Jeŋba Ni Nyɔŋmɔ Gbeyeishemɔ Yɔɔ Mli Ni Aaajie lɛ Kpo Yɛ Mɛi Krokomɛi Ahe
“Miiŋmao . . . . ni ole bɔ ni sa akɛ oba ojeŋ oha yɛ Nyɔŋmɔ we, ni ji . . . asafo lɛ.”—1 Tim. 3:14, 15.
1, 2. Mɛɛ gbɛ nɔ Biblia lɛ baanyɛ aye abua wɔ yɛ gbɛ ni wɔkɛ mɛi krokomɛi yeɔ haa lɛ mIi?
1 SƐƐNAMƆI ni Kristofoi naa yɛ Biblia lɛ kasemɔ mli ji akɛ amɛkaseɔ gbɛ ni Nyɔŋmɔ gbeyeishemɔ yɔɔ mli ni atsɔɔ nɔ akɛ adesai krokomɛi yeɔ. Gbɔmɛi ni leee Kristo jamɔ loo Biblia lɛ he nɔ ko po kpɛlɛɔ nilee ni yɔɔ ŋaawoo ni tamɔ nɛkɛ mli kɛ bɔ ni anyɛɔ akɛtsuɔ nii lɛ nɔ: “Bɔ ni nyɛtaoɔ akɛ mɛi afee ahanyɛ lɛ, nyɛ hu nyɛfea nakai nɔŋŋ nyɛhaa amɛ.”—Luka 6:31.
2 Biblia lɛ kɛ nɔ ni fe saji sɔrɔtoi babaoo ni kɔɔ wɔjeŋba yɛ mɛi krokomɛi ahe kɛkɛ lɛ haa. Ewoɔ wɔ ŋaa yɛ gbɛ ni esa akɛ wɔtsɔ nɔ wɔba wɔjeŋ yɛ gbɔmɛi aŋkroaŋkroi komɛi ni kɛwɔ yɔɔ wekukpaa krɛdɛɛi komɛi amli, aloo amɛyɔɔ shihilɛi komɛi amli lɛ ahe. Akɛ nɔkwɛmɔ nɔ lɛ, ewoɔ ŋaa yɛ bɔ ni esa akɛ ŋa ni ji Kristofonyo lɛ aba ejeŋ yɛ ewu ni heee yeee lɛ he, ni ewoɔ ŋaa yɛ wɔjeŋba he yɛ ohiafoi, obubuafoi kɛ hii loo yei ahe. (1 Pet. 3:1-6; Lala 41:2; 3 Mose 19:14; 1 Tim. 5:1, 2) Ŋmalɛi lɛ hu kɛ ŋaawoo kpakpa haa yɛ bɔ ni ‘wɔɔba wɔjeŋ yɛ Nyɔŋmɔ we lɛ, ni ji asafo lɛ mli.’—1 Tim. 3:15.
3. Mɛni hewɔ ni Nyɔŋmɔ gbɛtsɔɔmɔ he hiaa wɔ yɛ wɔjeŋba mli lɛ?
3 Ŋwɛi ŋaawoo nɛɛ kɛ nitsumɔ he hiaa, ejaakɛ Nyɔŋmɔ Wiemɔ lɛ tsɔɔ akɛ, ebaadamɔ bɔ ni wɔbaa wɔjeŋ yɛ mɛi krokomɛi ahe lɛ nɔ ekojo wɔ yɛ gbɛ ko nɔ. (Mat. 18:35; 25:40, 45; Kpoj. 2:23) No hewɔ lɛ, ni wɔɔha nɔ ni adesai komɛi kɛɔ akɛ esa akɛ wɔfee lɛ akudɔ wɔ, aloo kɛtsɔ wɔhenumɔi anɔ kɛ nɔ ni “wɔnuɔ he” akɛ esa nɔ lɛ, esa akɛ wɔna su ni David hiɛ lɛ: “Yehowa, tsɔɔmɔ mi bo diɛŋtsɛ ogbɛi lɛ, ha male bo diɛŋtsɛ otempɔŋi lɛ! Ha manyiɛ o-nɔkwale lɛ mli, ni otsɔɔ mi nii; ejaakɛ bo ji miyiwalaheremɔ Nyɔŋmɔ lɛ.”—Lala 25:4, 5; 139:17, 21.
BƆ NI AKƐ ESHAFEELƆI YEƆ AHAA
4. Mɛni hewɔ ni ehe hiaa akɛ wɔɔle gbɛ ni wɔɔtsɔ nɔ wɔkɛ eshafeelɔi aye aha lɛ?
4 Akɛ Adam seshibii lɛ, adesai fɛɛ “efee esha, ni Nyɔŋmɔ anunyam lɛ ebɔ amɛ.” (Rom. 3:23; 5:12) Wɔshihilɛ lɛ jeee nɔ ni hiɛnɔkamɔ bɛ mli, eyɛ mli akɛ, “Kristo Yesu ba je nɛŋ eba eshafeelɔi ayiwalaheremɔ.” Mɔ fɛɛ mɔ ni kpɛlɛɔ enɛ nɔ ni naa hemɔkɛyeli yɛ Kristo mli lɛ baanyɛ ana eshaifaa eyɛ mli akɛ ehi shi akɛ eshafeelɔ yɛ tsutsu be ni eho lɛ mli.—1 Tim. 1:12-16; 1 Kor. 6:9-11; Bɔf. 10:43; Rom. 6:12-14.
5. Mɛni he hiaa ni afee kɛji akɛ Kristofonyo ko fee esha ni hiɛdɔɔ yɔɔ mli?
5 Shi mɛni, kɛji akɛ mɔ ni etsake etsui, ni ehe Kristo nɔ eye ni ebatsɔ Kristofonyo ni abaptisi lɛ lɛ gbɔjɔ aloo egbee esha ni hiɛdɔɔ yɔɔ mli lɛ mli hu? Abaanyɛ akɛfa lɛ, tamɔ bɔ ni akɛfa bɔfo Petro yɛ Yesu ni ekwa lɛ hewɔ. Kɛji akɛ onu onaanyo Kristofonyo ko ni egbee esha ni hiɛdɔɔ yɔɔ mli he lɛ, mɛni ji nɔ ni obaafee? Yɛ anɔkwale suɔmɔ hewɔ lɛ obaasumɔ ni nakai mɔ lɛ ana mumɔŋ yelikɛbuamɔ. Yɛ be babaoo mli lɛ, mumɔŋ onukpai loo nɔkwɛlɔi ni amɛtu amɛhe amɛha ni yɔɔ asafo lɛ mli lɛ ji mɛi ni atsɔɔ amɛnɔ akɛ yelikɛbuamɔ nɛɛ haa. Kɛ mɛɛ yiŋtoo? Beni afee ni asaa Kristofonyo ni tɔ̃ɔ lɛ yɛ mumɔŋ.—Gal 6:1; 1 Yoh. 5:16; 2 Tim. 2:23-26; Yuda 23.
6. Kɛji akɛ Kristofonyo ni efee esha ni hiɛdɔɔ yɔɔ mli tsakeee etsui lɛ, mɛni esa akɛ afee?
6 Shi yɛ bei komɛi amli lɛ, mɔ ko ni ekɛ afii babaoo enyiɛ anɔkwa Kristojamɔ gbɛ nɔ lɛ gbaa afa, ekɛ ehe haa jeŋba ni Nyɔŋmɔ gbeyeishemɔ bɛ mli ni yɛ mɔdɛŋ babaoo ni onukpai lɛ aaabɔ ni amɛkɛye amɛbua lɛ lɛ fɛɛ sɛɛ lɛ etsakeee etsui. Biblia lɛ tsɔɔ akɛ enɛ ba yɛ klɛŋklɛŋ afii oha lɛ mli ni ebaa mli ŋmɛnɛ hu. (2 Pet. 2:10-20) Belɛ mɛni ji nɔ ni esa akɛ afee? Nyɔŋmɔ tsɔɔ enilee kɛ jalɛsaneyeli ni yeɔ emuu lɛ nɔ ejajeɔ akɛ esa akɛ atsu enɛ he nii yɛ gbɛ ni yɔɔ shiŋŋ nɔ beni afee ni akɛbaa asafo lɛ jeŋba kɛ mumɔŋ hetsemɔ lɛ yi, ni nifeemɔ nɛɛ hu baahɛle eshafeelɔ lɛ shi ni ena jwɛŋmɔ. Nyɔŋmɔ Wiemɔ lɛ faa akɛ: “Nyɛjiea mɔfɔŋ lɛ yɛ nyɛteŋ.” Enɛ tsɔɔ akɛ abaashwie lɛ kɛjɛ Kristofoi asafo lɛ mli.—1 Kor. 5:13; 1 Tim. 1:20; okɛto 5 Mose 17:7 he.
7. Mɛɛ sanebimɔi teɔ shi ni kɔɔ mɔ ni ashwie lɛ kɛjɛ asafo lɛ mli lɛ he?
7 Eyɛ awerɛho akɛ mɔ ko aaaha ejeŋba kɛ esubaŋ hewɔ lɛ afee nii ni tamɔ nɛkɛ ashi lɛ, shi kɛji akɛ ana ashwie lɛ lɛ sɛɛ lɛ, te esa akɛ asafo lɛ mli anɔkwafoi lɛ asusu nɛkɛ gbɔmɔ nɛɛ he ni amɛkɛ lɛ aye aha tɛɛŋ? Esa akɛ amɛkɛ lɛ aye tamɔ bɔ ni amɛkɛ amɛnaanyo ko, hefatalɔ nitsulɔ ko aloo mɔ ko ni amɛkɛ lɛ kpeɔ yɛ gbɛjegbɛi anɔ baaye? Ani esa akɛ amɛfala lɛ aloo amɛŋa lɛ, aloo amɛkɛ lɛ agba sane fioo yɛ be mli ni amɛkɛ mɔ ni ashwie lɛ lɛ ekpe hiɛ kɛ hiɛ lɛ? Shi nii ni aaatsu aha lɛ aloo apaa ni aaabɔ lɛ lɛ hu? Saji babaoo ni tamɔ nɛkɛ teɔ shi. Wɔbaanyɛ wɔda shi babaoo akɛ Yehowa Nyɔŋmɔ kɛ gbɛtsɔɔmɔ ni kɔɔ gbɛ ni wɔɔtsɔ nɔ wɔkɛ efɔŋfeelɔi ni ashwie amɛ lɛ aye aha lɛ haa wɔ!
YESU ŊAAWOO NI KƆƆ EFƆŊFEELƆI AHE
8, 9. (a) Mɛɛ ŋaawoo Yesu kɛha ni kɔɔ mɔ ni efee esha lɛ he? (b) Mɛɛ esha nɛkɛ Yesu wieɔ he yɛ biɛ lɛ?
8 Yesu kɛ ŋaawoo ko ha yɛ mɔ ni efee esha lɛ he yɛ be mli ni Nyɔŋmɔ kahe ekɛ Yudafoi lɛ yeɔ lolo akɛ E-maŋbii lɛ. Kristo kaselɔi lɛ ni amɛ diɛŋtsɛ lɛ amɛji Yudafoi lɛ baanu nɛkɛ ŋaawoo nɛɛ shishi yɛ shihilɛ ni yɔɔ Yudafoi lɛ ateŋ lɛ hewɔ. Wɔhu ehe baaba sɛɛnamɔ aha wɔ ejaakɛ akɛ ŋaawoo ni Yesu kɛha lɛ hu baatsu nii yɛ sɛɛ mli beni Nyɔŋmɔ eto Kristofoi asafo lɛ ema shi lɛ. (Mat. 21:43) Kristo je shishi akɛ: “Shi kɛji onyɛmi ko tɔ onɔ lɛ, yaa ni oyatsɔɔ lɛ etɔmɔ lɛ, okɛ lɛ yii enyɔ kɛkɛ. Kɛji eboò toi lɛ, nyɛmi efee nyɛmi.”—Mat. 18:15.
9 Eka shi faŋŋ akɛ jeee esha loo “tɔmɔ” ni ji sane bibioo ko ni baaba mɔ kɛ enyɛmi teŋ lɛ he ewieɔ taakɛ wɔkaneɔ yɛ Filipibii 4:2, 3 lɛ. (Okɛto Abɛi 12:18 he.) Shi moŋ etamɔ nɔ ni eetsɔɔ eshai loo tɔmɔi tamɔ shishiumɔ loo heguɔgbee, eshai loo tɔmɔi ni baanyɛ aha ashwie mɔ ko kɛjɛ asafoa lɛ mli. Kɛji akɛ mɔ ni atɔ enɔ aloo afee esha ashi lɛ lɛ baanyɛ asaa sane lɛ yɛ teemɔŋ lɛ, ebaanyɛ ‘ehere enyɛmi lɛ’; kɛji akɛ nɔtɔlɔ loo eshafeelɔ lɛ yoo etɔmɔ lɛ yɛ etsui mli ni etsake ni ebɔ mɔdɛŋ ni esaa nɔtɔmɔ ni eba lɛ, belɛ ehe ehiaaa ni atsa sane lɛ nɔ dɔŋŋ.
10, 11. Kɛji akɛ nakai klɛŋklɛŋ nifeemɔ lɛ yeee omanye lɛ, mɛni ji nɔ ni esa akɛ afee agbɛnɛ?
10 Shi kɛji akɛ nakai nifeemɔ lɛ yeee omanye hu? Yesu tee nɔ ekɛɛ akɛ: “Shi kɛji [nɔtɔlɔ lɛ] ebooo bo toi lɛ, ŋɔɔ mɔ kome loo mɛi enyɔ ofata ohe, koni odasefoi enyɔ loo etɛ naa lɛ sane fɛɛ sane ama shi.”—Mat. 18:16.
11 Mɛi ni akɛ amɛ fataa amɛhe baa lɛ baafee “odasefoi,” jeee mɛi ni fiii amɛteŋ mɔ ko sɛɛ ni miibɔ mɔdɛŋ ni amɛsaa amɛteŋ kɛkɛ ni toiŋjɔlɛ aba. Amɛtamɔ mɛi ni baafee gbɔmɛi aŋkroaŋkroi ni ‘amɛye’ efɔŋfeemɔ ni etee nɔ lɛ he ‘odase,’ tamɔ mɛi ni le shika he kpaŋmɔ ni amɛbote mli lɛ he nɔ ko ni no hewɔ lɛ amɛbaanyɛ amɛye odase kɛji akɛ shishiumɔ eba. Aloo, kɛji akɛ efɔŋfeemɔ lɛ ji nɔ ko ni kɔɔ kpaŋmɔ ko loo nɔ ko ni tamɔ nakai ni aku mli he lɛ, abaanyɛ akɛ mumɔŋ nyɛmimɛi ni he esa ni yɔɔ shihilɛi ni tamɔ nakai lɛ ahe niiashikpamɔ loo nilee aba. Amɛbaanyɛ amɛye anɔkwalei lɛ kɛ nɔ ni mɔ ni afolɔɔ enaa lɛ kɛɔ yɛ nɛkɛ kpee nɛɛ shishi lɛ he odase kɛji ebaabi ni atsu naagbee nifeemɔ lɛ he nii lɛ.
12. Mɛni ji naagbee nifeemɔ, taakɛ Yesu tsɔɔ mli lɛ?
12 Yesu kɛ naagbee nifeemɔ ni kɔɔ eshafeelɔ lɛ he lɛ ha: “Ni kɛji amɛhu ebooo amɛ toi lɛ, yaakɛɛ asafo lɛ; ni kɛji asafo lɛ hu nɔ etoi gbo yɛ lɛ, buu lɛ tamɔ wɔŋjalɔ kɛ toohelɔ.” (Mat. 18:17) Hɛɛ, akɛ naagbee mɔdɛŋ ni aaabɔ koni agbala efɔŋfeelɔ lɛ kɛjɛ egbɛ lɛ nɔ lɛ, akɛ sane lɛ baafɔ onukpai ni yɔɔ asafo lɛ mli ni amɛdara yɛ mumɔŋ lɛ ahiɛ. Amɛbaanyɛ amɛbo sane lɛ toi ni amɛbo odasefoi lɛ hu toi. Ni amɛbaanyɛ amɛkɛ Nyɔŋmɔ Wiemɔ lɛ aka nɔtɔlɔ lɛ. Shi kɛji akɛ etsakeee etsui lɛ, amɛbaatsu nii amɛha asafo lɛ, ni amɛtsɔse lɛ, ani amɛbaa asafo lɛ yi kɛjɛ nɛkɛ oshara nɛɛ he kɛtsɔ shwiemɔ ni amɛaashwie lɛ lɛ nɔ.
NO ETSƆƆƆ MƆBƆNALƐ NI ABƐ KƐHA MƐI KROKOMƐI
13, 14. Te wɔɔfee tɛɛŋ wɔna nɔmimaa akɛ Yesu etsɔɔɔ akɛ esaaa akɛ ajieɔ mɔbɔnalɛ kpo atsɔɔ mɛi krokomɛi?
13 Beni afee ni eye ebua wɔ ni wɔnu bɔ ni esa akɛ wɔba wɔjeŋ yɛ gbɔmɔ ni tamɔ nɛkɛ he lɛ, ehe miihia ni wɔnu Yesu wiemɔi: “Buu lɛ tamɔ wɔŋjalɔ kɛ toohelɔ” lɛ shishi. Yɛ sɛɛ mli afii ohai lɛ amli lɛ, Yudafoi ahiɛnyiɛlɔi lɛ ateŋ mɛi komɛi jie jwɛŋmɔ ni yɔɔ keketee kpo tamɔ akɛ esaaa akɛ Yudanyo yeɔ ebuaa Jeŋmaŋnyo ni oshara ko eba enɔ ni miihe agbo po. Nɛkɛ su ni mɔbɔnalɛ bɛ mli nɛɛ jeee nɔ ni ajieɔ lɛ kpo atsɔɔ Jeŋmajiaŋbii pɛ. Akɛ nɔkwɛmɔ nɔ lɛ, yɛ Yesu abɛbua ni kɔɔ mɔ ni ji naanyo diɛŋtsɛ lɛ he lɛ, Levinyo kɛ osɔfo fɛɛ kpoo akɛ amɛaaye amɛbua amɛnaanyo Yudanyo ni epila, eyɛ mli akɛ Samarianyo fee nakai yɛ sɛɛ mli.—Luka 10:29-37.
14 Shi Yesu nyɛŋ atsɔɔ yɛ Mateo 18:17 akɛ esaaa akɛ ekaselɔi lɛ jieɔ mlihilɛ kpo amɛtsɔɔ mɔ ko, tamɔ yɛ oshara ko ni eba aloo nɔ ko ni he ehia akɛ afee aha mɔ ko lɛ mli. Yesu jie mlihilɛ ni tamɔ nɛkɛ kpo etsɔɔ Jeŋmajiaŋbii lɛ ateŋ mɛi komɛi. Akɛ nɔkwɛmɔ nɔ lɛ, efee nakai eha Sirofoinike yoo ko. Eyɛ mli akɛ Yesu, ekaselɔi lɛ kɛ yoo lɛ diɛŋtsɛ kpɛlɛ nɔ akɛ shihilɛ mli ni eyɔɔ lɛ yɛ sɔrɔto kwraa ejaakɛ Jeŋmaŋnyo ji lɛ ni atsu Yesu kɛtee Yudafoi lɛ aŋɔɔ moŋ, shi kɛlɛ Yesu tsa ebiyoo lɛ. (Mat. 15:21-28; Mar. 7:24-30) Yesu jie adesai amlihilɛ nɛɛ nɔŋŋ kpo yɛ be mli ni Roma asraafonyo nukpa ko kpa lɛ fai ni etsa etsulɔ ko ni miina nɔ kɛ kuumɔ hela lɛ. Asraafonyo nukpa nɛɛ kpɛlɛ nɔ akɛ ekpaaa Yesu gbɛ, akɛ Yudanyo tsɔɔlɔ lɛ, ni eba eshia. Shi kɛlɛ, “Yudafoi lɛ anukpai” lɛ kpa Yesu fai ni ejie mɔbɔnalɛ kpo etsɔɔ nɛkɛ Jeŋmaŋnyo ni sa nɛɛ, ni efee nakai. (Luka 7:1-10; Mat. 8:5-13) No hewɔ lɛ nɔ ni Yesu kɛɛ akɛ abu mɔ ko tamɔ “wɔŋjalɔ kɛ toohelɔ” lɛ etsɔɔɔ akɛ belɛ egu mɔbɔnalɛ kɛ mlihilɛ ni aaajie lɛ kpo. Belɛ mɛni ji nɔ ni etsɔɔ?
“TAMƆ . . . TOOHELƆ”
15. Te Yudafoi lɛ buɔ toohelɔi, ni te amɛkɛ amɛ yeɔ amɛhaa tɛɛŋ?
15 Klɛŋklɛŋ lɛ, te Yudafoi lɛ buɔ toohelɔi, ni te amɛkɛ amɛ yeɔ amɛhaa tɛɛŋ?
“Abuɔ toohelɔi ni yɔɔ Kpaŋmɔ Hee lɛ mli lɛ akɛ sɛɛgbɛtsɔɔlɔi kɛ hemɔkɛyeli kwalɔi, mɛi ni wɔŋjalɔi ni amɛkɛ amɛ yeɔ be fɛɛ mli lɛ eha amɛtsɔmɔ mɛi ni amɛbule amɛhe, dɛŋdadei ni jɛɔ amɛsuɔmɔ mli amɛŋmɛɔ gbɛ ni yiwalɔ lɛ kɛ amɛ atsuɔ nii. Abuɔ amɛ akɛ eshafeelɔi . . . tamɔ ajwamaŋbɔlɔi . . . tamɔ wɔŋjalɔi. . . . Akɛ amɛ ebɔɔɔ, gbɔmɛi ni buɔ amɛhe lɛ tsiɔ amɛhe kɛjɛɔ amɛhe, amɛnanemɛi kɛ hefatalɔi pɛ ji mɛi ni tamɔ amɛ, mɛi ni ashɛrɛ amɛ ashwie.”—“Cyclopedia” ni M’Clintock kɛ Strong fee, Kpo. VIII, bf. 769.
Hɛɛ, Yesu toibolɔi lɛ le jogbaŋŋ akɛ Yudafoi taooo toohelɔi ni amɛtsiɔ amɛhe kɛjɛɔ amɛhe. Yudafoi lɛ tsɔɔ ŋtsɔidɔɔmɔ kɛ shishashaomɔ nɔ kɛkɛ amɛkɛ amɛ yeɔ jara yɛ gbɛ fioo ko nɔ, koni amɛwo too ni mla lɛ taoɔ akɛ amɛwo lɛ.
16, 17. Mɛni ji Yesu su loo ejeŋba yɛ toohelɔi komɛi ahe?
16 ‘Shi,’ mɔ ko baabi akɛ, ‘ani Yesu kɛ toohelɔi ebɔɔɔ?’ Ojogbaŋŋ, nyɛhaa wɔtaoa anɔkwasaji lɛ amli.
17 Ákɛ “Nyɔŋmɔ Toobi ni woɔ je lɛ he esha lɛ kɛyaa lɛ,” Yesu ji kane kɛha gbɔmɛi fɛɛ, eyɛ mli akɛ etsu Yudafoi lɛ ahe nii titri yɛ eshikpɔŋ nɔ sɔɔmɔ nitsumɔ be lɛ mli. (Yoh. 1:29; 8:12; Yes. 42:1, 6, 7; Mat. 10:5, 6; 15:24) Etamɔ tsofafeelɔ ni miiye kɛmiibua nakai Yudafoi lɛ fɛɛ ni ehe hiaa amɛ lɛ, mɛi ni fata he ji eshafeelɔi tamɔ ajwamaŋbɔlɔi, daatɔlɔi kɛ toohelɔi ni yɛ bei komɛi amli lɛ amɛyeee anɔkwale lɛ. Mateo Levi, toohelɔ ni asumɔɔɔ esane kwraa lɛ ji mɛi ni here yiwalaheremɔ he sane hee ni Yesu kɛba lɛ nɔ lɛ ateŋ mɔ kome. Mateo fɔ nine etsɛ Yesu kɛtee shia kɛha niyeli, ni enɛ ha Mateo kɛ toohelɔi krokomɛi ni yɔɔ ewiemɔ lɛ he miishɛɛ lɛ ná hegbɛ amɛnu anɔkwalei heei ni yɔɔ naakpɛɛ nɛɛ babaoo. (Luka 5:27-32; 19:1-10) Nɛkɛ gbɔmɛi nɛɛ ji hii ni ‘fee esha yɛ le ni amɛleee hewɔ,’ shi kɛlɛ ámɛfee klalo akɛ amɛbaato gbɛjianɔ koni “agbe” amɛhe eshai lɛ.—Bɔf. 3:19; Heb. 9:7.
18. Mɛni hewɔ ni gbɛ ni Yesu tsɔ nɔ ekɛ toohelɔi komɛi ye lɛ jeee nɔkwɛmɔ nɔ kɛha nɔ ni ewieɔ yɛ Mateo 18:17 lɛ?
18 Shi kɛlɛ, mɔdɛŋ ni Yesu bɔ ni eye toohelɔi ni “tsi bɛŋkɛ lɛ ni amɛbabo lɛ toi” lɛ odase “ni amɛnyiɛ esɛɛ” lɛ jeee nɔkwɛmɔ nɔ ni tsɔɔ gbɛ ni esa ákɛ akɛ eshafeelɔi ni tsakeee amɛtsui lɛ aye yɛ. (Mar. 2:15; Luka 15:1) Te wɔɔfee tɛɛŋ wɔle akɛ nakai enɛ ji? Eyɛ mli akɛ Kristo kɛ toohelɔi ye nii moŋ, shi bɔfo Paulo fa Kristofoi lɛ akɛ amɛkɛ eshafeelɔ ni ashwie lɛ kɛjɛ asafo lɛ mli lɛ “akayea nii tete.” (1 Kor. 5:11) Agbɛnɛ hu Yesu kɛɛ ekaselɔi lɛ ni amɛkɛ eshafeelɔ ni tsakeee etsui lɛ aye yɛ gbɛ ni amɛbuɔ nakai be lɛ mli toohelɔi lɛ nɔ. R. F. Weymouth shishitsɔɔmɔi lɛ kaneɔ akɛ: “Buu lɛ tamɔ ooobu Jeŋmaŋnyo loo toohelɔ.”—Okɛto The New International Version; The New English Bible lɛ ahe.
TE ABUƆ JEŊMAJIAŊBII LOO WƆŊJALƆI NI TE AKƐ AMƐ YEƆ AHAA TƐƐŊ?
19. Mɛni ji nɔ ni Biblia lɛ tsɔɔ akɛ eji wekukpaa ni ka Yudafoi kɛ mɛi ni jeee Yudafoi lɛ ateŋ?
19 Bɔfoi lɛ ni nu Yesu wiemɔi ni aŋma yɛ Mateo 18:17 lɛ ji Yudafoi ni amɛle akɛ amɛmaŋbii lɛ kɛ Jeŋmajiaŋbii lɛ ebɔɔɔ. Mla lɛ kɛ sɔrɔtofeemɔ ba Yudafoi kɛ Jeŋmajiaŋbii ateŋ, ni enɛ ha Israelbii lɛ tse amɛhe kɛjɛ jeŋmaji ni ebɔle amɛhe lɛ ahe. (5 Mose 7:1-4; 4 Mose 15:37-41; Efe. 2:11-14) Yɛ afi 33 Ŋ.B. Hehoo gbi lɛ nɔ lɛ, Yudafoi lɛ boteee Roma amralo lɛ maŋtsɛwe lɛ “koni amɛkabule amɛhe.” (Yoh. 18:28) Ni agbɛnɛ bɔ ni mligbalamɔ ni ka Yudafoi lɛ kɛ Samariabii ni amɛ po amɛheɔ. Klɛŋklɛŋ Mose Woji Enumɔ lɛ amɛyeɔ lɛ da ha lɛ ha yoo ko ni yɔɔ nu bu ko he ni ‘yɛ Yudanyo ni Yesu ji fɛɛ sɛɛ lɛ’ ebi lɛ nu lɛ naa kpɛ ehe.—Yoh. 4:9.
20. Mɛni abaanyɛ akase kɛjɛ Petro kɛ Kornelio niiashikpamɔ lɛ mli ni tsɔɔ bɔ ni Yudafoi kɛ mɛi ni jɛ maji krokomɛi amli lɛ yeɔ haa lɛ mli?
20 Nɔ ni fata he lɛ, yɛ afi 36 Ŋ.B., beni Nyɔŋmɔ to eyiŋ akɛ ebaafee nɔkwɛmɔ nɔ ko ni tsɔɔ akɛ abaanyɛ akpɛlɛ Jeŋmajiaŋbii foolɔi lɛ akɛ Maŋtsɛyeli lɛ niyelɔi lɛ anɔ lɛ, etsɔɔ bɔfo Petro gbɛ kɛtee Roma asraafoi oha atsɛ Kornelio ŋɔɔ. Shi Petro kɛɛ Kornelio akɛ: “Nyɛ diɛŋtsɛ nyɛle bɔ ni Yudanyo bɛ hegbɛ akɛ ekɛ mɔ ko ni ji maŋ kroko nɔ nyo bɔɔ aloo ebaa eŋɔɔ.” (Bɔf. 10:28) Petro wiemɔ lɛ tsɔɔ bɔ ni Yudafoi lɛ nuɔ he waa akɛ esaaa akɛ amɛkɛ nuu ko ni jɛ maŋ kroko nɔ bɔɔ naanyo kwraa. Agbɛnɛ, beni ana ale akɛ Petro etee Kornelio shia lɛ, Yudafoi Kristofoi lɛ ateŋ mɛi komɛi te shi wo Petro amɛkɛɛ “otee hii foolɔi aŋɔɔ ni okɛ amɛ yaye nii.” Hɛɛ, Yudafoi lɛ buɔ enɛ akɛ eji nyaŋemɔ nii akɛ mɔ ko aaaya “jeŋmajiaŋbii” lɛ aŋɔɔ ni ekɛ amɛ aaaye nii.—Bɔf. 11:1-3; okɛto Galatabii 2:12 he.
21. Belɛ te onuɔ nɔ ni Yesu kɛɛ ni kɔɔ eshafeelɔ ni tsakeee etsui lɛ he akɛ etamɔ “wɔŋjalɔ [loo Jeŋmaŋnyo] kɛ toohelɔ” lɛ shishi ohaa tɛɛŋ?
21 No hewɔ lɛ Ŋmalɛi lɛ yeɔ ebuaa wɔ koni wɔnu Yesu ŋaawoo akɛ abu efɔŋfeelɔ ni tsakeee etsui ni booo asafo lɛ toi lɛ akɛ “wɔŋjalɔ [jeŋmaŋnyo] kɛ toohelɔ” lɛ shishi. Kristo ŋaawoo lɛ kɛ nitsumɔ ŋmɛnɛ lɛ etsɔɔɔ akɛ wɔɔbu efɔŋfeelɔ lɛ akɛ mɔ ko ni yɔɔ akutso lɛ mli kɛkɛ, ejaakɛ enɛ etsɔɔɔ akɛ nakai ji bɔ ni Yesu kaselɔi lɛ nu nɔ ni ekɛɛ lɛ shishi ha. Wɔbaayoo enɛ jogbaŋŋ kɛtsɔ ŋaawooi krokomɛi ni yɔɔ Kristofoi a-Hela Ŋmalɛi lɛ amli lɛ ni wɔɔpɛi mli lolo lɛ nɔ, ejaakɛ ebaaye ebua wɔ ni wɔkɛ nɔ ni eba yɛ shihilɛ mli diɛŋtsɛ ŋmɛnɛ ni kɔɔ gbɔmɛi ni ashwie amɛ kɛjɛ Kristofoi asafo lɛ mli Iɛ ahe lɛ atsu nii.b
[Shishigbɛ niŋmai]
a Yɛ Mose mla lɛ shishi lɛ, eshai komɛi ni hiɛdɔɔ yɔɔ mli tamɔ gbalafitemɔ, nuu kɛ nuu loo yoo kɛ yoo ni kɛ amɛhe feɔ yakayakanii, gbɔmɔgbee kɛ hemɔkɛyeli kwamɔ lɛ jeee saji ni mɛi enyɔ pɛ kɛkɛ saa yɛ amɛteŋ, ni mɔ ni atɔ enɔ lɛ miikpɛlɛ nɔtɔlɔ lɛ awerɛho kɛ mɔdɛŋ ni ebɔɔ akɛ eeesaa nɔtɔmɔ Iɛ nɔ. Shi moŋ, atsuɔ nɛkɛ eshai ni hiɛdɔɔ yɔɔ mli nɛɛ ahe nii kɛtsɔɔ onukpai, kojolɔi kɛ osɔfoi lɛ anɔ.—3 Mose 20:10,13; 4 Mose 5:11-31; 35:12,19-25; 5 Mose 13:6-15; 17:2-9; 19:16-19; 22:22.
b Ajie kɛjɛ September 15, 1981 Buu-Mɔɔ lɛ mli
MƐNI JI NƆ NI “WƆŊJALƆ[LOO JEŊMAŊNYO] KƐ TOOHELƆ” LƐ TSƆƆ?
◼ Yudafoi lɛ buɔ toohelɔi akɛ mɛi ni ashɛrɛ amɛ ashwie
◼ Yudafoi lɛ boteee amralo Jeŋmaŋnyo lɛ maŋtsɛwe lɛ
◼ Petro kɛɛ akɛ ‘mla eŋmɛɛɛ gbɛ’ akɛ Yudanyo aaabɛŋkɛ Jeŋmaŋnyo
◼ Yudafoi Kristofoi lɛ anaa kpɛ amɛhe akɛ Petro kɛ Kornelio ye nii
[Mfoniri ni yɔɔ baafa 9]
Yudafoi lɛ kpooɔ toohelɔi ni amɛbuɔ amɛ akɛ eshafeelɔi lɛ. Nɔ ni amɛkɛ amɛ tsuɔ pɛ ji ni amɛwo too ni mla lɛ biɔ lɛ