3. Feemɔ nibii ni baahã oná gbɔmɔtsoŋ hewalɛ kpakpa

Akɛni wɔwo Yehowa shi akɛ wɔbaafee nɔ ni esumɔɔ be fɛɛ be hewɔ lɛ, wɔkɛ wɔwala fɛɛ sɔmɔɔ lɛ. Kɛ́ wɔɔkɛɛ lɛ, wɔkɛ wɔgbɔmɔtsei lɛ hãa Nyɔŋmɔ akɛ afɔlei. Nyɛkanea Romabii 12:​1, 2 lɛ, ni nyɛsusua sanebimɔi nɛɛ ahe:

• Mɛni hewɔ esa akɛ ofee nibii ni baahã oná gbɔmɔtsoŋ hewalɛ kpakpa lɛ?

• Mɛni ji nibii komɛi ni obaanyɛ ofee koni oná gbɔmɔtsoŋ hewalɛ kpakpa?

Biblia lɛ ni akɛ bo kaseɔ lɛ ehã okase nibii pii yɛ Yehowa he. Ekolɛ, nibii nɛɛ ehã ofee tsakemɔi komɛi. Loloolo lɛ, ekolɛ yiŋtoo ko hewɔ lɛ onuɔ he akɛ oshɛko mɔ ni sa akɛ ejɔɔ ehe nɔ ehã Yehowa ni ehã abaptisi lɛ. Yɛ nikasemɔ nɛɛ mli lɛ, obaana nibii komɛi ni hãa mɛi komɛi nuɔ he akɛ amɛshɛko mɛi ni abaanyɛ abaptisi amɛ, kɛ nɔ ni obaanyɛ ofee yɛ nibii nɛɛ ahe.

1. Mɛni kɛ mɛni esa akɛ ole dani abaptisi bo?

Esa akɛ oná “anɔkwale lɛ he nilee krɔŋŋ” dani abaptisi bo. (1 Timoteo 2:4) Enɛ etsɔɔɔ akɛ esa akɛ ole sane fɛɛ sane ni mɛi baabi bo yɛ Biblia lɛ he lɛ hetoo dani abaptisi bo. Kristofoi ni abaptisi amɛ be kplaŋŋ lɛ po miikase nii lolo. (Kolosebii 1:​9, 10) Shi Biblia mli tsɔɔmɔi komɛi yɛ ni esa akɛ onu shishi bɔ ni sa. Asafoŋ onukpai lɛ baanyɛ awa bo ni ona kɛji nibii ni ole lɛ fa bɔ ni sa lo.

2. Mɛɛ nibii komɛi esa akɛ ofee dani abaptisi bo?

Ja ‘otsake otsui ni oku osɛɛ’ dani abaanyɛ abaptisi bo. (Kanemɔ Bɔfoi 3:​19.) Enɛ tsɔɔ akɛ, obaashwa ohe waa yɛ eshai ni ofee be ko ni eho lɛ hewɔ, ni obaabi Yehowa ni ekɛke bo. Agbɛnɛ hu, obaatswa ofai shi akɛ ofeŋ nibii ni Nyɔŋmɔ kɛɛ ehiii lɛ, ni obaahi shi yɛ gbɛ ni saa ehiɛ lɛ nɔ. Kɛfata he lɛ, obaabɔi asafoŋ kpeei yaa, ni okɛ asafo lɛ baafee ekome kɛshiɛ akɛ shiɛlɔ ni abaptisiko lɛ.

3. Mɛni hewɔ esaaa akɛ osheɔ gbeyei lɛ?

Mɛi komɛi sheɔ gbeyei akɛ amɛnyɛŋ amɛye shi ni amɛbaawo Yehowa lɛ nɔ. Hii kɛ yei anɔkwafoi ni awie amɛhe yɛ Biblia lɛ mli lɛ po tɔ̃, hewɔ lɛ eji anɔkwale akɛ, bo hu obaatɔ̃ bei komɛi. Yehowa le akɛ ejálɔi lɛ yeee emuu, ni no hewɔ lɛ bei komɛi lɛ amɛbaatɔ̃. (Kanemɔ Lala 103:​13, 14.) Kɛ́ ofee bɔ fɛɛ bɔ ni obaanyɛ lɛ, enáa miishɛɛ! Ebaaye ebua bo. Yɛ anɔkwale mli lɛ, Yehowa ewo shi akɛ nɔ ko nɔ ko ‘nyɛŋ atse wɔ kɛje esuɔmɔ lɛ he.’​—Kanemɔ Romabii 8:​38, 39.

KASEMƆ PII OFATA HE

4. Le Yehowa jogbaŋŋ

Te esa akɛ ole Yehowa ohã tɛŋŋ dani ohã abaptisi bo? Esa akɛ ole lɛ jogbaŋŋ bɔ ni baahã osumɔ lɛ, ni osumɔ akɛ obaafee nɔ ni saa ehiɛ. Jiemɔ Vidio lɛ koni ona bɔ ni Biblia mli nikaselɔi ni yɔɔ jeŋ fɛɛ lɛ enyɛ efee nakai. No sɛɛ lɛ, nyɛsusua sanebimɔ ni nyiɛ sɛɛ nɛɛ he.

VIDIO: Nɔ Ni Afeɔ Dani Ashɛɔ Baptisimɔ He (3:56)

• Mɛni ye ebua mɛi komɛi ni amɛnyɛ amɛshɛ baptisimɔ he?

Nyɛkanea Romabii 12:2 lɛ, ni nyɛsusua sanebimɔi nɛɛ ahe:

• Ani oyiŋ feɔ bo enyɔnyɔɔnyɔ yɛ Biblia mli tsɔɔmɔ ko he, aloo kɛji Yehowa Odasefoi lɛ ji mɛi ni tsɔɔ anɔkwale lɛ?

• Kɛ́ nakai ni lɛ, mɛni obaanyɛ ofee yɛ he?

5. Ye nibii ni hãaa okɛ ohe ahã ni abaptisi bo lɛ anɔ

Mɔ fɛɛ mɔ ni baakpɛ eyiŋ akɛ ebaajɔɔ ehe nɔ ehã Yehowa ni ehã abaptisi lɛ lɛ, ekɛ naagbai komɛi baakpe. Bɔ ni afee ni ona enɛ he nɔkwɛmɔnɔ lɛ, jiemɔ VIDIO lɛ, ni nyɛsusua sanebimɔi ni nyiɛ sɛɛ nɛɛ ahe.

VIDIO: Suɔmɔ Ni Eyɔɔ Kɛhã Yehowa Lɛ Hã Eye Gbɛtsiinii Anɔ (5:22)

• Mɛɛ gbɛtsiinii ehe bahia ni Narangerel aye nɔ koni enyɛ esɔmɔ Yehowa?

• Mɛɛ gbɛ nɔ suɔmɔ ni eyɔɔ kɛhã Yehowa lɛ wa lɛ ni enyɛ eye nakai gbɛtsiinii lɛ anɔ?

Nyɛkanea Abɛi 29:​25 kɛ 2 Timoteo 1:7 lɛ, ni nyɛsusua sanebimɔ nɛɛ he:

• Mɛni hãa wɔnáa ekãa kɛyeɔ gbɛtsiinii anɔ?

6. Hemɔ oye akɛ Yehowa baawa bo

Yehowa baawa bo ni ofee nibii ni baahã ená ohe miishɛɛ. Jiemɔ VIDIO lɛ, ni nyɛsusua sanebimɔi ni nyiɛ sɛɛ nɛɛ ahe.

VIDIO: Yehowa Baaye Abua Bo (2:50)

• Mɛni hãaa Biblia mli nikaselɔ lɛ kɛ ehe ahã ni abaptisi lɛ lɛ?

• Mɛni ená ele ni wa lɛ ni ekɛ ehiɛ fɔ̃ Yehowa nɔ kwraa?

Nyɛkanea Yesaia 41:​10, 13 lɛ, ni nyɛsusua sanebimɔ nɛɛ he:

• Mɛni hewɔ obaanyɛ ohe oye waa akɛ, obaanyɛ oye shi ni owo be ni ojɔɔ ohe nɔ lɛ nɔ?

7. Feemɔ nibii ni baahã ohiɛ asɔ suɔmɔ ni Yehowa yɔɔ kɛhã bo lɛ waa

Kɛ́ otee nɔ ojwɛŋ suɔmɔ ni Yehowa yɔɔ kɛhã bo lɛ nɔ lɛ, ohiɛ baasɔ nibii ni efee ehã bo lɛ waa, ni obaasumɔ ni osɔmɔ lɛ kɛya naanɔ. Nyɛkanea Lala 40:5 lɛ, ni nyɛsusua sanebimɔ nɛɛ he:

• Te nibii ni Yehowa efee ehã bo lɛ ateŋ nɔ ni ohiɛ sɔɔ waa?

Gbalɔ Yeremia ná suɔmɔ ehã Yehowa kɛ ewiemɔ lɛ, ni ehiɛ sɔ hegbɛ ni ená akɛ ebaasɔmɔ Yehowa lɛ waa. Ewie akɛ: “Owiemɔ lɛ tsɔ miishɛɛ kɛ nyamɔ kɛhã mitsui, ejaakɛ akɛ ogbɛ́i efɔ̃ minɔ, bo Yehowa.” (Yeremia 15:​16) Hã sanebimɔi nɛɛ hetoo:

• Mɛni hewɔ eji hegbɛ kpele akɛ mɔ ko aaatsɔ Yehowa Odasefonyo lɛ?

• Ani obaasumɔ ni abaptisi bo ni obatsɔ Yehowa Odasefonyo?

• Ani nɔ ko miitsĩ bo gbɛ koni okanyɛ ofee nakai?

• Kɛ́ okwɛ lɛ, mɛni esa akɛ ofee koni anyɛ abaptisi bo?

EMLI OTI

Yehowa baanyɛ ewa bo ni oye nɔ fɛɛ nɔ ni hãaa okɛ ohe ahã ni abaptisi bo lɛ nɔ.

Mɛni Okase?

• Mɛni kɛ mɛni esa akɛ ole yɛ Biblia lɛ mli dani abaptisi bo?

• Mɛɛ tsakemɔi ehe baahia ni ofee dani abaanyɛ abaptisi bo?

• Mɛni hewɔ esaaa akɛ osheɔ gbeyei lɛ?

EHE SAJI KROKOMƐI

Obaana nɔ ni esa akɛ etsirɛ bo koni ohã abaptisi bo.

“Ani Oshɛ Kɛhã Baptisimɔ?” (Buu-Mɔɔ, March 2020)

Obaana bɔ ni obaafee oye nibii komɛi ni hãŋ okɛ ohe ahã ni abaptisi bo lɛ anɔ.

“Mɛni Tsĩɔ Mibaptisimɔ Gbɛ?” (Buu-Mɔɔ, March 2019)

Nuu ko ye gbɛtsiinii wuji komɛi anɔ ni abaptisi lɛ. Mɛni wa lɛ?

‘Mɛni Hewɔ Ohãko Abaptisi Bo Lolo?’ (1:10)

Kulɛ, nuu ko ni atsɛɔ lɛ Ataa lɛ enaaa nɔ hewɔ ni esa akɛ ehã abaptisi lɛ. Obaana nɔ ni wa lɛ ni ekpɛ yiŋ ni he hiaa waa nɛɛ.

Ani Misa Mɔ ni Náa Enɛ Lɛɛlɛŋ? (7:21)