Maŋtsɛyeli Jajelɔi Bɔ Amaniɛ
AJɔɔ Nigeria Skul Gbekɛbii Yɛ Anɔkwayeli Hewɔ
BƆFO Paulo ŋma akɛ: “Kɛ aaaho lɛ, nyɛgbɛfaŋ lɛ, nyɛkɛ gbɔmɛi fɛɛ ahia shi yɛ hejɔlɛ mli.” (Romabii 12:18) Yehowa Odasefoi abii ni ji skul gbekɛbii ni yɔɔ Nigeria lɛ kɛ ŋaawoo nɛɛ tsuɔ nii, kɛji aawa amɛ yi po. Nɔ ni jɛɔ mli baa ji, Yehowa jɔɔ amɛ.
◻ Tsɔɔlɔ kome ko sumɔɔɔ Yehowa Odasefoi asane kwraa. Gbi ko leebi beni skulbii lɛ fɛɛ ebua amɛhe naa lɛ, etsɛ Odasefoi lɛ fɛɛ kɛba hiɛ ni ekɛɛ amɛla jakumaŋ lala lɛ. Amɛkpoo akɛ amɛlaŋ, ni amɛtsɔɔ mli akɛ amɛmiisumɔ ni amɛkɛ hetuu-kɛhamɔ aha Nyɔŋmɔ pɛ. Kɛkɛ ni tsɔɔlɔ lɛ ha amɛ fɛɛ amɛje kpo kɛtee agbo lɛ naa ni ekɛɛ amɛyahu. Shi yɛ nakai beaŋ lɛ, skulbii krokomɛi ni eshwɛ lɛ miiya nɔ kɛ amɛnikasemɔ.
Kɛkɛ ni Odasefonyo ko ni hiɛ efa yɛ mli kɛ Skul kɛ Yehowa Odasefoi wolo bibioo lɛ ekome yaha tsɔɔlɔ lɛ, ni egbala bɔ ni Yehowa Odasefoi kɛ amɛhe wooo maŋ saji amli lɛ mli etsɔɔ lɛ. Shi, tsɔɔlɔ lɛ sumɔɔɔ ni akɛ lɛ wieɔ sane lɛ he, ni eheee wolo bibioo lɛ hu. Yɛ anɔkwale mli lɛ, amrɔ nɔŋŋ ni eha toigbalamɔ ni ekɛhaa gbekɛbii lɛ mli wa waa moŋ.
Odasefoi gbekɛbii nɛɛ tee nɔ amɛŋmɛ amɛtsu shi yɛ toigbalamɔ nɛɛ mli ni amɛtee nɔ amɛhu aahu beni tsɔɔlɔ lɛ po bɛ jɛmɛ. Gbi ko lɛ, tsɔɔlɔ lɛ yatee ni eekwɛ amɛ ni amɛleee, beni amɛyaa nɔ amɛtsuɔ nii ni amɛlaa Maŋtsɛyeli lalai lɛ. Ehiɛ sɔ amɛ waa, ni no hewɔ lɛ eha amɛku amɛsɛɛ kɛtee klas, ni enaa ekpɛ ehe yɛ su ni amɛjie lɛ kpo nɛɛ he. Mɛni jɛ mli eba? Amrɔ nɛɛ tsɔɔlɔ lɛ kɛ Yehowa Odasefoi miifee Biblia mli nikasemɔ!
Eka shi faŋŋ akɛ ajɔɔ nakai skul gbekɛbii lɛ waa yɛ anɔkwa ni amɛye Yehowa kɛ emlai lɛ hewɔ.—Abɛi 10:22.
◻ Ajɔɔ Ruth kɛ enanemɛi lɛ hu yɛ anɔkwa ni amɛye Yehowa taomɔ nii akɛ “amɛjɛɛɛ je lɛ mli” lɛ hewɔ. (Yohane 17:16) Ruth, ni eye afii 18 lɛ bɔi gbɛgbamɔ beni eye afii 12. Lɛ kɛ Odasefoi krokomɛi kɛ shitee-kɛ-woo kpe kɛjɛ amɛ skul tsɔɔlɔi aŋɔɔ, ejaakɛ amɛkpoo akɛ amɛlaŋ jakumaŋ lala lɛ. Kɛkɛ ni tsɔɔlɔi lɛ ateŋ mɔ kome bi akɛ eetao ena gbekɛbii yei lɛ afɔlɔi. Beni agbala nibii amli atsɔɔ lɛ kɛjɛ Skul wolo bibioo lɛ mli sɛɛ lɛ, tsɔɔlɔ lɛ nu shishi, ni ehaaa nikaselɔi lɛ naagbai dɔŋŋ.
Shi, gbi ko lɛ, tsɔɔlɔ ko ni jɛ lndia jɛ gbekɛbii yei lɛ ateŋ mɔ kome ni egbala etoi hu yɛ klasbii lɛ ahiɛ beni gbekɛyoo lɛ laaa jakumaŋ lala lɛ. Gbekɛyoo lɛ kɛ ekaa fa ehemɔkɛyeli lɛ he, kɛkɛ ni tsɔɔlɔ lɛ kɛ lɛ tee skul nɔkwɛlɔ lɛ ŋɔɔ. Beni amɛshɛ jɛmɛ lɛ, Odasefonyo obalaŋta nɛɛ na akɛ skul nɔkwɛlɔ lɛ sɛɛmɔ lɛ hu yɛ jɛmɛ. Nɔ ni fee lɛ naakpɛɛ fe fɛɛ ji akɛ, amrɔ nɔŋŋ kɛkɛ ni skul nɔkwɛlɔ lɛ kɛ esɛɛyelɔ lɛ fɛɛ shwie shi kɛ ŋmɔlɔ. Kɛkɛ ni skul nɔkwɛlɔ lɛ tsɔ ehe ni ebi tsɔɔlɔ lɛ akɛ: “Awura, kaagba ohe naa yɛ nɛkɛ gbekɛbii yei nɛɛ ahe. Kɛji okɛɛ abaagbe amɛ po, amɛbaasumɔ moŋ ni amɛgboi fe ni amɛaala jakumaŋ lala lɛ. Ani onuko amɛhe sane?” Kɛkɛ ni ekɛ esɛɛyelɔ lɛ fɛɛ wie hemɔkɛyeli kɛ ekaa ni Yehowa Odasefoi yɔɔ lɛ he. Kɛkɛ ni skul nɔkwɛlɔ lɛ kɛ gbekɛyoo lɛ wie, ni ekɛɛ lɛ akɛ edɔ lɛ waa yɛ hiɛgbele ni sane nɛɛ ewo lɛ lɛ hewɔ. Kɛkɛ ni ekɛfata he akɛ: “Yaa nɔ yɛ ohemɔkɛyeli nitsumɔi lɛ amli. Misumɔɔ nyɛjamɔ lɛ kɛ ekaa ni nyɛkɛdamɔɔ shi yɛ maŋ, kɛ agbɛnɛ yɛ skul nɛɛ mli hu lɛ.” Sɛɛ mli lɛ, tsɔɔlɔ ni teɔ shi ewoɔ amɛ nɛɛ yakpa Odasefonyo lɛ fai, ni ekɛɛ lɛ akɛ enu Odasefoi ahe ni amɛkɛwooo maŋ saji amli lɛ shishi agbɛnɛ.
Nɛkɛ gbekɛbii nɛɛ nyiɛɔ Hebribii etɛ ni ekuuu emuuyeli ni amɛhiɛ mli amɛha Nyɔŋmɔ lɛ mli kɛtsɔ shi ni amɛaakula amɛha amaga, kɛ agbɛnɛ Daniel hu, ni kpaaa sɔlemɔ kɛha Yehowa lɛ anɔkwɛmɔ nɔ lɛ sɛɛ. Yehowa jɔɔ nɛkɛ hii nɛɛ babaoo ejaakɛ amɛye Nyɔŋmɔ jalɛ mlai lɛ anɔkwa.—Daniel, yitsei 3 kɛ 6.