Kristofoi Aweku Yeɔ Buaa Mɛi Ni Edara Lɛ
“Kaashɛ mi ofɔ yɛ migbɔlɛ be lɛŋ; kɛ mihewalɛ ta lɛ, kaakwa mi.”—LALA 71:9.
1. Te akɛ mɛi ni edara lɛ yeɔ haa tɛŋŋ yɛ maji pii anɔ.
“NIIAMLIPƐIMƆ tsɔɔ akɛ nɔ ni miihe ashɛ yinɔbii ni afeɔ amɛ niseniianii lɛ ateŋ mɛi ekpaa yɛ kpawo mli (86%) lɛ awekumɛi diɛŋtsɛ ji mɛi ni feɔ amɛ nakai,” taakɛ The Wall Street Journal tsɔɔ lɛ. Wolo tɛtrɛɛ ni atsɛɔ lɛ Modern Maturity lɛ wie akɛ: “Mɛi ni edara ni afeɔ amɛ niseniianii lɛ ji [weku yiwalɛ nifeemɔ] nii hee fe fɛɛ ni ajieɔ lɛ kpo yɛ maŋ lɛŋ adafitswaa woji amli saji amli.” Hɛɛ, mɛi ni edara lɛ ebatsɔmɔ mɛi ni afeɔ amɛ niseniianii ni akpooɔ amɛ yɛ maji pii amli. Lɛlɛŋ mɛi pii etsɔmɔ “trumui, . . . mɛi ni yeee anɔkwa, kɛ mɛi ni edɔɔɔ mɔ he” yɛ wɔbe nɛɛ mli.”—2 Timoteo 3:1-3, New World Translation.
2. Taakɛ Hebri Ŋmalɛi lɛ tsɔɔ lɛ, te Yehowa buɔ mɛi ni edara lɛ ehaa tɛŋŋ?
2 Ni kɛlɛ, jeee nakai esa akɛ akɛ mɛi ni edara lɛ ahi shi aha yɛ blema Israel. Mla lɛ jaje akɛ: “Tee shi yɛ yiteŋwajiatsɛ hiɛ, ni owo nuumo hiɛ nyam, ni oshe o-Nyɔŋmɔ lɛ; miji Yehowa.” Nilee abɛi awolo ni jɛ mumɔŋ lɛ woɔ wɔ ŋaa akɛ: “Bo otsɛ ni fɔo lɛ toi, ni kaagbe onyɛ he guɔ, kɛ egbɔ lɛ.” Ekɛ famɔ haa akɛ: “Mibi, bo otsɛ tsɔsemɔ lɛ toi, ni kaashɛ onyɛ mla lɛ ofɔ.” Mose Mla lɛ tsɔɔ akɛ esa akɛ ana bulɛ aha mɛi ni edara lɛ, hiimeji kɛ yeimeji fɛɛ. Belɛ eyɛ faŋŋ akɛ, Yehowa sumɔɔ ni awo mɛi ni edara yɛ afii amli lɛ ahiɛ nyam.—3 Mose 19:32; Abɛi 1:8; 23:22.
Mɛi ni Edara lɛ Akwɛmɔ yɛ Biblia Beaŋ
3. Yosef jie mlihilɛ kpo etsɔɔ etsɛ ni egbɔ lɛ yɛ mɛɛ gbɛ nɔ?
3 Esa akɛ ajie bulɛ kpo, jeee yɛ wiemɔi amli pɛ kɛkɛ, shi moŋ yɛ mlihilɛ nifeemɔi amli hu. Yosef jie mlihilɛ kpele kpo etsɔɔ etsɛ ni egbɔ lɛ. Eetao ni Yakob afa gbɛ kɛjɛ Kanaan kɛba Mizraim, ni ji gbɛ jekɛmɔ fe shitooi 200. No hewɔ lɛ Yosef maje Yakob “tejii nyɔŋma ni tere Mizraim nibii kpakpai, kɛ tejiyei nyɔŋma ni tere abele kɛ aboloo kɛ niyenii, ni akɛyaha etsɛ, ni ekɛnyiɛ gbɛ lɛ.” Beni Yakob bashɛ Goshen lɛ, Yosef yanina lɛ yɛ jɛmɛ ni “eho egbee ekuɛ nɔ, ni efo eshwie ekuɛ nɔ aahu.” Yosef jie suɔmɔ ni mli wa waa kpo etsɔɔ etsɛ. Mɛɛ nɔkwɛmɔ nɔ ni kanyaa henumɔ ni aaana aha mɛi ni edara lɛ enɛ ji nɛkɛ!—1 Mose 45:23; 46:5, 29.
4. Mɛni hewɔ Rut ji nɔkwɛmɔ nɔ kpakpa ni sa akɛ wɔkase lɛ?
4 Mlihilɛ ni wɔɔjie kpo wɔtsɔɔ mɛi ni edara lɛ he nɔkwɛmɔ nɔ fɛfɛo kroko ni sa akɛ wɔnyiɛ sɛɛ ji Rut. Eyɛ mli akɛ eji Jeŋmajiaŋnyo moŋ, shi etee nɔ ekɛ ehe kpɛtɛ eshaayoo Yudayoo okulafo ni eda waa yɛ afii amli, Naomi he. Eshi lɛ diɛŋtsɛ emaŋbii ni ekɛ ehe wo oshara ni ji wu kroko ni ekolɛ enyɛŋ ena lɛ mli. Beni Naomi wo lɛ hewalɛ ni eku esɛɛ eya emaŋbii aŋɔɔ lɛ, Rut ha lɛ hetoo kɛ wiemɔi kpakpai fe fɛɛ ni yɔɔ Biblia lɛ mli lɛ ateŋ ekome, akɛ: “Kaahiɛ mi doo akɛ mishio ni miku misɛɛ ni mifɔɔ osɛɛ nyiɛmɔi. Shi he fɛɛ he ni oyaa lɛ, matee; ni he ni oyaahi lɛ, jɛi mayahi. Omaŋ ji mimaŋ, ni o-Nyɔŋmɔ ji mi hu mi-Nyɔŋmɔ. He ni ooogbo yɛ lɛ, jɛi magbo yɛ, ni jɛi nɔŋŋ aaafu mi yɛ; Yehowa kɛ mi aye ni ekɛ mi aye ekoŋŋ, kɛ jeee gbele kɛkɛ aaagbala mi kɛ bo teŋ fii!” (Rut 1:16, 17) Rut jie sui kpakpai akpo hu beni etsɔɔ akɛ eesumɔ ni ekɛ Boaz ni eda yɛ afii amli lɛ abote gbalashihilɛ mli yɛ gboshiŋa loo okulafo kɛ shihilɛ he gbɛjianɔtoo lɛ naa lɛ.—Rut, yitsei 2 kɛyashi 4.
5. Mɛɛ sui Yesu jie lɛ kpo yɛ bɔ ni ekɛ mɛi ye eha lɛ mli?
5 Yesu fee nɔkwɛmɔ nɔ ni tamɔ nakai nɔŋŋ yɛ bɔ ni ekɛ mɛi ye eha lɛ mli. Eto etsui shi, emusuŋ tsɔ lɛ, emli hi, ni eha mɛi hejɔɔmɔ. Ená nuu ohiafo ko ni etsɔ helatsɛ, ni enyɛɛɛ enyiɛ afii 38 sɔŋŋ lɛ he miishɛɛ ni etsa lɛ. Ejie mlihilɛ kpo etsɔɔ yei okulafoi. (Luka 7:11-15; Yohane 5:1-9) Yɛ epiŋmɔ gbele yɛ sɛŋmɔtso lɛ nɔ amanehulu lɛ mli po lɛ, eto gbɛjianɔ koni akwɛ enyɛ, ni nakai beaŋ lɛ ekolɛ eye kɛjɛ afii 50 kɛyaa lɛ. Yesu ha mɛi fɛɛ ni kɛ lɛ bɔ lɛ na hejɔɔmɔ, ja ehenyɛlɔi osatofoi lɛ pɛ. Enɛ hewɔ lɛ, enyɛ ekɛɛ akɛ: “Nyɛbaa miŋɔɔ, nyɛ mɛi fɛɛ ni etɔ nyɛ ni nyɛjatsui fe nyɛ lɛ, ni maha nyɛ hejɔɔmɔ. Nyɛwoa mipa lɛ nyɛfɔa nyɛnɔ, ni nyɛkasea mi; shi mihe jɔ, ni mibaa mihe shi kɛjɛ mitsui mli; ni nyɛaana hejɔɔmɔ nyɛaaha nyɛsusumai lɛ.”—Mateo 9:36; 11: 28, 29; Yohane 19:25-27.
Namɛi Sa Akɛ Asusu Amɛhe?
6. (a) Namɛi sa kwɛmɔ krɛdɛɛ? (b) Mɛɛ saji wɔbaanyɛ wɔbi wɔhe?
6 Akɛni Yehowa Nyɔŋmɔ kɛ e-Bi, Yesu Kristo efee nɔkwɛmɔ nii kpakpai yɛ mɔ hesusumɔ mli hewɔ lɛ, eja gbɛ jogbaŋŋ akɛ Kristofoi ni ejɔɔ amɛhe nɔ lɛ aaakase amɛ nɔkwɛmɔ nɔ lɛ. Wɔyɛ mɛi komɛi yɛ wɔteŋ ni etɔ amɛ ni amɛjatsui tsii fe amɛ, afii babaoo nɛ—nyɛmimɛi hii kɛ nyɛmimɛi yei ni edara yɛ afii amli ni amɛbote amɛgbɔlɛ be afii amli lɛ. Ekolɛ wɔfɔlɔi loo wɔniimɛi kɛ wɔnaamɛi ji amɛteŋ mɛi komɛi. Ani wɔbuɔ amɛ akɛ amɛ he ehiaaa? Ani wɔkɛ yelikɛbuamɔ kɛ sɛɛfimɔ haa amɛ? Aloo ani wɔhiɛ sɔɔ niiashikpamɔ kɛ nilee babaoo ni amɛyɔɔ lɛ lɛlɛŋ? Eji anɔkwale akɛ, ekolɛ amɛteŋ mɛi komɛi kɛ sui komɛi kɛ gbɔjɔmɔi ni afɔɔ namɔ yɛ gbɔlɛ mli lɛ baaka wɔ tsuishitoo akwɛ. Shi bi ohe akɛ, ‘Te ebaasoro mi eha tɛŋŋ yɛ nakai shihilɛi ashishi?’
7. Mɛni feɔ bɔ ni ehe hiaa ni wɔna henumɔ wɔha mɛi ni edara lɛ he mfoniri?
7 Agba sane ko ni saa henumɔi ahe waa, ni jɛ Boka Teŋgbɛ, ni tsɔɔ mlihilɛ ni gbekɛ yoo fioo ko yɔɔ kɛha mɛi ni edara lɛ. Yoomo ko miiye miibua yɛ kpatashi, kɛkɛ ni trukaa ni sũ plɛte ni ehiɛ lɛ je edɛŋ egbee shi ni ejwa. Bɔ ni efeɔ nii shɔ̃ɔ lɛ haoɔ lɛ waa; shi ebiyoo lɛ mli fu lɛ waa po fe nakai. Kɛkɛ ni ebiyoo nɛɛ tsɛ lɛ diɛŋtsɛ ebiyoo fioo ni eyɔɔ lɛ ni etsu lɛ ni eya shwapo mli ni eyahe tso plɛte ni ejwaaa kɛbaha enaa nɛɛ. Kɛkɛ ni gbekɛyoo lɛ ku esɛɛ ekɛ tso plɛtei enyɔ ba. Ni emami bi lɛ akɛ: “Mɛni hewɔ ohe plɛtei enyɔ?” Ni nabi lɛ here nɔ, kɛ shishashaomɔ akɛ: “Ekome kɛha minaa kɛ ekroko lɛ kɛha bo, kɛ ogbɔ.” Hɛɛ, wɔ fɛɛ wɔkpaa gbɛ akɛ wɔbaagbɔlɔ, yɛ nɛkɛ je nɛɛ mli. Ani wɔhiɛ esɔŋ akɛ akɛ wɔ aaaye yɛ tsuishitoo kɛ mlihilɛ mli?—Lala 71:9.
8, 9. (a) Te esa akɛ wɔkɛ mɛi ni edara yɛ wɔteŋ lɛ aye aha tɛŋŋ? (b) Mɛni ehe hiaa ni mɛi ni batsɔmɔ Kristofoi etsɛko tsɔ̃ lɛ ateŋ mɛi komɛi akai?
8 Ohiɛ akakpa nɔ kɔkɔɔkɔ akɛ wɔnyɛmimɛi hii kɛ yei ni edara yɛ afii amli lɛ ateŋ mɛi pii kɛ afii babaoo etsu nii kɛ anɔkwayeli yɛ Kristofoi anitsumɔ mli. Eka shi faŋŋ akɛ amɛsa woo kɛ mɔ hesusumɔ, kɛ mlihilɛ yelikɛbuamɔ kɛ hewalɛwoo ni wɔkɛaaha amɛ. Nilelɔ lɛ wie yɛ gbɛ ni ja nɔ akɛ: “Waŋ lɛ, anunyam akekre ni, kɛ́ ana lɛ yɛ jalɛ gbɛ nɔ lɛ.” Ni esa akɛ ajie bulɛ kpo atsɔɔ nakai yi ni eje waŋ lɛ, nuumo kɛ yoomo fɛɛ. Nɛkɛ hiimeji kɛ yeimeji nɛɛ ateŋ mɛi komɛi miisɔmɔ lolo akɛ gbɛgbalɔi, ni hii lɛ ateŋ mɛi pii miiya nɔ amɛmiisɔmɔ yɛ anɔkwayeli mli akɛ onukpai yɛ asafoi lɛ amli; mɛi komɛi tsuɔ nitsumɔi kpakpai akɛ nɔkwɛlɔi gbɛfalɔi.—Abɛi 16:31.
9 Paulo wo Timoteo ŋaa akɛ: “Kaafámɔ onukpa ko, shi moŋ owie otsɔɔ lɛ akɛ tsɛ; obalahii hu akɛ nyɛmimɛi; yei onukpai lɛ akɛ nyɛmɛi; obalayei lɛ hu akɛ nyɛmimɛi yei yɛ hetsemɔ fɛɛ mli.” (1 Timoteo 5:1, 2) Esa akɛ mɛi ni jɛ jeŋ ni bulɛ bɛ mli nɛɛ mli amɛba Kristofoi asafo lɛ mli etsɛko tsɔ lɛ aŋɔ Paulo wiemɔi, ni damɔ suɔmɔ nɔ nɛɛ amɛto amɛtsuii amli jogbaŋŋ. Obalaŋtai, nyɛkakasea sui gbohii ni ekolɛ nyɛnaa yɛ skul lɛ. Nyɛmli akafua yɛ ŋaawoo ni Odasefoi ni edara yɛ afii amli lɛ jɛɔ mlihilɛ mli amɛkɛhaa nyɛ lɛ ahe. (1 Korintobii 13:4-8; Hebribii 12:5, 6, 11) Shi, kɛ yelikɛbuamɔ he miihia mɛi ni edara lɛ yɛ hela loo ohia hewɔ lɛ, namɛi gbɛnaa nii ka amɛnɔ klɛŋklɛŋ akɛ amɛ esa akɛ amɛye amɛbua amɛ?
Weku lɛ Gbɛfaŋnɔ yɛ Mɛi ni Edara lɛ Akwɛmɔ Mli
10, 11. (a) Taakɛ Biblia lɛ tsɔɔ lɛ, namɛi sa akɛ amɛnyiɛ hiɛ yɛ mɛi ni edara lɛ akwɛmɔ mli? (b) Mɛni hewɔ ebɛ mlɛo be fɛɛ be akɛ aaakwɛ mɛi ni edara lɛ?
10 Naagbai tetee shi yɛ mra be Kristofoi asafo lɛ mli, yɛ okulafoi akwɛmɔ he. Mɛɛ gbɛ nɔ bɔfo Paulo tsɔɔ bɔ ni esa akɛ atsu nɛkɛ hiamɔ nɛɛ he nii aha yɛ? “Yei okulafoi ni ji okulafoi lɛlɛŋ lɛ wo amɛ. Shi kɛ yoo okulafo ko yɛ bii loo nabii lɛ, amɛkase Nyɔŋmɔ gbeyeishemɔ yɛ amɛ diɛŋtsɛ amɛwe tsutsu, ni amɛto amɛfɔlɔi lɛ anajiaŋ pɛpɛɛpɛ; ejaakɛ enɛ yɛ fɛo ni eŋɔɔ Nyɔŋmɔ naa. Shi kɛ mɔ ko kwɛɛɛ lɛ diɛŋtsɛ emɛi, titri lɛ lɛ diɛŋtsɛ eshiabii lɛ, ekpa yɛ hemɔkɛyeli lɛ sɛɛ, ni efaŋ mɔ ni heee yeee fe lɛ.”—1 Timoteo 5:3, 4, 8.
11 Yɛ hiamɔ bei amli lɛ, esa akɛ wekumɛi ni bɛŋkɛ kpaakpa lɛ afee klɛŋklɛŋ bii ni esa akɛ amɛye amɛbua mɛi ni edara lɛ.a Yɛ nɛkɛ gbɛ nɔ lɛ, bii ni edara lɛ baanyɛ ajie hiɛsɔɔ kpo yɛ suɔmɔ, nitsumɔ, kɛ kwɛmɔ ni amɛna kɛjɛ amɛfɔlɔi adɛŋ afii babaoo lɛ he. Ekolɛ enɛ feemɔ efeŋ mlɛo. Kɛji gbɔmɛi miigbɔlɔ lɛ, yɛ adebɔɔ naa lɛ, amɛfeɔ shɔ̃ɔ, ni mɛi komɛi po nyɛɛɛ nɔ ko kwraa amɛfee dɔŋŋ. Ekolɛ amɛteŋ mɛi komɛi feɔ pɛsɛmkunya kɛ shɛii, ni ekolɛ amɛleee akɛ amɛmiifee nakai. Shi beni wɔji abifabii lɛ, ani wɔ lɛ wɔfeee pɛsɛmkunya kɛ shɛii? Ni ani wɔfɔlɔi kɛ oyaiyeli baaa amɛbayeee amɛbuaaa wɔ? Amrɔ nɛɛ nibii etsake yɛ amɛgbɔlɛ be nɛɛ mli. No hewɔ lɛ, mɛni he hiaa? Mlihilɛ kɛ tsuishitoo.—Okɛto 1 Tesalonikabii 2:7, 8 he.
12. Mɛɛ sui ahe hiaa yɛ mɛi ni edara lɛ akwɛmɔ mli—kɛ mɛi krokomɛi fɛɛ hu yɛ Kristofoi asafo lɛ mli?
12 Bɔfo Paulo kɛ ŋaawoo ni anyɛɔ akɛtsuɔ nii ha beni eŋma akɛ: “No hewɔ lɛ, akɛ nɔ ni Nyɔŋmɔ halamɔ bii, mɛi krɔŋkrɔŋi kɛ suɔmɔ mɛi ji nyɛ nɛɛ lɛ, nyɛwoa musuŋtsɔlɛ, mlihilɛ, heshibaa jwɛŋmɔ, mlijɔlɛ, tsuishitoo; ni kɛji mɔ ko kɛ mɔ ko na sane ko lɛ, nyɛnanaa nyɛhaa nyɛhe ni nyɛkɛfafaa nyɛhe, taakɛ bɔ ni [Yehowa] hu ŋɔfa nyɛ lɛ, nakai nyɛ hu nyɛfea; shi enɛɛmɛi fɛɛ sɛɛ lɛ nyɛwoa suɔmɔ ni ji emuuyeli kpaa lɛ.” Kɛ esa akɛ wɔjie nɛkɛ musuŋtsɔlɛ kɛ suɔmɔ nɛɛ kpo yɛ asafo lɛ mli lɛ, no lɛ ani esaaa akɛ wɔjieɔ lɛ kpo babaoo po fe nakai yɛ weku lɛ mli?—Kolosebii 3:12-14.
13. Kɛfata wafɔlɔi kɛ wɔniimɛi kɛ wɔnaamɛi ahe lɛ, namɛi hu yelikɛbuamɔ he baahia amɛ?
13 Bei komɛi lɛ, ekolɛ jeee fɔlɔi loo niimɛi kɛ naamɛi pɛ nɛkɛ yelikɛbuamɔ nɛɛ he baahia amɛ, shi moŋ wekumɛi krokomɛi hu ni edara yɛ afii amli. Mɛi ni edara yɛ afii amli ni amɛbɛ bii lɛ ateŋ mɛi komɛi kɛ afii babaoo esɔmɔ yɛ maŋsɛɛ sanekpakpa sɔɔmɔ, kɛ gbɛfaa sɔɔmɔ lɛ, kɛ be-fɛɛ sɔɔmɔ nitsumɔ kroko mli. Amɛkɛ Maŋtsɛyeli lɛ eye klɛŋklɛŋ gbɛhe lɛlɛŋ yɛ amɛshihilɛ be fɛɛ mli. (Mateo 6:33) Belɛ, ani ebafeŋ nɔ ni ja jogbaŋŋ akɛ wɔɔtsɔɔ akɛ wɔsusuɔ amɛhe? Eka shi faŋŋ akɛ wɔyɛ enɛ he nɔkwɛmɔ nɔ kpakpa ni ji bɔ ni Buu Mɔɔ Asafo lɛ kwɛɔ e-Betel weku lɛ mli bii ni edara yɛ afii amli lɛ. Yɛ Betel nitsumɔ he yitso yɛ Brooklyn kɛ Asafo lɛ nitsumɔ he niji lɛ babaoo mli lɛ, ahaa weku lɛ mli bii ni atsɔse amɛ jogbaŋŋ ni akɛ nitsumɔ nɛɛ ewo amɛdɛŋ lɛ kwɛɔ nyɛmimɛi hii kɛ yei ni edara nɛɛ ateŋ mɛi saŋŋ daa gbi. Amɛyɛ he miishɛɛ akɛ amɛaakwɛ mɛi ni edara nɛɛ, oookɛɛ amɛfɔlɔi loo amɛniimɛi kɛ amɛnaamɛi diɛŋtsɛ ji amɛ. Yɛ nakai beaŋ nɔŋŋ lɛ, amɛkaseɔ nii babaoo kɛjɛɔ mɛi ni edara nɛɛ aniiashikpamɔ mli.—Abɛi 22:17.
Asafo lɛ Gbɛfaŋnɔ yɛ Amɛ Kwɛmɔ Mli
14. Mɛɛ gbɛjianɔ ato aha mɛi ni edara lɛ yɛ mra be mli Kristofoi asafo lɛ mli?
14 Maji pii yɛ ŋmɛnɛ ni amɛyɛ gbɛjianɔtoi kɛha gbɔlɛ be mli shika ni ahaa kɛ helatsamɔ he kwɛmɔ ni Maŋ lɛ kwɛɔ mɛi ni edara lɛ. Kɛ hegbɛ yɛ akɛ amɛkɛaatsu nii lɛ, no lɛ Kristofoi baanyɛ amɛkɛ nɛkɛ hegbɛi nɛɛ atsu nii kɛmɔ shi. Shi, hegbɛi ni tamɔ nɛkɛ bɛ yɛ klɛŋklɛŋ afii oha lɛ mli. No hewɔ lɛ Kristofoi asafo lɛ to gbɛjianɔ jogbaŋŋ koni amɛkɛye amɛbua okulafoi ni ehia amɛ lɛ, Paulo fã akɛ: “Akaŋɔ yoo okulafo ni nako aye afii nyɔŋmai ekpaa awo [asafo lɛ yelikɛbuamɔ] sɔɔmɔ lɛ mli, ja mɔ ni gbã nuu kome, mɔ ni atãa ehe sane kpakpa akɛ etsu nijuji, no ji: kɛ́ elɛ bii, kɛ́ efee mɛi agbɔ, kɛ́ efɔ mɛi krɔŋkrɔŋi anaji ahe, kɛ́ eye ebua mɛi ni naa amanehulu lɛ, kɛ́ edi nitsumɔ kpakpa fɛɛ nitsumɔ kpakpa sɛɛ lɛ.” Enɛ hewɔ lɛ, Paulo tsɔɔ akɛ asafo lɛ hu yɛ egbɛfaŋnɔ yɛ mɛi ni edara lɛ ayelikɛbuamɔ mli. Yei ni jwɛŋɔ mumɔŋ nibii ahe, ni amɛbɛ bii ni ji heyelilɔi lɛ sa kɛha yelikɛbuamɔ ni tamɔ nɛkɛ.—1 Timoteo 5:9, 10.
15. Mɛni hewɔ yelikɛbuamɔ he baahia koni nine anyɛ ashɛ Maŋ yelikɛbuamɔ nɔ lɛ?
15 Kɛ Maŋ lɛ yɛ gbɛjianɔtoi kɛha mɛi ni edara lɛ, bei pii lɛ ebiɔ ehe woji afeemɔ nitsumɔ ni baanyɛ awa waa. Yɛ shihilɛi ni tamɔ nɛkɛ mli lɛ, eja gbɛ akɛ nɔkwɛlɔi ni yɔɔ asafo lɛ mli lɛ aaato gbɛjianɔ kɛha yelikɛbuamɔ, koni mɛi ni edara lɛ anyɛ abi, loo amɛyahe yelikɛbuamɔ nɛɛ, loo amɛha eya hiɛ. Bei komɛi lɛ, tsakemɔi ni baa yɛ shihilɛ mli baanyɛ aha shika ni ahaa mɔ lɛ aya hiɛ. Shi nibii krokomɛi babaoo diɛŋtsɛ yɛ ni nɔkwɛlɔi lɛ baanyɛ amɛto he gbɛjianɔ koni anyɛ atsɔ nɔ akwɛ mɛi ni edara lɛ. Mɛni ji nibii nɛɛ ekomɛi?
16, 17. Mɛɛ gbɛi sɔrɔtoi anɔ wɔbaanyɛ wɔtsɔ wɔjie gbɔfeemɔ kpo wɔtsɔɔ mɛi ni edara ni yɔɔ asafo lɛ mli lɛ yɛ?
16 Gbɔfeemɔ ji kusum ni yaa sɛɛ shɔŋŋ kɛyaa Biblia beaŋ tɔ̃ɔ. Yɛ Boka Teŋgbɛ maji pii amli lɛ, afeɔ mɛikpɔji gbɔ, ni kɛ hoo kwraa lɛ, ahaa amɛ tii loo kɔfe kɔɔpoo kome, aahu kɛbashi ŋmɛnɛ. No hewɔ lɛ, ebɛ naakpɛɛ akɛ Paulo ŋma akɛ: “Mɛi krɔŋkrɔŋi lɛ ahia lɛ ahia nyɛ hu; nyɛbɔa gbɔfeemɔ he mɔdɛŋ.” (Romabii 12:13) Hela wiemɔ kɛha gbɔfeemɔ, phi·lo·xe·niʹa, lɛ shishinumɔ diɛŋtsɛ ji “suɔmɔ ni ayɔɔ kɛha, (miishɛɛ ni anaa ahaa, loo mlihilɛ ni ajieɔ kpo atsɔɔ) gbɔi.” Kɛ esa akɛ Kristofonyo afee mɛikpɔji agbɔ lɛ, no lɛ ani esaaa akɛ efeɔ nakai babaoo eha mɛi ni ekɛyɔɔ hemɔkɛyeli wekukpaa lɛ mli lɛ? Bei pii lɛ ninefɔɔ kɛha niyeli bafeɔ mɛi ni edara lɛ adaa gbi nifeemɔ mlifoo ko ni amɛnaa he miishɛɛ waa. Kɛ ootao onu gbee ni nilee kɛ niiashikpamɔ yɔɔ mli, yɛ ohiɛtserɛjiemɔ henaabuamɔi ashishi lɛ, no lɛ okɛ mɛi ni edara lɛ afata he.—Okɛto Luka 14:12-14 he.
17 Gbɛi babaoo yɛ ni abaanyɛ atsɔ nɔ awo mɛi ni edara lɛ hewalɛ. Kɛ wɔmiito kar kuu he gbɛjianɔ kɛha Maŋtsɛyeli Asa lɛ nɔ loo kpee yaa lɛ, ani mɛi ni edara lɛ ateŋ mɛi komɛi yɛ ni amɛbaasumɔ ni amɛfata nyɛhe? Nyɛkamɛa akɛ amɛ diɛŋtsɛ amɛbabi. Nyɛhaa amɛlea akɛ nyɛmiisumɔ ni nyɛkɛ amɛ aya. Yelikɛbuamɔ diɛŋtsɛ kroko hu ji ni nyɛha amɛle akɛ nyɛmiisumɔ ni nyɛya jara nɔ nyɛha amɛ. Aloo kɛ amɛbaanyɛ lɛ, ani wɔbaanyɛ wɔkɛ amɛ afata wɔhe kɛya nihemɔ? Shi esa akɛ okwɛ akɛ hei yɛ ni amɛbaanyɛ amɛjɔɔ amɛhe yɛ jɛmɛ kɛji ebalɛ akɛ nakai feemɔ he miihia amɛ. Ŋwanejee ko bɛ he akɛ tsuishitoo kɛ mlihilɛ kɛ nitsumɔ he baahia, shi anɔkwa shidaa ni mɔ ni eda nɛɛ baajie lɛ kpo lɛ baanyɛ afee nyɔmɔwoo kpele.—2 Korintobii 1:11.
Sɛɛnamɔ Kpele Kɛha Asafo Lɛ
18. Mɛni hewɔ mɛi ni edara lɛ ji jɔɔmɔ kɛha asafo lɛ?
18 Mɛɛ jɔɔmɔ eji nɛkɛ akɛ aaana mɛi ni yiteŋ eyɛ (kɛ agbɛnɛ mɛi ni yiteŋ ekpa yɛ gbɔlɛ hewɔ) yɛ asafo ko mli! Etsɔɔ akɛ yɛ obalaŋtai ni yɔɔ hewalɛ kɛ ekaa babaoo lɛ ateŋ lɛ, wɔyɛ nilee kɛ niiashikpamɔ hu ni akɛshwã amɛteŋ—ni he yɔɔ sɛɛnamɔ kpele kɛha asafo lɛ. Amɛ nilee lɛ tamɔ nu ni haa mɔ he jɔɔ lɛ, ni ashaa kɛjɛɔ nu bu mli. Etamɔ bɔ ni Abɛi 18:4 wie he lɛ, akɛ: “Gbɔmɔ daaŋ wiemɔi tamɔ nui ni mli kwɔlɔ, kɛ faa ni hoɔ kɛ nilee nu bu.” Kwɛmɔ bɔ ni ewoɔ mɛi ni edara lɛ hewalɛ ehaa akɛ amɛaanu he akɛ abuɔ amɛ, ni hiɛ sɔɔ amɛ waa hu!—Okɛto Lala 92:15 he.
19. Mɛi komɛi kɛ amɛhe esha afɔle kɛha amɛfɔlɔi ni edara lɛ yɛ mɛɛ gbɛ nɔ?
19 Mɛi ni yɔɔ be-fɛɛ sɔɔmɔ lɛ mli lɛ ateŋ mɛi komɛi enu he akɛ ehe miihia ni amɛŋmɛɛ amɛhegbɛi ahe koni amɛku amɛsɛɛ amɛba shia ni amɛbakwɛ amɛfɔlɔi ni edara, ni amɛhe yeɔ lɛ. Amɛkɛ amɛhe esha afɔle amɛha mɛi ni kɛ amɛhe sha afɔle amɛha amɛ be ko ni eho lɛ. Gbalashihilɛ mli hefatalɔi komɛi, ni tsutsu lɛ amɛji maŋsɛɛ sanekpakpa shiɛlɔi, ni amɛkã he amɛyɛ be-fɛɛ sɔɔmɔ lɛ mli lolo lɛ ku amɛsɛɛ amɛba shia koni amɛbakwɛ amɛfɔlɔi ni amɛdara lɛ. Amɛfee enɛ fe afii 20 sɔŋŋ. Afii ejwɛ ni eho nɛ ni ehe bahia ni akɛ nuu lɛ nyɛ aya he ni akwɛɔ mɛi ni edara yɛ. Wu lɛ, ni amrɔ nɛɛ eye fe afii 60 lɛ yasaraa enyɛ ni eye afii 93 lɛ daa gbi. Etsɔɔ mli akɛ: “Te mafee tɛŋŋ mashi lɛ? Minyɛ ni!” Yɛ shihilɛi krokomɛi amli hu lɛ, asafoi kɛ aŋkroaŋkroi kɛ amɛhe haa akɛ amɛbaakwɛ mɛi ni edara yɛ afii amli lɛ koni amɛbii anyɛ amɛya nɔ yɛ amɛnitsumɔi amli. Nɛkɛ suɔmɔ ni pɛsɛmkunya bɛ mli nɛɛ hu sa yijiemɔ waa diɛŋtsɛ. Esa akɛ ajɛ henilee kanyamɔ mli atsu shihilɛi nɛɛ eko fɛɛ eko he nii ejaakɛ esaaa akɛ akuɔ hiɛ afɔɔ mɛi ni edara lɛ anɔ. Tsɔɔmɔ akɛ osumɔɔ ofɔlɔi ni edara yɛ afii amli lɛ.—2 Mose 20:12; Efesobii 6:2, 3.
20. Mɛɛ nɔkwɛmɔ Yehowa efee eha wɔ yɛ mɛi ni edara lɛ akwɛmɔ mli?
20 Lɛlɛŋ, wɔnyɛmimɛi hii kɛ yei ni edara yɛ afii amli lɛ ji akekre fɛfɛo kɛha weku ko loo asafo ko. Yehowa kɛɛ: “Kɛyashi gbɔlɛ mli lɛ, mi nɔŋŋ ni, ni kɛyashi waŋjee mli hu mi nɔŋŋ matere: mi mifee, ni mi nɔŋŋ mahiɛ, mi nɔŋŋ matere, ni majie.” Eba akɛ wɔɔjie tsuishitoo kɛ kwɛmɔ ni tamɔ nakai kpo yɛ wɔnyɛmimɛi hii kɛ yei ni edara yɛ afii amli lɛ ahe, yɛ Kristofoi aweku lɛ mli.—Yesaia 46:4; Abɛi 16:31.
[Shishigbɛ niŋmai]
a Kɛ ootao nɔ ni wekumɛi baanyɛ afee ni amɛkɛye amɛbua mɛi ni edara lɛ he ŋaawoo ni atsɔɔ mli jogbaŋŋ lɛ, kwɛmɔ September 1, 1987 Buu-Mɔɔ, baafai 14-19.
Ani Okaiɔ?
◻ Mɛɛ Biblia mli nɔkwɛmɔ nii wɔyɔɔ ni kɔɔ mɛi ni edara lɛ akwɛmɔ he?
◻ Te esa akɛ wɔkɛ mɛi ni edara lɛ aye aha tɛŋŋ?
◻ Mɛɛ gbɛ weku mli bii lɛ baanyɛ akwɛ amɛsuɔlɔi ni edara lɛ anɔ yɛ?
◻ Mɛni asafo lɛ baanyɛ afeeni ekɛye ebuɔ mɛi ni edara lɛ?
◻ Mɛni hewɔ mɛi ni edara lɛ ji jɔɔmɔ kɛha wɔ fɛɛ lɛ?
[Mfoniri ni yɔɔ baafa 23]
Rut jie mlihilɛ kɛ bulɛ kpo etsɔɔ Naomi ni eda yɛ afii amli lɛ
[Mfoniri ni yɔɔ baafa 24]
Mɛi ni edara lɛ ji asafo lɛ mli bii ni abuɔ amɛ waa