Aamɛ kɛ ‘Gbɛkwɛmɔ kɛ Hehiamɔ’

“Bɔɔnii lɛ agbɛkwɛmɔ kɛ hehiamɔ lɛ miimɛ Nyɔŋmɔ bii lɛ akpojiemɔ lɛ.”—ROMABII 8:19, NW.

 1. Shihilɛ ni Kristofoi yɔɔ mli ŋmɛnɛ lɛ tamɔ klɛŋklɛŋ afii oha lɛ mli Kristofoi lɛ anɔ̃ lɛ yɛ mɛɛ gbɛ nɔ?

SHIHILƐ ni anɔkwa Kristofoi yɔɔ mli ŋmɛnɛ lɛ tamɔ klɛŋklɛŋ afii oha lɛ mli Kristofoi lɛ anɔ̃ lɛ. Gbalɛ ko ye ebua Yehowa tsuji ni yɔɔ nakai gbii lɛ amli lɛ koni amɛyoo be mli ni Mesia lɛ baapue. (Daniel 9:24-26) Nakai gbalɛ lɛ nɔŋŋ gba Yerusalem hiɛkpatamɔ, shi nɔ ko bɛ mli ni ye ebua Kristofoi lɛ koni amɛtsɔ hiɛ amɛle be mli ni abaakpata nakai maŋtiase lɛ hiɛ. (Daniel 9:26b, 27) Nakai nɔŋŋ hu yɛ Nyɔŋmɔ duromɔ naa lɛ, gbalɛ ko ha anɔkwa Biblia kaselɔi ni yɔɔ afii ohai 19 lɛ mli lɛ fee klalo koni amɛkwɛ gbɛ. Yɛ “bei kpawo” lɛ ni yɔɔ Daniel 4:25 lɛ ni amɛkɛtsá “jeŋmaji abe” lɛ hewɔ lɛ, amɛkpa gbɛ akɛ Kristo nine baashɛ Maŋtsɛyeli hewalɛ nɔ yɛ 1914. (Luka 21:24, King James Version; Ezekiel 21:30-32) Yɛ be mli ni gbalɛi babaoo yɔɔ Daniel wolo lɛ mli lɛ, enɛɛmɛi ateŋ eko nyɛɛɛ ahã ŋmɛnɛŋmɛnɛ beaŋ Biblia kaselɔi lɛ anyɛ abu be pɔtɛɛ ni abaakpata Satan nibii agbɛjianɔtoo lɛ fɛɛ hiɛ. (Daniel 2:31-44; 8:23-25; 11:36, 44, 45) Shi kɛlɛ, etsɛŋ kwraa ni enɛ baaba, ejaakɛ “naagbee be” lɛ mli wɔyɔɔ lɛ.—Daniel 12:4.a

Saramɔ yɛ Be ni Kristo Eba lɛ Mli

2, 3. (a) Mɛni ji odaseyelii titrii ni tsɔɔ akɛ ba ni Kristo eba yɛ maŋtsɛyeli hewalɛ mli lɛ mli wɔyɔɔ lɛ? (b) Mɛni tsɔɔ akɛ esa akɛ Kristofoi aya nɔ asara yɛ ba ni Yesu Kristo eba lɛ mli?

² Eji anɔkwale akɛ, gbalɛ ko hã Kristofoi bɔi nibii agbɛkwɛmɔ dani akɛ Maŋtsɛyeli hewalɛ wo Kristo dɛŋ yɛ 1914. Shi “okadi” ni Kristo kɛha ni kɔɔ beni eba lɛ kɛ nibii agbɛjianɔtoo lɛ naagbee he lɛ kɔɔ nibii ni baaba lɛ ahe. Ni abaana enɛɛmɛi ateŋ nɔ ni fa beni ba ni eba lɛ eje shishi lɛ sɛɛ. Nibii ni tamɔ—tai, hɔmɔ, shikpɔŋhosomɔi, tsɛŋemɔ helai, mlakwamɔ ni baafá, Kristofoi ayiwaa, kɛ Maŋtsɛyeli lɛ he sanekpakpa lɛ ni aaashiɛ yɛ jeŋ fɛɛ lɛ—feɔ odaseyeli titri ni tsɔɔ akɛ ba ni Kristo eba yɛ maŋtsɛyeli hewalɛ mli lɛ mli wɔyɔɔ lɛ.—Mateo 24:3-14; Luka 21:10, 11.

³ Kɛ̃lɛ, nɔ ni anaa yɛ Yesu shɛɛ wiemɔi ni ekɛha ekaselɔi lɛ fɛɛ mli ji akɛ: “Nyɛkwɛa jogbaŋŋ, nyɛshia kpe . . . nyɛsaraa!” (Marko 13:33, 37; Luka 21:36) Ŋaawoo ni kɔɔ saramɔ he lɛ fɛɛ kanemɔ jogbaŋŋ tsɔɔ akɛ jeee saramɔ ni aaasara jogbaŋŋ ni akɛna ba ni eba lɛ shishijee he okadi Kristo wieɔ he titri lɛ. Shi moŋ, eefã enɔkwa kaselɔi lɛ koni amɛsara yɛ beni eba lɛ mli. Mɛni he anɔkwa Kristofoi baaya nɔ asara yɛ lɛ?

 4. Okadi ni Yesu kɛha lɛ baatsu mɛɛ yiŋtoo he nii?

⁴ Yesu kɛ egbalɛ kpeteŋkpele lɛ ha akɛ hetoo kɛha sanebimɔ akɛ: “Mɛɛ be mli nibii nɛɛ baaba [nibii ni baaba ni baaya ayagbe naa kɛ Yudafoi anibii agbɛjianɔtoo lɛ hiɛkpatamɔ], ni mɛni baafee ba ni oba lɛ kɛ nibii agbɛjianɔtoo lɛ naagbee lɛ he okadi?” (Mateo 24:3, NW) Jeee be mli ni Kristo eba lɛ pɛ kɛkɛ ni okadi ni agba yɛ he lɛ baaha ayoo, shi nibii ni baaba ni kɛ ŋmɛnɛŋmɛnɛ yiwalɛ nibii agbɛjianɔtoo lɛ baaba enaagbee lɛ hu.

 5. Mɛɛ gbɛ nɔ Yesu tsɔɔ yɛ akɛ yɛ be mli ni eba yɛ mumɔŋ lɛ, kɛ̃lɛ ‘ebaaba’ lolo?

⁵ Yesu tsɔɔ akɛ ekɛ hewalɛ kɛ anunyam baaba ‘beni eba’ (Hela, pa·rou·siʹa) lɛ mli. Ejaje yɛ ‘ebaa’ ni tamɔ nɛkɛ (ni Hela wiemɔ erʹkho·mai sui srɔtoi tsɔɔ mli lɛ) he akɛ: “Kɛkɛ ni gbɔmɔ bi lɛ okadi lɛ aaapue yɛ ŋwɛi, ni no lɛ shikpɔŋ lɛ nɔ akutsei lɛ fɛɛ aaawo yara, ni amɛaana gbɔmɔ bi lɛ akɛ eeba yɛ ŋwɛi atatui lɛ anɔ kɛ hewalɛ kɛ anunyam babaoo. . . . Shi nyɛkasea agbami tso abɛ ni ebuɔ lɛ: beni eniji lɛ efrɔke ni ebɔi baai fũmɔ lɛ, nyɛle akɛ latsaa be lɛ eshɛ eta. Nakai nɔŋŋ nyɛ hu, beni nyɛaana nii nɛɛ fɛɛ lɛ, nyɛlea akɛ [Kristo] eshɛ agboi lɛ anaa etã. . . . No hewɔ lɛ nyɛsaraa, ejaakɛ nyɛleee nɔ̃ ŋmɛlɛtswaa nɔ ni nyɛ-nuntsɔ lɛ baa. . . . No hewɔ lɛ nyɛ hu nyɛsaa nyɛhe nyɛtoa, ejaakɛ nɔ̃ ŋmɛlɛtswaa ni nyɛsusuuu lɛ nɔ gbɔmɔ bi lɛ baa.”—Mateo 24:30, 32, 33, 42, 44, wɔma efã ko nɔ mi.

Mɛni Hewɔ Yesu Kristo Baa?

 6. “Babilon Kpeteŋkpele” lɛ hiɛkpãtãmɔ lɛ baaba yɛ mɛɛ gbɛ nɔ?

⁶ Eyɛ mli akɛ eji Maŋtsɛ bianɛ kɛjɛ 1914 moŋ, shi gbɛjianɔtoi kɛ aŋkroaŋkroi akojomɔ yɛ ni esa akɛ Yesu Kristo afee dani ekɛ hiɛkpatamɔ kojomɔ aba mɛi ni enaa akɛ amɛji efɔŋfeelɔi lɛ anɔ. (Okɛto 2 Korintobii 5:10 he.) Etsɛŋ ni Yehowa kɛbaawo maŋkwramɔŋ nɔyelɔi lɛ ayitsoŋ ni amɛkpata “Babilon Kpeteŋkpele” lɛ, jeŋ apasa jamɔ maŋtsɛyeli lɛ hiɛ. (Kpojiemɔ 17:4, 5, 16, 17) Bɔfo Paulo je gbɛ ewie akɛ Yesu Kristo baakpãtã “mlakwamɔ gbɔmɔ lɛ”—Kristendom osɔfoi ni amɛkwa hemɔkɛyeli lɛ, ni ji “Babilon Kpeteŋkpele” lɛ fã titri lɛ hiɛ. Paulo ŋma akɛ: “Abaajie mlakwalɔ lɛ kpo, mɔ ni Nuntsɔ Yesu kɛ edaaŋ mumɔ lɛ aaagbe ni ekɛ ba ni eba lɛ puemɔ lɛ aaakpata ehiɛ lɛ.”—2 Tesalonikabii 2:3, 8, NW.

 7. Kɛ́ gbɔmɔ Bi lɛ ba yɛ enunyam lɛ mli lɛ, mɛɛ kojomɔ ekɛbaaha?

⁷ Yɛ wɔsɛɛ be ni ebɛŋkɛ lɛ mli lɛ, Kristo baadamɔ bɔ ni jeŋmaji lɛ amli gbɔmɛi lɛ fee amɛnii yɛ enyɛmimɛi ni yɔɔ shikpɔŋ nɔ lolo lɛ ahe lɛ nɔ ekojo amɛ. Wɔkaneɔ akɛ: “Beni gbɔmɔ bi lɛ aaaba yɛ enunyam lɛ mli, ni bɔfoi krɔŋkrɔŋi lɛ fɛɛ aaafata ehe lɛ, no mli lɛ eeeta enunyam sɛi lɛ nɔ; ni aaabua jeŋmaji lɛ fɛɛ naa yɛ ehiɛ, ni eeegbala amɛmli, taakɛ bɔ ni tookwɛlɔ gbalaa gwantɛŋi kɛ abotiai amli lɛ. Ni eeeŋɔ gwantɛŋi lɛ edamɔ eninejurɔ nɔ, shi abotiai lɛ, eeeŋɔ amɛ edamɔ ebɛku nɔ. Kɛkɛ lɛ maŋtsɛ lɛ aaakɛɛ mɛi ni yɔɔ eninejurɔ nɔ [gwantɛŋi] lɛ akɛ: . . . Gbiiabɔ kɛ̃ ni nyɛfee nyɛha minyɛmimɛi nɛɛ ateŋ bibioo kome lɛ, mi nɔŋŋ nyɛfee nyɛha lɛ. . . . Ni mɛnɛɛmɛi [abotiai] lɛ, amɛaatee naanɔ hejaramɔ mli; shi jalɔi lɛ aaatee naanɔ wala mli.”—Mateo 25:31-46.

 8. Te Paulo tsɔɔ Kristo baa koni ebakojo mɛi ni leee Nyɔŋmɔ lɛ mli eha tɛŋŋ?

⁸ Taakɛ átsɔɔ yɛ gwantɛŋi lɛ kɛ abotiai lɛ ahe abɛbua lɛ mli lɛ, Yesu kɛ naagbee fɔbuu kojomɔ baa gbɔmɛi fɛɛ ni sheee Nyɔŋmɔ gbeyei lɛ anɔ. Paulo shɛje enanemɛi heyelilɔi ni naa nɔ̃ lɛ amii akɛ “eeeha nyɛkɛ wɔ fɛɛ hejɔɔmɔ, beni aaajie Nuntsɔ Yesu kpo kɛaajɛ ŋwɛi kɛ ehewalɛ bɔfoi lɛ, mɔ ni kɛ lalilɛi aaatɔ owele yɛ mɛi ni leee Nyɔŋmɔ kɛ mɛi ni booo wɔ-Nuntsɔ Yesu Kristo sanekpakpa lɛ toi lɛ anɔ lɛ, mɛi ni aaaná nyɔmɔwoo ni ji naanɔ hiɛkpatamɔ kɛaajɛ Nuntsɔ lɛ hiɛ kɛ ehewalɛ anunyam lɛ he, beni eeeba ni aaawo ehiɛ nyam yɛ emɛi krɔŋkrɔŋi lɛ amli.” (2 Tesalonikabii 1:7-10) Akɛni saji ni kanyãa mɔ nɛɛ fɛɛ jwere wɔhiɛ hewɔ lɛ, ani esaaa akɛ wɔjieɔ hemɔkɛyeli kpo ni wɔkɛ hehiamɔ saraa Kristo baa lɛ?

Hehiamɔ ni Akɛmɛɔ Kristo Kpojiemɔ Lɛ

9, 10. Mɛni hewɔ mɛi ni afɔ amɛ mũ lɛ ni yɔɔ shikpɔŋ nɔ lolo lɛ kɛ hehiamɔ mɛɔ Yesu Kristo kpojiemɔ lɛ?

⁹ ‘Nuntsɔ Yesu kpojiemɔ kɛmiijɛ ŋwɛi’ lɛ efeŋ nɔ ni akɛ hiɛkpatamɔ baa efɔŋfeelɔi anɔ kɛkɛ, shi koni awo jalɔi lɛ anyɔmɔ hu. Ekolɛ Kristo nyɛmimɛi ni afɔ amɛ mũ ni eshwɛ yɛ shikpɔŋ nɔ lolo lɛ baana nɔ̃ dani Kristo kpojiemɔ lɛ aba, shi amɛmli filiɔ amɛ yɛ amɛ ŋwɛi hiɛnɔkamɔ ni yɔɔ nyam lɛ mli. Bɔfo Petro ŋma wolo eyaha Kristofoi ni afɔ amɛ mũ lɛ akɛ: “Babaoo ni nyɛnaa Kristo amanehului lɛ eko lɛ, nyɛmii ashɛa, koni enunyam kpojiemɔ lɛ mli hu nyɛmii ashɛ ni nyɛmli afili nyɛ.”—1 Petro 4:13.

¹⁰ Mɛi ni afɔ amɛ mũ lɛ etswa amɛfai shi akɛ amɛbaahi shi akɛ anɔkwafoi kɛyashi be mli ni Kristo ‘aaabua amɛnaa kɛya eŋɔɔ’ koni ana ‘amɛhemɔkɛyeli salɛ lɛ akɛ ejara wa kɛyaha yijiemɔ kɛ woo kɛ anunyam yɛ Yesu Kristo kpojiemɔ lɛ mli.’ (2 Tesalonikabii 2:1; 1 Petro 1:7) Abaanyɛ awie yɛ Kristofoi anɔkwafoi ni akɛ mumɔ efɔ́ amɛ nɛɛ ahe akɛ: “Áma Kristo odase lɛ nɔ mi shiŋŋ yɛ nyɛteŋ, no hewɔ lɛ duromɔ keenii ko eshwɛɛɛ nyɛ kwraa, yɛ be mli ni nyɛkɛ hehiamɔ mɛɔ wɔ-Nuntsɔ Yesu Kristo kpojiemɔ lɛ.”—1 Korintobii 1:6, 7, NW.

11. Mɛni Kristofoi ni afɔ amɛ mũ lɛ feɔ yɛ be mli ni amɛmɛɔ Yesu Kristo kpojiemɔ lɛ?

¹¹ Shwɛɛnii ni afɔ amɛ mũ lɛ nuɔ he tamɔ Paulo nɔŋŋ ni ŋma akɛ: “Misusuɔ akɛ ŋmɛnɛŋmɛnɛ amanehului nɛɛ kɛ anunyam ni wɔsɛɛ abaajie kpo aha wɔ lɛ yeee egbɔ” lɛ. (Romabii 8:18) Ehe ehiaaa ni akɛ be he akɔntaabuu awaje amɛhemɔkɛyeli. Amɛkɛ amɛhe woɔ Yehowa sɔɔmɔ mli ni dekã bɛ mli, ni amɛkɛ nɔkwɛmɔnɔ fɛfɛo hãa amɛnanemɛi “tooi krokomɛi” lɛ. (Yohane 10:16) Mɛi ni afɔ amɛ mũ nɛɛ le akɛ yiwalɛ gbɛjianɔtoo nɛɛ naagbee ebɛŋkɛ, ni amɛboɔ Petro kɔkɔbɔɔ lɛ toi akɛ: “Nyɛfimɔa nyɛjwɛŋmɔ hɛ, nyɛhiɛ akãa shi, ni nyɛŋɔa nyɛhiɛ nyɛfɔa duromɔ ni akɛbaaha nyɛ yɛ Yesu Kristo kpojiemɔ mli lɛ nɔ kwraa.”—1 Petro 1:13.

“Bɔɔnii lɛ Agbɛkwɛmɔ kɛ Hehiamɔ”

12, 13. Yɛ mɛɛ gbɛ nɔ “aŋɔ” adesa bɔɔnii lɛ “awo yakayakanii ashishi,” ni mɛni tooi krokomɛi lɛ kwɛɔ gbɛ?

¹² Ani tooi krokomɛi lɛ hu yɛ nɔ ko ni amɛkɛ gbɛkwɛmɔ kɛ hehiamɔ aaahi shi yɛ naa? Hɛ̃ɛ amɛyɛ eko kɛ nɔmimaa. Yɛ be mli ni ewie anunyam hiɛnɔkamɔ ni mɛi ni Yehowa eŋɔ amɛ akɛ emumɔŋ “bii” lɛ kɛ “Kristo nanemɛi niyelɔi” yɛ ŋwɛi Maŋtsɛyeli lɛ mli lɛ yɔɔ lɛ he lɛ, Paulo kɛɛ: “Bɔɔnii lɛ agbɛkwɛmɔ kɛ hehiamɔ miimɛ Nyɔŋmɔ bii lɛ akpojiemɔ lɛ. Ejaakɛ aŋɔ bɔɔnii lɛ awo yakayakanii ashishi, jeee yɛ amɛ diɛŋtsɛ amɛsuɔmɔ naa, shi kɛtsɔ mɔ ni ba amɛ shi lɛ nɔ, yɛ hiɛnɔkamɔ hewɔ akɛ, bɔɔnii lɛ diɛŋtsɛ hu baaye ehe kɛjɛ fitemɔ nyɔŋyeli lɛ mli koni amɛná Nyɔŋmɔ bii lɛ anunyam heyeli lɛ eko.”—Romabii 8:14-21, NW; 2 Timoteo 2:10-12.

¹³ Yɛ Adam esha lɛ hewɔ lɛ, aŋɔ eseshibii lɛ fɛɛ “awo yakayakanii ashishi,” afɔ amɛ akɛ mɛi ni ámɛtsɔmɔ nyɔji amɛha esha kɛ gbele. Amɛnyɛɛɛ amɛye amɛhe kɛjɛ nyɔŋyeli ni tamɔ nɛkɛ shishi. (Lala 49:8; Romabii 5:12, 21) Oo kwɛ bɔ ni tooi krokomɛi lɛ shweɔ ni ‘amɛye amɛhe kɛjɛ fitemɔ nyɔŋyeli lɛ mli’! Shi dani enɛ aaaba lɛ, esa akɛ nibii komɛi aba yɛ Yehowa bei kɛ yinɔi amli.

14. Mɛni baafee nɔ ni yɔɔ “Nyɔŋmɔ bii lɛ akpojiemɔ lɛ” mli, ni ebaaha adesai ‘aye amɛhe kɛjɛ fitemɔ nyɔŋyeli lɛ mli’ yɛ mɛɛ gbɛ nɔ?

¹⁴ Esa akɛ ‘ajie’ shwɛɛnii ni ji “Nyɔŋmɔ bii” lɛ ‘akpo’ klɛŋklɛŋ dã. Mɛni yɔɔ enɛ mli? Yɛ Nyɔŋmɔ be ni sa mli lɛ, ebaafee faŋŋ kɛha tooi krokomɛi lɛ akɛ “ásɔo” mɛi ni afɔ amɛ mũ lɛ anaa ágbe naa ni áwo amɛhiɛ nyam koni amɛkɛ Kristo aye maŋtsɛ. (Kpojiemɔ 7:2-4) ‘Abaajie’ “Nyɔŋmɔ bii” ni átee amɛ shi lɛ hu ‘kpo’ yɛ be mli ni amɛkɛ Kristo feɔ ekome kɛkpataa Satan yiwalɛ nibii agbɛjianɔtoo lɛ hiɛ lɛ. (Kpojiemɔ 2:26, 27; 19:14, 15) Kɛkɛ lɛ yɛ Kristo Afii Akpe Nɔyeli be lɛ mli lɛ, ‘abaajie amɛ kpo’ lolo akɛ osɔfoi ni atsɔɔ amɛnɔ akɛ Yesu kpɔmɔ afɔleshãa lɛ mli sɛɛnamɔi hãa adesai “bɔɔnii” lɛ. Nɔ ni baajɛ enɛ mli aba ji adesai ni “baaye amɛhe kɛjɛ fitemɔ nyɔŋyeli lɛ mli” koni yɛ naagbee lɛ amɛbote “Nyɔŋmɔ bii lɛ anunyam heyeli lɛ mli.” (Romabii 8:21; Kpojiemɔ 20:5; 22:1, 2) Akɛni gbɛkwɛmɔ kpakpa ni tamɔ nɛkɛ kã amɛhiɛ hewɔ lɛ, ani eyɛ naakpɛɛ akɛ tooi krokomɛi lɛ “miimɛ Nyɔŋmɔ bii lɛ akpojiemɔ lɛ” kɛ ‘gbɛkwɛmɔ kɛ hehiamɔ’?—Romabii 8:19, NW.

Yehowa Tsuishitoo lɛ Tsɔ̃ɔ Yiwalaheremɔ

15. Mɛni esaaa akɛ wɔhiɛ kpaa nɔ kɔkɔɔkɔ yɛ bɔ ni Yehowa toɔ be kɛhaa saji lɛ ahe?

¹⁵ Yehowa ji Be Bulɔ Kpeteŋkpele lɛ. Bɔ ni etoɔ be kɛhaa saji lɛ baafee nɔ ni baaba mli pɛpɛɛpɛ. Ekolɛ nibii baŋ yɛ gbɛ ni wɔ diɛŋtsɛ lɛ wɔkpaa gbɛ ni eba lɛ lɛ naa. Shi kɛlɛ, wɔbaanyɛ wɔná hemɔkɛyeli ni ma shi shiŋŋ akɛ Nyɔŋmɔ shiwoi fɛɛ baaba mli. (Yoshua 23:14) Ekolɛ eeŋmɛ gbɛ ni nibii aya nɔ yɛ be kakadaŋŋ mli fe bɔ ni mɛi pii kpaa gbɛ. Shi nyɛhãa wɔtaoa akɛ wɔɔnu egbɛ̀i lɛ ashishi ni wɔjie enilee lɛ yi. Paulo ŋma akɛ: “Oo, bɔ ni Nyɔŋmɔ nifalɛ kɛ ŋaa kɛ nilee mli kwɔ ha nɛ! Ekojomɔi lɛ anyɛɛɛ shishi ana, ni egbɛi lɛ hu anyɛɛɛ sɛɛ mò aja! Ejaakɛ namɔ le [Yehowa, NW] jwɛŋmɔ lɛ, aloo namɔ ewo lɛ ŋaa pɛŋ?”—Romabii 11:33, 34.

16. Namɛi Yehowa tsuishitoo lɛ he baaba sɛɛnamɔ kɛha?

¹⁶ Petro ŋma akɛ: “No hewɔ lɛ, suɔmɔmɛi, akɛni nyɛkwɛɔ nii nɛɛ [“ŋwɛi” kɛ “shikpɔŋ” momo lɛ hiɛkpatamɔ kɛ Nyɔŋmɔ shiwoo “ŋwɛi hee” kɛ “shikpɔŋ hee” ni akɛbaato najiaŋ] lɛ agbɛ lɛ, nyɛbɔa mɔdɛŋ, koni ana nyɛ ni muji loo kpa ko bɛ nyɛhe yɛ ehiɛ, yɛ hejɔlɛ mli; ni nyɛbua wɔ-Nuntsɔ lɛ tsuishitoo lɛ akɛ yiwalaheremɔ ni.” Yɛ Yehowa tsuishitoo lɛ hewɔ lɛ, akɛ hegbɛ miiha gbɔmɛi akpekpei babaoo koni ahere amɛyiwala kɛtsɔ “Yehowa gbi” lɛ ni baaba trukaa “tamɔ julɔ” lɛ mli. (2 Petro 3:9-15, wɔma efã ko nɔ mi.) Etsuishitoo lɛ hu miiŋmɛ wɔteŋ mɔ fɛɛ mɔ gbɛ koni ‘wɔya nɔ wɔkɛ gbeyeishemɔ kɛ hekpokpomɔ atsu wɔ diɛŋtsɛ wɔyiwalaheremɔ he nii.’ (Filipibii 2:12) Yesu kɛɛ akɛ esa akɛ ‘wɔha wɔhiɛ ahi wɔhe nɔ’ ni ‘wɔsara’ kɛji akɛ wɔmiisumɔ ni akpɛlɛ wɔ nɔ ni ‘wɔnyɛ gbɔmɔ Bi lɛ hiɛ wɔdamɔ’ yɛ be mli ni ebaa kɛha kojomɔ lɛ.—Luka 21:34-36; Mateo 25:31-33.

Yaa Nɔ ni Okɛ Tsuishiŋmɛɛ Amɛ

17. Mɛɛ bɔfo Paulo wiemɔi esa akɛ wɔbo toi?

¹⁷ Paulo wo emumɔŋ nyɛmimɛi lɛ hewalɛ koni amɛkɛ amɛhiŋmɛi ‘akamamɔ nibii ni anaa lɛ anɔ, shi moŋ nibii ni anaaa lɛ anɔ.’ (2 Korintobii 4:16-18) Esumɔɔɔ ni nɔ̃ ko ahà bɔ ni amɛkwɛɔ ŋwɛi nyɔmɔwoo ni akɛma amɛhiɛ lɛ amɛhãa lɛ nɔ. Kɛji akɛ wɔji Kristofoi ni afɔ amɛ mũ aloo tooi krokomɛi hu ji wɔ lɛ, nyɛhãa hiɛnɔkamɔ ni yɔɔ naakpɛɛ ni ákɛma wɔhiɛ lɛ ahia wɔjwɛŋmɔ mli ni wɔnijiaŋ akaje wui. Nyɛhaa ‘wɔyaa nɔ wɔkɛ tsuishiŋmɛɛ amɛa,’ koni wɔkɛtsɔɔ akɛ, “jeee mɛi ni kpaleɔ kɛyaa hiɛkpatamɔ mli lɛ ateŋ mɛi komɛi ji wɔ, shi moŋ wɔji mɛi ni kɛ hemɔkɛyeli náa amɛsusuma yiwalaheremɔ lɛ ateŋ mɛi komɛi.”—Romabii 8:25; Hebribii 10:39.

18. Mɛni hewɔ wɔbaanyɛ wɔshĩ bei kɛ yinɔi lɛ yɛ Yehowa dɛŋ yɛ hekɛnɔfɔ̃ɔ mli lɛ?

¹⁸ Wɔbaanyɛ ni wɔkɛ hekɛnɔfɔ̃ɔ ashĩ bei lɛ kɛ yinɔi lɛ wɔwo Yehowa dɛŋ. Eshiwoi lɛ amlibaa “ekpeŋ sɛɛ” yɛ ebe ni eto lɛ naa. (Habakuk 2:3) Dani enɛ aaaba lɛ, Paulo ŋaawoo ni ekɛha Timoteo lɛ yaa nɔ etsɔɔ babaoo kɛhãa wɔ. Ekɛɛ: “Miima nɔ mi miihao yɛ Nyɔŋmɔ kɛ Nuntsɔ Yesu Kristo ni baaba ebakojo hiɛkalɔi kɛ gbohii yɛ epuemɔ kɛ emaŋtsɛyeli lɛ mli lɛ hiɛ akɛ: Shiɛmɔ wiemɔ lɛ, kã he, dekã yɛ jio, dekã bɛ jio, . . . Tsũ sane kpakpa jajelɔ nitsumɔ lɛ, gbee osɔɔmɔ lɛ naa kwraa!”—2 Timoteo 4:1-5.

19. Mɛni be yɔɔ lolo ni esa akɛ Yehowa webii afee, ni mɛni hewɔ?

¹⁹ Oshara eba wala he—wɔnɔ̃ kɛ wɔ akutseiaŋbii anɔ̃ he. Paulo ŋma akɛ: “Ohiɛ ahi ohe nɔ kɛ tsɔ̃ɔmɔ lɛ nɔ, hii shi yɛ nii nɛɛ amli; ejaakɛ kɛji ofee enɛ lɛ, ooohere bo diɛŋtsɛ kɛ mɛi ni boɔo toi lɛ fɛɛ yiwala.” (1 Timoteo 4:16) Be ni yiwalɛ nibii agbɛjianɔtoo nɛɛ yɔɔ lɛ yɛ kuku kwraa. Yɛ be mli ni wɔkɛ gbɛkpamɔ kɛ hehiamɔ mɛɔ saji ni kanyãa mɔ ni jwere wɔhiɛ lɛ, nyɛhãa wɔhiɛ ahia wɔhe nɔ be fɛɛ be akɛ, ekã he eji Yehowa be kɛ yinɔ kɛha ewebii akɛ amɛshiɛ Maŋtsɛyeli lɛ he sanekpakpa lɛ. Esa akɛ atsu nakai nitsumɔ lɛ kɛgbe naa bɔ ni aaaha etsui anyɔ emli. Ni taakɛ Yesu kɛɛ lɛ, “no dani naagbee lɛ aaaba.”—Mateo 24:14.

[Shishigbɛ niŋmai]

Yɛ Emlitii Mli Lɛ

◻ Yɛ be he akɔntaabuu he lɛ, wɔshihilɛ lɛ tamɔ klɛŋklɛŋ afii oha lɛ mli Kristofoi lɛ anɔ̃ lɛ yɛ mɛɛ gbɛ nɔ?

◻ Mɛni hewɔ esa akɛ Kristofoi ‘aya nɔ asara,’ yɛ ba ni Kristo eba lɛ mli po?

◻ Mɛni hewɔ adesa bɔɔnii lɛ kɛ hehiamɔ mɛɔ “Nyɔŋmɔ bii lɛ akpojiemɔ lɛ”?

◻ Mɛni hewɔ wɔbaanyɛ wɔshĩ bei kɛ yinɔi lɛ yɛ Yehowa dɛŋ yɛ hekɛnɔfɔ̃ɔ mli lɛ?

[Mfoniri ni yɔɔ baafa 17]

Esa akɛ Kristofoi asara ni amɛkɛkpa Kristo baa lɛ gbɛ

[Mfoniri ni yɔɔ baafa 18]

Shwɛɛnii ni afɔ amɛ mũ lɛ kɛ amɛ dekã fɛɛ woɔ Yehowa sɔɔmɔ mli, ni amɛkɛ amɛhemɔkɛyeli damɔɔɔ be he akɔntaabuu nɔ