Daniel

6 Esa Dario hiɛ akɛ ehole kpokpaa nɔkwɛlɔi* 120 yɛ maŋtsɛyeli lɛ fɛɛ nɔ.+ 2 Ehole onukpai etɛ ni amɛkwɛ amɛnɔ, ni Daniel ji amɛteŋ mɔ kome;+ ni kpokpaa nɔkwɛlɔi*+ lɛ babuɔ amɛnitsumɔ lɛ he akɔntaa amɛhãa amɛ koni nɔ ko akaŋmɛɛ maŋtsɛ lɛ. 3 Daniel bɔɔ mɔdɛŋ fe onukpai krokomɛi lɛ kɛ kpokpaa nɔkwɛlɔi* lɛ ejaakɛ mumɔ ni nɔ bɛ yɛ emli,+ ni maŋtsɛ lɛ to eyiŋ akɛ ebaahã lɛ hegbɛ ni nɔ kwɔ yɛ maŋtsɛyeli muu lɛ fɛɛ mli.

4 Nakai beiaŋ lɛ, onukpai lɛ kɛ kpokpaa nɔkwɛlɔi* lɛ miitao nɔ ko amɛdamɔ nɔ yɛ maŋtsɛyeli lɛ he saji lɛ amli koni amɛkɛ sane afɔ̃ Daniel nɔ, shi amɛnáaa nɔ ko ni amɛbaadamɔ nɔ amɛkɛ sane afɔ̃ enɔ, ni amɛnáaa ehe sane gbonyo ko hu, ejaakɛ eyeɔ anɔkwa, ni ehiɛ yɛ ehe nɔ, ni anáaa sane gbonyo ko hu yɛ ehe. 5 Kɛkɛ ni hii nɛɛ kɛɛ akɛ: “Wɔnáŋ nɔ ko nɔ ko kwraa yɛ nɛkɛ Daniel nɛɛ he ni wɔbaadamɔ nɔ wɔkɛ sane afɔ̃ enɔ, ja wɔjɛ e-Nyɔŋmɔ lɛ mla lɛ mli wɔkɛ sane efɔ̃ enɔ.”+

6 No hewɔ lɛ, onukpai kɛ kpokpaa nɔkwɛlɔi* nɛɛ fee ekome kɛtee maŋtsɛ lɛ ŋɔɔ ni amɛyakɛɛ lɛ akɛ: “Maŋtsɛ Dario, oyi aná wala kɛya naanɔ. 7 Maŋtsɛyeli lɛ mli onukpai lɛ, kɛ hiɛnyiɛlɔi lɛ, kɛ kpokpaa nɔkwɛlɔi* lɛ, kɛ maŋtsɛ ŋaawolɔi lɛ, kɛ amralofoi lɛ fɛɛ ekpe ni amɛkpɛ mli akɛ amɛkɛ famɔ ko baahã yɛ maŋtsɛ lɛ gbɛ́i mli ni agu nifeemɔ ko, no ji akɛ, kɛyashi gbii 30 lɛ, mɔ fɛɛ mɔ ni sɔleɔ ebiɔ nyɔŋmɔ ko loo gbɔmɔ ko nɔ ko yɛ bo, maŋtsɛ, osɛɛ lɛ, ashɛ lɛ afɔ̃ jatai abu lɛ mli.+ 8 No hewɔ lɛ, maŋtsɛ, okɛ famɔ nɛɛ ahã,+ ni okɛ onine awo shishi koni akanyɛ atsake dɔŋŋ yɛ Mediabii lɛ kɛ Persiabii lɛ amla ni anyɛɛɛ atsake lɛ naa.”+

9 No hewɔ lɛ, Maŋtsɛ Dario kɛ enine wo famɔ lɛ kɛ mla ni akɛmiigu nifeemɔ ko lɛ shishi.

10 Shi be ni Daniel ná ele akɛ, akɛ nine ewo famɔ lɛ shishi nɔŋŋ lɛ, etee eshĩa lɛ, eshĩa lɛ ŋwɛi asa lɛ samfɛji lɛ hiɛ kwɛɔ Yerusalem kɛ́ agbele.+ Ni daa gbi lɛ, ekulaa enakutsei anɔ shii etɛ yɛ e-Nyɔŋmɔ lɛ hiɛ ni esɔleɔ ni ekɛ yijiemɔ hãa lɛ, tamɔ bɔ ni efeɔ daa dani sane nɛɛ ba lɛ. 11 Nakai be lɛ mli lɛ, hii nɛɛ fee ekome kɛbote mli ni amɛbati Daniel nɔ ni ekula shi yɛ e-Nyɔŋmɔ lɛ hiɛ eebi lɛ nii, ni eekpa lɛ fai kɛhã mɔbɔnalɛ.

12 No hewɔ lɛ, amɛtee maŋtsɛ lɛ ŋɔɔ ni amɛyakai lɛ mla ni ewo kɛgu nifeemɔ ko lɛ akɛ: “Ani okɛ onine woko mla ko shishi kɛguko nifeemɔ ko akɛ, kɛyashi gbii 30 lɛ, mɔ fɛɛ mɔ ni sɔleɔ ebiɔ nyɔŋmɔ ko loo gbɔmɔ ko nɔ ko yɛ bo, maŋtsɛ, osɛɛ lɛ, ashɛ lɛ afɔ̃ jatai abu lɛ mli lo?” Maŋtsɛ lɛ hã hetoo akɛ: “Awo nakai mla yɛ Mediabii lɛ kɛ Persiabii lɛ amla ni anyɛɛɛ atsake lɛ naa.”+ 13 Amɛkɛɛ maŋtsɛ lɛ oya nɔŋŋ akɛ: “Maŋtsɛ, Daniel, mɔ ni jɛ mɛi ni aŋɔ amɛ nom kɛjɛ Yuda lɛ ateŋ lɛ,+ ebuuu bo ehãaa nɔ ko nɔ ko, ni ebuuu mla ni okɛ onine ewo shishi kɛgu nifeemɔ nɛɛ, shi moŋ lɛ, esɔleɔ shii etɛ daa gbi.”+ 14 Be ni maŋtsɛ lɛ nu enɛ nɔŋŋ lɛ, ehao waa diɛŋtsɛ, ni ebɔ mɔdɛŋ akɛ ebaatao gbɛ ko ni ebaatsɔ nɔ ejie Daniel; ni efee nɔ fɛɛ nɔ ni ebaanyɛ aahu kɛyashi hulushinyɔɔ mli koni ehere lɛ. 15 Kɛkɛ ni hii nɛɛ fee ekome kɛba maŋtsɛ lɛ ŋɔɔ ni amɛbakɛɛ maŋtsɛ lɛ akɛ: “Maŋtsɛ, kadimɔ akɛ, Mediabii lɛ kɛ Persiabii lɛ amla ji akɛ, kɛ́ maŋtsɛ wo mla kɛgu nɔ ko loo ekɛ famɔ ko hã lɛ, anyɛɛɛ atsake dɔŋŋ.”+

16 No hewɔ lɛ, maŋtsɛ lɛ fã, ni akɛ Daniel ba, ni ashɛ lɛ afɔ̃ jatai abu lɛ mli.+ Maŋtsɛ lɛ kɛɛ Daniel akɛ: “O-Nyɔŋmɔ lɛ ni osɔmɔɔ lɛ be fɛɛ be lɛ baajie bo.” 17 Kɛkɛ ni akɛ tɛ ko ba ni akɛbatsĩ bu lɛ naa, ni maŋtsɛ lɛ kɛ eniianaasɔomɔ ga lɛ kɛ ebladei lɛ aniianaasɔomɔ ga lɛ sɔo naa koni akanyɛ atsake nɔ ko yɛ Daniel sane lɛ mli.

18 Kɛkɛ ni maŋtsɛ lɛ tee emaŋtsɛ shĩa lɛ. Eyeee nii jenamɔ muu lɛ fɛɛ, ni ekpɛlɛɛɛ ni ajieɔ ehiɛtserɛ,* ni enyɛɛɛ ewɔ hu.* 19 Be ni hulu lɛ te shi nɔŋŋ lɛ, maŋtsɛ lɛ te shi ni ejo foi kɛtee jatai abu lɛ naa. 20 Be ni ebɛŋkɛɔ bu lɛ naa lɛ, ebo etsɛ Daniel kɛ gbee mɔbɔmɔbɔ. Maŋtsɛ lɛ bi Daniel akɛ: “Ao Daniel, Nyɔŋmɔ hiɛkãalɔ lɛ tsulɔ, ani o-Nyɔŋmɔ lɛ ni osɔmɔɔ lɛ be fɛɛ be lɛ enyɛ ejie bo kɛje jatai lɛ adɛŋ lo?” 21 Daniel kɛɛ maŋtsɛ lɛ amrɔ nɔŋŋ akɛ: “Maŋtsɛ, oyi aná wala kɛya naanɔ. 22 Mi-Nyɔŋmɔ lɛ tsu ebɔfo ni ebaŋamɔ jatai lɛ anaabui,+ ni amɛyeko mi awui ko,+ ejaakɛ yɛ ehiɛ lɛ, anaaa efɔŋ ko yɛ mihe; ni bo maŋtsɛ hu, mifeko bo efɔŋ ko.”

23 Maŋtsɛ lɛ ná miishɛɛ waa diɛŋtsɛ, ni efã akɛ ajie Daniel kɛje bu lɛ mli. Be ni ajie Daniel kɛje bu lɛ mli lɛ, ana akɛ ayeko lɛ awui ko kwraa, ejaakɛ ekɛ ehiɛ fɔ̃ e-Nyɔŋmɔ lɛ nɔ.+

24 Kɛkɛ ni maŋtsɛ lɛ fã, ni akɛ hii ni kɛ sane lɛ fɔ̃ enɔ lɛ* ba, ni ashɛrɛ amɛ kɛ amɛbihii kɛ amɛŋamɛi ashwie jatai abu lɛ mli. Amɛshɛɛɛ bu lɛ shishi po ni jatai lɛ mɔmɔ amɛ ni amɛjwara amɛwui fɛɛ.+

25 Kɛkɛ ni Dario ŋma wolo eyahã majimaji lɛ, kɛ jeŋmaji lɛ, kɛ wiemɔ kui lɛ fɛɛ ni yɔɔ shikpɔŋ lɛ nɔ fɛɛ lɛ akɛ:+ “Toiŋjɔlɛ babaoo ahã nyɛ! 26 Mikɛ famɔ miihã akɛ yɛ mimaŋtsɛyeli lɛ mli kpokpai lɛ fɛɛ anɔ lɛ, mɛi ahe akpokpo kɛ gbeyeishemɔ yɛ Daniel Nyɔŋmɔ lɛ hiɛ.+ Ejaakɛ lɛ ji Nyɔŋmɔ hiɛkãalɔ lɛ, ni eyɛ kɛmiiya naanɔ. Akpãtãŋ emaŋtsɛyeli lɛ hiɛ kɔkɔɔkɔ, ni enɔyeli lɛ hiɔ shi kɛyaa naanɔ.+ 27 Ejieɔ mɔ,+ ni ehereɔ mɔ yiwala, ni efeɔ okadii kɛ naakpɛɛ nii yɛ ŋwɛi kɛ shikpɔŋ lɛ nɔ,+ ejaakɛ ejie Daniel kɛje jatai lɛ adɛŋ.”

28 No hewɔ lɛ, nɛkɛ Daniel nɛɛ shwere yɛ Dario+ maŋtsɛyeli lɛ, kɛ Persianyo Koresh maŋtsɛyeli+ lɛ mli.