Hegbɛi Ni Yeɔ Nɔ Lɛ Agbɛnaa Nii
“Nyɔŋmɔ sɔɔlɔ ji lɛ yɛ ohewɔ, koni ahi ahao. Shi kɛji ofee nɔ ni ji efɔŋ lɛ, she gbeyei!”—ROMABII 13:4.
1, 2. Mɛɛ gbɛ nɔ mɛi pii ni yɔɔ Kristendom lɛ kɛ amɛhe ewo maŋ hiɛ atuatsemɔ nifeemɔi amli yɛ?
AFII enyɔ ni eho nɛ lɛ, kpee ni osɔfoi akuu ko fee yɛ London lɛ ha akɛ mlifu ŋma adafitswaa sane titri ko yɛ New York Post lɛ mli. Henaabuamɔ lɛ ji Lambeth kpee lɛ, ni Anglican sɔlemɔ lɛ mli osɔfoi fe 500 ba. Nɔ ni kɛ mlifu lɛ ba ji yiŋkpɛɛ ko ni kpee lɛ kpɛlɛ nɔ ni amɛkɛmiitsɔɔ akɛ amɛnuɔ mɛi “ni, yɛ be mli ni amɛkɛ gbɛi krokomɛi fɛɛ ni yɔɔ lɛ etsu nii sɛɛ lɛ, amɛhalaa akɛ amɛkɛ tui aaawuu akɛ gbɛ kometoo pɛ ni amɛaatsɔ nɔ amɛna jalɛsaneyeli” lɛ ashishi lɛ.
2 Post lɛ kɛɛ akɛ, nɔ ni enɛ tsɔɔ kɛkɛ ji akɛ, amɛmiikpɛlɛ mɛi ahegbeyeiwoo nɔ. Shi kɛlɛ, osɔfoi lɛ nyiɛ nifeemɔ gbɛ ni yaa nɔ yɛ he fɛɛ he lɛ sɛɛ kɛkɛ. Subaŋ ni amɛjie lɛ kpo lɛ bɛ sɔrɔto yɛ nɔ ni Katolek osɔfo ko ni yɔɔ Ghana, ni jie teemɔŋ tawuu yi akɛ no ji gbɛ ni yɔɔ oya kɛ nɔ ni nɔmimaa yɔɔ he, ni yɔɔ shweshweeshwe hu kɛha Afrika kpɔmɔ lɛ jie lɛ kpo lɛ he; aloo tamɔ Afrikanyo Methodist osɔfo ni wo shi akɛ ebaahiɛ “ta ni awuɔ kɛhaa kpɔmɔ lɛ mli aahu kɛyashi naagbee ni jooɔ” lɛ; aloo tamɔ maŋsɛɛ sanekpakpa shiɛlɔi pii ni yɔɔ Asia kɛ Amerika Wuoyigbɛ ni kɛ maŋ hiɛ atuatselɔi ni teɔ shi woɔ nɔyelii ni ato lɛ wuuɔ lɛ hu.
Anɔkwa Kristofoi ‘Ekuuu Hegbɛ Lɛ Naa’
3, 4. (a) Mɛɛ shishitoo mlai mɛi ni tsɛɔ amɛhe Kristofoi ni amɛwoɔ maŋ hiɛ atuatsemɔ he hewalɛ lɛ kuɔ mli? (b) Mɛni ji nɔ ni mɔ aŋkro ko kpa shi ena yɛ Yehowa Odasefoi ahe?
3 Yɛ klɛŋklɛŋ afii oha lɛ mli lɛ, Yesu wie esɛɛnyiɛlɔi lɛ ahe akɛ: “Amɛjɛɛɛ je lɛ mli, taakɛ bɔ ni mi hu mijɛɛɛ je lɛ mli lɛ.” (Yohane 17:14) Mɔ fɛɛ mɔ ni tsɛɔ ehe Kristofonyo ni woɔ maŋ hiɛ atuatsemɔ he hewalɛ lɛ ji je Iɛ fa jogbaŋŋ diɛŋtsɛ. Ejeee Yesu sɛɛnyiɛlɔ; ni nakai nɔŋŋ hu ejeee mɔ ni ‘baa ehe shi ehaa hegbɛi ni yeɔ nɔ lɛ.’ (Romabii 13:1) Ebaahi jogbaŋŋ kɛha lɛ akɛ eeebo kɔkɔbɔɔ ni bɔfo Paulo kɛha akɛ “mɔ fɛɛ mɔ ni kuɔ hegbɛ lɛ naa lɛ, Nyɔŋmɔ gbɛjianɔtoo lɛ eteɔ shi ewoɔ; ni mɛi ni teɔ shi nakai lɛ aaana amɛ kojomɔ” lɛ toi.—Romabii 13:2.
4 Yehowa Odasefoi yɛ sɔrɔto kwraa yɛ mɛi babaoo ni yɔɔ Kristendom lɛ ahe ejaakɛ amɛkɛ tu kɛ awuiyeli bɛ nɔ ko feemɔ. Nuu ko ni yɔɔ Europa lɛ kpa enɛ shi. Eŋma akɛ: “Beni mina nɔ ni ejɛ jamɔ kɛ maŋkramɔ mli eba lɛ, mijɔɔ mihe nɔ kwraa akɛ mabutu maŋ shihilɛ gbɛjianɔtoo ni yɔɔ lɛ. Miyafata awuiyelɔi akuu ko he ni amɛtsɔse mi yɛ bɔ ni atswaa tui sɔrɔtoi fɛɛ mli; mikɛ mihe wo mli ni wɔkɛ tui tswa mɛi pii ojo. Miwala baje oshara mli yɛ be fɛɛ mli. Beni be shwieɔ mli lɛ, ebafee faŋŋ akɛ wɔnine miinyɛ shi yɛ ta ni wɔwuuɔ lɛ mli. Mibafee mɔ ko ni nijiaŋ eje wui, ni yiŋtoo ni bɛ mishihilɛ mli lɛ baye minɔ kwraa. Kɛkɛ ni Odasefonyo ko batswa wɔshinaa lɛ. Yoo nɛɛ kɛ mi wie Nyɔŋmɔ Maŋtsɛyeli lɛ he. Akɛni miiti nɔ doo akɛ eefite mibe hewɔ lɛ, mikɛɛ lɛ akɛ eha miŋa abo lɛ toi. Efee nakai, ni amɛje shia Biblia mli nikasemɔ shishi. Yɛ naagbee lɛ, mikpɛlɛ nɔ akɛ mafata he yɛ nikasemɔ lɛ mli. Wiemɔi nyɛŋ atsɔɔ hejɔlɛ ni minu he yɛ be mli ni minu hewalɛ ni tsirɛɔ adesai ni haa amɛfeɔ efɔŋ lɛ shishi jogbaŋŋ lɛ. Maŋtsɛyeli lɛ he shiwoo ni yɔɔ naakpɛɛ lɛ eha mi hiɛnɔkamɔ ni wajeɔ mi kɛ yiŋtoo hu yɛ shihilɛ mli.”
5. Mɛni hewɔ ni Kristofoi yaa nɔ amɛbaa amɛhe shi amɛhaa hegbɛi ni yeɔ nɔ lɛ yɛ toiŋjɔlɛ mli lɛ, ni enɛ baakã he nakai kɛyashi mɛɛ beyinɔ?
5 Kristofoi ji Nyɔŋmɔ kɛ Kristo bɔfoi loo najiaŋdamɔlɔi (Yesaia 61:1, 2; 2 Korintobii 5:20; Efesobii 6:19, 20) Enɛ hewɔ lɛ, amɛhiɔ shi ni amɛkɛ amɛhe wooo je nɛŋ béi amli. Eyɛ mli akɛ maŋkwramɔŋ gbɛjianɔtoi lɛ ekomɛi tamɔ nɔ ni eye omanye yɛ shika gbɛfaŋ fe ekrokomɛi, ni amɛteŋ ekomɛi ŋmɛɔ heyeli gbɛ babaoo fe ekrokomɛi moŋ, shi Kristofoi fii eko sɛɛ ni amɛbuuu gbɛjianɔtoi nɛɛ eko akɛ amɛnɔ kwɔlɔ fe ekroko mɛi. Amɛle akɛ gbɛjianɔtoi nɛɛ eko fɛɛ eko yeee emuu. Eji “Nyɔŋmɔ gbɛjianɔtoo” akɛ amɛya nɔ amɛhi shi kɛyashi be mli ni e-Maŋtsɛyeli lɛ aaahe hegbɛ lɛ. (Daniel 2:44) No hewɔ lɛ, Kristofoi yaa nɔ amɛkɛ toiŋjɔlɛ baa amɛhe shi amɛhaa hegbɛi ni yeɔ nɔ lɛ yɛ be mli ni amɛyaa nɔ amɛtsuɔ mɛi krokomɛi anaanɔ hilɛ hu he nii kɛtsɔ Maŋtsɛyeli lɛ he sanekpakpa lɛ shiɛmɔ nɔ lɛ.—Mateo 24:14; 1 Petro 3:11, 12.
Mla lɛ Nɔ Yeli
6. Mɛni hewɔ ni adesai amlai pii hi eyɛ mli akɛ “jeŋ muu lɛ fɛɛ ka mɔ fɔŋ lɛ mli” lɛ?
6 Maji anɔyelii lɛ kɛ mlai ahe gbɛjianɔtoo mamɔɔ shi, ni mlai nɛɛ ateŋ pii ji mlai kpakpai. Ani esa akɛ enɛ afee wɔ naakpɛɛ, akɛni eji anɔkwale akɛ “jeŋ muu lɛ fɛɛ ka mɔ fɔŋ lɛ mli” lɛ hewɔ? (1 Yohane 5:19) Dabi. Yehowa ha wɔ klɛŋklɛŋ tsɛ, Adam, henilee, ni nɛkɛ fɔmɔ mli henumɔ ni akɛleɔ ekpakpa kɛ efɔŋ nɛɛ jeɔ kpo yɛ gbɛi sɔrɔtoi anɔ yɛ mlai ni adesai woɔ lɛ amli. (Romabii 2:13-16) Blema Babilonnyo, mlawolɔ Hammurabi kpa mlai ni eto naa eŋmala lɛ ahiɛ kɛ wiemɔi ni nyiɛ sɛɛ nɛɛ: “Nakai beaŋ lɛ, [amɛ]hala mi koni miha gbɔmɛi lɛ ashihilɛ aya hiɛ, mi, Hammurabi, lumɔ bi ni ejɔɔ ehe nɔ eha Nyɔŋmɔ jamɔ, ni sheɔ Nyɔŋmɔ gbeyei hu lɛ, koni miha jalɛsaneyeli agbɛ ashwa shikpɔŋ lɛ fɛɛ nɔ, koni mikpata efɔŋfeelɔi kɛ efɔŋ lɛ hu hiɛ, koni mɛi ni he wa lɛ akanyɛ mɛi ni egbɔjɔ lɛ anɔ.”
7. Kɛji mɔ ko ku mla lɛ mli lɛ, namɔ yɔɔ hegbɛ akɛ egbalaa etoi, ni mɛni hewɔ?
7 Nɔyelii pii baakɛɛ akɛ yiŋtoo ni yɔɔ amɛmlai lɛ asɛɛ lɛ tamɔ nakai nɔŋŋ: koni amɛha maŋbii lɛ ashihilɛ aya hiɛ ni gbɛjianɔtoo kpakpa hu ahi mli. No hewɔ lɛ, amɛgbalaa mɛi ni feɔ nii ni teɔ shi woɔ adesai ashihilɛ gbɛi, tamɔ gbɔmɔgbee kɛ juu nɛkɛ lɛ atoi, ni amɛwoɔ mlai koni akɛkudɔ nibii tamɔ tsɔne foiwoo kɛ hei ni akɛ tsɔnei mamɔɔ nɛkɛ. Mɔ fɛɛ mɔ ni kuɔ amɛmlai nɛɛ amli lɛ ete shi ewo amɛhegbɛ lɛ, ni nɛkɛ mɛi nɛɛ “aaana kojomɔ.” Namɔ dɛŋ kojomɔ? Jeee doo akɛ kɛjɛ Nyɔŋmɔ ŋɔɔ. Hela wiemɔ ni atsɔɔ shishi yɛ biɛ akɛ kojomɔ lɛ baanyɛ akɔ gbɛjianɔtoi ni akɛtsuɔ maŋbii ahe nii ahe fe bɔ ni eeenyɛ ekɔ kojomɔi ni jɛɔ Yehowa ŋɔɔ lɛ ahe. (Okɛto 1 Korintobii 6:7 he.) Kɛ mɔ ko fee nɔ ko ni kuɔ mla mli lɛ, hegbɛ ni yeɔ nɔ lɛ yɛ hegbɛ ni egbalaa etoi.
8. Mɛni ji su ni asafo lɛ baakɔ kɛji akɛ emlinyo ko yafee efɔŋ ko ni hiɛdɔɔ yɔɔ mli lɛ?
8 Yehowa Odasefoi yɛ gbɛi kpakpa yɛ shi ni amɛteee amɛwooo adesai ni yeɔ nɔ lɛ hewɔ. Kɛji ebalɛ akɛ mɔ ko ni yɔɔ asafo lɛ mli ku mla lɛ mli lɛ, asafoŋ lɛ yeŋ ebuaŋ lɛ ni ejo toigbalamɔ ni akɛaaha lɛ yɛ mla naa lɛ naa foi. Kɛ mɔ ko ju, egbe gbɔmɔ, eŋma nɔ ko ekɛgbe mɔ ko he guɔ, eyeee anɔkwa yɛ etoowoo mli, eto kaabonaa, eshishiu mɔ ko, ni ekɛ tsofai ni agu tsuɔ nii, aloo eteɔ shi ewoɔ hegbɛi ni yeɔ nɔ yɛ mla naa lɛ yɛ gbɛ kroko nɔ lɛ, no lɛ ebaana toigbalamɔ ni mli wa kɛjɛ asafo lɛ dɛŋ—ni kɛ maŋ nɔyeli lɛ miigbala etoi lɛ, esaaa ni enuɔ he akɛ aawa lɛ yi.—1 Korintobii 5:12, 13; 1 Petro 2:13-17, 20.
Nii ni Sa Gbeyeishemɔ
9. Kɛji mlakwalɔi miiwo Kristofoi ahe gbeyei lɛ, nɛgbɛ amɛbaanyɛ amɛtsɔ amɛhe kɛya kɛha yelikɛbuamɔ yɛ gbɛ ni sa nɔ?
9 Paulo tee nɔ yɛ nɔ ni ewie yɛ hegbɛi ni yeɔ nɔ lɛ ahe lɛ mli ni ekɛɛ: “Ejaakɛ lumɛi lɛ, jeee nitsumɔi kpakpai ahe gbeyei amɛwoɔ, shi nitsumɔi fɔji moŋ. Shi kɛji osumɔɔɔ hegbɛ lɛ gbeyeishemɔ lɛ, feemɔ ekpakpa, ni ooona yijiemɔ yɛ edɛŋ.” (Romabii 13:3) Jeee Kristofoi anɔkwafoi lɛ esa akɛ amɛshe toigbalamɔ ni jɛɔ nɔyelɔi lɛ aŋɔɔ lɛ gbeyei, shi moŋ efɔŋfeelɔi, mɛi ni feɔ ‘nibii fɔji,’ awuiyeli nifeemɔ lɛ. Kɛji nɛkɛ mlakwalɔi nɛɛ miiwo Yehowa Odasefoi ahe gbeyei lɛ, amɛbaanyɛ amɛkpɛlɛ polisifoi loo asraafoi ahebuu ni jɛ nɔyelɔi lɛ aŋɔɔ lɛ nɔ yɛ gbɛ kpakpa nɔ.—Bɔfoi lɛ Asaji 23:12-22.
10. Mɛɛ gbɛ nɔ Yehowa Odasefoi ‘ena yijiemɔ’ kɛjɛ nɔyelɔi adɛŋ yɛ?
10 Paulo kɛɔ Kristofonyo ni yeɔ hegbɛi ni yeɔ nɔ lɛ amla nɔ lɛ akɛ: “Ooona yijiemɔ yɛ edɛŋ.” Akɛ enɛ he nɔkwɛmɔ nɔ lɛ, susumɔ woji ni Yehowa Odasefoi lɛ anine shɛ nɔ yɛ Brazil yɛ be mli ni amɛfee amɛkpokpai wuji anɔ kpeei lɛ amɛgbe naa lɛ he okwɛ. Ejɛ maŋ lɛ ajinafoi ni kwɛɔ shwɛmɔ hei anɔ lɛ anɔ onukpa lɛ ŋɔɔ: “Nɔ ni sa yijiemɔ ni da fe fɛɛ ji nɔ ni jɛ nyɛ toiŋjɔlɛ jeŋba lɛ mli ba lɛ. Ehaa mɔ naa miishɛɛ yɛ ŋmɛnɛŋmɛnɛ jeŋ ni ehao nɛɛ mli akɛ aaale akɛ mɛi pii heɔ Nyɔŋmɔ nɔ amɛyeɔ ni amɛjaa lɛ hu.” Enɛ hu jɛ maŋtiase lɛ shwɛmɔ he nɔkwɛlɔ lɛ dɛŋ: “Yɛ mɛi babaoo ni ba kpeei lɛ ashishi lɛ fɛɛ sɛɛ lɛ, afeee nɔ ko ni baawo nifeemɔ lɛ he muji, shidaa aha gbɛjianɔtoo ni tɔmɔ bɛ he lɛ.” Enɛ hu jɛ maŋtiase nɔkwɛlɔ lɛ nitsumɔ he lɛ: “Wɔmiisumɔ ni wɔŋɔ hegbɛ nɛɛ ni wɔkɛjie nyɛyi yɛ bɔ ni nyɛto nɔ fɛɛ nɔ he gbɛjianɔ kpakpa, kɛ jeŋba kpakpa ni mɔ fɛɛ mɔ jie kpo yɛ naakpɛɛ gbɛ nɔ lɛ hu hewɔ, ni wɔmiibi ni nyɛye omanye yɛ nibii krokomɛi fɛɛ ni nyɛaafee yɛ wɔsɛɛ lɛ hu mli.”
11. Mɛni hewɔ ni anyɛŋ akɛɛ yɛ gbɛ ko gbɛ ko nɔ akɛ sanekpakpa lɛ shiɛmɔ ji nitsumɔ fɔŋ lɛ?
11 Wiemɔ “nitsumɔi kpakpai” lɛ kɔɔ nifeemɔi ni tsɔɔ toiboo ni afeɔ ahaa hegbɛi ni yeɔ nɔ lɛ amlai lɛ ahe. Kɛfata enɛ he lɛ, wɔshiɛmɔ nitsumɔ lɛ, ni ji famɔ ni jɛ Nyɔŋmɔ ŋɔɔ, shi jeee gbɔmɔ ŋɔɔ lɛ jeee nitsumɔ fɔŋ—oti ko ni esa akɛ maŋkwramɔŋ nɔyelɔi lɛ ayoo lɛ. Eji maŋ sɔɔmɔ ni haa mɛi ni kpɛlɛɔ nɔ lɛ ajeŋba nɔ kwɔɔ. No hewɔ lɛ, wɔhiɛ ka nɔ akɛ hegbɛi ni yeɔ nɔ lɛ baabu hegbɛ ni wɔyɔɔ akɛ wɔɔshiɛ wɔtsɔɔ mɛi krokomɛi lɛ he. Paulo kɛ esane lɛ ha hegbɛi ni yeɔ nɔ lɛ ni amɛye amɛha lɛ bɔni afee ni eto sanekpakpa lɛ shiɛmɔ shishi yɛ mla naa. (Bɔfoi lɛ Asaji 16:35-40; 25:8-12; Filipibii 1:7) Nyɛsɛɛ nɛɛ, Yehowa Odasefoi etao mla naa nɔkpɛlɛmɔ ni tamɔ nakai nɔŋŋ kɛha amɛnitsumɔ lɛ, ni amɛnine eshɛ enɛ nɔ yɛ maji tamɔ East Germany, Hungary, Poland, Romania, Benin, kɛ Myanmar (Burma) amli.
“Nyɔŋmɔ Sɔɔlɔ ji Lɛ”
12-14. Mɛɛ gbɛ nɔ hegbɛi ni yeɔ nɔ lɛ etsu nii akɛ Nyɔŋmɔ sɔɔlɔi (a) yɛ Biblia bei amli? (b) yɛ ŋmɛnɛŋmɛnɛ beaŋ?
12 Yɛ be mli ni Paulo yaa nɔ ewieɔ hegbɛi ni yeɔ nɔ lɛ ahe lolo lɛ, etee nɔ ni ekɛɛ: “Ejaakɛ Nyɔŋmɔ sɔɔlɔ ji lɛ yɛ ohewɔ, koni ahi ahao. Shi kɛji ofee nɔ ni ji efɔŋ lɛ, she gbeyei! ejaakɛ jeee yaka ehiɛ tsi lɛ; shi eji Nyɔŋmɔ sɔɔlɔ ni kɛ mlifu tɔɔ owele yɛ mɔ ni tsuɔ nifɔjianii lɛ nɔ.”—Romabii 13:4.
13 Maji anɔ nɔyelii lɛ etsu nii yɛ bei komɛi amli akɛ Nyɔŋmɔ sɔɔlɔi yɛ gbɛi pɔtɛɛ komɛi anɔ. Koresh fee nakai beni efa Yudafoi lɛ ni amɛku amɛsɛɛ kɛjɛ Babilon ni amɛyasaa amɛtswa Nyɔŋmɔ shia lɛ amɛma shi ekoŋŋ lɛ. (Ezra 1:1-4; Yesaia 44:28) Artashasta tsu nii akɛ Nyɔŋmɔ sɔɔlɔ yɛ be mli ni ekɛ tooyeli tsu Ezra koni akɛma nakai shia lɛ ni agbɛnɛ yɛ sɛɛ mli hu lɛ ekɛ nitsumɔ wo Nehemia dɛŋ ni etswa Yerusalem he gbogboi lɛ. (Ezra 7:11-26; 8:25-30; Nehemia 2:1-8) Roma hegbɛ ni ye nɔ lɛ hu tsu nii yɛ nɛkɛ gbɛ nɔ beni ejie Paulo kɛjɛ gbɔmɛi asafo babaoo ni feɔ basabasa lɛ dɛŋ yɛ Yerusalem, ni amɛbu ehe beni ekɛ lɛlɛ yasha shi, ni amɛto gbɛjianɔ hu amɛha lɛ koni ena lɛ diɛŋtsɛ eshia yɛ Roma lɛ.—Bɔfoi lɛ Asaji 21:31, 32; 28:7-10, 30, 31.
14 Yɛ nakai gbɛ nɔ nɔŋŋ hu lɛ, hegbɛi ni yeɔ nɔ lɛ esɔmɔ akɛ Nyɔŋmɔ sɔɔlɔi yɛ ŋmɛnɛŋmɛnɛ beaŋ. Akɛ nɔkwɛmɔ nɔ lɛ, yɛ 1959 mli lɛ, Kojomɔ He Wulu Fe Fɛɛ ni yɔɔ Canada lɛ kojo akɛ Yehowa Odasefonyo ko ni yɔɔ Quebec ni afolɔ enaa akɛ ekala maŋjwaa woji ni ekala nibii hu ni ekɛmiigbe mɛi ahe guɔ lɛ yeee fɔ—ni atsɔ nɛkɛ gbɛ nɔ aku jwɛŋmɔ fɔŋ ni nakai beaŋ Quebec maŋsɔɔlɔ nukpa, Maurice Duplessis hiɛ ni efee shɛii yɛ he hu lɛ naa.
15. Nɔyelɔi lɛ tsuɔ nii yɛ daa gbi shihilɛi amli akɛ Nyɔŋmɔ sɔɔlɔi yɛ mɛɛ gbɛ nɔ, ni mɛɛ hegbɛ enɛ kɛhaa amɛ?
15 Kɛfata he hu lɛ, yɛ daa gbi shihilɛi amli lɛ, majianɔ nɔyelii lɛ sɔmɔɔ akɛ Nyɔŋmɔ sɔɔlɔi kɛtsɔɔ gbɛjianɔtoo kpakpa ni amɛkwɛɔ ni ehi adesai ashihilɛ mli kɛyashi be mli ni Nyɔŋmɔ Maŋtsɛyeli lɛ aaaŋɔ nakai gbɛnaa nii lɛ nɔ. Taakɛ Paulo tsɔɔ mli lɛ, yɛ enɛ hewɔ lɛ, hegbɛ lɛ “hiɛ tsi,” ni tsɔɔ hegbɛ ni eyɔɔ ni ekɛgbalaa mɛi atoi lɛ. Yɛ bei babaoo mli lɛ, nɔ ni fata he hu ji tsuŋwoo aloo shika toigbalamɔ. Yɛ maji komɛi anɔ lɛ, gbele toigbalamɔ hu fata he.a Yɛ gbɛ kroko nɔ lɛ, maji pii ehala akɛ amɛkɛ gbele toigbalamɔ lɛ tsuŋ nii, ni no hu ji amɛhegbɛ.
16. (a) Akɛni nɔyeli hegbɛ lɛ ji Nyɔŋmɔ sɔɔlɔ hewɔ lɛ, mɛni Nyɔŋmɔ tsuji lɛ ateŋ mɛi komɛi esusu he akɛ eja gbɛ akɛ amɛaafee? (b) Mɛɛ nitsumɔ Kristofonyo lɛ ekpɛlɛŋ nɔ, ni mɛni hewɔ ni efeŋ nakai lɛ?
16 Anɔkwale ni eji akɛ hegbɛi ni yeɔ nɔ lɛ ji Nyɔŋmɔ sɔɔlɔi lɛ tsɔɔ nɔ hewɔ ni Daniel, Hebribii etɛ lɛ, Nehemia, kɛ Mordekai nyɛ amɛkpɛlɛ nitsumɔ mli hegbɛi wuji anɔ yɛ Babilonbii lɛ kɛ Pershiabii anɔyelii lɛ amli lɛ. No hewɔ lɛ amɛnyɛɔ amɛkɛ amɛsane haa Maŋ lɛ nɔyeli hegbɛ lɛ koni aye aha amɛ koni ahi aha Nyɔŋmɔ webii lɛ. (Nehemia 1:11; Ester 10:3; Daniel 2:48, 49; 6:1, 2) Ŋmɛnɛ, Kristofoi komɛi hu tsuɔ nii yɛ nɔyeli lɛ sɔɔmɔ mli. Shi akɛni amɛtsi amɛhe kɛjɛ je lɛ he hewɔ lɛ, amɛyafataaa maŋkwramɔŋ kui ahe, ni amɛtaooo maŋkwramɔŋ hegbɛi, ni amɛkpɛlɛɛɛ gbɛhei ni haa afeɔ yiŋkpɛɛ yɛ maŋkramɔŋ gbɛjianɔtoi amli lɛ hu nɔ.
Nɔ Hewɔ ni Ehe Hiaa ni Ana Hemɔkɛyeli
17. Mɛɛ shihilɛi komɛi baanyɛ aha mɛi ni jeee Kristofoi lɛ amli afu ni amɛte shi amɛwo nɔyeli hegbɛ lɛ?
17 Shi kɛlɛ, mɛni kɛji nɔyeli hegbɛ lɛ ŋmɛɔ juu kɛ fɔ̃ kɛ yiwalɛ po gbɛ lɛ? Ani esa akɛ Kristofoi abɔ mɔdɛŋ ni amɛkɛ nɔyeli kroko ni amɛsusuɔ akɛ no hi lɛ ato najiaŋ? Ojogbaŋŋ, jalɛsane ni nɔyelii yeee kɛ juu kɛ fɔ̃ lɛ jeee nɔ hee. Yɛ klɛŋklɛŋ afii oha lɛ mli lɛ, Roma Nɔyeli ŋmɛ jalɛsane ni ayeee tamɔ mɛi ni ayeɔ amɛ nyɔŋ nɛkɛ lɛ gbɛ. Eŋmɛ maŋ nɔkwɛlɔi ni kɛ amɛhe woɔ juu kɛ fɔ̃ mli lɛ po gbɛ. Biblia lɛ wieɔ toohelɔi ni shishiu mɛi, kojolɔ shishitswalɔ ko, kɛ kpokpaa nɔ amralo ko ni miitao ni aha lɛ nyɔɔŋ nii lɛ ahe.—Luka 3:12, 13; 18:2-5; Bɔfoi lɛ Asaji 24:26, 27.
18, 19. (a) Kɛji ebalɛ akɛ nifeemɔi fɔji kɛ juu kɛ fɔ̃ miiya nɔ yɛ maŋ sɔɔlɔi agbɛfaŋ lɛ, mɛɛ gbɛ nɔ Kristofoi feɔ amɛnii yɛ enɛɛmɛi ahe yɛ? (b) Mɛɛ gbɛ nɔ Kristofoi eha aŋkroaŋkroi ashihilɛ etee hiɛ yɛ, taakɛ yinɔsaneŋmalɔ ko kɛ agbɛnɛ akrabatsa ni yɔɔ shishigbɛ lɛ tsɔɔ lɛ?
18 Kulɛ Kristofoi lɛ baanyɛ amɛbɔ mɔdɛŋ ni amɛkɛ nɛkɛ nifeemɔi fɔji ni ba yɛ nakai beaŋ lɛ aba naagbee, shi amɛfeee nakai. Akɛ nɔkwɛmɔ nɔ lɛ, Paulo eshiɛɛɛ yɛ nyɔŋyeli ni aaaba naagbee lɛ he, ni ekɛɛɛ Kristofoi ni yɔɔ nyɔji lɛ ni amɛŋmɛɛ amɛnyɔji lɛ ahe ni amɛye amɛhe. Shi moŋ, ewo nyɔji kɛ mɛi ni yɔɔ nyɔji lɛ ŋaa ni amɛjie Kristofoi ahenumɔ kpo yɛ be mli ni amɛkɛ amɛhe yeɔ lɛ. (1 Korintobii 7:20-24; Efesobii 6:1-9; Filemon 10-16; kwɛmɔ 1 Petro 2:18 hu.) Ni yɛ nakai gbɛ nɔ nɔŋŋ hu lɛ, Kristofoi kɛ amɛhe wooo nifeemɔi ni akɛtseɔ maŋ hiɛ atua lɛ mli. Amɛbɛ deka kwraa yɛ “hejɔlɛ sanekpakpa” lɛ shiɛmɔ mli. (Bɔfoi lɛ Asaji 10:36) Yɛ afi 66 Ŋ.B. mli lɛ, Roma asraafoi bawo Yerusalem he ka ni amɛgbala amɛhe shi yɛ sɛɛ mli. Ni amɛkɛ atuatselɔi ni fãa maŋ lɛ he lɛ aaahi shi moŋ lɛ, Hebri Kristofoi lɛ ‘jo foi kɛtee gɔji lɛ anɔ’ yɛ gbɛtsɔɔmɔ ni Yesu kɛha lɛ toiboo mli.—Luka 21:20, 21.
19 Mra be mli Kristofoi lɛ kɛ nibii ni yɔɔ lɛ hi shi bɔ ni amɛyɔɔ lɛ, ni amɛbɔ mɔdɛŋ akɛ amɛaaha aŋkroaŋkroi ashihilɛ aya hiɛ kɛtsɔ yelikɛbuamɔ ni amɛkɛha amɛ koni amɛnyiɛ Biblia mli shishitoo mlai asɛɛ lɛ nɔ. Yinɔsaneŋmalɔ John Lord ŋma yɛ ewolo ni ji The Old Roman World lɛ mli akɛ: “Ana Kristojamɔ mli anɔkwa kunimyelii lɛ yɛ gbɔmɛi kpakpai ni mɛi ni kpɛlɛɔ etsɔɔmɔi lɛ anɔ lɛ batsɔmɔ lɛ mli, moŋ fe ni amɛaatsake gbɛjianɔtoi ni ehe shi lɛ, aloo nɔyeli lɛ, aloo mlai lɛ yɛ kponɔ gbɛ.” Ani esa akɛ Kristofoi ni yɔɔ ŋmɛnɛ lɛ afee amɛnii yɛ gbɛ ni yɔɔ sɔrɔto nɔ?
Beni Maŋ lɛ Yeŋ Ebuaŋ
20, 21. (a) Mɛɛ gbɛ nɔ nɔyeli hegbɛ ko tsuuu egbɛnaa nii ni ka enɔ akɛ Nyɔŋmɔ sɔɔlɔ kɛha ekpakpa lɛ he nii yɛ? (b) Kɛ aawa Yehowa Odasefoi ayi yɛ Maŋ lɛ nɔkpɛlɛmɔ naa lɛ, te amɛfeɔ amɛnii yɛ he amɛhaa tɛŋŋ?
20 Yɛ September 1972 mli lɛ, akɛ yiwaa ni naa wa waa ba Yehowa Odasefoi ni yɔɔ Afrika teŋ gbɛ maŋ ko mli lɛ anɔ. Aju amɛteŋ mɛi akpei abɔ nibii ni afee amɛ niseniianii krokomɛi, tamɔ yii, piŋmɔ, kɛ gbɔmɔgbee tete po. Ani hegbɛ ni yeɔ nɔ lɛ tsu gbɛnaa nii ni ka enɔ akɛ efa Odasefoi lɛ ahe lɛ he nii? Dabi! Shi moŋ, ewo awuiyeli lɛ he hewalɛ, ni enyɛ nɛkɛ Kristofoi ni he jɔ nɛɛ anɔ koni amɛjo foi kɛya maji ni bɛŋkɛ lɛ amli kɛba amɛ shweshweeshwe feemɔ.
21 Ani esaaa ni Yehowa Odasefoi kɛ mlifu teɔ shi woɔ yiwalɔi ni tamɔ nɛkɛ? Dabi. Esa akɛ Kristofoi kɛ tsuishitoo adamɔ nɛkɛ nifeemɔi ni etsɔɔɔ bulɛ kɛha adesa nɛɛ naa, ni amɛkɛ heshibaa afee amɛnii amɛkɛkase Yesu: “Mɔ ni, . . . beni enaa amanehulu lɛ, elomɔɔɔ mɔ ko, shi moŋ etuu esane ewo mɔ ni kojoɔ jalɛ naa lɛ dɛŋ” lɛ. (1 Petro 2:23) Amɛkaiɔ akɛ beni amɔ Yesu yɛ Getsemane abɔɔ lɛ mli lɛ, ekã ekaselɔi lɛ ateŋ mɔ kome ni ba ehe famɔ kɛ klante lɛ hiɛ, ni sɛɛ mli lɛ ekɛɛ Pontio Pilato akɛ: “Mimaŋtsɛyeli lɛ jɛɛɛ je nɛŋ; mimaŋtsɛyeli lɛ jɛ je nɛɛ mli jikulɛ, misɔɔlɔi lɛ aaapele he, koni akaŋɔ mi aha Yudafoi lɛ; shi enɛ lɛ mimaŋtsɛyeli lɛ jɛɛɛ biɛ.”—Yohane 18:36; Mateo 26:52; Luka 22:50, 51.
22. Mɛɛ nɔkwɛmɔ nɔ kpakpa Odasefoi ni yɔɔ Afrika lɛ ateŋ mɛi komɛi fee amɛfɔ shi yɛ be mli ni amɛnaa yiwaa ni mli wa mli amanehulu lɛ?
22 Akɛni Yesu nɔkwɛmɔ nɔ lɛ yɛ amɛjwɛŋmɔ mli hewɔ lɛ, nakai Odasefoi Afrikabii lɛ na ekaa ni amɛkɛnyiɛ Paulo ŋaawoo lɛ sɛɛ: “Nyɛkaŋɔa efɔŋ nyɛtoa mɔ ko mɔ ko efɔŋ najiaŋ; nyɛjwɛŋa nɔ ni yɔɔ fɛo nɔ nyɛtoa yɛ gbɔmɛi fɛɛ ahiɛ. Kɛ aaaho lɛ, nyɛgbɛfaŋ lɛ, nyɛkɛ gbɔmɛi fɛɛ ahia shi yɛ hejɔlɛ mli. Suɔlɔi, nyɛkatɔa nyɛ diɛŋtsɛ nyɛhe owele, shi moŋ nyɛŋmɛa mlifu lɛ gbɛ; ejaakɛ aŋma akɛ: ‘Minɔ ji oweletɔɔ, mi mato najiaŋ, Nuŋtsɔ lɛ [Yehowa] kɛɛ.’” (Romabii 12:17-19; okɛto Hebribii 10:32-34 he.) Mɛɛ nɔkwɛmɔ nɔ ni kanyaa mɔ wɔnyɛmimɛi Afrikabii lɛ ji kɛha wɔ fɛɛ ŋmɛnɛ nɛkɛ! Kɛji akɛ nɔyeli lɛ kpoo akɛ eeefee he nɔ ko yɛ gbɛ ni sa woo nɔ po lɛ, anɔkwa Kristofoi ekuuu amɛhiɛ amɛshwieee Biblia mli shishitoo mlai anɔ.
23. Mɛɛ sanebimɔi yɔɔ lolo ni abaasusu he?
23 Shi kɛlɛ, mɛni ji nɔ ni hegbɛi ni yeɔ nɔ lɛ baanyɛ akpa gbɛ kɛjɛ Kristofoi adɛŋ? Ni ani husui yɛ nibii ni amɛaanyɛ amɛbi yɛ gbɛ ni ja nɔ lɛ ahe? Abaasusu enɛɛmɛi ahe yɛ sane ni tsa nɔ lɛ mli.
[Shishigbɛ niŋmai]
a Gbele toigbalamɔ ni akɛhaa yɛ efɔji ni mli wa lɛ ahe fata Mla ni ajɛ ŋwɛi akɛha Israel lɛ he.—2 Mose 31:14; 3 Mose 18:29; 20:2-6; 4 Mose 35:30.
Ani Obaanyɛ Otsɔɔ Mli?
◻ Mɛni ji gbɛi komɛi ni mɔ aŋkro Iɛ aaanyɛ atsɔ nɔ ‘akɔ shidaamɔ ni teɔ shi woɔ’ hegbɛi ni yeɔ nɔ Iɛ?
◻ Mɛni ji “Nyɔŋmɔ gbɛjianɔtoo Iɛ” yɛ nɔ ni kɔɔ maŋ nɔyeli hegbɛi ahe Iɛ gbɛfaŋ?
◻ Mɛɛ gbɛ nɔ hegbɛi Iɛ ji ‘nii ni sa gbeyeishemɔ’ yɛ?
◻ Mɛɛ gbɛ nɔ adesai anɔyelii sɔmɔɔ yɛ akɛ “Nyɔŋmɔ sɔɔlɔ”?
[Akrabatsa ni yɔɔ baafa 21]
Wolo ko ni jɛ Polisifonyo Onukpa ko Dɛŋ
AŊMA wolo ko kɛ kadimɔ nii ni ji ‘Maŋ Sɔɔmɔ Kɛha Minas Gerais Maŋ Lɛ’ kɛba Buu Mɔɔ Asafo lɛ nitsumɔ he nine ni yɔɔ Brazil lɛ. Ejɛ polisifonyo nukpa ni yɔɔ Conquista maŋ lɛ mli lɛ ŋɔɔ. Ani nɔ ko etɔtɔ? Ha wolo lɛ diɛŋtsɛ atsɔɔ mli. Ejajeɔ akɛ:
“Suɔmɔ Mɛi:
“Eŋɔɔ minaa waa akɛ matsɔ wolo nɛɛ nɔ matsɔɔ nyɛ mɔ ni miji. Mitsu nii akɛ polisi onukpa yɛ Conquista maŋ lɛ mli, yɛ Minas Gerais, aaafee afii etɛ sɔŋŋ nɛ. Kɛ mitee nitsumɔ lɛ, mibɔɔ mɔdɛŋ ni matsu nii waa be fɛɛ be, shi mifɔɔ naagba namɔ yɛ toiŋjɔlɛ ni aaahi tsuŋwoo he lɛ gbɛfaŋ. Eyɛ mli akɛ atsɔɔ mɛi ni awo amɛ tsuŋ lɛ nitsumɔi komɛi koni amɛtsu moŋ, shi amɛfeɔ basabasa.
“Nyɔji fioo ko ni eho nɛ lɛ, Senhor O—ba wɔmaŋ lɛ mli ni etsɔɔ akɛ eji Yehowa Odasefoi lɛ ateŋ mɔ kome. Kɛkɛ ni eje shishi ni ebɔi Biblia lɛ shiɛmɔ kɛ mɛi ni awo amɛ tsuŋ lɛ hamɔ, ni etsɔɔ amɛ nikanemɔ kɛ niŋmaa kɛ shishijee nibii komɛi ni he hiaa yɛ he falefalefeemɔ mli kɛ ninenaa nitsumɔi komɛi hu, ni agbɛnɛ ekɛ amɛ wie Biblia loo Ŋmalɛ Krɔŋkrɔŋ lɛ he. Bɔ ni nɛkɛ shiɛlɔ nɛɛ tsu nii eha lɛ tsɔɔ mɔ ko ni ejɔɔ ehe nɔ kwraa, ni yɔɔ suɔmɔ kɛ he-afɔleshaa mumɔ hu. Etsɛɛɛ kɛkɛ ni mɛi ni awo amɛ tsuŋ lɛ ajeŋba tsake kɛbafee ekpakpa, ni eha mɛi fɛɛ ni na lɛ anaa kpɛ amɛhe ni amɛhiɛ sɔ enɛ hu.
“Yɛ nɔ ni ba yɛ wɔtsuŋwoo he nɛɛ hewɔ lɛ, miisumɔ ni matsɔ hegbɛ ni miyɔɔ lɛ nɔ matswa Buu Mɔɔ Biblia kɛ Woji Tɛtrɛbii Asafo lɛ adafi yɛ bɔ ni wɔhiɛ esɔ nitsumɔ kpakpa ni nɛkɛ Shiɛlɔi ni sa yijiemɔ nɛɛ batsu yɛ wɔ maŋ lɛ mli lɛ hewɔ.”
Bɔfo Paulo wie yɛ maŋ nɔyeli hegbɛi lɛ ahe akɛ: “Feemɔ ekpakpa, ni ooona yijiemɔ yɛ edɛŋ.” (Romabii 13:3) Eka shi faŋŋ akɛ enɛ bafee anɔkwale yɛ sane ni yɔɔ yiteŋgbɛ nɛɛ mli. Mɛɛ odaseyeli ni tsɔɔ hewalɛ ni Nyɔŋmɔ Wiemɔ lɛ yɔɔ ni ekɛtsakeɔ mɛi enɛ ji nɛkɛ, akɛ sanekpakpa lɛ nyɛ ekɛ nyɔji fioo ko pɛ tsu nitsumɔ ni toigbalamɔ he gbɛjianɔtoo lɛ nyɛɛɛ ekɛ afii babaoo atsu lɛ!—Lala 19:7-9.