Nyɛkɛ Nyɛhe Akafɔa Shi Nyɛhaa Abonsam!
“Hulu akanyɔ shi yɛ nyɛmlila lɛ nɔ, ni asaŋ nyɛkɛ nyɛhe akafɔa shi nyɛhaa Abonsam.”—EFESOBII 4:26, 27.
1. Te Petro tsɔɔ akɛ Abonsam ji lɛ mli eha tɛŋŋ, shi mɛɛ hebuu nɔ mi bɔfo lɛ ma?
KOOLOO ko ni hiɛ yɔɔ la miihuu. Nɔ ni baa etsine nɔŋŋ ji ni enine ashɛ Kristofoi anɔ ni emii amɛ. Petro bɔ kɔkɔ akɛ: “Nyɛhiɛ akaa shi, nyɛsaraa; ejaakɛ nyɛhenyɛlɔ abonsam lɛ nyiɛ tamɔ jata ni huuɔ eetao mɔ ni eeemi; nyɛdamɔa shi shiŋŋ yɛ hemɔkɛyeli lɛ mli nyɛtsia lɛ gbɛ. Shi duromɔ fɛɛ Nyɔŋmɔ lɛ, kɛ nyɛna amanehulu fioo nɛɛ ta lɛ, lɛ diɛŋtsɛ eeewonyɛ hewalɛ ni eeeha nyɛfi shi shiŋŋ.”—1 Petro 5:8-10.
2. (a) Mɛɛ shihilɛi komɛi baa ni baanyɛ aha Satan atutua wɔ? (b) Mɛni hewɔ mɔ ni gbeɔ shi ehaa hemɔkɛyeli kwamɔ lɛ bɛ mɔ ko ni ekɛ enɛ he sɔ̃ aaafɔ enɔ akɛ ja lɛ diɛŋtsɛ lɛ? (d) Mɛɛ gbɔjɔmɔ ko gbele gbɛ ni no ha Abonsam kɛ nɔ ko wo Yuda Iskariot tsui mli koni etsɔ Yesu sɛɛgbɛ lɛ?
2 Wɔbaanyɛ wɔna nɔmimaa akɛ Abonsam kɛ esamaŋfoi, daimonioi kɛ adesai fɛɛ, efee klalo akɛ amɛbaatsɔ yiŋkɔshikɔshi feemɔ ko ni haoɔ mɔ kɛ gbɔjɔmɔ yɛ gbɔmɔtsoŋ loo su kɛ baŋ mli nɔ aloo wɔhiɛ ni wɔɔku wɔshwie hewalɛ ni wɔɔna yɛ mumɔŋ yɛ hemɔkɛyeli mli lɛ nɔ amɛkɛtsu nii ni amɛkɛye wɔ awui. Shi Yehowa Wiemɔ lɛ maa nɔ mi kɛhaa wɔ akɛ Abonsam nyɛŋ akpata wɔhiɛ kɛji akɛ wɔte shi wɔdamɔ shi shiŋŋ wɔshi lɛ. (Yakobo 4:7) Akɛ nɔkwɛmɔ nɔ lɛ, hemɔkɛyeli kwamɔ nyɛŋ aye mɔ ko nɔ kunim yɛ nyɛ ni anyɛɛɛ akwa aloo enaa foi ni anyɛɛɛ ajo lɛ hewɔ. Atoko afɔko shi akɛ esa akɛ mɔ ko akwa hemɔkɛyeli lɛ. Ekɔɔ tsui lɛ mli susumɔi ahe. Eji anɔkwale akɛ Yohane wie akɛ “wɔteŋ amɛjɛ amɛtee, shi kɛlɛ amɛjeee wɔteŋ mɛi komɛi.” (1 Yohane 2:19) Enɛ ba lɛ nakai ejaakɛ amɛje gbɛ amɛhala hemɔkɛyeli kwamɔ aloo amɛba Yehowa asafo lɛ mli kɛ yiŋtoo fɔŋ ko kɛjɛ shishijee. Yuda Iskariot yɛ tsui kpakpa yɛ be mli ni atsɛ lɛ akɛ ebafee Yesu bɔfoi 12 lɛ ateŋ mɔ kome lɛ. Shi Abonsam tsu Yuda gbɔjɔmɔ ni ji hiɛjoomɔ lɛ he nii. Dani gbɛkɛ ni aaatsɔɔ Yesu sɛɛgbɛ lɛ aaashɛ po lɛ, no mli lɛ, “eŋɔwo Yuda Iskariot, Simon bi lɛ tsui mli momo, akɛ etsɔɔ esɛɛgbɛ.”—Yohane 13:2.
3. Mɛni nibii baanyɛ aná mɔ ko nɔ hewalɛ koni etsɔ mɔ ni ekwa hemɔkɛyeli lɛ?
3 Gbɔmɔ jeɔ gbɛ efiteɔ ejaakɛ ehaa lɛ diɛŋtsɛ epɛsɛmkunya susumɔi, lɛ diɛŋtsɛ ehiɛnyam taomɔ kɛ akɔnɔi, mɛi ni ehala amɛ akɛ enanemɛi kɛ nibii ni ebɔle ehe kɛkpe lɛ kudɔɔ esusumɔi ni etsɔɔ he ni esuɔmɔnaa nii ka. Paulo tsɔ hiɛ ewie mɛi komɛi ni tsutsu lɛ ‘la etso amɛnɔ pɛŋ, ni amɛkɛ ŋwɛi nɔkeenɔ lɛ esa amɛnaa ni no sɛɛ amɛgbee shi’ lɛ ahe. (Hebribii 6:4-6) Kɛji akɛ wɔhaaa wɔhiɛ ahi wɔhe nɔ yɛ be fɛɛ mli lɛ, Abonsam baanyɛ atsɔ elakamɔ wiemɔi ni yɔɔ nigii lɛ anɔ eha wɔtsuii akpɛlɛ hemɔkɛyeli kwamɔ susumɔi anɔ. Shi te Abonsam feɔ tɛŋŋ ni ehaa mɔ ko tsɔɔ mɔ ni baanyɛ agbee shi, hemɔkɛyeli kwalɔ lɛ?
4. Mɛni baanyɛ aba kɛ wɔŋmɛɛ wɔhe wɔha mlifu, kɛ tɔmɔ taomɔ?
4 Subaŋi komɛi ni Satan taoɔ yɛ mɛi amli ji mlifu, mlila, kɛ mɛi ahe tɔmɔ taomɔ. Nɛkɛ henumɔi nɛɛ baanyɛ ada aahu akɛ emli baawa bɔ ni gbɛ ko kwraa bɛ kɛha suɔmɔ kɛ hiɛsɔɔ. Ekolɛ naagbai komɛi ni anyɛɛɛ asaa lɛ fiteɔ mɔ, ni ehaa mɔ lɛ nuɔ he akɛ emli afu ni eyeɔ bem hu yɛ Kristofoi akpeei ashishi ni etsiɔ ehe kɛjɛɔ lɛ mli. Akɛni ehiɔ shi akɛ mɔ ni mli efu yɛ be kakadaŋŋ mli hewɔ lɛ, ‘ekɛ ehe fɔɔ shi ehaa Abonsam.’ (Efesobii 4:27) Mɔ ni ehao nɛɛ naa enyɛmi adesa lɛ gbɔjɔmɔi lɛ pɛ fe ni ekɛaake lɛ “shii nyɔŋmai kpawo kɛ kpawo,” ni enyɛɛɛ ekɛ shihilɛi ni kaa mɔ waa nɛɛ atsu nii akɛ hegbɛi ni ena ni ekɛaaha e-Kristofoi asu kɛ baŋ lɛ aye emuu. (Mateo 18:22) Yɛ be mli ni ena jwɛŋmɔ ni tamɔ nɛkɛ lɛ, kɛji akɛ mɔ ko ba ni ebawo lɛ ŋaa akɛ Yehowa asafo lɛ nyɛɔ mɔ nɔ aloo etsiɔ mɔ naa, aloo ejaaa po yɛ tsɔɔmɔi titrii komɛi amli lɛ, Kristofonyo ni mli efu nɛɛ tsui lɛ baakpɛlɛ nɔ ni awieɔ ni bɛ mli nɛɛ nɔ. Belɛ kwɛ bɔ ni ehe hiaa akɛ wɔɔkwɛ jogbaŋŋ koni wɔkaha mlifu kɛ mlila miite shi yɛ wɔmli! Kaaha hulu miinyɔ shi yɛ omlila naa. Shi moŋ, ha suɔmɔ aye emuu kwraa yɛ oshihilɛ mli.
5. (a) Henɔwomɔ kɛ kamɔ loo jajemɔ ni wɔhiɔ lɛ baanyɛ aha wɔgbee shi yɛ mɛɛ gbɛ nɔ? (b) Mɛɛ gbɛfaŋnɔ heshibaa tsuɔ yɛ shiŋŋ ni wɔfeɔ yɛ hemɔkɛyeli lɛ mli lɛ mli?
5 Mɛɛ shihilɛi komɛi hu tsui lɛ kɛ jwɛŋmɔ lɛ baa mli ni nomɛi ji nɔ ni Abonsam taoɔ? Ojogbaŋŋ, henɔwomɔ yɛ, mɔ lɛ nuɔ he akɛ ehe miihia tsɔ, emli efu akɛni gbɛhe loo hegbɛ ni enuɔ he akɛ esa akɛ ena lɛ enaaa no. Enɛɛmɛi fɛɛ ji fatɔɔi loo tsɔnei ni Abonsam kɛtsuɔ nii. (Romabii 12:3) Kɛji akɛ awo bo ŋaa aloo akã bo yɛ nifeemɔ aloo subaŋ ko ni ejaaa he lɛ, enɛ hu baanyɛ afee hegbɛ ni Abonsam ena koni ekɛwo bo hewalɛ ni obi bo diɛŋtsɛ ohe akɛ ani asafo loo gbɛjianɔtoo ni ja lɛ mli oyɔɔ lɛ lo. No hewɔ lɛ ba ohe shi. Na tsui ni obu ohe akɛ “mɔ ni ji bibioo.” Kaaha henɔwomɔ aloo henumɔ ni ooona akɛ ohe miihia tsɔ lɛ miiha oodida yɛ hemɔkɛyeli lɛ mli shidaamɔ shiŋŋ lɛ mli.—Luka 9:48; 1 Petro 5:9.
6, 7. (a) Mɛni ji sui komɛi ni anaa ni tsɔɔ tsui shi ni aŋmɛɛɛ ni Abonsam he feɔ oya ekɛ nomɛi tsuɔ nii? (b) Kɛ mɔ ko bɛ nilee lɛ, mɛni esa akɛ efee?
6 Tsui shi ni aŋmɛɛɛ hu ji nɔ kroko ni Abonsam taoɔ yɛ mɔ he. Eshɛɔ be ni wɔnuɔ he akɛ tsakemɔi aba; wɔmiitao ni afee nii oya, wɔmiitao hetoo amrɔ nɔŋŋ. ‘Esa akɛ mana nɛkɛ naagba nɛɛ naa amrɔ nɔŋŋ kɛjeee nakai lɛ mashi. Esa akɛ mana sanebimɔi nɛɛ ahetoo amrɔ nɔŋŋ, kɛjeee nakai lɛ miyaŋ nɔ dɔŋŋ. Harmagedon kɛ nibii agbɛjianɔtoo lɛ naagbee ni “ebɛŋkɛ kpaakpa” lɛ ji sane ni wɔnu aahu afii babaoo nɛ. ‘Mimɛ aahu etɔ mi agbɛnɛ.’ Na nɔmimaa akɛ Abonsam efee klalo akɛ ebaadu yiŋkɔshikɔshi feemɔ kɛ atuatsemɔ wui yɛ tsuishiŋmɛɛ ni bɛ ŋmɔ lɛ mli. Tsuishiŋmɛɛ kɛ hemɔkɛyeli he miihia.—Hebribii 10:36, 39.
7 Yakobo kɛɛ: “Ni nyɛhaa tsuishiŋmɛɛ lɛ agbea enitsumɔ naa kɛwulaa shi, koni nyɛhi kɛwula shi, ni nyɛye emuu, ni nɔ ko nɔ ko akashwɛ nyɛ. Shi kɛ nilee eshwɛ nyɛteŋ mɔ ko lɛ, ekpa Nyɔŋmɔ ni haa mɛi faa ni ewieee mɔ ko hiɛ lɛ fai, ni aaaŋɔha lɛ. Shi ha ni ekpa fai yɛ hemɔkɛyeli mli, ni ekaje nɔ ko nɔ ko he ŋwane; ejaakɛ ŋwanejelɔ lɛ, etamɔ ŋshɔke ni kɔɔyɔɔ tswaa kɛyaa kɛbaa. Ejaakɛ nakai gbɔmɔ ko akasusu akɛ eeena nɔ ko yɛ Nuŋtsɔ [Yehowa] lɛ dɛŋ; jwɛŋmɔi enyɔnyɔtsɛ ko fiii shi yɛ egbɛi fɛɛ mli.” (Yakobo 1:4-8) Kaaha Abonsam miiha ootsɔ mɔ ni baanyɛ atsɔ hemɔkɛyeli kwalɔ, akɛni onaaa tsui ni oobi ni afee nɔ ko doo, oyiŋ feɔ bo kɔshikɔshi yɛ Nyɔŋmɔ shiwoi lɛ ahe lɛ hewɔ! Too otsui shi, feemɔ mɔ ni daa shi aloo ehiɛ sɔɔ nii. Mɛɛ Yehowa.—Lala 42:6.
8. Mɛɛ gbɛ nɔ su ni mɔ ko naa akɛ eeetse atua eshi hegbɛ loo onukpayeli lɛ gbeleɔ gbɛ ni ehaa Abonsam lakaa mɔ lɛ koni eshɛrɛ nibii ni buɔ ehe mɛ Ŋmalɛ naa lɛ eshwie lɛ?
8 Mɛni hu Abonsam kɛtsuɔ nii koni ekɛbɔ mɔdɛŋ ni egbala wɔ kɛya? Ani ebɔko mɔdɛŋ yɛ be fɛɛ mli akɛ aaatee atuatsemɔ shi, koni eha Yehowa tsuji awie ashi mɛi ni nyiɛɔ hiɛ lɛ? Mɛi komɛi baakɛɛ akɛ, ‘Onukpai lɛ nuuu sane shishi. Amɛyɛ keketee tsɔ̃, amɛyɛ veveeve yɛ nibimɔ mli tsɔ.’ Mɔ ko baanyɛ aya shɔŋŋ po fe nakai ni ekɛɛ akɛ Yehowa Odasefoi a-Nɔyeli Kuu lɛ aloo onukpai ni yɔɔ hegbɛ lɛ kɛ amɛhe woɔ henilee mli heyeli ni mɔ ko yɔɔ lɛ kɛ “hegbɛ” ni mɔ lɛ yɔɔ ni ekɛaatsɔɔ Ŋmalɛi lɛ ashishi lɛ mli. Shi kaimɔ Yosef heshibaa wiemɔi nɛɛ: “Ani shishitsɔɔmɔ lɛ, jeee Nyɔŋmɔ nɔŋ?” (1 Mose 40:8) Ni ani Yesu egbaaa akɛ yɛ naagbee gbii lɛ amli lɛ “tsulɔ anɔkwafo kɛ nilelɔ” kuu lɛ ni afɔ amɛ mu lɛ agbɛjianɔtoo ko baafee nɔ ni akɛ mumɔŋ niyenii ni akɛaaha mɛi baawo amɛdɛŋ yɛ be ni sa mli? (Mateo 24:45-47) Kwɛmɔ mɛi ni bɔɔ mɔdɛŋ ni amɛkɛ amɛsusumɔi ni teɔ shi woɔ enɛ lɛ aba lɛ jogbaŋŋ. Agbɛnɛ hu kwɛmɔ mɛi ni sumɔɔ ni amɛshɛrɛ naatsii fɛɛ amɛshwie aloo mɛi ni woɔ heyeli he shi, ni amɛkɛɔ akɛ Yehowa Odasefoi etsɔmɔ nyɔji lɛ jogbaŋŋ! Petro wie apasa tsɔɔlɔi ahe akɛ: “Amɛwoɔ amɛ shi akɛ amɛaaye amɛhe, tɛɛ, amɛ diɛŋtsɛ lɛ fitemɔ nyɔji ji amɛ; ejaakɛ mɔ ni eye mɔ ko nɔ lɛ, lɛ nɔŋŋ enyɔŋ ji lɛ.”—2 Petro 2:1, 19.
9. Yɛ be babaoo mli lɛ mɛni ji su ni mɛi ni wieɔ shiɔ mɛi ni nyiɛɔ hiɛ lɛ hiɛ?
9 Yɛ be babaoo mli lɛ mɛni ji yiŋtoo ni mɛi ni wieɔ shiɔ Asafo lɛ loo mɛi ni nyiɛɔ enɛ hiɛ lɛ hiɛ? Ani ejieee ákɛ yɛ be babaoo mli lɛ akɛ Ŋmalɛ ko etsu nii ni enɛ esa amɛhe waa diɛŋtsɛ lɛ hewɔ? Ni amɛaakpɛlɛ tsɔɔmɔ kɛ gbɛtsɔɔmɔ kpakpa nɔ moŋ lɛ, amɛmiisumɔ ni asafo lɛ loo gbɛjianɔtoo lɛ moŋ atsake. Nyɛhaa wɔkɛ nɔkwɛmɔ nii fioo ko atsɔɔ enɛ mli:
10. Mɛɛ gbɛ nɔ bɔ ni mɔ ko aaama atadewoo loo hesaamɔ ni hiɛshikamɔ bɛ mli nɔ mi aha lɛ baaha ‘ekɛ ehe afɔ shi aha Abonsam’ lɛ?
10 Nyɛminuu ko miima atadewoo loo hesaamɔ ni hiɛshikamɔ bɛ mli nɔ mi veveeve akɛ no nɔŋŋ ebaawo ni nakai gbɛ nɔ nɔŋŋ ebaatsɔ esaa ehe. Onukpai lɛ nuɔ he akɛ ejeee mɔ ni feɔ nɔkwɛmɔ nɔ kpakpa, no hewɔ lɛ akɛ sɔɔmɔ hegbɛi komɛi wooo edɛŋ, tamɔ kpoku lɛ nɔ ni eeeba ebaha tsɔsemɔ wiemɔ ko yɛ. Emli fu, ni ekɛɔ akɛ mɛi krokomɛi miitao ni amɛshɔ̃ heyeli ni eyɔɔ akɛ Kristofonyo lɛ yɛ edɛŋ. Shi mɛni hɔ nɛkɛ susumɔ nɛɛ sɛɛ? Ani jee no nɔŋŋ ji henɔwomɔ? Heyeli su, aloɔ su ni tamɔ gbekɛ ni haa mɔ feɔ lɛ diɛŋtsɛ etsui naa nii? Yɛ be mli ni enɛ tamɔ nɔ ko bibioo lɛ, gbɔmɔ ni susuɔ nii ahe yɛ nɛkɛ gbɛ nɔ lɛ ‘kɛ ehe baafɔ shi aha Abonsam.’ Shi suɔmɔ kɛ heshibaa baaha wɔsaa wɔhe ni wɔwo atadei yɛ hiɛshikamɔ kɛ agbɛnɛ yɛ gbɛ ni akpɛlɛɔ nɔ lɛ nɔ. Esa akɛ wɔsumɔ akɛ wɔɔfee nibii kɛha sanekpakpa lɛ nɔyaa koni wɔkasa wɔ diɛŋtsɛ wɔhiɛ.—Romabii 15:1, 2; 1 Korintobii 10:23, 24.
11. Mɛni baanyɛ afee nɔ ni hɔ sane ni abiɔ yɛ Yehowa famɔ akɛ atsi he kɛjɛ lá he lɛ sɛɛ?
11 Nyɛhaa wɔkɛ nɔkwɛmɔ nɔ kroko atsua nii. Yɛ bei komɛi amli lɛ wɔnuɔ ni mɔ ko miibi kɛji akɛ Ŋmalɛ naa naatsii akɛ akaye lá lɛ kɔɔ lá ni aaagbala awo mɔ mli diɛŋtsɛ lɛ he. Shi mɛni ji nɔ ni hɔ susumɔ ni tamɔ nɛkɛ sɛɛ? Ani no ji gbeyeishemɔ—gbeyeishemɔ akɛ mɔ ko wala ni ehiɛ ŋmɛnɛ lɛ baaje edɛŋ aloo esuɔlɔ ko wala aaaje edɛŋ? Ani hiɛnɔkamɔ ni eyɔɔ yɛ gbohiiashitee lɛ mli Iɛ miilaaje? Kristofoi anɔkwafoi eŋmɛɛɛ saji ahe koni amɛkɛsaa yɛ Nyɔŋmɔ mla he aloo ni amɛaatao gbɛ ko nɔ ni amɛaatsɔ amɛfutu mli ni ehe ajɔ aloo aba lɛ shi. Lá ni akɛaalɛ gbɔmɔtso lɛ ni wɔɔtsi wɔhe kɛaajɛ he lɛ he miihia tamɔ bɔ ni ajwamaŋbɔɔ kɛ wɔŋjamɔ ni wɔɔtsi wɔhe kɛaajɛ he lɛ he hiaa lɛ pɛpɛɛpɛ, ejaakɛ enɛɛmɛi fɛɛ ji saji ni famɔ ni mumɔ lɛ kudɔ bɔfoi lɛ kɛ onukpai ni yɔɔ Yerusalem lɛ ni amɛkɛha lɛ wieɔ eshiɔ lɛ.—Bɔfoi lɛ Asaji 15:19, 20, 28, 29.
12. Mɛni hewɔ esaaa akɛ wɔŋmɛɔ gbɛ koni anɔkwayeli ni ejaaa aha wɔku Ŋmalɛ naa taomɔ nii akɛ wɔkɛ mɛi ni ashwie amɛ kɛjɛ asafo lɛ mli lɛ akabɔ lɛ mli lɛ?
12 Mɛi ni wieɔ shiɔ nɔ fɛɛ nɔ lɛ kɛɔ akɛ Yehowa asafo lɛ loo egbɛjianɔtoo lɛ yɛ keketee tsɔ yɛ mɛi ni ashwie amɛ lɛ ni akɛɛ akɛ amɛ akabɔ lɛ mli. (2 Yohane 10, 11) Mɛni hewɔ mɛi ni wieɔ shiɔ lɛ nuɔ he nakai? Ani amɛyɛ wekunyo ko ni bɛŋkɛ amɛ kpaakpa aloo anɔkwale ni ejaaa ni amɛyeɔ naanyo ko ni amɛkɛyeɔ anɔkwale ni amɛaaye Yehowa kɛ ejalɛ tɛi ni efolɔ shwie shi kɛ otaomɔ nii ahiɛ lɛ hewɔ? Susumɔ he hu akɛ, ya ni oooya nɔ okɛ mɔ ni ashwie lɛ lɛ aaabɔ, kɛ̃ mɔ lɛ ji wekunyo ko ni bɛŋkɛ kpaakpa po lɛ baaha mɔ ni etɔ̃ lɛ amu sane naa akɛ yɛ fɛɛ sɛɛ lɛ, tɔmɔ lɛ jeee nɔ ni hiɛdɔɔ yɔɔ mli tsɔ ko, ni enɛ baaye lɛ awui. Shi moŋ, bɔ ni wɔkɛ lɛ ebɔŋ lɛ baatee henumɔ ko shi yɛ emli akɛ eeesumɔ ni enine ashɛ nɔ ni elaaje lɛ nɔ ekoŋŋ. Yehowa gbɛ lɛ ji nɔ ni hi fe fɛɛ ni no ji nɔ ni buɔ wɔhe.—Abɛi 3:5.
13. Mɛɛ su ji nɔ ni esa akɛ wɔna yɛ shiɛmɔ yɛ shia kɛ shia lɛ he?
13 Agbɛnɛ hu mɔ ko baakɛɛ yɛ gbɛ ni ejaaa nɔ akɛ Ŋmalɛi lɛ fiii shiɛmɔ yɛ shia kɛ shia lɛ sɛɛ. Shi ani no ji akɛ esumɔɔɔ nitsumɔ ni he hiaa ni tamɔ nɛkɛ lɛ momo ni eetao nɔ ko ekɛjie enaa koni etsi ehe kɛjɛ he lo? Esa akɛ suɔmɔ kɛha Nyɔŋmɔ kɛ naanyo atsirɛ wɔ ni wɔna bɔ ni yiwalaheremɔ nitsumɔ ni tamɔ nɛkɛ he hiaa waa ha lɛ. Agbɛnɛ, tsuishiŋmɛɛ he miihia. Bɔfo Paulo hu wie etsui shi ni lɛ diɛŋtsɛ eŋmɛ yɛ ‘Yudafoi kɛ Helabii odase ni eye kɛmɔ shi lɛ mli’ yɛ be mli ni etsuɔ nii yɛ faŋŋ kɛ agbɛnɛ yɛ shia kɛ shia lɛ. (Bɔfoi lɛ Asaji 20:18-21) Ní wɔɔwie huhuuhu wɔshi saji lɛ, ani esaaa akɛ wɔkɛ anɔkwayeli nyiɛɔ enɔkwɛmɔ nɔ fɛfɛo lɛ sɛɛ? Kwɛmɔ gbɔmɛi akpei abɔ ni abua amɛnaa awo “kuu kome” lɛ mli yɛ Yehowa jɔɔmɔ ni yɔɔ shia kɛ shia lɛ nɔ lɛ hewɔ lɛ! (Yohane 10:16) Ni agbɛnɛ kaaha ohiɛ miikpa sɛɛnamɔi kpakpai ni wɔnine shɛɔ nɔ yɛ tsɔsemɔ kɛ kamɔ mli, yɛ wɔhemɔkɛyeli lɛ hewalɛwoo mli, kɛtsɔ shia kɛ shia ni wɔyaa koni wɔkɛ sanekpakpa lɛ aha gbɔmɛi lɛ anɔ lɛ nɔ.—Okɛto Bɔfoi lɛ Asaji 5:42; 1 Timoteo 4:16 he.
14. Te osusuɔ akɛ esa akɛ wɔfee wɔnii wɔha tɛŋŋ yɛ be mli ni awieɔ ashiɔ Yehowa Odasefoi akɛ amɛji apasa gbalɔi lɛ?
14 Yɛ naagbee lɛ wɔbaanyɛ wɔsusu nɔ ni Asafo lɛ eŋmala yɛ tsutsu yɛ be he akɔntaabuu he lɛ he. Mɛi ni teɔ shi woɔ lɛ ateŋ mɛi komɛi kɛɔ akɛ Yehowa Odasefoi lɛ apasa gbalɔi ni. Mɛi ni teɔ shi woɔ nɛɛ kɛɔ akɛ ato be amamɔ shĩ, shi nɔ ko nɔ ko jɛɛɛ mli baaa. Wɔbiɔ ekoŋŋ akɛ, Mɛni ji yiŋtoo ni mɛi ni wieɔ shiɔ nɛɛ hiɛ? Ani amɛmiiwo saramɔ aloo bu ni Nyɔŋmɔ webii aaabu daa lɛ he hewalɛ, aloo amɛmiibɔ mɔdɛŋ ni amɛbu amɛhe bem yɛ wɔdɔiwɔɔ kɛ nɔ ko ni amɛtsuuu dɔŋŋ lɛ mli ni amɛbote lɛ hewɔ? (1 Tesalonikabii 5:4-9) Nɔ ni he hiaa babaoo lɛ, mɛni ji nɔ ni obaafee kɛ onu ni aawie aashi yɛ nɛkɛ gbɛ nɔ? Kɛji akɛ mɔ ko miibi sane akɛ ani nibii agbɛjianɔtoo nɛɛ “naagbee gbii” lɛ amli wɔyɔɔ lɛlɛŋ lo, aloo eena jwɛŋmɔ ko akɛ Nyɔŋmɔ naa mɔbɔ tsɔ ákɛ ehaŋ gbɔmɛi akpekpei abɔ agboi yɛ “amanehulu kpeteŋkpele” lɛ mli lɛ, belɛ gbɔmɔ ni tamɔ nɛkɛ esaa etsui eto momo akɛ ebaabo wiemɔ ni awieɔ ashiɔ nɛɛ atoi.—2 Timoteo 3:1; Mateo 24:21.
15. Ní wɔɔfee apasa gbalɔi moŋ, lɛ, mɛni yeɔ odase akɛ Yehowa Odasefoi yɛ hemɔkɛyeli yɛ Nyɔŋmɔ Wiemɔ lɛ kɛ eshiwoi ni ji anɔkwale lɛ amli?
15 Hɛɛ, ehe bahia ni Yehowa webii lɛ atsake amɛgbɛkpamɔi lɛ amli yɛ be kɛ bei amli. Yɛ bɔ ni wɔhe tswaa shi babaoo lɛ hewɔ lɛ, wɔkɛ wɔhiɛnɔkamɔ fɔ gbɛjianɔtoo hee lɛ nɔ mra tsɔ fe bɔ ni Yehowa be buu yɔɔ. Shi wɔjieɔ wɔhemɔkɛyeli yɛ Nyɔŋmɔ Wiemɔ kɛ eshiwoo ni ji anɔkwale lɛ mli lɛ kpo kɛtsɔɔ emli saji lɛ ni wɔjajeɔ wɔtsɔɔ mɛi krokomɛi lɛ anɔ. Agbɛnɛ hu bɔ ni ehe hiaa akɛ wɔtsake wɔshishinumɔi amli yɛ gbɛ ko nɔ lɛ haaa wɔtsɔmɔ amale gbalɔi ni asaŋ etsakeee anɔkwale ni eji akɛ “naagbee gbii” ni etsɛŋ “amanehulu kpeteŋkpele” lɛ baagba gbɛ ni shikpɔŋ nɔ Paradeiso aba lɛ mli wɔyɔɔ lɛ. Belɛ kwɛ bɔ ni eji kwashiai asane akɛ aaahi sane yɛ anɔkwale muu lɛ fɛɛ he yɛ gbɛkpamɔi komɛi ni ehe bahia ni wɔfee tsakemɔi komɛi yɛ mli lɛ hewɔ! Odaseyeli lɛ kã shi faŋŋ akɛ Yehowa kɛ egbɛjianɔtoo kome lɛ etsu nii, ni ekɛ lɛ miitsu nii hu yɛ “tsulɔ anɔkwafo kɛ nilelɔ” lɛ hiɛnyiɛmɔ mli. No hewɔ lɛ wɔnuɔ he tamɔ Petro, ni kɛɛ akɛ: “Nuŋtsɔ, namɔ ŋɔɔ wɔɔtee? Bo oyɔɔ naanɔ wala wiemɔi lɛ.”—Yohane 6:68.
16, 17. (a) Yɛ mɛɛ gbɛ nɔ Yesu wiemɔi ni yɔɔ Mateo 7:15-20 lɛ kɛ nitsumɔ yeɔ ebuaa wɔ ni wɔyooɔ gbɛjianɔtoo ni Yehowa jɔɔmɔ yɔɔ nɔ lɛ? (b) Mɛni ji yibii kpakpai ni Yehowa anɔkwale tsuji ewo yɛ amɛshihilɛ mli lɛ ekomɛi?
16 Mumɔŋ paradeiso ni yɔɔ Yehowa Odasefoi lɛ ateŋ pɛ wɔnaa he kɛ afɔleshaa suɔmɔ ni Yesu kɛɛ akɛ ebaaha ayoo enɔkwa kaselɔi lɛ yɛ. (Yohane 13:34, 35) Akpaa amale gbalɔi ahe mama ni anaa bɔ ni amɛji diɛŋtsɛ yɛ yibii gbohii ni amɛwoɔ lɛ hewɔ. Shi Yesu tsɔɔ akɛ abaatsɔ yibii kpakpai anɔ ayoo tsei kpakpai lɛ. (Mateo 7:15-20) Ni mɛɛ yibii kpakpai po wɔyɔɔ yɛ mumɔŋ paradeiso lɛ mli nɛkɛ! Etamɔ nɔ ni yifalɛ miiya nɔ yɛ maŋ fɛɛ maŋ mli. Nyɔŋmɔ Maŋtsɛyeli lɛ shishibii fe 3,000,000 ni yɔɔ miishɛɛ yɛ je muu fɛɛ lɛ ji odaseyeli ni anaa faŋŋ akɛ Yehowa yɛ gbɔmɛi yɛ shikpɔŋ nɔ.
17 Akɛni Nyɔŋmɔ ji mɔ ni tsɔɔ amɛ nii hewɔ lɛ, Yehowa Odasefoi woɔ Kristojamɔ yibii yɛ amɛshihilɛ mli. (Yesaia 54:13) Yehowa webii lɛ pɛ ji mɛi ni amɛtsi amɛhe kwraa kɛjɛ Babilon apasa hemɔkɛyelii ahe. Amɛ pɛ ji mɛi ni yɔɔ asafo loo gbɛjianɔtoo ni boɔ nɔ ni Nyɔŋmɔ Wiemɔ lɛ kɛɔ yɛ bɔlɛnamɔ he jeŋba shara, musufitemɔ, daatɔɔ, juu, wɔŋjamɔ, maŋ nɔ ni mɔ ko jɛ lɛ he jwɛŋmɔ fɔŋ ni anaa kɛ je lɛŋ nibii komɛi ni adiɔ sɛɛ yɛ nifeemɔi komɛi ahe lɛ toi. Ni amɛ pɛ amɛboɔ famɔ akɛ ashiɛ Yehowa Maŋtsɛyeli lɛ he sanekpakpa lɛ toi. (Mateo 24:14) Nyɔŋmɔ diɛŋtsɛ Wiemɔ lɛ tsɔɔ ni sanebimɔ ko kwraa bɛ he akɛ Yehowa Odasefoi lɛ ji gbɔmɛi pɛ ni ato amɛ gbɛjianɔ ni ejɔɔmɔ yɔɔ amɛnɔ!
18. Kɛ wɔkɛ hemɔkɛyeli kwamɔ tsɔɔmɔi kpe lɛ, mɛni ji nɔ ni esa akɛ efee Yehowa tsuji ashidaamɔ?
18 Hɛɛ, kɛha mɛi fɛɛ ni ji anɔkwafoi kɛ anɔkwayelɔi ni yaa nɔ amɛŋmɛɔ amɛtsui shi yɛ Kristofoi agbɛ lɛ nɔ lɛ, wɔle yɛ faŋŋ mli akɛ Yehowa anɔkwale lɛ ka he eji nɔ ni yɔɔ fɛo yɛ amɛhiɛ, ehaa amɛtsui nyɔɔ amɛmli—babaoo po fe be mli ni amɛnu he lɛ. No hewɔ lɛ, tswaa ofai shi yɛ otsui mli akɛ okɛ onine etaŋ ebɔɔ ni hemɔkɛyeli kwalɔi sumɔɔ ni onu lɛ he kɔkɔɔkɔ. Bo Yehowa kitai ni yɔɔ shiŋŋ ni nilee yɔɔ mli lɛ toi ni otsi ohe kɛjɛ mɛi ni baasumɔ ni amɛshishiu bo, amɛlaka bo, amɛtsi bo kɛya gbele gbɛi anɔ lɛ ahe. Kɛji akɛ wɔsumɔɔ Yehowa kɛ wɔtsui, wɔsusuma kɛ jwɛŋmɔ muu lɛ fɛɛ, yɛ be mli ni wɔsumɔɔ wɔnaanyo tamɔ bɔ ni wɔsumɔɔ wɔ diɛŋtsɛ wɔhe lɛ, wɔŋmɛŋ gbɛ ni hemɔkɛyeli kwamɔ susumɔi agbu gbɛ abote wɔmli. (Mateo 22:37-39) ‘Wɔkɛ wɔhe efɔŋ shi wɔhaŋ Abonsam’ ni wɔsumɔŋ akɛ wɔɔkwɛ he kroko. Wɔŋmɛŋ gbɛ ‘ni ahoso wɔ oya kɛjɛ wɔjwɛŋmɔ lɛ he’ kɛtsɔ kantafit loo apasa tsɔɔmɔ ko nɔ.—2 Tesalonikabii 2:1, 2.
19. Mɛni gbɛ aloo nifeemɔ baaye abua koni ‘wɔkaha mɔ ko miishɔ wɔjweremɔ nii ni ji naanɔ wala lɛ ‘kɛmiijɛ wɔdɛŋ’?
19 Nyɛhaa wɔhiɛ asɔa hegbɛ ni wɔna akɛ wɔɔhi Yehowa mumɔŋ paradeiso lɛ mli, he ni wɔnaa jɔɔmɔi ni fa babaoo mli ŋɔɔmɔ yɛ be fɛɛ mli nɛɛ. Wɔle mɛi ni hiɛɔ naanɔ wala wiemɔi lɛ amli kpɛŋŋ Iɛ. No hewɔ lɛ okɛ amɛ abɔ kpaakpa, ejaakɛ ole akɛ amɛji onyɛmimɛi hii kɛ yei anɔkwafoi diɛŋtsɛ ni yɔɔ hemɔkɛyeli lɛ mli. Eba akɛ wɔɔya nɔ wɔna miishɛɛ kɛ tsui ni nyɔɔ mɔ mli lɛ nɔŋŋ ni wɔná yɛ be mli ni wɔkase anɔkwale lɛ kɛjɛ shishijee lɛ, kɛ nɔmimaa aakɛ wɔbaana jweremɔ nɔ kpele ni ji naanɔ wala yɛ Yehowa nibii agbɛjianɔtoo hee lɛ mli. Taakɛ Paulo wie he yɛ gbɛ ni ja nɔ lɛ: “Nyɛkahaa mɔ ko miishɔa nyɛjweremɔ nii lɛ kɛmiijɛ nyɛdɛŋ.”! —Kolosebii 2:18.a
[Shishigbɛ niŋmai]
a Ajie kɛjɛ March 15, 1986 Watchtower lɛ mli
Ani Obaanyɛ Oha Hetoo?
◻ Mɛni hewɔ eji anɔkwale akɛ atoko afɔko shi akɛ mɔ ko baakwa hemɔkɛyeli lɛ?
◻ Yɛ mɛɛ gbɛ nɔ mlifu, henɔwomɔ kɛ tsui shi ni aŋmɛɛɛ baanyɛ agbele gbɛ yɛ wɔtsui mli aha Abonsam?
◻ Mɛni ji nɔ ni yɛ be babaoo mli lɛ ehɔ wiemɔ ni awieɔ ashiɔ ŋaawoo ni mɛi ni nyiɛɔ hiɛ lɛ kɛhaa lɛ sɛɛ?
◻ Mɛɛ yibii ni Yehowa Odasefoi ewo yeɔ odase akɛ amɛji gbɛjianɔtoo loo asafo kome ni Nyɔŋmɔ kɛtsuɔ nii?
[Mfoniri ni yɔɔ baafa 15]
Kɛ wɔkpoo ŋaawoo lɛ, ‘wɔkɛ wɔhe baafɔ shi wɔha Abonsam’
[Mfoniri ni yɔɔ baafa 16]
Henɔwomɔ kɛ shigbeemɔ baaba, nɔ̃ mli ni mɔ ko nyɛŋ ate shi kɛjɛ mli dɔŋŋ
[Mfoniri ni yɔɔ baafa 18]
Yehowa tsuji ni kɛ amɛhe woɔ nitsumɔ mli ni yɔɔ miishɛɛ lɛ ‘kɛ amɛhe efɔɔɔ shi amɛhaaa Abonsam’ aloo hemɔkɛyeli kwamɔ susumɔi