihilɛ he lɛ. (1:9-11) Yɛ be mli ni atatu ko batsi bɔfoi lɛ ahiɛ ni no haaa amɛnyɛ amɛna Yesu dɔŋŋ lɛ, etsake ehe ni eshi helooŋ gbɔmɔtso lɛ. Kɛkɛ ni bɔfoi enyɔ bapue ni amɛkɛɛ akɛ ‘ebaaba nakai nɔŋŋ.’ Nakai ji bɔ ni eba mli. Yesu kaselɔi lɛ pɛ na lɛ yɛ be mli ni eyaa lɛ, taakɛ Yehowa Odasefoi pɛ yɔseɔ ba ni eba ni anaaa lɛ lɛ.
Yehowa Hala Mɛi ni Esumɔɔ
6. Mɛɛ gbɛ nɔ atsɔ ahala mɔ kroko ato Yuda Iskariot najiaŋ?
6 Etsɛɛɛ ni bɔfoi lɛ ku amɛsɛɛ amɛtee Yerusalem. (1:12-26) Bɔfoi anɔkwafoi 11 lɛ kɛ Yesu nyɛ bii lɛ, kɛ ekaselɔi krokomɛi lɛ, kɛ enyɛ, Maria tee nɔ yɛ sɔlemɔ mli yɛ ŋwɛitsu ko nɔ, (ekolɛ yɛ Marko nyɛ, Maria shia lɛ). (Marko 6:3; Yakobo 1:1) Shi namɔ nine baashɛ Yuda “nɔkwɛmɔ nitsumɔ lɛ” nɔ? (Lala 109:8) Kaselɔi aaafee 120 yɛ jɛmɛ yɛ be mli ni Nyɔŋmɔ hala nuu ko koni eye mɔ ni tsɔɔ Yesu sɛɛ gbɛ, Yuda, najiaŋ, koni asaa ana bɔfoi lɛ ayibɔ 12 lɛ ekoŋŋ lɛ. Esa akɛ mɔ ni abaahala lɛ lɛ afee mɔ ko ni eji kaselɔ yɛ Yesu sɔɔmɔ nitsumɔ be lɛ mli ni ye eshitee lɛ he odase hu. Yɛ anɔkwale mli lɛ, esa akɛ nuu lɛ akpɛlɛ nɔ akɛ Yehowa ji e-Nɔyelɔ. Yɛ be mli ni amɛsɔle sɛɛ lɛ, afɔ oshiki yɛ Matia kɛ Yosef Barsaba nɔ. Nyɔŋmɔ ha oshiki lɛ bagbee Matia nɔ.—Abɛi 16:33.
7. (a) Te fee tɛŋŋ ni Yuda kɛ “enɔsha ni efee lɛ mli nyɔmɔwoo lɛ ehe abɔɔ” lɛ? (b) Mɛɛ gbɛ nɔ Yuda tsɔ egbo?
7 Eka shi faŋŋ akɛ Yuda Iskariot ekpɛlɛɛɛ nɔ akɛ Yehowa ji e-Nɔyelɔ. Mɛni hewɔ, ejaakɛ eyatsɔɔ Nyɔŋmɔ Bi lɛ sɛɛ gbɛ kɛha jwiɛtɛii kukuji 30! Yuda kɛ nakai shika lɛ ku sɛɛ eyaha osɔfonukpai lɛ, shi Petro kɛɛ akɛ sɛɛgbɛtsɔɔlɔ lɛ kɛ “enɔsha ni efee lɛ mli nyɔmɔwoo lɛ ehe abɔɔ.” Yɛ mɛɛ gbɛ nɔ? Ojogbaŋŋ, lɛ ekɛ shika kɛ yiŋtoo lɛ ba ni akɛhe “La Abɔɔ,” taakɛ atsɛɔ lɛ lɛ. Anaa shikpɔŋ nɛɛ yɛ shikpɔŋ tɛtrɛɛ ko ni ka Hinom Jɔɔ lɛ wuoyigbɛ lɛ nɔ. Akɛni efite wekukpaa ni ka ekɛ eŋwɛi Nɔyelɔ lɛ teŋ lɛ hewɔ lɛ, Yuda “yawo esɛ kpaa.” (Mateo 27:3-10) Shi ekolɛ kpaa lɛ tse loo tso nine lɛ ku, ni no hewɔ lɛ ‘ema eyi shi, ni emli gba enyɔ ni emlinii fɛɛ tue,’ beni ebagbee tɛsaai lɛ anɔ lɛ. Ekaba akɛ wɔteŋ mɔ ko aaafee nyɛmi amalelɔ kɔkɔɔkɔ!
Mumɔ krɔŋkrɔŋ Yimɔ Amɛ Obɔbɔ!
8. Mɛɛ be akɛ mumɔ krɔŋkrɔŋ baptisi Yesu kaselɔi lɛ, ni mɛni jɛ mli ba?
8 Shi mumɔ krɔŋkrɔŋ ni awo amɛ shi yɛ he akɛ akɛbaabaptisi amɛ lɛ hu? Eba yɛ Pentekoste yɛ afi 33 Ŋ.B., yɛ be mli ni Yesu ekwɔ kɛtee ŋwɛi lɛ sɛɛ gbii nyɔŋma. (2:1-4) Mɛɛ miishɛɛ be nakai baptisimɔ lɛ ji nɛkɛ! Susumɔ nakai nifeemɔ lɛ he okwɛ. Kaselɔi aaafee 120 yɛ ŋwɛitsu lɛ nɔ kɛkɛ ni ‘gbɛɛmɔ ko ni tamɔ ahum ni miitswa waa jɛ ŋwɛi ba ni ebayi shia lɛ fɛɛ obɔ trukaa.’ Ejeee kɔɔyɔɔ ni miitswa, shi egbɛɛmɔ tamɔ nakai. Ni lilɛi “ni tamɔ lalilɛi” batara kaselɔi lɛ kɛ bɔfoi lɛ ateŋ mɔ fɛɛ mɔ yiteŋ. “Ni mumɔ krɔŋkrɔŋ bayimɔ amɛ fɛɛ amɛmli obɔbɔ, ni amɛbɔi wiemɔi sɔrɔtoi sɔrɔtoi wiemɔ.” Beni nakai baptisimɔ lɛ ba mli lɛ, akɛ mumɔ krɔŋkrɔŋ lɛ hu fɔ amɛ, ni akɛfɔ amɛ mu, ni asɔo amɛnaa akɛ okadi kɛha mumɔŋ gboshiniyeli.—Yohane 3:3, 5; 2 Korintobii 1:21, 22; 1 Yohane 2:20.
9. Mɛni he kaselɔi ni mumɔ eyi amɛ obɔbɔ lɛ wie?
9 Nɛkɛ nifeemɔ nɛɛ sa Yudafoi kɛ mɛi ni etsake kɛba Kristo jamɔ mli ni yɔɔ Yerusalem ni jɛ ‘jeŋmaji fɛɛ ni yɔɔ shikpɔŋ nɔ’ lɛ amli lɛ ahe. (2:5-13) Amɛnaa kpɛ amɛhe, ni amɛbi akɛ: ‘Te tɛŋŋ ni wɔteŋ mɔ fɛɛ mɔ nuɔ emaŋ he ni afɔ lɛ yɛ lɛ wiemɔ nɛɛ?’ Ekolɛ ebaafee maji tamɔ Media, (yɛ Yudea bokagbɛ), Frigia (yɛ Asia Bibioo), kɛ Roma (yɛ Europa) lɛ anɔ wiemɔi. Yɛ be mli ni kaselɔi lɛ wieɔ “Nyɔŋmɔ nii wuji lɛ” yɛ wiemɔi sɔrɔtoi amli lɛ, toibolɔi lɛ ateŋ mɛi babaoo anaa kpɛ amɛhe, shi mɛi ni yeɔ amɛhe fɛo lɛ susu akɛ amɛtɔrɔ dãa.
Petro ye Odase ni Kanyaa Mɔ
10. Nibii ni ba mli yɛ Pentekoste afi 33 Ŋ.B. lɛ wo mɛɛ gbalɛ obɔ, ni ani enɛ yɛ ŋmɛnɛŋmɛnɛ beaŋ henɔ?
10 Petro je shishi ni eye odase kɛtsɔ tsɔɔmɔ ni etsɔɔ amɛ akɛ leebi ŋmɛji nɛɛhu yɛ mra tsɔ fe be ni akɛtɔɔ daa lɛ nɔ. (2:14-21) Yɛ no najiaŋ lɛ, nɛkɛ nifeemɔ nɛɛ ji shi ni Nyɔŋmɔ ewo akɛ ebaafɔse emumɔ lɛ eshwie ewebii anɔ lɛ mlibaa. Nyɔŋmɔ kɛ mumɔ tsirɛ Petro koni egbala jwɛŋmɔ kɛba wɔgbii nɛɛ anɔ kɛtsɔ wiemɔi ni ji “naagbee gbii lɛ anɔ” kɛ ‘amɛaagba’ ni ekɛfata he lɛ nɔ. (Yoel 3:1-5) Yehowa baaha naakpɛɛ nibii aba yɛ ŋwɛi kɛ okadii hu yɛ shikpɔŋ lɛ nɔ dani egbi wulu lɛ aba, ni mɛi ni boɔ tsɛɔ egbɛi lɛ yɛ hemɔkɛyeli mli lɛ pɛ yiwala abaahere. Yɛ nakai gbɛ nɔ nɔŋŋ lɛ mumɔ krɔŋkrɔŋ ni afɔseɔ ashwieɔ mɛi ni afɔ amɛ mu lɛ anɔ ŋmɛnɛ lɛ eye ebua amɛ koni “amɛgba” kɛ ekaa yɛ gbɛ ni mɔɔ shi nɔ ŋmɛnɛ.
11. Mɛni Yudafoi lɛ kɛ agbɛnɛ Nyɔŋmɔ hu fee yɛ Yesu he?
11 Petro tsa nɔ ni etsɔɔ mɔ ni Mesia lɛ ji. (2:22-28) Nyɔŋmɔ ma Mesia ni Yesu ji lɛ nɔ mi kɛtsɔ yelikɛbuamɔ ni ekɛha lɛ ni ekɛfee hewalɛ nibii, okadii kɛ naakpɛɛ nibii lɛ nɔ. (Hebribii 2:3, 4) Shi Yudafoi lɛ tsɔ “mɛi ni bɛ mla lɛ anine nɔ,” Romabii ni booo Nyɔŋmɔ mla toi lɛ, ni amɛkala lɛ amɛkpɛtɛ sɛŋmɔtso. Atsɔ “Nyɔŋmɔ yiŋtoo kɛ enii ni ele eto lɛ” nɔ ajie Yesu ejaakɛ Nyɔŋmɔ suɔmɔnaa nii ji no. Shi kɛlɛ, Nyɔŋmɔ tee Yesu shi, ni eŋmɛɛ egbɔmɔtso akɛ adesa lɛ he yɛ gbɛ ni tsɔɔ akɛ enaaa fitemɔ lɛ nɔ.—Lala 16:8-11.
12. Mɛni David tsɔ hiɛ ena, ni mɛni nɔ yiwalaheremɔ damɔ?
12 Atee nɔ ama Mesia gbalɛ lɛ nɔ mi lolo yɛ be mli ni Petro odaseyeli lɛ yaa nɔ lɛ. (2:29-36) Ewie akɛ David tsɔ hiɛ ena ebinuu kpele, Yesu ni ji Mesia lɛ shitee. Yesu ejɛ gbɛhe ni awo nɔ gojoo yɛ Nyɔŋmɔ ninejurɔ nɔ yɛ ŋwɛi lɛ mli, ni efɔse mumɔ krɔŋkrɔŋ ni enine shɛ nɔ kɛjɛ e-Tsɛ lɛ ŋɔɔ lɛ eshwie shi. (Lala 110:1) Mɛi ni boɔ Petro toi lɛ ‘na ni amɛnu’ enitsumɔ lɛ yɛ be mli ni amɛna lalilɛii lɛ yɛ kaselɔi lɛ ayiteaŋ ni amɛnuɔ maŋsɛɛ wiemɔi ni amɛwieɔ lɛ. Etsɔɔ hu akɛ yiwalaheremɔ damɔ kpɛlɛmɔ ni aaakpɛlɛ Yesu nɔ akɛ Nuŋtsɔ kɛ Mesia lɛ nɔ.—Romabii 10:9; Filipibii 2:9-11.
Yehowa ha Shweremɔ Ba
13. (a) Dani aaabaptisi amɛ yɛ gbɛ ni ja nɔ lɛ, mɛni esa akɛ Yudafoi lɛ kɛ mɛi ni etsakɛ kɛbatsɔmɔ Kristofoi lɛ akpɛlɛ nɔ? (b) Mɛi enyiɛ abaptisi amɛ, ni mɛni jɛ enɛ mli eba yɛ Yerusalem?
13 Kwɛ bɔ ni Petro wiemɔi lɛ mɔ shi ha! (2:37-42) Wiemɔ lɛ tsurɔ etoibolɔi lɛ atsuiiaŋ yɛ kpɛlɛmɔ ni amɛkpɛlɛ ni agbe Mesia lɛ hewɔ. No hewɔ lɛ ewo amɛ hewalɛ akɛ: “Nyɛtsakea nyɛtsuii amli ni nyɛteŋ mɔ fɛɛ mɔ aha abaptisi lɛ awo Yesu Kristo gbɛi amli, koni aŋɔ nyɛhe eshai lɛ afa nyɛ, ni nyɛna mumɔ krɔŋkrɔŋ nɔkeenɔ lɛ.” Yudafoi lɛ kɛ mɛi ni etsake kɛba Kristo jamɔ mli lɛ ekpɛlɛ nɔ momo akɛ Yehowa ji Nyɔŋmɔ ni akɛ emumɔ lɛ he hiaa amɛ. Shi ehe miihia ni amɛtsake amɛtsuii agbɛnɛ ni amɛkpɛlɛ Yesu nɔ akɛ Mesia lɛ koni abaptisi amɛ yɛ Tsɛ (ni amɛaakpɛlɛ ehegbɛ loo nitsumɔ nɔ) lɛ, kɛ Bi lɛ, kɛ mumɔ krɔŋkrɔŋ lɛ gbɛi amli. (Mateo 28:19, 20) Petro tsɔ odase ni eye etsɔɔ nɛkɛ Yudafoi kɛ mɛi ni etsake kɛba Kristo jamɔ mli nɛɛ nɔ ekɛ mumɔŋ samfele ni Yesu kɛha lɛ lɛ mli klɛŋklɛŋ nɔ lɛ tsu nii ni ekɛgbele nilee kɛ hegbɛ shinaa lɛ naa eha Yudafoi ni heɔ yeɔ Iɛ koni amɛbote ŋwɛi Maŋtsɛyeli lɛ mli. (Mateo 16:19) Yɛ nakai gbi kome lɛ pɛ mli lɛ abaptisi mɛi 3,000! Susumɔ Yehowa odasefoi babaoo nɛɛ ni miishiɛ yɛ Yerusalem kpokpaa bibioo nɛɛ nɔ lɛ he okwɛ!
14. Mɛni hewɔ ni yɛ mɛɛ gbɛ nɔ heyelilɔi lɛ “fee nɔ fɛɛ nɔ ekome”?
14 Mɛi ni jɛ shɔŋŋ amɛba lɛ ateŋ mɛi babaoo ehiɛɛɛ nibii ni baaha amɛhi shi ni amɛsɛɛ atsɛ shi kɛlɛ amɛmiishwe ni amɛkase amɛ hemɔkɛyeli hee lɛ he nii babaoo ni amɛshiɛ amɛha mɛi krokomɛi. No hewɔ lɛ Yesu mra be mli kaselɔi lɛ jɛ suɔmɔ mli amɛye amɛbua amɛhe, taakɛ Yehowa Odasefoi feɔ ŋmɛnɛ lɛ nɔŋŋ. (2:43-47) Mɛi ni heɔ yeɔ lɛ “fee amɛnii fɛɛ ekome.” Mɛi komɛi hɔ̃ɔhɔi amɛ nibii, ni aja shika lɛ aha mɛi ni ehe hiaa amɛ lɛ. Enɛ ha asafo lɛ je shishi yɛ gbɛ kpakpa nɔ, ejaakɛ ‘Yehowa ŋɔ mɛi ni ahere amɛ yiwala lɛ efata amɛhe.’
Tsamɔ ko kɛ Nɔ ni Jɛ Mli Ba
15. Mɛni ba yɛ be mli ni Petro kɛ Yohane boteɔ sɔlemɔ we lɛ, ni mɛni gbɔmɛi lɛ fee yɛ enɛ he?
15 Yehowa tsɔ “okadii” anɔ efi Yesu sɛɛnyiɛlɔi lɛ asɛɛ. (3:1-10) No hewɔ lɛ, yɛ be mli ni Petro kɛ Yohane boteɔ sɔlemɔ tsu lɛ mli yɛ shwane 3:00 kɛha gbɛkɛnaashi afɔleshaa lɛ he sɔlemɔ lɛ, nuu ko ni eji obubuafo kɛjɛ egbekɛbiiashi ta Shinaa Fɛfɛo lɛ masɛi “eeba nii.” Ni Petro kɛɛ: ‘Jwiɛtɛi kɛ shika lɛ mibɛ eko; shi nɔ ni miyɔɔ lɛ, no miŋɔhaa bo nɛɛ: Yesu Kristo Nazarenyo lɛ gbɛi amli lɛ, tee shi ni onyiɛ.’ Kɛkɛ ni atsa nuu lɛ amrɔ nɔŋŋ! Beni ebote sɔlemɔ tsu lɛ mli “kɛ nyiɛmɔ kɛ tuumɔ kɛ Nyɔŋmɔ yijiemɔ” lɛ, mɛi ni na lɛ lɛ ‘ahe jɔ̃ amɛhe.’ Ekolɛ amɛteŋ mɛi komɛi kai wiemɔi nɛɛ: “No mli lɛ Obubuafoi aaatumɔ akɛ ofrote.”—Yesaia 35:6.
16. Mɛɛ gbɛ nɔ bɔfoi lɛ tsɔ ni amɛnyɛ amɛtsa nuu obubuafo ko?
16 Gbɔmɛi ni naa ekpɛ amɛhe nɛɛ bua amɛhe naa yɛ Salomo ablanaa lɛ nɔ, yɛ sɔlemɔ tsu lɛ bokagbɛ afa ni aha yiteŋ lɛ mli. Jɛmɛ Petro ye odase yɛ. (3:11-18) Etsɔɔ mli akɛ Nyɔŋmɔ ha bɔfoi lɛ hewalɛ koni amɛtsa nuu obubuafo lɛ kɛtsɔ E-Tsulɔ ni awo ehiɛ nyam, Yesu nɔ. (Yesaia 52:13–53:12) Yudafoi lɛ kwa nakai “mɔ krɔŋkrɔŋ kɛ jalɔ lɛ”; shi Yehowa tee lɛ shi. Eyɛ mli akɛ gbɔmɛi lɛ kɛ amɛnɔyelɔi lɛ leee akɛ amɛmiigbe Mesia lɛ moŋ, shi Nyɔŋmɔ tsɔ no nɔ eha gbalɛ wiemɔi ni kɛɔ akɛ ‘e-Kristo lɛ aaana amanehulu’ lɛ ba mli.—Daniel 9:26.
17. (a) Mɛɛ nifeemɔ gbɛ ehe hiaa ni Yudafoi lɛ akɔ? (b) Mɛni eba kɛjɛ be mli ni ‘atsu Kristo kɛba’ yɛ wɔgbii nɛɛ amli lɛ?
17 Yɛ nɔ ni amɛfee Mesia lɛ hewɔ lɛ, Petro tsɔɔ nɔ ni esa akɛ Yudafoi lɛ afee. (3:19-26) Ehe miihia ni “amɛtsake amɛtsuii,” aloo amɛshwa amɛhe yɛ amɛhe eshai lɛ ahe, ni ‘amɛku amɛsɛɛ,’ loo ni amɛtsake, ni amɛkɔ gbɛ kroko. Kɛ amɛjie hemɔkɛyeli kpo yɛ Yesu mli akɛ Mesia lɛ, ni amɛkpɛlɛ kpɔmɔ nɔ lɛ nɔ lɛ, hejɔɔmɔ baajɛ Yehowa ŋɔɔ aba amɛnɔ akɛ mɛi ni akɛ amɛhe eshai eke amɛ. (Romabii 5:6-11) Akai Yudafoi lɛ akɛ amɛji bii kɛha kpaŋmɔ ni Nyɔŋmɔ kɛ amɛ blematsɛmɛi lɛ fee, ni ekɛɛ Abraham akɛ: “Ni oseshi mli aaajɔɔ shikpɔŋ lɛ nɔ wekui fɛɛ yɛ” lɛ. No hewɔ lɛ Nyɔŋmɔ tsu e-Mesia Tsulɔ lɛ koni ebakpɔ̃ Yudafoi ni tsakeɔ amɛtsui lɛ. Nɔ ni yɔɔ miishɛɛ ji akɛ, kɛjɛ be mli ni ‘atsu Yesu kɛba’ yɛ ŋwɛi Maŋtsɛyeli hewalɛ mli yɛ 1914 kɛbaa nɛɛ, asaa ato anɔkwalei kɛ teokrase gbɛjianɔtoo ni haa mɔ he jɔɔ lɛ lɛ ama shi ekoŋŋ yɛ Yehowa Odasefoi ateŋ.—1 Mose 12:3; 18:18; 22:18.
Amɛkpaŋ!
18. Mɛɛ “tɛ” Yudafoi “tsutswalɔi” lɛ kpoo lɛ, ni namɔ mli pɛ wɔbaana yiwalaheremɔ yɛ?
18 Akɛni amɛmli efu akɛ Petro kɛ Yohane ewie Yesu shitee lɛ he hewɔ lɛ, osɔfonukpai lɛ, kɛ sɔlemɔ we asafoiatsɛ lɛ, kɛ Sadukifoi lɛ ha awo amɛ tsuŋ. (4:1-12) Sadukifoi lɛ heee gbohiiashitee lɛ amɛyeee, shi mɛi krokomɛi babaoo batsɔmɔ heyelilɔi, ni hii lɛ pɛ ayibɔ miihe ashɛ 5,000. Beni abi amɛ sane yɛ Yerusalem saneyeli he wulu lɛ hiɛ lɛ, Petro kɛɛ akɛ atsa nuu obubuafo lɛ yɛ “Yesu Kristo, Nazarenyo lɛ” ni amɛ nɔŋŋ amɛsɛŋ lɛ shi Nyɔŋmɔ tee lɛ shi lɛ “gbɛi amli.” Nɛkɛ “tɛ” ni Yudafoi “tsutswalɔi” lɛ kpoo lɛ ebatsɔ “koŋtɛ nɛɛ.” (Lala 118:22) Petro kɛɛ hu akɛ: “Ejaakɛ yiwalaheremɔ bɛ mɔ ko mɔ ko mli.”
19. Beni afa amɛ ni amɛkpa shiɛmɔ lɛ, te bɔfoi lɛ here nɔ amɛha tɛŋŋ?
19 Aka akɛ abaaha amɛkpa nakai wiemɔ lɛ. (4:13-22) Shi akɛni nuu ni atsa lɛ lɛ damɔ jɛmɛ hewɔ lɛ, amɛnyɛɛɛ amɛkɛɛ akɛ “okadi wulu” nɛɛ bɛ mli, shi amɛfa Petro kɛ Yohane ni ‘amɛkawie loo amɛtsɔɔ nii yɛ Yesu gbɛi lɛ mli yɛ he ko he ko dɔŋŋ.’ Mɛni ji amɛhetoo? ‘Wɔnyɛŋ wɔkpa nibii ni wɔna kɛ nɔ ni wɔnu lɛ ahe wiemɔ.’ Amɛbo Yehowa toi akɛ amɛnɔyelɔ!
Aha Sɔlemɔi Ahetoo!
20. Mɛni he kaselɔi lɛ sɔle yɛ, ni mɛni jɛ mli ba?
20 Taakɛ Yehowa Odasefoi sɔleɔ yɛ amɛkpeei ashishi lɛ, nakai nɔŋŋ kaselɔi lɛ hu sɔle beni bɔfoi ni ajie amɛ kɛjɛ tsuŋ lɛ bɔ amɛ amaniɛ yɛ nibii ni afee amɛ lɛ ahe lɛ. (4:23-31) Ayoo yɛ faŋŋ akɛ nɔyelɔi ni ji Herode Antipa kɛ Pontio Pilato, kɛ agbɛnɛ Romabii ni ji Jeŋmajiaŋbii lɛ kɛ Israelbii lɛ fɛɛ ebua amɛhe naa amɛwo Mesia lɛ. (Lala 2:1, 2; Luka 23:1-12) Yehowa ha mumɔ krɔŋkrɔŋ yimɔ kaselɔi lɛ obɔbɔ, yɛ sɔlemɔ lɛ hetoohamɔ mli, ni no hewɔ lɛ amɛwie Nyɔŋmɔ wiemɔ lɛ kɛ ekaa. Amɛbiii ni amɛnɔyelɔ lɛ aha yiwaa ni baa amɛnɔ lɛ aba naagbee shi moŋ ni eye ebua amɛ ni yɛ fɛɛ sɛɛ lɛ amɛshiɛ kɛ ekaa.
21. Namɔ ji Barnaba, ni mɛni sui komɛi eyɔɔ?
21 Heyelilɔi lɛ tee nɔ amɛfee nɔ fɛɛ nɔ ekome, ni mɔ kome folo po bɛ ni efiɔ lɛ. (4:32-37) Mɛi ni kɛ amɛnibii baye bua nɛɛ ateŋ mɔ kome ji Levinyo Yosef ni esɛɛ jɛ Kipro lɛ. Bɔfoi lɛ wo lɛ Barnaba, ni eshishi ji “Miishɛjemɔ Bi,” ekolɛ akɛni eyeɔ ebuaa mɔ ni eyɔɔ mɔ he miishɛɛ hu lɛ hewɔ. Eka shi faŋŋ akɛ, wɔteŋ mɔ fɛɛ mɔ baasumɔ ni etamɔ mɔ nɛ.—Bɔfoi lɛ Asaji 11:22-24.
Akpa Amalelɔi lɛ Ahe Mama
22, 23. Mɛni ji esha ni Anania kɛ Safira fee lɛ, ni mɛɛ gbɛ nɔ amɛ niiashikpamɔ lɛ he baanyɛ aba sɛɛnamɔ aha wɔ yɛ?
22 Shi, Anania kɛ eŋa Safira kpoo akɛ amɛaakpɛlɛ Yehowa nɔ akɛ amɛ-Nɔyelɔ. (5:1-11) Amɛyahɔɔ shikpɔŋ ko, ni amɛkɛ shika lɛ fa to ni amɛkwa amɛfee tamɔ nɔ ni shika lɛ fɛɛ amɛkɛbaha bɔfoi lɛ. Nilee ni Nyɔŋmɔ mumɔ lɛ kɛha Petro lɛ ye bua lɛ ni eyoo amɛ osatofeemɔ lɛ, ni enɛ kɛ amɛgbele ba. Mɛɛ kɔkɔbɔɔ kɛha mɛi ni Satan lakaa amɛ ni amɛfee nibii fɔji kɛtee lɛ enɛ ji nɛkɛ!—Abɛi 3:32; 6:16-19.
23 Yɛ nɔ ni ba nɛɛ sɛɛ lɛ, mɛi ni hiɛ jwɛŋmɔ fɔŋ lɛ ateŋ mɔ ko naaa ekaa ni ekɛ ehe abɔ bɔfoi lɛ ahe dɔŋŋ. Shi mɛi krokomɛi batsɔmɔ heyelilɔi lolo. (5:12-16) Kɛfata he hu lɛ, yɛ be mli ni helatsɛmɛi kɛ mɛi ni mumɔi ni he tseee gbaa amɛnaa lɛ naa Nyɔŋmɔ hewalɛ lɛ mli hemɔkɛyeli lɛ, ‘atsa amɛ fɛɛ.’
Esa Akɛ Abo Nyɔŋmɔ Moŋ Toi Fe Gbɔmɛi
24, 25. Mɛni hewɔ ni Yudafoi ahiɛnyiɛlɔi lɛ wa bɔfoi lɛ ayi lɛ, shi mɛɛ nɔkwɛmɔ nɔ nɛkɛ anɔkwafoi nɛɛ fee amɛha Yehowa tsuji fɛɛ?
24 Agbɛnɛ osɔfonukpai lɛ kɛ Sadukifoi lɛ bɔ mɔdɛŋ ni amɛtsi shweremɔ ni baa yɛ naakpɛɛ gbɛ nɔ nɛɛ naa kɛtsɔ tsuŋ ni amɛwo bɔfoi lɛ nɔ. (5:17-25) Shi nakai nyɔɔŋ lɛŋ lɛ, Nyɔŋmɔ bɔfo bajie amɛ. Ni beni shɛɔ jetsɛremɔ lɛ, no mli lɛ amɛmiishiɛ yɛ sɔlemɔwe lɛ! Yiwaa nyɛŋ atsi Yehowa tsuji anaa.
25 Shi kɛlɛ, akɛ nɔnyɛɛ ba yɛ be mli ni akɛ bɔfoi lɛ tee Sanhedrin lɛ hiɛ lɛ. (5:26-42) Afa amɛ ni amɛkpa nitsɔɔmɔ lɛ, shi amɛkɛɛ: “Esa akɛ aboɔ Nyɔŋmɔ moŋ toi akɛ nɔyelɔ fe gbɔmɛi.” Enɛ bafeɔ nɔkwɛmɔ nɔ kɛhaa Yesu sɛɛnyiɛlɔi lɛ, nɔ ni Yehowa Odasefoi nyiɛɔ sɛɛ ŋmɛnɛ lɛ. Yɛ be mli ni Mla tsɔɔlɔ Gamaliel ebɔ amɛ kɔkɔ sɛɛ lɛ, hiɛnyiɛlɔi lɛ yi bɔfoi lɛ, ni amɛfa amɛ ni amɛkpa shiɛmɔ lɛ, ni amɛŋmɛɛ amɛhe.
26. Mɛɛ gbɛ nɔ bɔfoi lɛ asɔɔmɔ nitsumɔ lɛ tamɔ Yehowa Odasefoi lɛ anɔ lɛ nɔŋŋ ŋmɛnɛ?
26 Bɔfoi lɛ na miishɛɛ waa akɛ abu amɛ akɛ mɛi ni esa akɛ abɔɔ amɛ ahora yɛ Yesu gbɛi lɛ ahewɔ. “Ni amɛfɔɔɔ nitsɔɔmɔ kɛ sanekpakpa lɛ shiɛmɔ yɛ sɔlemɔ we lɛ kɛ shia fɛɛ shia.” Hɛɛ, amɛji shia-kɛ-shia sɔɔlɔi. Nakai nɔŋŋ Nyɔŋmɔ ŋmɛnɛŋmɛnɛ-beaŋ Odasefoi, ni amɛ hu amɛnine eshɛ emumɔ lɛ nɔ lɛ ji, ejaakɛ amɛboɔ lɛ toi ni amɛkɛɔ akɛ, “Yehowa ji wɔ-Nɔyelɔ!”
Te Obaaha Hetoo Oha Tɛŋŋ?
◻ Mɛɛ famɔ esa akɛ Yesu sɛɛnyiɛlɔi Iɛ aha aba mli, yɛ blema kɛ ŋmɛnɛŋmɛnɛ beaŋ fɛɛ?
◻ Mɛni ba yɛ Pentekoste gbi Iɛ nɔ yɛ afi 33 Ŋ.B.?
◻ Mɛɛ be mli ni yɛ mɛɛ gbɛ nɔ Petro kɛ mumɔŋ samfele ni Yesu kɛha lɛ Iɛ mli klɛŋklɛŋ nɔ Iɛ tsu nii?
◻ Mɛni wɔbaanyɛ wɔkase kɛjɛ Anania kɛ Safira niiashikpamɔ lɛ mli?
◻ Beni afa amɛ ni amɛkpa shiɛmɔ lɛ, mɛɛ nɔkwɛmɔ nɔ bɔfoi Iɛ fee amɛha Yehowa Odasefoi fɛɛ?