Gbɔmɛi Ni Ayeɔ Abuaa Amɛ Koni Amɛtsi Amɛbɛŋkɛ Yehowa
“Mɔ ko baaa tsɛ lɛ ŋɔɔ, akɛ ja etsɔ minɔ.”—YOHANE 14:6.
1. Mɛɛ fãmɔ Yesu ni átee lɛ shi lɛ kɛha ekaselɔi lɛ, ni mɛni ejɛ mli eba yɛ toiboo ni Yehowa Odasefoi fee kɛha enɛ lɛ hewɔ?
YESU KRISTO fã esɛɛnyiɛlɔi lɛ akɛ: “Nyɛyaa ni nyɛyafea jeŋmaji fɛɛ mikaselɔi, nyɛbaptisia amɛ nyɛwoa Tsɛ lɛ kɛ Bi lɛ kɛ Mumɔ krɔŋkrɔŋ lɛ gbɛi amli.” (Mateo 28:19) Yehowa Odasefoi eye ebua gbɔmɛi fe akpekpei etɛ yɛ afii nyɔŋma ni eho lɛ mli koni amɛba Nyɔŋmɔ ŋɔɔ, ni yɛ be ni sa mli lɛ amɛbaptisiɔ amɛ koni amɛkɛfee amɛhe nɔ ni ámɛjɔɔ amɛha lɛ akɛ amɛbaafee esuɔmɔnaa nii lɛ he okadi. Kwɛ miishɛɛ ni wɔná akɛ wɔɔye wɔbua amɛ ni amɛtsi amɛbɛŋkɛ Nyɔŋmɔ!—Yakobo 4:8.
2. Eyɛ mli akɛ aabaptisi mɛi heei pii moŋ, shi mɛni eba?
2 Shi kɛlɛ, yɛ shikpɔji komɛi ni ábaptisi kaselɔi heei pii yɛ mli lɛ anɔ lɛ, anáaa nɔyaa yɛ Maŋtsɛyeli shiɛlɔi ayifalɛ ni kɛ enɛ yeɔ egbɔ. Abaanyɛ ajie mɛi ni gboi lɛ kɛjɛ mli moŋ, ni enɛ feɔ aaafee oha mlijaa 1 daa afi. Ni kɛlɛ, mɛi saŋŋ eshi anɔkwale lɛ yɛ afii fioo nɛɛ amli yɛ yiŋtoo ko hewɔ. Mɛni hewɔ? Nikasemɔ nɛɛ kɛ nɔ ni baanyiɛ sɛɛ lɛ baapɛi bɔ ni agbalaa mɛi kɛbaa Yehowa ŋɔɔ lɛ kɛ yiŋtoi komɛi ahewɔ ni mɛi komɛi shiɔ anɔkwale lɛ mli.
Yiŋtoo Hewɔ ni Wɔshiɛɔ
3. (a) Mɛɛ gbɛ nɔ nitsumɔ ni akɛwo Yesu kaselɔi lɛ adɛŋ lɛ kɛ ŋwɛibɔfo ni atsĩ etã yɛ Kpojiemɔ 14:6 lɛ nɔ̃ lɛ kpãa gbee yɛ? (b) Mɛni efee gbɛ ni mɔɔ shi jogbaŋŋ ni atsɔɔ nɔ ateeɔ gbɔmɛi amiishɛɛ shi yɛ Maŋtsɛyeli shɛɛ sane lɛ he, shi mɛɛ naagba yɔɔ?
3 Nitsumɔ kã Yesu kaselɔi lɛ anɔ akɛ amɛgbɛ “anɔkwa nilee” ni kɔɔ “maŋtsɛyeli lɛ he sanekpakpa” lɛ he lɛ amɛshwã yɛ “naagbee be” nɛɛ mli. (Daniel 12:4; Mateo 24:14) Amɛnitsumɔ lɛ kɛ ŋwɛibɔfo lɛ ni “ehiɛ naanɔ sanekpakpa ni eyaajaje etsɔɔ mɛi ni yɔɔ shikpɔŋ lɛ nɔ kɛ jeŋmaŋ fɛɛ jeŋmaŋ kɛ akutso fɛɛ akutso kɛ majianɔ wiemɔi fɛɛ kɛ maŋ fɛɛ maŋ” lɛ ba yɛ be kome mli. (Kpojiemɔ 14:6) Yɛ jeŋ nɛɛ ni je lɛŋ saji ehe edekã fɛɛ nɛɛ mli lɛ, gbɛ ni mɔɔ shi fe fɛɛ ni atsɔɔ nɔ ahaa mɛi náa Nyɔŋmɔ Maŋtsɛyeli lɛ he miishɛɛ koni aye abua amɛ ni amɛtsi amɛbɛŋkɛ Yehowa ji ni agba amɛ naanɔ wala yɛ paradeiso shikpɔŋ nɔ he hiɛnɔkamɔ lɛ. Yɛ be mli ni shishinumɔ yɔɔ enɛ mli lɛ, mɛi ni kɛ Nyɔŋmɔ webii bɔɔ, titri lɛ koni amɛbote Paradeiso kɛkɛ pɛ mli lɛ anaji mamɔko shi shiŋŋ yɛ gbɛ ni yɔɔ fintɔŋŋ ni kɛ mɔ yaa wala mli lɛ nɔ.—Mateo 7:13, 14.
4. Yɛ nɔ ni Yesu kɛ ŋwɛibɔfo ni filikiɔ yɛ ŋwɛi teŋ lɛ tsɔɔ lɛ hewɔ lɛ, mɛni ji wɔshiɛmɔ nitsumɔ lɛ yiŋtoo?
4 Yesu wie akɛ: “Enɛ ji naanɔ wala lɛ, akɛ amɛaaná bo, anɔkwa Nyɔŋmɔ kome pɛ lɛ, kɛ Yesu Kristo, mɔ ni otsu lɛ lɛ he nilee.” (Yohane 17:3, NW) Ŋwɛibɔfo ni miifiliki yɛ ŋwɛi teŋ lɛ jajeɔ “naanɔ sanekpakpa” ni ekɛɔ mɛi ni yɔɔ shikpɔŋ lɛ nɔ lɛ akɛ: “Nyɛshea Nyɔŋmɔ gbeyei ni nyɛkɛ anunyam ahaa lɛ, ejaakɛ ekojomɔ ŋmɛlɛtswaa lɛ eshɛ; ni nyɛjaa mɔ ni fee ŋwɛi kɛ shikpɔŋ kɛ ŋshɔ kɛ nubui ni baa lɛ.” (Kpojiemɔ 14:7) No hewɔ lɛ, yiŋtoo titri ni yɔɔ sanekpakpa lɛ ni wɔshiɛɔ lɛ sɛɛ ji ni wɔye wɔbua gbɔmɛi ni amɛtsi amɛbɛŋkɛ Yehowa kɛtsɔ Kristo Yesu nɔ.
Wɔ Gbɛfaŋnɔ yɛ Yehowa Nitsumɔ lɛ Mli
5. Mɛɛ Paulo kɛ Yesu wiemɔi tsɔɔ akɛ wɔmiitsu Yehowa nitsumɔ, shi jeee wɔ nɔ̃?
5 Beni eŋmaa wolo eyaha nanemɛi Kristofoi ni afɔ amɛ mu lɛ, bɔfo Paulo wie “kpatamɔ sɔɔmɔ” lɛ he, ni ekɛɛ akɛ Nyɔŋmɔ damɔɔ Yesu Kristo kpɔmɔ afɔleshaa lɛ nɔ ekpataa ekɛ gbɔmɛi ateŋ. Paulo kɛɛ akɛ ‘etamɔ nɔ ni Nyɔŋmɔ miikpa fai kɛmiitsɔ wɔnɔ,’ ákɛ, “wɔdamɔɔ Kristo najiaŋ wɔkpaa nyɛ fai akɛ: nyɛhaa akpataa nyɛ kɛ Nyɔŋmɔ teŋ.” Mɛɛ susumɔ ni haa mɔ tsui nyaa nɛ! Kɛji akɛ wɔji “bɔfoi yɛ Kristo najiaŋ” aloo wɔji tsuji ni yɔɔ shikpɔŋ nɔ hiɛnɔkamɔi hu lɛ, esaaa akɛ wɔhiɛ kpaa nɔ kɔkɔɔkɔ akɛ Yehowa nitsumɔ nɛ, shi jeee wɔ nɔ̃. (2 Korintobii 5:18-20) Nyɔŋmɔ diɛŋtsɛ ji mɔ ni gbalaa gbɔmɛi ni etsɔɔ mɛi ni baa Kristo ŋɔɔ lɛ anii. Yesu kɛɛ akɛ: “Mɔ ko nyɛŋ aba miŋɔɔ, akɛ ja tsɛ lɛ ni tsu mi lɛ gbala lɛ dã, ni mi lɛ matee lɛ shi yɛ naagbee gbi lɛ nɔ. Aŋma yɛ gbalɔi lɛ amli akɛ: ‘Amɛ fɛɛ amɛaafee [Yehowa, NW] kaselɔi.’ Mɔ fɛɛ mɔ ni enu yɛ tsɛ lɛ naa ni ekase hu lɛ, ebaa miŋɔɔ.”—Yohane 6:44, 45.
6. Yehowa eje shishi eehoso jeŋmaji lɛ yɛ mɛɛ gbɛ nɔ, ni yɛ nakai beaŋ nɔŋŋ lɛ namɛi naa yibaamɔhe yɛ ejamɔ “shia” lɛ?
6 Mɛɛ gbɛ nɔ Yehowa tsɔɔ egbalaa gbɔmɛi ni egbeleɔ “hemɔkɛyeli shinaa” ehaa amɛ yɛ naagbee gbii nɛɛ amli lɛ? (Bɔfoi lɛ Asaji 14:27; 2 Timoteo 3:1) Gbɛ titri ji kɛtsɔ e-Dasefoi ni ehaa amɛjajeɔ eyiwalaheremɔ shɛɛ saji lɛ kɛ kojomɔ ni ekɛbaa yiwalɛ nibii agbɛjianɔtoo nɛɛ nɔ amɛtsɔɔ lɛ nɔ. (Yesaia 43:12; 61:1, 2) Nɛkɛ jeŋ muu fɛɛ sanejajemɔ nɛɛ miihoso jeŋmaji lɛ—kojomɔ ni akɛkpataa nii ahiɛ ni etsɛŋ ni ebaaba lɛ he naakpɛɛ okadi. Yɛ nakai beaŋ nɔŋŋ lɛ, aagbala gbɔmɛi ni “jara wa” yɛ Nyɔŋmɔ hiɛ lɛ kɛmiijɛ gbɛjianɔtoo nɛɛ mli ni amɛmiiná yibaamɔhe yɛ enɔkwa jamɔ “shĩa” lɛ mli. No hewɔ lɛ, Yehowa miiha egbalɛ wiemɔi ni Hagai ŋmala eshwie shi lɛ miiba mli, akɛ: “Ni mahoso jeŋmaji fɛɛ kwa, ni jeŋmaji lɛ fɛɛ anii ni jara wa lɛ aaaba, ni mikɛ anunyam sɔŋŋ aaawo shĩa nɛɛ obɔ.”—Hagai 2:6, 7; Kpojiemɔ 7:9, 15.
7. Te Yehowa feɔ tɛŋŋ egbeleɔ gbɔmɛi atsuii amli ni egbalaa aŋkroaŋkroi lɛ kɛbaa lɛ diɛŋtsɛ kɛ e-Bi lɛ masɛi lɛ?
7 Yehowa gbeleɔ mɛi ni sheɔ Nyɔŋmɔ gbeyei nɛɛ—“jeŋmaji lɛ fɛɛ mli nibii ni jara wa fe fɛɛ lɛ” atsuiiaŋ—koni “amɛbo nibii ni” e-Dasefoi lɛ “wieɔ lɛ toi.” (Hagai 2:7, Jewish Publication Society; Bɔfoi lɛ Asaji 16:14) Taakɛ eji yɛ klɛŋklɛŋ afii oha lɛ mli lɛ, Yehowa kɛ ebɔfoi lɛ tsuɔ nii yɛ bei komɛi amli koni amɛkudɔ e-Dasefoi lɛ kɛya gbɔmɛi anɔkwafoi ni bolɔɔ tsɛɔ lɛ kɛha yelikɛbuamɔ lɛ aŋɔɔ. (Bɔfoi lɛ Asaji 8:26-31) Beni aŋkroaŋkroi lɛ kaseɔ gbɛjianɔtoo ni yɔɔ naakpɛɛ ni Nyɔŋmɔ etsɔ e-Bi, Yesu Kristo nɔ efee kɛha amɛ lɛ he nii lɛ, esuɔmɔ lɛ gbalaa amɛ kɛbaa Yehowa masɛi. (1 Yohane 4:9, 10) Hɛɛ, Nyɔŋmɔ gbalaa gbɔmɛi kɛbaa lɛ kɛ e-Bi lɛ masɛi kɛtsɔɔ ‘E-duromɔ’ loo ‘enɔkwa suɔmɔ’ lɛ nɔ.—Yeremia 31:3.
Namɛi Yehowa Gbalaa Amɛ Lɛ?
8. Mɛɛ gbɔmɛi srɔto nɛkɛ Yehowa gbalaa amɛ lɛ?
8 Yehowa gbalaa mɛi ni taoɔ E-sɛɛgbɛ lɛ kɛbaa lɛ diɛŋtsɛ kɛ e-Bi lɛ masɛi. (Bɔfoi lɛ Asaji 17:27) Mɛi ni fata amɛhe ji gbɔmɛi ni “dɔmɔɔ ntsɔi ni amɛyeɔ ŋkɔmɔ yɛ nihii nii fɛɛ ni afeɔ” yɛ Kristendom teŋ lɛ, kɛ agbɛnɛ yɛ anɔkwale mli lɛ, yɛ jeŋ fɛɛ lɛ hewɔ. (Ezekiel 9:4) ‘Amɛhiɛ yɛ amɛmumɔŋ hiamɔ nii anɔ.’ (Mateo 5:3) Yɛ anɔkwale mli lɛ amɛji “shikpɔŋ lɛ nɔ heshibalɔi” ni baahi paradeiso shikpɔŋ lɛ nɔ kɛya naanɔ lɛ.—Zefania 2:3.
9. Te Yehowa aaafee tɛŋŋ ana akɛ gbɔmɛi ‘sumɔɔ naanɔ wala,’ ni mɛɛ gbɛ nɔ etsɔɔ egbalaa mɛnɛɛmɛi?
9 Yehowa baanyɛ ale gbɔmɔ tsui mli saji. Maŋtsɛ David kɛɛ ebinuu Salomo akɛ: “Yehowa taoɔ tsuii fɛɛ amli, ni ele yitseiaŋ jwɛŋmɔi fɛɛ. Kɛji oootao lɛ lɛ, eeeha ona lɛ.” (1 Kronika 28:9) Yehowa baanyɛ adamɔ bɔ ni mɔ aŋkro lɛ tsui kɛ emumɔ yɔɔ, aloo su titri ni ejieɔ lɛ kpo lɛ nɔ ena kɛji akɛ mɔ lɛ baanyɛ akpɛlɛ ŋwɛi gbɛjianɔtoo kɛha eshaifaa kɛ naanɔ wala he hiɛnɔkamɔ yɛ Nyɔŋmɔ jalɛ gbɛjianɔtoo hee lɛ mli lɛ nɔ. (2 Petro 3:13) Yehowa tsɔɔ e-Wiemɔ ni e-Dasefoi lɛ shiɛɔ ni amɛtsɔɔ mɛi lɛ nɔ egbalaa ‘mɛi fɛɛ ni sumɔɔ naanɔ wala lɛ’ kɛbaa lɛ diɛŋtsɛ kɛ e-Bi lɛ masɛi, ni mɛnɛɛmɛi ‘batsɔmɔɔ heyelilɔi.’—Bɔfoi lɛ Asaji 13:48.
10. Mɛni tsɔɔ akɛ mɛi komɛi ni Yehowa gbalaa amɛ shi jeee mɛi krokomɛi lɛ kɔɔɔ yiŋ ni áto áfɔ̃ shi momo he?
10 Ani Yehowa ni gbalaa mɛi komɛi shi jeee mɛi krokomɛi lɛ kɔɔɔ yiŋ ni áto afɔ̃ shi momo he? Dabi kwraa! Gbɔmɛi ni Nyɔŋmɔ gbalaa amɛ lɛ damɔ nibii ni amɛ diɛŋtsɛ amɛsumɔɔ waa akɛ amɛnine aaashɛ nɔ lɛ nɔ. Ekɛ bulɛ haa suɔmɔ mli ni amɛjɛɔ amɛfeɔ nii lɛ. Yehowa kɛ nihalamɔ ni tamɔ nakai nɔŋŋ fɔ̃ɔ shikpɔŋ lɛ nɔ bii ahiɛ ŋmɛnɛ, tamɔ nɔ ni akɛfɔ̃ Israelbii lɛ ahiɛ nɔ ni fe afii 3,000 ni eho nɛ, beni Mose kɛɛ akɛ: “Naa, ŋmɛnɛ gbi nɛɛ mikɛ wala kɛ ekpakpa, gbele kɛ efɔŋ miishwie ohiɛ. . . . Miitsɛ́ ŋwɛi kɛ shikpɔŋ ŋmɛnɛ ni amɛbaye nyɛhe odase akɛ, mikɛ wala kɛ gbele, jɔɔmɔ kɛ loomɔ eshwie nyɛhiɛ; no hewɔ lɛ kɔ wala, koni bo kɛ oseshi fɛɛ ayi aná wala, ni osumɔ Yehowa o-Nyɔŋmɔ lɛ, ni obo egbee toi, ni okɛ ohe akpɛtɛ ehe; ejaakɛ no aaaha oyi aná wala ni otsɛ yɛ jeŋ.”—5 Mose 30:15-20.
11. Te Israelbii lɛ aaafee tɛŋŋ ahala wala?
11 Kadimɔ akɛ, esa ni Israelbii lɛ ahala wala ‘kɛtsɔ Yehowa ni amɛaasumɔ lɛ, kɛtsɔ egbee toi ni amɛaabo, kɛ amɛhe ni amɛkɛaakpɛtɛ ehe’ lɛ nɔ. Beni awie nakai wiemɔi lɛ, no mli lɛ Israelbii lɛ bako Shiwoo Shikpɔŋ lɛ nɔ. Ámɛfee klalo yɛ Moab Ŋa Kpataa lɛ nɔ, amɛmiisaa amɛhe koni amɛfo Yordan Faa lɛ ni amɛbote Kanaan. Yɛ be mli ni eji nɔ ni sa akɛ amɛkɛ amɛsusumɔi maa shikpɔŋ “kpakpa ni da” ni “fufɔ kɛ wo hoɔ yɛ nɔ” ni etsɛŋ ni amɛnine baashɛ nɔ lɛ nɔ lɛ, nibii ni amɛshweɔ nɛɛ ni amɛnine aaashɛ nɔ lɛ damɔ suɔmɔ ni amɛyɔɔ kɛha Yehowa, egbee toi ni amɛaabo, kɛ amɛhe ni amɛkɛaakpɛtɛ ehe lɛ nɔ. (2 Mose 3:8) Mose fee enɛ faŋŋ, akɛ: “Kɛji oooye kitai kɛ akpɔi kɛ mlai ni miwoɔo ŋmɛnɛ gbi nɛɛ, akɛ osumɔ Yehowa, o-Nyɔŋmɔ lɛ, ni onyiɛ egbɛ̀i anɔ lɛ nɔ lɛ, no lɛ oyi aaaná wala ni oyi aaafá, ni Yehowa, o-Nyɔŋmɔ lɛ, aaajɔɔo yɛ shikpɔŋ ni oyaa oyaŋɔ lɛ nɔ.”—5 Mose 30:16; wɔma efã ko nɔ mi.
12. Mɛni esa akɛ Israelbii lɛ anɔkwɛmɔnɔ lɛ atsɔɔ wɔ yɛ wɔshiɛmɔ kɛ nitsɔɔmɔ nitsumɔ lɛ he?
12 Ani esaaa akɛ nɔ ni tsɔ hiɛ nɛɛ tsɔɔ wɔ nɔ ko yɛ wɔshiɛmɔ kɛ nitsɔɔmɔ nitsumɔ lɛ he yɛ naagbee be nɛɛ mli? Wɔjwɛŋɔ Paradeiso shikpɔŋ ni baa lɛ he, ni wɔwieɔ he yɛ wɔsɔɔmɔ nitsumɔ lɛ mli. Shi wɔ, aloo kaselɔi ni wɔfeɔ lɛ anine shɛŋ shiwoo lɛ mlibaa nɔ kɛji akɛ wɔ, aloo amɛ hu miisɔmɔ Nyɔŋmɔ yɛ pɛsɛmkunya yiŋtoi ahewɔ. Taakɛ Israelbii lɛ ji lɛ, esa akɛ wɔ, aloo mɛi ni wɔtsɔɔ amɛ nii lɛ akase bɔ ni ‘amɛaasumɔ Yehowa, amɛbo egbee toi, ni amɛkɛ amɛhe akpɛtɛ ehe.’ Kɛji akɛ wɔkai enɛ yɛ be mli ni wɔtsuɔ wɔsɔɔmɔ lɛ he nii lɛ, no lɛ wɔkɛ Nyɔŋmɔ miifee ekome yɛ gbɔmɛi ni wɔgbalaa amɛ kɛbaa eŋɔɔ lɛ mli.
Nyɔŋmɔ Hefatalɔi Nitsulɔi
13, 14. (a) Taakɛ 1 Korintobii 3:5-9 tsɔɔ lɛ, te wɔfeɔ tɛŋŋ wɔbatsɔmɔɔ Nyɔŋmɔ hefatalɔi nitsulɔi? (b) Namɔ esa ákɛ akɛ shweremɔ ko ni aaaba lɛ he woo aha, ni mɛni hewɔ?
13 Paulo fee ekome ní akɛ Nyɔŋmɔ aaafee lɛ he nɔkwɛmɔnɔ kɛtsɔ ŋmɔ̃feemɔ he wiemɔ nɔ. Eŋma akɛ: “Apolo ji namɔ? Paulo ji namɔ? Amɛji sɔɔlɔi ni nyɛtsɔ amɛnɔ nyɛhe nyɛye, ni mɔ fɛɛ mɔ lɛ bɔ ni Nuntsɔ lɛ eha lɛ. Mi lɛ, mitɛo; Apolo shwie nɔ nu; shi Nyɔŋmɔ ha shwere. Belɛ agbɛnɛ jeee mɔ ni tɛo lɛ ji nɔ ko, ni jeee mɔ ni shwie nɔ nu lɛ hu, shi moŋ mɔ ni ha eshwere, ni ji Nyɔŋmɔ lɛ. Shi mɔ ni tɛoɔ lɛ kɛ mɔ ni shwieɔ nɔ nu lɛ fɛɛ lɛ ekomeŋ; shi mɔ fɛɛ mɔ aaaná lɛ diɛŋtsɛ enyɔmɔwoo, yɛ lɛ diɛŋtsɛ enitsumɔ naa. Ejaakɛ Nyɔŋmɔ hefatalɔi nitsulɔi ji wɔ; Nyɔŋmɔ ŋmɔ̃, Nyɔŋmɔ tsũ ji nyɛ.”—1 Korintobii 3:5-9.
14 Ákɛ Nyɔŋmɔ hefatalɔi nitsulɔi lɛ, esa akɛ wɔkɛ anɔkwayeli atɛo “maŋtsɛyeli lɛ he wiemɔ lɛ” yɛ gbɔmɛi atsuii amli, koni wɔshwie miishɛɛ fɛɛ miishɛɛ ni aaajie lɛ kpo lɛ nɔ nu kɛtsɔ sɛɛsaramɔi kɛ shia Biblia mli nikasemɔi ni ásaa he jogbaŋŋ yɛ mli lɛ anɔ. Kɛji akɛ sũ loo shikpɔŋ lɛ, ni ji tsui lɛ hi loo eji ekpakpa lɛ, Yehowa baafee egbɛfaŋnɔ kɛtsɔ dumɔ wu ni ji Biblia mli anɔkwale lɛ ni eeeha eda ni etsɔ tso ni woɔ yibii lɛ nɔ. (Mateo 13:19, 23) Ebaagbala gbɔmɔ lɛ kɛba lɛ diɛŋtsɛ kɛ e-Bi lɛ ŋɔɔ. Yɛ naagbee mlitsɔɔmɔ lɛ, Maŋtsɛyeli jajelɔi ayifalɛ fɛɛ ni baaba lɛ jɛ nitsumɔ ni Yehowa tsuɔ yɛ gbɔmɛi atsuii ahe, ni ehaa anɔkwale dumɔ wu lɛ daa, kɛ gbɔmɛi ni tamɔ nɛkɛ ni egbalaa amɛ kɛbaa lɛ kɛ e-Bi lɛ ŋɔɔ lɛ nɔ.
Tsũmaa Nitsumɔ ni Baahi Shi
15. Mɛɛ nɔkwɛmɔnɔ Paulo kɛtsu nii koni ekɛtsɔɔ bɔ ni wɔyeɔ wɔbuaa mɛi krokomɛi koni amɛná hemɔkɛyeli?
15 Yɛ be mli ni wɔmli filiɔ wɔ yɛ nɔyaa lɛ he lɛ, yɛ anɔkwale mli lɛ wɔmiisumɔ ni wɔna ni gbɔmɛi miiya nɔ amɛmiijie Yehowa he suɔmɔ kpo, amɛmiibo egbee toi, ni amɛkɛ amɛhe miikpɛtɛ ehe. Edɔɔ wɔ kɛji akɛ wɔna ni mɛi komɛi asuɔmɔ lɛ he ejɔ ni amɛshi anɔkwale lɛ. Ani wɔbaanyɛ wɔfee nɔ ko ni wɔkɛtsĩ enɛ gbɛ? Paulo tsɔɔ bɔ ni wɔɔfee wɔye wɔbua mɛi krokomɛi koni amɛná hemɔkɛyeli yɛ nɔkwɛmɔnɔ kroko mli. Eŋma akɛ: “Mɔ ko nyɛŋ shishi kroko ato fe nɔ ni ato momo ni ji Yesu Kristo lɛ; shi kɛ́ mɔ ko kɛ shika, jwiɛtɛi, tɛi ni jara wa, tsei, jwɛi loo ntoo tsa shishitoo nɛɛ nɔ lɛ: abaana mɔ fɛɛ mɔ nitsumɔ lɛ faŋŋ; ejaakɛ gbi lɛ aaajie lɛ kpo, ejaakɛ la mli eeeje kpo yɛ, ni bɔ fɛɛ bɔ ni mɔ nitsumɔ yɔɔ lɛ, la lɛ nɔŋŋ baaka.”—1 Korintobii 3:11-13.
16. (a) Yiŋtoo ni yɔɔ nɔkwɛmɔnii enyɔ ni Paulo kɛtsu nii lɛ sɛɛ lɛ yɛ srɔto yɛ mɛɛ gbɛ nɔ? (b) Te aaafee tɛŋŋ ni wɔ tsũmaa nitsumɔ lɛ aaafee nɔ ni yeee omanye ni ejeee nɔ ni la nyɛɛɛ ashã?
16 Yɛ Paulo nɔkwɛmɔnɔ ni kɔɔ ŋmɔ̃ he lɛ mli lɛ, shweremɔ damɔ nidumɔ kɛ hekãmɔ, enɔ nushwiemɔ daa, kɛ Nyɔŋmɔ jɔɔmɔ nɔ. Bɔfo lɛ nɔkwɛmɔnɔ kroko lɛ maa Kristofonyo sɔɔlɔ lɛ gbɛnaa nii yɛ nɔ ni jɛɔ etsũmaa nitsumɔ lɛ mli baa lɛ nɔ mi. Ani ekɛ nibii kpakpai ema tsũ lɛ yɛ shishitoo kpakpa nɔ? Paulo bɔ kɔkɔ akɛ: “Ha mɔ fɛɛ mɔ akwɛ bɔ ni etsaa nɔ ehaa lɛ ni ahi.” (1 Korintobii 3:10) Yɛ be mli ni wɔtée mɔ ko miishɛɛ shi kɛtsɔ gba ni wɔgba lɛ naanɔ wala yɛ Paradeiso he hiɛnɔkamɔ lɛ he sane lɛ nɔ lɛ, ani wɔkɛ wɔ nitsɔɔmɔ lɛ maa shishijee Ŋmalɛ mli nilee pɛ nɔ, kɛkɛ lɛ wɔma nɔ ni esa akɛ gbɔmɔ lɛ afee koni ena naanɔ wala lɛ nɔ mi titri? Ani wɔ nitsɔɔmɔ lɛ baanyɛ afee nɔ ni kɔɔ enɛ pɛ he: ‘Kɛji akɛ oosumɔ ni ohi shi kɛya naanɔ yɛ Paradeiso lɛ, esa akɛ okase nii, oya kpeei, ni okɛ ohe awo shiɛmɔ nitsumɔ lɛ mli’? Kɛji nakai ni lɛ, belɛ wɔtswaaa gbɔmɔ lɛ hemɔkɛyeli wɔmaaa shishitoo ni ma shi shiŋŋ nɔ, ni ekolɛ nɔ ni wɔtswaa wɔmaa shi lɛ nyɛŋ adamɔ la ni ji kaai anaa aloo ni eeeŋmɛ etsui shi yɛ be kakadaŋŋ mli. Mɔdɛŋ ni wɔbɔɔ koni wɔgbala gbɔmɛi kɛba Yehowa ŋɔɔ kɛtsɔ wala yɛ Paradeiso he hiɛnɔkamɔ pɛ nɔ, kɛtsɔ afii fioo ni aaaye yɛ esɔɔmɔ mli lɛ nɔ lɛ tamɔ nɔ ni akɛ “tsei, jwɛi loo ntoo” miitsa tsũ lɛ nɔ.
Suɔmɔ Kɛha Nyɔŋmɔ kɛ Kristo ni Atswaa Amaa Shi
17, 18. (a) Mɛni he hiaa ni anyɛŋ ashi no sɛɛ kɛji akɛ mɔ ko hemɔkɛyeli sɛɛ aaatsɛ? (b) Te wɔɔfee tɛŋŋ wɔye wɔbua mɔ ko koni Kristo ahi etsui mli?
17 Kɛji akɛ hemɔkɛyeli sɛɛ aaatsɛ lɛ, esa akɛ edamɔ mɔ kɛ Yehowa Nyɔŋmɔ teŋ wekukpaa kɛtsɔ Yesu Kristo nɔ lɛ nɔ. Ákɛ adesai ni yeee emuu lɛ, wɔnine baanyɛ ashɛ wɔkɛ Nyɔŋmɔ teŋ wekukpaa ni toiŋjɔlɛ yɔɔ mli nɛɛ nɔ kɛtsɔ e-Bi lɛ pɛ nɔ. (Romabii 5:10) Kaimɔ akɛ Yesu kɛɛ akɛ: “Mɔ ko baaa tsɛ lɛ ŋɔɔ akɛ ja etsɔ minɔ.” Bɔni afee ni aye abua mɛi krokomɛi ni amɛtswa amɛhemɔkɛyeli amɛma shi lɛ, “mɔ ko nyɛŋ shishi kroko ato fe nɔ ni ato momo ni ji Yesu Kristo lɛ.” Mɛni enɛ tsɔɔ?—Yohane 14:6; 1 Korintobii 3:11.
18 Kristo ákɛ shishitoo lɛ nɔ ni atswaa amaa lɛ tsɔɔ nitsɔɔmɔ yɛ gbɛ ni aaaha Biblia kaselɔ lɛ aná suɔmɔ ni mli kwɔ kɛha Yesu, kɛtsɔ E-nitsumɔ akɛ Kpɔ̃lɔ, asafo lɛ Yitso, Osɔfonukpa ni yɔɔ suɔmɔ, kɛ Maŋtsɛ ni yeɔ nɔ lɛ he nilee ni eeená kɛmɔ shi lɛ nɔ. (Daniel 7:13, 14; Mateo 20:28; Kolosebii 1:18-20; Hebribii 4:14-16) Etsɔɔ Yesu ni amɛaafee lɛ mɔ ni yɔɔ diɛŋtsɛ kɛha amɛ ákɛ ehiɔ shi yɛ amɛtsuii amli kwraa. Esa akɛ wɔsɔlemɔ kɛha amɛ lɛ atamɔ fai ni Paulo kpa kɛha Kristofoi ni yɔɔ Efeso lɛ. Eŋma akɛ: “Midrɔɔ minakutsei mihaa . . . tsɛ lɛ, . . . ni atsɔ hemɔkɛyeli nɔ ni Kristo ahi shi yɛ nyɛtsuii amli, ni nyɛshishifai amɔmɔ shi, ni nyɛmamɔ shi shiŋŋ yɛ suɔmɔ mli.”—Efesobii 3:14-17.
19. Mɛni esa akɛ ejɛ suɔmɔ kɛha Kristo ni wɔtswaa yɛ wɔ Biblia kaselɔi atsuii amli lɛ mli aba, shi mɛni esa akɛ atsɔɔ?
19 Kɛji akɛ wɔtswa tsũ lɛ yɛ gbɛ ni tamɔ nɛkɛ nɔ ni suɔmɔ kɛha Kristo te shi yɛ wɔ nikaselɔi lɛ atsuii amli lɛ, yɛ sane naatsɔɔmɔ ni ja naa lɛ, nɔ ni baajɛ mli aba ji suɔmɔ kɛha Yehowa Nyɔŋmɔ ni atswaa amaa shi. Yesu suɔmɔ, ehenumɔ, kɛ musuŋtsɔlɛ lɛ ji Yehowa sui lɛ akpojiemɔ yɛ anɔkwayeli mli. (Mateo 11:28-30; Marko 6:30-34; Yohane 15:13, 14; Kolosebii 1:15; Hebribii 1:3) No hewɔ lɛ, yɛ be mli ni gbɔmɛi baleɔ ni amɛnáa suɔmɔ kɛhaa Yesu lɛ, amɛbaleɔ ni amɛbanáa suɔmɔ kɛhaa Yehowa.a (1 Yohane 4:14, 16, 19) Esa akɛ wɔtsɔɔ Biblia kaselɔi lɛ akɛ Yehowa ji mɔ ni yɔɔ nibii fɛɛ ni Kristo efee kɛha adesai lɛ sɛɛ, ni yɛ enɛ hewɔ lɛ wɔhiɛ Lɛ shidaa, yijiemɔ, kɛ jamɔ he nyɔmɔ akɛ ‘yiwalaheremɔ Nyɔŋmɔ.’—Lala 68:20, 21;Ga Bible Yesaia 12:2-5; Yohane 3:16; 5:19.
20. (a) Te wɔɔfee tɛŋŋ wɔye wɔbua gbɔmɛi koni amɛtsi amɛbɛŋkɛ Nyɔŋmɔ kɛ e-Bi lɛ he kpaakpa? (b) Mɛni abaasusu he yɛ nikasemɔ ni nyiɛ sɛɛ lɛ mli?
20 Ákɛ Nyɔŋmɔ hefatalɔi nitsulɔi lɛ, nyɛhaa wɔyea wɔbuaa gbɔmɛi koni amɛtsi amɛbɛŋkɛ lɛ kɛ e-Bi lɛ, koni wɔye wɔbua amɛ ni amɛná suɔmɔ kɛ hemɔkɛyeli yɛ amɛtsuii amli. Kɛkɛ lɛ Yehowa baafee mɔ ni yɔɔ diɛŋtsɛ kɛha amɛ. (Yohane 7:28) Kɛtsɔ Kristo nɔ lɛ, amɛbaanyɛ amɛto amɛkɛ Nyɔŋmɔ teŋ wekukpaa ni bɛŋkɛ kpaakpa amɛma shi, ni amɛbaasumɔ lɛ ni amɛkɛ amɛhe akpɛtɛ ehe. Amɛkɛ be etoŋ sɔɔmɔ ni amɛkɛhaa yɛ suɔmɔ mli lɛ he, amɛbaaná hemɔkɛyeli akɛ Yehowa shiwoi ni yɔɔ naakpɛɛ lɛ baaba mli yɛ ebe ni sa mli. (Yaafo 3:24-26; Hebribii 11:6) Shi kɛlɛ, yɛ be mli ni wɔyeɔ wɔbuaa mɛi krokomɛi koni amɛná hemɔkɛyeli, hiɛnɔkamɔ, kɛ suɔmɔ lɛ, esa akɛ wɔtswa wɔ diɛŋtsɛ wɔhemɔkɛyeli wɔma shi tamɔ lɛlɛ ko ni yɔɔ hewalɛ waa ni nyɛɔ edamɔɔ ahumii srɔtoi ni tswaa waa lɛ anaa. Abaasusu enɛ he yɛ nikasemɔ ni nyiɛ sɛɛ lɛ mli.
[Shishigbɛ niŋmaa]
a Yelikɛbuamɔ nɔ̃ ni nɔ bɛ ni aaatsɔ nɔ ale Yesu jogbaŋŋ, koni kɛtsɔ enɔ lɛ, ale e-Tsɛ, Yehowa ji, Gbɔmɔ ni Fe Mɔ Fɛɛ Mɔ ni Ehi Shi Pɛŋ wolo lɛ, ni Watchtower Bible and Tract Society of New York, Inc. fee lɛ.
Kɛha Emlitii
◻ Mɛɛ gbɛ wɔfɔɔ kɛ nitsumɔ beni wɔteeɔ gbɔmɛi amiishɛɛ shi yɛ Maŋtsɛyeli shɛɛ sane lɛ he, shi mɛɛ oshara yɔɔ?
◻ Mɛɛ gbɔmɛi srɔto nɛkɛ Yehowa gbalaa amɛ kɛbaa lɛ kɛ e-Bi lɛ ŋɔɔ?
◻ Mɛni nɔ Shiwoo Shikpɔŋ lɛ ni Israel bote nɔ lɛ damɔ, ni mɛni wɔbaanyɛ wɔkase kɛjɛ enɛ mli?
◻ Mɛni wɔtsuɔ yɛ gbɔmɛi ni wɔyeɔ wɔbuaa amɛ koni amɛtsi amɛbɛŋkɛ Yehowa kɛ e-Bi lɛ he kpaakpa lɛ mli?
[Mfoniri ni yɔɔ baafa 10]
Eyɛ mli akɛ wɔkpãa naanɔ wala he hiɛnɔkamɔ yɛ Paradeiso mli lɛ mli wɔhaa gbɔmɛi moŋ, shi wɔyiŋtoo titri ji ni wɔgbala amɛ kɛba Yehowa ŋɔɔ
[Mfonirii ni yɔɔ baafa 13]
Wɔ sɛɛsaramɔi lɛ baanyɛ afee nɔ ni mɔɔ shi jogbaŋŋ kɛji akɛ wɔsaa wɔhe jogbaŋŋ