Tertio—Paulo Woloŋmalɔ Anɔkwafo
TERTIO kɛ kaa ko kpe. No mli lɛ bɔfo Paulo miisumɔ ni ekɛ lɛ atsu nii akɛ ewoloŋmalɔ beni eŋmaa wolo kakadaŋŋ eyaha enanemɛi Kristofoi ni yɔɔ Roma lɛ. Enɛ baafee nitsumɔ ni wa.
Mɛni hewɔ ewa waa akɛ mɔ ko aaatsu nii akɛ woloŋmalɔ yɛ klɛŋklɛŋ afii 100 Ŋ.B. lɛ mli lɛ? Te atsuɔ nɛkɛ nitsumɔ nɛɛ ahaa tɛŋŋ? Mɛɛ niŋmaa nibii akɛtsuɔ nii yɛ nakai be lɛ mli?
Blema Beaŋ Woloŋmalɔi
Woloŋmalɔi sɔrɔtoi yɛ blema Helabii kɛ Romabii ashihilɛ mli. Hii komɛi tsu nii akɛ maŋ lɛ woloŋmalɔi—maŋ lɛ nitsulɔi ni tsu nii yɛ maŋtsɛ lɛ nitsumɔhei bibii lɛ. Maŋ woloŋmalɔi ni sɔmɔɔ maŋbii yɛ jarayelihei hu yɛ. Niiatsɛmɛi kɛ woloŋmalɔi (bei pii lɛ nyɔji) ni amɛ diɛŋtsɛ amɛyɔɔ lɛ tsuɔ nii. Agbɛnɛ hu, nanemɛi ni miisumɔ ni yɔɔ he miishɛɛ akɛ amɛaaŋmala mɛi krokomɛi awoji amɛha amɛ lɛ hu yɛ. Taakɛ nilelɔ E. Randolph Richards tsɔɔ lɛ, nɛkɛ woloŋmalɔi ni tsuɔ amɛ diɛŋtsɛ amɛnii lɛ ahesaai lɛ “baanyɛ ajɛ mɔ ni he esa fioo yɛ wiemɔ lɛ mli loo/kɛyashi gbɛ ni atsɔɔ nɔ akɛ hesaa ni fe fɛɛ ni haa akɛ oyaiyeli ŋmalaa nii, ni haa wolo lɛ mli niŋmaa lɛ feɔ nɔ ni ja jogbaŋŋ ni hi, ni ŋɔɔ lɛ nɔ.”
Namɛi kɛ woloŋmalɔi tsuɔ nii yɛ nakai be mli? Klɛŋklɛŋ kwraa lɛ, mɛi ni no mli lɛ amɛleee nikanemɔ kɛ niŋmaa. Akɛ niŋmaa bibii ni tsɔɔ akɛ woloŋmalɔ lɛ eye odase akɛ, lɛ eŋma wolo lɛ yɛ nyɛ ni mɔ ni kɛ nitsumɔ lɛ wo edɛŋ lɛ nyɛɛɛ aŋma hewɔ lɛ ŋmalaa kpaŋmɔ ni mɛi kɛ mɛi feɔ, kɛ nitsumɔ mli woji babaoo lɛ, fataa he kɛgbeɔ naa. Blema wolo ko ni aŋma kɛjɛ Thebes yɛ Mizraim lɛ feɔ yiŋtoo ni ji enyɔ hewɔ ni abɔɔ woloŋmalɔ apaa lɛ he mfoniri. Wolo ko ni aŋma aha Asklepiades ko lɛ kɛɛ yɛ enaamuu lɛ mli akɛ: “Eumelus, Herma binuu lɛ ŋma eha lɛ . . . ejaakɛ eŋmaa nii blɛoo fioo.”
Ni kɛlɛ, etamɔ nɔ ni le ni aaale nikanemɔ kɛ niŋmaa lɛ jeee nɔ ni adamɔɔ nɔ akɛ woloŋmalɔ tsuɔ nii. Taakɛ Biblia sane mlitsɔɔlɔ John L. McKenzie tsɔɔ lɛ, “ekolɛ jeee niŋmaa ni ejeee shi faŋŋ lɛ po hesusumɔ hewɔ, shi moŋ susumɔ ni anáa yɛ niŋmaa ni yɔɔ fɛo lɛ he lɛ hewɔ, loo kɛ hoo lɛ bɔni afee ni aŋma lɛ jogbaŋŋ” lɛ hewɔ ni mɛi taoɔ ni woloŋmalɔi atsu nii aha amɛ lɛ. Niŋmaa bafee tɔlɛ nitsumɔ kɛha mɛi ni le woloŋ lɛ po, titri lɛ, yɛ he ni ekɔɔ wiemɔi kakadaji babaoo he lɛ. Woloŋlelɔ J. A. Eschlimann kɛɛ akɛ mɔ fɛɛ mɔ ni baanyɛ afee nakai lɛ “kɛ miishɛɛ kpoɔ nitsumɔ nɛɛ, ni ekɛwoɔ nyɔji ni tsuɔ nii akɛ woloŋmalɔi lɛ adɛŋ.” Agbɛnɛ hu, ewaaa akɛ aaanu nɔ hewɔ ni mɛi sumɔɔɔ ni amɛŋmalaa amɛ diɛŋtsɛ amɛ woji lɛ ashishi kɛ́ aasusu nibii ni akɛtsuɔ nii lɛ kɛ bɔ ni nitsumɔ lɛ ji ha lɛ he lɛ.
Nibii ni akɛfɔɔ niŋmaa yɛ bei pii amli yɛ klɛŋklɛŋ afii 100 Ŋ.B. lɛ mli ji papyrus. Anáa kpãai fɛtɛfɛtɛi kɛjɛɔ tso nɛɛ mli kɛtsɔ tsei lɛ amli teŋgbɛ kpãa ni afolɔɔ lɛ kakadaji lɛ nɔ. Atoɔ kpãai komekomei akuu lɛ ashwieɔ shi. Akɛ kpãai akuu kroko beleɔ shi bɔ ni no saa klɛŋklɛŋ nɔ̃ lɛ yiteŋgbɛ lɛ he. Anyɛmɔɔ enyɔ lɛ fɛɛ nɔ waa akɛtsáa, ni efeɔ “wolo” fɛtɛfɛtɛ ko.
Ebɛ mlɛo akɛ aaaŋma nii yɛ nɛkɛ nii nɛɛ nɔ. Enɔ yɛ basabasa kɛ kpãaikpãai. Taakɛ nilelɔ Angelo Penna tsɔɔ lɛ, “papyrus kpãai ni efee tamɔ kotsakotsa lɛ haa inki lɛ kpáa nɔ, titri lɛ yɛ gbɛi bibii ni kamɔ kpãai fɛtɛfɛtɛi lɛ ateŋ lɛ amli.” Ekolɛ woloŋmalɔ lɛ baatsu nii be mli ni eta shikpɔŋ ni ekɛ enane kome ela ekome ni ekɛ nine kome hiɛ wolo fɛtɛfɛtɛ lɛ yɛ tso ni nɔ lɛɛ nɔ lɛ. Kɛ ehe esako loo nibii ni ekɛtsuɔ nii lɛ ehiii jogbaŋŋ lɛ, etsɛrɛ ni ekɛŋmaa nii, loo pɛn ni akɛ jwɛi efee lɛ baanyɛ aka papyrus lɛ mli, wolo lɛ baanyɛ atse, loo niŋmaa lɛ ejeŋ shi faŋŋ.
Lashinyanyera kɛ tso mli nu ni tamɔ amã akɛfeɔ inki lɛ. Ahɔ̃ɔ beni eshɔ̃ keketee, ni esa akɛ akɛ nu afutu yɛ inki bu mli dani abaanyɛ akɛŋma nii. Ekolɛ nɔ ni fata nibii krokomɛi ni woloŋmalɔ tamɔ Tertio baahiɛ lɛ ahe ji kakla ni ekɛbaajɔ pɛn ni akɛ jwɛi efee lɛ naa kɛ kotsa ni efɔ ni ekɛbaagbe niŋmaa mli tɔmɔi ni efeɔ lɛ. Esa akɛ akɛ henɔkwɛmɔ jogbaŋŋ aŋma niŋmaa okadi fɛɛ niŋmaa okadi. No hewɔ lɛ niŋmaa tee nɔ blɛoo kɛ tɔlɛ.
‘Mi Tertio, Miibi Nyɛ’
Nɔ ni fata ŋamɔi lɛ ahe yɛ wolo ni aŋma kɛyaha Romabii lɛ naagbee gbɛ lɛ ji Paulo woloŋmalɔ lɛ nɔ̃ lɛ, mɔ ni ŋma akɛ: “Mi Tertio hu ni miŋma nɛkɛ wolo nɛɛ, miibi nyɛ yɛ Nuntsɔ lɛ mli.” (Romabii 16:22) Enɛ ji be kome pɛ yɛ Paulo niŋmaai lɛ amli ni atsĩ ewoloŋmalɔi lɛ ateŋ mɔ kome tã yɛ faŋŋ mli.
Nɔ ko fioo pɛ wɔle yɛ Tertio he. Ekolɛ wɔbaamu sane naa yɛ ŋamɔ ni ekɛha akɛ “yɛ Nuntsɔ lɛ mli” lɛ mli akɛ eji Kristofonyo anɔkwafo yɛ nakai be lɛ mli. Ekolɛ eji asafo ni yɔɔ Korinto lɛ mlinyo ni ekolɛ ele Kristofoi pii yɛ Roma. Biblia nilelɔ Giuseppe Barbaglio susuɔ akɛ no mli lɛ Tertio ji nyɔŋ loo mɔ ni eye ehe kɛjɛ nyɔŋyeli mli. Mɛni hewɔ? Klɛŋklɛŋ lɛ, ejaakɛ “bei pii lɛ woloŋmalɔi yɔɔ kuu nɛɛ mli; agbɛnɛ, Latin gbɛi ni ehiɛ lɛ . . . ehe shi waa yɛ nyɔji kɛ mɛi ni eye amɛhe kɛjɛ nyɔŋyeli mli lɛ ateŋ.” Barbaglio kɛɛ: “No hewɔ lɛ ejeee niŋmalɔ nitsulɔ ‘ni etse ehe,’ shi moŋ eji naanyo nitsulɔ ni ye ebua Paulo yɛ nɛkɛ gbɛ nɔ koni ekɛbua nibii ni eŋmalaa ni sɛɛ kɛlɛ fe fɛɛ ni eto he gbɛjianɔ lɛ anaa: sɔɔmɔ ni he yɔɔ sɛɛnamɔ waa, ni eha Paulo ná be babaoo koni ekatɔ lɛ.”
Eka shi faŋŋ akɛ Tertio nitsumɔ nɛɛ he yɛ sɛɛnamɔ waa. Baruk tsu nitsumɔ ni tamɔ nakai eha Yeremia, taakɛ Silvano tsu kɛha Petro lɛ. (Yeremia 36:4; 1 Petro 5:12) Mɛɛ hegbɛ po nanemɛi nitsulɔi nɛɛ ná nɛkɛ!
Wolo ni Aŋmaa Ayaha Romabii Lɛ
Aŋma wolo lɛ ayaha Romabii lɛ beni Paulo eyato Gaio gbɔ lɛ, ekolɛ yɛ Korinto. No baafee 56 Ŋ.B., yɛ bɔfo lɛ maŋsɛɛ sanekpakpa shiɛmɔ gbɛfãa ni ji etɛ lɛ mli. (Romabii 16:23) Eyɛ mli akɛ wɔle faŋŋ akɛ Paulo kɛ Tertio tsu nii akɛ ewoloŋmalɔ ni ekɛŋma wolo nɛɛ moŋ, shi wɔleee bɔ ni ekɛ lɛ tsu nii pɔtɛɛ eha. Yɛ gbɛ ni etsɔ nɔ etsu nii lɛ fɛɛ sɛɛ lɛ, nitsumɔ lɛ tsumɔ ebafeŋ nɔ ni yɔɔ mlɛo. Shi wɔbaanyɛ wɔna nɔmimaa yɛ enɛ he: Taakɛ Biblia lɛ fã ni eshwɛ lɛ ji lɛ, wolo ni Paulo ŋma kɛyaha Romabii lɛ “jɛ Nyɔŋmɔ Mumɔ lɛŋ.”—2 Timoteo 3:16, 17.
Beni aŋma wolo nɛɛ agbe naa lɛ, no mli lɛ Tertio kɛ Paulo eŋmala wiemɔi akpei abɔ, ni ekɛ papyrus woji babaoo etsu nii. Beni akɛ nibii fɛtɛfɛtɛi nɛɛ etsara eko fɛɛ eko naabugbɛ lɛ, woji nɛɛ bafee wolo kakadaŋŋ ni anyɛɔ akotaa, ekolɛ aaafee mitai 3 kɛyashi 4 kɛlɛ. Akota wolo lɛ jogbaŋŋ ni asɔo naa. No sɛɛ lɛ etamɔ nɔ ni Paulo kɛwo Foibe, nyɛmi yoo ko ni yɔɔ Kenkrea, ni baafã gbɛ kɛya Roma lɛ dɛŋ.—Romabii 16:1, 2.
Kɛjɛ klɛŋklɛŋ afii 100 lɛ mli kɛbaa nɛɛ, gbɛi ni akɛtsuɔ nii ni akɛŋmalaa woji etsake waa diɛŋtsɛ. Shi, Nyɔŋmɔ ebaa wolo ni aŋma ayaha Roma Kristofoi lɛ yi yɛ afii ohai abɔ lɛ fɛɛ mli. Kwɛ bɔ ni wɔdaa shi yɛ Yehowa Wiemɔ lɛ fã nɛɛ ni atsɔ Paulo woloŋmalɔ anɔkwafo Tertio, ni tsuɔ nii waa lɛ yelikɛbuamɔ nɔ aŋma lɛ hewɔ!